هما الرجالة اتعموا ولا ايه ؟؟ ! انا مش عاوزه ابشر على حد من اخوانا في الجهاد أقصد الرجال .. وخصوصا ان امرهم يهمنا الكام سنه دول – شوية دلع لحد ما رجلهم تطب - بس الجمله دي بسمعها اكتر ما بسمع كلمة ازيك من الاهل والأحباب والاصحاب وميضرش عبده البواب أو مريض جي يحنن قلبي عشان أكتبله على أجازه .
وعليه قعدت افصص السؤال الرجاله أتعموا – بعد الشر لحد ما ربنا يتمم على خير – وتوصلت لعدة احتمالات :
1 - يمكن بيغضوا البصر وساعتها يبقى كل الرجال محترمين وملهمش آخر والفيلم كداب .
2- يمكن مش عاجبهم الخلق الي بيشوفوها وبلاش إحراج أكتر من كده .
3- يمكن نظرهم فعلا على قدهم والافضل اني اتخصص رمد يمكن أعالج حد فيهم ويكسب فيا ثواب قصدي العكس طبعا .
4 – يمكن عنيهم اندب فيها رصاص من كتر فرجتهم على قناة مولتي والتانيه الي مقدروش يغمضوا فيها عنيهم لحد ما تقرحت القرنيه .
5 – يمكن دي تلكيكه كل راجل بيقولها عشان يهرب بجلده قبل ما يتكلبش على اساس انه بيتكلم عن جنس تالت أو على اساس ان البنات حلقة مفقودة بين الانسان والقرد .
وطبعا طبيعتي الطبية وفضولي المميت خلاني أدور على علاج لعمى الرجالة – أكتر من كده ويزيح ربنا - وتوصلت برضه للآتي :
1- فحص دوري على نظر الرجالة فوق ال 25 زي الكشف المبكر على ورم الثدي كده – أحسن يكون حاجة وحشه وخصوصا لو أُثر على الجواز كفاية عليهم السجاير.
2- زي ما الشبكة على العريس فرض نضارة كعب كبايه على العروسة وتتكتب في القايمة .
3- يمنع منعا باتا التعرض للحب الأعمى المشرحة مش ناقصة قتلى .
4- توصية السقا بعمل شيبسي بنكهة الجزر الحار وكله عشان مصر تختار وهي مفتحة .
5- تجنب دخول المراحيض العامة أو حتى الوقوف تحت الكباري ومنع البنات من تناول الكرنب والثوم لتجنب إصابة الشباب بالعمى المؤقت وفي حالات أخرى دائم مصحوب بشلل .
نهايته احنا يهمنا ايه غير الرجالة المفتحين – ومش مقصود منها مقطعين الفرخة وريشها – يهمنا الرجالة الي اتعموا – ربنا يعافينا ويعافيهم – يفتحوا عنيهم مرة عشان فيه ناس كتير صعبان عليهم البنات الي زي الورد – أعوذ بالله من كلمة أنا – يتجوزوا عشان عاملين زحمة في البيت .
حاجة أخيرة محدش يقولي الرجالة أتعموا – والا بعد كده همشي بقطرة في الشنطة