Tuesday, 30 September 2008

يوميات فاطر 5


العيد رنجة
 بياع الرنجة
بابا بظبوطي : انا مش فاهم لزومها ايه الرحلة في العيد دي؟؟
لماضة : انا اللي مش فاهمه لزومها ايه الرنجه اللي جايباها معانا دي يامه  بصراحه ريحتنا بقت على كل لسان
ماما نظمية : يابنتي هو العيد عندنا رنجه .. ومعروف كده من أزيل القدم
بابا بظبوطي: أزيل القدم .. اسمها قديم الازل يا وليه .. أزيل القدم دة مستحضر تجميل زى "أزيل العرق" كدة .. هفضل اعلّم فيكي لحاد امتى لازم تعرفي ان العيد مش بس برنجته
لماضه : وبعدين بقى يا جماعه .. اهدو بقى ده احنا في عيد .. يا اما اسيبكم واروح مع عسقول وسوووو
بابا بظبوطي: العيال دي راحت فين وسابوني .. ده انا حتى اول مره اطلع معاهم في اليوميّات
وفي البحر كان عسقول وسوووو بيبلبطو في الميه
عسقول: يادين النبي .. شايف ياد ياسوووو طقم البنات اللي واخدين مركب في البحر؟؟ طقم بنات ماركة فلنكات السكة الحديد
سوووو: انا شايف البحر وطقم المايوه ابو قطعه واحده اللى احنا لابسينه
عسقول: ماهو عشان انت نازل البحر من غير النضاره .. خساره انك مش شايف المنظر ده
سوووو: طب قولي .. هو طقم البنات دول .. في انهي مرحلة عمريه بالظبط ؟
عسقول: انهي مرحلة عمرية ازاي ؟
سوووو: يعني تقريبا عندهم كام سنه !؟
عسقول: هو احنا هانعمل لهم بحث موجتماعى .. ودي هتفرق في ايه بقى ؟
سوووو: طبعا تفرق .. كل مرحلة عمريه وليها طريقة معاكسه
عسقول: مش فاهم !!
سوووو: يعني لو بنات في سن خماشر ستاشر ولغاية تماناشر سنه .. بيبقو عايزين الواد المطقطق المتتامر ..  حاطط جيل عالشعر .. عنده شعر في الصدر .. سماعات ام بي ثري في الودان .. السكه دي يعني
عسقول: الصلاه عالنبي ياسوووو يا مظبطني .. طب ولو سنهم اكبر من كده .. في العشرينات مثلا
سوووو: السن ده بنقسمو احنا بتوع المعاكسات لمرحلتين .. سن الضياع .. وسن الخطر
عسقول: طب وايه الفرق مابين ده وده ؟؟
سوووو : سن الضياع حاجه كده زي مسلسل سنوات الضياع تقريبا .. اللي تلاقيهم بيلعبوا في التسعتاشر ولغاية تلاته وعشرين .. دول بقى لو قلتلهم أي كلمة بتلاقيهم جايين معاك .. ضياع ضياع يعني وتعيش بقى ولا مهند في زمانه
عسقول: طب وسن الخطر
سوووو: سن الخطر اللي فوق تلاته وعشرين سنه .. واُطلقت عليهم هذه التسميه لأنك بمجرد ما تيجي تعاكس البنت من دول .. تقولك صلح غلطتك واتجوزني .. وده اكبر خطر يا عسعس
عسقول : الله عليك يا سوو طول عمري كان عندي استعداد للانحراف بس مكنتش لاقي اللى يوجهني
وعلى الشط حيث لماضه وبابا بظبوطي وماما نظمية .. والرنجه
ماما نظميه : بت يالماضه .. سيبك من البتاع اللي بتلعبيه مع ابوكي ده وتعالي ساعديني نجهز الغدا
بابا بظبوطي: شايفه امك يالماضه .. مش عارفه الشطرنج وبتقولك بتاع .. مش بذمتك كان لي حق اهرب من أول اليوميات وما اظهرش غير دلوقتي
لماضه: معلش يابا .. هي بس تلاقيها بتنكشك عشان واحشها ونفسها تلعب صلح معاها
بابا بظبوطي : متجيبليش سيرة اللعبة دي هي سبب نكستي 25 سنه ونتج عنها 3 خساير صغيره مفهوم طبعا
ماما نظمية:  ايوه واعتزلتها وادمنت لعبة الشطارنج ..لا ياختي ولا واحشني ولا بتاع .. وعلى رأي المثل .. ايش ياخد الريح مالبلاط
بابا بظبوطي: شايفه .. اهي بتتريق علي اكمني اقرع وبتقول علي اني بلاط
لماضه: لا طبعا يابا .. انت ريح قصدي نسمة .. بس صحيح .. هو ليه العيلة بتاعتنا كلها واخدة القراع هواية ؟؟
ماما نظمية: بقولك ايه يابت .. قومي اندهي على نييييسمه قصدي قومي اندهي على اخواتك عشان نتغدى مع بعض
لماضة: طب اخلص دور الشطرنج ده واروحلهم
ماما نظمية: يابت اللعب مش هايطير .. انما الاكل ممكن يحمض
بابا بظبوطي: وهو لسه هيحمض .. الرنجه اللي انتي جايباها اصلا حمضانه من وهي سمك في البحر
ماما نظمية: هو كل اللي جاي عليكم الرنجه الرنجه الرنجه .. ماحنا بقالنا تلاتين يوم بناكل محمر ومشمر .. نريح معدتنا في العيد وناكل حاجه حرشا
لماضه: بس مش رنجه يعني يامه .. اعملي بساره .. فول نابت .. سندوتشات جبنه بالقوطه .. أي حاجه خفيفه وفي نفس الوقت مالهاش اعراض جانبيه
ماما نظمية: لا ياعين امك .. احنا مادخّلناكيش طب عشان تتفزلكي علينا وتقوليلنا ناكل ايه وماناكلش ايه
بابا بظبوطي: قومي بينا يالماضه نتمشى .. عشان دكتور الحساسيه واصفلي ابعد عن أي ريحه .. واحنا ريحتنا فاحت
مام نظمية: (بدلال ودلع) يعني هو انا مقوّمه البت عشان نقعد لوحدينا شويه .. تقوم تقول اروح اتمشى معاها
لماضه: آآآآآآآآآآه .. بتسربيني يعني .. ماشي يامه .. هاروح اجبلكم كيلو لب وسوداني من اثيوبيا
بابا بظبوطي: (وهو بيستغيث) استني يابت .. أنا فى عرضك يا "مليس زيناوي"
لماضه: مين الباشمهندس اللى انت قلت اسمه دة يا بابا ؟؟
بابا بظبوظى: دة رئيس وزراء أثيوبيا .. إلهى ربنا يكرمه و يدينى فيزا و اهج على هناك
ماما نظمية: (وهي ماسكه في بابا بظبوطي ومش مخلياه يعرف يتحرك) روحي انتي يا لماضه .. روحي وسيبهولي .. ومِنّي ليه .. وفارس لفارس .. والبحر من أمامه .. و الرنجة من خلفه
في البحر تاني
عسقول: بالك ياسوووو .. انا على قد مانا فرحان ان ابوك جه معانا الرحله دي .. على قد مانا مقلق .. حاسس انها هتقلب بمصيبه وابوك هيقفش علينا ويختفي ويسيبنا في اليوميات دي لوحدنا مالناش اب
سوووو: ماهي امك بتستعبط برضه ياعسقول .. بقى حد يصدق اننا نطلع رحلة في العيد .. ونأجر عربية بيجو سبعه راكب من بابها .. وهي تجيب معاها رنجه
عسقول: انا مش قصدي عالرنجه .. ولعلمك لولا الرنجه دي كان زماننا ميتين
سوووو: ازاي؟
عسقول: اصل انا حسيت ان السواق كان مقضيها سهره حمره وعينيه كانت مسطّره من كتر المخدرات .. وريحة الرنجه خلته فصل وفاق وعرف يسوق العربيه
سوووو: سيبك انت بس من الرنجه ومن البيجو واستمتع بجمال الطبيعه .. طب والله العظيم راس البر دي تحفه
عسقول: راس البر ايه .. احنا في راس سدر ياسوووو
سوووو: ياخي النضاره فارقه معايا برضه .. راس البر راس سدر راس التين اهي كلها روس يابو سريع .. بقولك ايه .. انا هاطلع من البحر واروح اشوفلي أي حاجه تتاكل
عسقول: أنا كمان معاك .. حاكم أنا كلاب بطنى هوهوت .. ايه ده .. مش البت لماضه اللي بتتمشى عالشط دي؟؟
سوووو: والله هو انا شايف الشط .. بس مش شايف أي حاجه تانيه ما انت عارف لماضه لابس النضاره مش لابسها برضه مش بشوفها
عسقول: طب انا هاطلع معاك .. احسن حد يعاكسها ولا حاجه
سوو : يعاكس مين يابني ده انا اخاف هي اللى تعاكس حد ده لو حد عاكسها ممكن تشرحه بالمشرط اللى حطاه تحت لسانها وتذاكر عليه كمان
عالشط .. حيث الرنجة والرومانسية
ماما نظمية: (بدلع) فاكر يا بظبظ
بابا بظبوطي: (بقرف) هفتكر ايه ولا ايه .. الواحد عمل بلاوي كتير
ماما نظمية: اخص عليك يا بظبوطي .. بقى بتسمّي جوازك مني بلوه
بابا بظبوطي: ان الله غفور رحيم .. اغفريلي غلطتي وارحميني واعتقيني لوجه الله
ماما نظمية: ليه كده بس يابظبظ
بابا بظبوطي: بذمتك في حد يدلع حد يقولو بظبظ
ماما نظمية : وبذمتك انت في حد يبقى اسمه بظبوطي .. ده عيالك هيتجننو يا جدع .. خصوصا الواد عسقول.. من اول ما دخل المدرسه والعيال بيتريقو على اسمه .. عسقول البظبوطي راح .. عسقول البظبوطي جه .. عسقول البظبوطي بيعاكس البنت دي وبيبظبظلها
وعلى الشط بعد ماطلع عسقول وسوووو ورايحين للماضه
واحد بيعاكس لماضه : ايه الحلاوة دي بسريايه ماشيه على الشط؟
لماضه ( في سرها يافرحتك ياما بنتك ببتعاكس على اخر الزمن ): افندم .. انت بتكلمني انا ؟؟
واحد بيعاكس لماضه : ايوه طبعا .. ده انا قبل كلامي حتى مكتوب (واحد بيعاكس لماضه)
لماضه : وكمان تعرف اسمي؟؟
واحد بيعاكس لماضه : الجميل اللي زيك .. لازم يكون لمض
بيسمع عسقول وسوووو كلام اللي بيعاكس لماضه وبيروحوله
عسقول: بقولك ايه يابو الكباتن .. اتكل على الله
واحد بيعاكس لماضه : وانت مالك بقى ان شاء الله .. وبعدين هو انا عملت حاجه للآنسه .. طب ده انا حتى كنت عايز اتعرف
سووو : وكمان بتقول انسه كده حاف الله الله عيشنا وشوفنا
لماضه:  اسمها مزمازيل يا حضرت .. وتتعرف بأمارة ايه ان شاء الله
واحد بيعاكس لماضه : بأمارة الانسانيه
سوووو: انت فاكرها مؤسسة رعاية ايتام .. اتكل على الله يا كابتن بدل ما نعلمك الأدب
واحد بيعاكس لماضه : انتو هتعلموني الادب .. طب وديني لافرج عليكم راس سدر والأنحاء المجاورة (وبيطلع يجري)
عسقول: قال عايز يتعرف قال سايب بنات الشط كله والطقم المعتبر اللى في الميه وجي يبصلك انتي واد معندوش نظر باين عليه لابس قعر كبايه ونسيها في البيت برضه
لماضه : وفيها ايه بس.. واساسا الواد كان داخل بمنتهى الادب والشياكه
عسقول: ايوه ياختي .. وحاطط على شعره جيل وفرحان بالكام شعرايه اللي على صدره .. شويه شويه تلاقيه بيغيلك أجمل حاجه شدتني ليكي هو ده
سوووو: آآآآه هو ده
لماضه: بلا هو ده بلا هي دي .. منكم لله عيال تسد النفس .. يلا بينا نرح نتغدى عشان امكم مع ابوكم لوحدهم
عسقول: امك مع ابوكي لوحدهم
سوووو: استغفر الله العظيم
بابا بظبوطي : نظمية .. اهمدي احسن اسيب الحلقه من قبل ماتخلص واحرمكم من التعليقات
ماما نظمية : ياخويا انت الخسران .. وبعدين هو الواحده مننا لما تعبر عن مشاعيرها يبقى حرام
بابا بظبوطي : لما تكون مشاعير بالشكل ده .. يبقى ماتعبرش احسن سرحيها وضفريها ولمي حشراتك من هنا
ماما نظمية : اهو انت كده دايما يابظبظ .. وعلى رأي المثل .. بره وجوه فرشتلك .. والفرش كان مستورد من دمياط
بابا بظبوطي: دمياط .. خسارة الربع جنيه اللى دفعته فيكي .. طب بس عشان العيال جم
سوووو: انا واقع من الجوع
عسقول : وانا كمان .. طلعي الاكل يامه بسرعه
بابا بظبوطي: يا عيال اهبطوا .. هو انتو هتاكلوا في آخر زادكوا
لماضه : عارف يابا .. اول ماروحت انده العيال .. لقيت في ناس كتير جايبين حلل محشي ومبهدلين الدنيا
عسقول: طب ماقولتيش ليه بس يالماضه كنا اتغدينا معاهم ودبسناهم في الرنجه
سوووو:  او كنا لحقنالنا صباعين تلاته ولا حاجه
بابا بظبوطي : يالهوي .. انا كنت سايبكم ذوق ومش بتاكلو أي حاجه .. عملتي ايه في العيال يا نظمية
ماما نظمية : ياخويا ولا عملت ولا نيله .. عيالك انطلقوا للشارع وعرفوا ان الله حق
وبمجرد ما ابتدينا ناكل ولسه هنطلع الحله اللي فيها الرنجه والبصل والذي منه .. لقينا الواد اللي كان بيعاكس لماضه جاي من بعيد ومعاه بتاع عشرين خمسه واربعين واحد
عسقول: اوباااا .. واخد بالك ياسوووو انا ولا اعرفك ولا عمري كلت معاك رنجه
لماضه: يا عيال .. انا خايفه تقلب بخناقه والواد يطير من ايدي
سوووو: اعملو نفسكم خواجات
بابا بظبوطي : في ايه يا ولاد
الواحد اللي كان بيعاكس لماضه : بقا انتوا هتعلموني الادب انتوا
بابا بظبوطي : في حاجه يا كباتن؟ طيب اتفضلوا معانا عمايل ايد خالتكم نظمية خلينا نخلص منكم قصدي من حلة الرنجه
الواحد اللي كان بيعاكس لماضه : لو رجاله بجد ورّوني نفسكم
ماما نظمية : في ايه يا عيال؟ للدرجه دي الرنجه بتاعتي جايبه اخر الشط والناس هيتجننوا عليها
الواحد اللي كان بيعاكس لماضه: ماحدش ليه دعوة .. الاتنين دول عارفين انا عايز ايه (وبيشاور على عسقول وسوووو)
لماضه : وكمان ليك عين تيجي تعاكسني هنا كمان .. وقدام امي وابويا وجي تاكل معاهم رنجه وجايبلي في ايدك حزمة بصل بفيونكه حمرا عيني عينك وعلى الشط
بابا بظبوطي: جاي تعاكس بنتي شرف البنت زي عود البخور اللي هيطير ريحة الرنجه ؟؟؟
ماما نظمية: سيبوهووووووووولي ( وفتحت ماما نظمية حلة الرنجة)
وبعدها بلحظات قليلة .. وعلى باب القريه اللي كنا فيها .. الناس كلها كانت طالعه بتجري .. ولما واحد من بتوع الأمن سأل واحد من اللي بيجرو هم بيجرو ليه .. قالو
واحد تاني غير اللي عاكس لماضه : بيقولك بن لادن ضرب الشط بالكيماوى .. اجري يا جرع

اكلها معكم 

55 comments:

رئيس جمهوريه نفسى said...

الاول مرة من نفس

قوس قزح said...

رضي الله عنكى وأرضاكى
وهداكى وأغناكى
وعافاكى وشفاكى
ووفقك لخير الدعاء
وأجاب لكى الرجاء
وأحبك بلا ابتلاء
وجعلك ساعية للخير
مؤثرة في الغير
وكل عام وانتى بخير

رئيس جمهوريه نفسى said...

هههههههههههههههههههههههههههههههههههههه
يعنى الواحد يخاف يكلمك يا دكتورة يطلع المشرط من تحت اللسان ويتكتب لية اروح فى النسيان ولا اية
احمدى ربنا انى اليوميات قفلت على كدة بصراحة سووو وعسقووووول تق تق تق مش قادر اكمل بصراحة
كل سنة وانتو طيبين وعندى اقتراح ياريت تكملوها يوميات اسرة عادية حرام بصراحة توقفوها واحنا استمتعنا بيها بجد
كل سنة وانتو بخير

صاحب المضيفة said...

كيماوي مرة واحده

دا احنا دخلنا في الغميق يا باشا منك له له ليها


يالا كل سنة وانت طيبة يا لماضة وعقبال كل عيد وهو برنجة يا هانم

mregypt7 said...

لسه انا ماقراتش حاجه
انا جيت بس عشان اعيد
كل سنه وانتى طيبه
وعيد سعيد
اعاده الله علينا وعليكم بكل خير يارب
تحياتى
بيبــــو

آلام وآمال said...

كل سنة وانتي طيبة يا مروة وكل الأسرة بخير
:)

مروة كمال said...

كل عام وأنتم بخير

تقبل الله

blue-wave said...

هههههههههههههههههههههه
يخرب بيت جنانكم
طيب والله الرنجه انقذتكم اهو من مصير مؤلم:))
بس طفشت الواد يا لماضه
ليه كدا دا احنا ماصدقنا:))
معلش المرة الجايه قضوها من غير رنجه:))
وكل سنه وانتى طيبه

ojg said...

ههههههههههههههههههههههه
طب والله نفسي في الرنجة جدااا

أزيل القدم دة مستحضر تجميل زى "أزيل العرق" كدة

عسقول البظبوطي راح .. عسقول البظبوطي جه .. عسقول البظبوطي بيعاكس البنت دي وبيبظبظلها

تسلم ايديكي يا لماضة
حلقة حلوة أوي

كل سنة وانتي بألف خير

مهندس مصري said...

ههههههههههههههههههه
بالكيماوي
آدي آخرة الرنجة
طيب دي الرنجة رحمة بالنسبة للفسيخ المعفن اللي بعض الناس بتآكله

و بعدين انا متأكد إن لو حد عاكسك بالشبشب و على دماغه و ملهوش لزمة المشرط خالص

:)

اما سوو و عسقول اللي عايمين على حل شعرهم لازم تبلغي بابا بظبوطي عنهم و يعلقهم من رجليهم لإن اللي يعاكس مزز الشط عادي تترد له في أخته

و ماما نظمية ما حبكش معاها تعبر عن مشاعيرها غير على الشط كده

ماله البيت بس

او اي مكان رومانسي مفيهوش زحمة

بس بجد تحفة
تسلم ايديكم انتم الـ3
كل سنة و انتوا طيبين

mido said...

كل سنة وانت طيبة

ومتحريمناش من بابا بظبوطى

:)

مهندس مصري said...

و بعدين يا سوو و يا عسقول بتعلموا الشباب الصغير أصول الإنحراف و تصنيف المزز و مزازتهم ( قابليتهم للمعاكسة ) و ردود افعالهم المتوقعة

المفروض الجزء ده يتصنف
adult
لفوق الـ 21 سنة
:)

مهيج الجماهير said...

ههههههههههههههههههههههه
لا جامدة جداً
كل سنة و انتى طيبة

ابن حـجـر الـعـسـقـلانـى said...

يا أم المتتامر رشى الملح سبع مرات

تارارم تارارم

يا أم المتتامر رشى الملح سبع مرات

تارارم تارارم

بمقامه التامر خشى و إيدى سبع شمعااااات

enjy said...

اولا كل سنة وانت طيبة
ثانيا هههههههههههههههههههه
ثالثا الله ينور الحلقة تحفة وطعمها جنان قصدى اسلوبها جنان

سمر الشافعى said...

بظبوطك؟

ههههههههه
ههههههههههه
ههههههههههه

يانهار ازرق وانتو ايه اللى جابركو على كدا

انا لو ابويا اسمه بظبوطى والله كنت اتبريت منه هههههههههههه

يالهوى يانا انا ميته من الضحك

والا سوووو اللى عاملى فيها الواد المخلص ومقسمهوملى بقى احنا على كدا بقى قى سن الخطر

الاهى يرزقك بواحده فى سن الياس تخلص منك القديم والجديد يااااارب

بس هه تستاهل

عسل والله يالماضه كل سنه وانتى طيبه ياقمر

وميض ابتسامة said...

بصراحة العيد من غير رنجة ملوش طعم

والمشكلة ان الرنجة بتتعبنى وبرضه بحبها

مازلت اكرر ان حكاياتك حكاية
..
خفة دم بنات البلد واسلوب مميز ساخر

كل عام وانت بخير

وعيد سعيد

prince4ever said...

هههههههههههه
بوست زي العسل يا دكتوره
ان شاء الله هبقى زبون هنا على طول
تحياتي
رامي

DR.roro said...

بت يا لماضة عسقول وسووو هيودوكي في داهية انشاء الله

يعني المرة الي فاتت كان جامعة الدول

والمرة دي البنات في مرحلة الضياع والخطر

يخوفي المرة اللي جاية يكون علي المقطم

ههههههههههههههههههههههه

أنا بس بهدي النفوس


كل سنة وانتي طيبة وعيد سعييييييييد

جنّي said...

السلام عليكم ورحمة الله وبركاته
عيدكم مبارك
تقبل الله منا ومنكم
وكل عام وأنتم بخير
كل عام وأنتم من الفائزين
كل عام وقد حصدتم الجائزة
كل عام وأنتم ترفلون في ثوب الفرحة
كل عام وانتم مقبولون الصيام والقيام
كل عام وقد عفا الله عنكم في ليلة القدر
كل عام وأنتي منصورة يا أمتي
أخوكم
سعيد

nona said...

ههههههههههههههههههه
كيماوى يا مفترية و كمان لبستيها ل بن لادن
كل سنة و انتى طيبة و ماما نظيمة و سوو و عسقول و بابا بظبوطي و كل العيلة و الرنجة طيبة
بس ما تقليش فى الرنجة قوى يا لماضة

ياسمين حميد said...

كل رنجة وأنتي بخير يا د. لماضة

فى القلب said...

كل سنه وأنتى عسوله ولمظه ومنورانه ومفطسانا من الضحك وجميله كده على طول يا ست الدكتوره
صباحك نادى يا قمر

shabfa2re said...

beeeeep beeeeeeeep
happy eiiiiiiiiiid

حنين القلب said...

هههههههههههههههه
عسل يا لماضه
تسلم ايدك يا سووو
سكر يا عسقول
كل سنه وانتم طيبين

على فكرة انا لسه متغديه زى ماما نظيمه رنجه وبصل
ااااااه هو العيد يبقى عيد من غير رنجه
ربنا يحفظكم
سلام

لماضة said...

كومنت على السريع عشان بنضف الرنجايه في ايدي وفسيخايه في الايد التانيه
وسردينه في بؤي

متشكره جدا يا جماعه والله احنا مبسوطين جدا ان الحلقات عجبتكم بالشكل ده وان شاء الله فيه مفاجأة حلوة قريب

ملحوظة صغننه كده على الماشي
اليوميات كتبها سوو وعسقول بنسبة 99 الميه انا مشاركتي كانت ضعيفه جدا مقارنه بيهم
تقدروا تقولوا شاركت بحته الارض من المدونة عشان ننزل المدونة عليها
بجد بشكرهم جدا جدا على الاشتراك في الفكره دي وتنفيذها
ويارب دايما راسمه ضحكه من القلب للقلب

حد يزرغط بقى

ـ-ـ- أحمد عبد العدل-ـ-ـ said...

يادكتورة أنا لسه قارى بوست يامراكبى دلوقتى آجى ألاقى بظبوظى ورنجة وفى العيد .. ضاع تأثير البوست كده
كل سنة وحضرتك وأهل اسكندرية كلهم بكل خير
عيد سعيد

مصري بالغربة said...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

اكتر حاجة ضحكتني

الواد اللي بيعاكس

وبيقولك يا بسرياية

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

تحفة

مصري بالغربة said...

وبحب اشكر عسقول وسوووو

على المعلومات القيمة اللي ادهولنا

في نوعية البنات

ونوعية المعاكسة

وكل شيخ وله طريقة

بس

وعرفنا كمان طريقة معاكسة لماضة

قصدي البسرياية

ههههههههههههههههههههه

بصراحة يوميات ميه ميه

وانا باقترح اقتراح

انكم تعملوا اليوميات ديه تكون ثابتة

يعني كل يوم خميس الساعة 10

ينزل بوست يوميات كده

وحنكون كلنا منتظرين

ايه رايكم

ويهمني راي البسرياية

بحبك يامصر said...

كل سنه وانتى طيبه يا دكتوره

جمعاوي(لا للنميمة) said...

السلام عليكم

شكلى كده جيت متأخر
على البوست ده
بس يلا حصل خير
على العموم عيد سعيد
وتقبل الله منا ومنكم
وربنا يعيد علينا
رمضان اللى جاى على خير

ويلا سلام

جمعاوي(لا للنميمة) said...

صحسح ما تنسيش تفوتى عندى تشوفى ابنى عمل ايه !!!!يلا سلام

°¨¨™¤¦الراقص مع الذئاب¦¤™¨¨° said...

السلام عليكم
اضحك الله سنك يا دكتورة

بجد جميلة اوي

كل سنة وانتي طيبة

صباح الصباح said...

اية يا جدعان

كل دة من الرنجة؟؟؟

هوة صحيح بتعمل لى حموضة وبتنشف ريقى

انما برضة بلاش تحرجوا طنط نظمية

لموضة

واللة وعملتى فتنة على البلاج

هههههههههههههههههههههههههه

ňįĝŗő said...

يا لهوي عليكم
إيه ده يا جدعان
خرافة خرافة خرافة
سوووو و حجورة و لماضة
يعمر بيت كده
إيه يا جدعان الحلاوة دي
تحفة تحفة تحفة بجد
و كمان دي الحلقة الخامسة ؟
ده انا فاتني كتير كده
ولا يهم
نجيبها م الأول
فكرة حلوة قوي يا مروة و صياغة مفيش جدال عليها
انتم دمكم زي العسل أصلاً
نسّتوني إني داخل أهنّي بالعيد
كل سنة و انت طيبة يا مروة
كل سنة و انت متألقة كده دايماً
تقبل الله منا و منكم



يلا سلام

alexandrany said...

رنجه
بيجو
بحر
راس التين
احمدك يا رب
:)

كل سنة وانتو طيبين

FreeKiller said...

الزميل المدون المحترم
بعد التحية
ندعوكم لحضور ملتقى مدوني الشرقية الأول
يوم الأحد 5-10 الساعة الرابعة مساءً
مقر النادي الإجتماعي الخاااص بشركة مطاحن شرق الدلتا
أمام مقر الوفد بشـــــارع مدير الأمن - ميدان القومية - الزقازيق - محافظة الشرقية

و كل المدونين من كل حتة ف مصر مدعوين

وللمزيد من التفاصيل يرجي زيارة اللينك التاااااالي
http://goharyblog.blogspot.com/

لكم جزيل الشكر و كل عام و أنتم بخير


كل سنة و انتي طيبة يا لماضة
اول مرة اجي المدونة زي ما اكيد ملاحظة عشان احط الدعوة دي
لازم اشكر الجوهري انه خلاني انا اوزع الدعوات
عشان وصلت لمدونات كويسه جدا
و دمها خفيف
و فوجئت انك كاتبة يوميات طالب طب
ههههههههههه
اصل انا كمان كتبت مذكرات طالب طب
تقريبا كلنا مساكين
هيء هيء هيء
اسفة عالتطويل

كل سنة و انتي طيبة و بصحه و سلامة و خير
وان شاء الله ارجع لمدونتك تاني على رواقة
اسمحيلي بقى اضيفها عندي

سلام

jessy88 said...

ياااه كل دة حصل من اول يوم بس يا لماضة امال بقيت العيد هيحصل ايه عموما انا حاسة ان بابا بظبوطى مش هيكمل مع ماما كتير ومش هيضحوا مع بعض فى العيد الكبير مع ان والله ان ابغض الحلال عند الله الطلاااق
تدوينة جميلة اوى وسكر هبقي اجى اعيد عندك كل سنة وابقي عدى ولو على اللماضة متقلقيش انا متوصاااااااااش

حسن مدني said...

جامدة جدا

كل رنجة وانتم طيبين

تحياتي

mezosherb said...

كل سنه وانتي طيبه يا دكتوره
تعرفي انا بنزل المدونه بتاعتك كامله برنامج winzip ووصلت الي 160ميجا ولسه منتهتش اييييييييييه كل ده بسم الله ما شاء الله

تحياتي وتقديري يادكتوره علي مدونتك الاكثر من عظيمه

اخوكي (اذا سمحتيلي )/ معتز

dr.mohamed shamndy said...

مش العيد مااااااااء
احسن

أحمد عاطف said...

الساخره الرائعه لماضه

تحياتي بشده على تلك التدوينه

والله ما عارف ابطل ضحك

اسلوبك في الانتقاد لاذع ورائع ومنمق ومرتب

وفقك الله

أنا إنسان said...

ههههههههههههههههه
ماقدرتش امسك نفسي من الضحك
بس غريبة تقليد اكل الرنجه في العيد
مش كده ولا ايه؟؟

بطوط حبوب said...

كل سنه وانتى طيبه يادكتره

انا جاى متأخر وفاتنى بوستات كتيره بس ملحوقه ان شاء الله

هو احنا هنروح من بعض فين

:)

سومه...مجنونه فى بلد عاقل said...

هههههههههههه يا خيبتكم
حد لاقى عرسان كنتوا اقفشوا فى الواد بايدكم وسنانكم وراسكم والف سيف تدبسوه يتجوز لماضه هى دى الرجوله الصح
:))
بعدين لا تهزاوا بالرنجه عشان انا بحبها هى والفسيخ والملوحه والسردين والجبنه المش يا سلام ع الدود والريحه
سلام انتوا جوعتونى
سلفيلى ماما شويه يا لماضه

صبرني يارب said...

جميل جميل جميل
اول مره اشوف اليوميات دي على فكره

واول مره اساسا اجي عندك

كل سنه وانتى طيبه يا قمر

دمكم زي العسل على فكره
ربنا يكرمكم

mostafa rayan said...

حلوة القصة
تحياتي لك

يا مراكبي said...

هههههه

بس الكيماوي ده بييجي بعد الأكل مش قبل الأكل .. وألا إيه يا داكتورة؟

وبعدين إيه حكاية إن القراع هواية دي؟ مش تراعي "شعوري" شوية؟

هههههه

ياريت تعرفيلي من إخواتك تبقى إزاي معاكسة البنات اللي من 25 سنة لحد 29 سنة ينوبك ثواب

بنوتة said...

أنا طول عمري (اللي هو 12 سنة)
بعيد وعمري ما سمعت عن حكاية
الرنجة دي
أتمنى تدخلي تزوري مدونتي عشان دي لسة جديدة ومحتاجة تشجيع

elsha3er said...

السلام عليكم

قد تم فتح مدونة لكل السكندرين ارجو ان تكون منهم بأضافة رد لحصر المدونين
على هذا اللينك

www.firstway1.blogspot.com

احمد الشاعر

مقتطفات من حياة فتاة said...

تعدي من الرحلة عشان تكلي لرنجة وفي

العيد لااااااااااااااااا
طب كنت اكلتيها الصبح ورحت الرحلة على طول
حلو اوي البويت
انا عيزة طلب ممكن تزوري مدونتي انا لسة جديدة وعيزة تشجيع

كراكيب عادل said...

هههههههههههه

يخرب عقلك بس علي فكرة الرنجة دي لازم يتكشف عليها خلي بالك

البرنامج الأذاعى انت تسال والكمبيوتر يجيب said...

تحيه طيبه
ندعوك للأشتراك انت وزوار مدونتك فى برنامجنا الأذاعى وهو اول برنامج عن النت والمدونات فى الشرق الأوسط ويذاع من الأذاعه الرئيسيه لمصر ...ندعوك للأشتراك بان تزور مدونتنا وموقعنا لتعرف كافة التفاصيل
المدونه
http://netonradio.blogspot.com
الموقع
http://dear.to/cairo

Geo Amr said...

اولا كل سنة وانتى طيبة ثانيا على الرغم من انى البوست طويل بس اسلوبه جميل جداااااااااااااا

Bannoura said...

إنتي أصلا أصلا
سكررررررررررررررررر
مووووووووووووووت

وضحكت بجد على سووو
مش بشوفها بالنضارة

hehehehehehehehehehe

gamda mooooooooooot