ياللي ظلمتوا القرد

لو عرفت مين اللي قال الامثال أعمل له قبة ومزار

كثيرا قالوا فى الامثال عن الحيوانات منهم الجمل ومنهم الحصان ومنهم الحمار -ولامؤاخذة- الذي كان صاحب النصيب الاكبر -ويمكن نفردله تدوينة خاصة باذن الله- وكان للنسناس مساحة لا بأس بها وردت فى أمثالنا العامية

وأجهل سبب ذلك حتى الان هل لجماله ؟ ام لقربه الشبه ببني الانسان ؟ ام لانه قد يكون حلقة الوصل بين الانسان والغوريلا كما قال دارون فى نظريته والتي استنكرها حتى الان ؟ لظلمه الشديد للقرد فليس هو حلقة الوصل وانما مخلوق اخر يمكن يكون " لماضة" وذلك لحبي الشديد للموز!! وهل يوجد علاقة بين هذه النظرية وبين تلاميذ هذه المرحلة التي تدرس بها مادة الاحياء ؟؟

ولم يسلم من لسانهم هذا المخلوق الودود المدعو القرود وسنعرض على حضراتكم كم ظلمنا هذا المسكين

وكما قالوا قديما خذوا الحكمة من افواه الجدات والحموات والمجانين

!!فذهبت الى العهد القديم وما به من أطيب الثمرات لانتقي أجمل ما فيه من احاديث وذكريات لتعيشوا معي أجمل الاوقات

ففي وصف الجمال تغزلوا بمحاسنه

بره وردة وجوه قردة

عصبية وبردة وعلى راسها قردة

شوف القرد وأتامل عينيه ما تلاقي غير السواد حواليه

قالوا يا قرد راح يسخطوك قال راح يعملوني غزال

ياواخد القرد على ماله بكره يروح القرد وتقعد لنا إنت بداله

القرد في عين أمه غزال

**********************

وفي الرضا والقناعه ضربوا به الامثال

الله يكفينا شر الكرب والشدة اللي تخلي الراجل كلب والمرأة قرده

قرد موافق ولا غزال شارد

قرد حارس وبياع مكانس

أرضي بقردك لا يجيك أقرد منه

صباح القرود ولا صباح الأجرود

قرد يسليني ولا غزال يعنيني

**********************

(وكان للرجال نصيب ايضا ليس كل الرجال (محدش يفهمني غلط انا مليش دعوة

يا واخد القرد علي ماله المال بكره يروح المال ويبقى القرد علي حاله

يا مأمنه للرجال يا مأمنه للقرد فى السنغال

قرد فتح لبان تغور من وشه القشطه

راحت الناس وفضل النسناس

يغور الشهد من وش القرد

**********************

وعن قاعدتة الشعبيه (المؤخرة يعني) افردوا لها خصيصا

إذا كان القـرد يشـوف حَمَار قاعدته ما كانش يهزها

يجي في قاعدة القرد ويشمها

زى القرد بيتباهي بحَمَار قاعدته

بيحسدوا القرد علي حَمَار قاعدته

**********************

وغيره كثيرا مثل

قالوا للقردة اتبرقعي قالت دا وشي واخد علي الفضيحة

اللي تخلفه الجدود تفنيه القرود

إن جاك القرد راقص طبل له

ارقص للقرد فى دولتة

القرش يلعب القرد

ابن القرد نطاط

تحديث

وصلتني هذه الصورة من استاذي العزيز جدا تامر الكاتب بالرصاص والتي التقطها في ساحة جامع الفنا بمراكش

والذي يعتبر مزار سياحي للقردة والقرداتيه ياتيه الناس من كل فج عميق

شوفتوا الناس اللي بتقدر القرود يا أخوانا

مستر شتلة

مروة جمعة تستجيب للتحريض بالرد على تدوينة حب صحي جدا بتدوينة أجمل وأكثر تميزا وتدوينة خصوصي في حب تربوي

اعتذار

السلام عليكم

انا بعتذر منكم يا جماعة على التقصير

وبعتذر منكم على اهمالي متابعتكم

وبعتذر لكل اخ واخت زعلته أو زعلتها بدون قصد مني حقيقى

وبعتذر على عدم الرد

أنا بعترف أنى لما دخلت عالم التدوين مكنتش على دراية كاملة بمعناه
كان كل همي أنى احكي مواقف مريت بيها بشكل هزلي أو ساخر يمكن تكون وقت ما حصلتلى بكيت لكن حبيت أعيد نظر فيها وابعت منها رسالة معينة في كل كلمة بكتبها وكل موقف بحكية مكنتش عارفة إن المجتمع ألتدويني كبير بالشكل ده وانه فعلا جذاب بياخدك للحظات جميلة ويعرفك على شخصيات أجمل خلتني أقول فعلا أنا كنت فين من زمان هي دي الناس اللي كنت عاوزة أتعرف عليها وعلى فكرها وأن النت فعلا مش مجرد غرفة محادثه أو مصدر معلومة وفرحت جدا لما أتأكدت فكرتي إن لسه فيه ناس تفكيرها جميل وشباب يفرح بحق
مكنتش اعرف إن فيه حاجه اسمها تعليقات ومدونات غيري
كنت عاملة زى اللي كان ماشى يدندن مع نفسه وفجأة من غير ما يحس صوته بدأ يعلا شوية شوية فتح عينه فجأة لقى ناس متجمعة حوالية بتسمعه وبتشجعه وبتكتشف فيه حاجات جديدة عمره ما لاحظها في نفسه ولا كان هياخد باله منها في يوم وبدأت تكبر وتكبر معاه والتشجيع بيزيد كمان وكمان
بقيت أحاسب على كل كلمة بكتبها عشان اجمع بين هدفي انى بدل ما أصرخ بشيء وآجعنى أبصله من بعيد واضحك عليه واستفيد منه وأعلم عليه على أمل إني أغيره في يوم وبين هدف تاني ظهرلي إني اسعد كل اللي بيدخلوا يقرولي كلمة وأراعي مشاعرهم
كنت بحب أوي اتلامض معاكم وتتلامضوا معايا عمري ما قصدت الاستخفاف من حد أو إني اجرحه أو ازعله لان في الطبيعة مش بطيق اعمل كده لأي حد اعرفه ما بالكم ناس مدتلي أديها وعلمتني زي الطفل ازاى أقف على رجلي وأحاول امشي وأنا راسي مرفوعة بدل ما كنت بحبي
أنا حقيقي مش عارفه أوصف قد إيه حبي وامتناني ليكم مع كل تعليق كان بيجيلى سواء أول تعليق أو حتى التعليق المية
بعتذر منكم مرة تانيه لو كنت ضايقت حد أو زعلته بكلمه أو بأي شيء بغير قصد وجهل مني والتمسولي العذر إني كنت بتعامل معاكم من خلال أفكار مكتوبة على صفحات إلكترونيه على انها متجسدة لكن في الأول والأخر دي مجرد شاشات عرض صعب مهما حاولت إني افهم طبيعة أي حد أو اقدر اذا كان ده يزعله أو يفرحه

عشان كده اعذروني بجد
خالص حبي وتقديري
دعواتكم

حب صحي جدااا

شكر خاص لـ ولاء على تعبها فى تلوين الصورة

هو = البيه الضاكتور

هي = الست الضاكتورة

هو : انا النهارده يا حبيبتى كتبتلك على خروج معايا وهناخد سوا جرعة الغدا اليوميه اتفضلى ادخلي

هي : ميرسي استنى افتح ايدك

هو : ايه اللى بترشيه ده برفيوم

هي : لا ده مطهر للايدين عشان انت مسكت الباب

هو : ده بقى من انظف واطهر المطاعم المكان هنا معقم جدا وهيعجبك

لحظه قبل ما تقعدى اتاكد ان الكرسي مفيهوش اى فضلات ملوثه ( المره دى يحرك الكرسي برجليه مش كل شويه هترشله مطهر على ايده ) اتفضلى استريحي

جرثوم ( ينادي على النادل ) ها يا ستى تحبى الغذاء بايه

هي : اللي توصفه يا حبيبى

هو : طيب من فضلك تجيبلنا 30 جرام لحمة مشوية كلوريد الصوديوم قليل وطبقين شوربة فراخ ياريت المية اللى هتتعمل فيها تكون بنسبة 5% محلول ملح وطبقين خضار سوتيه ويفضل يتسلق الخضار فى ميه مقطره استنى انا معايا 14 كيس اهم خدهم

والحلو يكون 50 سم عصير برتقال للدكتوره وانا تجيبلى شاي و تحليه بتركيز 25% جلوكوز

هي : ممكن اخد عصير موز باللبن

هو : لا يا حبيبتى كده الصنفين مع بعض هيتفاعلوا ويضروكي ده عشان يقوي مناعتك
مش هوصيك بقى الاطباق تكون معقمه فى فرن على درجه 600 درجة سيليزيوس ويفضل لو الشوك والمعالق تكون بلاستيك استعمال مره واحده فقط

الجرسون : تأمر باى حاجه تانيه يا افندم

هو : لا متشكر جدا بس ياريت تجبلنا الغدا كمان ساعه و16 دقيقه عشان العملية الايضيه بتاعة جسمنا متتلخبطش ها يا ست الدكتورة ايه رايك

هي : حاسه انى بقيت احسن دلوقتى

هو : يا ستى انا جايبلك هديه ونفسى اشوفها عليكى

هي : معقوله يا حبيبى ربنا يديك الصحه يارب انا كمان كنت حاسه وجبتلك هدية انا كمان

هو : يا سلام وعرفتي ازاى

هي : ابدا حسيت بنفس الاعراض

هو : ورينى الهديه بتاعتك الاول

هي : اتفضل يا سيدى بالشفا ان شاء الله

هو : ياه وتاعبه نفسك ولفاها فى صورة اشعة انتى عارفه انى بحب اللون ده

هي : أفتحها الاول

هو : ازازة دوا بشريطه حمرااا

هي : دى ازازة فاتح شهيه ومفاجأه فيها فيتامينات وحديد كمان هتلاقى معاد الجرعه كتبهولك على الشريطه الحمرا

هو : طيب يا ستى ربنا ما يدخل المرض جسمك ابدا شوفى بقى هديتى وياريت تخلينى البسهالك

هي : ايه ده مش ممكن مش مصدقة عينى علبة جوانتيات كل صوبع لون

هو : هاتي ايدك البسهالك

هي : طيب اروح دقيقة التواليت اصلح كريم الحساسيه واجيلك

هو : اوك يا حبيبتى بس اتاكدى ان البشره شربته

بعد 10 دقايق

هو : هاتي بقى اشوف المقاس مظبوط مال ايدك بترتعش كده ليه انتى لازم تعملي تحليل هيمجلوبين اكيد عندك انيميا

هي : عملته طلع كويس هروح اعمل تحليل غدة بكره ان شاء الله عشان اطمن وانت مال وشك بهتان شويه النهارده وعينك صفرا

هو : فعلا انا حاسس بشوية ارهاق متشغليش بالك

هي : اوبس معلش حصل خير

- كوز الميه اللى على التربيزه اتكب وبسرعه تمد اديها فى شنطتها وتطلع كيس-
( وتقوله : ولا يهمك امسحه بحتة الشاش دى ( أكثر فاعلية من المناديل

هي : شوفت الشريط الجديد اللى نزل السوق

هو : مش ممكن جميل جدا و بوستر الاعلان بتاعه فكرته جديدة وتشد

هي : ايوه ولا الحبايه بتاعته مغلفه عشان تحمى جدار المعده

انا جبتلك عينه تجربه وتقولى رايك

هو : اوك هبلعه بشوية ميه ونشوف

هي : يلا عشان تلحق النبطشية

هو : طيب الاسعاف مستنياكي بره هتوصلك للبيت

جرثوم

روشتة الحساب من فضلك

عملوها الرجالة

ايوه يا جماعة الوحش حسن شحاته من عندنا

عملوها الرجاله


عملوها لابطال


فرحه فرحه فرحه


مش مصدقه نفسي يا جدعان


زيدان لمها وابو تريكة حطها وجون الكاميرون معرفش يصدهاااااا


صحيح يا جماعه الفرحة غاليه والله اليومين دول


امبارح أصريت اني اشوف المتش بزاوية مختلفه


قمت اتصلت بزمايلى الشيخه رحرح ودودة وزرزر وقلتلهم يلا نجهز العدة


العدة لزوم رسم علم مصر على ادينا بمنتجات طبيعيه ميه الميه رووووووووج وقلم كحل مش بحطهم محدش يفهم غلط برسم بيهم و باكلهم بس

والمَزه كانت كالاتي


عصير قصب


لب مصري فاخر سوبر يعني


سفندي ابن عم البرتقان


حاجة ساقعة بيبس كولا


جاتون


سندوتشات لا دي اكلنا في بيوتنا


وهاتك يا اكل قصدي يا تشجيع


وجون وجون وجون


شوية واحنا قاعدين نتفرج فى الصيدلية بالمناسبة لاقينا ست كبيرة معدية بتقولنا مبروك لمصر


قمت نطيت وقلتلها زغروطة يا أم محمد


والله الفرحة غاليه يا جماعة قد كده متش كورة جمع الشعب ده كله صغير وكبير بنات وشباب مسلم ومسيحي


تفتكروا السبب ايه؟ وليه مش بيتجمعوا على مثلا حاجه زى السكر اللي غلا ولا المرتب اللى نقص ولا على الكادر ولا ولا


متهيألي لان دى الحاجه الوحيدة اللى هتيجمعوا عليها من غير خوف


ولا عشان االفرحة بقت غاليه وقليلة


على رأي مواطن بيكلم اخوه المواطن وبيقوله كويس انهم لسه مغلوش الهوا علينا او باعوه


ايييييه دنيا


صحيح نسيت اقولكم


تشيكو شيكو رونو واوا

يعنى الف مبروك بالغانى


بحبك اوي يا مصر وبحب ولادك كلهم

الله عليكوا يا شباب حقيقي شرفتونا

حياتي من غيرك كابتشينو

في حركة جدعنه غير مسبوقة قررت أنا وصديقتي" الشيخة رحرح" كما تعودت أنا أدللها - حيث أن من حق الطويل يدلع- أن نلتحم بطبقات الشعب المطحونة ونذهب لأحد أشهر مطاحن البن في الاسكندريه والذي تجذبك رائحته من على بعد 6 حارات لتناول واحد من ثلاث مشروبات أدمن عليهم وهو الكابتشينو

ولان أختكم لا يتجاوز طولها بضع سنتيمترات فقد قامت رحرح متفضلة بإعطاء بون الشراء " لدكتور الكابتشينو" كما أسميته وكانت معاناة ما بعدها معاناة بالنسبة لي للوصول لهذا الكوب الدافئ في يوم من أيام طوبة الذي جعلني كركوبة وفضلت احايلة ميردش أقوله انزل يقولى اللي عاوزنى يجيلي كده برضه يا سونة يا خاين وبعد معاناة للوصول ابتدت الحرب مع تفريغ محتويات أكياس السكر البنية اللون وقد تمكنت قواتنا من الوصول للهدف واقتحام هذا السد المنيع وذلك بعد تقديم الشيخه رحرح يد العون معي في تقليب هذا الكوب المستعصي

ولأن" اللماضه" في دمي قررت الانتقام قمت طلعت بنظري كده - أيام ما كان عندي نظر- ونظرت نظرة ثاقبة لطبقة الأوزون لدكتور الكابتشينو ونهرته بشدة : مش تعملوا حساب الناس اللي في الأرض وتخلوا البار تحت شوية اعمل إيه أنا دلوقتى مش كمان بشرب الكابتشينو للركب على الواقف وكمان مش عاوزني أطوله
دكتور الكابتشينو في ابتسامته المعتادة يشير في صمت لإحدى الأركان حيث يوجد به حافة طاولة قصيرة إلى حد ما تستخدم للأطفال

احم احم تنحنحت في خجل وهمهمت : أنا اللي جبت ده كله لنفسي
ومحاولة لتدارك هذا الموقف قلت له : تسلم أيدك على الكابتشينو طول عمري بقول عليك دكتور

وبينما أنا أسهب في الكلام عن هذه الخلطة السحرية وكيفية صنعها واخراجها بهذا الفوم المليان إذ أرى على مرمى بصري - أيام ما كان ليا بصر- لافته عجيبة نوعا ما تحمل الآتي

ممنوع التدخين للسيدات

قمت بجذب رحرح من طرف عباءتها لاستئذانها في النزول لأحدثها : شايفه كاتبين إيه ناس ذوق ذوق صراحة
مش عاوزين الرجالة تدخن حفاظا على مشاعر السيدات المرهفات و الأطفال الرضع وحديثي الولادة
رحرح : يابنتى لا دي أكيد قصدهم إن الستات هما اللي ميدخنوش بس غريبة الحكاية دى
أنا : طيب ما كانوا كتبوا ممنوع التدخين وخلاص اشمعنى يعنى السيدات لا هي أكيد زى ما بقولك كده
ولكي اقطع الشك بالسكين عن مغزى هذه ألافته لم أجد استشاري أمامي إلا دكتور الكابتشينو

(أنا : إلا قولي يا ريس ( على اعتبار أن هذه الكلمة ذات صدى ارهابي عفوا ايجابي ومن أحب الكلمات لأذن الشعب المصري
انتوا كاتبين ممنوع التدخين للسيدات تقصدوا إن الرجالة يمتنعوا عن التدخين عشان خاطر السيدات الفضليات حفيدات ابلة حكمت ولا تقصدوا إن ألطف الكائنات نفسها تمتنع عن التدخين

يجيبني مقاطعا : ايوه حاطينها عشان فيه سيدات منقبات بتدخن سجاير هنا وشكلهم بيبقى وحش

أنا : اممم يعنى عشان واحده منقبة عملت كده تكتبوا الكلام ده طيب؟

في سري: وازاى تعمل كده مش يمكن البيشه تولع هي حابكت يعني الليلة يا عمدة؟

الدكتور : لا مش كده كذا واحده منقبة ومحجبة عملتها وشكلهم مش مستحب

أنا : امممممممممم يعنى لو كانت بشعرها وبتدخن مكنش فيه مشكله ماكنتوش علقتوها

الدكتور : لا إحنا مكتبناش كده إحنا نقصد المصريات لأنهم لما يدخلوا يدخنوا كده شكلهم يعنى مش ولابد

أنا : امممممممممممممممم يعنى لو واحده صابغه شعرها اصفر أو مش مصريه عادي تدخن لكن العيب إنها تكون مصريه ومسلمه ومحجبة أو منقبة لكن غير كده براحتها وكمان الرجالة عادي لما يدخلوا يدخنوا البيت بيتهم

الدكتور : أصل فيه هنا زباين منقدرش نزعلهم

أنا : امممممممممممممممممممممممممممماشى
( وانغمست مرة أخرى في شوب الكابتشينو)

كلمة أخيره

عيب كده يا ستات كسفتونا

يوميات طالب الطب 4

رحلة البحث عن هيكل

كعادة سارت و توارثها طلاب الطب عبر الازمان و ما عرف قديما وحديثا ان طالب الطب يساوي هيكل ولان هذا لا يندرج تحت قائمة " الاوشاعات " بدأت رحلتى فى البحث عن هيكل لزورم الاستذكار والتطبيب
اجيب هيكل منين ؟؟؟

ساقتنى قدماي ومشيت على الاشوواك لاول باب اطرقه وهو باب عم زينهم عامل المشرحه والراجل الصراحه يحب يخدم

فقدم لي قائمه متعددة باسعار القطع وقالى بالحرف عندما سالته مستنكره عن غلاء سعر الحته

لماضه : يا عم زينهم أمال لو كنت فاصلت على حته بلحمها دول شوية عضم للعيال فى البيت هيموتوا من الجوع ونفسى اعشيهم كنت طلبت منى كام ؟؟
عم زينهم : والله يا دكتوره " البوضاعه " اللى عندى ما هتلاقيها فى حته تانيه كفايه انها مدهونة دوكو جاهزه وحاجه سوبر لوكس ومسكونه بقالها 10 سنين وزياده وخرجِت من تحت كفنها اجيال ورا اجيال

واخذت اقرأ قائمة العظام واتمتم : اموت واعرف مين اللى زقنى
جمجمه 90 جنيه
جمجمه بالفك مع الطاسه 120 جنيه
دراع 30 جنيه
دراع مع الرسغ وسلاميات الاصابع الاربع 60 جنيه واحصل على الخامس مجانا
جوز ضلوع 40 جنيه
فقرات الفقره الواحده 10 جنيهات وخصم 5 % على شراء المجموعه كامله
وعرض عم زينهم الخاص اشتري الان كومبو نصف هيكل 400 جنيه فقط واحصل على شريط اغنية طريقك مسدود مسدود يا ولدي
عرض الشتاء الآن ولفتره محدوده اشتري هيكل واحصل على الآخر بنص التمن
توصيل الطلبات حتى باب المنزل + 10 جنيه مصاريف حانوتية

كدت ابكي اثناء عرض قائمة الأسعار ويقاطعنى صوت عم زينهم المعتاد بنداء للطلبه بحالة التأهب لقدوم الدكتور واستعداد كتيبة الطلبه والطالبات

( انتباااااه البناطي يا دكتنه ( البلاطى يا دكاترة

شد خط ومن اول السطر

بابا انا عاوزه عضم
ابي الحبيب : عضم ايه هو الكلب اللى جرى وراكي الصبح وانتى رايحه الكليه عضك
يا بابا هو لو الكلب عضنى هوهو كده الكلام ده لو انا اللى عضيته ساعتها تبقى تخاف عليا من انفلونزا الكلاب
انا عاوزه عضم عشان اذاكر عليه مش انت بتقولى نفسي أشوفك دكتوره شاطره قد الدنيا
ابويا : طيب اجيبهولك منين ده
انا سألت عليه فى الكليه لاقيته غالى جدا وبصراحه خفت على جيوبك تزعل مني فقلت اتصرف من حته مضمونة ورخيصه وبدل ما اشترى نص هيكل اجيب هيكل كامل أهو على الاقل أخد نصه واسترزق من نصه التانى واطلع عمولتي
بابا : وده هتجيبيه منين
هو ده الكلام عوزاك تكلملنا عم مدبولى التربي وتوصيه على حاجه كده في ربيع العمر
الحاج ابو لماضة : انتى عاوزه تجيبيلنا مصيبه ! ما تشتري واحد بلاستيك
بلاستيك ايه هو انا هشتري طشت غسيل وكمان عمر ما البلاستيك هيكون زى خلقة ربنا وبعدين ده تمنه ضعف البنى ادم شوفت يا عم الحاج الأنسان رخيص ازاى وبعدين تعالى نحسبها سوا كده

شوف يا سيدي الانسان مننا بيتولد بريء يا بيه حلمه يروح المدرسه ولما يدخلها يقول امتى أدخل الجامعه عشان أخد شهادة " عوليا " يدخل الجماعه من هنا نفسه يتخرج عشان يتجوز ويشتغل بعد ما يتجوز يرجع يندم على شبابه وعمره ويقول خدنى يارب بقى وريحنى من اللى انا فيه وطبعا " لازمن حتمن " يعمل حاجه تتكتبله بيها حسنه بدل حياته كلها اللى راحت ومتكتبش فيها ولا حسنه ساعاتها قدامه حل من اتنين

ياما يموت موتة ربنا على فرشته بعد ما يجيله سكته قلبيه من فاتورة الكهربا او التليفون ويروح لعم مدبولى وعم مدبولى يبيعهولنا يا يروح المستشفى وهناك قدامه حل من اتنين لسه فيه نفس وبتحرك يبقى هنتعلم عليه وهو صاحى ولو ربنا افتكره وعياله تبرأوا منه يبقى هيروح لعم زينهم اللى برضه هيبيعهولنا اما بقى لو ركب قطر الصعيد يبقى هيخش النار حدف وهيجيلنا محروق وبرضه يجي لعم زينهم ولو كان راجل صالح وفكر يكفر عن سيئاته فى اخر ايامه عشان يقابل وجه كريم واتكتبله زيارة بيت الله الحرام يركب عبارة السلام ختام وهيلاقى عم زينهم مستنيه برضه واحنا وراه
يبقى بقى بتلومونى ليه !؟؟

شد خط اكبر ومن نص السطر

في ساعة متأخره يغيم هدوء الليل وسكونه على المنطقه المحيطة بمنزلنا مع انطلاق صفارة صرصار الزراعيه الاشبه بموسيقى تصويريه لمسلسل الضوء الشارد بعيدا عن غرفتي
يتسائل والدي العزيز بصوت خائف عفوا خافت من السرير المجاور : لماضه انتى لسه صاحيه
أنا واعوذ بالله من الكلمه دي : نعم يا بابا لا انا نمت خلاص
بابا : انا شايفك النهاردة بتذاكري على العضم اوعي تكوني حطتيه فى البلكونه بتاعة الاوضه
أنا : لا يا بابا متقلقش محطتوش فى البلكونه الدنيا برد
بابا : امال حطيتيه فين ؟؟
انا : متخفش تاويته
بابا (بنبرة قلق شديدة ) : فين يعنى ؟؟
أنا : تحت سريرك يا حبيبى
تيييييييييييييييييييييييييييييييت عفوا عطل فنى مقصود عشان الرقابه متطيرش رقابَ

كلاكيت لف وارجع تانى

جدتي الحنون كثيرا ما تغمرنا بوابل من الاكلات الشهيه فى كل زيارة لها لبيتنا محاولة منها لمساعدة والدتى فى الاعباء المطبخيه وايضا لتعطينا جرعه من اكلات الزمن الجميل الذى تفتقد بطوننا لدفئه وضياع طعمه من السنتنا هذا الزمان ولا اخفى عليكم دورها هى ووالدتي فى نصب شراك التعليم البيتوي علي كي اصبح اما ماهرة فى سلق البيض فى المستقبل القريب ان شاء الله وجاء صوتها العذب المليء بتجاعيد الزمن

لماضة امك شايله البصل فين عاوزه الحق اعملكوا الغدا قبل ما ترجع من الشغل
أنا : فى البلكونه يا تيتا اجى اساعدك فى حاجه
ولأنها من زمن كان للصحه اسم على مسمى ربنا يديها الصحه يارب قالت : لا يا حبيبتى خليكى انتى فى مذاكرتك أنا هجيبه
وانغمست مرة اخرى فى كتاب الفسيولوجى وكتاب الكيمياء محاولة لفك هذه الطلاسم التي اعتقد بان رموز حجر رشيد ايسر منها

تيتا محدثة نفسها : هي ام لماضه حطيت كيس البصل فين اكيد الكيس اللى تحت الكرسى ده هي مالها جايبه البصل كبير قوى كده ! هبقى اخليها تجيبلى كام كيلو متهيألي بصلاية واحده للشوربه كفايه
وفجأه تنطلق تيتا باستغاثه لم يشهدها العالم من قبل حتى بعد تحطم ابراج الولايات المتحدة : الحقوووووووووووووووني
أنا ببراءة الاطفال : ايه يا تيتا اللى حصل
تجيب وطلقات انفاسها المتسارعه تخرج من بين جوانحها وصوتها يكاد يكون مسموع : مش عارفه ياختى بمد ايدى اجيب بصله لاقيت ايدى فى دماغ قتيل وعنيه بتبصلي
أنا : قتيل ايه يا تيتا بس خضتينى دى الجمجمه اللى بذاكر عليها حكموا عليا احطها بره البيت حطيتها فى البلكونه
وبعدين كيس البصل متعلق فوق ولا انتى كنتى ناويه تعمليلنا شوربة كوارع على شوية العضم بتوعي
جدتى : روحوني بيتى عاوزه اموت فى فرشتى

قولوله قولوله قولوله قولوله انى فى طب يا بشــــــــــــر