Thursday, 31 January 2008

تاجك فوق راسي يا خال




تاج جالي على حين غفلة من أحمد الصباغ وبما انه خال والخال والد وكلام الوالد لازم يتسمع وينفذ بدون اى مناقشات صدر فرمان رسمي من ديوان عام العائلة التدوينية انه لازم نجاوب على التاج ده اوامرك يا خال

انا هشمع الاجابات بالشمع الاحمر من دلوقتى

وربنا يستر على مستقبل التدوين فى مصر بعد التاج ده

اشوفكوا على خير

يا خفي الالطاف نجننا مما نخاف

بسم الله نبدأ


هل توافق على حذف خانة الديانة من البطاقة الشخصية ؟

أكيد لا طبعا مسلمة واعتز باسلامى حتى آخر زفير وكلمة مسلمه قبل لماضة في البطاقة كمان


ما رأيك فى المثليين ؟
متهيألى دول الحلقه المفقوده بين الانسان والقرد

هل هى حرية شخصية ؟
ايوه الحلال بين والحرام بين الله يهديهم ويشفيهم

هل توافق على الإعتراف بالمثليين ؟
للأسف مضطرين نعترف بيهم كمشكلة وآفه فى المجتمع والنفوس المريضه واجب معالجته
ا

هل لديك أصدقاء من المثليين ؟
اعوووذ بالله اذا كانت سيرتهم بتخلى نفسي بتغم عليا


هل تعتقد بوجود إضطهاد للمسيحين فى مصر ؟

والله احنا لينا جيرانا ناس زى الفل الصراحة كل عيد يبعتولنا كحك وبيتى فور وانا بحب آكل بيتي فور طنط اوى وماما برضه لازم ترد وتبعت اصلهم بيحبوا كحك ماما
افتكر السؤال كده غلط الصح هل يوجد اى انسان يستطيع ان يتنفس الصعداء فى مصر ؟


من هو الشخص الذى تختارة لرئاسة مصر ؟

ده هيتوقف على عمري مقارنة بعمر الريس وطبعا طويل العمر يطول عمره وينصره على مين يعاديه


أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات؟
كل اللى هيكونوا معايا فى السجن بعد الانتخابات


هل توافق على مشاركة كل من : الإخوان المسلمين - الأقباط فى الحكم ؟

والله ده هيتوقف على الشخص نفسه هل معروف بنزاهته لا بلاش نزاهته دى يعني معروف انه اخلاقه عالية وانه لا يسعى وراء اغراض كده ولا كده يبقى اخترناه اخترناه


فى رأيك الشخصى .. ما هى أفضل مدونة على بلوجر قمت بزيارتها ؟

بلاش تهدئة نفوس


للإناث فقط : هل توافقين على الزواج من رجل مطلق ؟

ده باعتبار انى بندرج تحت هذا النوع من البشر يبقى نسأل بابا والله بس هو يجى ونبقى نشوف يا كسوفي


اذا تزوجت وأنجبت ولدين وبنتين .. أى الأسماء تحب أن تسمى ؟

ده اذا بقى حصل يدينا ويديك طولة العمر اكيد اللى هتأمر بيه حماتي هو انا اقدر اتكلم في حاجه زي دى


هل تعتقد أن توريث الحكم فى مصر . . سيتم فعلا أم لا ؟

مفيش حاجه بعيدة على ربنا المكتوب على الجبين لازم تشوفه العين


فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟

افضل انجاز : اممم بحاول افتكر اهو
اسوأها : الاول انت فاضي ولا وراك حاجة


همرر التاج ده للصباغ ذات نفسه ولازم يشرب ده كاس ولازم يدوقه
تحديث
اعتذر منكم جدا فى التاخير على الرد فى التعليقات لسوء الاحوال النتيه عندي
ووصلنى الايميل ده من اخ فاضل بخصوص سؤال الصباغ فى التاج
هل توافق على مشاركة كل من : الإخوان المسلمين - الأقباط فى الحكم ؟
وده ما ورد فيه للعلم بالشىء
أما بعد
سُئل الدكتور يوسف القرضاوى سؤال مشابه لهذا وهو عن جواز ترشيح غير المسلمين للمجالس النيابية وكان رده كالآتى

( ........ والذى أراه ان هذه النيابة عن جزء من الشعب فى دائرة معينة او التمثيل له ، لا يعتبر من باب الإمارة او الولاية ، التى ذم الحديث طلبها والحرص عليها فالنائب ليس وزيرا ولا اميرا ولا واليا ، بل هو يمثل دائرته فى هذا المجلس الذى يقوم على محاسبة الأمراء و الولاه و الوزراء ولهذا هو يحاسب ولا بُحاسَب لأنه لا يوجد ما يليه ويحاسب عليه .

ثم أنه يساعد فى التشريع للأمة فى ماليس فيه نص محكم ، وذلك فى ( منطقة العفو ) التى ليس بها أى نص أو فيهما نص ظنى محتمل فى ثبوته أو دلالته أو فيهما . واذا كان غير المسلمين من أهل دار الإسلام و بالتعبير الحديث ( مواطنين ) فى الدولة الإسلامية ، فلا يوجد مانع شرعى لتمكينهم من دخول هذه المجالس ليمثلوا فيها بنسبة معينة مادامت الأغلبية من المسلمين ................ ويرى الفقهاء أن لها ما للمسلمين ولهم ما عليهم ، وأن القرآن الكريم قال { لَا يَنْهَاكُمُ اللَّهُ عَنِ الَّذِينَ لَمْ يُقَاتِلُوكُمْ فِي الدِّينِ وَلَمْ يُخْرِجُوكُم مِّن دِيَارِكُمْ أَن تَبَرُّوهُمْ وَتُقْسِطُوا إِلَيْهِمْ إِنَّ اللَّهَ يُحِبُّ الْمُقْسِطِينَ ( 8)
ومن برهم و الإقساط اليهم ان يمثلوا فى هذا المجالس حتى يعبروا عن مطالب جماعتهم ...... و ألا يشعروا بالعزلة عن بنى وطنهم ، ويستغل ذلك أعداء الدين و المسلمين ليغرسوا فى قلوبهم العداوة والبغضاء للمسلمين وفى هذا ما فيه ضرر وخطر على مجموع الأمة الإسلامية و غير المسلمين .

وقد أجاز المسلمون خلال العصور المختلفة أن يتولى غير المسلمين من أهل الذمة : وزارة التنفيذ وعرف كثير من وزراء الدولة العباسية و لم ينكر عليهم احد من العلماء ذلك الا اذا طغوا وتكبروا على المسلمين ...........)


هذا كان رأى الشيخ الذى يتبنى منهج الوسطية " الدكتور يوسف القرضاوى" و ذلك تجديه فى كتابه فتاوى معاصرة و أيضا فى كتاب فقه الدولة فى الإسلام فصل " ترشيح غير المسلمين للمجالس النيابية " و أنصحك بالإطلاع عليه ففيه ردود لتساؤلات عديدة بعقل رشيد

Saturday, 26 January 2008

يجعلك فى كل دعوة شغلانة




الدكاترة كانوا دايما يقولولنا إن الدكتور الشاطر لماح شاطر ودايما كانوا يشدونا من سماعاتنا مهي دايما فى ودانا و يفكرونا بالجمله دى ويحاولوا يشربوهالنا فى محلول معالجة الدماغ كانوا يقولولنا لازم تخلوا بالكم من العيان كويس اوى وتبصوله من فوق لتحت نظره فاحصه من وهو على باب العياده ده باعتبار ان ربنا هيكرمنا يعنى ونفتحها بعد عمر طويل قولوا يارب


العيان لازم تفليه من راسه لرجليه وتاخد بالك من كل كلمه بيقولها وكل نفس بيتنفسه وكل حركه بيعملها - بنتعب والله – وعليه خد عندك مثلا تدخل عليك العيانه من دول تقولك انا اسمى سوسو تعرف انها جايه تشتكى ان ضوافرها بتتقصف اما لو قالتلك ان اسمها ام محمود اعرف ان عندها لومباجو


لو العيان قالك انه ساكن فى قريه او اصله فلاح اعرف على طول وانت مغمض انها حاله بلهاريسيا اما لو قالك انه من المهندسين مثلا اعرف انك بتكشف على الحاله الغلط ودور هتلاقى القطه فى ايده بتنونو جنبه عشان عندها مغص اما بقى لو قالك انا الشعب يعنى لا هنا ولا هناك يبقى على طول دى حاله ضغط وقلب وسكر وهلم جرا
هبقى اقولكوا على الخبرات دى كلها فى احدى يوميات طالب الطب ان شاء الله

فى احدى حلقات الدرس العيانه دعت للدكتور وقالتله يجعلك فى كل خطوة سلامة قام الدكتور قالنا اخدتوا بالكم من الدعوه دى قلنا فى نفس واحد يا بختك حد يطول ست مبروكه زى دى تدعيله كده
قالنا بلاش نفسنه وركزوا معايا من الدعوة دى يا دكاترة نستنتج ان الحاجه دى جوزها بيشتغل سواق ومش اى سواق لا ده على عربيه لوري صح يا حاجه ؟؟
الحاجه ابتسمت وقالت ايوه انا اصلى متعودة ادعيها لجوزى كل يوم الصبح وهو نازل الشغل
الدكتور: اثبــــــت عندك والدليل قالوله




قمت انا بقى ايه بما انى بحلم ابقى دكتوره شاطره وطبعا لا تخفى عليكم نباهتى ومفهوميتى سرحت بخيالى كده اتخيل كل الدعوات وكل دعوة بمدلولها الوظيفى وحطيتها فى جدول عشان احفظها عن ظهر قلب ما انتوا عارفين برضه ان طلبة الطب حفيظه ويمكن اتزنق فيها فى امتحان ولا حاجه







انتبهوا ايها الساده اليكم الجدول الآتي بقائمة دعوات امهات مصريات لازواجها ومدلولها الوظيفى مقدمه اليكم على عرض حال دمغه



الهي يعمر بيتك
زوجة البنا

ربنا يكفيك شر المرض
زوجة الدكتور
ربنا يخبزلك الخير
زوجة فران

ربنا يطرحلك البركة ويفرجها فى وشك
( زوجة المهندس (طرح وجمع بقى وفرج من فرجار برجل يعنى

الهي ينصرك على مين يعاديك
(زوجة الظابط (اللى هما الشعب ولا مؤاخذه


يجعل فى وشك القبول ويحبب فيك خلقة
زوجة المحامي


الهي يرزقك من وسع
زوجة البقال


الهي يطعمك ما يحرمك
زوجة الطباخ

الهى يسترك ويكسيك ما يعريك
زوجة الخياط

الهى يحنن قلوب الناس عليك و يديك ما يستخسر فيك
زوجة الشحات

الهي ما تنضان ولا يجوع لك كبد
(زوجة الجزار (الضانى والكبدة مش محتاجه توضيح


الهي يبل ريقك ويسقيك من الحوض البارد
زوجة بتاع عصير القصب

الهي ما يرقدلك جتة
زوجة الحانوتي

ربنا ينورلك طريقك
زوجة الكهربائي

دايما حسك فى الدنيا
زوجة المطرب

يجبرك دنيا وآخرة
(زوجة مدرس الرياضيات (جبر وتفاضل وحساب مثلثات


ربنا يسهلك طريقك
زوجة السباك

ربنا يعلى مراتبك
زوجة المنجد

الهي يفتح في وشك الابواب المقفولة
زوجة حرامي خِـزن

ربنا يكتر من امثالك ويديك الصحة وطولة العم
ر
السيدة الأولى

Wednesday, 23 January 2008

لماضة في البرلمان

التاج ده مررهولي الله يمسيه بالخير ويديله الصحة والعافيه كان قاعد فى وسطينا في المدونة دي مهندس مصري اللى كان قرفان بس بيحب مصر كان لازم يعنى يقول انه قرفان الله اعلم هيحصله ايه خصوصا بعد التاج اللى مررهولى ده
والله يا لماضة وبقيتى نايبه فى البرطمان

استرها معانا يارب دنيا وآخره

وصيتى ليكوا لو جرالى حاجه توزعوا عصير قصب على الغلابة اللي هما المصريين
نجاوب بقى
استعنا على الشقى بالله
عشانا عليك يارب




دخلت مجلس الشعب من اوسع ابوابه ايه هو رمزك الانتخابى المفضل ؟

رمز المصاصة

كنت تفضل الدخول مستقل او تتبع حزب معين ؟

لا طبعا تبع حزب معين حزب اسمه كله من ده امال هعرف ادخل المجلس ازاى لو مش تبع الحزب المعين ولا كمان هصرف على الانتخابات من جيبى مثلا


اذا دخلت مستقل هل توافق على التوقيع للحزب الوطنى بعد نجاحك كمستقل ؟

قلنا هدخل تبع حزب كله من ده ومش هوقع للوطني طبعا امال انا داخله مجلس الشعب اتخانق مع مين يعنى


ايه اول حاجه هتعملها لنفسك ولاسرتك ؟

لنفسي هعمل حامل ايد جلد معتبر اعلق فيه ايدى عشان مرفعهاش بالموافقه ابدا لاسرتى ممكن اخلي بابا يحج ما انا هيبقى معايا دعاوى كتير بقى والباقى هشوف برضه مين نفسه يحج هديه مقابل انه يدعيلي ربنا يثبتني طبعا على الدين مش على الكرسي


ايه المشروع اللى ناوى تعمله لاهل دايرتك دون ذكر اسم الدائره ؟

والله كل مجال عاوزله مشروع البلد كلها محتاجه اعادة تأهيل بس اول حاجه هعملها هغير شعار الدايرة اللى منحوت بقاله سنين احترس مصر ترجع الى الخلف

قعدت فى المجلس جنب نائب مميز . من هو النائب ؟


أحمد عز اصلى نفسى اسأله بذمتك مش انا أحلى من شاهيناز انا اللى هي مصر محدش يفهم غلط


قدمت سؤال للحكومه ايه هو السؤال ؟
اكل وسممتوه بقر وجننتوه دعم ولغيتوه عمر افندي وبعتوه بنك مصر ونهبتوه نهر النيل ولوثتوه فاضل ايه تانى ناويين تعملوووه؟؟؟

طلب احاطه موضوعه ايه ؟؟؟ وبتقدمه لمين ؟
هقدمة لنظيف فين يا نظيف قرطاس اللب المصري اللى كنت باكله انا شايفه كله بيااااااكل جت عليا
انت واخده تاكل فيه لوحدك طيب وزع على شعب مصر الغلابة شويه من قدم شىء بيداه التقاه




انت مع الخصخصه ؟

انا لا مع الخصخصة ولا الجرجرة انا مع ربنا


هل انت مع قطع العلاقه مع اسرائيل ؟

قطع ايه العلاقة علاقة بس انا مع قطعها هي شخصيا حتت حتت ومجهزالها الا كياس كمان


هل تؤيد الحرب على العراق ؟

لا طبعا كده يبقى إرهاب مش حرب


هل تؤيد مرور الامريكان فى القناه ؟

قناة ايه اذا كنت مش موافقه على مرورهم على قناة استاكيوس بتاعتى بس ممكن نخليهم يمروا للتجارة

بتمرر التاج ده لمين ؟
كنت همرره لصانعة الحرية وهذا التاج
فرنسا هانم بس هي جاوبت عليه خلاص عشان ندخل المعتقل سوا واشرب معاها بقى كباية الشاى اللى مش عارفه اشربها معاها لحد دلوقتي ونقعد نرغي للصبح واكيد هيكون معانا كل اللى جاوبوا على التاج ده يعنى جمعاء ان شاء الله

Monday, 21 January 2008

عملتها ونجحت !!



اللهم لك الحمد والشكر كما ينبغي لجلال وجهك وعظيم سلطانك مش مصدقة نفسي طيب حد يشممني 10 جنية عشان افوق
عملتها ونجحت يا بني أدمين بعد سنين عناء رايحه فين رايحه المشرحة جايه منين جاية من المتحف شايلة ايه شايلة بالطو 6 سنين عدوا كده
والله وبجيتى ضاكطوووورة يا لماضة جد الدنيا ولا حدش جدك


مبروك يا رحرح مبروك يا دودة مبروك يا زرزر ومبروك يا أرائيرو مبروك يا دغيدى هو يا جماعه اللى شافلى نتيجة السنه دى واللى فاتت بقوله ليك الحلاوه قالى كده بقوا حلاوتين عقبال ما يبقوا تلاته واربعه مبروك يا شباب ويا بنات
وعقبالكوا يا اخوانى واخواتى المدونين عقبالك يا دكتور محمد يا حر عقبالك يا ولاء ويا اجدع بنوتة
عقبال يارب كل اللى فى طب واللى مش فى طب


النجاح طعمه حلو بجد وخصوصا لما يكون اخر سنه وكفااااااارة
كل اللى هيدخل ايده على شوكولاتاية جالكسى بالمكسرات اللى ب 3 جنيه محدش يجبلى اللى ب نص جنيه ويقولى جبتلك لا اللى يدخل يبارك ميجيش ايده فاضيه يا أخوانا يعنى كيس جوافه ماشى لو حتى كباية عصير قصب ميضرش


يلا نقول الناجح يرفع ايده ورجله وسماعته

وسهرنا وذاكرنا ونجحنا وفرحنا

ونقول ونقول دايما ناجحين على طول

Tuesday, 15 January 2008

سين وجيم


اعلمكم انى قد اخذت هذا التاج من عند صالح سعيد عنوة وبمحض ارادتي

وانا فى كامل قوايا العقليه والله على ما اقول شهيد

وحسبنا الله ونعم الوكيل

يجعل كلامنا خفيف وربنا يستر ميبقاش س وج ون

بسم الله نبتدي




س .....ما الفرق بين الحكومه والزمالك ؟
ج.... الزمالك جاب لمشجعيه الضغط
والحكومه جابته للشعب كله


س....... لماذا لم تتحرك الحكومه تجاه قضية الاسرى ؟
ج .......عشان المشرحة مش ناقصه قتلى


س....... لماذا يشعر الشعب المصرى تجاه الحكومه بالاستياء والغضب ؟
ج .......لأن الحكومه رجعت فى كلامها عن الغاء دعم رغيف العيش أبو مسامير ولغت الدعم عن الدقيق بس


س....... متى ستصبح مصر دوله ديموقراطيه ؟
ج .......لما منتخبنا يأخد كأس العالم

س....... (كن قويا ) احذف كلمة قويا وضع خبر مناسب ؟

ج .......(كن) تقيا


س ....... ما وجه الشبه بين بوش وهانى شاكر ؟
ج .......الاتنين غنوا تتر مسلسل لدواعي امنية


س....... ما هو مضاد كلمة الحريه؟

ج ....... الدستور


س .......ماذا سيحدث اذا فتحت السفارات الاوروبيه باب تاشيراتها للمصريين ؟
ج ......الريس هيأخد اجازة مخدهاش من 25 سنة


س....... لماذا لم يدلى عمرو دياب بصوته فى الاستفتاء الاخير ؟
ج....... (العالم الله ) لما رحتله بيته الكائن في (رصيف نمرة 5) خبطت رد قال
( مين اللى بـ (يدق الباب
(لاقيته و(لا على باله

الاستفتاء (الليلة دي) ياعمرو مش هتيجى
(قالي (أنا حر
ده لتحسين الاوضاع
(هتمرد على الوضع الحالي)
ايه اللى بتقوله ده ؟؟
(أصل في حاجات (ميتحكيش عليها

هتندم يا عمرو
(وايه يعنى) اهى ( ايام وبنعيشها)
(يعنى ده (أخر كلام
(ايوه مش رايح (وأنا من قلبي بقولها
وقعد يعيط ويقولى
(يا لماضة (انا عايش ومش عايش
(روحي انتي بس قوليله (يا ناسي وعدك) عمرو (تملي معاك ) بس (خليك فاكرني ) بـ (أي حاجه تيجى من ريحة الحبايب
(ماشى يا فنان بس (خلينا نشوفك

(متخافيش انا مش ناسيكي )


س .......اكمل العباره حياتك تخطط ليها ...................... ؟
ج .......واجري على اليونان واغرق فيها

انا لله وانا اليه راجعون
التاج ده مش اجبارى اللى يحب يتفضله ياريت
بس انا لا شفته ولا أعرفه

Sunday, 13 January 2008

اسبرين



تحديث

لم اقصد الدعاية للأسبرين وانما قصدت مجرد رمز كمسكن لبعض مشاكلنا والآمنا هذه الايام



لو جالك فى يوم الآم ومعرفتش تنام خدلك اسبرين




لو خايف تكون عيان خدلك اسبرين




لو صحيت فى يوم بردان خدلك اسبرين




لو مسافر اومهاجر من غربتك تعبان خدلك الاسبرين




لو مصدع او حزين خدلك اسبرين




لو عديت الاربعين خدلك اسبرين




لو زاد ضغطك فى يوم خدلك اسبرين




لو هتحكم مية مليون اوعى تنسى اسبرين


على جنب كده : يا جماعه ده لا هو شعرولا هو قافيه ده بس شوية لماضة بلا قافيه

Tuesday, 8 January 2008

يوميات طالب الطب 3

الجثة علينا حق



بداية الفاتحه لموتانا وموتى المسلمين


أول أيام المشرحة

ايه الريحة الفظيعه دي

اكيد المشرحه من هنا

هى دي بقى ريحة النفتالين اللى بيحطوها على الجثث

رحرح : نفتالين ايه اسمها فورمالين

إيه الزحمة دي كلها بت يا رحرح

و فين الجثث اللي بيقولوا عليها
اهية متغطية هناك
أشهد أن لا اله الا الله
طيب يلا نروح نشوفها
غطيها بسرعة تاني الدكتورة جايه تشرح عليها
وبعدين هنعمل إيه في الزحمة دى إنا واقفة في الدور التالت فوق الكرسي إلى فوق الترابيزه ومش شايفه حاجه إيه الحل ؟؟
وبدأت رحلة الكفاح والبحث عن جثه

أول رحلة

الووو (بصوت خافت جدااا) ها يا رحرح اتفقتى مع زينهم عامل المشرحة يجهزلنا المطلوب
وقلتيله ينقي لنا حتت حلوة كده ميكونش جار عليها الزمن وتكون ماسكه نفسها شويه وواضح فيها العضلات والأوردة والأعصاب يعنى حته جديدة كده مش زى اللي إحنا عماليين نبهدل فيها ليل نهار في المشرحة
وخليه كمان يحبشهالنا يحطلنا معاها كام مخ على كام بيت كلاوى
طيب تمام أوى وأنا جهزت الأكياس السودا اللي هنجيبها فيها بس ياريت تجيبي كام ازازه فاضيه يحطلنا فيها شوية فورمالين عشان متنشفش مننا
عال أوى لا الحمام بتاعكم فيه بانيو بس ضيق هانجبها عندنا الحمام بتاعنا أوسع شويه نحطها فيه ونبقى نذاكر في الاوضه عندي
وإذ فجأة صوت صراخ في صرصور ودنى التانية : انتى بتعملى ايييييييييه وإيه اللي عاوزه تجيبيه ده عاوزه تجيبيلنا قتيل في البيييييييييت
يا ماما قتيل إيه بس ده حتى مش جثه كاملة دى قطع بس منها هنذاكر عليها ونرجعها مهو أصل الكلية
ماما : لا أصل ولا فصل على جثتي
لا يا حبيبتي جثتك متنفعش لازم جثه متشرحه أمال نذاكر ازاى اسقط يعنى
ماما : الحق يا أبو لماضة بنتك عوزه تجيبلنا قتيل في البيت
بابا : ودي هتشيليها ازاى من المشرحة للبيت انتى عارفه لو اتمسكتى بيها في الشارع هيتعملك قضيه
لا يا بابا متقلقش إحنا مرتبين كل حاجه
ماما ( تشطاط اكتر واكتر ): هي دى كل الأزمة تجيبها ازاى
!!!وبعدين بقى حد قالكوا دخلوني طــــــــــــــــــــــــب؟

الرحلة التانيه

اضطررنا آسفين نروح بدري جدا أو بعد انتهاء ساعات السكاشن متأخر جدا عشان نستفرد بالمشرحة ونقدر نذاكر هناك ونشوف من غير زحمة وطبعا مكناش نقدر نعمل كده من غير ما عم زينهم ياخد الأوبيج

ها يا زينهم جهزت لنا المطلوب
زينهم : كله تمام تعالوا بنفسكم والحته اللي تتشاوروا عليها هطلعهلكم
لا إحنا لسه هنشاور افتحلنا أنت بس الحوض وأنا هطلع
استعنا على الشقى بالله ما تسندوا معايا يا إخوانا مش شايفينى شايله دراعات بأديا الاتنين
ناوليني الصينية دى يا رحرح اطلع عليها الكبد والعيون دى هاتلي يا زينهم الرئة اليمين دى والقلب ده حلو كمان طلعه

زرزر : مش هنفطر الأول
نفطر إيه لا عشان منضيعش وقت قدامنا ساعة والسكاشن تبدأ هاتى السندوتشات ناكلها وإحنا شغالين


,,,يتبع ان شاء الله

Saturday, 5 January 2008

تاج السنه الجديده



وصلنى التاج ده من عند ابو فرح وهو عليه تاج متأخر بس يلا زى بعضه عشان خاطر بس فرح ومامة فرح


نجاوب عليه على طول عشان بحضرلكم اليوميات الجديدة وانا عارفه ان الجزء ده بالذات ناس كتير مستنياه


بسم الله


نبتدى


لو مكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟


اعترض على السؤال لو مكنتش مصرى كنت هتمنى انى ابقى مصرى


النيل رواني والخير جواني


لوكنت أوروبي أو غير مسلم هتبقي إيه نظرتك للعرب والمسلمين؟


كنت هحسدهم ان عندهم دين زى الاسلام بسماحته


وكنت هحسدهم انهم يوم ما بضيق عليهم بيفردوا سجادة صلاة ويرفعوا ايديهم لربنا


لوقالولك إنت بقيت رئيس جمهورية هتعمل إيه؟


هوزع عصير قصب على شعب مصر كله


وبعدين هتنحى


لوسمح لك برؤية الرسول عليه الصلاة والسلام وإنك تقوله كلمة واحدة؟


أحبك


(يحشر المرء مع من أحب)


لو كنا في عصر ازدهار الأندلس كنت تتخيل نفسك إزاي؟


امممممممم صعبة دى اتخيل نفسى ازاى وانا لسه مجتش على وش الدنيا


لو خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟


هقوله كل شىء نصيب وهفسخ الخطبه


لكن لو زوجى الامر هيختلف


الرسول امرنا بالتكاثر لمباهاة الامم بينا


وامر الرجل بانه من الافضل ان يتزوج المرأاه الولود


ولو انا مكانه واكتشفت ان العيب عندى هفسخها برضه الا اذا كان مصمم بقى


لو طلعت القمر هتكتب عليه ايه؟


بصراحه هكتب زى ما بشمهندس عصفور قال


هضع قبلة للصلاة


لو مررت التاج لحد وماجاوبش هتعمل ايه؟


لا مش همرره لحد اصلا هدفنه هنا عشان تقريبا كل الناس جاوبت عليه كفايه كده الرحمة حلوه برضه