Tuesday, 12 August 2008

يوميات طالب الطب 6

إحنا بتوع الليل وآخرة


اخدت قرار انا والمغامرين التلاته مورسي وثوثن وثوعاد ابطال دوري الترع ضفادعي الاحباء بضرورة ركوب القطر وقد كان
لبستهم وبرفنتهم ومنجهتهم ومشمشتهم وقمت حطاهم جوا اكياس بلاستيك شفافه عشان محرمهمش برضه متعة المناظر السياحية بصراحه مردتش احطهم جوا قفص لاني مكنش معايا 50 جنيه زي لينا عشان اشتريه وكمان خفت عليهم من انفلونزا الضفادع
وجريت الحق قطر 6 صباحا بالتمام والكمال صحيح ملحقتوش قوي لان القطر كان بينه وبين المحطه يجي 15 متر كده بس الفضل يرجع للرياضة اليوميه في الجري والشعلقه في المواصلات ولأجل الحظ سواق القطر لمحني قام وقف القطر في لحظة تاريخية عشان اركب أنا وابنائي الاعزاء شكرا

يا بوي عالليل وآخره لما بتصحى جروحه حمل وماجدرش اتاخره عني وعن وجه روحي

موظفين نايمين في القطر زي ما يكونوا نايمين على ريش نعام وفلاحين شايلين قفف مليانه خيرات ربنا اشي جبنه فلاحي على بيض على سمنة ده غيرالعمال الممددين فوق ولا داريين باللي تحت مش باين منهم الا ريحة شرابات رجلين ماتت وعفنت نازله علينا
وفي محاولة مني لمجاراة عرف النوم المتبع في القطر ده اذا بصوت ربنا يحفظنا يخرم طبلة ودني ويفتحها على صباع رجليا الصغير طبعا هو فيه غيرها
سيدة القطار : حااااااااا حلاوة حاااااا خدلك حلاوة حاااااااااا

لماضة : اعوذ بالله من الشيطان الرجيم اعوذ بالله من الشيطان الرجيم اعوذ بالله من الشيطان الرجيم

شوية وانا بتأمل المشهد الرباني ده اذ الاقيلكم حاجه بتتحرك فوق كتف الراجل اللى نايم قدامي وبتبصلي قوي زي ما تكون عرفاني ايوه هي ثوعاد

كده برضه يا خاينه تسيبيني وتطلعي فوق اكتاف غيري هانت عليكي العشرة والعيش المبلول اللى ياما سئسئتهولك انزلي من على أكتاف الراجل بدل ما أطلعلك

ولاقيت ثوثن قامت محصلاها وهي واخدة جزمة الراجل اللى جنبي وماشية بيها بتطوح واضح ان تاثير ريحتها كان أقوى من مقاومة البنت الغلبانه واقوى من اي حاجه اصفرة ممكن تشربها الخوف بقى ان إدمان مثل هذه الروائح اشد خطرا من إدمان بريزة البانجو

وأنا محتاسة في ثوثن الاقيلكم ثوعاد قاعده جوا حلة الست الفلاحة وبتاكل خس وجرجير ولا في دماغها المفجوعة
ملحقتش اكمل الاقيلكم مورسي على باب القطر والناس بتصرخ

أرجع يا مورسي وأعقل يا مجنون عيالك عاوزينك بلاش تهور العمر مش بعزقة

وهوووووب نط مورسي من القطر وفي اعتقادة انه نفد بجلده من مكر ثوعاد ومن كتر مهي مطلعه عينه ومسودة عيشته تقريبا كده والله اعلم كان حاطط عينه على البت حسنات الغازية يوه قصدي ثوثن اصلها كانت بتعاكسه من فتحة الجردل أيام المزرعة اللى كنت عملاهالهم في الحمام

الغلبان انتحر من القطر ومفكر انه كده هيسافر بين عجلاته من غير تأشيره اويمكن أفتكر انه كده ممكن يهرب عن طريق المصارف المصرية لبلاد بره يجيبله حزمتين فجل ولا بلاعة تأويه هو وعياله

الليدي ثوعاد وقتها تقريبا كان اغمن عليها بعد ما حبست بكوباية الشاي من الراجل أبو كولمن بياع الشاي اللي اتضح بعد كده انه كان مسمم شاي الكولمن طبعا مش الراجل

في حين أن الغلبانه ثوثن طلعت تجري وراه من لهفتها عليه بس للاسف كان كل شيء راح وأنقضى

حبيبي حبيبــــــي حبيبــــــــــي يا شمس منورة غيبي وكفايه ضيك يا حبيبي
ودي يا ليالي وجيبي ولا لاقي زيك يا حبيبي
عمرك يا دنيا ما تخلي بي طول ما هو ساكن في جليبي

الله يرحمه كان ضفدع طيب وفضل معايا ثوثن وثوعاد بعد ما قضوا على الراجل وجابوا أجله كعادة نون النسوة عرفت بس ساعتها ليه هما اطول عمرا لكن للاسف الشديد مش هيطولوا كتير ما عدش في العمر بقية
تدخل ولاد الحلال وقطعوا بعض الخيوط من هدومهم وربطولي الضفدعتين اللدودتين من رجليهم اخدتهم وهما بيتنططوا قدامي لحد الكليه ومنها طبعا على المدبح

وعلى باب المعمل عم عوض بصلي بغيظ كده وسألني جيباهم منين
طبعا عشان البوضاعة بتاعتنا ولا مؤاخذة مفيش منها في البلد قلتله دي تربية أديا وحياة عنيا

وابتدى السكشن كل واحد قدام الحوض بتاعه فيه ضفادعه ومستلم اسطوانه مدهونة بكربون اسود ومهبب اللى بسببه أمي كانت دايما بتتهمني اني ببهدل البالطو بتاعي في لعب الكورة

وكان مطلوب مننا 3 تجارب اول واحده اننا نغز الضفدعة في عصعوص ضهرها بأبره تطلع من نافوخها بعدها تقعد تتشنج لحد ما يطلع السر الألهي طيب دي سهله

اخدت ثوعاد ابدأ بيها على الاقل اخد بتار مورسي الغلبان والاقيها طلعت تجري في المعمل كله بعد ما اخدت الجرعه كامله مهي تربية أديا وحياة عنيا بقى ولا جاب الدوا معاها اي نتيجة وقعدت تتنطط في المعمل كله وأنا انط وراها لحد ما لاقيت ركب بني ادم طلعت بنظري كده أيام ما كان لينا نظر لاقيتها نطت في جيب عم عوض وهو بيبصلي شذرا

لماضة : لامؤاخذة يا باشا دي حاجه مش قد المقام ومديت اديا في جيبه واخدتها بكل براءة ولا كأني بديلة باكت شاي بالياسمين في جيبه عشان يستر عليا

بلاها التجربه دي ندخل على اللي بعده نطير راسها على الصاحي وبرضه نديها نفس الحقنه اياها في عصعوصها

يلا يا ثوعاد هو انا ورايا غيرك

وللمرة الاولى والاخيرة في حياتي اللى فكرت اعمل فيها آنسة وبسكوتة و قال ايه بيعديني وخليه يمسكها يا فوزية
رحت لواحد زميلنا وضربت طمطمايه في وشي لزوم حمرة الخجل وطلبت منه يطيرلي راسها قام الواد بصلي
وقالي : انتي مش عامله فيها برم والبنات البنات ألطف الكائنات اقطعي راسها انتي انا مليش دعوه ولا اعرفك

الحكايه قلبت معايا عند بقى كده طـــــــــــــــــــــــــــيب
ومسكت المقص وبسم الله الله اكبر طيرت راس ثوعاد ونص ضهرها
برفع عنيا الاقي طابور من الولاد والبنات وعم عوض ذات نفسيته مسكنلي الاضاحي ومجهزينها عشان اجزها كلها

هع ما يجيبها الا بناتها

فضلي اخر تجربه تقطع القلب وهي فعلا استخراج القلب وهو بينبض بكل كلمة حب لمورسي طبعا قلب ثوثن امال هيكون قلبي انا
المسكينه يا عيني مستحملتش وأول ما حطيتها بين اديا عملتها على روحها رغم اني كنت مغيرالها الكافوله قلت يلا فداها كده ضمنت اني هتكسي على العيد
وبعد ما شرحت قلبها وعلقته على الاسطوانة الكربون رسم اخر كلماته

ع الليل وآخره يا ولداه
وايش بعد نوح الهوى والداه
الليل طويل قوي يا ولداه
واللي كان هواه في الأول تاه
ع الليل وآخره يا ولداه

59 comments:

alexandrany said...

أول تعليق
بواحد كابتشينو العليق ده مش ببلاش

وأنا محتاسة في ثوثن الاقيلكم ثوعاد قاعده جوا حلة الست الفلاحة وبتاكل خس وجرجير ولا في دماغها المفجوعة
مش عارف ليه ثوعاد دي بتفكرني بحد كده مفجوع برضه
مين مين مين؟؟؟؟؟؟
ياللا ما علينا

الليدي ثوعاد وقتها تقريبا كان اغمن عليها بعد ما حبست بكوباية الشاي من الراجل أبو كولمن بياع الشاي

لا دي مش بتفكرني بحد بقى
دي هي هي المفجوعه بعينها
ههههههه
:)

لماضة said...

ههههه
ماشي يا مصطفى
ظالمني على فكره
عشان مشفتنيش اصلك لو شفتني كنت صعبت عليك وجبتلي اكل الدنيا كله
الا انت بتتكلم على مين
انا معرفش انت تقصد مين بالظبط
(وش بيستعبط

Misrdream said...

بجد يوميات طالب الطب دي
المفروض تاخد اوسكار الكتابه
فى المدونات اسلوبك زي السكر
تحياتي

لماضة said...

ميس دريم
مش للدرجادي ايه الاحراج ده طيب
ده انا متردده انزلها والله
الحمد لله انها عجبتك انا مبسوطه قوي

ياسر حسين said...

الضفاضيع دي لها الجنة
هههههههههههههههه
:)))))))))))))))
تحياتي وترحماتي على مورسي ضحية العلم
وتحية خاصة لثوثن وثوعاد
في انتظار القادم

خالص تحياتي

Unique said...

عثل .. عثل .. عثل

الضفادع طبعا مش البوست

هههههههههه

تسلم ايدك على البوست اجميل

مهيج الجماهير said...

ازيك يا لماضة ؟
صباح الخير
طبعاً البوست دمه خفيف كالعادة
بالنسبة لمشاكل القطر و كدة
حسب كلامك اما متعيألى انك كنت راكبة فى المكيف
علشان انا بقى بشوف فى القطر أكتر من بكتييييييييييييير
لدرجة انى شوفت و لأول مرة فى حياتى واحد نايم
هتقوليلى و ايه الغريب فى كدة
هقولك اصله كان نايم و هو واقف
اه و الله بيتعلموا كدة فى طوابير الجيش
ماااااااااااا علينا
يللا سلام

appy said...

ايه ده ثكر ثكر هههههههه
يا بنتى بجد حرام عليكى ضيعتى اللغه بتاعتى وانتى عارفه انها بايظه اصلا
بجد بتمنى لكى ان الحاجات دى تتعمل فعلا حاجه كويسه يا لمضه انتى

blue-wave said...

هههههههههههههههههههه
بجد تحفه يا لماضه
تسلم دماغك

سومه...مجنونه فى بلد عاقل said...

ياربنا يا لماضه ربنا يعينك يا بنتى دا لو مش علم كنت سميتك جزاره ضفادع
ربنا معاكى
تحياتى ليكى سومه_87

dr.nour said...

هههههههههههه


حلوه اوى


انا كده هاضيفك عندك

ده بعد اذنك طبعا

bastokka طهقانة said...

يا نهار ابيض ابقى فكريني لما اشوفك مسلمش عليكي بايدي
ضفادع و دم و بيبي و مرسي و انتحار اية يا بنتي بيت الرعب اللي انت معيشاني فيه ده
بس حاجة تضحك فعلا و انا ببوس ايدي وش و ضهر اني مدخلتش طب علشان مليش اي عمار مع الكائنات الحية

ربنا يعينك
اوروفوار

Rehab Mostafa said...

طيب نقف 50 دقيقه حداد الأول على روح الفقيد مرسي
يابنتي ايه ده :( ضفادع وراسها وقلبها وكده :( ايه القسوه دي
على فكره أنا صاحبتي خريجة طب برضه وكنت لما بقابلها وأشوف معاها الحاجت دي وضفادع برضه طبعاً وكده ماكنتش بسلم عليها :( وهي كمان كانت بتقرف الأول بس بعد كده بقوا اصحابها
حسستيني انك سفاحه أو جزاره .. بسم الله الله أكبر طيرتي راس ثوعاد ونص ظهرها ليه تعملي كده ف ثوثو هانت عليكي العشره.. ياخسارتك يا ثوثو:(

صدى الصمت said...

دمك خفبف قوى وكلك شقاوة ربنا يوفقك ويعوض عليكى بضفادع أحسن منهم إن شاء الله

عمرو said...

لو كان لزاما علينا الرحيل, نركب القطر ولو كان عويل

القطار المصرى بالذات تجربة حياة.... خبرة لا يجب ان تفوتك.... لا أعلم بصراحة كيف يستحمل اولاد الذوات-من اصحاب الطائرات والايروبلانات- ان يروا القطار يسير متهاديا امامهم ولا يركبوه ؟؟ دعك بالطبع من انه ممكن يولع فى اى لحظة... هذه متعة اخرى ذات طابع خاص !!!1

اسلوبك جميل يا لماضة..., وان كنت عامة لا افضل الكتابة بالعامية, ولكنك امتعتينى فى البوست


تحياتى

المنسى said...

لماضة تانى
يالماضة
إنتى ركبتى القطر ده
ههههههههههههههههههههههههه
إقرى البوست ده
أنا بركبه طول السنة
هههههههههههههههههههه
http://elmancy2000.blogspot.com/2008/03/blog-post_22.html

لماضة هو إنتى قسم تشرح ولا إيه
ولا دكتورة بيطرية
وصيرتر رقبتا بالمقص
ياااااااااه على جمودية قلبك
بطلوا إفترى بقى
مش ملاءكة الرحمة ولا إيه
بث ثيبك إنتى بقى
الموضوع أثلا أثلا
كميل ولسيس

ومتنسيش تشوفى البوست هيفكرك بكل إللى عدى عليكى فى القطر
وخصوصا بتاع الشاى
تحياى

دكتور حر said...

:))))))))))))))))))

وجوه ضاحكه وبترفص وبتشلت كمان

بجد حاجه آخر منجهه وحلاوه

ربنا يدخل السرور والرحه على لبك يوم لقائه

قولي آمين

بطوط حبوب said...

ههههههههههههههه
ايه الى انتى بتعلموه فى الضفادع ده
احنا مكنش عندنا كده خالص
كنا بنشرها ونشوف الدور ه الدمويه من غير شيل الراس ولا القتل
وكنا بنبنجها بالسبرتو

اظن الضفادع الى بيجلها عقد عمل عندنا بتحمد ربنا
:)

النجمة الصامدة said...

ههههههههههههههه

لا اله الا الله

ايه يابنتي دا

دا على كدا الضفادع بتوعي كانو غلااااااااااابااااااا

خسارة ايامهم والله

ههههههههههه

كنت بحط الواحدة في الكيس من هنا
ورشتين سبرتو من هنا
ترفس شوية وساعات من الغلب مترفسش كمان
وتقوم هووووب
تغط في سبات عميق

بس كنت دايما اتخيل وانا بشرحها

انها هتقوم رافعة راسها كدا وباصة على بطنها وبصالي
وتقولي اييييييييييييييه داااااااا

ههههههههه

>>> اثار افلام الكرتون بعيد عنك

الحمد لله اللي خلصني منهم على خير

ňįĝŗő said...

يا قلبك يا لماضة
و قدرتي تدبحي الضفدعة
ده أنا ماقدرش أدبح خروف
تقومي انت تدبحي الضفدعة البريئة
إيه الجسارة دي؟
و الله يرحمه مورسي
صفدع متهور
مش كان زمانه دلوقت عنده قوقعة ايجار جديد و عنده اتنين ابو دنيبة أمامير كده و عايش عيشة التماسيح
إيييييييه .. كله يهون في سبيل الدم
----------------------------
سؤال جانبي منخور في دماغي و ملهوش اي علاقة بالموضوع :
ألا قوليلي يا مروة .. هي دراسة الطب بتعلم جمودية القلب ؟
وبس



يلا سلام

حاجات جوايا said...

ياربى
دى ولا مذبحة القلعة
وجالك قلب تقتليهم بعد العشرة دى كلها
ده انا اقشعريت عالكلام بس
أمال لو شفت بقى كان جرالى ايه
كان هيغمى عليه أكيد


الحمد لله انى كنت ادبى
الحمد لله
الحمد لله

ربنا يوفقك يا مروة بس عشان خاطرى المرة الجاية ادبحيهم بشويش


سالى

مصر يا موكوسه .....يا مزارع الكوسه said...

بسم الله الرحمن الرحيم
يقوم مجموعه من المدونين وانا من ضمنهم بتكوين رابطه لانقاذ ومساعدة اطفال الشوارع
التفاصيل كلها هنا
http://awraqwasrar.blogspot.com/
يسعدنا انضمامكم

The Führer said...

ههههههههههههه

بوست جنان يا دوك ،فكرتنا بأيام الفسيولوجي وتفاصيل أول جريمة قتل مع سبق الإصرار والترصد .
كوميديا تراجيدية جميلة منك .
دمتي بكل الخير

Mohamed Hamdy said...

بوست تحفة بجد بجد

ربنا معاكى ويوفقك علطول

اه صحيح .. ابقى شوفى مدونتى لعل وعسى تنول الرضا العالى

الطبـيـبـه الأديـبـه said...

لا بجد والله أنا مش هستحمل الحجات دى كلها ،، مش عارفه أول ما ييجى يعطوهالنا هسيب الطب وأمشى ،، ده إيه الحجات اللى تقطع القلب دى
ربنا يكون فى عونك يا لماضه
أقول إيه كلنا لها
تحياتى
السلام عليكم

قوس قزح said...

عايز فعلا تبقى مشاركتك مش بس كلام
و تساعد نفسك و غيرك و بلدك
تعالى شارك معنا
التفاصيل هنا

http://kouskoza7.blogspot.com/2008/08/blog-post_12.html

او هنا

http://bekyaforsale.blogspot.com/2008/08/blog-post.html

د.مينا فيليب said...

زميلتي العزيزة:
فكرتيني بأيام الفارما _وبصراحة أسلوبك فوق الرائع_تقبلي مروري_
دمت سالمة_
مينا فيليب
طب اسكندرية

ميرام said...

هههههه
بجد انتي تحفة ..
اسلوبك جميل ..
ولا عزاء في الضفادع ..
كل الحب ..
تحيـــــــــاتي

لماضة said...

استاذ ياسر حسين
هههههههه يا افندم قول ان طلبة الطب كلهم ليهم الجنة
,,,,,,,,,,,,,,,,,,,,,,,,,
يونيك
والله انتي اللي ثكر ثكر ثكر :)
,,,,,,,,,,,,,,,,,,,,,,,,,
مهيج الجماهير
بلدياتي كيفك انا ركبته سنه واحده وحرمت حرمت نايم وهو واقف دي مرحلة انا نفسي وصلتلها في اخر السنه هههههه عارفاها انا الاشكال دي ملوا القطر
,,,,,,,,,,,,,,,,,,,,,,,,,,
آبي
اي خدمة يا بوبي قولي بس يارب
,,,,,,,,,,,,,,,,,,,,,,,,,,
دكتور عمرو فاروق
ربنا يخليك يا افندم حقيقي عجبك ؟
,,,,,,,,,,,,,,,,,,,,,,,,,,,
سومةالمجنونة
ليه بس ده انا غلباااااان
,,,,,,,,,,,,,,,,,,,,,,,,,,,
دكتور نور
طبعا يا افندم يشرفني جدا اضافتك
,,,,,,,,,,,,,,,,,,,,,,,,,,,
طهقانة
هههههههه ليه بس يا تتيتي ده انا غلبانه خالص انا بقى لازم اشوفك واخدك بالحضن جامد قوي
على فكره انتي السبب اني ادخل التدوين بس اوعي تقولي السر ده لحد
,,,,,,,,,,,,,,,,,,,,,,,,,,,,
رحاب مصطفى
ههههههههههه ضحكت قوي على 50 دقيقة حداد دي امانه عليكي تقريله الفاتحه كل يوم ربنا يرحمهم مطرح ما راحوا كانوا غلابة
,,,,,,,,,,,,,,,,,,,,,,,,,,,,
صدى الصمت
لا لا ضفادع تاني لا انا بقيت انام احلم بكاوبيس بسببهم ك :))
,,,,,,,,,,,,,,,,,,,,,,,,,,,,
عمرو
حقيقي القطار نسخة مصغرة من حياتنا اليوميه انا بحاول اغير الاسلوب من يوميه ليوميه يا عمرو مش بلتزم برتم معين منعا للملل وزي ما بحس اني عاوزه اكتبها
,,,,,,,,,,,,,,,,,,,,,,,,,,,,
المنسي
هههههه قريته واضح انك زميل كفاح قديم توب علينا يارب
,,,,,,,,,,,,,,,,,,,,,,,,,,,,
دكتور حر
ههههههه خلاص الوجوه اغمن عليها
ربنا يكرمك ويوفقك يا دفعه يارب
,,,,,,,,,,,,,,,,,,,,,,,,,,,,,
بطوط حبوب
يا بطبط انتوا بالكتير كنتوا بتكشفوا على سنان الضفدعه وبتشوفوها غسلت سنانها بسيجنال تو ولا لا
احنا بقى كنا بنريحها على الاخر بنفصصها عشان نعرف ايه اللى دخل المرض جسمها وكانت ناوية على ايه يمكن كانت ناوية تفجر برج القاهره ولا حاجه
,,,,,,,,,,,,,,,,,,,,,,,,,,,,,,,
النجمة الصامدة
هههههههههه سبرتو ده كانت بتشربه ولا البيبسي وتقول كمااااان احنا طرق التنويم عندنا كتيره قوي ممكن الصعق او الربط او الشد من اماكن حساسه ههههه
,,,,,,,,,,,,,,,,,,,,,,,,,,,,,,
نيجرو
هههههه الله يرحمه كان راجل طيب
والله يا محمد الطب ملوش دعوة بجمودية القلب لان دي بتكون نابعه من الانسان بطبيعته وطريقة تفكيره الفكره هنا ايه
اني مطلوب مني اكون حاسمه جدا في الموقف واكون متماسكه وافكر بسرعه وصح عشان اقدر انقذ الناس دي لكن مش معنى كده اني يكون قلبي جامد عليهم بالعكس المفروض اكون حنينه ورقيقه جدا معاهم كفايه اللى هما فيه
لكن مساله التعود على رؤية المصايب دي ممكن اننا من كتر ما بنشوف عنينا بتكون اتعودت بس قلبنا مجمدش ولا حاجه انا لحد دلوقتى قلبي رهيف والله بس مش معنى كده اني بيغمن عليا ولا بقعد اعيط يعني جنب الحاله لا طبعا بتصرف بسرعه
سؤال جامد على فكره ومحتاج كلام كتير
,,,,,,,,,,,,,,,,,,,,,,,,,,,,,
حاجات جوايا
هههههههه هبقى احميهم بالشامبو الاول
انا كانوا صعبانين عليا اكتر بس نعمل ايه الدكتوره كانت فوق دماغنا
اسقط يعني ولا اطير رقبتهم لا طبعا رقبتهم فدا رقبتي :)
,,,,,,,,,,,,,,,,,,,,,,,,,,,,,
دكتور فوهرر
اي خدمة يا افندم كلنا فداء الفسيولوجي
والبقيه تأتي
,,,,,,,,,,,,,,,,,,,,,,,,,,,,,,
محمد حمدي
طبعا يا باشا يا خبر
انا مش مصدقة انك علقت عندي انا متبعاك من زمان جدا ما شاء الله عليك وعلى مدونتك رغم صغر سنك حقيقي حاجه هايله والحمد لله ان مدونتي عجبتك
,,,,,,,,,,,,,,,,,,,,,,,,,,,,
الطبيبة الاديبه
هههههههه انتي لسه شفتي حاجه يابنتي لسه لسه متستعجليش على رزقك هتألفي يوميات اكتر مني كمان
,,,,,,,,,,,,,,,,,,,,,,,,,,,
قوس قزح
علم وينفذ يا افندم
,,,,,,,,,,,,,,,,,,,,,,,,,,,
د.مينا فيليب
اهلا اهلا بريحة الحبايب اوعى تكون دفعتي يا مينا انا في امتياز دلوقتى اظن انت طبعا حاسس باللى نفسي اقوله من زمان في اليوميات دي اكيد عشتها وعارف االمعاناه ربنا يوفقك وسعيدة جدا جدا بزيارتك لمدونتي
,,,,,,,,,,,,,,,,,,,,,,,,,,,
ميرام
الله يرحمهم بقى ولا يرجع ايامهم تاني دي كانت عذاب بجد
الحمد لله نفدنا بجلدنا :))

kafrawy said...

انتى عارفة ان الضفدعة دى كرت عملت معايا الدناءة و ماتت

وطبعا انطردت من السكشن بسببها

عامة ربنا يرحم الضفادع كلها اللى بتموت
من اجل الطلبة الغلابة

هههههه

تحياتى يا افندم

صاحب المضيفة said...

فكرتينا بالذي مضى وايام الكلية والضفادع والتشريح


لكن انا برضو مش كان لي قلب اعمل كده

بصراحة كانوا بيصعبوا علي وباحس انهم امانة في اعناقنا لازم نحافظ عليها لانها روح برضو



ربنا يسعدك يارب ويفتح عليكي دنيا واخرة

ابن حـجـر الـعـسـقـلانـى said...

الحكاية دى جامدة جدا .. أنا مت من الضحك

الله يرحمك يا مرسى .. كنت راجل و لا كل الرجالة

sendbad said...

تصدقي بقالي فترة طويلة مبتسمتش مش مضحكتش هادعيلك ربنا يزودك لماضة عشان تعرفي تضحكي الغلابة اللي زي تحياتي الخالصة

لماضة said...

كفراوي
هههه ايوه شهداء العلم بصحيح
,,,,,,,,,,,,,,,,,,,,,,,,,,,,
صاحب المضيفه
ميصعبش عليك ضفادع ابدا :))
,,,,,,,,,,,,,,,,,,,,,,,,,,,,
عسقل
ههههههه الله يرحمه ما طرح ما راح كان مدوبهم الاتنين
,,,,,,,,,,,,,,,,,,,,,,,,,,,,,
سندبادي
ايه يا باشا طولت الغيبه علينا
ما عاش ولا كان اللى يزعلك ولا يتوه الضحكه منك
زورونا تجدوا ما يسركم انا بفرح لما بتيجي والله

صباح الصباح said...

اطعتى قلبى يا لماضة..
وبكدة انتهت قصة حب خالدة بطلها قيس وليلى.. اصدى موورسى وبثبث
هههههههههة

حسام مصطفي إبراهيم said...

مش عارفة اقولك ايه
انا داخل مكتئب وكربان .. الاقي البوست اللي زي العسل ده.. بجد بجد ... تسلم ايدك .. انا وقعت من كتر الضحك .. البقية في حياتك .. والله يرحم ضفادعنا جميعاً

حسام مصطفي إبراهيم said...

مش عارفة اقولك ايه
انا داخل مكتئب وكربان .. الاقي البوست اللي زي العسل ده.. بجد بجد ... تسلم ايدك .. انا وقعت من كتر الضحك .. البقية في حياتك .. والله يرحم ضفادعنا جميعاً

مهندس مصري said...

زعلتيني على الضفادع يا مفترية
:)
دلوقتي بقيتي بتعملي الكلام ده في البني آدميين
أستر يارب

انسان بلا عنوان said...

الف سلامه عليكى

انا كنت فاكر ان طلبة هندسه بس هما اللى بيلسعول يا عينى من كتر المذاكره وصعوبتها

اخويا فى كلية هنسه طلع عينه
بس الظاهر ان الطب طب برضه

يعوض عليك ربنا

حسن ارابيسك said...

اولا
مبروك لإعادة اللوجو القديم لصورة لماضة وهي اكثر تعبيراً
ثانياً ايه اللي انتي عملتيه فيا ده وأنا بقرأ البوست
ده انتيماطلعتيش لماضه ياريتها جت على كده انا حسيت اني قاعد بقرأ مذكرات لريه وسكينه . وكل ما تجيبي سيرة ثووعاد وثثن وياختي عليها ياختي عليها ياختي عليها
وأشوفك وانتي عماله بتقطعي وتشرحي ايه ده انا كنت هارجع واجيب اللي فيبطني وأنا لسه متغدي
لا لا بتوع الطب دول الوحد ميأمن لهم أبدا مشكلة لو واحد اتجوز له واحده من بتوع طب ده لايمكن يجيله نوم معاها تحت سقف واحد يمكن تزعل في مره تقوم حضرتها جايبه السكينه وهات ياتقطيع فيه .اه مهو العمليه دي سهله عندكم ومفيش اي مشاكل
قلبكم ميت وقاعدين تقطعوا في جتت الخلق حيوانات وبني أدميين
الله يسامحك على اللي عملتيه في ثووعاد وثثوثن وموورسيي
وياختي عليها ياختي عليها
تحياتي
حسن أرابيسك

شفقة هانم واحسان بك said...

انتى شربات يا لماضة ......دمك زى العسل

كلبوزة لكن سمباتيك said...

نورتي عالم التدوين يا جميلة
و بوست تحفة بجد


تحياتي
و اوروفوار

mostafa rayan said...

لكن يا دكتورة انت يماقولتلناش وايش بعد تقطيع الضفادع دة
يعني ايه اللي حصل في التجارب وايه النتيجة
تحياتي ليكي

ست البيت said...

همه الستات كده اسأليني ...وجالك قلب تطيري رقبتها مش يمكن موغسي كان مطلع عنيها وجايبلها ضفدوووعة تانية تعيش معاها في البركة؟؟؟؟
بس شديدة قوي اناه نطت على كتف الراجل ...وعجبتني قوي حدودة الشرابات
صدق اللي قال لماضة ...متعرفيش تركبي وتقعدي ساكته ولأ عدوى كمان حتى الضفادع اتعدوي لماضة صحيح
بس أحلى لماضة في الدنيا
دمت بحفظ الرحمن

شفقة هانم واحسان بك said...

وحشتينى ووحشتنى لماضتك انت فين؟

Alien Purlo said...

ههههههههههههه
أنا أول مرة أعرف اني دراسة الطب ممكن تضحك بالشكل ده

بس برضه ازاي ثوعاد و ثوثن و مورسي يهونو عليكي ؟ ده انتي حتى سميتيهم .. أنا لو مكانك كان زمان اللي جرى في اللجنة اتنشر في الجورنال مع أحدث الافلام الدرامية
xD

ليلـــــــــــــــــــــــــــــى said...

هاهاهاههاهاههاهاها
لماضة انتِ كارثة بجد :)
أنا عمالة اضحك من أول البوست لأخره :):):)

خمسة فضفضة said...

السلام عليكم ورحمة الله وبركاته

ههههههههههههههه

فكرتيني بالذي مضي

عارفه انا كمان كنت جايبه ضفادع في البيت ومش عاوزه اقولك عملت فيهم ايه

يلا الله يرحمهم ويجعل مثواهم الجنه


:))))))))))))))))))))))))))

momken said...

عثل
دمك شربات
ماشاء الله
اسلوب جميل فى الكتابه والسرد
وخيال رائع ماشاء برضو

ولماضه سلام قولا من رب رحيم
ربنا ميحكمش علينا

دمك ومدونتك شربات
تقبلى مرورى الاول

تحياتى

محمد آل ربيع said...

إزاي الواحد يسنسن العيش المبلول للضفادع؟ أصل أنا عندي ضفدع و مهتم جداً بالموضوع ده، فلو سمحتي ممكن توصفيلي إزاي أأكله لأني محتار معاه من فترة طويلة و غالباً بأكله حاجات غريبة منتهية الصلاحية من باب تنظيف التلاجة عندي، و بالمرة لو تعرفي بقى الهامستر بياكل إية كمان

Frustrated said...

أول زيارة ليا بس عاجبني أسلوبك جدا ماشاء الله.
بما انك زميلة، أنا عايزة أعرف الكلام دة عاملتيه إمتى؟ مش في سكشن الفارما بتاع سنة تالتة برضو ولا لسة أوريب؟؟

صفا said...

البوست تحفة بجد والمدونة كلها جميله جدااااااااااا
تقبلى مرورى

abo salah said...

بعد السلام عليكم

هههههههههههههههههههه
الواد مورسى ربنا بيحبه
على الأقل مات بإردته
مش مات بجز رقبته
ومين عالم ممكن يكون نط من القطر ولسه عايش

ساعتها احذرى سيعود مورسى ملتحيا مرتديا ملابس حسن الهلالى هدفه الانتقام من قتلة نسله
احذرى مورسى الهلالى
ههههههههههههههههههه

انا اكتر حاجة ضحكتنى رد الواد زميلكوا اللى باين انه معبى منكم اوى لما قالك : انتي مش عامله فيها برم والبنات البنات ألطف الكائنات اقطعي راسها انتي انا مليش دعوه ولا اعرفك
ههههههههههههههههه

بوست وسرد وأسلوب غاية فى الروعة

العزاء لضفادعك
وتحياتى ليكى
وكل سنة وأنتى طيبة

فاتيما said...

يا خرابى عليكلى يا لموضة
يا بنتى إتهريت ضوحك
يا خرابى على خفة دمك
أنا مقرتيش البوست دا بدرى ليه قبل ما اجيلكم كنت عزيتك فى الغلابة دول
و حلوة قوى الإستعانة بأغانى الليل و آخره
ماشية مع الحدث
بقى الرقة و البراءة اللى كانت واقفة تلبس البالطو دى
بتطير رقاب و تنزع القلوب كدا ؟؟
طب ماشى
مدام فى خدمة الطب و خلاص
سؤال على جنب يا مرمر
قريتلك تعليق عند بطوط حبوب بتقولى إنك مش ناوية تحضرى لقاءت مدونين بعد كدا ...
صحيح الكلام دا ؟؟
طب ليه ؟
إحنا زعلناكى فى حاجة ؟؟
منتظرة الإجابة
عشان ضايقنى الموضوع دا قوى
سلام مؤقتاً يا حبيبتى

Zanooba (Zeinab sab9n) said...

ههههه أنت فعلاً لماضتك زي السكر ...يعني أنا قعدت أضحك و أبتسم و أنا بقرأ بوستات المدونة رباني يخليلك الثلاثي المرح يا رب مستنية جديدك أول زيارة و إنشاء الله متكنش الأخيرة :)
سلااااااام

maha zein said...

يا عيني
حرام والله يا لماضة
ايه ده
سيبك من القصة ودمها الخفيف
الا اني بجد والله زعلت اوي علي الضفدع مرسي
وبعدين ثوعاد
طب ليه كده تبقه دي نهايتهم يعني
حرام والله
يا عيني
وارجع واقولك لازم قلبكم يجمد من اللى بتشوفوه
يا عيني يا مورسي

TIMMY said...

يا قلبك يا قاسي ..

قصدي .. يا قلبكم يا دكاترة ..

الحمد لله إن الواحد مش بيتعامل مع كائنات حية ..

بس هو انتوا لسه بتشرحوا ليه ؟؟

هو مش فيه أجازة برضه ؟؟ :)


تحيتي لكِ و لمدونتكِ و لأسلوبكِ و لكل حاجة آخرتها "كسرة" :)

رئيس التحرير said...

انا مش عايز انط لك كل شويه احسن تفتكريني ضفدع وانا عيالي مستحقاني .

Ramanaro0o said...

ههههههههههههه جميلة جدااااا

بجد تحفة بس انت بتعذبوا الضفاضع اوي احنا مرتاحين عنكوا شوية عمو زكريا بتاع المعمل هو اللي بخدرها ويشرحها ويطلع القلب احنا بس بنشوفه وهو بيعمل والدكتورة تقول اللي ف نفسها وخلاص

تحياتي