Wednesday, 31 December 2008

هنحتفل ازاي بالراس ؟



فيه ناس سابت الراس واحتفلت بالرجلين او بمعنى ادق بالحذاء زي ما امتعنا الزايدي بالضربه الحره الغير مباشرة
لكن للاسف فيه ناس مصره تحتفل بيها عن طريق المفرقعات تقريبا كده والله اعلم في صغرهم من كتر ما كانوا بيلعبوا بالبمب ومسدسات الميه زي ما المثل بيقول ابنك على ما تربيه فطلعت تربيتهم دي على خلق الله عن طريق تسديد ضربات حره مفخخه على قلوبنا
ناس تانيه صاحبة مزاج عالي قوي بتحتفل برقص عفوا رأس السنه على انواع مختلفه من الاستقصاءات الي تجيب المرارة والحلاوة قصدي السكر في نفس الوقت زي مطرب العام وممثلة العام و..... العام وبلاش أفسر بدل ما نروح في داهيه كلنا
كل واحد فينا بيحتفل على طريقته
في طالب بيحتفل بمرور التيرم الاول بالتفكير في التخلص من كافه الكتب دون رحمه فور انتهاء امتحاناته
والد ورب اسرة فاضل بيدور على المرتب الفاضل في جيوبه وبيدعوا  بالستر حتى طلوع النهار بأمان ليسرع في الحصول على مرتبه بعد الضرايب والحجوزات والخصومات ده اذا كان فيه فاضل
ناس مسافره وناس مفارقة وناس بتفتكر همومها وناس بتداري ندمها على سنه فاتت ويا سنه ما تمت
وناس بطلت تفكر وسلمت امرها للرب يدبر
اما انا فبتشاقى مع  والدي  زي كل سنه بنحتفل فيها بسؤاله حد يتولد في البرد ده ؟؟

كنت أصغر من كده
كنت أصغر من كده
بشوية سنين
بغلط كتير ف عدها
كنت أصغر من كده
والدنيا طولها
أد عرضها
كنت ممكن أحب ف اليوم
ألف مرة
وكل الحاجات كانت
تليق على بعضها
كنت أصغر من كده
بسنين كتار
كنت فاكر
إن الناس تسافر
بس عشان تحج
ماكنتش أعرف
شكل تصريح السفر
ولا ختم الدخول
ولا الباب الحديد
اللى ف صالة الوصول
ولا كنت لسه تعبت
من قسوة الانتظار
كنت أصغر من كده
والدنيا أولها هنا
حضن أمى
زى كوباية حليب
أو معلقة عسل
قبل الفطار
كل يوم بعد العشا
استراحة من تعب طول النهار
جدى لا كان عنده دهب
ولا عنده سهم محيره
فى سوق العقار
جدى كان عنده يقين
الله حى
والبركة دايماً ف اللى جاى
والبنات زى البنين
وهو ده المعنى الحقيقى للعمار
يفتح كتاب الحب
نفرح كلنا
يشرح لنا
ويقول لنا
وصانا ليه سيدنا النبى
على سابع جار
علي سلامه

Saturday, 27 December 2008

مش كفاية كده

مش كفايه بقى تدبحوا فينا 
دم الشهداء دول في رقبة مين لو مش في رقبتنا كلنا وانتوا أولنا 
ورونا بقى هتعملوا ايه 
لسه مصرين تتكلموا وبس 
تحكموا وتتحكموا وبس
حسبي الله ونعم الوكيل

Monday, 15 December 2008

خلي الحذاء صاحي


خلي الحذاء صاحي
كانت هتدخل الشبكه - شبكة العين اقصد- 
بس معلش لسه فيه وقت بدل ضايع
تحديث
 واحد : يا جدعان دي الجزمة اللى حيلتي 
  اتنين : بفكر اليومين دول اشتغل جزمجية على الاقل تلميع الأحذيه افضل من تلميع الوشوش
تلاته : وصلتني اللعبه دي على الايميل 
ادمنتها بعد ادماني لعبة البليه في  الرمل 
http://play.sockandawe.com/

Thursday, 4 December 2008

سيبونا نموت باللحمة .. وانتوا تعيشوا وتاكلوا الفول


http://www.3hood.org/uploaded-3/pinksadcheeeep.gif
أولكشي كل سنه وانتوا طيبين وفي الفته عايمين قولوا آمين


أعلمكم اني مازلت على قيد الحياة وبخير – سبحان الله – 


بس مش هقدر اكتب اي حاجه الفتره الجايه .. لحد ما آكل لحمة العيد .. آآآآآآكل لآول


لازم اتغذى الاول بالبروطيم الحيواني المعتبر - حيواني مش فولي -  هو ده حاجه سهله اليومين دول !!


 وبعدين دي حاجه بتتشم من السنه للسنه أقصد حمام العيد مش اللحمة أكيد ربنا يخليك يا مأكلنا اللحمة البتلو


ولأن طبق الفته المزين بحتت اللحمه وشوية مكسرات من فوق – يا سلام ريقي جري – يعتبروا شىء اساسي في حياتي 6 ايام العيد فطار وغدا وعشا – شفتوا السرعَه الي انا فيها  وياريته بيبان – وده لاني بشحن للأيام وبجْتَرّ منه بقية السنه – زي ما يكون معندناش لحمة -  فلازم اكون متفرغه تماما فكرياً وحسياً ومَعدياً  - بفتح الميم بمعدة فاضيه يعني محدش يقراها غلط بضم الميم ويفكرني عندي جرب لا سمح الله


لذلك


أكلني تجدني .. ومن قدم فخدة بيداه أكلتها .. وهنيالك يا دابح الخيل