Tuesday, 23 September 2008

يوميات صائم 4

عزومة ما تمت

لماضة : يلا يامه هنتاخر على الناس كده
ماما نظمية : يابنتي هو المغرب هيطير .. لسه فاضل ساعه بحالها .. وعلى رأي المثل .. استعجل يا مستعجل .. قال مانا مستعجل اهو
عسقول : انا عايز افهم يامه .. انتي دلوقتى بتلبسي الدهب ده كله ليه .. احنا مش رايحين فرح .. دي عزومه والسلام
ماما نظمية : ايش فهمك انت يا واد .. ولا عاوز فكهات تقول دي ماحيلتهاش حاجه .. وعلى رأي المثل .. ادخل على عدوك معرّش .. ولا تدخلش عليه مكرّش
لماضة : متقلقيش احنا هنخرج معرّشين بعُرف الديك الرومي اللي طنط فكهات هتعمله .. وكمان مكرّشين بعد ما ناكل الفخده البتلو كلها
سوووو: عسقوووووووووووول
عسقول :يلا يا اخواننا ده الواد سوووو بينادي .. يلا ننزلو قبل ما ياكل عيل من عيال الشارع
لماضة : انا بقول كده برضه
----
سوووو : انا عايز افهم ياما .. ايه لزوم اللي اشتريتيه ده .. فاكهة وخضار وأتـّا .. في حد يدخل على ناس ومعاه أتـّا برضه !!!؟؟؟
ماما نظمية: ياد اسكت ايه فهمك انت .. وبعدين المثل بيقول .. هات أتـّا .. واقعد اتغدا
سوووو :غدا إيه بس.. احنا فى رمضان.. المفروض المثل يبقى: هات أتا و خيار.. و اقعد الحق الإفطار .. طب بما انك فكيتي الكيس وجايبه نص كيلو أتـّا .. وطلع أتـّايتين بحالهم .. شوفيلنا قد عششه جنيه ولا حاجه ناخدلنا تاكس بدل ماحنا واقفين في الشارع
عسقول : هي الدنيا زحمه ليه؟؟
لماضه : واضح ان الناس كلها معزومه .. وباينهم معزومين عند طنط فكهات برضه
سوووو : تااااااااااكس .. القللي يا اسطى
سواق التاكسي : قللك ايه بس .. خدلك كام بلحاية (يرمي البلح ويجري )
لماضة : واضح اننا هنفطر في الشارع وصعبنا على سواق التاكسي
عسقول : بس والله فيه الخير انه شافنا بكام بلحايه .. طب مش كنا إديناله أتاية
سوو : وكان هيبقى فيه الخير اكتر لو وصّلنا
ماما نظمية: هو اداكم بلح رطب ولا عجوه ؟؟
يظهر تاكس تاني
سوووو : القللي يا اسطى؟؟
سواق التاكسي : لازم القللي يعني؟؟
سوووو : اه والله هو لازم القللي بصراحه
سواق التاكسي: يعني شارع جامعة الدول ماينفعش معاكم؟
سوووو : جامعة الدول فى رمضان يا قليل الأدب ..  احنا رايحين لناس في القللي
سواق التاكسي: طب ماهو شارع جامعة الدول في ناس برضه .. و ناس حلوة .. حلوة خالص .. حلوة جدا .. شاور عقلك كده
سوووو : بقولك ايه يالماضه .. هاتي البلح اللي معاكي
لماضه: هو انت هتبعزق من أولها .. خد ياسيدي البلح
سوووو : بقولك يا اسطى .. خد البلح ده ابقى افطر بيه و ادعى ربنا يتوب عليك .. و هابقى أشوفك فى العيد بقى هناك
سواق التاكسي :قشطة يا ريس .. و ياسيدي الف شكر على البلح (يمشي التاكس)
عسقول: هو انت اديتلو البلح ليه ياسوووو؟؟
سوووو : اصلو مش هيلحق يروح شارع جامعة الدول
لماضة : وهو احنا اللي هنلحق نروح القللي؟؟
سوووو : قولي لامك .. ادينا اتأخرنا قد نص ساعه في شرا الخضار والأتـّا
ماما نظمية: يابني ده المغرب فاضل عليه نص ساعه بحالها .. وعلى رأي المثل .. ساعة الحظ ماتتعوضش
سوووو : ياما هو احنا رايحين نلعب بولة ترنيب .. احنا رايحين نفطر عند ناس .. تقومي تقولي حظ
لماضه: هو انا عارفه حظنا .. حظنا مهبب .. و دايما بختى مايل .. إهئ إهئ
عسقول:إيه يا بنتى .. هو احنا رايحين نخطب لك .. إحنا رايحين ناكل ..  بقولكم ايه .. احنا مش هنلاقي حاجه في الشارع ده .. تعالو نطلع عالشارع الجديد يمكن نلاقي أي حاجه
واحنا ماشيين ولماضه بتتكلم مع ماما نظمية وسوووو بيتكلم مع عسقول
ماما نظمية: هو الشارع الجديد بِعِد ولا انا مش باخرج كتير
لماضه: اه هو الشارع مش بيخرج كتير
عسقول: الا هم سمّوه الشارع الجديد ليه ياسوووو مع انه في مكانه من زمان
سوووو : نفس النظريه بتاعة (مستشفى القصر العيني الجديد) اللي محطوطه يافطته بقالها عشر سنين
شويه ويظهر واحد يوزع علينا بلح تاني
الراجل : اتفضلوا يا جماعه .. المغرب خلاص هيأذن واحنا بنفطر صائم .. تقبل الله منا ومنكم
عسقول : جزاك الله خير .. شكلنا هنحتاجه فعلا
يوزع الراجل على كل واحد مننا بلحايه واحده بس
سوووو : طب ما تجيب بلحه كمان ياعم الشيخ
الراجل: والله هم قالولنا الثواب عالفطار بس مش عالشبع
ماما نظمية: طب الف شكر يابني
لماضة: طب يلا بينا عشان نلحق نروح مشوارنا
الراجل : مشوار ايه ورايحين على فين .. لازم اشوفكم وانتو بتفطرو بيه لما المغرب يأذن عشان اضمن اني اخدت الثواب
عسقول : خلاص يابني .. احنا ممكن نحلفلك اننا هنفطر بيه
لماضة : انا بقول نكتبلو وصل أمانة .. عشان لو مافطرناش بالبلح بتاعه .. ياخد ثواب الافطار من رصيدنا يوم القيامه .. وطبعا هيمسكوه ساعتها  لان الوصل من غير رصيد
سوووو : خبر ايه ياجدع انت .. انت هتدينا البلح وتذلنا عليه ولا ايه؟؟
الراجل: لا ياسيدي .. ولا هذلكم ولا بتاع .. هاتو البلح
وبياخد الراجل البلح مننا ويمشي
----
ماما نظمية: آدينا جينا الشارع الجديد وواقفين ومافيش تاكس معبرنا
عسقول: طب بقولكم ايه .. ماتيجو نركب اي اتوبيس وخلاص
لماضه: لا مش وقت اتوبيسات وزحمه خالص
سوووو : طب عندك حل تاني؟؟
ماما نظمية: اللي تشوفوه يا ولاد .. وعلى رأي المثل .. ان كبر ابنك خاويه
سوووو : هو انتي ناويه تخلفي تاني ولا ايه ياما؟؟
لماضه: هتخلف ازاي وابوك مش معانا في اليوميات
عسقول: طب ماتيجي نطلعه في الحلقه الجايه .. واهو نقفل بيها اليوميات بتاعة رمضان .. بس هانسميه إيه ؟؟ عتريس ؟؟ شلقامى ؟؟ ريكى مارتن ؟؟
سوووو: اتوبيس هناك اهو
لماضه: طب اجري وقفه عشان امك تعرف تركب
سوووو : اجري انت ياعسقول .. انا طخين ومش هعرف اجري
بيجري عسقول ويقف قدام الاتوبيس وبيروح موقفه .. وبتروح لماضه وماما نظمية عشان يركبو من قدام .. ولسه عسقول وسوووو داخلين .. راح قافل الباب
لماضه: في ايه ياسطى ماتفتحلهم الباب
سواق الاتوبيس: ممنوع
ماما نظمية: ممنوع ايه بس
السواق: ممنوع ان حد يركب من قدام
لماضة: طب ماحنا ركبنا اهو خلاص
السواق: (راح مبطل العربيه وقايم وبيزعقلنا) يعني هو انا اكمني عملت ثواب وركبتكم عشان الست الكبيره .. تقومو تستغلو طيبتي وسذاجتي
ماما نظمية: طيبة ايه وسذاجة ايه .. أما انت زي المثل اللي بيقول الحقوني يا أخوانا.. قاموا لحقوك يا اخونا
ركب سوووو وعسقول من الباب الوراني .. والناس اللي في الاتوبيس هدّت السواق وفعلا اتحرك الاتوبيس

عسقول : احسن حاجه ان امك والبت لماضه قعدو واترحمو من الوقفه
سوووو: لا ماهو الشعب المصري رجاله طول عمرهم
عسقول : اه والله .. دايما الرجاله هم اللي بيقومو ومافيش ولا ست بتقوم مع اننا بنكون صايمين زيهم
سوووو: تخيل بقى انا شفت ست بتقوم
عسقول : لا ياراجل .. ازاي؟؟؟
سوووو: قامت ونزلت من الاتوبيس كمان
عسقول : يالهوي عالنصاحه .. امال كنت عايزها تفضل في الاتوبيس على طول .. تلاقيها وصلت مشوارها ونزلت
سوووو: المهم انها قامت
عسقول : وطبعا انت قعدت مكانها
عسقول: لا طبعا .. كانت فيه بنت أمورة واقفه قمت مخليها هي اللي تقعد يمكن تعبرنى .. لكن ولا الهوا نفضتلى تنفيضة و لا السجادة اللى فى إيد شغالة مفترية
ماما نظمية: ماتفتحي الشباك يا لماضه بدل الكتمه اللي احنا فيها دي خليه يدخل هوا ربنا
لماضه: ( بعد ما حاولت وماعرفتش) والله ياما شكلو محطوط ديكور ومش بيتفتح وملكيش نصيب في شوية الهوا
ماما نظمية: طب اسألي اخواتك فاضل كتير ولا لأ
لماضه: فاضل كتير ياعسقول؟
عسقول: (بيسأل الكمساري) فاضل كتير عالقللي يا اسطى؟؟
الكمساري: قللي ايه يا استاذ .. الاتوبيس ده مش رايح القللي !!
عسقول: امال رايح فين ؟؟
الكمساري : احنا داخلين شارع جامعة الدول ومنها هنطلع على ميدان لبنان
لماضه: ميدان لبنان !!!!!
ماما نظمية: هي لبنان من كتر الضرب اللي فيها .. جات وعملت ميدان هنا في مصر؟؟
عسقول: لبنان ايه بس؟؟
لماضة: هو مين اللي قالنا نركب الاتوبيس ده؟؟
عسقول: سوووو ... اللى غوانا ومشانا في الطريق ده .. ياما قلتلكوا ونصحتكوا بلاش الطريق ده اخرته وحشة
سوووو: ماهو انتو قلتو عايزين أي اتوبيس وخلاص
الكمساري: انتو ممكن تنزلو في اول جامعة الدول وتاخدو حاجه رايحه على هناك
----
نزلنا وخلاص المغرب هيأذن علينا
لماضه: اشوف فيك يوم يا سوووو
عسقول: يوم واحد بس .. اشوف فيك سنه كبيسه بحالها
ماما نظمية: وعامللي واد حِرك ولافف وبتروح خيم رمضانيه .. على رأي المثل .. نهيتك ما انتهيت .. وسقيتك ما ارتويت
سوووو : اموت واعرف انتي بتجيبي الامثال دي منين ياما .. وبعدين ماهو لو ماكنتيش اتأخرتي في اللبس وشرا الخضار والأتـّا .. كان زماننا هناك وبنفطر مع الناس دلوقتي
الله اكبر الله اكبر
آدان المغرب
عسقول: اهو المغرب ادن اهو واحنا في الشارع لوحدنا .. من غير ساتر حلل ولا قلل
لماضه: استنو كده .. في تاكسي جاي علينا
قرب مننا نفس التاكسي اللي ادينالو البلح .. وأول ما قرب مننا رايح واقف

سواق التاكسي : مش قلتلكم تروحو شارع جامعة الدول احسن
من مائدة الرحمن نقلها لكم

45 comments:

صاحب المضيفة said...

أول تعليق وراجع

صاحب المضيفة said...

هي دي يوميات صائم ؟؟

دي تنفع يوميات مفتريين


مستغلين


اي حاجه غير صايمين دي خالص




ربنا يستر ويكملوا الشهر على خير


عيد سعيد

مهندس مصري said...

ههههههه
آخرتها جامعة الدول
لا حول و لا قوة الا بالله
ثم ايه كمية الأمثال دي دي نصها مضروب و اونطة

يالا مش مهم
المهم فطرتوا ايه ؟ بلح و قثة و لا ايه ؟

ابن حـجـر الـعـسـقـلانـى said...

بصراحة ...التدوينة دى و اللى فاتت اتضرب فيها حبة أمثال إنما إيه ... لووووز

بس بصراحة الأمثال شكلها مضروب فى الخلاط .. مش مضروب للعبرة و العظة

و شكلنا كدة فطرنا فى شارع جامعة الدول ... بس مافطرناش على أكل .. فطرنا على حاجات تانية

و بجد .. مية مية يا لماضة انت و سوووو

لماضة said...

ابو العساقيل

احنا فطرنا الناس كلها معانا كده
:))
انت عارف مصدر الامثال طبعا
بيت الحكمه
ماما نطمية
على فكره انا لا اعرف جامع الدول ولا ميدان لبنان ولا التحرير ولا رمسيس
ولا اعرفكوا
هههههه
بجد تسلم ايدك انت وسوو انا قلت اذيع على طول

طالب ثانوى said...

ههههههههة اليوميات دى جميلة جدا يارب رمضان يفضل على طول علشان تعملولنا اليوميات دة على طول واية الا مثال الجامدة دى هى وماما نظمية بجديوميات جميلة جدا

وميض ابتسامة said...

والله الحكاية دى حصلت لنا برضه فى عزومة من كام سنة ..بس كنت فى عربيتى يعنى مفيش حوجة لتاكسى أو اوتوبيس وبالرغم من كدة كانت الطرق مقفولة قافلة سوداء فقررت اتفلسف واطرق طريق جديد فما كان الا ان تهت ووطبعا الاولاد قعدوا يبصوا لبعض بخبث على ابوهم التائه وزوجتى اكتفت بالصمت الرهيب وانا سلمت امرى لله بعد ما المدفع ضرب والاذان اذن ..ولكنى واصلت الكفاح حتى وصلنا بعد الافطار لمصر الجديدة بربع ساعة ..ونزلنا جرى وطلعنا للعزومة فوجدت الناس منتظرة فى قلق وصولنا ..وكانت ليلة لم تتكرر ..فأنا انزل قبل الميعاد بساعتين لاى عزومة على الاقل ..خبرة بقى!!! والسلام

blue-wave said...

ههههههههههههههههههههههههههههههههههههههههههههههههههههههههههههههههههههههههههههههههههههههه
اعمل فيكم ايه بس؟
انا لو بموت من الديق البويتات دى بتفطسنى من الضحك
يخرب بيت عقولكو بجد
وايه حكاية الأتا دى كمان؟؟
ول امثال ماما نظيمه
تحفه
وموضوع البلح والتاكسى دا لينا فيه كلام
دى حقوق ناس(وش بيغمز)
بجد تسلم ايديكو ورجليكوا ودماغكوا

رئيس جمهوريه نفسى said...

كده يا سوووو عايز تروح جامعة الدول العربية ولوحدك يا اخى راعى العيش والملح اللى بينا واستنى لما اجى القاهرة نروح مع بعض
الحمد للة التدوينة دى فكت شوية الضيق اللى كان الواحد فيهم

لماضه
هى ماما نظيفة مش ناوية تنزل كتابها الرائع
الموسوعة الذهبية فى الامثال المصرية

Appyplanet said...

قاموس امثال متحرك ماما لظلظ دي ههههههه
وايه الامثال اللى ملهاش علاقه ببعض دي ههههههه
انما بلاش جامعه الدول عيب عليكوا
بس الناس اللى بتدي البلح مش بتاخده يا جماعه بجد ولا دي موضه جديده هههه
ابقوا سموا والدكم
الدياسطي هههههههه حلو الاسم ده

مـجـنـووون said...

وبعدين متزعليش أنتي مش وخده بالك أن ماما عملت حسبها علي كده من أول المشوار لما أخدت الفاكه والأتا ههههههه

تقبلي مروري
مجنووون

مروة كمال said...

بسم الله ما شاء الله

كانت فين المدونة الرائعة دي من زمان

سعيدة جدا بأن تشرفت بزيارة مدونتك الجميلة

وإن شاء الله متابعةعلى طول


وفقك الله وإيانا

جمعاوي(لا للنميمة) said...

السلام عليكم
هههههههههههههه
ايه الكلام الغريب اللى بيتقال ده

اليوميات دى لازم تنزل فى كتاب

الواحد مش قادر يمسك نفسه من الضحك

بجد شغل عالى يلا سلام

DR.roro said...

انتوا ايه اساسا اللي خرجكم من البيت انتوا اصلا ملكوش خروج وأنا هقول لأبوكم لم عيالك متخرجهمش

بقي سيبين الراجل لوحده ورايحين جامعة الدول العربية طيب خدوه معاكم ينبكم فيه ثواب بس ساعتها هيبص لماما نظيمة ويقلها انت طالق بالتلاتة وبلا رجعة أنا عايز أتمتع بالكام يومين اللي فضلين من عمري بدل ما أنتي قرفاني بالأمثال بتاعتك دي


وانتوا طبعا هتقولوا لأبوكم لا والنبي يابابا أوعي تطلق أمي حيقلكم يلا أنتوا كمان أنا متبري منكم

وساعتها بقي ابقوا ارفعوا عليه قضيت حجر وقولوا ابونا بيروح جامعة الدول العربية هههههه


ايه ده مش احنا في يوميات صائم ايه
اللي جبنا في المحاكم خلاص خلاص متخدوش ابوكم معاكم في حتة بلا بهدلة محاكم بقي

nona said...

باة فى حد يروح يفطر و ياخد معها نص كيلو قتة طب خلية كيلو دة حتى احنا فى رمضان
اليوميات جميلة و نصيحة ما تمشيش وراء كلام عسقول و سووو تانى امشى وراء كلام ماما نظيمة بس خبيرة الامثال الشعبية
فى انتظار ظهور بابا عسقول و سووو

3omda said...

انا بقول نكتبلو وصل أمانة .. عشان لو مافطرناش بالبلح بتاعه .. ياخد ثواب الافطار من رصيدنا يوم القيامه .. وطبعا هيمسكوه ساعتها لان الوصل من غير رصيد

جامده أوي دي

dr.mohamed shamndy said...

انا مش عارف بتجيبي الكلام ده منين بس باستنى البوست كل مرة علشان اضحك

مصري بالغربة said...

يوميات جميلة جدا

يا ريت تكملوا

she said...

انتى سكر
ولمضة
وعليكى سرد يجنن
ينفع تألفى سيتكوم على فكرة :)
رمضان كريم :)

انا ودماغي said...

ههههههههههههههه
بجد فطست من الضحك
و بعديت إيه الأمثال اللى عمالة تتقال دى.....لأ المرة دى زوردتها أوى بس شكلكم كلتوا الأتة و الله فى الآخر

S-G-S said...

بجد بوست رهيب جميل اوي وعجبني جدا
وعلى رأي المثل
اكفي القدرة على فمها تطلع البت لامها
ولو انه مش فى محله بس اهو اللي فاكره من امثال
حقيقي خلتيني اقرا البوست من اول حرف فيه لاخر حرف احيكي على ابداعك
سمسم

Manamino said...

عجبتني قوي حكاية البلح ابو وصل امانة ده
هههههههههههههههههههه
علي فكرة فيه ناس كتير كدة فعلا
بتتعامل مع ربنا بالشيكات وايصالات الامانة مش بالنيات
بس بجد تحياتي علي المدونة الرائعة

Eman Eltaher said...

هههههههههههههههههه
لووووووووووووووول
انا ضحكت ضحك

والله بجد انتوا بتكتبوا حاجات روعة
و خفة دم مش معقولة

انا فطست م الضحك
ماشاء الله عليكم

أنا مقريتش الموضوع ده بس
من كتر ما عجبتنى اوى قريت لآخر الصفحة

و كمان ضفت لينك المدونة عندى
عشان دى ان شاء الله مش هتكون آخر زيارة

تقبلى مرورى و تحياتى ليكى

رمضان كريم و بألف خير

جنّي said...

السلام عليكم


تقبال الله منا ومنكم الصيام والقيام ايمانا واحتسابا لوجه الله الكريم

وعفا الله عنا وعنكم في ليلة القدر

mido said...

لماضة الدكتورة المطرقعة
الدكتورات المطرقعات فى كليات الطب قليليين أوى
ربنا يزيدهم
:) :)

ياسر حسين said...

رمضان قرب يخلص
ومعملتيش غير اربع يوميات بس
على فكرة انتي كسلانة
عوضيها لنا في يوميات طالب طب واتوصي
:)))

خالص تحياتي

ojg said...

هههههههههههههههههههههههه
ههههههههههههههههههههههه
ههههههههههههههههههههه
فظيع البوست
مش ممكن
ماما نظمية دي كارثة
أمثالها والافيهات اللي بتعملها
بجد بجد
خرافة
ام مصرية بجد
والله شامة فيها ريحة سوووو
قلبي حاسس ان هو اللي كاتبها

وجامد قوي موضوع البلح
وخاصة اللي وقفهم وأصر يشوفهم وهما بيفطروا بيه
بتحصل بتحصل
:))

وأجمد حاجة القفلة
انتوا بجد تحفة
تسلم ايديكي يا لماضة

بس رمضان هيخلص
:((
مافيش يوميات في العيد؟

اسكندراني اوي said...

ممكن اسأل هو ايه اللي مخليه الناس كلها تتبرى من شارع جامعه الدول العربيه ؟؟؟؟
سؤال بريئ ما بيفطرش

enjy said...

يا نهار اسوح تحفة تحفة دمك خفيف جدا فظيعة بجد.......بس ماما نظمية دى عليها شوية امثال فى الجون بصراحة

عايش ولكن said...

هههههه اخر لماضه والله
وبعدين ايه كل الامثال دى
يلا عموما بالهنا والشفا
دمتى بكل الود
علاء

Beram ElMasry said...

لبنتى . إيمان الطاهر
شكرا جزيلا على التعليق
تعرفى يا اخر لماضة لو سيبتى ماما نظيمة تاخد معاها بتوجاز كانت حلت المشكلة بس انت اخر لماضة
ارجو ان لاتحرمى مدونتى الزيارة والتعليق
عيد سعيد وكل سنة وانت والاهل بخير وسلامة

DR.roro said...

انتي هتردي علي التعليقات دي كلها ازاي مش كفاية التقارير هههههههههه ربنا يعينك علي الاتنين ههههههه

يا مراكبي said...

هههه أحسن

كان قلبي حاسس إن آخرتها موائد الرحمن برضه

فيه حد في الدنيا ينزل قبل الإفطار بساعة؟

لازم تنزلي من الظهر على الأقل

rainbow said...

احلى مرمر

خفة الدم دى مش ممكن بجد ضحكت من قلبى

ربنا يسعدك يا رب

كل سنة وانتى طيبة حبيبتى

دمتى المض من اللماضة

بحبك هه

هدى

حسام وريمان فى هاكونا مطاطا said...

هههههههههههههه

ربنا يكون فى عونهم


كانوا يروحوا اى مائده من موائد الرحمن دى وخلاص ويسيبوهم من فتكات والعزومه

هههههههههههه

بوست رائع بجد

(احمد سكر ) said...

هههههههه

والله عثل

الاول كل سنه وانتى طيبه

ارووح كمل حكاااوى رمضان بتاعتكم

كل سنه وانتى طيبه يامروى

احمد

صدى الصمت said...

يخرب بيت عقلك كل دة حصلكم؟ ربنا يصبركم ؟ وكل عام وانتى بخير

كيارا said...

ههههههههههههههههه

بجد ثكر يالماضه

---------
كل سنه وانتي طيييييبه

وعيد سعيد ياقمر

زهرة الجنة (زهرة سابقا) said...

كل سنة وانتي طيبة يا لماضة
وعيد سعيد عليكي
وعلي كل أسرتك

أحمــــد said...

بسم الله الرحمن الرحيم
كل عام وأنت بخير
وكل زائرى مدونتك
وتقبل الله الصيام
والقيام
والزكاة
وجعله عيد يمن وبركة عليكم
وأدعوك لزيارة مدونتى " أمــــى "

رئيس جمهوريه نفسى said...

كل سنة وانتى طيبه يا دكتورة وعسى اللة ان يتقبل منا ومنكم ومن سائر المسلمين صيامنا وقيامنا وصالح اعمالنا
عيد سعيد عليكى

romansy said...

كل سنه وانتى طيبه
عيد سعيد عليكى وعلى المسلمين جميعا
باليمن والخير والبركات

نهر الحب said...

اللهم زد هـــــــذا الوجه نورا
واجعله دائـما مأجورا
وبلغه العيد مسرورا
امين يارب العالمين
عيد سعيد

Dr.Soha Adel said...

هههههههههههه
جميله اوي عندك حس كوميدي لذيذ

صمت المشاعر said...

ههههههههههههههههه

بجد مت من الضحك بوست دمه خفيف اوووووووووووي