Monday, 3 November 2008

يوميات طالب طب 7


Medical student syndrome
هسهس كلية الطب
بعد ما ربنا اكرمنا وخلصنا مرحلة التعليم الاكاديميه وبدأنا ندخل في دراسة التخصصات .. ونتخصخص ونتجرجر ونلفت قصدي نشفت * من روند * لروند – الترجمة اخر الصفحة -  كانت بداية ظهور أول اعراض الهسهس عليا .. وده  مرض الوسواس لطلبة كلية الطب المعروف .. بقت كل حاجه اخدها اطبقها على نفسي وعلى اللى في البيت .. يستاهلوا حد قالهم يطوعوني ويدخلوني طب لازم يشربوا من نفس المحلول
وبدأت اعراض المرض تتجلى سنه ورا سنه - مش اعلان بامبرز ده – كل ما ندرس تخصص امسك الكتاب من دول بأديا  ورجليا – اصلها مش مجرد كتب دي جر شكل– واذاكر الاعراض واطبقها على كل اللى حواليا .. لو حد جاتله كحة ايه يمنع انها تكون بداية ربو ولا سُل من شرب الشيشه والتحشيشة.. ولو جاله اسهال يبقى الطاعون دخل مصر تاني
مش هطول عليكم هشهدكم وانتوا تحكموا
أول روند كان الرمد (دراسة امراض العين )
لماضة : بابا وريني عينك كده
بابا : مالها يا لماضة
لماضة : مش عارفه شيفاها بتحرقك
بابا : تصدقي فعلا حاسس انها حمرا
لماضة :  دي فيها زي غيامة أبيض في أبيض كده انت شايفني كويس
بابا : اه بالأمارة انتي لابسه أخضر في أخضر
 لماضة : طيب قولي ده كام
ماما : لماضة خدي نقيلي كام كباية الرز دول
لماضة : لا مش هقدر انقيه
ماما : ليه ان شاء الله
لماضة : عندي قصر نظر .. مش انتي طول النهار تقوليلي ربنا يوقف نموك .. اهو وقف كل النمو بما فيهم النظر .. يرضيكي النهارده اجي اكشف على الست في الروند
مش طايله العلامات اشاورلها عليها اضطريت يا ولداه زي الغلابه اجيب كرسي وأقف عليه .. وخليت ابنها يقف ورا الباب عشان محدش يقفشني واتفضح يقوم ابنها يقعد يضحك عليا ويسيب الباب .. وفجأه .. يدخل واحد زميلي من أطول طلبة الكليه
لماضة : يا فضيحتشي
زميلي : انتي بتعملي ايه فوق يا لماضة
لماضة : استر عليا الهي يستر عليك ..انا كنت بعدل الاريال بتاع الاشارات عشان الست تلقط معايا على طول واقيسلها النظر.. ده بدل ما تيجي تشاورلها انت وتعملك حاجه تقابل بيها ربنا مش كتر خيري اني بعمل فحص بضمير وبتصرف
عجبك كده يا ماما اهي بقت الايد قصيرة والعين كمان
روند الجلدية
بت يا زرزر انا استحميت امبارح 15 مره ..  واتليفت 45 مره .. تصدقي طلعت لاقيت جسمي احمر وكأن جلدي مسلوخ .. تفتكري يكون عندي جرب ؟؟
خصوصا وانها عمرها ما حصلت إني آكل 17 باكو شوكولاته واهرش ..على طول بيجيلي اسهال بس .. شكلي اتعديت من الواد الجربان اللى كشفنا عليه امبارح
زرزر : يابنتي عشان يجيلك جرب لازم تفضلي حاضنه الواد مش اقل من شهر.. ومن غير ما تستحمي طول الشهر ده كمان .. كل ده عشان الواد ريل عليكي .. بس الرياله مبتنقلش العدوى لو كان تف بس تخافي ..
روند الطب الشرعي
ده بقى كنت ولا المحقق كولمبو في زمانه .. ماشية بالعدسة في ايد .. والاسلكي في ايد .. والختامة في رجل  .. اي ضيف يدخل لازم يتعمله مسح بصمات من على الكباية .. - ده لو طلب شاي- و لو طلب قهوة يبقى ضروري قلب الفنجان .. اما بقى لو كان معزوم على غدا فده لازمله تحديد نسل .. وتحليل جيني .. وفيش وتشبيه .. وورقة يثبت فيها انه من خارج المحافظة .. عشان يكون ليه حق في العزومة
روند الانف واذن والحنجرة
ماما : مال يابت صوتك مبحوح كده
لماضة (بصوت زي الي كان بيغني في فرح طرش ) : اصل كان عليا الشيت * النهارده
ماما : وايه اللى حصلك اتعديتي
لماضة : لأ اصل الست قعدت اسألها عندها ايه مش بترد عليا .. وتبلصي وتضحك ..  قمت قعدت ازعق بعلو صوتي - ايام ما كان ليا صوت - واقولها
سمعااااني يا حاااااااجه رحتلك القرافه قالولي انك هناااا
روند الباطنه والقلب
كان فرحه ما بعدها فرحه .. مسكت السماعه  بشكل يكاد يكون رسمي .. ورايحه بالسماعه وجايه بيها  ..ومعلقاها في ودني ليل نهار .. وعامله فيها مجدي يعقوب .. وبسمع كل اللى في البيت مرحمتهمش .. حتى قطة الجيران وابنهم الرضيع وحتى دبة النملة .. بس اللي كان ليه نصيب الاسد معايا والدي الصبور ربنا يديله الصحه
لماضة : بابا انا سامعه حاجه مش طبيعيه انت متأكد انك كويس
بابا : آه .. الحمد لله .. فيه ايه طمنيني
لماضة : مفيش اي وجع الناحيه الشمال يعني ؟؟
بابا : خلاص نهايتي قربت على ايدك
لماضة : اصلي سامعه دقات غريبه .. انصحك تعمل رسم قلب بسرعه
بابا (بدأ وشه يصفر ) : هو فيه ايه بالظبط متخبيش عليا ده انا ابوكي من وانتي في اللفة
لماضة : اصلي سامعه دقة زيادة كده والله أعلم
بابا : ودي هدفع عليها مصاريف زياده في البيت ؟؟ دقة زياده ازاي .. سامعه ايه
لماضة : بص يا حاج احتمال زيادة الدفع وارد جدا .. يعني هي مجرد زيادة في المصاريف الادارية الشهريه مجرد اجراءات روتينيه يعني .. وانت عارف ان الاعمار بيد الله وان اللي هيبقى ولد صالح يدعو لك  .. والدعوة لو ملحقة بصدقة كمان يا هناك يا سعدك  .. خصوصا لو الصدقة الجاريه دي تكون لبنتك لماضة عبارة عن زيادة في مصروفها .. وده لان الدقة الزيادة دي بتقول بتقول  بحبك .. بحبك .. بحبك
وطبعا دي كانت نهاية اني امسك سماعه في البيت
روند النفسيه والعصبيه
لماضة : قولي يا كابتن انت اسمك ايه
المريض : محمد
لماضة : وساكن فين
المريض : محمد
لماضة : طيب بتشتغل ايه
المريض : محمد
لماضة : تعرف انت فين دلوقتى
المريض : محمد
لماضة : عارف النهارده ايه في الايام بتاعه ربنا ؟؟
المريض : محمد
لماضة : والنبي ناولوني الولاعة عايز اولع روما بحالها .. انا مستعجل عندي اذاعة خطة عظيمه لازم اقولها 
ـــــــــــــــــــــــــــــــــــــــــــــــــــــــــــــــــــــــــــــــــــ
*نشفت : كلمة مشتقة من شيفت - وليس له علاقة بالمطبخ بالمناسبة - شيفت في اللغة الطبية تعني مدة عقوبة نقضيها بقسم معين لدراسة تخصص معين
*روند : كلمة المغزى من وراءها اخفاء الرعب المتجمع في دراسة تخصص معين فأطلقوها قديما على كل تخصص كلقب يسبقة  وفي رواية اخرى لفة بناخدها في كل قسم
* الشيت : عبارة عن برديه قديمه .. يستخدمها طلبة الطب لتدوين ما قد تتوصل اليه اعمالهم الحمقاء من تصورات للأعراض المصاب بها المريض بعد اجراء الفحص والتمحيص

59 comments:

blue-wave said...

اول تعليق

blue-wave said...

بحجز بس وراجع

ـ-ـ- أحمد عبد العدل-ـ-ـ said...

شقاء شقاء يعنى
هتكرهى الناس فى طب يادكتورة
ربنا يوفقك

Ma 3lina said...

انا اعرف شيفت لكن بقيت المصطلحات دى جديدو عليا

صاحب المضيفة said...

ألشيت بتاعك النهرده مليان هساهس خالص


رودندات وحوارات


ربنا يكون في عون الحاج والحاجه

حرام عليكي اللي بتعمليه فيهم ده


بس بجد


مستقبلك باهر في الكتابة


ابقي افتكري الكلمتين دول بعدين وقولي كان هنا واحد بيقول كده من زمان الله يرحمه



سلام

Anonymous said...

Great Work ya doc .. wish u good luck.. Lamadaa forever

dr_hero

nona said...

الله يكون فى عون الحاج الوالد على ماتخلص الكلية و تبقى دكتورة هيكون هو طلع عينة منك

dr.mohamed shamndy said...

نسيتي حاجه مهم وكويس انك مفتكرتيهاش

نسيتي الجراحة
وكويس انك مجربتيهاش على حد

فاتيما said...

هاهاهاها
عاجبنى قوى موقف السيد الوالد
تعرفى إن يوسف كان بيعمل معايا كدا
لما جبتله لعبة أدوات الدكتور دى ييجى خمسميت مرة ...
كل مرة يلبس السماعة و يكشف عليا
و يقولى إفتحى بوقك
قولى آآآآآه
و بعدين يسكت ثوانى و يبصلى بشفقة و يقولى
لازم أديكى حقنة
صوييييييييييت بقى
و نهاية الكشف بتبقى زغزغة فى كل الاماكن لحد ما يبطل الكشف الاونطة دا
....
فكرتينى بكدا يا مرمر
ربنا يكرمك و أشوفك أجدع من مجدى يعقوب ...أنا شفته فى العاشرة مساءا و حسيته إنسان محترم و طيب قوى ...
عقبال ما أشوفك فى صيته و شطارته
و الجدعنة و الطيبة و الشطارة
دول مفروغ منهم
تحياتى يا حبيبة ماما

دنيتى الجميله said...

ايه يا لماضه ده حرام عليكى
انا مابطلتش ضحك لحد ماجتنى الكحه
لالالالالالالالالالالا
انسى انسى لحسن القاكى جايه تكشفى عليا انا كمان
هههههههههههههههه
طول عمرى بقول لسهيله يا رب اشوفك دكتورة شكلى كده هغير رأيى
العمر برضوا مش بعزقه
وكمان بلاش تفويل على باباها
فعلا اسلوبك فى الكتابه رائع وجميل جدا
سلام يا دكتورة

ست البيت said...

7/0 للماضة
جامدة قوي
وبجد انا بحب اليوميات دي قوي
الله يكون في عو الوالد
بجد...ربنا يخليكي ليهم برضه وجودك في البيت ...
حيوفر عليهم تمن الذهاب للاطباء
دول معاهم مستششفى متنقل
وش مطلع لسانه

رئيس جمهوريه نفسى said...

حلوة قوى بجد واللة موقف الوالد وياريت يا دكتورة تعملي لية تمثال علشان مطردش حد من البيت
ما زلت عند راي اعمليها كتاب واللة تحفة بجد

د.مادو said...

اسلوبك حلو أوى
فكرتينى بالذى مضى

ياسر حسين said...

هههههههههههه
حلوة حكاية الهسهس دي
الوسواس ده عند الناس كلها
خصوصا اللي بيقروا النشرات اللى بتيجي مع الدواء
أنا كنت أعرف طبيبة مخ واعصاب
كان عندها الهسهس ده
اقل صداع يبقى حاجة مش ولابد
ربنا يبعد عنك الهسهس
:))))))))

خالص تحياتي

غمض عينيك said...

صحيح حكاية الهسس دي تبقى حكاية
لو هطبقى كل حاجة على اللي حواليكي
يبقى يا انتي هتجنني يا هما هيجننوكي
وساعتها هتغني هاتولي الولاعة بجد


ليكي وحشة يا لماضة
محمد سمير

صبرني يارب said...

عسل يالماااااضه
هههههههههههههههههههههه

طيب الناس فى البيت صحتهم عامله ايه دلوقتي

وميض ابتسامة said...

عزيزتى الدكتورة لماضة

بعد هذا العرض المذهل والغبر عادى لمواهبك فى جميع افرع الطب ..قررت بلا رجعه سرعة التعاقد معك ..حتى تكونى طبيبة العائلة ..وربنا يستر

ومنتظرين النتائج المذهلة ان شاء الله

خمسة فضفضة said...

السلام عليكم ورحمة الله وبركاته

ههههههههههههه

يخرب عقلك يا لماضه فتسطيني من الضحك

وفكرتيني باللذي مضي

:)))

mohamed ghalia said...

دكتور لماضة
لا والله مش انتى لوحدك
أصحابى برده الى فى طب برده بيقعدوا يفتوا فى كل حاجة وجابوا لكل إلى حواليهم امراض الدنيا والأخرة
يلا بالتوفيق
لست وحدك
متشكر جدا على زيارتك الكريمة للمدون ومنتظر إجابات التاج
تحياتى

3omda said...

بوست مميز،خصوصاً روند الرمد.ده لو سمحتيلي استعمل مصطلح روند باعتباره ملكيه فكريه لصاحبه البوست اللمضه.

ست الستــــــات said...

هههههههههههه يخرب عقلك

دنا ضحكت لما قولت يابس

كان الله في عون الاهل وابا الحاج

واحدة مفروسة said...

هههههههههههههههههههه
حلوةكلية الطب ديه
مسلية للغاية
و خصوصا الاخ محمد بتاع النفسية

ولا الجلدية
هههههه
بصي انتى اثناء السفت تنقلى وقائعها على الهواء مباشرةُ
علشان نعيش اللحظة معاكي
ههههههههههههههههههههه

سى السيد said...

الحمد لله انى دخلت كليات القاع
والله انا سعيد لما بتشرف بزيارة مدونتك
والله يكون فى عون الوالد




نعمة كليات القاع دى

The Führer said...

ههههههههههههه
يخرب عقلك ، فكرتينا بأيام المرار الطافح وطلعة نص الليل علشان الشيت ، بس كانت فرصة الواحد يزوغ من المدينة الجامعية ،نلعب بلاي ستيشن صباحي يوماتي وكنا نقول للحارس كان عندنا حالة ، والراجل الطيب بيصدق!!!!
جميلة فعلا الأيام دي" أيام البلاي ستيشن طبعا مش الشيتات"

بس المصطلحات دي أسرار عسكرية مش عاوزين حد يعرفها علشان هالة الغموض اللي حوالينا تفضل مرعبة ،

خالص تحياتي

كراكيب عادل said...

يا ماما وبعد كدة الدكتور يطلع يكشف ويشخص معتقدش

انا كل يوم عن يوم مش عارف لية بفقد ثقتي في الدكاترة

روند في البيت كمان

خليهم فعلا يشربوا الله يكون في عونهم

Geo Amr said...

الله يكون فى عونهم فى البيت يعنى حتى لو حد كان عنده اعراض مرض معين تقولى كدة مرة وحدة على طول ربنا يصلح حالك وحالنا

مسدس صغير said...

هههههههههههههههههه ايه اللماضه دى عجبنى حوارك مع العيان اللى اسمه محمد وساكن فى شارع محمد وبيحب يفطر محمد وبينقى محمد عشان محمد ياكل .. اتمنى لك المزيد من اللماضه

اقصوصه said...

هههههههههههههه

بصراحه التدوينه ظريفه

وممتعه جدا

عقبال التخرج :)

lyssandra said...

يابنت يا لماضه

انتي ماكليش حل بجد

ههههههههه

باستمتع أوي لما باقرأ مغامراتك وتعليقاتك اللذيذه

دمتِ مبهجة

Lyssandra

Anonymous said...

احنا بقي كنا بنعمل ذيكوا كدة بالظبط بس مش علي البني ادميين بقي لا علي الحيوانات ههههههههههههههههه



لعاشر مرة بقولك عايزة التاج بتاعي مليش دعوة

dr.roro said...

التعليق اللي فات ده بتاعي نسيت اكتب اسمي

rainbow said...

مرمر المض دكتورة

ربنا يخلى بابا وماما ويتحملوكى يا قمر .. ويجعلهم دايما سعداء وفخورين بيكى بعد الصبر دا كله
ههههههههههههه بجد ضحكت من قلبى ربنا يسعدك خصوصا على محمد اللى الدنيا كلها عنده محمد
ربنا يشفى كل مريض يا رب
ويقدرك على رسالتك التقيلة الجميلة

بحبك هه

هدى

اعلان هـــام said...

ندعوكم للانضمام لجروب
لا للعنف ضد اطفالنا بالمدارس
وهذا هو لنك الجروب على الفيس بوك
http://www.facebook.com/group.php?gid=43106767017

يسعدنا انضمامكم

Khaled said...

هاي د. مروة
يا ريت تساعدينا في حملة راديو صوتكم
وتنزلي تولبار راديو صونكم من هنا
http://theradiosotcomtoolbar.ourtoolbar.com/
وفيه كود برده للتولبارعشان يتحط في المدونة وبرده هتلاقيه في جروبنا علي الفيس بوك هنا
http://www.facebook.com/topic.php?topic=5798&uid=21097306314
والتولبار لقي تفاعل كبير الحمد لله
بس احنا عاوزين نزودالاودينس او المستمعين بتوعنا

تحياتنا
واحنا واثقين من تعاونك

راجى said...

حضرتك فى كلية الهندسة؟
انا فاكر حاجات زى كانت بتحصل لنا فى الكلية زمان

bastokka طهقانة said...

تصدقي علشان اقرا البوست كان لازم اعمل سيليكت على التكست كله لانه مش باين عندي غير لون الخلفية
تفتكري العيب فين يا دكتور؟
امضاء
محمد

اوروفوار

أحمد سعيد بسيوني said...

اعراض شبة حقيقة بتحصل لينا كلنا

سلمت يداك

سومه...مجنونه فى بلد عاقل said...

هههههههههههه انتى ناويه تطلعيه على اللى فى البيت

مجدى الجبالى said...

من خلال تصفحى للمدونة يتاعتك رأيت إن مدونتى ساحة نقاش سوف تعجبك كثيرا .
http://sahetneqash.blogspot.com
لذا أنتظر مشاركتك فيها بأحد مواضيعك المميزة بس من غير لماضة




وشكرا

مجدى الجبالى said...

مالها التجارة
أينعم حسنى مبارك خلى الخمسة فى خمسة بخمسةوخمسيين و الموازنة العامة للدولة عمرها ما إتوزنت بس كله أرحم من الهسهس

سمـــــــــــا said...

ههههههههههههههههههههههههههههه

دى اول مرة ليا فى البلوج عندك

بس بجد ضحتيكى وعجبنى اوى الهسهس دا

واعتقد ان فعلا الهسهس دا حقيقى اوى عند الدكاترة

ربنا يوفقك ويثبت عقلك قولى آآمين

لماضة said...

د.عمرو
يعني حجزت تعليقين وكل ده معلقتش برضه
عليك كده غرامه وهكلبش العجل
,,,,,,,,,,,,,,,,,,,,,
أحمد عبد العال
هههههههه ليه بس ده انا بحبه جدااا
,,,,,,,,,,,,,,,,,,,,,
دكتورة ما علينا
ههههههه يلا اديني اديتك خبرات اهو عدي الجمايل بقى نورتيني يا جميله والله
,,,,,,,,,,,,,,,,,,,,
صاحب المضيفة
حد قالهم يدخلوني طب ويطاوعوني
لا مفتكرش باهر مين ده
:)))
,,,,,,,,,,,,,,,,,,,,,
دكتور هيرو
ربنا يخليك يا ايهاب
من بعض ما عندكم
,,,,,,,,,,,,,,,,,,,,,,
نونا
بقيت يا نونا وخلصت من سنه الحمد لله يا جميله
انا مخلصه دراسه ودلوقتى طبيبة امتياز يعني طلع عنيهم واللى كان كان خلاص
,,,,,,,,,,,,,,,,,,,,,,
دكتور شمهندي
مييييييييييين قال اني مجربتش الجراحه اهي دي بالذات جربتها قبل ما ادرسها :))
,,,,,,,,,,,,,,,,,,,,,,
ماما فاتيما
هههههههههه يوسف ده دكتور ورئيس قسم من يومه ربنا يسعدك يارب ويباركلك فيه ويرجعهولك قريب وانا اعلمهولكك ضرب الابر
:))
,,,,,,,,,,,,,,,,,,,,,,
دنيتي الجميله
هههههه يارب تشوفيها احسن مني كمان
ربنا يخليكي يارب ومش تغيبي عليا كتير كده بتوحشيني قوي
,,,,,,,,,,,,,,,,,,,,,,
ست البيت
مين قال ده وجودي في البيت سبب رئيسي يخليهم يروحوا لدكاتره
ههههه من بعد اللى بعمله فيهم
ازيك يا جميله وحشاني يابنتي
,,,,,,,,,,,,,,,,,,,,,,

لماضة said...

السيد رئيس الجمهورية
والله الراجل ده استحمل مني كتير ربنا يديله الصحه ويستحملني كمان وكمان
كتاب ايه بس كده حلو قوي
,,,,,,,,,,,,,,,,,,,,
د.مادو
ربنا يخليك يا افندم وتعيش وتفتكر :))
,,,,,,,,,,,,,,,,,,,,
استاذ ياسر حسين
نشرات بس ما بالك بقى باللي بيقرا الكتب نفسهاااا ههههه والله استحملوا مني كتير
,,,,,,,,,,,,,,,,,,,,,
غمض عنيك
هما لسه هيتجننوا خلاص دي بقت ماركه مسجله لكل طالب طب على فكره الحكايه دي بجد مرض فعلا معروف وحقيقي مش بس هزار والكلام اللى كتبته ده حصل بجد بالحرف
منور يا ابو سمره والله انت ليك وحشه اكتر
,,,,,,,,,,,,,,,,,,,,,,,
صبرني يارب
والله تقريبا صحتهم جت على الهسهس :))
,,,,,,,,,,,,,,,,,,,,,,,
وميض ابتسامه
هههههههه انتي بتعزي العيله عندك قوي كده عاوزه تخلصي منهم ولا ايه
يا ستي الف بعد الشر عن اي حد بجد وخصوصا الي يقع تحت ايدي
,,,,,,,,,,,,,,,,,,,,,,,,
دكتورة فضفضة
هههههه اي خدمه يا ست الكل تعيشي وتفتكري :))
,,,,,,,,,,,,,,,,,,,,,
محمد غاليا
الحمد لله مش لوحدي يعني الي بعاني على فكره ده فعلا حكايه معروفه وبحد
والكلام ده حصل حقيقي يعني مش مجرد ضحك
نورتني يا محمد وشكرا على التاج قريبا في الاسواق
,,,,,,,,,,,,,,,,,,,,,,,,,,
عمده
لا يا افندم ده بالذات مش ملكيه فكريه ده كلمه دارجه عندنا
مسموح طبعا انك تستعملها ياااريت :))
,,,,,,,,,,,,,,,,,,,,,,
ست الستات
ههههه ربنا يسعدك دايما يارب
,,,,,,,,,,,,,,,,,,,,
واحده مفروسه
ههههههه والله كان نفسي بس للاسف الايام الجميله دي راحت خلاص
ربنا ما يعودها ايام :))

لماضة said...

سي السيد
طبعا نعمه بوس ايدك وش وضهر عشان مشتفتش الي شفناااااه
,,,,,,,,,,,,,,,,,,
دكتور فورير
هي بتتقال كده ولا بتتقال ازاي ؟؟
هههههههه لا طبعا لازم الناس تعرف قد ايه كنا بنعاني هو احنا جبنا طب بالساهل كده :)
,,,,,,,,,,,,,,,,,,,
استاذ عادل واحلى كراكيب
ليه بس الثقه في محلها متقلقش ربنا ما يوقعك تحت ايد دكتور ابدا يارب
:))
على فكره احنا دكاتره شاطرين الحمد لله ده بس هزار ومعاناه من ايام الدراسه
,,,,,,,,,,,,,,,,,,,,
جيو عمرو
طبعا مش لازم اخبي حاجه على العيان بتاعي خصوصا لما يكون من اهل البيت عشان يتعظ :)) بهزر طبعا
,,,,,,,,,,,,,,,,,,
مسدس صغير
هههه على فكره ده مرض بجد مش هزار
,,,,,,,,,,,,,,,,,,
اقصوصه
الحمد لله اتخرجنا من زمان يا افندم دي مجرد زكريات بسردها
,,,,,,,,,,,,,,,,,
ليساندرا
ربنا يخليكي يا جميله انتي احلى والله كفايه بس الرقه اللى بحسها لما بقرالك تعليق ولا تدوينه
بفرح قوي لما بشوف اسمك بس
,,,,,,,,,,,,,,,,,,,
رورو
هههههه اي خدمه
والله فكراه
ومش عارفه اجاوبه تاج شقي جدا وسؤال واحد
جباره يعني
:))

لماضة said...

هدى
ازيك يا ست الكل وحشاني والله
ربنا يخليكي يارب ويسعدك دايما
زي ما بتسعديني
,,,,,,,,,,,,,,,,,,,,
استاذ راجي
هههههه للاسف فرقت معايا اني كنت ادبي فدخلت طب على طول
,,,,,,,,,,,,,,,,,,,
طهقانه
هههه ليه العذاب ده طيب كنتي اعملي ريفريش للصفحه
انا مقدرش اتعبك يا ست الكل
,,,,,,,,,,,,,,,,,,,
احمد سعيد بسيوني
طبعاااااااا اي خدمه
,,,,,,,,,,,,,,,
سومه
هههههههه هو لسه هيطلع يابنتي طلع من زمان واللى كان كان
,,,,,,,,,,,,,,,,,,
استاذ مجدي الجبالي
الصفحه مش بتفتح عندي
,,,,,,,,,,,,,,,,,
سما
حقيقي جدا جدا
الحمد لله ايام وبنعيشها وراحت لحالها
:))

م/ الحسيني لزومي said...

شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي

بس خلاص ... said...

لماضة... مدونتك لذيذه كنت هتجنن لما قريتها من كتر حلاوتها وكنت هبقى اول زبونه مجنونه .. وكمان قلبى وقف من كتر الضحك وعينى دمعت ومقد
رتش اخد نفسى
ملحوظة : تعرفى الست اللى رحتلها القرافه وقالولك انه هناااا
هى مين ... تبقا انا تبقا انا
وده اللى حصللى بسبب مدونتك

رابطة هويتي اسلامية said...

ندعوكم للمشاركة معنا في رابطة " هويتي إسلامية "

لا تكن بخيلا وشارك معنا لنهضة التدوين

كون معنا أول شبكة تواصل في عالم التدوين

كلنا نتفق في الغاية نختلف في الأسلوب

هيا.................. كن أول المشاركين

رابطة هويتي إسلامية

صدى الصمت said...

والله انتى زى العسل كل ما أدخل مدونتك لازم أقعد أضحك اليوم كله ربنا يوفقك ويسعدك

لماضة said...

بس خلاص
ههههههههه
الف سلامه عليكي يا جميله
يارب تنوريني دايما والحمد لله ان الي كتبته عجبك
ربنا يسعدك على طول

,,,,,,,,,,,,,,,,,,,,و
صدى الصمت
ربنا يخليكي يا ست الكل
من بعض ما عندكم بس
:))

dr.wesam said...

يااااااااااااااااااه فكرتينى بنفسى
انا جننت الناس معايا
ايام روند الرمد رحت عند الدكتور علشان حسيت بحبات رمل فى عينى قال يعنى عندى تراكوما
الدكتور ضحك وقالى
young doctor syndrom
دى حاجه حاجه تانيه ايام الاطفال هريت الواد النونو ابن خالتى بركشن على بطنه وصدره واشوف البوردر بتاعه الهارت
اقول ايه بسسسسسسس
دا احنا بجد ملناش حل انا كنت فاكره نفسى الى كده طلع الناس كلها معايا
بس دلوقتى لما بقيت ميزو ولا حاجه من دى بقت فى دماغى زى الدراسه
تفتكرى ليه يا لماضه
هو الهبل له اوقاته؟؟؟؟؟؟
تسلمى على لماضتك

كباريه said...

بصراحه

أنا ضحكت من قلبي على الأمراض النفسيه

اللي كله محمد

انت تسال والكمبيوتر يجيب said...

دعوه
الأحت العزيزه صاحبة المدونه المتميزه
تحيه طيبه
ندعوك للمشاركه فى برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام وهو يذاع يوميا التاسعه وعشر دقائق صباحا عدا الجمعه وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا
المدونه
http://netonradio.blogspot.com
الموقع
http://dear.to/cairo

amato allah said...

:))لا بجد جامده

ربنا يوفقك يا بنتى
عارفاهم بتوع الطب دول ,,, أصحابى منهم بس الله يكون فى عونكم والله :)) البوست هايل ما شاء الله وكله لماضه ^_^

قصيدة said...

تحياتى لك
يعجبنا فيك اللماضة
و انت فكرتينا بايام زماااان

شرفينا فى هذه المدونة الطبية
و يا ريت تجيبى كل اصحابك
الاطباء و طلاب الطب
اللمضين
BROKEN HEART
http://tabibqulob.blogspot.com/

Anonymous said...

جميل اوي اوي
بجد الواحد بيرتاح لما يضحك شويه ويبعد عن نفسع قرف المذاكره وضغط الامتحانات

Anonymous said...

هاى يا لماضه
اول مره ادخل مدونتك
عجبتنى جدا
كتصميم ومحتوى
اول ما قريت يومياتك رقم 1
وحكايتك عن الاتوبيس الاخضر وعم جبر وناجى عرفت انك بلديات
واكيد انت دفعتى فى الثانويه العامه من الثانويه بنات انا دفعه 2000 ثانوى عام
عجبنى اوى اسلوبك الساخر
ومبسوطه ان بلدنا طلعت دكتوره موهوبه وفظيعه زيك كده
استمرى
وتحياتى
منال عامر

د/بندقه said...

دكتور بليز عنى طلب ممكن انقل اليوميات
مع الاشاره الى مدونتك بليز

انا دكتوره برده بس صيدله
وبجد اللى عندكم تقريبا هو اللى عندك انا هستنى ردك سواء بالاجاب او الرفض

اختك د/بندقه

د/بندقه said...

بليز عاوزه انقل اليوميات الى منتدى صيدله

مع الاشاره الى ان حقوق كلها محفوظه للدكتزره لماضه

اه احنا مش اد والدك المحامى هههه