!! موافق تتجوز دكتورة

منذ أيام قليله شنت حملة زواج الكترونية تدوينية بحته برعاية بعض الأخوة المدونين ومن ضمنهم
دكتورتي الغالية دكتورة مناجاة
بشمهندس العدة بتاعتنا واللي مش هسيبو في حالو

الجميلة كلاكيت تاني وتالت ورابع

وبهذه المناسبة قلت فرصه اقول حاجه غيظاني من زمان وبالمرة للرد على ضرورة وإلزام زواج المدون بمدونة والمدونة بمدون
واهو يبقى زيتنا في طاساتنا وعملا بمبدأ يا بخت من جمع بوستين في الحلال

قررنا نحن لماضة هانم توعية وإرشاد بعض الشباب من بعض الأخطاء التي قد تنحدر إليها أرجلهم عملا بالمثل اعمل المعروف وارميه في كومنت
لذلك وجب علينا الصراخ بأعلى صوت لمن يريد الزواج بدكتورة ذكر عيوب ومميزات هذا الزواج الصحي

في البداية الزواج بدكتورة يشمل مزايا الخط ومميزات الكارت
بمعنى آخر كونك تتجوز دكتورة هتستفيد بالاتي

أولا : اعرف انك مش هتحتاج تتعب ولا تمارس مثل هذه الألاعيب للتملص من شغل البيت لأنها باختصار فقساك فبالتالي ستتمتع بكافة الصحة والحيوية طوال العمر

ثانيا : ستنعم بيوم هادئ جدا وذلك لانشغالها طوال اليوم والليل بالمرضى وحتى بعض السويعات القليلة التي ستقضينها معا ستكون قد أنهكت من كثرة الشجار مع الممرضات ولن تحتاج لتنغيص حياتك

ثالثا : ستوفر عليك الكثير من الميزانية المنفقة في أدوات التجميل ليس لعدم احتياجها لها وإنما لعدم توافر مكان لها في جعبتها لان مخلة الدكتورة يا عزيزي تحتوي على كثير من الأدوات الطبية كالسماعة وترمومتر الحرارة وجهاز الضغط وخافض اللسان و بدله العمليات والبالطو وقفازات اليد و .... إيه تاني يا لماضة استنوا كده لما أشوف

رابعا : ستتمكن من اللعب بديلك كيفما تشاء وأنت مطمئن البال أنها لن تلاحظك أبدا ويرجع الفضل في ذلك لارتدائها ميكروسكوب ماركة " كعب الكباية "

خامسا والأهم : اضمن انك ستتخلص من متاعبك كلها في أول العمر ولن تحتاج لوقت طويل للعيش فيها حيث انك ستستشهد يا عزيزي ناقصا عمر والتفاصيل في تقريرنا التالي عن طرق التخلص منك

لازم تعرف يابني إن أول طريقة دي مجربه ومنتشرة وفعالة
وذلك باختصار لان حرمك المصون لم يكن عندها الوقت الكافي لتعلم فن الطبخ ولا لشراء كتاب السيدة الفاضلة نظيره لانكبابها على العلم الطبي وتركها العلم المنزلي لشخصكم الكريم وفي هذه الحالات فانك ستضطر للجوء للديليفري وهنا ستتجلي عظمة الطب في

المحافظة على جسمك من التسمم الغذائي وفي هذه الحالة حتما ستموت جوعا !

تاني طريقه وهي انك قد تستيقظ أو لا - الله اعلم ساعتها - على يد الست حرمكم وهي تطبق في رقبتك وتمارس عليك طرق التنفس الصناعي في ساعة متأخرة من الليل – ده لو كانت بايته في البيت بالصدفة – وهي تصرخ بأعلى صوتها مقتلتوش !

ثالث الطرق وأسهلها وأحبها لممارسي هذا المجال وهو موت الرحمة عارفه يا حبيبي لازم تعرف إن طرق التخلص منك كثيرة جدا وملكش دية

في النهاية أوجه شكري وامتناني لحضاراتكم والدعوة لي بظهر الغيب بالفوز بـــ

عريس يا أمآآآآآآآآآي

مغامرة otv

طبعا كلكم عاوزين تعرفوا ايه اللى حصل من طقطق لسلام عليكم
طيب تدفعوا كام
انا راضيه بباكو شوكولاته جلاكسي بالمكسرات ابو 3 جنيه

اللي حصل كالآتي

وصلني ايميل من الجميل هيثم ابو عقرب معد البرنامج بيطلب استضافتي في برنامج مساءك سكر زيادة طبعا انا مصدقتش فكرتها اشتغاله المهم بعتله رقم تليفوني اتصل بيا واتفق معايا كل ده وانا مش مصدقه ولا حد عندي مصدق حتى وهو بيقولي عربية القناة هتستناني تاخدني قلتله طيب إديني اماره اعر ف منين انه انتوا اصل انا بقيت مطلوبة امنياً دلوقتى قالي متقلقيش
لحد ما العربية جت اخدتنى فعلا انا قلت كده خلاص لماضة راحت في شربة ميه بسكر زيادة خطفوني يا ولاداااه

وصلت القناه في مدينة الانتاج الاعلامي اطمنت شوية الحمد لله ودخلوني في اوضها كلها فيبر في فيبر " والله يا لماضة وعديتي" قعدت شوية لاقيت مين داخل يكلمني الجميل شريف عبد الرحمن طبعا انا اتخضيت الراجل لاقاني فتحت بقي واذبهليت بقوله مش انت اللى هتستضيفني ده هيثم قعد يضحك قالي هيثم المعد انا المذيع المهم اني عارفه كده بس الجهل بقى والخضه بعيد عنكوا
اصله يخض فعلا حاجه جميله قوي اللهم اغزيك يا شوشو

شويه وقعد يرتب معايا محدش ملاني اجابات يا اخوانا والله انا اللى قلت الكلام لوحدي وقلتله اني عاوزه اتكلم عن الكتاب وعن المؤتمر في الكليه عندنا
وشوية دخلت الفراشة انجي المقدم ووراها لاقيتلكوا مين عمكوا عقروب قلتله يا راجل لسه فاكر وقعدت اقرره مين الى فتن عليا اكتشفت انها اختي وصديقتي اللدودة ومدرستي في عالم الكتابه البت دربكه قصدي مروة جمعه كنت مستحلفالها الصراحه
وقعدنا نتكلم شوية عن الاسئله تاني وبقوله يا هيثم الله يتمملك بخير فرحه يوم 16 \ 6 ياجماعه ربنا يكملك على خير يارب ده غير انه طلع مدون قديم ومعقرب فعلا

بس وبعدين قعدت في لحظات الانتظار الاخيرة حسيت اني مكنش فيا نقطة دم واحده كنت مرعوبه بجد خصوصا ان شريف كان موصيني اطلع اللماضة كلها الحمد لله كنا هنروح في داهيه لكن ربنا ستر

بعد ما خلصت تصوير انجي قامت بتقولي انتي عسل هاتي بوسه بصيت لشريف ساعاتها قعد يضحك محدش يفهم غلط يا اخوانا

بعد ها قابلني اخويا الكبير ابو همس ربنا يخليه يارب جابلي أكل اصلي كنت واقعه من الجوع وفضل معايا لحد ما ركبني بصراحه عمل معايا واجب صعيدي جامد أوي خصوصا واني كنت تايهه يا ولاد الحلال واهل مصر متوصوش يتوهوني زياده قاموا معايا بالواجب
الحمد لله ان ابو همس لقطني ما انا كنت لقيطه فعلا وقتها واقفه بشحن موبايلي عاله على محل موبايلات صغير عشان تليفوني كان فصل الراجل ذوق صراحه قد يسترجع معايا ذكريات اسكندريه والموبايل في الشاحن

اسيبكوا بقى تتفرجوا على لماضة في التلافازيون اللي نزلهالي محمود آلام وآمال ربنا يخليه بجد مش عارفه اشكره ازاي فرحت قوي لما لاقيته نزلها وكمان لينك لمصري مصراوي ربنا يخليك يارب على مجهودك الجميل ده واقدر اردهولك اللى عاوز يحتفظ بلماضه جوده عاليه على جهازه بس هو حر بقى لو الجهاز جراله حاجه اللهم بلغت

بس حقيقي مش عارفه اشكركم ازاي الفرحة اللى انا فيه دي كلها انتوا سببها وانا رايحه كنت كاتبه كل اساميكوا في ورقه عشان اقولها بس للاسف اتلخمت فاعذروني
يلا حضروا كيس اللب والسوداني

اتمنى لكم مشاهدة ممتعه

دي بجودة عاليه من مصري المصراوي

http://misry.com/lamada

الفيديون الاول

الفيديون التاني

لماضة في التلافازيون

ايون يا جدعان

انا هطلع في التلافازيون عقبال عندكم

برنامج مساءك سكر زيادة

قناة

OTV

يوم الاتنين الجاي الموافق 9/6/2008

المعاد

الساعه 6 ونص مساءا والاعاده الساعه 1 بعد نص الليل

اظن كده مفيش حجه مدلعاكوا على الاخر

بلاش التلاكيك حد يقولي انا مش عندي دش ولا حنفيه ركبوا طبق يا اخوانا واللى يقولي مش عندي طبق اقوله هات سلطانيه وركب وصله

انزلوا على القهوه وانا اعمل زي الواد محروس بتاع الوزير

لو حد نفسه في اي حاجه يقولها يا جدعان فرصه لاتعوض

معونه علاوة منحه ان شالله رغيف عيش

كل طلباتكوا مجابه

ده تدوين بقرار جمهوري

اللهي يستركوا طلب اخير

لو حد يقدر يسجل الحلقه ينوبه ثواب في اختكوا الغلبانه

اصل الفيديون الى حيلتنا تقريبا عمره الافتراضي انتهى

عاوزه تشجيع حاار

ربنا يستر واعرف اتكلم حاكم اختكم لخمه راس

يوميات طالب الطب 5

الضفدع العجيب

لم يقتصر التشريح في كلية الطب على البني ادمين فقط بل اتسع ليعم كل ما يمشى على أربع أو لا يمشى مطلقا وكعادة يتوارثها شباب النيل قوام بينا بالطب ننول عيانينا

فكل الأدوات والمعامل والمدرجات مجهزه ومعدة للممارسة كافة أنواع التعلم لا ينقصها فقط إلا بعض أدوات التشريح ,الخامات اللازمة للتحليل والرسم وإظهار بعض النتائج, وأيضا عدم توافر بعض عوامل الامان والسلامة والحفاظ على صحة المواطنين ولكن هذا غير مهم فهو مكلف للغايه ولا يوجد له اي هدف سامي (سامي مين) لذلك نشكر كل من ساهم فى دفع عجلة التعذيب عفوا التعليم وياما قالتلكوا شدوا الحزام محدش سمع الكلام

هذا يومكم لتبدعوا فى هذا الصباح ستسحق الاجساد وتتطاير الرقاب

اي والله زى ما بقولكوا كده

انطلقت هذه الكلمات الحماسية من قائدنا العظيم دكتور مادة علم الادويه وهو يخبرنا باننا لابد وان نقطع كل رقاب الضفادع بدون اعطائها اي " حاجه اصفرة " او حتى شربة ماء ولا يقتصر الامر على هذا وحسب بل تمتد ايدينا لتسحق اجسادها الهذيله بعد تثبيت اطرافها الاربع وممارسة كل انواع الحقد والغيظ من التعليم واللى بيتعلموه فى هذا المخلوق اليتيم واستخراج اعز ما تملك هذه المسكينه وهو قلبها الذي ينبض بكل براءه ليس هذا فقط بل وتعليق هذا القلب وكأنه عبرة لمن لا يعتبر

هذا بالنسبه لرؤوس الضفادع الصغيره اما بالنسبه للرؤوس الكبيره فلابد من ممارسة نوع اخر من انواع التعذيب جديد نوعا ما غير الفلكه او العصا لمن عصى او الكرسي الكهربائى او بالشد من اماكن احم ما علينا وانما علينا فقط ان نطعنها فى ظهرها لكي تتشنج ونراها باعيننا حتى تنتهي من نوبة الصرع المصطنعه وبعدها بكل حقد نقوم بانتزاع قلبها من مكانه كما انتزعت الرحمة من قلوبنا

ولان هذا موسم بالنسبه لعم عوض - بالمناسبه عم عوض ابن خال عم زينهم بتاع المشرحة لزم - هرولنا جميعا نستبق الباب على عم عوض لشراء الفرائس

عم عوض بصوت اجش : عنينا يا دكاترة والله الضفدعة الكبيره بعشه جنيه متنقصش ملين(يقصد عشره ولكن عصر السرعه ليه احكام ) والصغيره بخمسايه ولا مؤاخذه

رجعت بخفي حنين وانا اهمهم بعد كلام عم عوض : الله يعوض علينا راحت الخمس درجات

ولكن ارادة الله فوق كل شىء قفزت فكره الي ذهني على حين غفله : وليه تدفع أكتر لما ممكن متدفعش خالص

وكأني استرجع احدى اجمل ذكريات الطفولة المشرده :ايييه فين ايامك فعلا كتر المذاكرة و الدروس ياما بتغير نفوس

فقررت ان اقوم بتلك المهمه وأوكلتها لله سبحانه وتعالى ثم الى بقية اعضاء فريق الغواصة من اولاد الشارع المشردين فهو لم ينضج بعد ليصبح فريق قناصة بالمعنى المقصود

وتذكرت هذا الاعلان السمج عن احدى مساحيق الغسيل وانا بزيى الرسمي مج وشبشب وبيجامة املي المهمه للابطالي الشجعان : النهارده بقى يا ولاد صيد

ويهتف الابطال : مصر هي مامتي لونها لون بيجامتي

واذا بجندي يرتعد ويهتف : لن اعيش فى بيجامة ابو جمال

وانطلقت مع هذه البراغث الصغيره ( على وزن البراعم وجمع برغوث ) نقفز يمنى ويسرى ( مش اللى بتمثل) حبة فوق وحبة تحت ( مش بتاعة عدويه) فى رحلة خلويه للبحث عن ضفادع بريه تصلح للذبح :الهمه يا رجاله عاوزه حاجه تشرف عاوزين نوريهم انتاج بلدنا لا تقولى مستورد ولا مزارع البلدي يوكل

ترع تشيلنا و بلاعات تحطنا فين عودنا سالمين غانمين بهذا الكنز الثمين من الاسرى ولان اكرام الضيف واجب اوصيت ام زغلول بائعة الجرجير بكام " حزمه" وبعشه شاغ خش ( بعشرة قروش خس ) لزوم تغذية الضفادع وتزغيطها اسبوعا كاملا حتى يحين موعد نحرها فلم تصبح مجرد ضفادع بحاحي فقط وانما بفضل الغذاء و الماء والهواء ووجهي الحسن وحقن الهرمونات عشان تسمنها بدري بدري تحولت الضفادع الى امهات بل توحشت واصبح الضفدع الواحد يزن ما يقرب أوقية وفي رواية فلاحي " وقة " وفي بعض الروايات الاخرى كيلو وشوية

وها قد حان موعد نقل الاضاحي للسلخانه عفوا للمعمل كيف سانقلها اليه ؟

هل من الممكن تأجير عربة نصف نقل أم استعين بالاتوبيس الموعود الذي لا يصلح الا لنقل ذوات الاربع فقط وانما يقلنا للكليات غلطه ام اضع كل ما ادخره من مال واسلم امري لصاحب الامر واقوم بشراء وسيلة نقل فخمه بعجلتين على احدث طراز ولكني تراجعت لاخر لحظه فمن أين سآتي بالمال للسائق الذي سيجرها وهل يمكن ان يصبر عليَ الي ان آتيه بالعليق وهل سيوافق على ربطه فى عمود من اعمدة الكليه حتى ميعاد انتهاء المذبحة اقصد الدراسة صامتا ولن ينهق ابدا ام سيتم خصخصته اذا لم اسدد اقساطه ويقال لي من اين لك هذا؟؟

ولم اجد بدا أمامي الا ارتياد القطار نعم فهو كما تعلمون وسيلة نقل شعبيه من الدرجة الثالثه حيث يتمتع بدورة مياه بلدي صحية جدا تسطيع ان تميز مكانها على بعد 3 عربات وانت معصوب العينين وبدون ادنى مجهود فقط تتبع حاسة الشم لديك

وايضا يوجد به شبكة تهويه دائمه حيث لا توجد اى نوافذ من اى نوع كما ان لك كافة الحرية لاختيار مغادرته أى وقت تشاء حيث لا توجد ابواب تمنعك من ذلك كما أنك تستطيع ممارسة رياضتك اليوميه فى القفز والشعلقة مجانا وبدون داع للذهاب لصالات الالعاب الرياضيه المكلفة

وايضا تستطيع ان تتحسس التحام الشعب بداخله فى كل الاوقات والازمات هذا غير فرصتك المتاحة بالتمتع بعطر مصري اصيل عندما تجد ارجل تطل عليك من فوقك برائحة زكيه معهوده واذا لم تتمكن من وجود متسع لك فى كل هذا تستطيع ان تنضم مع الطبقه العليا فهناك تتمكن من التمدد بحرية والفوز بنوم هادىء
هذا غير انك ان لم تكن تملك تذكرة مقابل اجرته الزهيده فيمكنك استقلاله دون مقابل فى غرفة رائعه الجمال تطل على منظر اخضر خلاب مخصصه لذلك فى مؤخرة القطار لا تكلفك اي مجهود فقط اسأل اين تقع “ السبنسة” قد تجدها مزدحمة بعض الشىء فغالبا ما تجد بها الشعب المصري بأكمله في انتظارك