Tuesday, 21 August 2007

اني اتجلبت

مسرح الاحداث
مسجد من اكبر مساجد عروس البحر يفد اليه الناس من كل فج عميق
زمن وقوع الحادثه
العام السابق ولاول مره فى تاريخ اللماضه وقد شهد توافقه مع اول يوم دراسى
المجنى عليه
لماضه على سن ورمح اللى بترعب الناس اتقلبت
وكيل المدعين
وكلت ربى ياخدلى حقى
الوقائــــــع
نحيل بشأنها الى ما جاء بعريضة الدعوى منعا للتكرار وحرصا على وقت عدالة المحكمه
الطلبــــــات
عايزه حقى يا سعادة البيه المأمور
معلش يا جماعه اصلى كان نفسى اعمل تغيير مسار وادخل حقوق والموقف اثر فيا شويتين
احكيلكم بقى اللى حصلى وعاوزه المحكمه تجيبلى حقى
السنه اللى فاتت مع اول يوم دراسه فى الكليه ولاول مره اقرر اجرب فكره الكورسات فى الكليه نظرا لان الدراسه صعبه ولان الواحد نفسه يبقى دكتور شاطر بدل ما انسى الفوطه فى بطن العيان ولا اجيب للناس مصايب والحكايه مش ناقصه
المهم
يومها المفروض كان برضه بدايه اول يوم فى الكورس وقلت فى عقل بالى انا ايه اللى يخلينى اروح وارجع انزل تانى من بيتنا لا يابت يا لماضه احسن حاجه اتغدى بره واروش نفسى واصليلى ركعتين فى الجامع يمكن ربنا يفتحها فى وشى السنه دى ويكرمنى بكام عيان
وفعلا اخدت المخله بتاعتى على كتفى ورحت اتغديت وتوجهت لبيت من بيوت الله اسأل حسنه قليله تمنع بلاوى كتيره
صلينا الفجر فين
الله عليك يا سيدنا الشيخ اشجينا كمان
ايه النور والروحانيات العاليه دى مفيش احلى من ان الواحد يكون بتاع ربنا قصدى مع ربنا اللهم لك الحمد والشكر
الست الحاجه : تاخدى سندوتش يابنتى
لماضه ( وعصافير بطنى بتهوهو) :شكرا يا امى بالهنا والشفا
الست الحاجه : انتى فى كليه
لماضة : ايوه يا امى انا فى كليه طب اخر سنه الى جايه (طبعا ده كان السنه اللى فاتت الحمد لله) ادعيلى
الست الحاجه : ربنا يكرمك يابنتى ويعلى مراتبك اصل انا ركبى بتوجعنى وعندى روماتيزم وقلبى بيدق على طول واديا بترتعش مش بقدر امسك حاجه و .......... الخ الخ الخ
لماضة : ألف بعد الشر عليكى يا امى ربنا يشفيكى ويعافيكى يا رب
يا حلاوه يا ولاد ادى اول فزيته ربنا مش بينسى حد صحيح الشحات ليه نص البلد قصدى الواحد يبقى يجى يسترزق هنا
الست الحاجه : ما تريحيلك شويه يابنتى شكلك تعبان مددى رجلك كده وخدى راحتك احنا ستات زى بعضينا ومتخافيش على حجاتك
لماضة ( والنوم يداعب عيون حبيبى قصدى عيونى ) : خايفه تروح عليا نومه شكرا يا امى
اه يانى فين سريرى حبيبى ولا طبيخ ماما الغامق
الله اكبر حى على الصلاه قد قامت الصلاه
لماضه فى سرى : هى الست دى داخله وحاطه شبشبها فى كيس وشيلاه قدامها كده ليه خلاص يعنى ده احنا داخلين نصلى ونفتكر ربنا وبعدين ده شبشب عادى اما الناس دى غريبه صحيح امال لو فلوس كانت عملت فيها ايه كل ده عشان شبشب وتاعبه نفسها وشايله كيس مخصوص فى شنطتها اما حكايه يلا ما علينا دع الخلق للخالق
الله اكبر
لماضة : الست دى بتزقنى كده ليه ده احنا بنصلى وانا مفينيش زقه
ايه الريحه الفظيعه دى هيغمن عليا ده احنا بنصلى يا ناااااس ارحمونا
الست دى رجليها شكلها عامل كده ليه مش يلبسوا شربات ويغطوها
اللهم اغزيك يا شوشو
ايه البت دى ده منظر لبس تصلى بيه
الله اكبر
استغفر الله العظيم اللهم اغزيك يا شوشو اتفوووو
السلام عليكم ورحمة الله
اللهم تقبل منا يارب
الست الحاجه : خدى ايدى يابنتى ربنا يكرمك ويرزقك كده بابن الحلال
لماضة ( هى لحقت تاخد بالها انى مش لابسه حاجه فى ايدى ) :ياااااااااااااارب يا نينا (ببراءه وخجل شديد بقيت طمطماية) بس الشهاده الاول ناخدها وبعدين الجواز
حجة البليد بقى
ياه الساعه كام دلوقتى كده تمام يدوب الحق اقوم امشى عشان اوصل مشوارى
ولفعت المخله بتاعتى تانى على كتفى استعنا على الشقى بالله
لماضة : الحقوووووووووووووووووووووونى يا ناااااااااااااااااس
اني اتجلااااااااابت

دزمتى اتسرقت يا ولد العم
يا فضيحتك يا لماضة لما ولاد الدهاشنه يعرفوا انك اتجلبتى

جزمتى اتسرقت يا ناس الحقونى امشى ازاى دلوقتى واعمل ايه

الست الحاجه : لا حول ولا قوة الا بالله معلش يابنتى مش عارفه ايه اللى داخلين الجوامع يسرقوا الناس دول مش تخلى بالك من حجاتك وبعدين اهم معلقين ورقه كله يخلى باله من شنطته وجيوبه

لماضة : يا ستى انا داخله بيت ربنا مش فى محطه مصر ولا راكبه ميكروباااااااااااااز اه يانى اعمل ايه دلوقتى وأمشى ازاى

ولاد الحلال: طيب ما تلبسى زنوبه من بتوع الميضة (المكان اللى بيتوضوا منه يعنى) وامرك لله

لماضة: زنووووووووووووبه زنوبه زنوبه حلوه وطعمه وحبوبه

يادى الفضيحه ام جلاجل يادى الجرسه ام حناجر

انا عاوزه طيب حاجه بس اروح اقرب محل اشترى شوز جديد اروح بيه مشوارى وارجعه تانى

بنوته روشه : طيب تاخدى البوت بتاعى تلبسيه لحد ما تشترى وترجعى

لماضة : (بوت عزالحر واكيد رحته ربنا يحفظنا ) ميرسى يا حبيبتى بس اصل ده مش مقاسى الدنيا مقاسى وانا بقاسى

الست الحاجه (بنظره امومه وشفقه وحنان ): طيب يابنتى معلش خدى شبشبى روحى اشترى بيه ورجعهولى تانى

لماضة : طيب وحضرتك تمشى ازاى وهتعطلى نفسك تستنيى لحد ما اشترى شكرا يا امى

الست الحاجه : ولا يهمك انا مستنياكى

لماضة : طيب خدى بطاقتى ولا شنطتى رهن لحد ما ارجع

الست الحاجه : عيب يابنتى يلا عشان متعطليش نفسك الحقى قبل ما السوق يقفل

لماضة (فى سرى ): هى دى شهمنة ولاد البلد ولا بلاش ادى قلب المصريين والله لو لفيت الدنيا ما هلاقى حب كده بس للاسف الست الحاجه شبشبها كبير قوى ده قد رجلى 3 مرات يلا مش مشكله اهى كلها دقايق واشترى حاجه البسها فى دماغى قصدى فى رجلى

ومشيت مشيييييييييييت على الاشواك
بيب بيييييييب : مش تفتحى يا أنسه
لماضة (وأنا بعبر الطريق) : ما تصبر ياعم مش شايف الشبشب اتقلع من رجلى استنى اصلى بمشى فى الشبشب الاول
ماشيه اتشحتف بالشبشب بكل فخر ولا هاممنى وراسى طبعا لفوق عشان محدش يبص لتحت وكل ما ابص لحد الاقيه يعدى
ولا الكاميرا الخفيه يشاور لتحت ويموت من الضحك وانا خلاص هعيط
الحمد لله وصلت لشارع الاحذيه
ايه يابت يا لماضة حلوه الشوز دى
صاحب المحل ( بنظره احتقار وقرف واشمئزاز على رجلى ) وشويه كان هيضربنى ويقولى روحى الله يسهلك
جتكوا القرف مليتوا البلد
المحل اللى جنبه مردتش ابص على البترينه دخلت على طول
لماضة : بص بقى يا عم انا اتسرقت فى الجامع ودى مش رجلى قصدى ده مش شبشبى ده شبشب ست تانيه
وعاوزه اشترى شوز انت عارفنى وبشترى من عندك على طول انا مش هنقى اللى تجيبه ينوبك ثواب
الراجل مات من الضحك قالى طيب ثوانى
جابلى حاجه حلوه ايه رايك يا انسه

لماضة : شغاله على بركة الله نقرا الفاتحه يلا لفلى بقى الشبشب ده لفه حلوه
الحمد لله ربنا سترها صحيح الراجل استغل الموقف وجابلى اغلى حاجه وستر ربنا انى معايا مصاريف الكليه والكتب

كنت ناويه ادفعها وطنشت النهارده ده بابا وماما هيفررررررررررررررحوا قوووووى لما يعرفوا الفلوس راحت فين

الامانه رجعت لصحابها الحمد لله وكل الستات اللى فى الجامع باركولى على الارض

والحمد لله انها جت على قد كده ومفيش حاجه تانيه اتسرقت خصوصا سندوتش الجبنه مكنتش هعرف اعوضه

ومن يومها بقيت ادخل اى جامع جزمتى فى حضنى وكيسها فى شنطتى الادب حلو

تمت

Friday, 17 August 2007

هيييييييييه



هييييييييييييييييييه
لا والله يا جماعه انا مش مجنونه انا بس هفتكر معاكم امتى كنا بنقول هييييه وامتى لسه بنقول هييييه وامتى نفسنا تانى نقول هيييييييييه وايه نفسنا يحصل عشان نقول هيييييييييييييه
يلا بينا نقول هييييييييييييييه الاول قبل ما نبتدى الموضوع

هيييييييه
كنا بنقولها زمان انا والعيال اول ما جرس المرواح فى المدرسه يدق مع انتهاء الحصه الاخيره خاصة لو كان اول يوم فى بداية السنه كنا نلاقى كل الفصول وكل العيال فى نفس واحد بتقول هيييييييييييه مراويييح وطبعا كنا بنكون مجهزين الشنط على اكتافنا من الحصه اللى قبل الاخيره والاستاذ ساعات كان يحب يعاقبنا يقوم ينزلنا اخر فصل فى المدرسه عقابا لينا على هييييه اللى عملناها وغالبا انا بكون حاجزه اول الباب عشان اطلع اجرى قبل العيال كلها اصل ده كان بيبقى زى المارثون اللى يلحق يطلع وطبعا بما انى اصغر الاطفال وقتها ومازلت كنت بخاف على نفسى بعدين يدوسونى

هيييييييه
كمان كنا بنقولها لما الدنيا تشتى وخصوصا اول شتوايه بعد الصيف دى بيكون ليها لذه خاصه كل العيال تطلع فى الشارع ونرقص تحت الشتا ونغنى كلنا اشتيها اشتيها خلى البط يعوم فيها والدنيا بتشتى واروح لستي ( جدتى يعنى ) تديني علقه بعصايه خضرا ..... الخ وطبعا بنرقد بقيت الشتا بانفلونزا حاده وعلقه سخنه بالعصايه الخضرا دى بسبب اننا بلينا هدومنا فى الشتا وبرضه كنا بنتلامض وبنعمل كده وبنقول هيييييييييه ومحدش يقدر يوقفنا مع كل شتوايه كمان كان لينا طقوس خاصه فى الشتا كنا كل عيل لازم يشترى جزمه خاصه فى الشتا اسمها بالبلدى ترومبه دى بقا لينا معاها حواديت كان الوانها كتير جدا احمر وازرق واصفر واخضر كان لازم كل الاطفال فى الشارع يلبسوها وننزل هجوم على اى تجمع مائى ونبلبط فيه كان كل مجموعه ليها بركة ميه تبلبط فيها براحتها كانت ايام رهيبه
هييييييييه
دى بقى كانت اشقى هيييه كانت تقريبا يوميا لما بتعدى عربية الرش الساعه 6 المغرب كل يوم فى التمام والعيال يستنوها على الشارع ويطلعوا يجروا وراها ويتشعلقوا فيها بس انا مجريتش وراها صراحه غير مره واحده لاقيت الريحه طلعه فظيعه ربنا ما يوريكوا كان هيغمى عليا وقعدت اكح منهم والعيال قعدوا يضحكوا عليا ويقولولى معلش يا لماضة هى اول مره بتبقى كده هههههههه بعد كده هتتعودى بس طبعا مكررتهاش لانى اخدت علقه احلف بيها

هييييييييه
كنت تسمعها من كل الشارع فى نفس واحد اول ما النور يكون قاطع ويرجع تانى تلاقى كل العيال اللى نايمين واللى قايمين واللى ماشيين واللى واقفين فى نفس واحد هيييييييييييه النور جه تسمع الى مسمعش ان النور جه وطبعا كالعاده اللماضة كانت بتظهر ان كل واحد كان بيتنافس يطلع اعلى هيييييييه ونطلع كلنا فى البلكونات او الشارع ونقولها باعلى صوت ربنا يقدرنا عليه وكل الناس اللى ماشيين يموتوا من الضحك

(القاهرة ليلا)

هيييييييييه

دى جايه هطل علينا قريب وكل سنه وانتوا طيبين هييييه بتاعه مدفع الافطار فى رمضان قال يعنى كنا بنصوم وقتها طبعا كنا بنصوم صيام الحجه كل ما نجوع نتغدى بس بمجرد اننا نسمع الاذان كل العيال تنطلق فى الشارع هييييييه وبمب وصواريخ ونكسر الدنيا على فكره انا لحد دلوقتى بعمل كده عادة ربنا ما يقطعها لازم قبل كل رمضان علبة الصواريخ المحترمه تكون جاهزة لزوم الاحتفال بعدين بقى هبقى احكيلكم عن شهر رمضان بالتفصيل لانه مليان لماضة


هيييييييييييه

طبعا عرفتوا دى انهى هيييه دى بيقولها الشعب المصرى كله خصوصا لو مباراة اهلى وزمالك او بطوله زى كأس الامم الافريقيه يعنى مش انا والعيال لوحدنا اللى بنقول هييييييه ده الشعب المصرى كله كده تقريبا تقريبا ده داء فينا يا مصريين متهيالى احنا الشعب الوحيد اللى بيقول هيييييييييييه

هييييييييييه تعبتكوا معايا وقطعت نفسكوا

يارب اقول هيييه قريب لما اخد البكالريوس ادعولى بقى

وعاوزه اعرف كل واحد فيكوا امتى وفين وازاى وليه نفسه يقول هيييييه مستنيه ردودكوا عليا مش شفوى ياريت كتابه اجبروا بخاطرى مره وخلونى اقول هييييييه فى حد عبرنى ورد عليا

Saturday, 11 August 2007

آيس كريم

كان لازم يعنى ايس كريم ادى اخرة اللماضة يقطع الواجب على الجنتلة فى وقت واحد
لماضة : بقولك ايه يابت يا دوده ( اصلها دحيحه حبتين وكمان دوده دى مشتق من اسمها ) انا ليا مزاج أوجب معاكى النهارده
النهارده هنغير مش هعزمك على عصير قصب زى كل مره انا هعزمك على مفاجأة فاكرة اخر مره اتخانقت مع الواد بتاع المعصره كل مره يعملنا عصير زعازيع قلتله اخر مره نفسى أدوق عصير القصب ده شكله ايه بيقولوا عليه حلو
الله يكرمك مش كل مره زعازيع ممكن مره قصب ده احنا حتى زباينك
النهارده يا بت يا دوده هعزمك على آااااايس كريييييييييييييييم يلا مش خساره فيكى كفايه استحملتى معايا عصير القصب ده كله
مش هعزمك عند اى حد كمان ده ايس كريم ابو السلاطييييييييييييييييييين
دودة : ليه يا لماضة كده ما تخلينا يابنتى فى عصير القصب اهو اللى نعرفه احسن من اللى منعرفوش كمان يطلع ايه الايس كريم ده ده منتج جديد ملوش اثار جانبيه طيب ليه مضاعفات بيأثر على النظر أوعلى الجهاز الهضمى بعد كده؟؟؟
لماضة : يابنتى خلينا نعيش يومين ملكيش دعوه انتى ده على ضمانتى انا اكلته قبل كده اطمنى
عند ابو السلاطين
المسقعاتى بتاع الجيلاتى : أامرى يا انسة
لماضة : لله الامرمن قبل ومن بعد عاوزين اتنين ايس كريم لو سمحت
هتشوفى دلوقتى يا دوده هتاكلى وتدعيلى ده لا يعلى عليه
المسقعاتى بتاع الجيلاتى : كبايه ولا بسكوته
لماضة : ايه رايك يا دوده خلينا بسكوت
المسقعاتى بتاع الجيلاتى : شكولاته ولا فانيليا ولا مانجه ولا كنتلوب ولا فرواله ولا... الخ الخ الخ
تقريبا دول الاسامى اللى قدرت اوعى عليهم بقيت الاسامى يعلمها الله معرفش بتاعه ايه بس تقريبا ادوية كحه
لماضة : اعملنا كوكتيل من كل حاجه
المسقعاتى بتاع الجيلاتى : مكسرات يا انسه
لماضة : اوك
المسقعاتى بتاع الجيلاتى : فواكه يا انسه
لماضة : وماله
المسقعاتى بتاع الجيلاتى : كريز يا انسه
لماضة : نو بروبلم
المسقعاتى بتاعى الجيلاتى : كريمه
لماضة : لا بتعملى حموضه
المسقعاتى بتاع الجيلاتى : ........... يا آآآ
لماضة : حط اللى عندك كله الايس كريم هيسيح فى ايدك انجز
يووووه الواد ده شكله خنيق شكله باصصلنا فيها ولا ايه
دوده : بقولك ايه يا لماضة ما اجيب كمان للشيخه رحرح
الشيخه رحرح دى صحبتنا بس هى ليها فى كل حاجه ومتعمقه فى الدين واليومين دول بتفكر تتطلق اللحيه
لماضة : وماله بس استنى لما تشوفى هيعجبك ولا لا
اتفضلى يا أنسة
دوده : الله ده شكله جامد قوى لما اجيب للشيخه رحرح بقى
لماضة : طيب استنى نحاسب على دول
كام يا عم ؟؟؟؟
المسقعاتى : اتنين كومبو بربع
لماضة ( وكأن الايس كريم وقع على دماغى ) : افندم بكام؟؟ لا طيب ماشى الدنيا حر ليه كده
المسقعاتى : خلى يا انسة
لماضة : معلش ده قضاء ربنا قصدى الله يخليك شكرا

لماضة : انا عاوزه اعيط نفسى اتسدت بس هاكله

دوده (طبعا كانت رجعت فى رأيها عن عزومه الشيخه رحرح وكمان لغت الفكره من اساسها) : ما انا قلتلك بلاش

لماضة : يلا معلش الله يرحمه كان طيب على طول محسسنى بالامان ومدفيلى جيوبى (اللى هو مصروفى) يلا مش مهم المهم ان انتى مبسوطة بس متاخديش على كده دى اول واخر مره تشوفيها فيها الايس كريم معايا ماله الكونو طيب وابن حلال

دوده ( بعد ساعه من لحس الايس كريم البت وكانها كانت فى مارثون ) : لماضه انا مش قادره اكمل ممكن ارمى الباقى

لماضة (بطقطقة سنان تسمع الشارع اللى جنبنا ) : اياااااااااااااااااااااكى يا دوده تعملى كده ده انا أخسرك فيها قصدى ازعل منك يعنى ده انا اللى عزماكى معلش اضغطى على نفسك وكمليها
ما تيجى نجيب رغيفين ونحطهم فيه نعملهم سندوتش اهو اسمنا اتغدينا طبيخ ساقع اهو بدل الطبيخ الغامق اللى فى البيت مستنينا

دوده : متزعليش نفسك تيجى نرجعهوله
لماضة : لا خلاص الطيب احسن احمدى ربنا اننا مسمعناش كلامه واكلنا جوه فى المحل والا كان زمانا بنغسل الصحون دلوقتى ربنا عالم بالحال وعارف اننا غلابه كان زمانا بناخد على قفانا دلوقتى يا الدفع يا الحبس ربك كريم اييييييه دنيا
دوده : كان نفسى اعزم الشيخة رحرح

لماضة : والله ما هزعلك فى كنتين جديد فاتح فى الكليه عندنا تبع كلية زراعه عندهم من الجبنه والبيضا واللبانى والرز بلبن لحد الايس كريم هنجيبلها من هناك اهى على الاقل كلها دسم وتغذيها شويه بدل ما هى مموقته كده ويدوبك على قد الكام قرش اللى فاضلين فى جيبنا او ممكن نديها كام لحسه اوفر برضه

دوده : طيب ده كويس يعنى ملوش اثار جانبيه ولا مضاعفات ولا ليه تاثير على النظر او الجهاز الهضمى او الصحة العامه انا رايى نخليها تالحسلها كام لحسه اضمن

لماضة : يابنتى اطمنى ايه الرعب ده انا مجرباه وعلى ضمانتى

دوده : تاااااااااااااااااانى

تفتكروا هنقدر ناكل ايس كريم من عند ابو السلاطين تانى ؟؟؟؟؟

Sunday, 5 August 2007

احتلاااااال

زمان كلنا كان لينا ذكريات لعب فى الشارع مع اصحابنا
النهارده انا هحكى على موقف واحد من عشرات المواقف اللمضه والشقيه اللى حصلتلنا
يوم من الايام لقينا انا والواد لمض اخويا خبط على الباب جامد
لمض لماضه الحقوااااااااااااااااااا
مين ده قلبظ جارنا اللى تحتينا ومن نفس سننا جاى ينبهنا وجايبلنا خبر وحش
قلبظ : الحقواااااااا لازم تنزلوا الشارع حالاااااااا
لماضة : ليه يعنى ايه اللى حصل استنى هنتغدى وننزل اهدى يا قلبظ فيه ايه احكى براحه
قلبظ : لا مينفعش مش هتلحقواا العيال بتوع الشارع اللى جنبنا احتلوا الشارع بتاعنا وجايبين لعبهم وحاجتهم وجايين يلعبوا فى شارعنا

احتلوااااااااااا شارعنااااااااااا

لمض ولماضه (وشنا احمر والنار طلعت من ودانا ) : لا ده مش لازم نسكت احنا نازلين حالا محدش يقرب من شارعنا كل واحد يلزم شارعه احنا لازم نوريهم شغلهم ونحرمهم يعدوا من الشارع ده هما فاكرين نفسهم ايه ولا ميعرفوش احنا ميييييييييييين
يلا بينا ونطينا فى الشباشب بتاعتنا وديلنا فى سنانا وعلى السلم
لماضة : قلبظ اجمعلى القوات حالا نادى على كل عيال الشارع كله يجمع تحت البيت
قلبظ : علم وينفذ
حمااااااااااصه
بوجي
زئرده
صفارة
كيمو
عينو
حمو
شلاطه
..
..
الخ..
اجمعواااااااااا حالا
لماضة : شوفوا يا رجاله حصل سطو على الشارع بتاعنا والعيال بيلعبوا فى منطقتنااااااااااا
هما مش عارفين احنا مين ولا ايه ده احنا بنرعب المنطقه كلها مش هنعرف نأدب عيال زى دول
لازم نقطعهههههههههههم
بس قبل ما نتحرك هنبقى فى جماعات
يعنى محدش يبقى على الخصم لوحده كل اتنين يستلموا واحد
وكمان مش هنروح ادينا فاضيه كله يعبى جيوبه طوب
نقوا زلط وطوب اللى مبيتكسرش ابعدوا عن الطوب الاحمر انا مجرباه مش بيوجع وكمان بيتفتفت
انتى يابت يا كنشوا (اصلها على طول مش بتسرح شعرها ) مش تلبسى بجامه بجيوب هتحطي الطوب فين دلوقتى يلا خليكى بقى مع الواد حمكشة اهو بجامته باربع جيوب خزنى طوبك معاه
يلا نتحرك هااااااااااااااااا

وفجأه واحنا رايحين على العيال لمحت فى الارض كنز
لماضة : يا عيااااااااااال المنطقققققققة الحقوا شوفوا لقيت ايه؟؟؟؟؟
واذا على الارض طقم صينى مكسر بس حتت كبيره
يلا كل واحد يتسلح بحته صينى من دول احنا لازم نقطع العيال دى

وطبعا اعددنا العدة وفجأه
لماضة : قلبظ خد امسك الحته دى حلوه طرفها حامى موس
قلبظ : ورينى كده
لماضه : آآآآآآآآآآآآآآآآآآآآآآآآآآآآآآآآآآآآآآآآآآآآآآآي
الحقووووووووونى اديا اتقطعت اديااااااااا
الصينى المكسور وانا بناوله للواد قلبظ عورنى فى ايدى وهو بيشاور بيه غصب عنه
روحونى البييييييييييت عاوزه اموت على فرشتى
اه يانى
ااااااااااه
العيال شالونى طلعونى بيتنا
بابا اول ما شافنى
ابويا : ايه اللى عمل فيكى كده
لماضة : اه يا بابا اديا بتوجعنى وبتخور دم اهيييييييييييييء
بابا قام غسلها وربطها الجرح كان سطحى جدا الحمد لله بس لحد النهارده لسه سايب اثر صغير
ابويا : ها يا لماضة احكيلى براحه مين اللى عمل فيكى كده
لماضة (على استحياء ) : بصراحه يا بابا حصل كذا كذا كذا
وعينكم ما تشوف الا النور
يومها اخدت علقه تمام مش انا لوحدى والواد لمض وكل عيال الشارع ويعينى على قلبظ علقته قعدنا نحكى بيها اسبوع
مامته اديتله علقه سخنه كل عيال المنطقه بقت تحكى بيها
وطبعا اتحرمنا اننا نزل الشاع لمده اسبوعين وما ادراكوا من ده عقاب
بس كنا بنقف فى البلكونه ونحدف العيال مع احنا معانا مخزون طوب يكفى شهر
والعيال اللى احتلوا منطقتنا برضه عرفنا نمشيهم سلطنا عليهم عيال اصحابنا فى الشارع اللى جنبنا



بس تفتكروا روح الاتحاد دى لسه موجوده بينا ؟؟
ولسه روح الثورجية دى عايشه جوانا ؟؟
بذمتكم مش عندى حق لما اقول ظلمونى وقالولى لماضة ؟؟

Wednesday, 1 August 2007

!!!طباشير


موقف ده لن انساه هحكيلكم وهتعرفوا اخرة اللماضة ايه
زمان انا ولمض اخويا كان عندنا هوايه غير كل الهوايات البريئه وهى هواية جمع الطباشير بتاع السبوره كنا يوميا نشترى طباشير بمصروفنا وناخد الطباشير اللى بيتبقى فى نهاية اليوم ويا سلام بقى لو طباشير طبى كمان والله عليه لو ملون
كنا نحتكم كده على يجى 5 علب كبيرة مليانه زائد درجين مفيهمش غير طباشير وبس كل ما تشتهيه العين
يوميا نقعد نعد ونرتب فيهم ونفرز الازرق مع الازرق والابيض مع الابيض والكاكي لوحده

يوم من الايام خارجين من المدرسه سوا ولاقيت لمض بيجرى عليا

لمض : الحقى يا لماضه شوفى المفاجأه دى معايا طباشير طبى ملون وابيض صوابع ده غير اللى الابله ادتهولى
لماضة: حلو قوى كده يبقى كملنا العلبة العشرتاشر

فجأه وبدون سابق انذار الشمس راحت والدنيا ضلمت ببص حواليا لقيت ركب بنى ادم بضرب بعينى لفوق لقيت عيل ضخم الجثه عريض المنكعين وفجاه شفت السما ( اتعلقت من قفايا ) وبصوت جهورى
انت ياض طلع الطباشير اللى فى جيبك كله
لمض : معيش حاجه
الواد الضخم : انا بقولك طلع انا لسه شايفك بتحطه فى جيبك
لمض : مش مديك حاجه ورينى هتعمل ايه ؟؟
الواد الضخم : انت هطلع الطباشير بالذوق ولا اضربهالك على قفاهاااااا

" لمض: اضربها على قفاهاااااااااا " عض اختي ولا تعض طبشيرتي
لولا ان ربنا كان عالم بحالى ساعتها لاقيت ابن عمتى الاكبر مننا لحقنا وزعق فى الولد والعيال خافت وطلعت تجرى بعيد
ومن يومها قررت امشى وجيوبى فاضية

!!!بذمتكم مش عندى حق

لماضة سنه جديدة




النهارده عيد ميلادى كل سنه وانتى طيبه يا لماضة

يااااااه ده السنين بتعدى بسرعه قوى فييين لما الواحد كان كل حلمه يدخل المدرسه ويلبس الزمزميه قصدى المريلة وبعدين يبقى فى اعدادى ويلبس بدلة السجن قصدى البدلة الزرقا وفين لما نكبر ونبقى فى ثانوى يارب مجموع يارب مجموع عشان ادخل طب والبس البدله البيضا قصدى البالطو الابيض ودخلنا طب وكان يا ما كان يااااااااه 7 سنين لا دول بقوا 6 الحقيقه المره هما 7 سنين ونص امتى نخلص خلاص هانت كلها ايام والواحد يبقى

داااااااااكتورة قد الدنيا يا دى الهنا يا دى الهنا

وعشان كده قررت ادون معاكم احلى ذكريات لماضتنا قصدى طفولتنا وشبابنا هحكى مواقف عدت عليا وهسيبلكم الحكم

بذمتكم مش مظلومه لما بيقولوا انى لمضة