Thursday, 28 February 2008

ياللي ظلمتوا القرد



لو عرفت مين اللي قال الامثال أعمل له قبة ومزار

كثيرا قالوا فى الامثال عن الحيوانات منهم الجمل ومنهم الحصان ومنهم الحمار -ولامؤاخذة- الذي كان صاحب النصيب الاكبر -ويمكن نفردله تدوينة خاصة باذن الله- وكان للنسناس مساحة لا بأس بها وردت فى أمثالنا العامية
وأجهل سبب ذلك حتى الان هل لجماله ؟ ام لقربه الشبه ببني الانسان ؟ ام لانه قد يكون حلقة الوصل بين الانسان والغوريلا كما قال دارون فى نظريته والتي استنكرها حتى الان ؟ لظلمه الشديد للقرد فليس هو حلقة الوصل وانما مخلوق اخر يمكن يكون " لماضة" وذلك لحبي الشديد للموز!! وهل يوجد علاقة بين هذه النظرية وبين تلاميذ هذه المرحلة التي تدرس بها مادة الاحياء ؟؟
ولم يسلم من لسانهم هذا المخلوق الودود المدعو القرود وسنعرض على حضراتكم كم ظلمنا هذا المسكين
وكما قالوا قديما خذوا الحكمة من افواه الجدات والحموات والمجانين
!!فذهبت الى العهد القديم وما به من أطيب الثمرات لانتقي أجمل ما فيه من احاديث وذكريات لتعيشوا معي أجمل الاوقات


ففي وصف الجمال تغزلوا بمحاسنه


بره وردة وجوه قردة

عصبية وبردة وعلى راسها قردة

شوف القرد وأتامل عينيه ما تلاقي غير السواد حواليه

قالوا يا قرد راح يسخطوك قال راح يعملوني غزال

ياواخد القرد على ماله بكره يروح القرد وتقعد لنا إنت بداله

القرد في عين أمه غزال


**********************


وفي الرضا والقناعه ضربوا به الامثال


الله يكفينا شر الكرب والشدة اللي تخلي الراجل كلب والمرأة قرده

قرد موافق ولا غزال شارد

قرد حارس وبياع مكانس

أرضي بقردك لا يجيك أقرد منه

صباح القرود ولا صباح الأجرود

قرد يسليني ولا غزال يعنيني


**********************


(وكان للرجال نصيب ايضا ليس كل الرجال (محدش يفهمني غلط انا مليش دعوة


يا واخد القرد علي ماله المال بكره يروح المال ويبقى القرد علي حاله

يا مأمنه للرجال يا مأمنه للقرد فى السنغال

قرد فتح لبان تغور من وشه القشطه

راحت الناس وفضل النسناس

يغور الشهد من وش القرد


**********************


وعن قاعدتة الشعبيه (المؤخرة يعني) افردوا لها خصيصا


إذا كان القـرد يشـوف حَمَار قاعدته ما كانش يهزها

يجي في قاعدة القرد ويشمها

زى القرد بيتباهي بحَمَار قاعدته

بيحسدوا القرد علي حَمَار قاعدته


**********************


وغيره كثيرا مثل


قالوا للقردة اتبرقعي قالت دا وشي واخد علي الفضيحة

اللي تخلفه الجدود تفنيه القرود

إن جاك القرد راقص طبل له

ارقص للقرد فى دولتة

القرش يلعب القرد

ابن القرد نطاط


تحديث


وصلتني هذه الصورة من استاذي العزيز جدا تامر الكاتب بالرصاص والتي التقطها في ساحة جامع الفنا بمراكش

والذي يعتبر مزار سياحي للقردة والقرداتيه ياتيه الناس من كل فج عميق

شوفتوا الناس اللي بتقدر القرود يا أخوانا

58 comments:

سهر الليالى said...

ايه يا بنتى دة دة انتى مسبتيش حاجة خالص عن القرود
جبتى دة كلو منين

عامة انا بحب القرود خالص
واهو
يا واخد القرد على حالو هيفضلك كدة ومالو

اهو احسن من مفيش
ههههههههههه

تحياتى

آلام وآمال said...

صباح القرود ولا صباح الأجرود
!!

يعني ايه الأجرود يا لماضة؟
-----

وبعدين يعني خلاص
حكمت معاكي للدرجادي
حتى القاعدة الشعبية يا لماضة؟
:D

لماضة said...

سهر
هههههه
ماشي يا ستى وانا بعترف اني واحدة منهم
,,,,,,,,,,,,,,,,,,,,,,,,,,,,,,
محمود الام وامال
الاجرود الى هو معندوش شعر ولا دقن والناس كانت بتتشائم لما تشوف حد كده فى الصبح فطلعوا المثل ده
حتى القاعده الشعبية يا عم محمود هما عتقوه الغلبان ههههههه

أوشــــــه said...

هههههههههه
والله سكر يا لماضه
واحشتني لماضتك دي
بس ايه ده كله
في حاجات بجد أول مره أسمعها

تحياتي ليكي يا قمر

مستــ ج ــــدة said...

أيوة كده يالماضة.... ايه الحلاوة دى
بس انتى عملتى شغل جامد جامد يعنى
فى حاجات كتير فعلا" اول مرة نشوفها
بس عسل والله
وانا كمان والله القرد ده بيصعب عليا هوا والغراب والحماااار أكيد
الناس مش سايبة حاجة ف حالها لابنى آدمين ولا حيوانات لامؤاخذة
سلااااامى ليكى

فرنسا هانم said...

يا عينى عليكى وعلى امثالك
انا حاولت افتكر مثل تانى اقوله ليكى
ملقتش
خلاص
انتى شطبتى على كل امثال القرود
مستنيين امثال الحمار

عصفور المدينة said...

حلو جدا أقترح تعملي موسوعة للأمثال مصنفة على الأشياء

زي
باب ما جاء في القرد
باب ما جاء في القدرة(قدرة الفول يعني)
باب ما جاء في الكلب
باب ماجاء في الرؤساء والحكام

الجماعة الي كانوا بيألفوا الأمثال ساعات بيحطوا ثقافة انتهازية أو انهزامية في الأمثال بطريقة تنم عن نمط سائد يحرصون على توريثه عبر الأجيال للأسف

وأقترح تعملي باب لوحدة
باب أمثال من تأليف ماكيافيللي
عشان الأمثال دي بالذات باتفقع منها جدا
اللي هي من نوعية
إن جاك القرد راقص طبل له
ارقص للقرد فى دولتة
القرش يلعب القرد

وباب تاني
باب ماجاء في الاستسلام والخنوع
زي أمثال
أرضي بقردك لا يجيك أقرد منه

========
بصراحة بصراحة عايزك تقولي لي أخدت وقت أد إيه في تجميع الأمثال دي
:)

لماضة said...

اوشـــــــــه
والله انتى كمان وحشاني يا أوش أوش اي خدمه يا جميله
,,,,,,,,,,,,,,,,,,,,,,,,,,,,,,,,
مستجدة
ههههههه والله ما انا عارفه مين يا مستجدة اللى مش سايب البني ادمين والحيوانات فى حالهم بس الجماعه بتوع زمان دول كانوا دماغ بجد
,,,,,,,,,,,,,,,,,,,,,,,,,,,,,,,,
خالتي فرنسا كله يوسع
ههههههه ده فيه اكتر من كده بس مقدرتش احط زيادة شوفتي ظالمين القرود معانا ازاى
,,,,,,,,,,,,,,,,,,,,,,,,,,,,,,,,
بابا عصفور
حضرتك ناوي على حبسي ولا ايه ههههه
ده انا كنت عماله بفنطهم وبحط مسميات ومرعوبة
عندك حق فى الامثال اللى غاظتك انا كمان مديقاني جدا
هحاول اعمل الموسوعة دي باذن الله
بصراحة التجميعة دي اخدت مني يومين كل يوم ساعتين لاني قعدت ادور على النت وكتاب امثال عندي وبسال بابا وماما على الكام مثل اللى كنت حفظاهم بس سبحان الله اتجمعوا بسرعه معرفش ازاى
:)

خمسة فضفضة said...

السلام عليكم ورحمة الله وبركاته

ههههههههههههههه

بجد بجد يعني لمااااااااضه

جبتي دا كله منيييييين ؟؟؟
ماكنتش اعرف الا 3 امثال بس والباقي اول مره اسمع عنه


اؤويد بشده اقراح باشمهندس عصفور

ويلا بقي ورينا الشطاره
:-)

عايز أتعلم said...

ههههههههههههه
ايه يا لماضة ؟؟؟
جبتي كل ده عن القرود منين صحيح؟؟؟؟؟؟؟

وبعدين الزاي تتكلمي عن الحاجات من غير ماتستاذنيني..انا هعديها المرة دي لأن الحاجات دي تبعي ومتتكلميش عنها وحش ابدا

بوست جميل بجد وخصوصا الامثلة اللي في الاخر دي

خليفة

مهندس مصري said...

هيييييه
عادت اليكم لماضة من جديد
و هي في اشد حالات التريقة على القرود الغلابة

فعلاً في حاجات أول مرة أسمعها
أيوه كده يا دكترة رجعي لنا الضحكة الحلوة

علاء سالم said...

السلام عليكم

بوست جميل والله وفكرته أجمل
فعلاً الأمثله دي بتكون أحياناً في الصميم

خالص تحياتي

Desert cat said...

ايه يا امى حديقة الحيوانات اللى انتى فاتحاها فى البلوج دى
انا كنت بحب ازورها زمان علشان اتفرج على الاسد يقوم تقولى لى قررررد
عليكى كلام يا دوك زى العسل
والامثال نصها جديد عليا
امواااااااااه ليكى جميل

همس الاحباب said...

مش كنتى قدمتى اعتذار وارتحنا منك شوية
مفيش فايدة لماضة اتفضل لماضة
هو انتى ناوية تحضرى ماجستير فى القرود ولاايه
ولا خلصتى دراسة وناوية تقعدى على المصطبة مع الجدات
عموما راى فيكى مش ايتغير
وحمدلله على السلامة
تحياتى ليكى

دنيتى الجميله said...

عودا حميدا
يا أحلى لماضه
حمدلله على سلامتك
وحشتينى جدا
وكنت هزعل بجد منك لو أعتزلتى
على العموم
ربنا يخليكى لينا يا رب
ودايما مفرحانا ومضحكانا
مستنياكى عندى قريب
نوريلى دنيتى بقى
اختك الحبيبه

Anonymous said...

ايه ده يامروه.... جبتى الكلام ده منين ... ايه التطور الخطير ده... نعتبر ده بمناسبه استلام الامتياز ... امال لما يجيلك التكليف هتعملى ايه



بس البلوج معجبنيش :D

روز

بطوط حبوب said...

هههههههههههههه
بصى انا هعلق تعليق مختلف
اصلى بصراحه كده نويت اوديكى فى داهيه
والبلوج ده كله سياسه
ههههههههههههههه
اظن ده احسن مقال معارض شفته فى حياتى

تخيلى بقى لو حد من المسؤلين عرف؟؟؟؟؟؟

Ahmed Mubarak said...

يا بنتي ..يا سعادة الضكتورة
لمضة معانا ماشي
مع بابي عرفنها
مع الناس فهمناها

لكن لمضه كمان على القرود

جديدة دية
:D
بوست لذيذ

تحياتي

آفاق الحرية said...

السلام عليكم
واضح انك ماشاء الله في الامثال موسوعة
بس هو المثل يا مأمن الرجال يامأمن الميه في الغربال ولا ايه
انا مش عارف ايه الصح بصراحة

خبيب said...

هههههههههههههههه

تدوينة ممتازة

---

مع إن فيه قرود أذكى من بني آدمين !!

لماضة said...

دكتورة فضفضة
اي خدمه يا افندم ربنا يسهل نشوف الموسوعة دي
,,,,,,,,,,,,,,,,,,,,,,,,,,,,,,,
دكتور خليفه
اهلا اهلا
معلش بقى يا سعادة البيه سماح النوبة وبعدين انا بسوقلك للعياده اهو ههههههه مبروك المدونة رغم انى مشفتش حاجه اتفتحت لسه انا عاوزه اقص الشريط
,,,,,,,,,,,,,,,,,,,,,,,,,,,,,,,,
مهندس مصري
الله يكرمك يا هندسة انت تأمر والله بس شكلي هغيب غصب عني عشان الامتياز
,,,,,,,,,,,,,,,,,,,,,,,,,,,,,,,,
علاء سالم
الله يخليك ده من ذوقك
,,,,,,,,,,,,,,,,,,,,,,,,,,,,,,,,
قطتي
والله القرود دول حبايبنا بس بزعل منهم لما بينافسوني فى اكل الموز
استنى هنعمل حلقه تانيه فى عالم الحيوان
,,,,,,,,,,,,,,,,,,,,,,,,,,,,,,,,
همس الاحباب
وماله يا سيدى هنرجع تاني للاعتزال بس المره دي مجببر اخاك عشان الامتياز
وايه رايك فيا يا افندم اللى مش هيتغير ده نحب نبقى على نور بس
,,,,,,,,,,,,,,,,,,,,,,,,,,,,,,,,
دنيتها الجميلة وانا كمان
الله يخليكي يا ست الكل والله المرة دي فعلا هتبقى غصب عني عشان بداية الامتياز ومش هكون موجوده على طول
بس هحاول كده افتكس واجيلكم متقلقيش
اخبار بنوتك الجميله ايه
,,,,,,,,,,,,,,,,,,,,,,,,,,,,,,,,,
روز
ايه يابت الفضايح دي
بتقولي اسمي على الملأ كمان
هههههه يادي الفضيحه ام جلاجل
لما يجيلى التكليف هعمله سلسلة لوحده ان شا ءالله
,,,,,,,,,,,,,,,,,,,,,,,,,,,,,,,,
بطوط الحبووب
يا ستار يارب
داهيه واحده قول اتنين تلاته ولا يهمك يا ريس نحن فدا اللماضة
وايه علاقة المسئولين بالقرود انت اللى قلت اهو مش انا
,,,,,,,,,,,,,,,,,,,,,,,,,,,,,,,,
احمد مبارك
لمضة مع كله والله يا احمد مش عاتقه
ربنا يرحمهم بقى لسه استنى الحلقه الجايه
,,,,,,,,,,,,,,,,,,,,,,,,,,,,,,,,
افاق الحرية
ههههههه لا المثل اللى حضرتك قلته صح بس المثل بتاع السنغال ده برضه سمعته قلت فرصه عشان ابقى مسبتش حاجه وخصوصا ان الرجاله فيه منهم وركز على منهم دي مش كلهم يستاهلوا صراحه
,,,,,,,,,,,,,,,,,,,,,,,,,,,,,,,,
خبيب
ههههه اعتبر ده مدح فيا يعنى علىاعتبار انى واحدة من النسناسات

الجمعاوي الاصيل said...

ههههههههههههههههه

اضحكتني جداً

وبعدين المثل بيقول

يا مأمنة للرجال يا مأمنة للميه في الغربال

مش القرد في السنغال

وبعدين ايه حكاية القرود ديه ملقتيش غيرها

وخلينا في الحمار الكبير اللي كلنا بنغنيله بنحبك يا حمار

تحياتي

ويسعدنا زيارتكم

د.دغيدى said...

حسبى الله ونعم الوكيل
حتى القردة لم تسلم من اللماضة
وانا بايد الاقتراح بعمل بوست عن الحمار والحصان والاسد
ونفتحها حديقة حيوانات

اسكندراني اوي said...

ايه يا دكتوره انتي حتحولي بيطري ولا ايه

rainbow said...

الداكتورة اللمضة حبيبتى

وحشتينا .. ايوة كده نورى تانى بمواضيعك الرائعة

بجد مجهود هايل فى تجميع مادة الامثال ربنا يقويكى على الامثال والقرود والحمير و...... الامتياز

بس اعملى حسابك انا هقول عليكى لو حد من اخوانا البعدا سألونى منين جبتى المثل ده :0
أرضي بقردك لا يجيك أقرد منه

واخدة بالك ههههههههههه

حبى الخالص ومودتى الصافية

هدى

son's egypt said...

السلام عليكم
كل ديه امثال عن القرد
انا كنت اعرف حاجات بسيطة بس انتي ما شاء الله عرفتي حاجات اكتر
تحياتي

مروة الزارع said...

قرد ودنة مقطوعة بص لنفسة فى المرايا وقال
يااااااسلاااااام

الحلو ميكلمش

:)))))

بوست تحفةةةةة

Eman Eltaher said...

هههههههههههههههههههههههههههههه
يا خبر أبيض
مكنتش أعرف الأمثال دى كلها الا يمكن مثل او اتنين

ده انا كده بقيت مثقفة

بس عندك حق بجد هو معاملة الحيوانات كلها عموما بتبقى سيئة و قاسية
و الأمثال يتكون قاسية عليهم أكتر
الحمد لله انه الحيوانت دى مش بتعرف تفهم اللى بيتقال عنهم ! :)

دى اول زيارة و اتمنى تعجبك مدونتى ولماضتى

رئيس جمهوريه نفسى said...

البوست روعه يا دكتوره انبسطت قوى وضحكت على الامثال شكلك بتقعدى مع تيته كتير تحفظى التراث الهائل ده على فكره يا ريت تغير الالوان بتاعت الكتابه علشان تظهر عينى تعبت ولما اكشف حكلفك حق الكشف

لماضة said...

الجمعاوي الاصيل
عنينا يا ريس ادينى فرصه بس
,,,,,,,,,,,,,,,,,,,,,,,,,,,,,,,,
د.دغيدي
كده الفيزيته هتغلى :)
,,,,,,,,,,,,,,,,,,,,,,,,,,,,,,,,,
اسكندراني اوى
ههههه لا متقلقش بشتغل فى البني ادمين لسه
,,,,,,,,,,,,,,,,,,,,,,,,,,,,,,,,,
هدي
ههههههه وماله استنى لما اجمعلك امثال كمان ساعتها اقعدى وسطهم براحتك مين قدك واوعي تقولي لحد على سر شويبس :)
,,,,,,,,,,,,,,,,,,,,,,,,,,,,,,,,,
ابن مصر
شفت بقى القرود عملوا فيها ايه غلابة والله
,,,,,,,,,,,,,,,,,,,,,,,,,,,,,,,,,
مروة سلطة
حتى انتي يابت مش سايبه القرد فى حاله
:))
,,,,,,,,,,,,,,,,,,,,,,,,,,,,,,,,,
ايمان طاهر
هههههه اي خدمة يا ستى طبعا عجبتنى لماضتك جدا وتعالى اتلامضى دايما
وهزورك يا جميله فى اقرب فرصه بس مطحونة والله يا مونتي
وانا بحب اتلامض مع الناس
,,,,,,,,,,,,,,,,,,,,,,,,,,,,,,,,,,
السيد رئيس الجمهورية
الله يكرمك يا ريس
طيب قولى انهي لون مريح اكتر لان الحكايه دي مجنناني بجد
قولي اكتر لون بيريح وانا تحت امرك والله اغيره حالا
انت تأمر يا ريسنا
:)

fatma said...

قالوا للقردة اتبرقعي قالت دا وشي واخد علي الفضيحة


هههههههههههههههههههههه

ايه ده فطستينى من الضحك وانا ماليش نفس أضحك

تصدقى لو كنت دخلت ولقيت بوست الاعتذار لسه
كنت هدخل اولع فيكى

ايوه كده يا باشا شوفى شغلك

صوت من مصر said...

دى جنينه حيوانات يا لماضه

يا مراكبي said...

إيه ده؟ بحث كامل في اللغة والأمثال عن القرود بس؟

كل ده؟

يعني سيبنا الماجستير والدكتوراه وإتفرغنا للقرود؟

متأكده إنك طب بشري؟

;-)

fatima said...

ايه ده
إسمك مروة
يا خرابى و مكنتيش عاوزة تقولى
لأ بقى حالا أسم الدلع يتزود حتة
مرمر
طعامة يا لماضة
انا مبسوطة مرتين
عشان التدوينة اللذيذة
و عشان عرفت أسم بنتى حبيبتى ..
انتى موش محتاجة طبعا انى أقولك
برافو
و دمك خفيف موت
قبلاتى
يا مرمر

مشمش said...

انا بحب القرود اوي دي مخلوق لطيف ووديع وسكر ازاي ميتحبش هوة ملوش ذنب ان الناس دي ظلماة بس انا بموت فية

محمد عبد الغفار said...

وفى حديقة الحيوان اكثر وقت نمضيه عنده

بحبك يامصر said...

ايه بجد الامثال دى كلها ؟ انا عرفت امثال كتير مكنتش اعرفها
شكراا

ابن حـجـر الـعـسـقـلانـى said...

لأ بصراحة أمثال جامدة .. شكلك كدة هاتألفى موسوعة قريب

بس أنا بيعجبنى مثل بس مش على القرود .. هو شبه المثل بتاع القرد فى عين أمه غزال

المثل اللى بيعجبنى هو: الخنفسة تشوف اولادها على الحيط .. تقول لولى و ملضوم فى خيط

و يالا .. حيوانات .. حشرات .. كله شغال

بت خيخة وأى كلام said...

انا بحب القرود جدا على فكرة
بحس انها طيبة وفيها امومة غريبة
تحياتى يا لماضة

صالح سعيد said...

بصراحه انا حاسس ان ده اليوم العالمى للقرد
ده ايه الاحتفال ده
البوست ده عندهم اغلى واحلى من الموز
سلاموز بالموز

شمس لا تغيب said...

السلام عليكم
لماضة يعني شطارة على ما اظن
جميل ما كتبته عن الحيوانات التي ظلمها الانسان بلسانه
لا شغل ولا مشغلة غير الكلام ههه
على فكرة جامع الفنا فيه قرادتية و
و القرد فيه ممثل يتزار انما المسكين لا يزور و لا عمري سمعت عن قرد من مصر او من بلد اخرى جا لجامع الفنا ليزوره ههههههه

alexandrany said...

قالوا يا قرد راح يسخطوك قال راح يعملوني غزال

جاااااااااااااااامد
جامدقوي المثل ده
بس ايه الحب ده كله يا لماضه
كل الحب ده للقرد
اكيد هو اللي لقالك فرده الشراب اللي كانت ضايعه منك تحت السرير
وانا اقول الحب ده كله منين اتاريكي
:)
بوست رائع يا دكتور
تحياتي

الإتربي اللولبي said...

عادي .. أنا كمان شفت القرد بيتلولب و يسوق طياره
أتمنى زيارتك و التعليق

الهدهد الطائر said...

مقال مبهج و مجهود مميز.. بالمناسبة.. أنا أؤيد نظرية التطور بالنسبة لعدد قليل من الحيوانات من ضمنهم القرد .. و لكن على عكس طريقة دارون.. فالحقيقة ان القرد أصله إنسان .. و بالتالي تصبح النظرية هي نظرية التدهور و ليست التطور.. و تكون هذه هي الحلقة المفقودة!!ـ

أحمد المصري said...

ده مجمع الزمخشري للأمثال القردية؟..
و بعدين مش لما نحترم الحمار يبقى نحترم القرد..ده هوا حمال الأذية.

أم أحمد said...

حلوة الامثال دي بجد وجديدة عليا انا هاحفظها ظهراًعن قرد

maii bahaa said...

لماضتي

عيب أوي لما ابقى في الآخر كده..بس معلش زنقة شغل والله...المهم عودة قوية مليانة شقاوة وتنطيط وسوداني وموز باحييكي عليها وياللا ورينا الهمة في اللي جاي

سلام يا قمر
:)

عاشقة القمر said...

ههههههههههههههه ..
تحفة جدا الموضوع ده .. وفيه امثال كتير عن القرود عمري ما سمعتها قبل كده .. ده انتي عندك قاموس ما شاء الله .. لا والصورة كمان تحفة تانية لوحدها بجد عسولة اوي تهلك من الضحك اساسا ..
على فكرة يا دكتورة لماضة صحيح ده اول مرور ليا بمدونتك بس ان شاء الله مش هيكون الأخير .. تقبلي تحياتي ..

عابد الرحمن said...

هو انتي بيطري !!!!!!!!!!!
كنت بحسبك اطفال
خير خير
على فكرة
الموضوع حلو
تؤ تؤ
حلو اوي ودمه خفيف
بس ده الطبيعي بتاعك
ديما متألقة

حصان بري said...

هههههههه
يخرب بيت عقلك ايه مجمع الامثال ده
واللهي القرد دمه عسل وكائن منتج
بس هو الحقد بقي يابنتي انتي عارفه البشر:)
مدونتك لذيذه وخفيفه
وزمل كمان
الكليه دي معدش فيها عاقلين تقريبا:)
سلامااات

عابد الرحمن said...

على فكرة مرسي بجد أنك متابعة مدونتي وبجد انتي من الناس اللي بحترمهم
وبجد اكتر من الاسباب اللي خلتني ارجع اني حسيت اني شيئ مرغوب فيه
جزاكي الله الجنة

la3lahakhier said...

يا لماضة عنيايا اتخزأت من الالوان دى يا بنتى
بس سيبك لمضة لمضة
خالص تحياتى ياستى
لعلها خير

مواطن زهقان said...

بجد
توبك
جامد
اصلى بحب القرود على
فكرة المدونة ناقصة بقا قردة يجرى فيها
تحياتى
بجد استفدت

لماضة said...

فاطمة
عنينا يا جميل
,,,,,,,,,,,,,,,,,,,,,,,,,,,,,,,,,
صوت من مصر
اوعى تنسى السوداني :)
,,,,,,,,,,,,,,,,,,,,,,,,,,,,,,,,,
يا مراكبي يا حمايا
اه والله بكالريوس طب بني ادمين قد الدنيا :)
,,,,,,,,,,,,,,,,,,,,,,,,,,,,,,,,,
فاتيما
ههههههههه اه البت كتبته وانا كنت عاوزه افضل اللهو الخفي كده بس طبعا مش ليكي يا ماما انا اعنيا ليكى والله
,,,,,,,,,,,,,,,,,,,,,,,,,,,,,,,,,
مشمش
عندك حق البنى ادم ظالمه
,,,,,,,,,,,,,,,,,,,,,,,,,,,,,,,,,
استاذي محمد عبد الغفار
ههههه ايوه وبجوارنا كيس السوداني والموز
,,,,,,,,,,,,,,,,,,,,,,,,,,,,,,,,,
بيحب مصر وهي بتحبه
الله يخليك اي خدمة
,,,,,,,,,,,,,,,,,,,,,,,,,,,,,,,,,
ابو العساقيل
ميه ميه
,,,,,,,,,,,,,,,,,,,,,,,,,,,,,,,,,
خيخه
اي خدمة يا حماتي
,,,,,,,,,,,,,,,,,,,,,,,,,,,,,,,,,
صالح سعيد
هههههههه يلا اهو كله زكاة
,,,,,,,,,,,,,,,,,,,,,,,,,,,,,,,,,
شمس لا تغيب
ههههههههه نعمل ايه طيب مش مقدرين اهميته لاسف
,,,,,,,,,,,,,,,,,,,,,,,,,,,,,,,,,
اسكندراني
ههههههه لا مش يمكن هو اللى ضيعلى فردة الشراب
,,,,,,,,,,,,,,,,,,,,,,,,,,,,,,,,,
الاتربي اللولبي
ههههههه ايوه ده سبع صنايع ان شاء الله ازورك سعدت بتعليقك جدا
,,,,,,,,,,,,,,,,,,,,,,,,,,,,,,,,
الهدهد الطائر
الله ينور ده ايه الفلسفه دي كلها بس تقريبا الحلقه المفقودة عندي
,,,,,,,,,,,,,,,,,,,,,,,,,,,,,,,,
احمد المصري
متقلقش الحمار الدور جاي عليه فى الامثال :)
,,,,,,,,,,,,,,,,,,,,,,,,,,,,,,,,,
أم احمد
تأمرينى يا ست الكل والله
,,,,,,,,,,,,,,,,,,,,,,,,,,,,,,,,,,
مي بهاء
الله يقويكي والله انا عارفه
انا كمان مطحونة فى النبطشيات وبدخل النت وقت قليل جدا غصب عني
المهم بس خليكى معايا اول باول قد ما تقدري تحياتى يا ست الكل
,,,,,,,,,,,,,,,,,,,,,,,,,,,,,,,,,
عاشقة القمر
انااسعد يا جميله والله مبسوطه انه عجبك وياريت تكرري الزيارة
,,,,,,,,,,,,,,,,,,,,,,,,,,,,,,,,
عابد الرحمن
الله يكرمك يا ريس وانا عارفهانى مقصرة جامد معاك والله غصب عني المهم انت تفضل تدون كمان وكمان
,,,,,,,,,,,,,,,,,,,,,,,,,,,,,,,,,
حصان بري
هههههههه لا متقلقش انا اخر الرجال المجانين فى الكليه الناس كلها عاقله
,,,,,,,,,,,,,,,,,,,,,,,,,,,,,,,,,
لعله خير
والله ما عارفه اعمل ايه فى الالوان
طيب حد يقولى ايه الالوان اللى مبتتعبش وانا اعملها والله على طول
معلش لعله خير برضه يمكن نظركم يضعف اقوم استنفع :)
,,,,,,,,,,,,,,,,,,,,,,,,,,,,,,,,,
مواطن زهقان
هههههه قرد يجري فيها ده بدل الفرس ولا ايه
:))




,,,,,,,,,,,,,,,,,,,,,,,,,,,,,,,

marool said...

اول مره ازورك بس موضوعك جامد جدااااا بجد ..كلامك عن القرود والامثله دى كلها ركبتيها كلها منييييين؟؟
بس بجد هايل
منتظرين المزيد ومنتظره زيارتك http://black-roses-candles.blogspot.com/

نوره الخشن said...

ولالله القرد ده زي العسل واذكى حيوانات الله واخفهم ظلاً

وانا بدعوكي للمدونة بتاعتي وماتخفيش بعيدة تماما عن مدونتك لتحذفي الرد ولا
حاجة من منطلق عدوك ابن كارك
http://awga3.blogspot.com/
تحياتي

Amr Ahmed said...

انا بحب اوي الامثال دي

هابقي استعيرها منك بقي

:)

ayar said...

انا بحب القرود اوى علشان دمها خفيف .. بس مرة عضنى فاكرهته !!