سلامتك يا ريس .. ربنا يديلك الصحة وطولة العمر ويبعد عنك وعن اي مصري اي مرض وحش
صدقني حسيت زي ما يكون حد من أهلي تعبان .. الف بعد الشر عليك يا ريس .. لو مقلقتناش عليك هنقلق على مين ده انا من ساعة ما عيني فتحت عالدنيا مشفتش غيرك
بس انا ليا عتاب صغيرعندك يا ريس ..
بقى اول ما تتعب كده تسيبنا وتسافر انت كمان بتهاجر ؟ بقى أكتر من 20 الف دكتور مش مأمنهم على نفسك وفيه اكتر من 80 مليون مأمنينك ومسلمينك نفسهم يا ريس !!
ده انا قعدت اتخيل لو كنت عملتها في مستشفى مصرية كان هيحصل ايه .. أكيد كنت اتنقلت باالاسعاف الطائر الي بسمع ان النقلة فيه بالشىء الفلاني وبتتحسب بالكيلو مش زي الاسعاف التوك توك الي بنشوفه
وكان زمان المستشفيات مش نضفت وبس لا دي كانت اتهدت واتطورت من جديد وكانوا جابوا فيها كل الاجهزة والادوية الناقصة وادوات الغيار والالات الجراحية كانوا جابوها جديدة واتعقمت عشرين مرة .. والاسانسيرات ركبت واتصلحت .. وكان زمان الحيوانات والحشرات المعششه اختفت وكانت السراير اتفرش عليها ملايات جديدة ومراتب ومخدات سليمة ووو... مش هطول عليك يا ريس يا بخت من كتب وخفف
وقعدت اتخيل الدكتور الي كان هيعملك العملية يا ترى كبير اساتذة الجامعات ولا دكتور حاتم شخصيا الا بالحق هو تخصص ايه ؟!! وكانوا جابوا طقم مضيفات يردوا الروح مش ممرضات يجيبوا المرض بصوتهم وزعيقهم واحجامهم !!
ولو كنت محتاج اكياس دم كنا بعتنا نجيبهالك مستوردة بس طبعا نتأكد من تاريخ صلاحيتها اصل دي بالذات يا ريس منضمنش فيها الشعب المصري لانه اما عنده فيروس سي او ايدز او معندوش دم اساسا من كتر ما الحكومة مصيته ..
وكان زمانهم استئصلوا مرارتك وحطولك مكانها واحدة بلاستيك عشان تستحملنا يا ريس ووكانت دي تبقى اول عملية زرع عضو ناجح طبعا بموافقة الحزب وكانوا خدوا المرارة القديمة حطوها في المتحف عشان يدرس عليها طلبة الطب وتجيلهم في الامتحان واللى ميعرفهاش يسقط دي مرارة مختومة بختم النسر
بالله عليك يا ريس توصي علينا وزارة الصحة ويا ريت بالمناسبة دي تقوم وزارة الصحة بعقد دورات تدريبية للأطباء المصريين في اسئصال المرارة حتى لا يضطر 80 مليون مصري السفر لالمانيا
ترجعلنا بالسلامة يا ريسنا وعلى العموم كل المصريين متطمنين مدام ابنك جمال موجود وانا بقترح انه يتولي رئاسة الجمهورية وكمان رئاسة مشيخة الازهر، هو احنا هنلاقي احسن منه
كان نفسي اقولك فداك نفسي يا ريس بس شيخ طنطاوي الله يرحمه كان دايما يقولها
عارفة ان فيه اغاني كتير مستنية رجوعك بس اسمحلي واقبل مني الاغنية دي
وجعك وجعنا كلنا
وصحتك بالدنيا عندنا
مين هيخاف عليك قدنا
طول ما أنت قاعد على قلبنا اسفة في قلبنا
واييييييه
