خير اللهم اجعله خير وانا قاعده في امان الله بندب حظي اني اتكعبلت في كلية بنت حلال ودخلتها برجلي اليمين- اي والله باليمين - واموت واعرف ليه محدش شنكلني عشان رجلي الشمال متحصلهاش .. قلت يابت وماله شوفي طريقك عالنت خصوصا ان حكومتنا الذكيه اوي – حد عنده كلمه تانيه – عملت لنا كل حاجه توماتيكي توماتيكي عالنت .. اشي تقديم واشي موقع نقابه .... ويارتني ما دخلته بايدي اليمين – اي والله اليمين – مش كنت اكلت بيها سندوتش الجبنه افيد
د . حمدى السيد يدعو الراغبين فى دراسة الطب لدخول كليات التمريض
فى تصريح لموقع نقابة الاطباء صحح د حمدى السيد ما نشرته بعض وسائل الاعلام حول دعوته لتشغيل الطبيبات مشرفات تمريض وقال نقيب الأطباء ورئيس لجنة الصحة بمجلس الشعب انه نصح من يرغب فى ممارسة مهنة الطب والحصول على فرصة عمل جيدة ودخل متميز ان يتجه إلى دخول كلية التمريض
ونفى د حمدى السيد انه دعا لتشغيل نصف الطبيبات المتخرجات مشرفات تمريض لحل أزمة التمريض في مصر.
والجدير بالذكر ان هذه التصريحات صدرت عن النقيب فى ندوة "التحولات الاقتصادية العالمية ومستقبل سياسات الدعم في مصر (الطاقة، الصحة، الغذاء) الأربعاء 23 ديسمبر 2009حيث أكد النقيب إن وزارة الصحة تعاني من عجز في هيئة التمريض؛ حيث تحتاج إلى حوالي 50 ألف ممرضة.
وأضاف أن سوء الخدمات الصحية والعلاجية في مصر هو أحد أهم أسباب الفقر، مشيرًا إلى أن بعض الأسر قد تبيع كل ما تملك من أجل إجراء جراحة زراعة كبد في الصين.
وعند كلمة كبد نزل عليا بلم واتحسرت في نفسي يا كبد أمي على شقى عمري وسنين شبابي وعنيا الي اتمققت والحمد لله - لسه سته على سته لاني كنت باكل جزر كتير وانا بذاكر وامي تلاقي وشي مصفر تفتكره انيميا - كل الجزر الي اكلته ده يطلع مصيره الصرف الصحي وبدل ما نبقى دكتورات نشتغل مرضعات قصدي ممرضات
طيب اذا كنت لحد دلوقتي بشحمي ولحمي وشاشي وسمعتي محدش عاوز يحن عليا ويسمعني كلمه ماما – غلطه كيبوردية – كلمة دكتورة اللي من زمان نفسي اسمعها
الناس تنادي عليا بكلمة "ميس " طيب ده انا حتى مبحبش ادرس لحد وبحب مبدأ " اللي ذاكر ذاكر واللي غنى غنى " وعندي عقده من المثل ده بالمناسبه ومحدش يسألني سببها دلوقتي
" ميس " على اخر الزمن أغير للعيال عفوا " للعيان " الكافولة وابقى " حقنجية " بدل ما كنت "بطنجية " وبدل ما هشيل في شنطتي بالطو هشيل منديل راس
طيب اذا كنت انا بطولي وهيبتي دي كلها بطول سرير الكشف بالعافيه يبقى هعلق ازاي المحلول في الحامل ؟؟
وازعق في العنبر طول النهار سد يا عيان منك له الميس عطية معدية الي عارف معاد حقنته يصدر سحنته
كابوس ده يا اخواتي ولا انا رفست الغطا .. يا خسارتك يا لماضة في مهنة ذات الرداء الابيض .. انا عارفه ان دكتور حمدي عنده حق والتمريض مهنه محترمه ومتعبه جدا لكن للدرجادي اتدهور حالنا.. يلا اكتر من كده ويزيح ربنا
أقراص سحرية للواسطه تحتوي على كمية كبيرة من الأشخاص المهمه والمناصب المفزعه وبعض الفكة
الخواص
فيتامين واو أحد مضادات التفكير وتقليل الصبر ومساعد هام في تدمير الاصرار والأمل كما انه خافض للروح المعنوية ويمتاز بأنه سريع المفعول والاختراق لكافة المصالح والهيئات ويصل لآعلى مستوى له في الخدمات الحكومية خلال اقل من نصف ساعه عند اعطاء فيتامين واو المركب والممتزج بالبنكنوت ولا يوجد اي طريقة للتخلص منه لا عن طريق الهضم ولاحتى التبول اللاارادي
الجرعة و دواعي الاستعمال
تختلف كمية وحجم الفيتامين حسب نوع الخدمة وكفاءة المركز المنتج للفيتامين
الآم البطالة ، كدمات المرور ، بعد عمليات الاغتصاب المادي والمعنوي ، يحمي الشباب من اليأس المبكر
الالتهابات المصاحبة للأنتخابات ، حالات ارتفاع درجات التنسيق ، حالات عسر الترقيات ، وإصابات الطوابير
كما انه مفيد في تسليك أي طريق مسدود
الاحتياطات
لابد من التأكد من ثقل الفيتامين في التأثير وشرط تغطية بعض المناصب الحساسه
يمنع استخدامه مع المرضى الذين يعانون من حساسية مفرطة من الكراسي القيادية والحالات المصابة بالضمير الحي لذلك يراعى عدم استخدامه بجرعات كبيرة لاحتمال حدوث تشنجات
الاعراض الجانبية
قد تحدث بعض الاضطرابات البسيطة بمجال العمل وبعض القيء والبصق من فئات المجتمع الدنيا والتي يمكن تلافيها اذا تناول الفيتامين مع الاطعام
كما قد يحدث طفح وهرش لدى الشعوب نتيجة للقهر وغالبا ما يحدث فشل في النظام
العبوة
كبسولة او اثنين على الاكثر كما يتوافر الفيتامين بالأشكال الاتيه
أقماع وأمبولات وجيل وشراب معلق وقريبا على هيئة محلول
الاخوة المتعصبين أو محدودي الفهم برجاء الامتناع عن قراءة هذا الموضوع واذا تفضلتم بقرائته الرجاء اكماله لاخر حرف حتى لا تسيئوا الفهم والتسرع في الحكم
على غير المعتاد وغير الاتفاق ايضا مع صديقة كفاحي صحبتشي وحبيبتشي صابونة – نظرا لكثرة شغفها بالاستحمام - وفي رواية أخرى سحلية النيل – نظرا لانها كانت بطله في السباحه - ذهبنا للسنكحةفي أيام الاجازة وكأنه نوع من الاخذ بالثأر بما تفعله بنا العلمين ومرضاها من المارينز نسبة الى مارينا
وبدوري انا المجنونة الاولى اخبرتها عن نيتي القتالية في حضور احدى حفلات مكتبة الاسكندريه المقامة .. وان الحفلة لن تزيد عن بعض الموسيقى الروحانيه كما قرأت الاعلان .. وانها فرصة للتروية عن نفوسنا.. خاصة عندما ضربت على وتر حساس لديها وهوعشقها لموسيقى الجاز فلربما يتواجد بالحفل هذا النوع
وبالفعل بعد الحاح شديد منها – مش مني الحمد لله – واخذ الاذن من عائلاتنا الكريمة بان كل منا قد تبرع للاخر بعزومه لا ترد على هذه الحفلة القيمة التي لا نعرف ماهيتها حتى وصلنا شباك الحجز
فاذا بالموظف وبدون ان انطق بكلمه يقول : داخلين حفلة النهارده فيه تذاكر كتير كام واحده
فأجبت وانا في حالة ذهول بعد ما لمحت الاعلان مره ثانيه انه انشاد ديني باللغه المصرية وطريقة عرض الموظف للتذاكر وكأننا على شباك بيع حشيش يستفسر عن العدد والكمية
اخبرت صديقتي بالمفاجأة حتى تستعد نفسيا
لماضة : على فكره ده انشاد ديني باللغه المصرية
صابونة : يعني ايه ؟؟ مفيش موسيقى
لماضة : يا بت انشاد ديني يعني اكيد فيه ابتهالات وكده يعني
صابونة : يعني ايه انا جايه اقول لأجل النبي و مدد مدد ومفيش جاز
لماضة : لا جاز ولا نفتالين بلي .. بقولك ايه احنا خلاص قطعنا التذاكر.. كان زمانا اكلنا بيهم ايس كريم من عند بندق انتي الي ركبتي دماغك وطلعتي ايدك مالشباك ودفعنا الاجرة للسواق .. استحملي بقى .. وبعدين يابنتي انتي جايه تعصي ربنا .. جاز ايه وبنزيم ايه بقولك انشاد ديني
صابونة : عندك حق الحمد لله انتي من ساعه ما قلقتي منامي الصبح ومعرفتش انام بعدها قعدت ادعي عليكي وماما ما صدقت بعتتني اجيبلها حاجات من السوق رجعت ضهري متكسر لاقيتها بتدعيلي الحمد لله ففرحت
لماضة : شفتي بقى يعني لولا اني صحيتك مكنتيش اخدتي الدعوة دي عشان تعرفي بس اني من الصبح ممشياكي فينور الله ادعي واقول يارب .. يلا ندخل الحفلة هتبدأ
وعلى باب الدخول
اذا بموظف اخر ياخذ التذاكر في سرعه اكبر مما تخيلت وتلاها تفتيش لنا لولا الحرج لصار تفتيشا ذاتيا لجواربنا داخل الاحذية
داخل القاعه
أكثر ما لفت نظرنا وجود عدد كبير من السائحيين الاجانب من مختلف الدول حيث فاق عددهم الحاضريين من المصريين وقلة عدد المحجبات مما زاد حيرتنا ما طبيعة هذه الحفلة ؟؟
لماضة : واخده بالك ان الاجانب من كل مكان انا حاسه اننا في مهمه في تل ابيب
صابونة : بس الاجانب دول هيفهموا ايه اذا كان الانشاد ديني وبالمصري كمان .. جايين زي عواجيز الفرح يصقفوا وخلاص .. لا و فيه حاجه كمان ملاحظاها الاخوة المسيحيين كتير برضه يا خوفي لا يكون اللي في بالي صح
لماضة: آه فعلا انا برضه في بالي حاجه وخايفه تطلع صح .. استغفر الله العظيم بس ايه الي في بالك يا صابونة ؟
صابونة : لا وكمان مفيش بنات مسلمة غيرنا هي احتفالات رأس السنه بدأت من دلوقتي ولا ايه ؟؟
لماضة : حاسه اني جايه احضر قداس .. او اننا اتنين مساطيل دخلنا جامع في صلاة الفجر .. الحقي ده فيه أخت داخله .. بقولك ايه ما تيجي ندخل الحمام ونختفي لحد ما النور يطفى احنا شكلنا غلط في المكان ده وكل الناس بتبصلنا
صابونة : يارتنا كنا رحنا عند بندق
لماضة : شفتي يا صابونة وانا الي كنت فاكره اننا جايينا نرضي ربنا
اثناء حديثنا تستأذن فتاه مسيحيه للعبور بين الكراسي وتشكرنا بعد مرورها بكلمة ميرسي
صحبتشي صابونة ترد على الفتاه : الشكر لله
لماضة : يابت قولي الشكر للرب هتودينا في داهيه
تظهر مقدمة الحفل لتنوه ان الحفل يحوي مؤلفات موسيقية وابتهالات صوفيه وقبطية تتوحد جميعا لاعلاء كلمة واحده هي حبنا لله وان الفرقه تجمع عدد كبير من الفنانين العالميين من مختلف دول العالم باختلاف ثقافتهم وديانتهم حالها حال الجمهور الحاضر
الحق يقال ان هذا المطرب تفاعل الناس معاه بشكل كبير جدا سواء مع الالحان او الكلمات وكانها تسبيح للسماء نابع من القلب رغم كونها باللغه المصرية الا ان الاجانب تذوقوها وتفاعلوا معها الحفل كان رائع بحق سواء الابتهالات الاسلاميه او القبطية او حتى الموسيقى كانت غاية في الاتقان والروعه
لماضة : تصدقي انا مبسوطه فعلا
صابونة : وانا كمان الحمد لله ما أغضبناش ربنا وافتكر ولا هما كمان شوفتي اهو كله بيتكلم المهم ان كلهم بيذكروا ربنا بطرق مختلفه شوفتي كانت نيتنا ايه ربنا برضه مش عايزنا نعمل حاجه وحشه اهو كله كلام لربنا
لماضة : شوفي الغريب اننا عايشين سوا بنحب بعض بنتريق على بعض الي بيفرق معانا بس هو الاحترام والتقدير لبعضنا وده الي مخلينا متعايشين سوا وافتكر ان الي بيجمعنا اكبر من كده وده اكتر حاجه خوفتنا من الحفلة
خوفنا اننا نغضب ربنا واكيد هما كمان وده في رايي اهم شىء خوفنا من ربنا ومحبتنا له هي سر اجتماعنا
فعلا لكم دينكم ولي دين وكفايه اننا كلنا بنعبد اله واحد هو الله مهما كانت ثقافتنا وديننا المهم اننا في الاخر موحدين وبنصلي لله
صحيح احنا الي عملنا في نفسنا كده .. الصهاينه والامريكان نهشوا في العرب واستباحونا لنفسهم .. والعرب نهشوا في بعض .. وحتى احنا نهشنا في حكومتنا ونهشنا في بعض قبل ما حد ينهشنا .. بإختصار نشرنا غسيلنا المزهر ناصع البياض
بس انا ادعي على ابني واكره الي يقول آمين .. يعني اكره الصهاينه والامريكان لما يدبحوا في العرب والمسلمين .. وأكره حكومتنا لما تذل شعبها وتخليه اقرب للكفر والانتحار .. لكن حد يمس طرف مصري اهو ده بقى كُره الكُره
تعصب لماتش ماشي احنا كمان بنقطع بعض في الماتشات المحليه زي الاهلي والزمالك ما بالك بقى كأس عالم هندخله .. وكل واحد من حقه يتعصب لبلده لكن بلطجة وهمجية وقلة أدب مش هتعدي بالساهل يا شعب ابو تلفيقة
والموضوع مش موضوع كورة نهائي والي حصل ان دل يدل على اننا شعب رجاله ومحترم وده مش معناه اننا شعب جبان .. ده راجع لاحترامنا لنفسنا ولدينا ولبلدنا وللايام المفترجة الي نسيتوا اننا فيها .. ولان ميصحش نضحك علينا الشعوب التانيه .. ولا إحنا بقينا زي الاطفال بنتخانق على لعبة
وإن كنت شايفة للموضوع ابعاد سياسية واضحة الايام هتكشفها دواليك والي اقدر الخصها في عنواين الاخبار كالاتي
اولا : تدخل صهيوني وامريكي واضح وصريح للتفرقة بين العرب
ثانيا : جر رجل مصر للاشتباك في حرب عربية قذرة لصالح من الله اعلم
ثالثا : نوع من اللإلهاء الاعلامي للشعب المصري عن أخطاء وسرقات لا حصر لها في هذه التصفيات
رابعا : إتباع رجل السلطة الاول خطة انتخابيه جديدة لفترة رئاسة قادمة سواء له او لاحد ابنائه واستعطاف الشعب تجاههم وصرفه عن بلاوي كتير بتحصل
واعتبارات كثيرة أخرى لابد لها من دراسة لان الموضوع مش متعلق بسياسة دولتنا بس بل بسياسة دولة الجزائر ايضا يجب الالتفات إليها بحذر شديد
الحلول الجزرية من وجهة نظري الضئيلة للموضوع ده
تدخل فوري للفيفا بالتحقيق مع منتخب الجزائر فيما بدر منه من عنف داخل وخارج المستطيل الاخضر وسحب نتيجة المباراه ويكون احسن لو ميدخلهوش كأس العالم من أصله لانه بصراحه فريق ميشرفش
تدخل حاد وقاطع من الحكومة برد اعتبار مصر ازاي معرفش دي شغلتهم يتصرفوا
تعويض مادي مناسب لكل الاضرار اللاحقة بالمصريين في الجزائر
مطالبه رسمية للرئيس الجزائري وسفيره بالقاهره بالظهور بالاعلام المصري لتكذيب ما نشرته صحفهم الحقيرة من كذب واعتذار رسمي لشعب مصر كله وان كان الاعتذار مش هيشفي غليلنا ولو سابونا عليهم هناكلهم بسنانا
الجميل في الموضوع
اقدر اقول انه بارقة امل عمري ما عشتها
ان اخيرا حسيت ان قلبنا على قلب بعض وان مصر بتفوق من النوم وقامت من على الترعه مش بتغسل شعرها وبس لا دي بتستحمى كمان
في المنزل .. حيث يقوم سوووو بعمل وجبة الافطار وتقوم ماما نظمية بمشاهدة التلفزيون
ماما نظمية : واد يا سوووو .. ماتعرفش برنامج ايناس الدغيدي هيتذاع الساعه كام
يخرج سوووو من المطبخ وهو مرتديا مريلة المطبخ ورابطا رأسه بمنديل بـ أوية .. وممسكا بالمغرفة ويبدو عليه الاستعجاب
سوووو : ايناس الدغيدي ايه دلوقتي يامّه ؟؟
ماما نظمية : مش هي بتعمل برنامج اسمه الجريمة برضك ؟؟؟
سوووو : لأ يامّه جريمة ايه بس .. أنتيدايما مخك رايح للمصايب .. اسمه الجريئة ..على وزن الجريئة والوحش .. حتى شفتيها وهي بتغيظ الوحش بشعرها وشوية شوية تلاقي كتاكيت بتنطلنا من التليفزيون منه .. بس ماعتقدش انهم ممكن يعرضوه قبل الفطار .. إلا بقى لو كانو عايزين يكسبوا ثواب افطار صائم قبل المغرب !!!
ماما نظمية : ليه بقى .. دي حتى بتقول حِكَم وكلامها موزون ويمكن كمان تعرض حتت من افلامها وخصوصا فيلم مذكرات مراهقه الي بيفكرني بأبوك وشقاوته وهو في شبابه
سوووو : - محدثا نفسه - حِكَم وكلامها موزون .. انا فهمت بس ليه بابا بظبوطي طفش وسابنا وساب البلد و هَجّ على أطاليا !!!
سوووو : اهلا .. اهلا .. تعالى يا بظبوطي شوف مراتك اللي انحرفت على كبر !!!!! شوية شويه وتقولي عاوزه اشيت على الفاسينجر !!!!!
-----
قبل المغرب بدقائق .. تخرج لماضة من حجرتها و تقابل سوووو و ماما نظمية
لماضة: يااااااااه .. انتم فينكم يا جماعة من رمضان اللى فات .. من أيام معركة الرنجة على الشط .. وحشتونى .. أمال فين عسقول و بابا بظبوطى ؟؟
سوووو: يا فتاح يا عليم يا رزاق يا كريم ... ما كنتى فى أوضتك بقالك حداشر شهر ... إيه اللى خرجك دلوقتى .. عسقول يا ستى راح يجيب لنا عرقسوس من بتاع عصير القصب اللى جنبنا .. و بابا بظبوطى ماعجبتهوش الأوضاع هنا .. فخلع على أطاليا
لماضة : كدة من غير مايقول إنه مسافر .. أصلى كنت عايزاه يجيبلى من هناك بيتزا ومكرونه شعر بدل اللى بيعملها سوو
سوو : ايه مكرونة شعر دي .. شيفاني بعملك مكرونة مولد النبي .. عشان تعرفي بس انك خيبه ولا عمرك هتفلحي في مسكة المغرفه
طااااااااااااااااخ .. باب الشقة يترزع و يتفتح و يدخل عسقول محنى الظهر و يحمل فوقه برميل ضخم
عسقول صارخا : يا عم سوووو أنا مش رايح مشوار العرقسوس دة تانى .. و اجرى بسرعة نزل من على ضهرى البرميل
ماما نظمية : اتحرك ياد يا سوووو نزل من على ضهر أخوك تموين العرقسوس اليومى بتاعنا .. الواد شكله خلاص هايقع من طوله
سوووو: حاضر حاضر – إيه المياعة دى .. هى هاتفرق فى إيه لما يبقى شايل العرقسوس على ضهره أو شايله فى بطنه
عسقول: يا عم أنا دوخت على ما لقيت برميل بالحجم دة .. و بعد ما أخدته و روحت لبتاع العصير و طلبت منه يملاه عرقسوس .. قال لى أسيبه و أفوت كمان يومين يكون ملاه .. قلت له يومين إيه يا عم .. دة الأدان فاضل عليه ساعة و أنا عايزه قبل الفطار .. المهم فين و فييييين لما قدرت أقنعه يملا ربعه
لماضة : ربعه إيه .. دة البرميل مليان
عسقول : ماهو أنا روحت على بتاع عصير تانى بس العرقسوس اللى عنده كان خلص .. فقلت له خلاص .. يحط كل التمر هندى و السوبيا اللى عنده .. دة حتى الله يكرمه حط لى جركن عصير بطيخ كان فاضل عنده من بتاع أسبوعين كدة.. و الغريبة إنه ما أخدش فلوس على عصير البطيخ .. فيدوبك .. عدى نص البرميل بالعافية
سوووو: أمال النص الباقى دة مليان إيه ؟؟
عسقول : و أنا راجع لقيت على الناصية زير مية و كام قلة .. روحت مفضى اللى فيهم جوة البرميل .. فيدوبك جاب تلات أربع البرميل .. بس فيه قلة وقعت منى جوة البرميل فكسلت أرجعها مكانها
عسقول: أيوة .. بيخمرها بالتبول الارادي .. و الراجل حط لى شوية لفت صحيح و جزر و لمون ببطرماناتهم
ماما نظمية : و الله براوة عليك يا ولد يا عسقول .. عرفت تتصرف صحيح .. بالهنا و الشفا يا أولاد .. كل واحد يدخل بقى يجيب له جردل عشان يغرف لنفسه من منقوع البراطيش اللى فى البرميل دة .. عشان خلاص المدفع قرب يضرب .. و التفاعلات اللى جو البرميل هى كمان هاتضرب
-----
آذان المغرب .. ويجلس الجميع ( ماما نظمية و سوووو ولماضه وعسقول) على الطبليه اللى بطول طرابيزة الميس بتاع الجيش , وبمجرد ما يبدأ الآذان ينزل الجميع حتتك بتتك عالاكل زى الحمير فى النجيل.. لا الحمير بتشبع و لا النجيل بيخلص لغاية ما يتبشمو وينامو على ضهرهم كما البهايم
عسقول : يااااه .. أنا متهيألى زودناها شوية فى الأكل المرة دى !!؟؟ مع إن الأكل مش ولا بد مع عدم اللا مؤاخذة
لماضه : قول لأخوك اللي مش راضي يعتقنا و زي ما يكون بيعلفنا
ماما نظمية : ألا صحيح يا سوووو .. ايه البتاع الاخضر اللي عامل زي الملوخيه ده؟؟
لماضة : هاهاهاهاىىىى .. دة النجيل يا نظنظ
سوووو : نجيل إيه بس .. ده الصنف اللي لقطته وعملته لما كنا بنتفرج عالبرنامج الجديد بتاع الاكل اللي قلتلك عليه
ماما نظمية : بس ما كانش طالع معاه اخضر زي ما طلع معاك كده !!!!!!
من 3 سنين تقريبا اتسابقت انا واخواتي أزاي نفوز بافطار صائم وبالدعوة دي .. اكيد مش دعوة فرح -عقبالي يارب - ولا هي دعوة غداء – أوعدنا كده - دي دعوة صائم عند فطره
قمنا أشترينا قيمة تلاته اربعة كيلو بلح على عجوة .. وكل واحد خدله ناصية - غرضنا كان شريف المره دي - قبل المغرب بنص ساعه عشان نوزع على الناس اللي هيأذن عليها المغرب قبل ما توصل بيتها وبكده نبقى فطرناهم على حسابنا ولا اضطرينا نعزمهم بقى ووالدي يدفع من لحمه الحي .. ولا أمي تفضل تطبخ وتجهز لمية صنف .. ولا أنا اتعاقب بغسيل مواعين المية صنف دول
هما يدوب كام بلحاية يفطروا بيهم وكتر ألف خيرنا .. يحمدوا ربنا .. ويدعولنا من قلبهم .. ويفتكرولنا الجمايل دي
وفعلا انتقلنا بإذاعة خارجية إلى ما يطلبه الصائمون في برنامجهم المفضل على السفرة او على الناصيه مفرقتش كتير
وفجأة ظهر اول فدائي من بعيد .. طلعت اجري وبعزم عليه بالبلح .. لاقيته بياخد ويعبي في جيوبه الاتنين - ايوه مهي حاجه ببلاش كده - وياريت على كده وبس قام واكل شوية كمان وهو واقف - مهو بلح سايب - وبعد ما شبع قالي انا عمك جرجس جاركم الجديد !!
بعدها على الناصية التانيه لمحت بنت الحارة – حبيتك يا أم حلق تارة – المره دي هي اللى جريت علينا وطبعا العلام مش بالساهل - اللي يتلسع من الشوربة ينفخ في كباية الشاي - قمت عديت 4 بلحات زي الشرع ما قال واديتهالها .. لاقيت البنت بتبصلنا بنظرات عجيبة شككتني في نفسي .. وقامت واكلاهم وهي ممتعضة قوي .. قلت وماله بعذرها !!
وبعدها بلحظات قرب مننا شيخ من مظهره طبعا يدل أنه خارج دائرة الشك قمنا مقدمين كل عزيز لدينا من تمر وعجوة بنظرة منكسرة لاقيناه فرح قوي وقال بارك الله فيكم أي والله قالنا بارك من غير ميم وسألنا هو البلح ده منين
قلناله : من عند عم فتحي البقال
الشيخ : لأ أقصد فلوسه حلال
لماضة : والله يا شيخنا احنا وفرنا مصروف البمب والصواريخ وقلنا نعمل حاجه ابتغاء مرضاة الله ونفطر صائم ونكسب دعوة لا ترد
الشيخ وشه نور وقالنا : والبلح ده نوعه ايه
لماضة بكل سذاجة : ده بلح مستورد أه ونص أسمه بلح نانسي
الشيخ وشه اتقلب ضلمة ورمى البلح من ايده بعد ما كان بيفكر يدوقه : استغفر الله .. اعوذ بالله منكم ومن أمثالكم .. هتخلوني أعيد وضوئي .. ربنا يهديكم أنتوا واللي زيكم
شوية ولاقينا مجموعة شباب زي الورد .. ميلت على اخويا وقلتله اتعرف على اساميهم الاول .. وفعلا الشباب رحبوا بينا قوي الحق .. وبدأنا نوزع عليهم البلح فعلا البركة بالشباب .. ولسه ملحقتش اتهنى بالبركة دي لاقيت الشباب بيلعبوا نبلة بنوى البلح !!
قلت لأخويا هو حل من اتنين اما ان المغرب اليومين دول بيأذن والشمس طالعة .. أو ان فيه فتوى جديدة ماشية في البلد ان البلح مش من المفطرات
أو أن البلح ده متهرب او براني والناس بتشك في ذمتنا وبيدخلوه على المطحنه يتاكدوا انه بيطلع نوى
او مش لاقيين في التمر عيب قال يا مفطر الصايمين
.. أنا حاسة اننا بدل ما بناخد ثواب بنحرض الناس على الرذيلة وبنمارس فعل فاضح في الطريق العام
بقولك ايه يلا بينا نروح بدل ما يجوا يمسكوني انا والبلح ونتلف في ملايات .. ولا يحرزوا على شوية البلح الباقيين اللي هنفطر بيهم واحنا بندعي دعوة صــــائم .. توب علينا يارب !
