Monday, 31 December 2007

كل سنة وانت طيب يا راجل يا طيب




كل سنه تقولى عيد ميلادى الدنيا كلها بتحتفل بيه عشان موافق ليلة راس السنه 31/12 وانا اقولك سيبك من الراس
الحمد لله اهي السنين عدت وكبرت يا راجل يا عجوز وكبرتنا وبقى عندك دكتورة ومهندس بترول فى متخرجين فى سنة واحدة زى ما كنت بتحلم تشوفنا طيب حضرتك و كان نفسك تدخل الكليات دى احنا ذنبنا ايه يلا ما علينا اللي حصل حصل


عمرنا ما هننسى يا حبيبى رعايتك لينا واحنا صغيرين ومازلت بترعانا وبتاكلنا اللحمه البتلو الحمد لله ربنا يديك الصحه وطولة العمر


عمرنا ما هننسى برضه لما كنت بتفصلنا بنفسك البيجامات الكستورعشان تدفينا بيها فى الشتا وتلبسنا جرايد تحت الهدوم عشان تحمي صدرنا من البرد وكنت تحطلنا الشرابات على الدفايه عشان لما نلبسها تدفينا اكتر وساعات كنت تنساها والشرابات تشيط


عمرنا ما هننسى اننا مكناش بنرضى ننام الا لما تيجى تغطينا والا نفضل صاحيين بالعند وده عشان تحكيلنا حدوته وشرط تكون مرعبه وكنت تلفنا بالبطاطين كويس عشان مفيش اى نسمة هوا حتى تدخلنا


عمرنا ما هننسى لما طبختلنا ملوخيه حمرا والكاكا اللى كنا فاكرينها طماطم واصريت تجيبهلنا عشان نتعرف على الفاكهه العجيبه دى ولما مرضناش ناكلها عملتهالنا عصير ولما كنت بتقطعلنا العيش لقمة لقمة وتحطلنا عليه الاكل عشان يدوب ناكله جاهز مانحتاجش حتى نغمس ونبهدل الدنيا وتكون متأكد اننا اكلنا الوجبه كامله


ولما عملتنا كنافة فى رمضان وكان عاجبنا اوى الحشو بتاعها وحبينا نقلدك قمنا حطينا كل المكونات اللى شفناك بتحطها وزودنا عليها لب اسمر وابيض اهى كلها تسالي ومكسرات ولما شبعنا اكل منها حطيناها فى نفس البرطمان بتاع الحشو الباقى منك وجيت انت مخدتش بالك وعملت بيه كنافه وبعد ما استوت اكتشفت المحتوى العجيب وبقيت تاكل كنافة وتقزقز منه فيه


عمرنا ما هننسى لما كنا بنتعب وتجيبلنا صيدلية متنقلة فى البيت وتصر على ممارسة الطب والطب البديل علينا ومش هنسى عصير التانج بالليمون من غير سكر فيتامين سي المركز اللى شربتهولي بالاكراه لما كان عندي برد وانا بستغيث مفيش فايده لازم تشرب


عمرنا ما هننسى لما كنت بتعملنا سندوتشات المدرسه وكل واحد فينا يتفنن ازاى يتخلص منها كنت أنا ااكلها للعيال او اديها للدادا او لما أيأس احطها فى سلة المهملات من تحت عشان متشوفهاش وتشوفها برضه وانت بتقلب الباسكت عشان تفضيه ولمض لما لقى طريقتى فشلت كان بيسيبها فى الشنطه لحد ما تعفن وتكتشفها فى نهاية الاسبوع لما تطلع ريحه وانت بتحطله الجدول


عمري ما هنسى انك فضلت تكويلى هدوم المدرسه حتى البالطو بعد ما دخلت الكليه بنفسك وافاجىء انك حاطتهولى جاهز لحد ما المرض كان اقوى من ارادتك على تكرار الحكاية دى وفى كل مره كنت بكوية بعدك كنت بدعيلك


عمرنا ما هننسى انك كنت بتفضل سهران طول الليل لو عندنا مذاكرة او امتحان سواء كنا صاحيين عشان تونسنا وتدعيلنا وانت بتقيم الليل وفى الفجر او نايمين عشان تصحينا نقوم نذاكر وتخاف لاتروح علينا نومة ومتنمش الا لما تتأكد اننا فوقنا ومش هنام تانى خصوصا واننا كنا ممكن ننام فى اى حته حتى لو فى الحمام


النهاردة أسمحلي اردلك جزء من فضلك علينا حضرتك عارف ان كل سنة بحتفل بعيد ميلادك على طريقتى الخاصه كان بودي اجيبلك تورتايه بس انت عالم بالحال اخوكوا مزنوق وعموما أنا جبتلك هدية تانيه مش هقولك هي ايه الا لما تدفع المصروف اللى متأخرعليك



طيب هسمعك الاغنية دى هتقولي مش بحبها مليش دعوة اللى لاقيتها بقى



45 comments:

سهر الليالى said...

كل سنه وانكل باباكى طيب

بجد كلامك عنو أكتر من رائع
ربنا يخليكو ويباركله فيكو ويمدة بالصحه وطوله العمر وتكونو سعداء دايما مع بعض
والسنه الجايه بقى يكون راجع من الحج

كل سنه وانتى طيبة يا جميلة
وخلى التورته علينا يا دكتورة اللى زى عمو نجبلو مليون تورتة

تحياتى

خمسة فضفضة said...

السلام عليكم ورحمة الله وبركاته

كل سنة والحاج ابو لماضه طيب
ربنا يخليهولكم ويخليكم ليه

أفندينا said...

كل سنة وبابا بخير وصحة يارب ويفرح بيكي وبأخوكي وبأولادكم إن شاء الله
ضحكتني قوي الكنافة باللب هههههههه
عقبال ميت سنة يا دكتورة وسلااااااااااااااام لبابا

عصفور المدينة said...

ربنا يبارك لكم فيه وعمر مديد مليء بالطاعة

ياسر حسين said...

تحياتي للوالد
أنا حاسس أنك بتتكلمي عن والدي
يبدو إن ده حال أغلب الآباء المصريين
ينبوع حنان ورعاية للابناء
اللهم أحفظ آباءنا وأمهاتنا وأرحمهما كما ربيانا صغارا

خالص تحياتي لبابا

بندقه said...

كل سنه وعمو والدك بخير وسعاده

اكيد ده طبعا اب عظيم اللى يستحمل كل الحجات اللى عملتوها دى
:)

بس اوعى تكونى فى الاخر ضحكتى عليه وهى دى الهديه البوست

ربنا يخليه ليكم يارب ويجمعكم على كل حب

كل سنه وانت طيبه

دكتور حر said...

ربنا يخليهولكم يا لماضه يا رب

ويعينوا على لماضتكم يا رب

وانت اكيد درستي ان استحمال اللماضه بيقل مع السن
الكلام ده كان في سنه رابعه

ضحكت قوي على موضوع الكنافه

تحياتي لكم

صاحب البوابــة said...

كل سنة ووالدك في اطيب وافضل حال

تحياتي

Desert cat said...

كل سنة وبابا طيب وبالف خير وصحة وسعادة
كل سنة وانتوا اسعد اسره
ربنا يخليك بابا يا دكتورة
وسنة يعبدة عليكو جميعا

Doba said...

بقى اكل وقزقزة فى نفس الوقت
بسم الله ماشاء الله عليه

هيتحسد كده يا بنتى
كل سنة وهو بألف خير وسعادة ودايما فى رعايته وحبه وفحضنه

ويخليكم ليه وتكونو قرة عينيه
تحياتى يا احلى لمضة

حماتك
هبة

Zika said...

كل سنه وه و طيب
وربنا يخليهولك
البوست مكتوب حلو جدا
تحياتي

Ahmed Mubarak said...

الله ايه الكلام الجميل دة..
كل سنه ووالدك يا لماضة طيب..
وربنا يخليهولك..
وبلاش النهار دة تتلمضي عليه..ريحية شوية بأه..على الاقل اليوم بس
:D:D

Mohamed_sobhy84 said...

كل الناس دي بتحتفل بعيد ميلاد الوالد
بس سيبك انتي
تلاقي فقرحته باالدنيا بكلامك عنه

كراكيب عادل said...

كل سنة وبابا طيب

كنافة باللب ههههههههههه

لماضة said...

سهر الليالى
كل سنه وانتى بالف صحه وسلامه ربنا يخليكى ياريت التورته بالشكولاته
,,,,,,,,,,,,,,,,,,,,,,,,,,,,,,,,,,,
دكتوره فضفضه
وحضرتك بالصحه والسلامه يارب وكل عام وانت الى الله اقرب
,,,,,,,,,,,,,,,,,,,,,,,,,,,,,,,,,,,
افندنيا
هى كنافه باللب وبس ده بلاوى تانيه لحد دلوقتى ماسكهالنا ههههه كل سنه وانت طيب
,,,,,,,,,,,,,,,,,,,,,,,,,,,,,,,,,,,
بشمهندس عصفور
وحضرتك بالصحه والسلامه وكل عام وانت الى الله اقرب
,,,,,,,,,,,,,,,,,,,,,,,,,,,,,,,,,,,
استاذ ياسر
الله يخليك ويبارك فى والد حضرتك ويخليكوا لبعض كل سنة وحضرتك طيب
,,,,,,,,,,,,,,,,,,,,,,,,,,,,,,,,,,,
بندقه
هههههه تصدقى وتامنى بالله انا بقوله انت هتدخل الجنه بسبب اللى بنعمله فيك والله ربنا يقدرنى واسعده حقيقى
وفعلا يا عفريته انا عملتله هديه البوست ده بس لسه مقرهوش صراحه خفت اخليه يقراه يضربنى ههههه
بس كنت سعيده جدا لما قرا المدونه وعجبته الحمد لله كل سنه وانتى طيبه يا ملبسه محشيه بندقه
,,,,,,,,,,,,,,,,,,,,,,,,,,,,,,,,,,,
دكتور حر
ههههه حاضر يا دفعه بس العكس اللى بيحصل اصله بيقعد ينكشنى وانامش بقدر امسك نفسى فى اللماضه
كل عام وانت الى الله اقرب
,,,,,,,,,,,,,,,,,,,,,,,,,,,,,,,,,,,
صاحب البوابه
يا خبر ايه النور ده
وحضرتك بالصحه والسلامة يا افندم
وكل عام وحضرتك بخير
,,,,,,,,,,,,,,,,,,,,,,,,,,,,,,,,,,,
قطة الصحرا
وانتى بالصحه والسلامه يا قطتى
ويارب كل سنه وانتى بتخربشى كده عندى على طول
,,,,,,,,,,,,,,,,,,,,,,,,,,,,,,,,,,,
حماتى
ازيك يا ست الكل
وانتى بالصحه والسلامه يارب
انا تقريبا خطبت اولاد كل المدونين
هههههه
يلا حد لاقى اليومين دول
وسلميلى على خطيبى وبوسيهولى لحد ما ينفع ابوسه
,,,,,,,,,,,,,,,,,,,,,,,,,,,,,,,,,,,
زيكا
الله يكرمك يا باشا ده من ذوقك
كل سنه وانت طيب
,,,,,,,,,,,,,,,,,,,,,,,,,,,,,,,,,,,
احمد مبارك
ههههههه لا النهارده بالذات مقدرش لازم اتلامض جدا انا قاعده مستنياه يرجع عشان اتلامض للصبح كل سنه وانت طيب
,,,,,,,,,,,,,,,,,,,,,,,,,,,,,,,,,,,
محمد صبحى
انا هروح ابخر بابا
كل سنه وانت طيب يا صبحى وسنه سعيده عليك يارب
,,,,,,,,,,,,,,,,,,,,,,,,,,,,,,,,,,,
استاذ عادل
هههههه هى كنافه بس ده عقابا لينا اكلهالنا ولما مردناش بقى يعاقب بيها كل اللى يجى يزورنا ولازم ياكلهاله هههههههه
كل سنه وحضرتك طيب يا ابو ميدو

زُمُرده said...

كل سنه وانت بخير
وربنا يخليهولك ويباركلك فيه
وتسعديه ويسعدك دايما
********
هابى نيو يير ... وحاجات حلوة وطراطير .... وجاتوه وفطير....والأهلي خطير ..... والريس لسه قدامه كتير

اسكندراني في الغربة said...

كل سنة و الوالد و الوالدة و انت و اخوكي بخير
و يا رب ما يحرمك من الملخية الحمراو الكنافة باللب

:)

تحياتي

فى القلب said...

كل سنه وبابا و انتى و أخوكى بخير وسعاده وطيبه يا طيبه

Boba said...

كل سنة وبابا طيب وكل سنة وانت طيبة وكلكوا طيبين وفرحانين

حسييت ان البيكلم انا وان اللي بكلمه بابا نفس المواصفات و كل حاجة الا البسبوسة باللب

happy new year

مروة الزارع said...

كل سنة وباباكى العسل دة طيب

وانتى كمان طيبة وجميلة كدة على طول

باباكى دة عسل اوى

ياااااااااااة كان بيعمل لكم كل دة

انا حبيتة اوىىىىىىى

انا بجد معشتش كل دة عشان بابايا مات من زمان الله يرحمة

ربنا يخلية ليكم وتفضلوا مع بعض على طول انتى واخوكى

ويشيل عيال عيال عيال عيالكم يارب

مروة الزارع said...

اةةةةةةةةةة نسيت

كنت عاوزة أستأذنك كمان أنى هحط اللينك بتاعك عندى فى المفضلات

Mohamed A. Ghaffar said...

متتحرموش من بعض دنيا واخره

MerMaid said...

كل سنة وانتي طيبة يا لماضة

و عقبال كدة ما تبقي استشارية لماضة قد الدنيا

و كل سنة ووالدك واخوكي طيب
مش عاوز عروسة؟؟؟؟؟؟؟؟؟؟
ههههههههههههههههههههههههههه
--------------------------------
كل عام ونتم جميعا بخير

:))))

3ala asm masr said...

كل سنه وهو طيب
وكل سنه وانتى طيبه
ويارب تكون سنه سعيده علينا كلنا
ربنا يخليهولك

DR.HAMAS said...

الله الله الله

جميلة أوى أوى الكلمات الجميلة دى

حكاياتك عن باباكى

هى هى اللى بابايا كان بيعملها معانا

بس بابا مكنش له فى الكنافة و الشرابات و السندوتشات

أصل دى شغلة ماما طبعا

انما ورق الجرايد و اللمون بالإكراه و الذى منه .. كله كله .. بابا كان بيعمله

أثرتى شــــجــــونـــى!!!!!!!!!!


يا رب يا رب يخليلك باباكى

و يمتعه بالصحة و العافية

------------------

أنا تأثرت كثيرا لأنى أصغر اخوتى

و عشت مع ابى و أمى فترة طويلة من عمرى وحدنا

و قد فقدناه منذ 6 أشهر

و ترك فى شخصيا صدعا كبيرا

و فراغا كئيبا فى صدرى



رحمـــه الله

(( رب ارحمه كما ربانا صغارا ))

--------------

على فكرة

الحال من بعضه

أنا برضه مشروع دكتور ..

بس اظن انتى أكبر

انا لسة ف رابعة طب بشرى

و العجيب ان والدى توفى فى وسط امتحانات السنة اللى فاتت .. سنة تالتة

قبل مادة الميكروبيولوجى بـ 5 أيام

....

بس عدت و الحمد لله
-------------



ياااااااااه

فكرتينى بحاجات نفسى أنساها و أنسى أيامها

أسأل الله أن يرأب صدعنا

---------

و أسأله ألا يفجعك فى قريب أو حبيب

و أن يحفظ لك أبيك الجميل هذا من كل سوء

اللهم آمين




د.حمـــــــــاس

Sola said...

yaaaaah ya lemda waga3tely 2alby bgad walahy
kol sana o babaky tayeb o rabena yedouly el se7eh o yes3edek ya rab enty ensana bgad kewayesa rabena 7e7meky enty kaman
bas ana mesh 3arfa 2eh heya el song mesh fata7et 3andy
yalla happy new year o happy birthday 2 ur dad
salam ya gamieel
bgad ya reet babaya kan zay babaky 7'ody balek menih bgad o 7oteh fe 3neky

بذرة امل said...

كل سنة وباباكى طيب
مدونتك لذيذة جدا

bos bos said...

كل سنه وباباكى طيب وعقبال مليون سنه
بجد كلامك عنه خلانى قربت ادمع
ربنا يخليكوا لعبض

اسكندراني اوي said...

اطال الله في عمره واسبغ عليه ثوب الصحه والعافيه

كل سنه وهو طيب وبصحه وسعاده وعقبال ميت سنه يارب

يعني الراجل مولعلكو العشره شمع وانتي برضه مش عاجبك

ماشي

ربنا يخليكو ليه ويخليه ليكو

اعتذر عن التاخير في المعايده
لكن الظروف

بلغيه تحياتي

NIDAAL PAL said...

اهو الراجل العجوز ده
هو الخير و البركة
يمكن ساعات بيبقى فيه قرارات تعسفية
و لكنها بتبقى نابعة نتيجة خوفه و قلقه الشديد
ربنا يخليهولك و كل سنة و انتى طيبة

لماضة said...

زمردتى
وانتى بالصحه والسلامه يارب
مفيش اخبار عن هنوده
,,,,,,,,,,,,,,,,,,,,,,,,,,,,,,,,,,,
اسكندرانى متغرب
وانت بالصحه والسلامه يا حاج
الحمد لله ربنا حرمنى منهم بس محرمنيش من با با ههههه تاب الحمد لله بعدها
,,,,,,,,,,,,,,,,,,,,,,,,,,,,,,,,,,,
فى القلب
وانتى بالصحه والسلامه يارب دايما سباقه بالخير وانا مقصره وفى نص هدومى
,,,,,,,,,,,,,,,,,,,,,,,,,,,,,,,,,,,
حبوبه
هههههه بسبوسه ايه كناااافه
وانتى بالصحه والسلامه يا جميله
,,,,,,,,,,,,,,,,,,,,,,,,,,,,,,,,,,,
سلطة مروه
الله يرحم باباكى يارب وهو سايب ولد صالح يدعو له اكيد يا ستى اعتبرى والدى والدك بالظبط
ويشرفنى يا قمر ا نك تحطى اسم مدونتى عندك الاسم وصاحبته تحت امرك اى وقت
,,,,,,,,,,,,,,,,,,,,,,,,,,,,,,,,,,
استاذ محمد عبد الغفار
طيب افرض انا دخلت النار ههههه
امين يارب
,,,,,,,,,,,,,,,,,,,,,,,,,,,,,,,,,,
ميراميد
هههههههه لا معنديش عرايس لسه بدورله بس هو اصغر منى بسنه عشان كليته 5 سنين واحنا 6 فخلصنا فى سنه واحده اول ما يشتغل هقولك
;)
,,,,,,,,,,,,,,,,,,,,,,,,,,,,,,,,,,,
على اسم مصر
وانتى بالصحه والسلامه يا ميله ويباركلك فى باباكى ومامتك ويخليكى ليهم
,,,,,,,,,,,,,,,,,,,,,,,,,,,,,,,,,,,
دكتور حماس
الله يعزك هو فعلا كان اب وام فى نفس الوقت لان الفتره دى كانت والدتى فى اعاره لاحد الدول العربيه
الله يرحم باباك يارب ويصبركم ويباركلكو فى والدتكم ويخليكوا ليه
بس اكي سايب ولد صالح يدعوا له مش كده؟
يلا شد حيلك يا دكتور نحن السابقون وانتم الاحقون انا خلصت الحمد لله وان شاء الله تخلص انت كمان على خير
,,,,,,,,,,,,,,,,,,,,,,,,,,,,,,,,,,
سولا
ازيك يا قمر
ربنا يخليكى يارب
حاضر والله هاخد بالى منه
بس مغلبنى اليومين دول مش بيسمع الكلام ابدا هههههه
الاغنيه دى بتاعه انغام هى قديم شويه اسمهاحسك فى الدنيا يابا اضغطى على الكلمه واعمليلها دونلود لو معرفتيش تشغليها جربى كده لو مكانش هبعتهاك عنيا
,,,,,,,,,,,,,,,,,,,,,,,,,,,,,,,,,,,
بذرة امل
الله يخليك وانت بالصحه والسلامه
,,,,,,,,,,,,,,,,,,,,,,,,,,,,,,,,,,,
اسكندرانى اوووووووى
ايه ياهندسة الغيبه دى قلقت عليك والله
ولا يهمك احنا عارفين الى عندك الله يقويك
انت بتهدى النفوس ولا ايه
هههههه
ده مش عاوز يسمع كلامى خالص ومغلبنى
مخبه منه 4 علب سجاير لح دلوقتى قالى هقطع عنك المصروف قلتله هروح ابيع السجاير بداله
ههههه
,,,,,,,,,,,,,,,,,,,,,,,,,,,,,,,,,,,
نضال
اكيد طبعا انا متاكده من حبه وخوفه علينا وهو كمان اغلى انسان عندى فى حياتى وطبعا والدتى وكمان العيال الى اسمهم اخواتى
وانت بالصحه والسلامه يا نضال

لماضة said...

بوس بوس
انا اسفه اتلخبط
انا اسفه والله
ربنا خليكى ياقمر بابا ده حكايه
وانتى بالصحه والسلامه

محمود الدوح said...

لو بطلنا نضحك نموت

بجد وانا بقرا البوست مكنتش عارف اكملة من الضحك
كل الحاجات دى كنتوا بتعملوها
كنافة باللب
وكمان شاربات تشيط هى كانت بتستوى كويس وحكايات مرعبة وملوخية حمرا وعصير كاكا

وفى الاخر اغنية
يا عينى على الصبر

أخف دم said...

ازيك يا دكتورة
حتى فى الذكريات الجميلة وفى البوستات الشخصية اسلوبك رائع جدا وخفة دمك واضحة جدا
كل ألفسنة وانتى طيبة وبابا طيب وعلى خير دايما والسنة الجاية تكون أحلى سنة ليكى وله وللمض كمان
كل سنة وانتوا طيبين

shabfa2re said...

happy 'bay
مع انها جايا متأخرة

سها said...

كل سنه وانت طيبه
وبابا طيب
ويارب يبارك في عمره ويمتعه بالصحه والعافية
ويشوف ولادكو
وولاد ولادكو

السـيد شبـل said...

انا والله بقالى مده طويله بقول انا لازم ادخل اشوف البنوته اللمضه دى بتقول ايه ف مدونتها ...

لكن كل مرة اكبر دماغى واقول لأمش داخل...

اصل انا كسول حبتين الا ف كتابتى ف المدونة ... انا بكتب كتير جدا
حتى هنا انا بتكلم عن نفسى الظاهر ان انا بقى عندى بارانويا فعلا...
المهم صورة البنت اللماضه دى جميله جدا وهى اول شىء شدنى وانا مش فاهم ايه حكايتى مع الصور ....

تقريبا تانى مدونة ادخلها عن طريق صورة البروفيل انت ورحيل " البنت مع الدبدوب بتاعها"

المهم كل سنه وانتى طيبه ...

وانتظرى زيارتى المتكررة وبجد مدونة محترمه ...
بس مش لاقى لماضه الظاهر انك بطلتى لماضه لما انا جيت...
ههههههههههه
بهزر طبعا
مدونتك محترمه بجد وعمل ومجهود رائع وملحوظ

وكل سنه وانتى طيبه تانى

Soooo said...

يااااه
ربنا يارب يارب يارب يخليهولكم ويفرح بيكم وبولادكم وولاد ولادكم
ويباركلكم فيه ويباركله فيكم

كل سنه وانت طيب




سلام

ŞoŖśậŖấầ said...

ايه المفاجأت الجميلة دى
يامحاسن الصدف زى مابيقولو
نفس تاريخ ميلادى بس انا اخر الليل
بلغى تحياتى لوالدك وربنا يخلليه ليكم ويديم عليه الصحة والعافية يارب

وتحياتى ليكى

غمض عينيك said...

ربنا يارب يخليه ليكوا
ويخليكوا ليه
ويباركله فيكم ويراضيكوا ويراضيه

بوست جميل اوي يالماضة
ربنا يكرمك بجد
بوست يفرح

Rosa said...

كل سنه ودايما بابا طيب و بصحه و سعاده يا رب دايما
بجد ماعنديش تعليق غير ربنا مايحرمكوا منه ابدا و يشفيه و يفرح دايما بيكوا
كل سنه و انتوا دايما طيبين
:)

غمض عينيك said...

لماضة
من غير لماضة
ليكي عندي تاج

لماضة said...

محمد الدوح
ههه اه اهى اغنيه احسن من مفيش بدل ما ادخلهمن غير بطيخه اديا فاضيه كده
,,,,,,,,,,,,,,,,,,,,,,,,,,,,,,,,,,,
اخف دم
احنا نيجى جنبكايه بس يا استاذ
الله يخليك على الشهاده الحلوه دى
اتبسط اوى و الله لما شوفت تعليقك عندى
,,,,,,,,,,,,,,,,,,,,,,,,,,,,,,,,,,,
شاب فقييير
لا متاخره ولا حاجه عجبانى قوى الصوره بتاعه البروفايل بتاعتك
,,,,,,,,,,,,,,,,,,,,,,,,,,,,,,,,,,,
سها
ربنا يخيليكى يارب ويباركلك فى اسرتك
,,,,,,,,,,,,,,,,,,,,,,,,,,,,,,,,,,,
السيد شبل
الله يعزك الصوره والمدونة كلها تحت امرك
ومش هبطل لماضة متقلقش
نورتنى وشكرا على كلامك الجميل ده
,,,,,,,,,,,,,,,,,,,,,,,,,,,,,,,,,,,
سوووو
ازيك ي راجل يا عجوز
وانت بالصحه والسلامه يارب
,,,,,,,,,,,,,,,,,,,,,,,,,,,,,,,,,,,
صرصاره
ايه المفاجاه الاحلى اللى انتى عملتيها دى وجيتى زروتينى
كل سنه وانتى طيبه يا سرسر
,,,,,,,,,,,,,,,,,,,,,,,,,,,,,,,,,,,
ابو فرح غمض عينيك
الله يباركلك ويخليلك اسرتك ويخليك ليهم
كل سنه وانت بالصحه والسلامه والتاج وصل يا سيدى
,,,,,,,,,,,,,,,,,,,,,,,,,,,,,,,,,,,
روزا
والله دايما بتحرجينى بذوقك
واتى بالصحه والسلامه يا ست الكل

صمت المشاعر said...

ياخبر ابيض انتي مشكله يا لماضه

كل سنه ووالدك طيب ويارب يخليه ليكوا

ويخليلنا ابائنا ويحميهم لنا يااااااارب

winner said...



جميل ..
الأبهات كلهم كدا ..
ما بنعرفش قيمة اللي بيعملوه لينا و احنا صغيرين غير لما بنكبر
ربنا يجازي اهالينا كل الخير على التعب اللي تعبوه معانا