Thursday, 27 September 2007

خلف الاسوار


من خلف الاسوار بكتبلكم
وخلاص الامتحان على الابواب
وطبعا عارفين المقوله الشهيره الى الناس دايما تقولها وفيها نوع من الذل
يوم الامتحان يكرم المرء او ياخد على قفاه
استر يارب
ربنا يعديها على خير
الواحد حاسس انه فعلا فى عنق الزجاجه وراسه محشوره زى جلبية الصعيدى
مش قادره اصدق ان السنين عدت بالسرعه دى وخلاص فى نهائى طب
حاسه انى كنت لسه يدوب مخلصه مدرسه امبارح وبدعى نتيجة التنسيق تدخلنى طب
ودلوقتى بدعى ربنا يخرجنى منها
انا بعتذر يا جماعه عن التدوين فى الفتره القادمه
لحين الانتهاء من


مش هواصيكوا يا جماعه

المدونه امانه فى رقبتكم وتقرولى الفاتحه

انا لله وانا اليه راجعون

Sunday, 23 September 2007

وقاحه ام حرية تعبير؟


يا جماعه انا سمعت عن رسوم جديده مسيئه لرسولنا الكريم على صفحات احدى الصحف السويديه
وللاسف الاساءة مازالت مستمره
للدرجه دى بيستهان برسولنا وبينا كأمه محمد

أمة محمد

ياه كلمه وجعتنى قوى
تفتكروا احنا نستاهل اللقب ده ورسولنا بيتهان كل يوم واحنا واقفين مكتوفى الايدى
انا مش قادره اكتب
بس مدونة اسكندرانى اوي و مدونة انسان اقترح فكره جميله قوى وهى

مدونه الا رسولي

افتكر دى اقل شىء ممكن نعمله
وانا بقوله انا معاك يا انسان
ياريت تدخلوا مدونته وتشوفوا البوست الرائع اللى هو كتبه
وكمان الفنان ياسر حسين عامل كايكاتير رائع لصاحب الرسوم المسيئه
حد يحب يشارك معانا؟؟؟

Tuesday, 18 September 2007

طالب الطب

ده طالب الطب

تعاطفك معاه مش كفايه

اتبرع ولو بجنيه

Sunday, 9 September 2007

وحوي يا وحوي

اهو جيه يا ولاد هيصوا يا ولاد
اهو جيه يا ولاد زقططوا يا ولاد
فى كل عام ويانا معاد وعمره ما بيخلفشى معاد
كل سنه وانتوا طيبين وبعوده يا رمضان
وكل سنة والامة الاسلاميه بخير وسلام
وطبعا لا اخفى عليكم رمضان واللماضة
الناس كلها وخصوصا الاطفال فى رمضان بيكون ليهم طقوس خاصه
من اهم الطقوس دى فانوس رمضان
الله عليه ابو شمعه ويا سلام على اللمبه لما تنور وتدور بالوان تخطف معاها احلى ضحكه من اجمل عيون
بابا يا بابا عاوزين فوانيس
الحاج ابو لماضة: لا انتوا الاتنين عقابا ليكوا على الشقاوة واللماضه مفيش فوانيس السنه دى
لمض ولماضة (على صرخه واحده ): لاااااااااااااااااااا اهيىء اهيى ء اهيء خلاص يا بابا والله حرمنا
الحاج ابو لماضة : قلت لا يعنى لا
طااااااااااااااااااااااااخ
لمض : اهييييييييييييييييييييىء عجبك كده اهو مفيش فوانيس بسببك وكمان بابا نزل من غير ما ياخدنا معاه
لماضة : ولا يهمك يا لمض انت زعلان عشان الفانوس احنا هنتصرف
احنا كبرنا خلاص ولازم نعتمد على نفسينا
الفانوس احنا اللى لازم نعمله من عرق جبينا
وان كان بابا نزل وسابنا فدى فرصه نثبت اننا قدها وادود
احنا هنصنع اول فانوس فيكى يا أم الدنيا بادينا بايدى مصريه ميه فى الميه
لمض : ازاى يا فالحه
لماضة : ملكش دعوه واسمع اللى هقولهولك ونفذ
يلا هات شويه ورق كرتون من جلاد الكراسات بتاعه المدرسة
وشويه كولة عشان نلزق بيها اوعى تشمها ياض وانت جاى
وهات مقص السمك بتاع ماما
وهات علبة الالوان بتاعتى من الدرج متشخبطش على الحيطه بالوانى هات الوانك شخبط
يلا نشتغل احنا هنعمل فانوس كرتون من الحاجات دى
يلا اشتغل بسرعه قص هنا ايوه تمام كده
اديها لزقه حلو قوى
بسرعه قبل ما بابا يرجع لازم نعملهاله مفاجأه
تويييت تصفير حاد
ده تحفه حلو قوى

لمض : اهيييييييييىء
لماضة : ايه ياض يا نكدى انت مهو فانوس ميه ميه اهوه
لمض : اهيىء اهيىء لا ياختى ده مش بينور زى الفانوس الحقيقى
لماضة (لمعة فى العينين ): والله فكره
ولا يهمك يا واد يا لمض انا هخليهولك ينور الدنيا كلها والشارع كمان
لمض : ازاى يا فالحه
لماضه : شوف يا ذكى هو مش فى فوانيس كانت بتنور بالشمعه
احنا برضه نحط جواه شمعه ايه رايك فى الفكره الفظيعه دى

لمض : ميه ميه يلا بينا
وهوووووووووب
لماضة : يلا كله تمام انا هديلك الشرف العظيم ده
انك تولع الشمعه
يلا
هيييييييه



ايه ده
ايه الريحه دى
الحقووووووووووونا
حريقأهاى حريقأهاى
(زى يونس شلبى فى مدرسة المشاغبين)
بسرعه هات ازازة الميه دى نطفى بيها
لا يابنى ده جاااااز هتولعها زياده
هات تراب هات تراب
ايه ده احنا فى البيت مفيش تراب
هات دقيق نطفى بيه
يلا شويه ميه بقى
ميه ميه كده الحريقه اتعجنت
سيبها بقى تخمر
لمض : اااااااااااااه مين دى
لماضة : كحكحكح ده انا يخرب عقلك هتودينا فى داهيه هنعمل ايه فى المصيبه دى
احنا ولعنا فى الشقه
دلوقتى بابا يجى يشوف الشياط ده ساعتها قول علينا يا رحمن يا رحيم
اجرى بسرعه افتح كل الشبابيك والبلكونات خلى الدخان يطلع
ترررررررن
بابا جه بابا جه بابا جه
بابايا : ايه ياولاد عملتوا ايه ايه الريحه دى الشقه زى مايكون فيها حاجه بتتحرق
لماضة (براءة الاطفال فى عينيا وبؤى ولا نفق محرم بيه ) : هيع هيع هيع لا يا بابا دى الست جارتنا بتخبز
بابايا ( فور اكتشاف المصيبه ووقوع الصدمه ) : يا ولاد ال............... حرقتوا السجاد والستاره انتوا هببتوا ايه فى الشقه
لماضه المتحدث الرسمى دائما : لو سمحت يابابا متزعقش احنا فى بلد ديمقراطى
ولازم تقدر العقليه الفازه اللى انت مخلفها
ولا انتوا بتخلفونا عشان تذلونا بقى وتقعدوا تزعقولنا وتضربونا كل شويه
مش دى خلفتك ولا انتوا لاقيتونا على بابا جامع استحمل بقى
وكمان احنا مردناش نكلفك وقلنا نصنع بايدى عامله ذكيه فانوس رمضان العجيب
لانك فرضت علينا ديكتاتوريه الحاكم ومردتش توفرلنا رغيف العيش قصدى فانوس رمضان
بابايا : كده طيب خدواااااااااااا
آآآآآآآآآآآآي حرمت ياباشا والنبى اخر مره خلاص حرمت
وكفايه عليكوا كده البقيه تأتى
ايه رايكوا بقى بذمتكم مش خساره الثروه البشريه اللى عندنا فى مصر دى
كل الاحصائات بتثبت وتؤكد وتجزم ان الطفل المصرى اذكى طفل على مستوى العالم
ناقصنا بس شويه تشجيع وارفعوا من روحنا المعنويه ادونا فرصة واحنا نسبق اليابان
يلا قولولى بقى رايكوا وفانوس رمضان اخباره ايه معاكم وكل سنه وانتوا صايمين