Saturday, 30 August 2008

رمضان جانا وغسلناله


دائما ما يهل علينا الشهر الكريم بنوبة عالية من النسمات الايمانيه العطرة والأجواء النقية وأستشعر معي بعنايه لفظة نقية فشهر رمضان يشهد حملة نظافة عالميه ودولية وبيئية و اجتماعيه واقتصاديه وفردية ونفسيه وعصبية .


لكل فرد نصيب في اكمال هذا " الفوم " الضخم من الغسيل و" نشره " وانجاحه على جميع المستويات فتجده يبدأ بمشاركة الأطفال ويتدرج ليصل لأعلى المناصب والأعمار.




فنلاحظ صغار السن يقومون بحملة غسيل مدوية لكافة الشوارع والحارات وإزالة ما بها من مخلفات والتسابق في تزيينها بأجمل الألوان والاضواء ورفعها بنفس شكل " حبل الغسيل " لربط نفوس شفافة ناصعة البياض بين البيوت المتجاورة والحارات.




وتشمر عن ساعديها ربات البيوت لتبدأ في غسيل أركان المنزل والمفروشات كواجب منزلي سنوي متبع لأستقبال العزومات وأيضا غسل أركان الثلاجات لأستقبال الكميات المهولة من اللحوم ومنتجات الألبان بمختلف أنواعها  ويمتد ساعدها لغسيل " الدوالايب " وازالة الملابس القديمة استعدادا لاستقبال جديد الاعياد .




اما الباعة فيبتكرون فنون في غسيل بضاعتهم الباليه الباقيه من العام الماضي وتجميلها للقيام بمعاهدة غسيل منزلية دولية مشتركة بينهم وبين ربات البيوت ضد رجل الأسرة البسيط المشارك  بكل ما يملك من محتوى الجيوب في هذه الحملة وإستلامه اياها بعد الشهر الكريم أنظف من الصيني بعد غسيلة.




ويأتي دور الشباب في هذا الحدث بغسيل السنتهم من الالفاظ البذيئة والمعاكسات وغسيل اعينهم وآذنهم من مشاهدة الكليبات وايضا غسيل اجهزتهم المحمولة من اللقطات والنغمات واستبدالها ببعض الابتهالات والقراءات.




أما عن الشابات فيشمل غسيلهن فقط الوجوه من أطنان مكياج الخدود والعيون والشفاه واستبدال كل ما يشف ويصف بغسيل بعض الملابس الواسعة المهملة طيلة العام.




وهنا يأتي دور الاعلام الفعال بجهازه الشغال بكل بيت لتغسل كل قنوات التلفاز ما قدمت من أعمال وتستعد لأستقبال شلال من الدراما والبرامج الحوارية والأذاعية ويتسابق كل فنان في غسيل مظهره وحنجرته ليشدوا بأعذب الكلام تيجوا نصوم شهر رمضان.




أما رجال الاعمال  فواجب علينا الا ننكر دورهم المؤثر في حملة الغسيل القوميه بالقيام بغسيل كل الأموال والقيام بموائد الرحمن على مد الابصار مفخخة بكل ما لذ وطاب على أعلى المستويات خاصة رغبة الراقصات التائبات العابدات في غسيل أموال " نقطتهن " بمثل هذه المائدات.




وذلك بعد تجلي دور رجال الدين في إصدار فتوى بـ " إن من يفطر من عابري السبيل عليها دون أن يدري لمن هي لا حرج عليه، أما من يذهب إليها خصيصا للإفطار هناك وهو يعلم أن القائمة عليها راقصة فلا يجوز."




فبهذا نجد ان حملة الغسيل حملة قومية فنية أجتماعية فردية يشارك بها كل كائن كان




وهذا كله تحت رعاية حكومة عظيمة يكفي أن يحمل رجلها أسما نظيفاً



ويكفي ان الكون كله يُغسل من الشيطان الم يحن الوقت ليُغسل الأنسان

Sunday, 24 August 2008

كوباية لبن



يلا يا حبيبي اشرب اللبن


يا ماما مبحبش اللبن بيوجعلي بطني


اللي بيشرب اللبن الصبح بيكبر بسرعه وبيبقى راجل


يعني لو مشربتش اللبن هفضل عيل


اللي بيشرب كوباية اللبن بيبقى اشطر واحد في الفصل


هو أنا لو شربت اللبن هبقى ظابط


لو شربت كوبايتك كلها هديك ربع جنيه



طيب لو شربتها على بؤ واحد مش عاوز سندوتشات المدرسة


اللبن يا حبيبي بيخلي جسمك قوي


طيب ممكن مشربش لبن بكرة واشرب شاي زيك


يلا نشوف مين هيخلص كوبايته الاول


مصير كوب اللبن


الشرب رغم الأنف


شرب نصفه وافراغ الباقي في الحوض خلسة بطرق سحرية مختلفة


اعطاءها للأب كنوع من الإذلال


إستجداء عطف الأم بالقيام بمسرحية قصيرة بطلاها البكاء والشحتفة




ملحوظة مرعبة

اللي مش هيشرب لبن الصبح هيبقى زي طنط لماضة كده

Friday, 22 August 2008

ناكلوا حلاوة .. ناكلوا جاتوه .. ناكلوا كل اللي نحبوه




المعاد بكرة ان شاء الله في ساقية الصاوي
هناكل احلى قطعة جاتوه مع العدد التاني من مدونات مصرية للجيب
مبروك لينا كلنا ولكل حد جميل شارك في العدد ده ومبروك بشكل خاص لحبيبتي اللدودة مروة جمعه
ياريت يا جماعه حد يتبرع ويشتريلي نسخه ويمضى كل الناس الجميله دي عليها ويديها
ل هشام علاء يا جماعه لاني مش هقدر اكون متواجدة للاسف

خبر كمان
ياريت تشوفوا مجلة روز اليوسف الاحد القادم بأذن الله
وتشجعوا اختكم الصغيرة

Tuesday, 12 August 2008

يوميات طالب الطب 6

إحنا بتوع الليل وآخرة


اخدت قرار انا والمغامرين التلاته مورسي وثوثن وثوعاد ابطال دوري الترع ضفادعي الاحباء بضرورة ركوب القطر وقد كان
لبستهم وبرفنتهم ومنجهتهم ومشمشتهم وقمت حطاهم جوا اكياس بلاستيك شفافه عشان محرمهمش برضه متعة المناظر السياحية بصراحه مردتش احطهم جوا قفص لاني مكنش معايا 50 جنيه زي لينا عشان اشتريه وكمان خفت عليهم من انفلونزا الضفادع
وجريت الحق قطر 6 صباحا بالتمام والكمال صحيح ملحقتوش قوي لان القطر كان بينه وبين المحطه يجي 15 متر كده بس الفضل يرجع للرياضة اليوميه في الجري والشعلقه في المواصلات ولأجل الحظ سواق القطر لمحني قام وقف القطر في لحظة تاريخية عشان اركب أنا وابنائي الاعزاء شكرا

يا بوي عالليل وآخره لما بتصحى جروحه حمل وماجدرش اتاخره عني وعن وجه روحي

موظفين نايمين في القطر زي ما يكونوا نايمين على ريش نعام وفلاحين شايلين قفف مليانه خيرات ربنا اشي جبنه فلاحي على بيض على سمنة ده غيرالعمال الممددين فوق ولا داريين باللي تحت مش باين منهم الا ريحة شرابات رجلين ماتت وعفنت نازله علينا
وفي محاولة مني لمجاراة عرف النوم المتبع في القطر ده اذا بصوت ربنا يحفظنا يخرم طبلة ودني ويفتحها على صباع رجليا الصغير طبعا هو فيه غيرها
سيدة القطار : حااااااااا حلاوة حاااااا خدلك حلاوة حاااااااااا

لماضة : اعوذ بالله من الشيطان الرجيم اعوذ بالله من الشيطان الرجيم اعوذ بالله من الشيطان الرجيم

شوية وانا بتأمل المشهد الرباني ده اذ الاقيلكم حاجه بتتحرك فوق كتف الراجل اللى نايم قدامي وبتبصلي قوي زي ما تكون عرفاني ايوه هي ثوعاد

كده برضه يا خاينه تسيبيني وتطلعي فوق اكتاف غيري هانت عليكي العشرة والعيش المبلول اللى ياما سئسئتهولك انزلي من على أكتاف الراجل بدل ما أطلعلك

ولاقيت ثوثن قامت محصلاها وهي واخدة جزمة الراجل اللى جنبي وماشية بيها بتطوح واضح ان تاثير ريحتها كان أقوى من مقاومة البنت الغلبانه واقوى من اي حاجه اصفرة ممكن تشربها الخوف بقى ان إدمان مثل هذه الروائح اشد خطرا من إدمان بريزة البانجو

وأنا محتاسة في ثوثن الاقيلكم ثوعاد قاعده جوا حلة الست الفلاحة وبتاكل خس وجرجير ولا في دماغها المفجوعة
ملحقتش اكمل الاقيلكم مورسي على باب القطر والناس بتصرخ

أرجع يا مورسي وأعقل يا مجنون عيالك عاوزينك بلاش تهور العمر مش بعزقة

وهوووووب نط مورسي من القطر وفي اعتقادة انه نفد بجلده من مكر ثوعاد ومن كتر مهي مطلعه عينه ومسودة عيشته تقريبا كده والله اعلم كان حاطط عينه على البت حسنات الغازية يوه قصدي ثوثن اصلها كانت بتعاكسه من فتحة الجردل أيام المزرعة اللى كنت عملاهالهم في الحمام

الغلبان انتحر من القطر ومفكر انه كده هيسافر بين عجلاته من غير تأشيره اويمكن أفتكر انه كده ممكن يهرب عن طريق المصارف المصرية لبلاد بره يجيبله حزمتين فجل ولا بلاعة تأويه هو وعياله

الليدي ثوعاد وقتها تقريبا كان اغمن عليها بعد ما حبست بكوباية الشاي من الراجل أبو كولمن بياع الشاي اللي اتضح بعد كده انه كان مسمم شاي الكولمن طبعا مش الراجل

في حين أن الغلبانه ثوثن طلعت تجري وراه من لهفتها عليه بس للاسف كان كل شيء راح وأنقضى

حبيبي حبيبــــــي حبيبــــــــــي يا شمس منورة غيبي وكفايه ضيك يا حبيبي
ودي يا ليالي وجيبي ولا لاقي زيك يا حبيبي
عمرك يا دنيا ما تخلي بي طول ما هو ساكن في جليبي

الله يرحمه كان ضفدع طيب وفضل معايا ثوثن وثوعاد بعد ما قضوا على الراجل وجابوا أجله كعادة نون النسوة عرفت بس ساعتها ليه هما اطول عمرا لكن للاسف الشديد مش هيطولوا كتير ما عدش في العمر بقية
تدخل ولاد الحلال وقطعوا بعض الخيوط من هدومهم وربطولي الضفدعتين اللدودتين من رجليهم اخدتهم وهما بيتنططوا قدامي لحد الكليه ومنها طبعا على المدبح

وعلى باب المعمل عم عوض بصلي بغيظ كده وسألني جيباهم منين
طبعا عشان البوضاعة بتاعتنا ولا مؤاخذة مفيش منها في البلد قلتله دي تربية أديا وحياة عنيا

وابتدى السكشن كل واحد قدام الحوض بتاعه فيه ضفادعه ومستلم اسطوانه مدهونة بكربون اسود ومهبب اللى بسببه أمي كانت دايما بتتهمني اني ببهدل البالطو بتاعي في لعب الكورة

وكان مطلوب مننا 3 تجارب اول واحده اننا نغز الضفدعة في عصعوص ضهرها بأبره تطلع من نافوخها بعدها تقعد تتشنج لحد ما يطلع السر الألهي طيب دي سهله

اخدت ثوعاد ابدأ بيها على الاقل اخد بتار مورسي الغلبان والاقيها طلعت تجري في المعمل كله بعد ما اخدت الجرعه كامله مهي تربية أديا وحياة عنيا بقى ولا جاب الدوا معاها اي نتيجة وقعدت تتنطط في المعمل كله وأنا انط وراها لحد ما لاقيت ركب بني ادم طلعت بنظري كده أيام ما كان لينا نظر لاقيتها نطت في جيب عم عوض وهو بيبصلي شذرا

لماضة : لامؤاخذة يا باشا دي حاجه مش قد المقام ومديت اديا في جيبه واخدتها بكل براءة ولا كأني بديلة باكت شاي بالياسمين في جيبه عشان يستر عليا

بلاها التجربه دي ندخل على اللي بعده نطير راسها على الصاحي وبرضه نديها نفس الحقنه اياها في عصعوصها

يلا يا ثوعاد هو انا ورايا غيرك

وللمرة الاولى والاخيرة في حياتي اللى فكرت اعمل فيها آنسة وبسكوتة و قال ايه بيعديني وخليه يمسكها يا فوزية
رحت لواحد زميلنا وضربت طمطمايه في وشي لزوم حمرة الخجل وطلبت منه يطيرلي راسها قام الواد بصلي
وقالي : انتي مش عامله فيها برم والبنات البنات ألطف الكائنات اقطعي راسها انتي انا مليش دعوه ولا اعرفك

الحكايه قلبت معايا عند بقى كده طـــــــــــــــــــــــــــيب
ومسكت المقص وبسم الله الله اكبر طيرت راس ثوعاد ونص ضهرها
برفع عنيا الاقي طابور من الولاد والبنات وعم عوض ذات نفسيته مسكنلي الاضاحي ومجهزينها عشان اجزها كلها

هع ما يجيبها الا بناتها

فضلي اخر تجربه تقطع القلب وهي فعلا استخراج القلب وهو بينبض بكل كلمة حب لمورسي طبعا قلب ثوثن امال هيكون قلبي انا
المسكينه يا عيني مستحملتش وأول ما حطيتها بين اديا عملتها على روحها رغم اني كنت مغيرالها الكافوله قلت يلا فداها كده ضمنت اني هتكسي على العيد
وبعد ما شرحت قلبها وعلقته على الاسطوانة الكربون رسم اخر كلماته

ع الليل وآخره يا ولداه
وايش بعد نوح الهوى والداه
الليل طويل قوي يا ولداه
واللي كان هواه في الأول تاه
ع الليل وآخره يا ولداه

Wednesday, 6 August 2008

سيدة الميكروباص



الدنيا ايه غير عربية ميكروباص وشوية حاجات فوق بعضها

كواجب يومي اتجهت لركوب هذه المواصلة الشعبية المريحة وخلي بالك من مريحة دي فتحت الباب لاقيت عينكم ما تشوف الا النور واحدة ست كُبرة قاعده في الكرسي اللى ورا السواق قلت كويس اقعد حريم في حريم على الاقل الست باين عليها ضخمة الجثة عريضة المنكعين تحميني من نهش كلاب السكك بس واضح اني مخدتش بالي من ان ضخمة الجثة دي تشمل انها اضطرت تاخد الكنبه كلها وفاض منها بعض الاجزاء ريحتها على الكرسي التالت كمان عشان كده لما سألتها فيه مكان فاضي جنبها بصتلي بأذبهلال حسيت اني غبية لاني فكرت حد قاعد وهي مدارية عليه وفعلا مكررتش السؤال تاني لما اكتشفت السر قلت ما علينا ناخد الكنبه اللى بعدها

كاميرا واحد انزل هنا يابني

الكنبة الاخيره : اتنين شباب قاعدين يمارسوا عرف الميكروباصات الجديد وهو اللعب في الموبايل وازعاج الناس بالاغاني مجهولة الهوية عملا بمبدأ لازم تسمع

الكنبة اللى قدامهم على طول : شاب قاعد واضح عليه الانهاك يوجه كلامه للشباب اللي ورا وينادي على الكباتن جمع كابتن

قلت في عقل بالي : ايوه كده هي دي الشباب الصح لسه مكملتش لاقيت الولد بيقولهم

قولي يا كابتن معندكش حاجه حلوة تتسمع

الكابتن : عاوز تسمع ايه يعني

الولد : اي حاجه على ذوقك كده يا معلم

الكابتن : كله موجود قول انت عاوز تسمع ايه وانا اشغلهولك

وكأن يعني الواد عنده اذاعة الشرق الاوسط كلها في الموبايل وكل الاغاني والحاجات اللى تتسمع واحنا في برنامج على الناصيه او ما يطلبه المستمعون

الولد : يعني اي حاجه لعبد الباسط ياريت لو عندك انا مش عارفني

الكابتن : طبعا عندي ده انت مزاجك عالي قوي

الولد : قشطة

تبدأ الاغنيه انا انا انا انا انا انا انا انا انا - عديتهم طلعوا 15 أنا تقريبا - أنا مش عارفني انا كنت مني انا مش أنا امال عفريتك يعني هكون انا مثلا

شوية ويطلع واحد في مقام والدي ملتحي وباين عليه التقوى اذ فجأة الاقي حوار الكباتن والولد بقى كالاتي

الولد : يابني مش تشغلنا عبد الباسط

الكابتن في ذهول : امال مين ده

الولد : يابني عبد الباسط عبد الصمد شغلنا قرآن

الكابتن : هههه ماشي يا باشا وعمال تقولي قشطة

اخيرا الميكروباص بدأ يمشي لاقيت السواق بيقول للي جنبه

بص بقى يا هندزة انا الفلوس دي على جزمتي ولا مؤاخذة ولا تفرق معايا في ايوتها حاجه اه زي ما بقولك كده يعني مثلا خد عندك انا باخد اليوميه بتاعتي من هنا واروح اشوفلي اي مصلحة اقضيها بيها

ايوة امال من يومين كان معايا ولا مؤاخذة 600 جنية ينطحوا جنيه رحت نزلت على الكورنيش وأكلت ايس كريم وشربت بيبس ودرة مشوي واتمشيت مع صحابي واخر الليل جبنا مصلحة نعدل بيها دماغنا

ايوه يا باشا اصل المصالح دي اهم حاجه لازم تمتع نفسك ومتحرمش نفسك هي الفلوس يعني هتفيد بايه

واديك شايف الدنيا كلها مصالح !!

الراجل : عندك حق يا أسطى دول حتى فضلوا المصالح على الضرايب وقالك الضرايب مصلحتك أولا

كاميرا اتنين هنا قرب شوية

يتوقف الميكروباص ويصعد ما لا يقل عن 11 نفر فوق 14 اللى جواه ولحظي العثر يقعد جنبي 3 غير ال4 اللي موجودين بالفعل ومنهم واحدة ست لا مش ست عفوا هي عشة فراخ تقريبا مكنوش على ايامها وزعوا صابون الجمعية !! وطبعا عشة الفراخ قعدت فوقيا من هنا وانا بقيت النحي نحي ناح رحت في غيبوبة فرخاوية

صحيت على نص المسافة كده لاقيت حرب استنذاف قدام واحد عجوز جنب السواق بيقوله

انتوا غليتوا الاجره ليه منكوا لله احنا هنلاقيها منين ولا منين

السواق : يابا احنا مالنا مش الحكومة هي اللى غلت علينا البنزيم ولا مؤاخذة

الراجل : عيب عليك متقولش على الحكومة كده انتوا اللى ناس مفتريه وبتتبلوا على الريس كمان يا ناكرين الجميل

السواق : يابويا احنا مالنا تيجي اوديك البنزيمة امونها قدامك عشان تصدق

الراجل : بطلوا بقى جشع حرام عليكوا الراجل موفرين لكوا كل حاجه انتوا اللى مغلينها علينا وبتمصوا دمنا منكوا لله وكمان بتتهموا الريس والحكومه يا نصابين

صحيح زي القطط تاكلوا وتنكروا وكمان بتيجوا على الغلابة اللى زينا

السواق : يابا متصدعنيش هي الاجرة زادت ربع جنيه هتدفعه ولا معكش وتقول من الاول بدل ما تودينا في داهيه

وهنا تنطلق كل العربيه في نفس واحد : نزل الراجل ده يا اسطى بدل ما نضربه ده شكله عميل حزب وطني ايه ياعم انت معانا ولا علينا

الراجل : انا مع الحق يا ظالمة حرام عليكوا الراجل بقى صاحب عيا على اديكوا اتقوا الله فيه

تنفجر العربيه بالضحك والسخريه طبعا عارفين ليه ؟؟

على ايدك هنا يا أسطى نزلت من الميكروباص وكأنها ولادة متعثرة لكن الحمد لله عدت سالمة وعلى موعد بميكروباص آخر ان شاء الله