وضاع العمر يا نظري

بعد خمستاشر سنه خدمه في بشري هلبس نضاره ... تقريبا ده ذنب الرجالة اللى عايرتهم بالعمى هنا .. ومبقاش حد احسن من حد

خلاص بقيت خليفة شعبولا في الملاعب .. اقول ايه في نفسي وانا بقى فيا كل العبر

دكتورة .. وقصيرة .. وبنضاره !!! ناقص ايه تاني أقرع وأبقى بكرش ؟!!

انتخبوا جمال !!

 انتخبوا جمال !

لمن لا يعرف جمال الدولي هو اشهر واول مدوني الاسكندرية .. استخدم حوائط الاسكندريه لتدوين اراءه واعتراضاته .. وايضا لتدوين حبه الشديد وتشجيعه لنادي الاتحاد ..  قرر ترشيح نفسه للانتخابات التقيت هذه بعض افكاره واحلامه اقدمها لكم كلافتة دعايه انتخابيه .. واترك لكم في الاخر حرية اختيارمرشحكم لدورة حياة جديده تتمتع بشفافية السخرية .

جمال الدولي للدولة ومن بعدها الطوفان

حزب الطبقة الكادحة .. شعار الحزب " وما الدنيا الا سفر طويل أو قصير"

جمال الدولي رمز القِدرة

مقره الانتخابي البورصه التجارية

جمال الدولي .. ابن البلد خريج مدرسة وجامعة مصرية مية المية .

جمال الدولي .. امين عام لجنة السياسات بحزب الطبقة الكادحة ومؤسس جمعية جيل التدوين على حوائط شوارع الاسكندريه .

جمال الدولي .. الذي حلم بالاخراج السينمائي ثم تحول حلمه للاخراج في الدنيا .. والتي اعتبرها مسرح كبير يا والدي ..  فعاش سينما الحياة .. ليخرج ما يحلو له ويتمناه .

فلسفته الخاصة بالحب يلخصها في جمله واحده هي أن الحب " هو الحب الذي لا تملكه .. لا تستطيع ان تملكه .. ولكن تفكر فيه .. واذا ملكته يصبح جزء منك "

يتضمن برنامجه الانتخابي :-

1-    مناصرة الوحدة العربية فكتب بلون الدم " اسرائيل ورم خبيث في جسم الوطن العربي يلزم استئصاله "

2-    حل جزري لمشكلة البطالة عن طريق ارسال جميع شباب القهاوي وبالاخص شباب البورصه التجاريه – مقره الانتخابي – لشن حرب على اسرائيل .. فيستشهدوا .. ليكون نصيبهم الجنه .. وبذلك يكونوا قد ربحوا الدنيا والاخره .. وتخلصت الدولة نهائيا من أزمة البطالة واسرائيل في آن واحد

3-    حل الازمة الاقتصادية عن طريق الفول "  القِدرة هي الحل "  حيث ستكتفي كل اسره بمخزونها من الفول عن طريق تدميسه وعمله داخل المنزل وبذلك لن يضطروا لشراءه فستحل الازمه بأذن الله .. والله أعلم .

4-    انقاذ الشعب من الافلاس والجوع .. كما انقذ نفسه واصبح اغنى الاغنياء .. وكتب بماء الذهب على الحوائط " السماء سقفي .. والارض فراشي .. والهواء غطائي .. والقمر مسهري .. والشمس منبهي .. فالكون ملكي " وبذلك قد حافظ على املاك الدولة واقتصادها القومي .. ولم يلجأ لاي بنك اجنبي لاستثمار خيراتها .

5-    سيجعل من الاسكندرية دولة عظمى بعد ان تركت اثرا في حياته وشخصيته وترك هو ايضا اثارا عديده على حوائطها وغنى لها :

ياما جريت ياما                                في دنيا المـــــلامة

ملقتش زيـــــــك                                يا اسكندريه علامة

علامة لحــــــبي                                علامة لصــــــبري

علامة لجــرحي                                علامة لوصـــــــفي

وصفي لنفســـي                                 في دنيا المــــــلامة

علامة لنظـــرك                                نظــــــــرك علينـا

علامة لقـــــربك                                في زمن المســافة

مرسومة في عنينـــا

6-    يدعو للمطالبة بحقوق الوطن وابناءه في بيع الوطن ويسأل " متر الوطن بكام " كما انه تعهد باقامة مهرجان البيع للجميع في دورته الاولى " مهرجان بواقي الوطن "

7-    حل ازمة الكرة المصرية وخاصة بفريق الاتحاد وبيع نجومه بالكيلو " نجوم الاتحاد للبيع والكيلو ب 5 جنيه " – يا بلاش – " العميد للبيع والكيلو ب 4 جنيه " – يا مسهل – اما بالنسبة للجمهور " فجمهور الاتحاد سيد البلد " طول عمره .

جمال الدولي مرشحكم الامثل رمز القِدرة

جمال الدولي يتوعد لمن لن يدلي بصوته لصالحه ويرفع شعار

" لو عشت هذلكم ولو مت ربنا يسهلكم "

ملحوظة : جميع الجمل ما بين الاقواس هي من نتاج الدولي وحده وليست للكاتبه - بعد الشر- اي تدخل بها

 نشر الموضوع بمجلة البوسطجي العدد السابع 

عزيزي وزير الصحة 2

عزيزي وزير الصحه

بعد التحيه ,,,

اكتب لسيادتكم خطابي الثاني والذي أعلم انه لن يصلكم ولكني اتمنى بل ارجو ذلك .. نعم فالرجاء سيدي اصبح مقدمة لكل طلباتي ووسيلة للوصول لحقوقي .. التي صعب عليّ ادراكها بشتى السبل

فأنا فخامتك .. واسمح لي سعادتك ايضا ان أبجلك .. فهذا اسلوب اعتدته مذ سلكت طريق الحق في هذا البلد .. كي احظى بفتات حقي .. التي قد تؤهلني لعيشة كريمه .. وأي كرامة بعد الرجاء والتبجيل

كرامة داخل صندوق فولاذي من الذل بكافة صوره

لن اطيل على حضرتكم .. فمنذ شهور قد استلمت نيابتي في تخصص لا اعرف لحسن ام لسوء حظي ان اعمل به .. وهو تخصص الاشعه فحسن حظي تكمن في انه تخصص سيادتكم من قبلي .. وسوءه هو ما واجهته منذ استلامي له وحتى الان .

حلمت كثيرا ان اخدم بلدي وعدم تركها مهما كانت الصعاب .. ومهما بلغ بي التعب من النحت بصخور العلم والتعلم .. وكنت ارى في هذا الاجتهاد متعه ما بعدها متعه

وعلى نهج ذلك استلمت عملي بمكان نائي .. بعيدا عن اسرتي التي تعتبرني قرة عين لها .. ولا يهنأ لها بال وانا فتاه بعيدة عن دفء بيتها .. سعيت كثيرا لانال اكبر قدر من الخبرة .. حتى اتمكن من ممارسة التخصص المطلوب على اكمل وجه .. كي لا أزج باي مريض للموت وليس للمساعدة على شفاءه

وكانت اولى خطواتي هي طلب العلم .. كما تشربنا بذلك منذ الطفوله .. وكما فرضته علينا اديان السموات

فماذا كان جزائي؟؟؟

جزائي كان كسر أنف ابا الهول .. وليس هذا الا جزء يسير في مجموعة الكسور التي لحقت بي من كسر الامل و كسر الادمية وكسر الكرامة وكسر المجاديف وكسر النفس

باختصار اردت ان التحق بالدراسات العليا .. والتي هي فرض عين على كل طالب طب بعد تخرجه .. واختياره تخصص في عدد محدد من السنوات .. لافاجىء برفضي من جامعة تخرجي بمنتهى الاستهتار.. وبعد ظهور نتيجة التنسيق متاخره جدا لبقية الجامعات .. حتى يفوتني اي فرصه للتسجيل باي جامعه اخرى .. ويتجمد حلمي مؤقتا لسنتين او ثلاث على الاقل دون ادنى مسئولية على اي مصلحة تقدمت بشهاداتي بها

وبمبالاة شديدة أجد وزارتي الصحة والتعليم العالي متواطئين في الحجر على عقلي وحلمي وهدفي الذي اراه ابسط ما يكن .. فقط اردت حقي في استكمال تعليمي .. او عفوا تحسين ادائي الوظيفي بمعنى اخر

لن اطيل على سيادتكم بتفاصيل رتيبه ومميته جدا .. كأي مكتب تقدمت بأوراقي لديه للمطالبة بحقي الشرعي جدا .. والقانوني جدا جدا .. والمنطقي جدا جدا جدا .. والمهضوم جدا جدا جدا جدا .

 سعادة الوزير احب ان ابشر سيادتكم بعد ما واجهته من اهانات واستهتار بسنون عمري .. وشغفي .. وحبي لعملي .. ومساعدة بلدي كرد للجميل

انتظروا مني رد الجميل في مريض قد اودي بحياته الى ابعد من الموت .. ومعاملته ابشع مما عوملت داخل اروقة الوزارة

وانتظر مني ايضا اللجوء لكافة الطرق الغير شرعية لأخذ حقوقي الشرعية

واخيرا بعد كل هذا انتظر مني ان اترك هذا البلد لسيادتكم غير آسفة ابدا

مخلفة ورائي اي هدف حلمت بتحقيقه وبذلك فقط يتحقق هدف اولي الامر منكم

امضاء

طبيبه للاسف

الصرف المصري

 نظرا لتعدد قواعد الصرف المصري وليس العربي كانت لبعض الكلمات صداها ومن ابرزها  

حمو وأخواته

س : ضع حمو في 10 جمل مفيدة واظهرالبلاغة فيها واستخدامتها مع ملاحظة ممنوع إعرابها 

ج : 

1.     ولا يا حمو التمساحة ياله : دوت به صوت المعلمه فضة المعداوي ( الجميله سناء جميل ) في مسلسل الراية البيضا وكان أشهر حمو في التاريخ

2.     تحالى لحمو يا حبيبي ولا انت مبتجيش غير بالشكاليته : عم أيوب ( محمد صبحي ) مسرحية الجوكر ومن يومها وأصبح البالبتوز زي المدرسة الرسمي

3.     يلا عشان حمو : أم بتفهم ابنها انه لازم يستحمى لان ريحته طلعت

4.     حمو هاتي إش : العيل المعفن الي فوق لما عمه جالهم زياره وهو بيمارس عليه الشحاته بريحته الرهيبه وطبعا حمو قصدي عمه لازم يديه

5.     حمو النيل : ده المرض الجلدي الي هيجي لنفس العيل المعفن وده أقل واجب

6.     حمو : مصطلح طبي متعدد الاغراض بمعنى حموضه عند بعض الناس وارتفاع درجة حرارة الجسم عند ناس تانين خالص

7.     حمو الرايق : لاقيتها مكتوبة على ضهر توك توك

8.     حمو الصغير : ( أصغر مطرب شعبي شفته – ليه حق يبقى حمو يعني )  وحمو سعيد : اللي غنى نوحد ربنا – لا إله الا الله

9.     حتى محمد أخويا مسلمش من دلعه باسم حمو

10.   لسه معرفوش وده سؤال مدونتنا النهارده تعاطفا مع حمو

ملحوظة : حاولت اجيب صورة للموضوع كل الصور في البحث طلعت مش مظبوطه هو حمو ده أسم قبيح ولا ايه ؟؟

كائن صرصاري

من يوم ولادتي وانا بتعامل ككائن صرصاري كانت غلطة الدادا الي شدتني من لساني .. ووصف جدتي لما عرفت اني بنت وكان تعليقها التاريخي لماما  : - ايه الصرصار الي جبتهولنا ده ؟؟!! -  

وللاسف ده مكنش مجرد وصف ده كمان فعل لاني كنت باخد جائزة البيت التقديرية في العياط والشحتفه  وبنال شرف كل الرضعات في غير مواعيدها المنطقية وكمان فسحة ليليه مع والدي وده كان معاد مقدس للفسح  بالنسبالي – أمي دايما تقولي غاوية نكد من يومك -  وهذا الشق الأول من الصرصرة

ولان ربنا بيعوض كل انسان يقطع من هنا ويوصل من هنا كان الشق التاني واللي كان متمثل في قصر قامتي – الحمد لله -  من وانا في اللفة فضلت أعاني من ازمة الناس في التعامل معايا على اني بنص رجل مع اني في الحقيقة بنص لسان كنت فاشلة في تطليعه للعيال  .. لانه مربوط  يعني العيب الخلقي كان في لساني مش في طولي يا خلق ..

وللاسف كان من اول الناس والدتي ولهفتها على شراء كل الهدوم الطويله على اساس اني هطول يوم بعد يوم .. وتكتشف إن الهدوم هي الي بتطول من غلبها .. وانا زي ما انا بجرجر ديل فستاني .. 

من طفولتي اتحرمت وعمري ما حسيت يعني ايه لبس الشورت .. لان كل الشورتات كانت شرعيه بالنسبالي مهما كان مقاسها على بقية الاطفال .. ولو جابتلي صندل مقاس زيرو صوابعي تتشوه من المشي لاني كنت بكتفي بكعب رجلي بس جواه .. 

ولما كانت تلبسني كافوله متحتاجش أي غيار تاني معاها لانها كانت بتغطيني بيها لحد صدري وبطلع درعاتي منها كمان .. الكافوله والبرنيطه الاتنين بيتمسكوا بدبوس واحد من يومي طفلة موفرة

وتجلت معاملتي ككائن صرصاري لما بدأت امشي زي بقيت الاطفال وفضل والدي ووالدتي يجيبولي مشاية كانت خيبة املهم كبيرة لان رجلي عمرها ما طالت الارض وكانوا بيضطروا يشيلوني انا والمشاية مع بعض عشان متقلبش على ضهري ونفسي يتكتم ..

وبعد ما ربنا اكرمني وبدأت اخد اول خطواتي امي مصدقتش نفسها .. فكرتني لسه بحبي لاني يدوب كنت بطول طرف جلبيتها وكانت بتاخد بالها طول الوقت ان والدي ميفعصنيش برجله وانا بتمشى جنب الحيط 

حاولت والدتي بكل قوتها انها تساعد على نموي سواء بالتغذية .. كانت بتهتم تأكلني الخضار والفاكهه بدون تقطيع يعني الخيار والجزر بطوله .. العيش الفينو بلبابته .. او باللعب ..

كانت تفضل تعلق لي اللعب في اطول مسافة ممكنه بالنسبالي ودي غالبا ما بتكون في اوكر الباب عشان اشب واوصلها وكانت النتيجة ان ايدي هي الي طولت وعشان كده كنت دايما بفضل اللعب في التراب .. وساعتها بتكون نهايتي ان حتى اثناء عقابي دايما يعلقوني من رجلي يمكن اتمط في اديهم ولا حاجه

المشكله بقى كانت لما بنخرج ونقابل الناس أمي كانت بتتفنن تعمل في شعري كل النخل الي ربنا يقدرها عليه .. يعني لو الخابور ابو ربع كان موجود وقتها كانت لزقتهولي في دماغي .. 

وطبعا كنت الطفلة الوحيدة الي هدومها دايما ستراها .. الحقيقه الخياط كان يجي عندي والنص متر في ايده يبقى توب بحاله

محدش اخد باله ان دي كانت سعادتي الحقيقيه لاني الطفلة الوحيدة الي قدرت اتشال اطول فتره ممكنه .. بعيدا عن كلمة - عيب عليكي بقيتي طولي ولسه بتتشالي؟؟! .. وغير اني كنت بقعد في عربية الاطفال مربعه مش عامله رجلي فرامل .. وكنت بستمتع بالاكل على الواقف عشان ينزل في رجلي براحته من غير ما يحمض قبل ما يوصل بطني .. وأول طفلة صرح ليها مص القصب حتى لو كانت فيها نهاية لمرتبة السرير

الخلاصة حاولت أسرتي في المرحلة دي من عمري بكل الطرق إني أطول ولو كام سم لكن القدر لعب لعبته وجه دوري بعدها في التعامل مع الظروف نكمل المرة الجاية

الووو يا مركز

قررنا نحن لماضة هانم أم العافية

إزعاج حضراتكم بحنجرتنا المؤذية

واصرخ زي الغول وأزعق وأقول

تعاليلي يا بطة

وانا مالي شيفاني صاحبة العشة

هتلاقوني بكاكي قصدي على الهوا مباشرة ان شاء الله السبت  من 6 ل 9 مساءا 7/8/2010

برنامج علشانك على اذاعة الشرق الاوسط

مش هقدم الفوازير متخافوش

ابوس الجدم حد يسجلي الحلقة يا جدعان وانا هحاول اشرب حاجة ساقعه قبل ما اطلع

اللهم بلغت

كان معكم

ولا بلاش ربنا يستر

وكل سنه وانتوا طيبين

الفجر بعينه

بجد مفيش كلام يتقال

لان مفيش فُجر أكتر من كده

الفجر بعينه

وعشان الناس تنبسط وتنسى

جدول مباريات كأس العالم

  

واخدين بالكم

الرجالة أتعموا

هما الرجالة اتعموا ولا ايه ؟؟ ! انا مش عاوزه ابشر على حد من اخوانا في الجهاد أقصد الرجال ..  وخصوصا ان امرهم يهمنا الكام سنه دول – شوية دلع لحد ما رجلهم تطب -  بس الجمله دي بسمعها اكتر ما بسمع كلمة ازيك من الاهل والأحباب والاصحاب وميضرش عبده البواب أو مريض جي يحنن قلبي عشان أكتبله على أجازه .

وعليه قعدت افصص السؤال الرجاله أتعموا – بعد الشر لحد ما ربنا يتمم على خير –  وتوصلت لعدة احتمالات :

1 - يمكن بيغضوا البصر وساعتها يبقى كل الرجال محترمين وملهمش آخر والفيلم كداب .

2- يمكن مش عاجبهم الخلق الي بيشوفوها وبلاش إحراج أكتر من كده .

3- يمكن نظرهم فعلا على قدهم والافضل اني اتخصص رمد يمكن أعالج حد فيهم ويكسب فيا ثواب قصدي العكس طبعا .

4 – يمكن عنيهم اندب فيها رصاص من كتر فرجتهم على قناة مولتي والتانيه الي مقدروش يغمضوا فيها عنيهم لحد ما تقرحت القرنيه .

5 – يمكن دي تلكيكه كل راجل بيقولها عشان يهرب بجلده قبل ما يتكلبش على اساس انه بيتكلم عن جنس تالت أو على اساس ان البنات حلقة مفقودة بين الانسان والقرد .

وطبعا طبيعتي الطبية وفضولي المميت خلاني أدور على علاج لعمى الرجالة – أكتر من كده ويزيح ربنا - وتوصلت برضه للآتي :

1-    فحص دوري على نظر الرجالة فوق ال 25 زي الكشف المبكر على ورم الثدي كده – أحسن يكون حاجة وحشه وخصوصا لو أُثر على الجواز كفاية عليهم السجاير.

2-     زي ما الشبكة على العريس فرض نضارة كعب كبايه على العروسة وتتكتب في القايمة .

3-    يمنع منعا باتا التعرض للحب الأعمى المشرحة مش ناقصة قتلى .

4-    توصية السقا بعمل شيبسي بنكهة الجزر الحار وكله عشان مصر تختار وهي مفتحة .

5-    تجنب دخول المراحيض العامة أو حتى الوقوف تحت الكباري ومنع البنات من تناول الكرنب والثوم لتجنب إصابة الشباب بالعمى المؤقت وفي حالات أخرى دائم مصحوب بشلل .

نهايته احنا يهمنا ايه غير الرجالة المفتحين – ومش مقصود منها مقطعين الفرخة وريشها – يهمنا الرجالة الي اتعموا – ربنا يعافينا ويعافيهم – يفتحوا عنيهم مرة عشان فيه ناس كتير صعبان عليهم البنات الي زي الورد – أعوذ بالله من كلمة أنا – يتجوزوا عشان عاملين زحمة في البيت .

حاجة أخيرة محدش يقولي الرجالة أتعموا – والا بعد كده همشي بقطرة في الشنطة

بس يا سيدي وقامت معيطة

من ساعة ما اقتحم الفيس بوك حياتي والدنيا اتشقلبت بصراحه بدل رسايل الموبايل بقت كومنتات على صفحات الاصدقاء وبدل الاتصالات والبومات الصور بقى كل شىء سهل جدا والحياه بقى لونها ازرق بلون الفيس بوك

كله كوم بقى يا اخوانا والجروبات الي بتتعمل كوم كل ما حد يتزنق لا مؤاخذة في حاجه بدل ما يقلع يعمل جروب عالفيس بوك – طبعا لا انكر الجروبات الهادفة – زي مثلا جروب اي فيلم كرتون تحبه وجروبات ايام الطفوله المشردة

الى ان اتكعبلت في الجروب ده بس يا سيدي وقمت معيطه كل  الجروبات والفيس كوم بلعبه برسايله بكومنتاته والجروب ده كوم تاني اشتركت فيه مكنش المشتركين عدوا 1000 حتى لكن فوجئت ان في خلال يومين عدوا 7000 وما زال العد مستمر كل ما تعمل ريفريش للصفحة تفاجىء بكم التعليقات والمشتركين .. انا عارفه ان فيه ناس شيفاه فراغ وانا اعترف بده بس الغريب ان كل البشر دي اتشدت للجروب

الجروب فكرته ببساطه معيطة يعني كل حد نفسه يتحسر على حاجه يكتبها وينهي جملته بجمله واحده بس يا سيدي وقامت معيطه

اللذيذ بقى ان الناس دي كلها اجتمعت على نهاية واحده يارب عقبال نهاية الي في بالي

كان نفسي اكتب كام تعليق من الي اتكتبوا عليه بس بصراحة كلهم احلى من بعض عشان كده اسيبكوا تعيشوا مع طنط الي بتعيط

وبعد ما كتبت البوست ده اكتشفت ان بقالها كتير قوي مش متابعه المدونة وبس يا سيدي وقامت معيطة

أبو الليف مطرب الحمام الأول

كالعادة قاعده لا بيا ولا عليا بهرش في وداني مكان السماعة وبلعب في عيني (منخيري بقت قديمة ) هبط على اغنية انا مش خرونج انا كينج كونج بصراحة الاغنيه جت على الوجيعه خصوصا اني في نفس ذات اللحظة كنت على الفيس بؤ الي مبفتحش غيره اصلا .. لفت نظري ان الراجل صوته حلو صحيح الاغنيه مسخرة بمعنى الكلمة .. بس اجبرني اني اركز في الكلام والصوت ده طبعا بعد ما موجة الضحك عدت على خير ومجاليش امساك بعدها الحمد لله

قلت يلا بجملة التهييس الي بنسمعه كل يوم يعني هي جت على الراجل ده ما احنا بنسمع تهييس على العلاج والضرايب والسكن والاكل .. اهي حاجه تطري الي بنسمعه وخلاص .. واذ بعد ايام الاقي الراجل ده نزله شريط بصراحة مقدرتش امسك نفسي جريت نزلته كله دفعه واحده وكانت المفاجعة!!

نادر ابو الليف بصراحة دي اول مره اتكلم عن فيلم او فنان او اي اغنية بس بجد يعني الراجل ده فنان رغم الاراء المعارضة ليه انه اساء للفن على اساس ان الفن محتاج الي يسوءه اساسا ..كفايه اعلانات الافلام الي الواحد بيستخبى ويستنى البيت ينام وهو بيشوفها ما بالك بالافلام على بعضها محتاجة انك تنيم مصر كلها

طيب هاجموه ليه ؟؟

 صوته وحش ابدا والله صوته قريب من حسن الاسمر وارحم من جورج موصوف لحساسية صدر تامر حسني (فكها بالكلمات المتقاطعة )

شكله وحش طيب ده حتى احلى من شعبولا ..وكفايه ان البوستر بتاعه مفيهوش برنيطه .. رجعنا لأصلنا الخيش والبدائية الي احنا فعلا ماشيين تجاهها تاني دلوقتي

الكلمات الحقيقة مفيهاش اي ابتذال لاننا بنسمع كلمات اسوا كتيرعلى الاذن .. وبتسببلي تلوث اكتر من الي بتسببهولي السماعه كل يوم في الكشف ومحدش يقولي بوس الواوا .. ببساطه هو جاب مصطلحاتنا بس بجرعه كبيره حبتين وبخفة دم ورشاقة معهوده من ايمن بهجت قمر بجد ابدع فيها

الافكار الحمد لله اننا لاقينا حد مش سارق افكار ولا جايبلنا افكار مستهلكه زهقنا منها يعني ضمنا ان محدش هيرفع قضيه عليه ..اخيرا مطرب بدون سابقة .. الشريط ده زي ما قالوا بيلخص حياة نادر ابو الليف اللي بيعيشها كل شاب دلوقتي

واذا ترجمنا الشريط كالاتي ابو الليف كان بيحب واحده بس كانت مدمنة فيس بوك زي حالتنا قام اتخانق معاها وقالها انا مش خرونج قامت اديته بومبه واهله قاطعوه ومبقاش عنده ثقه في حد وبدأ يعتمد على نفسه وجاب تاكسي وحب يرجع عابدين بس واضح ان كان فيه ناس كتيرفي الموقف بتنفسن وندلوا معاه الندالة دي حالة عامة .. امتى نتحسن ولما رجع وقال جبت شقة ومكنش عاوز يدفع مهر كفايه على التشطيب هو التشطيب رخيص ؟ وربنا اكرمه واتجوز بطلوع الروح ربنا رزقه بولد وبقى يعلمه قبل ما ينام فيه حاجات لازم يعملها مش على روحه .. وتقريبا كلها حاجات متعلقه بالحمام مش ابن ابو الليف ؟؟ وبقى يصحى الصبح ويجري على اكل عيشه الست مراته طلعت عينه وكره بسببها كل الستات فعلا دولا مجانين

وكفايه اسمه الي كله نضافة ياريت بقيت المطربين بقى ياخدوا صابونه احنا مبنحبش نرغي

و ادينى فى الهايف وانا احبك يا ننس

اعتقلونا كلنا

لو هتعتقلوا مهنى يبقى اعتقلونا كلنا 

ومع البرادعي لاخر الخط ان شاء الله

وده ان دل على حاجه يدل على منتهى الضعف

خسارة يا بلدي وألف خساره على الي بيحصل في شبابك 

الفين إخص متكفيش
هنشتري كل نسخ كتاب البرادعي وحلم الثورة الخضراء

متضامنة مع مهنى ودكتور البرادعي

فقعوا مرارتك يا ريس

سلامتك يا ريس .. ربنا يديلك الصحة وطولة العمر ويبعد عنك وعن اي مصري اي مرض وحش

صدقني حسيت زي ما يكون حد من أهلي تعبان .. الف بعد الشر عليك يا ريس .. لو مقلقتناش عليك هنقلق على مين ده انا من ساعة ما عيني فتحت عالدنيا مشفتش غيرك

بس انا ليا عتاب صغيرعندك يا ريس ..

بقى اول ما تتعب كده تسيبنا وتسافر انت كمان بتهاجر ؟ بقى أكتر من 20 الف دكتور مش مأمنهم على نفسك وفيه اكتر من 80 مليون مأمنينك ومسلمينك نفسهم يا ريس !!

ده انا قعدت اتخيل لو كنت عملتها في مستشفى مصرية كان هيحصل ايه .. أكيد كنت اتنقلت باالاسعاف الطائر الي بسمع ان النقلة فيه بالشىء الفلاني وبتتحسب بالكيلو مش زي الاسعاف التوك توك الي بنشوفه

وكان زمان المستشفيات مش نضفت وبس لا دي كانت اتهدت واتطورت من جديد وكانوا جابوا فيها كل الاجهزة والادوية الناقصة وادوات الغيار والالات الجراحية كانوا جابوها جديدة واتعقمت عشرين مرة .. والاسانسيرات ركبت واتصلحت .. وكان زمان الحيوانات والحشرات المعششه اختفت وكانت السراير اتفرش عليها ملايات جديدة ومراتب ومخدات سليمة ووو... مش هطول عليك يا ريس يا بخت من كتب وخفف

وقعدت اتخيل الدكتور الي كان هيعملك العملية يا ترى كبير اساتذة الجامعات ولا دكتور حاتم شخصيا الا بالحق هو تخصص ايه ؟!! وكانوا جابوا طقم مضيفات يردوا الروح مش ممرضات يجيبوا المرض بصوتهم وزعيقهم واحجامهم !!

ولو كنت محتاج اكياس دم كنا بعتنا نجيبهالك مستوردة بس طبعا نتأكد من تاريخ صلاحيتها اصل دي بالذات يا ريس منضمنش فيها الشعب المصري لانه اما عنده فيروس سي او ايدز او معندوش دم اساسا من كتر ما الحكومة مصيته ..

وكان زمانهم استئصلوا مرارتك وحطولك مكانها واحدة بلاستيك عشان تستحملنا يا ريس ووكانت دي تبقى اول عملية زرع عضو ناجح طبعا بموافقة الحزب وكانوا خدوا المرارة القديمة حطوها في المتحف عشان يدرس عليها طلبة الطب وتجيلهم في الامتحان واللى ميعرفهاش يسقط دي مرارة مختومة بختم النسر

بالله عليك يا ريس توصي علينا وزارة الصحة ويا ريت بالمناسبة دي تقوم وزارة الصحة بعقد دورات تدريبية للأطباء المصريين في اسئصال المرارة حتى لا يضطر 80 مليون مصري السفر لالمانيا

ترجعلنا بالسلامة يا ريسنا وعلى العموم كل المصريين متطمنين مدام ابنك جمال موجود وانا بقترح انه يتولي رئاسة الجمهورية وكمان رئاسة مشيخة الازهر، هو احنا هنلاقي احسن منه

 كان نفسي اقولك فداك نفسي يا ريس بس شيخ طنطاوي الله يرحمه كان دايما يقولها

عارفة ان فيه اغاني كتير مستنية رجوعك بس اسمحلي واقبل مني الاغنية دي

وجعك وجعنا كلنا

وصحتك بالدنيا عندنا

مين هيخاف عليك قدنا

طول ما أنت قاعد على قلبنا اسفة في قلبنا

واييييييه

طرق الوقايه من انفلونزا الكتاكيت ولا مؤاخذة الخنازير

1-    اشتريلك صابونة صباح الفل وبلاش استخصار – فين ايام صابون الجمعية ابو تلاته تعريفه -  ضروري تخليها معاك في كل حته خصوصا في شغلك عشان لو جالك حد غتيت تعرف تزحقله ولو جالك واحد حبيبك تعرف ترّغي معاه

2-    تأكد من تغطية كل فتحات التهوية عندك سواء علوية او سفلية الغلاف الجوي مش ناقص مواد أو غازات مسممه بتطردها بعد أكلة بصل متينه او كحة شيشة فراولة ويفضل لو متستخدمش منديل القماش المحلاوي وتشتريلك علبة كلينيكس من اي عيل واقف في المحطة وبالمرة تبقى زكاة عن مالك وعيالك

3-    ابعد ايدك عن انفك وفمك وعينك ودفيها في جيبك بدل ما تاخد برد اخر الشهر الي بتظهر نسبته مؤكده ميه الميه عند كل الشعب المصري

4-    احرص على التنظيف المستمر للاسطح والارضيات عن طريق جرجرتك في الشوارع والهيئات ووراء كل المواصلات

5-    التزم البيت عند الشعور باعراض الانفلونزا واستشر الطبيب يعني لو سخن او عندك كحة او رشح او سعال يبقى بيتك اولى بيك لان الاعراض دي خطيرة جدا ومعدية اما لو جالك انزلاق غضروفي او لومباجو زي ام محمد بياعة الفجل او لو حتى كليتك وكبدك اتهروا من البلهاريسيا الي شربتها في الميه او فيروس سي الي اتنقلك بحقنه ملوثة أو حسيت انك بتكح تراب ودم وضغطك عالي والسكر أكل رجلك او ... او ... يبقى بلاش دلع وكفاية اجازات شغلك اولى بيك وبلدنا امانه في ادينا ورجلينا.. نعليها مدام ميتين .. نعيش فيها سنين وسنين واحنا عيانين .. مشربتش من نيلها ؟؟

6-    تجنب الاماكن المزدحمة وخاصة المغلقة زي السينما او المول او حفلة تامر حسني اما زحمة القهاوي وطوابير العيش او زحمة الاوتوبيسات اتزاحم براحتك لانها اماكن جيدة التهوية