Saturday, 29 May 2010

الرجالة أتعموا



هما الرجالة اتعموا ولا ايه ؟؟ ! انا مش عاوزه ابشر على حد من اخوانا في الجهاد أقصد الرجال ..  وخصوصا ان امرهم يهمنا الكام سنه دول – شوية دلع لحد ما رجلهم تطب -  بس الجمله دي بسمعها اكتر ما بسمع كلمة ازيك من الاهل والأحباب والاصحاب وميضرش عبده البواب أو مريض جي يحنن قلبي عشان أكتبله على أجازه .
وعليه قعدت افصص السؤال الرجاله أتعموا – بعد الشر لحد ما ربنا يتمم على خير –  وتوصلت لعدة احتمالات :
1 - يمكن بيغضوا البصر وساعتها يبقى كل الرجال محترمين وملهمش آخر والفيلم كداب .
2- يمكن مش عاجبهم الخلق الي بيشوفوها وبلاش إحراج أكتر من كده .
3- يمكن نظرهم فعلا على قدهم والافضل اني اتخصص رمد يمكن أعالج حد فيهم ويكسب فيا ثواب قصدي العكس طبعا .
4 – يمكن عنيهم اندب فيها رصاص من كتر فرجتهم على قناة مولتي والتانيه الي مقدروش يغمضوا فيها عنيهم لحد ما تقرحت القرنيه .
5 – يمكن دي تلكيكه كل راجل بيقولها عشان يهرب بجلده قبل ما يتكلبش على اساس انه بيتكلم عن جنس تالت أو على اساس ان البنات حلقة مفقودة بين الانسان والقرد .

وطبعا طبيعتي الطبية وفضولي المميت خلاني أدور على علاج لعمى الرجالة – أكتر من كده ويزيح ربنا - وتوصلت برضه للآتي :
1-    فحص دوري على نظر الرجالة فوق ال 25 زي الكشف المبكر على ورم الثدي كده – أحسن يكون حاجة وحشه وخصوصا لو أُثر على الجواز كفاية عليهم السجاير.
2-     زي ما الشبكة على العريس فرض نضارة كعب كبايه على العروسة وتتكتب في القايمة .
3-    يمنع منعا باتا التعرض للحب الأعمى المشرحة مش ناقصة قتلى .
4-    توصية السقا بعمل شيبسي بنكهة الجزر الحار وكله عشان مصر تختار وهي مفتحة .
5-    تجنب دخول المراحيض العامة أو حتى الوقوف تحت الكباري ومنع البنات من تناول الكرنب والثوم لتجنب إصابة الشباب بالعمى المؤقت وفي حالات أخرى دائم مصحوب بشلل .
نهايته احنا يهمنا ايه غير الرجالة المفتحين – ومش مقصود منها مقطعين الفرخة وريشها – يهمنا الرجالة الي اتعموا – ربنا يعافينا ويعافيهم – يفتحوا عنيهم مرة عشان فيه ناس كتير صعبان عليهم البنات الي زي الورد – أعوذ بالله من كلمة أنا – يتجوزوا عشان عاملين زحمة في البيت .
حاجة أخيرة محدش يقولي الرجالة أتعموا – والا بعد كده همشي بقطرة في الشنطة

55 comments:

أبو العريف said...

هههههههههههههههههههه

تصدقي انا لسه عامل نظاره قريب

مع ان نظري سليم

بس كبرت ف دماغي اعمل نظاره


فهلللللللللللللل

ده ليه علاقه بالرجاله اللي اتعموا


بوست ف الجون

احاسيس آيوشه said...

هى مش اتعموا فى عنيهم بعيد عنك دول اتعموا فى قلوبهم وبصيرتهم
يلا مش بدينا غير ندعى ونقول ربنا يعافيهم زى ما بتقولى :))

P A S H A said...

نياهاهاهاهاها

سرك في بيـــــــــــر يا دكتوره !

:)

شاهد ما شافش حاجة

تحياتي

سمع هوص (Abo 3li) said...

ههههههههههههههههههههههههههههه
ولا اتعمينا ولا حاجة...
بس عاملين من بنها...
وعاملين مش واخدين بالنا...

ادعي انتي بس نعقل مش نظرنا يرجعلنا..

Noha Saleh said...

عجبتنى اوى حكاية شيبسى بالجزر دى
بصى والله البنات بيقولوا ان الرجالة اتعمت والرجالة بيقولوا البنات متفرعنين وشايفين نفسهم
وكل واحد مصمم على موقفه
بس برضه عاجبنى موضوع الشيبسى اللى بالجزر ده

فتاه من الصعيد said...

هههههههههههههههه

ربنا معاهم..ماهو الامكانيات قليله برضو

تحياتي

مهندس مصري said...

هما مش اتعموا و لا حاجة
بس العين بصيرة و الإيد قصيرة
و اللي معاهوش ما يلزموش
و لا عايزة الشاب يخطب واحدة و يقعد يشحت على جوازته منها 10 سنين بالقليل قوي
:))
هو اللي يقدر يهج بره مصر هج من شوية يا بنتي
و عموماً غير نصيبك لن يصيبك و المكتوب على الجبين لازم تشوفه العين يا دكترة :)

جبهة التهييس الشعبية said...

هههههههههههههههههههههههههههههههههههههههه
معلش احنا بنتبهدل

سومه...مجنونه فى بلد عاقل said...

هههههههههههههههههههههه
يا بنتى عندهم حاله خوف رهيبه من الجواز وتحمل المسؤليه تقوليش حنعضهم ولا حناكلهم طب دا احنا حتى غلابا مش حقول ملايكه :))

sweet angel said...

هههههههههههههههههههه

طيب والعروسه تجيب نظاره في القايمه لية؟
هو مش خلاص هيبقا اتدبس؟
‏:)
مش مهم يشوف حاجه تاني بقا بعد كده

Bent Men ElZaman Da !! said...

هههههههههههههههههههههههههههههه
مفتحين مغمضين اهو اى رجاله
الواحد مابقاش شايف هههههههههههههه
ربنا يكون فى عونهم
ويقوى نظرهم

تقبلى مرورى

ندى الياسمين said...

ههههههههههههههههههه
عسوله يا لماضه ربنا يصلح حالهم يا اختي
وينفخ فى صورتهم

tamer.sala7 said...

وهو يعني خلاص كل البنات ماشية صاحية

مهو في بنات بيكون جنبها حاجات كتير وبرضه عندها عمي جزئي ومش شايفين

Shreef said...

:D
تحفة التدوينة ديه و احب اطمنك و اقولك اه هما اتعموا بس قهراً للأسف .. تحياتي يا فندم
:)

محمد ناصر الدين الهلالى said...

احم احم .. ماهو لازم يتعموا يا فندم بعد ما شافوا النوع الحقيقى من النساء عبر الاثير .. البنت فى مصر باعتبرها زى أخويا او واحد صحبى بالكتير .. مسترجلة وكلها توستيستيرون ولا هوجان فى زمانه .. فميش داعى نفتح العلب ونقول اللى جوانا لحسن شوية وبوليس المطافى يطب !

Gid-Do - جدو said...

فيه حلين ملهمش تالت

الحل الاول - هو اعادة برمجة تفكير اسرة الفتاة خاصة الاب اللى علشان الشاب يطلب منه ايد بنته يطلب منه لبن العصفور وحتى لو فرض ان الشاب جاب لبن العصفور يطلب الاب من الشاب انه يوقع على قايمة عفش تدخله السجن لان كل المكتوب فيها امانه عندة - وكم من زيجة فشلت بسبب قايمة العفش هذه - لابد من ان يكون هناك ثقة واذا كان الاب وثق فى زوج بنته واعطاه بنته مفيش داعى انه لا يثق فيه فى شوية كراكيب


الحل التانى - ان البنت والولد يتجوزوا بالموجود - مفيش داعى لشقة فيها كل الكماليات ولا بد من عربية تحت العمارة - محدش بيبدء كبير واذا البنت تعاونت مع الولد بانها تقنع والدها بان الولد كويس وانها على استعداد انها تعيش حسب الامكانيات سوف تحل المشكلة

محمد الشوادفي said...

هوه مش عما بعيد عندك ممكن تعتبريه حول وراثي وبرضه الستات ليهم دور ولو عايزه تعرفي السبب تفضلي بالدخول على مدونتي
www.adpsaker.blogspot.com

محمد الشوادفي said...

معلش عنوان المدونه الصحيح
http://www.adpsakher.blogspot.com/

هوبتي said...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

ماعنديش تعليق اضيفه بعد الي انتي قولتيه

هشام علاء said...

عزيزتى لماضة

ارجو انك تكونى بخير و فى احسن حال

بالنسبة لموضوع البوست اللى بيشكك فى نظر طائفة الرجالة
فأحب اقول ان ممكن يكون فيه فعلا رجالة كتير مش اتعموا و لكن عاملين عمى بمزاجهم او غصب عنهم

بمزاجهم ازاى؟

ممكن يكونوا خايفين من تجربة الزواج و الالتزام

ممكن يكونوا بيقدسوا حياة العزوبية

ممكن يكونوا مش لاقيين البنت اللى نورها يكشف عماهم الاختيارى


غصب عنهم ازاى؟

حضرتك عارفة الشقة بكام دلوقتى؟ اى قة ان شاء الله 60 متر حضرتك

العين بصيرة بس الايد قصيرة حضرتك

و ربنا ما يوقعك فى ضيقة
:)


و اخيرا احب اقولك حاجة مهمة

المشكلة اللى بنواجها اليومين دول مع الولاد و البنات و الشباب الحلوين المتعلمين القمامير مش مشكلة عمى البصر..المشكلة - و لامؤاخذة- هى عمى البصيرة

هش

Me7'o said...

أول ما قريت البوست ده
أول حاجة جت على بالى هى

الشيخ حسنى ورفيقه الشيخ عبيد
تحياتى

لماضة said...

جدو
والله يا جدوا عندك حق
بس عشان تغير عقلية الاهالي في الموضوع ده محتاجين معجزة
وبحمد ربنا وبشكر فضله ان اهلي متفهمين الموضوع ده الحمد لله
لكن مش كل الناس كده
وفعلا دي مشكله حقيقيه بس حاليا مش هي كل سبب العنوسه للاسف ظهرت اسباب اخرى اسوء بكتير

لماضة said...

الي باقي الاخوه والاحباب
احب ا طمنكم ان عرايسكم عندي بس فتحوا عنيكم :))))

Gid-Do - جدو said...

الابنة العزيزة

اشكرك على الرد على تعليقى - وانت قلتى فى ردك - للاسف ظهرت اسباب اخرى اسوء بكتير - ياريت تذكريها باختصار واكون شاكر

mohamed said...

هما الرجاله فاضين يبصوا احنا اكتفينا خلاص

لماضة said...

الاسباب دي يا جدو
اولها تغير عقل الشباب نفسه
الولد دلوقتي مبقاش جاد ولا قادر يتحمل المسئولية زي والدي
بقى كل همه اهلي هيساعدوني ازاي وبايه
عاوز يشتغل شغل مرفه يجيب فلوس بسرعه وبس معندوش صبر يتعب في الاول عشان يجني بعدين
وقصاده برضه في الجواز
بيدور على بنت من عيله مستريحه ومينفعش يكون مخها شغال او بتفكر او مثقفه لان الحاجات دي بقت متعبه بالنسباله بيدور بس على واحده حتى لو خريجة طب او هندسه تقعد في البيت وتكون جميله وتدلعه وبس مش عاوز مشاركه اكتر من كده ويقولك مش عاوزها تشتغل وهو اساسا شحات بياخد مصروفه من اهله
ده غير المكيفات والحشيش الي بقى زي البيبسي زمان لو كان ولد شرب سجاير يبقى اجرم دلوقتي ده بقى شىء طبيعي وعادي
غير كمان الامراض الي بهدلت الشباب منها الايدز وفيروس سي والتهاب الرئوي وحتى الضعف الجنسي الي بيجيلهم من البلاوي الي بياخدوها او الممارسات الغير شرعيه والي بقت منتشره بغزاره اليومين دول
يعني للاسف الشباب دلوقتي بقى من غير مخ وجسم وكمان احساس او مسئوليه
طبعا مش كل الشباب الا فيما ندر
وبرضه البنات مش معفيين من الكلام ده
لانهم بيتصرفوا نفس التصرفات دي وللاسف لو الولد غلطان قيراط فالبنت بتبقى الف
وما خفي كان أعظم
وفيه حاجات كتير تانيه لو حكيتلك عنها حكايات مش هخلص

عفوا أنا أميرة said...

ههههههههههههههههههههههههههههههههه، قويه جدااا قطعتى قلبى عليهم ربنا يشفيهم مؤقتا بس بوست أسلوبه رااااائع وتحليل متميز لضعف نظرهم

حازم شلبى said...

من زمان نفسى اسأل السؤال ده

لو سمحتى يا ست الدكتورة الا دكاترة اللسان دول بيسموهم ايه
يعنى لو واحد لسانه عايز قصه ولمض شوية يروح لدكتور ايه يعنى
اوعى تفكرى انى بأرمى كلام و لا حاجة
يعنى هى ناقصة اديكى عملتى ثورة نسائية علينا
بس انا رأيى تعملوا اعتصام عند مجلس الشعب يمكن ربنا يفرجها والرجالة تخلى عندها نظر

حقيقى بوست جميل و شكرا لمرورك ومتابعتك

بنوته مصريه said...

ههههههههههههههههه
بجد بوست تحفه

Anonymous said...

بلاش رمد اتخصصى نسا وولادة

ههههههههه

قلم رصاص said...

ههههههههههههههههه

لاهما بس ودن من طين والتانيه من طين بردو

أصل مفيش دقيق يعملوها من عجين

ظروووووووووف بقى

Ahmed Nabil said...

ههههههههههههههه

اللى عاميهم جيبهم يا دوك

معكيش كام الف جنية علشان العمى يروح.....وهنيالك يا فاعل الخير

اقبل التبرعات على حساب رقم
584596148
بنك التجويز والتعمير

:)))))))))

Diyaa' said...

مش هتكلم عن نفسي لأني حالة خاصة جداً :)
لأني غير مؤهل للبطلة المطلوبة أصلاً
وكمان معتقدش إنها متاحة ...مش بسهولة في أحسن الأحوال :)
___
المهم
اقري دي يا لماضة
وتعرفي سبب من أهم الأسباب...خصوصاً لو الولد والبنت متربيين كويس وأهلهم مش معقدين ....
الماسون الصهيون اللي حاكمين مصر...

http://www.shorouknews.com/Columns/Column.aspx?id=226566

هم المستفيدين من تأخير الجواز
بتجارتهم في العقار والحديد والبنية التحتية وديون مصر وأكلها وشربها وصحتها وتعليمها _ تعتيمها _ وإعلامها وثقافة الإلهاء ورياضة التعصب

لما يكونوا بيعملوا كل ده
يبقى يولع قصر العروبة وملحقاته
وتبدأ البلد على نضافة

بس في نفس الوقت لو الناس لغت فكرة الفرح وخلتها زفة بسيطة وخلاص :)
لغت المبالغة في المهر :)
عملت فحوصات طبية أفيد وكبروا دماغهم من دوبان الرجل علشان أوضة نوم جديدة بتبرق !! متقلش عن سعر كذا

اكتفوا بدبلة دهب للعروسة وخلاص :)
الجهاز يكون جهاز فقرا حتى ...أرخص تلاجة وأرخص غسالة وأرخص تلفزيون ...
الأنتريه لو مستعمل وب 3 تعريفة أحسن برضه ...لحد ما يقفوا على رجلهم ويبقوا يبدلوا براحتهم

إلغاء مفهوم إن الخطوبة فترة مسك إيدين وتسبيل ومكالمات ليلية وحبيبتي ووحشتيني وبموت فيكي وبتدفي حياتي والكلام الفاضي
تبقى فترة اكتشاف شخصية ومد جسور مش لبس ومكياج وتمثيل وهبل

ساعتها هيبقى في أمل
بس اقري المقال وتعرفي دور الفساد الأساسي في اللي بيحصل ده :)

مطلق said...

ولله فرحتيني جدا

لاول مره احس انا مش بكلم نفسي بقالي سنتين

ماشي بحذر في الناس من خطر الستات

بس الحمد لله رجعتيلي الامل انه لسه في فايده من كلامي

صمت المشاعر said...

ههههههههههههههه والله عندك حق

(ست* جنى* الحسن) said...

قلبى معاكى لحد ماالعمى ده ينتهى ولو ان له اسباب تانية منها البطالة والفلس و.....
دعاءى لكل الشباب بالفرج القريب
برجاء قبولى صديقة للمدونة

دكتور حر said...

والله يا لماضة
انا ضحكت قبل لما اقرا الموضوع

بس تصدقي بالله

انا لبست نضارة بعد الجواز بس

شفتي بقى

روح طفلة said...

هههههههههههههه
جامده جدا
حلو اوى طعم الشبسى بالجزر الحار ده

ربنا يرزقك بالزوج الصالح يارب

Anonymous said...

يا شيخة يا ريتهم كانوا اتعموا من زمان كانوا ريحونااااااااااااااااااا

ابراهيم said...

انا مش عارف ارد افتراءاتك التشخيصية اللذيذة ازاي
بس انا ممكن انام علي الشيزلونج واحكي حكايتي
بصي ياستي وصلي علي الحبييب
انا نفسي اتجوز بس مش لاقي فلوس
والفلوس عاوزة شغل فاشتغلت فلما اشتغلت الفلوس مكفتش ولما رحت اتكلم مع ناس رفضو من علي الباب
ممكن تكشفي بقا وتكتبيلي الرشتة
وبعدين اهو كلة بيلبس نضارة في الاخر
وهي تكتيفة والسلام
ابراهيم
مدونة لحن الغروب
اتمني التواصل الدائم بيننا
http://anaabnalikwan.blogspot.com/

نسر الشرق said...

ايه اللماضه دى كلها
فعلا الرجاله اتعموا من دخان العربيات كل يوم وهما رايحين شغلهم
اتعموا من احوال السرقه فى البلد اتعموا من تسليط السليط الضوء على الفنانين والراقصات
اتعموا من القعة على النت
يبقى عايزاهم يتجوزوا
تحياتى مدونتك لطيفه وجميله جدا
ده الكارت بتاعى
http://nisr-elsharq.blogspot.com/
وهضيف مدونتك عندى

М€ŝЋМΣŞĦ said...

:)

الغريبة إنى كنت بلبس نضارة , وبعد ما قلعتها روحت إتقدمت لبنت الجيران

نصيحة لو تعرفى حد لابس نضارة و لسه ماخطبش إعميليله لايزك على حسابك و إكسبى فيه ثواب.. الوصفة دى مضمونه

تحياتى

زهرة said...

حلوة أوى لماضتك .. تسمحى لى أتابعها؟؟

بيتنا القديم said...

الطيبون للطيبات..!

sun of free dom said...

عمى من الداخل وحياتك ودى عدوة وماشية فى مصر اليومين دول

كويس انها جت على قد العمى، فى ناس بتنتحر said...

بيقولك ساعة القضى بيعمى البصر

بجد قبل ما الواحد يكون بيفكر فى الزواج بيشوف بنات جميله جدا وكويسه وبنات ناس
ويتمنى لو كان امكانياته تسمح بالزواج كان اتقدم فورا

لكن بجد بعد لما الواحد يستعد ويكون نفسه يجى يدور ميلاقيش ويحس انه مبقاش فى بنات ومش شايف البنات الكويسين اللى كان بيشوفهم الاول
انا بجد اعرف ناس صحابى كده كتير

والنتيجه انه بعد كتير من البحث بيتجوز اى بنت والسلام وهو وحظه

محمود المصرى said...

الرجاله اتعموا من كتر الذنوب الى بيعملوها وهما مشين ده يبقى الراجل من دول عنده سبعين سنه وماشى يبص على الستات والبنات الى زى احفاده وطبعاَ العمى ده انتقام من عند ربنا وربنا يستر
يا ريت تيجى تشرفينى وتزورينى وتكونى صديقه دائمه ومتنسيش التعليق لاْن راْيك يهمنى جداَ جداَ فوق ما تتخيلى
اخوكى
محمود المصرى

Anonymous said...

هي اللماضة في الموضوع ده كمان
هههههههه

انا مش عارف ايه اللي حصل للحريم ده
بقوا ملهوفيين على الرجاله كده ليه

الاول كنا نعرف ان الرجاله هي اللي بتعاكس الحريم
دلوقت العكس
تماما
انتوا ايه معندكمش اخوات رجاله ولا ايه ؟

Sonnet said...

الرجا نشر رابط هذا الفيلم الوثائقي عن أحداث غزة على أوسع نطاق:
أن تقتل فيلا
TO SHOT AN ELEPHANT

http://shayunbiqalbi.blogspot.com/2010/06/1-2.html

http://shayunbiqalbi.blogspot.com/2010/06/2-2.html

مع تحياتي

maxbeta3zaman said...

العمى عمى الجيب وعمى اليد وابنى بيتك وامتلاء القهاوى بالجالسين القرفصاء ومبدأ ربنا يخلى بابا وماما ...ومبدأ "أنا بنتى ما تقلش عن بنت خالتها" هذا كله ومعه كتاب "فى الزهد" لأبى العتاهيه قد وضع الغمامة على أعين شباب الحزب الوطنى ...وجميع الأحزاب الأخرى والمستقلين معهم وجعل شعار الجميع
وحدانى حاعيش كده وحدانى
ولا اقول يا غرام أبدا تانى

Anonymous said...

الرجالة ماتت فى 73 والبقية خدها الوبا مش العمى

عمر said...

متوقعين ايه من حد يبقى لسه متخرج
او كمان لسه وراه جيش
هيجيب شبكه وشقه وعفش منين
استنوا بقى لما نبقى حاجه وتلاتين

قبل ما نسلم نمر بلنشه

شوارعي said...

دي أول زيارة لمدونتك المليانة لماضة وإن شاء الله مش الأخيرة...
أما بخصوص موضوع الرجالة فهو حكاية عمى دي حكاية قصر يد وقصر ديل وحيل وكل اللي نفسك فيه والمشكلة دي محتاجة تتضافر كل الجهات المعنية من أهالي بنات لسه متجوزوش لحكومة مطنشة وجمعيات أهلية وخلافه وده طبعاً مع ضرورة شيبسي الجزر اللي تفضلتي بطرح فكرته على المناضل أحمد السقا

تحياتي

dr.mimo said...

دا مش عمى يالماضة
العين والحمد لله بصيرة
بس بعيد عنك الايد قصيرة
ربنا يفكها علينا كلنا شباب وبنات
هههههههههههههههه

tito said...

ههههههههههههههههههههههههههههههه
يا دودا انتي بتنفخي في قربه مخرومه
لا .. دي مش مخرومه
دي مقطوعه والقطع كبير ومش هينفع يتعملوا صيانه
هههههههههه