Thursday, 31 July 2008

في مثل هذا اليوم





في مثل هذا اليوم

صدرت أولى صرخاتي في اللماضة بعد أن التقطتني الدكتورة من لساني

في مثل هذا اليوم

تلقيت أول رضعة أثمرت في بناء كياني اللمض

في مثل هذا اليوم

ولدت الأبنه البكريه لماضة لتملأ سماء الأسرة ببخار اللماضة وبعض الروائح الأخرى

في مثل هذا اليوم

عانت الأسرة ولمدة دامت 24 سنة متواصلة من وجود شخص لمض رغاي كثير المفاجعات

في مثل هذا اليوم

أضطر أبي لشراء كميات مهوله من السبوع والمغات والذي منه

في مثل هذا اليوم

تلقيت أولى الدروس الخصوصيه حيث كان متعارف وقتها ببدأ موسمها في هذا اليوم بالأخص

في مثل هذا اليوم

بدأت اولى تدويناتي في هذا العالم الجميل ونمت وترعرعت لماضة الابنة المدللة لمعشر المدونين


حقيقي سعيدة جدا جدا النهارده وبكره وأمس اني وسط ناس بتحبني كده دي اكتر نعمه ممكن يمن بيها ربنا عليا الحمد لله

النهارده احتفل بيا اصدقائي الانتيخ احتفاليه خاصة وقدموا ما لذ وطاب وطبعا من الهدايا اللى مكنتش قادره اشيلها مش هقول ايه هي عشان الحاجات دي بتتنظر

كمان من اجمل الهدايا الخاصة جدا اللى وصلتني صورة لماضة المصرية في ثوبها الجديد مهداه من الفنان الجميل ياسر حسين ومرفق معها عقد كونتراتو


دي يا جماعه صورة لماضة الجديده وان شاء الله على طول


يلا انا مستنيه في صفحة الكومنتات مين هياكل معايا التورتايه

اوعى حد يجي ايده فاضية انا استغلاليه
واللى هيجيب هدية ليه الحق يسألني في أي استشارة مجانا ولمدة ساعه ليس اكثر

بيان هام

قررنا نحن لماضة هانم النزوح غدا لقاهرة المعز لأخذ بأزر الاخوة المدونين اثناء تبرعهم بالدم والشد على اذرعتهم علما بأن سيادتنا لن يستطع التبرع بقطرة دم ليس لعدم تواجدها وانما لقصر القامه والانيميا الحادة وانخفاض معدل ضغط الدم ومن قدم شىء بيداه التقاه وسوف نوافيكم الي نادي الزراعيين لمشاركتنا الأحتفاليه بعيد ميلاد حضرتنا

علما بأن اليوم في الحادية عشر مساءا سيتم فتح باب التعليقات لمن يحب مشاركتي هذه اللحظة السعيده مروري لعام جديد
يجعل ايامكم كلها بركة وهنا

انتهى البيان

Monday, 28 July 2008

سلام يا بلدي


98 سلام يا بلدي


والله عيب اللى بيحصل ده ازاي نقول على القضاء المصري كده

قضائنا المصري نزيه وعادل وتامر كل ده يعني عشان طلع ممدوح بيه اسماعيل وشركاه براءة

وعيب لما تقولوا على دوحة كده انظروا لهذا الملاك الطاهر

الراجل كان نفسه يعمل حاجه للبلد ويخدمها بالروح والدم وصاحب الفضل علينا في أول غطسة بحريه السلام 95 و98 ايه يعني لما يروح اكتر من 1000 شخص أصلا كانوا ميتين والتقارير قالت كده ان الناس مماتتش بفعل الصدمة ولا الغرق ولا الميه المتلجه ولا سمك القرش ابدا الناس دي اما أنهم كانوا راكبين العبارة جثث وبيستهبلوا أو ماتوا من شوية إجهاد او التهاب في زورهم من كتر ما فضلوا مستنيين الأغاثة ذنبه ايه الراجل البرىء ده بقى مش كفايه انهم غرقوله العبارة اللي لسه دافع فيها دم قلبه وكان مديهالكوا عروسة والتوكيل مرداش يصلحها وشركة التأمين رفضت تدفعله

قلتوا عليه هرب طلع انه كان صاحب مرض وبيجري على كوم عبارات وسافر يجيبلكوا شوية خردة تعوموا بيها هي صحيح عمرها الافتراضي انتهى من اكتر من 25 سنة فاتوا انما يعني شغاله مبتقولش لأ وعلى رأي عادل أمام لو كل واحد عزل عشان تحتيه رقاصة البلد كلها هتبات في الشارع يعني لو أعدمنا كل العبارات مش هنلاقي عبارات نغرق بيها

ايه يعني ناس ماتت وأسر أتشردت وناس أتخطفت فرقت كتير يعني ده اسمه موت الرحمة يا عديمي الرحمة على الاقل رجعوا في صناديق معتبرة بدل ما يعيشوا عريانين وبعدين هو مش السمك اللي في الميه ده ليه حق علينا لازم نأكله من لحمنا الحي

بلاش كده قولولي يعني الراجل سمعة أبو سمعة زي البرلنت ده يعيش ازاي دلوقتى واحنا قاعدين نلطش فيه سنتين بحالهم ظلم وافتراء اوعى تسكت يا دوحة على الحكايه دي لازم كل الشعب يجي يبوس أيدك ورجلك ولو احتكم الأمر حته تانيه راسك يعني بلاش قباحة

عشان كده يا بهوات لازم نتعلم الدروس المستفادة من الحكايه دي

أولا : يا بخت من بات مظلوم ومبتش ظالم

ثانيا : كل الطرق تؤدي الى روما بمعنى انك تختارلك موتة مستريحه وتاخد عليها فلوس أحسن ما تموت برضه وانت اللى تدفع الفلوس

ثالثا : أي شهادة وفاة مكتوب فيها الجنسية مصري يبقى أكيد هتدخل الجنه حدف لانك شهيد مفيهاش كلام

رابعا : اللي يلاقي حكومة وقضاء زي اللى عندنا وميدلعش يبقى لا مؤاخذة

خامسا : البطران سكته قطران

سادسا : الفصل التشريعي التاسع ينص على أن أي قضيه يبلغ عدد ضحاياها عشر فأكثر تؤيد ضد مجهول
ويتكفل الشعب بكافة المصاريف وأتعاب المحاماه وترفع ضدة قضية سب وقذف

Thursday, 24 July 2008

المدونة مغلقة




أنا هستأذنكم اقفل المدونة لمدة اسبوع واحد بس

امال مين هيتلامض مكاني يعني

الاسبوع ده تجهيزات لحدث هام جدا

امال هو الحدث ده شوية ولا ايه

وبصراحه اول مره يحصلي

حدث مبيجيش الا مرة واحدة في السنه

دماغكم متروحش لبعيد

الحدث ده هو

عيد ميلادي انا ولماضة

ايوه عيد ميلادنا احنا الاتنين في يوم واحد لاني عملت لماضة يوم عيد ميلادي

يوم 1/8/2007

ويوم الجمعه القادم بأذن الله هي هتم سنة وانا هتم ......... خلاص استروا عليا ربنا يخليكوا

المهم كلكم يا جماعه معزومين في العيد ميلاد ده والحاضر يعلم الغايب

وهنعمل فيه اكتر من مفاجأة

أولها هنعمل ان شاء الله اجتماع على الهواء مباشرة في صفحة الكومنتات عشان نطفي الشمع سوا

الاجتماع ده هيكون يوم الخميس القادم 31/7/2008 الساعه 11 مساءا

هستناكم

محدش يجي ايده فاضية

Sunday, 20 July 2008

جائنا التاج التالي



وصلني التاج ده من دكتورة منوسي على الايميل لولا بس انها غاليه عندي واسمها غالي عليا كمان اصله بيفكرني باسمي قلت خلاص لازم نجاوب


من أنت؟
لماضة والأجر على الله خريجة كليه البوستة في طنطا اعمل حاليا امتياز مقيم وغدا لناظره قريب طبيب مقيم على ما تفرج


وكنت تحب تكون حد غير نفسك؟
لا بصراحه كل اللى يجيبه ربنا كويس ده امر ربنا ودي خلقته اللهم لا اعتراض الحمد لله انها جت على قد كده شدة وتزول


بتدون ليه - امتى - لمين وفين؟
ليه ؟ عشان اتلامض معاكوا امال هتلامض مع نفسي يعني
امتى ؟ الساعه 2 الضهر على نص كوبري قصر النيل
لمين ؟ بدون عشانك يا مصر وعشان ترابك الزعفراني اللى بيدخل جوه عيني
أنا لا ممكن أبدا أنسى جمايلك عليا
النيل رواني والخير جواني
فين ؟ ايه التوهه دي أكيد هنا في دكانة لماضة ليس لنا فروع اخرى وخلي بالك من العلامة
بإختصار بدون عشان أكتب حاجه مبيحكمهاش زمان ولا مكان حصلت في زمن وآن لها الأوان تتنقش من غير حسبان


منظر أو موقف مش قادر تنساه عمرك؟
راجع مدونة لماضة كلها وركز كويس عشان هيجي منها سؤال في الامتحان


أمنية شبة مستحيلة نفسك تتحقق؟
ربنا كبير قادر على كل شىء يا ياخده يا ياخده محدش يفهم غلط أنا اقصد الفقر اللي قاعد على قلبنا وبعدين معاكوا عيب كده طويل العمر يطول عمره وينصره على مين يعاديه


تحب تكون مكان حد مشهور ؟مين ؟ وحتعمل ايه وقتها؟
لا انا متواضعه أحب اكون مكان بسم الله يجعل كلامنا خفيف عليهم
مقدرش انطق اسمه بيجيلي حشرجه وبفقد بعدها حواسي التسعه
هعمل ايه ساعتها العمل عمل ربنا بقى اكيد مش هعرفكوا
لا انا هجيبكوا تقعدوا معايا كمان


شايف مستقبلك إزاي ؟
عبد الحليم الله يرحمه شافهولي من وانا لسه في بطن الحاجة أم لماضة
قالي روح يابني طريقك مسدود مسدود يا ولدي مسدود اصلهم لسه مكنوش يعرفوا نوع الجنين يدوبك قال يا ولدي من هنا واتكل من هنا كان فيه شىء لله وفعلا كبرت وفهمت السبب لقيت المجاري ضاربة في الشوارع ومسدودة قمت لفيت من الناحيه التانيه اصلهم قالولي خليك حدق وأمشي جنب الحيط قمت طلعت احدق منهم ومشيت على الحيط نفسه
ولا مؤاخذة مبخفش دلوقتى غير من ربنا وحاجه واحده بس ضرب الجزم أصلي عقبال أملتكم أترقيت في الشغلانه وبقيت باشصرصار قد الدنيا


تختار زوجتك /زوجك عل أي أساس؟ المال /الدين/الجمال/ المستوى الأجتماعي ؟
بس يجي وبعدين يحلها حلال متبقوش قطاعين أرزاق


امتى يكون الحب أعمى؟
لما تتواجد حلة المحشي حيث ثبت بالدليل القاطع على أنها اقصر الطرق


شايف الدنيا إزاي؟
دنيا خربانه ياعم خربانه لا ده الراديو معلش صوته عالي قولولي السؤال كده تاني اصلي مسمعتوش


صفة أو عمل جميل نفسك نشاركك فيه؟
مشروع عصير قصب خالي من الزعازيع واصدره لدول الخليج واحتكره سعره يطلع مع سعر البترول وكل ما يغلوا البترول كل ما احرمهم من عصير القصب ويا الدفع يا زعزوعه لكل مواطن


التاج ده عجبني بصراحه عشان كده همرره لكل الناس اللى هتتلامض معايا وأولهم
ماما فاتيما روح قلبي
البت مروة صحبتي الانتيخ
دكتور عمرو فاروق
كبير العيله الخال احمد الصباغ
أختي وحبيبتي اللدودة مروة جمعه
واحلى تحيه للباشا اللي نور التدوين كله عمرو الطاروطي
بوبي حبيبة قلبي وخرفانها جاوبي يا آبي احسن ما ادبح خرفانك على العيد
وصديقي الصدوق صالح سعيد جدا جد
ا

وأستاذ العربي حسام ابراهيم


Friday, 11 July 2008

الطب للجدعان


ها قد أنتهت عاصفة الامتحانات وقد بذل كل طالب مطحون ما في وسعه لمواجهتها وهو في هذا الطوفان يضع كل أحلامه تحت رجليه ومهما ارتفعت الأمواج فهو ملتزم بموقفه المطأطأ مستميتا في النيل بمجموع يؤهله للالتحاق بركب كليات القمة
فكثيرا يتبادر إلي ذهني لماذا هذا التكالب على هذه الكليات ؟ ولم هي بالذات دون الكليات الأخرى؟ ولماذا أعداد المقبولين مازال في تزايد مستمر رغم تصريحات السادة المسئولون بارتفاع الحد الأدنى للقبول
فهذا إن دل فإنما يدل على إن الست مصر أمي " ولادة " طول عمرها والفضل كل الفضل لنماذج " الجمهورية "


لذلك أخي الطالب دعني أوجه إليك هذا السؤال أين تذهب هذا المساء إذا وافتك الثانوية بمجموع يتعدى الحد الأقصى للنسبة المئوية نفسها؟
هل ستفكر في ارتياد هذه الكليات ؟
إذا كانت إجابتك بنعم فلماذا ؟
لأنها إحدى كليات القمة ؟
رغبة الأهل وحلم الطفولة المشردة ؟
إستخسار للمجموع عملا بمبدأ وجع بطني ولا خسارة الطبيخ ؟؟


استعن بصديق
ولتعتبرني هذا الملاك المنقذ


الإجابة الصحيحة

بسم الله الرحمن الرحيم " قبل ما تناسق حاسب " أي قبل التفكير بالتوجه لأي مكتب تنسيق دعني اخذ بيدك في جولة سريعة حتى يستريح ضميري و لنفترض جدلا أنك أردت احتذاء نفس حذائي واخترت كلية الطب
فلنناقش سويا مبدأ بمبدأ


أولا : مبدأ اتعب النهاردة عشان تستريح بكره
لازم تعرف يابني انك لو ذاكرت في ثانوي هيطلع عينك في طب ولو رتبت سنة هتتبهدل عشان تحافظ على الترتيب ولو ربنا أكرمك و أتعينت يبقى هتموت في عز شبابك قبل ما تاخد الماجستير فكر بتأني العمر مش بعزقة
لسه مُصر يبقى أنت إنسان صميم يابني ندخل على المبدأ اللى بعده


ثانيا : مبدأ البطيخة القرعة لبها كتير
بمعنى انك لازم تعرف انك هتفني عمرك وشبابك في التعليم مش مصدقني طيب تعالى نحسب سوا عمرك راح ازاي من معادلة معروفة
شوف يا سيدي عندك سنوات التعليم كالآتي:


المعطيات : التعليم = تعليم متدني + تعليم عالي + منافعهم (
1

بما إن التعليم متدني = تعليم أساسي + ثانوي
والتعليم الأساسي = حضانة + ابتدائي + إعدادي
إذن التعليم المتدني = حضانة + ابتدائي + إعدادي + ثانوي (2

وبما أن التعليم العالي = كلية + امتياز (3


وحيث أن منافعهم = دبلومه + ماجستير + دكتوراه (4


وبالتعويض من 2 , 3 , 4 في 1

إذن إجمالي مدة التعليم = 2+6+3+3+6+1+2+4+4 مع الشغل والنفاذ


ده بافتراض حسن السير والسلوك وعدم الدبلرة

شفت بقى عشان تعرف إن جهنم مفيهاش مراوح

عشان كده يابني نصيحة متدخلش طب استخسار ولا منظرة وفرد عضلات


وهنيئا لمن لن يلحق بكلية الطب هذا العام وكل الأعوام ونيابة عن اكتر من 10 ألاف طالب بنحسدكم يا ولاد المحظوظة

Monday, 7 July 2008

امسحي دموعك يا لماضة




عااااااااا
محدش يمسكني سيبوني اتفلق

بابا اول مره يعملها ويبعد عني
من ساعة ما اتولدت وأنا ملازماه زي الأتب

بيقولي اني كنت زنانة قوي وانا صغيره ورذله كمان

عااااااااا
طيب ده اول يوم في حياتي هيبعد عني فيه
انت عارف اني ما بصدق أوصل البيت عشان أمارس هوايتي المفضلة في الغلاسة عليك

ازاي هدخل البيت وأنت مش فيه
هتسيبني أتحرم من حنان الأب ومصروفة
طيب مين هيجيبلي الفطيرة بالسكر كده مش هعرف اكلها تاني
طيب خلاص حلفتك تدعيلي وانت عند نبينا الغالي


مش عارفة اتكلم ولا أقول ايه حاسة الفراغ مالي بؤي
اصلي خلعت ضرس العقل ومن ساعتها واجعني ومش عارفه أكل ولا أبطل عياط
ادعيلي وانا ابطل عياط

Saturday, 5 July 2008

بريء يا بيه



البوست ده يا جماعه يعبر عن حالة تهييسة وأنا بتبرأ منه على الملأ
وان دل انما يدل على كثر النوباتجيات الملخبطه وعدم اتزان الدماغ فياريت اللى معاه حجرين ميبخلش بيهم
أنا بس هاشهدكم إن قليل البخت يلاقي العضم في الشوربة

عشان كده هحكيلكم على شوية مواقف بعتبرها من اكتر المواقف المحرجة اللي عدت عليا في حياتي وياريت محدش يتكسف هو كمان يحكي عن اكتر المواقف حصلتله وخلونا نفتح حلقة جديدة من برنامجكم مواقف وطرائف

ابتدي بقائمة الاعتراف

أول موقف

كان مطلوب مني فيه تقديم واجب عزاء لإحدى صديقات الفصل والتختة وده على اعتبار إني كنت ذو حكمة وقتها يعني فرشحت لهذا المنصب ولأني" مبسترش " في الحاجات دي قربت من الهدف قصدي زميلتي اعزيها في جدتها رحمها الله
والبنت بتبكي بحرقه شديدة متأثره جدا وأنا لا أعرف كيف أهدئ من روعها

أقولها خلاص يا حبيبتي متزعليش دي عند ربنا والى عند ربنا مبيروحش البت تعيط زيادة
خلاص يابنتي حرام عليكي كده أنتي كده بتعذبيها زيادة هي ناقصة ألاقي البنت تنفجر في العياط
آخر ما زهقت مش عارفه اسكتها ازاي فكانت الطآمة ويارتني سكت دهرا وما نطقت
!! قلتلها خلاص يا ليلى بقى هي يعني ستك كانت صغيره
لأحمل من مؤخرة رأسي ( قفايا ولا مؤاخذه ) بفعل فاعل والقي في آخر الفصل


تاني موقف

لما طلب مني أستاذي في المدرسة تأدية خدمة شخصيه ليه بالقرب من بيتي وطبعا معروف عني إني أبو الجدعنه قررت أروح المشوار قبل ما أروح بيتنا بعد إصرار شديد من الأستاذ عشان متأخرش وإذا بي وأنا متجهه للتمثيل أمام عدالة المحكمة الاقيلكوا حاجة - والله ما اعرف لحد دلوقتى سخنه ولا سقعه - بتدلق فوق دماغي وأنا لا أحرك ساكنا " مزراب " مليء بكل مخلفات الأسطح العامرة بكل أنواع الطيور وأنا لا أتزحزح عن موقفي من تحته أبدا لينفجر احد المارة بالضحك وأنا ثابتة كتمثال سعد باشا زغلول وياريت على كده وبس جريت على البيت اصطادني عم " بكار " حارس العقار ويسأل في استغراب : إلا جوليلي أنتي كنني بتعملي إيه في عشت الفراااااخ


ثالث موقف ولا أحسد عليه أبدا

عندما ارتديت كل ما هو نفيس وجديد واتجهت والنية لله لأداء فريضة امتحان الشفوي لآخر العام بإحدى سنوات الدراسة بالكلية وإذا بطفل بريء يجلس في الكرسي الخلفي وبعد ووصولنا ودنو اللحظة الحاسمة للهروب من الميكروباص يفاجئني الطفل بانطلاق مدفع به كل طعامه وعصارته المعدية فوق كتفي وحجابي وهو ينظر لي بابتسامة رضا كاملة ومع ذلك اصريت على التوجه للامتحان لتكون هدية من الله تعالى ألقاها علي فيرفض الممتحن إكمال طحني بالأسئلة بسبب الروائح الذكية المنبعثة

أخر المواقف في برنامجنا اليوم

عندما انتابتني حالة الوحم المعروفة لدى كل الطلبة المقبلين على الامتحانات للهروب من الاستذكار والإلحاح في طلب كوب من عصير القصب وإلا الإجابة يطلع في قفاها زعزوعه
فجلست أقدم كل وسائل الأغراء لأختي الصغيرة حتى تتطوع بالنزول لإحضار كيس العصير المرجو وأخيرا وبعد تقديم رشوة من كوب عصير وفوقه ربع جنيه وافقت بعد إلحاح شديد
وإذا بها تعود بعد دقائق مصفرة الوجه تلهث في إعياء كأنما لدغتها أنثى ثعبان بأجراس
اسألها لا تجيب فقط نظرت برعب شديد لباب المصعد
فتوجهت منه خيفة وفتحت بابه لأجد انه قد انفرط منها كيس العصير بالمصعد
فهدأت من روعها وطلبت منها إحضار أداة تنظيف لمسرح الجريمة
وبينما أزيل بقايا الدماء عفوا العصير وانزلها لبئر المصعد إذا بساكن يصر على استدعائه على وجه السرعة وقد كنت لم أنته من المسح بل ازداد الطين بله فتوزع العصير على كل أنحاء المصعد
بوليس ادخلي واقفلي الباب أنا تحت السرير لو حد سأل عني قوليله عند قرايبنا في البلد
بعد نصف ساعة جرس الباب الأول
أخويا لمض : لماضة شوفتي اللي حصل حد " عملها " في الاسانسير
جرس الباب الثاني
ماما : اللي يجي من بره يقلع جزمته على باب الشقة الاسانسير مش نضيف
على اعتبار إننا ماشيين على موكيت في الشارع خالي من مخلفات كتير ولا مؤاخذة
الجرس التالت والأخير
بابا بعد أن ثبتته ماما على باب الشقة : شفت العيال عملوها تاني في الاسانسير احنا لازم نقفل باب العماره الاسانسير بقى مبولـَة
بابا : لا ده عصير حد موقعه بس ازاي ملى الاسانسير بالشكل ده مش واقع في مكان واحد ده متوزع و حتى الواد جارنا اللى في الخامس كان واقف على رجل واحده مش عاوز يدوس في الاسانسير و خايف منه وبيقول فيه ريحة وحشه
امال لماضة فين ؟؟؟ انا شامم ريحتها في الموضوع ده


هذا اعزائي قد كانت نبذة عن بعض المواقف
ياريت محدش يبخل علينا بمواقف حصلتله كده واللى عنده موقف يحكيه بلاش بخل

Thursday, 3 July 2008

بحلم معاك




وصلني بالبريد المستعجل تاج غالي قوي
التاج ده لحد دلوقتى مش عارفه اكتب فيه إيه لأنه باختصار يستاهل يتكتب فيه عمر بحاله وكل حاجه حلوة ممكنه
بس اللي اقدر أقوله انه تاج جميل من إنسانة أجمل أكيد عرفتوها إيمان اللي عماله تشخبط على كل حيطان المدونات
التاج عبارة عن مجموعة أحلام أنا هرغي كتير ليه ندخل في المفيد ونجيب من الآخر


بسم الله توكلنا على الله


السؤال الأول


خمسة أحلام كنت بحلمهم في الماضي


لو حصرتهم في عدد خمسة أبقى كدابة كبيره ولو كتبت حاجه قبل حاجه أبقى اكبر بكاشة عرفتها البشرية
اقدر أقول في منها كتير أتحقق الحمد لله ولسه بيتحقق
صحيح مكنتش أحلام عظيمة قد ما كانت بسيطة وكنت بقول لنفسي لما احلم حلم صغير ويتحقق أحسن لما احلم حلم كبير يطّلع عيني وميتحققش وساعتها اقصر فوق قصري
بس الحلم الكبير الوحيد اللي حلمته ومازالت بحلمه هو
الجنة


السؤال التاني يا خفي الألطاف نجنا مما نخاف


خمسة أحلام بحلمهم للمستقبل


شبشب بوردة وكيس عسلية
إيه حكاية رقم خمسه ولا انتوا بتغزوا العين إذا كان كده ماشي يبقى أجاوب التاج على عروسة واخرمها
طيب بعينكوا مش قايلة إيه هي الأحلام دي
حاكم الحاجات دي بتتنظر فعلا

ندخل على اللي بعده السؤال التالت وإذا جاوبته ما بدك شيء راح تخسره


شخصين موجودين في حياتك وكنت تتمنى وجودهم


إيه ده انجليزي ده يا مرسي ازاي موجودين وأتمنى وجودهم مهم موجودين وإذا لم يوجدوا فمن أين سأتمنى وجودهم حد فهم حاجه ولا أنا
بس موجود وأتمنى يدوم وجوده هو والدي مهو أكيد ربنا يديله الصحة يارب وطوله العمر موجود في حياتي وإلا كنت جيت منين ولا أنا لقيطة مثلا


السؤال الخامس والأخير لو جاوبته غلط هترجع للنص جنيه


شخصين مش موجودين وتتمنى وجودهم في حياتك


الإجابة من غير لماضة أول شخص هو حبيبي رسول الله عليه أفضل الصلاة والسلام
الشخص الثاني وهو زوجي لو كان في العمر بقيه وعشت لحد ما أشوف اليوم ده


خلص التاج وسكتت لماضة عن الكلام المباح نعمل بقى العقاب المتعارف عليه في مثل هذه البوستات وهو اننا نحدفه للناس دي


البت مروة صحبتي الانتيخ
مهندس العدة بتاعتنا قلتكوا مش هسيبو في حالو
دفعتي دكتور حر

وكعقاب رادع وفعال لكل اللي اتلامضوا في الـ 100 تعليق في البوست اللي فات
تحديث هااام
اولا التاج ده بمرره لخالي و خالنا كلنا ابو المخاليل الصباغ
ثانيا يا جماعه والله انا مقصدتش اهرب من الاجابه بس فعلا كل يوم بصحى فيه بيتولد باحلامه الجديده وانا بحب اعيش كل لحظه أجمل لحظه بحلوها ومرها وبقول اكيد بكره احسن ان شاء الله واللى كان نفسي فيه النهارده مين عارف قادر ربنا يحققهولي بعدين
غلبتكوا صح ;)