Saturday 24 November 2007

اول تاج اشربه بالشفا ان شاء الله




التاج ده وصلنى لصالح حملة جمع تبرعات طالب الطب والاخت العزيزه علا من غزه بعتتلى ما يعادل قيمة جنيه التبرع شويه إكسير تفاؤل وده كشف حساب بالمصاريف اللى ادفع فيها الاكسير عشان تشوفوا الميزانيه بتروح فين


استعنا على الشقى بالله




إكسير تفاؤل


لما اصحى الفجر وصوت الجوامع كلها بتقول الصلاة يا مؤمنين الصلاة وألاقى بابا بيتخانق معايا عشان اتاخرت شويه وصحيته بعد الأذان ونقعد بعدها نضحك وأغلس واتلامض عليه و أمي تكون رافعه أديها وبتدعيلي ربنا ينجحني طبعا ده أيام رضاها عنى


إكسير تفاؤل


لما بضيق قوى عليا ومع ذلك بحس إن ربنا معايا كلما ضاقت حلقاتها فرجت وافتكر قول الحبيب عليه افضل الصلاة والسلام تفائلوا بالخير تجدوه

إكسير تفاؤل


لما نصلى تراويح في رمضان وأشوف كم الناس الهائل ده من الشباب والبنات وكبار السن وادعى ربنا يدوم على الشباب نعمة الإيمان والقرب من ربنا


إكسير تفاؤل


لما افتح كتاب ربى وألاقيه بيناديلى "َوالسَّابِقُونَ السَّابِقُونَ
وافتكر كلام موسى عليه السلام واردد "وَعَجِلْتُ إِلَيْكَ رَبِّ لِتَرْضَى


إكسير تفاؤل


لما افتح شباك اوضتي وارمي بنظري أيام ما كان ليا نظر ألاقى سجاده قطيفة خضرا مفروشة واشم نسمة هوا الصبحيه

إكسير تفاؤل


لما بروح اركب أتوبيس ماركة تاتا من أيام محمد على عشان يوصلنا الكلية ويعطل في الطريق كالعادة على الطريق الدولي أو الزراعي ونغامر أنا وزمايلى وناخدها مشى لحد ما نطلع على مكان فيه ناس نقدر نركب منه حاجه توصلنا وندخل السكشن ألاقى الدكتور بيضحكلى ويقولى أبوس أيدك يا لماضة تعالى مرة بدري أقوله استغفر الله


إكسير تفاؤل



لما أحب اركب القطر وألاقيه طالع اجري ورآه على المحطة وأنط الرصيف وألاقى السواق وقفلي القطر لحد ما اركب وبرضه ميهنش عليا ادخل السكشن بدري






إكسير تفاؤل



لما آكل يوميا شيكولاته جالكسى بالمكسرات ويا سلام لو حد جبهالى يبقى حبيبي وصاحبي وكفاءة


إكسير تفاؤل


لما بشرب كابتشينو أو عصير قصب بعزهم قوى


إكسير تفاؤل


لما ادخل عنبر الأطفال وينقضوا عليا وعلى شنطتى المفخخة بالمصاصات والمستيكه اللبان يعنى وكل واحد حسب طلبه وفى آخر اليوم آكل الباقي من المتفجرات




إكسير تفاؤل



لما ادخل العنبر وألاقى كل العيانين بيضحكولى والعيان اللي بكشف عليه يقولى الهي ما يدخل المرض جسمك والهي يستر عرضك





إكسير تفاؤل


لما أتجمع أنا وزمايلى ونقعد نضحك ضحك متواصل أو نروح بحري وناكل ايس كريم من عند الصعيدي ونطلع بيه على القلعة ونلاقى كل الاحبه أتنين أتنين وإحنا اربعات وخمسات بنات طبعا


إكسير تفاؤل



لما اعمل عيد ميلاد لأعز اصحابى ولا تخلو من مفاجأة الحفلة طبعا ودي تفوتني
فاكره يا دوده عيدان القصب اللي جبتهالك يابت وسيبنا كلنا التورته و قعدنا على الأرض نمص في القصب ولا فاكره لما رحنا للشيخه
رحرح وجبتلها رشاش بينور واللي بعديه واللي بعديه واللي بعديه



إكسير تفاؤل


لما بروح أعزى حد وأنا مش بعرف اعمل حاجه في المواقف دى لانى بحس انى لو قلتله حاجه هزعله اكتر وكمان بيصعب عليا حد لما بيكون زعلان بلاقى نفسى بضحكه بأي شكل وافتكر مره رحت أعزى واحده صحبتي في المدرسة لوفاة جدتها والبت بتعيط ومموته نفسها وأنا قمت داخله وسط البنات وقلتلها قال يعنى بخفف عنها : خلاص يا لولو متزعليش نفسك وبعدين يعنى هي ستك كانت صغيره



إكسير تفاؤل



لما انزل أنا واختى الصغيرة ونقعد ناكل درة مشوى على البحر ورجلينا تتعب من كتر المشى ومره اخدتها توهتها قعدت تدعى عليا



إكسير تفاؤل


لما خلصت امتحانات البكالوريوس الحمد لله وكسرنا ست قلل فى الكليه بعدد السنين اللى درسناها


إكسير تفاؤل


لما أحس إن شبابنا لسه بخير والأمل لسه جواهم ومستعدين يثبتوا للدنيا بحالها إننا ناس بتفكر صح وعلى قد المسئولية


إكسير تفاؤل


لما الشتا بيدخل علينا

إكسير تفاؤل


لما بكتب فى المدونة والاقى ناس بتتلامض معايا بكل حب واحترام أو بزور مدونات ناس والاقي بتفكر كويس قوى وبشكل مشرف لينا كمصريين ومسلمين


إكسير تفاؤل


لما وصلنى التاج ده

إكسير تفاؤل


لو الناس اللي يوصلهم يردوا عليه



يااااه انا تعبت من اللماضة فى التاج ده و لسه فاضل معايا شوية إكسير يجى بحنيه وربع كده
شوفوا بقى يا أخوانا اللي أوله شرط أخره اييييه ؟؟ اخره تاج
التاج ده همرره لمجموعتين



أول مجموعه في الوينج اليمين زواري ودائمي اللماضة معايا واللي لسه موصلهمش التاج
اسكندرانى أووووى
عصمت عاشقة اسكندرية واسكندرية عشقاها
اسكندرانى فى الغربة اشرب وانسى
ولاء
والقادم أجمل صديقة كفاح
استاذى العزيز
محمد عبد ا لغفار اظن ده تاج فى العمق
عاليا حليم وسمعنى سلام وانا كل ما اقول التوبه
مروه جمعه عشان الدربكة اللي عملاها بقولها صباح الورد والتاج على عيونك يا جميل
هنوده ولو مجاوبتش هغرقها فى البحر لما ترجع بالسلامة ان شاء الله
زمردة حبيبتي صاحبة الاجزخانه اللي هبعتلها زباين لما ربنا يكرمني إن شاء الله
الراجل العجوز الطيب
سووووو

محمد سمير غمض عنيك واخبط فى الحيط

سها هتقولنا شىء منها

رجل ا لاحلام استاذى حازم شلبى

هبه عشان الدعوتين الحلوين اللى قالتهملى


مممممممم مين تانى يا لماضة ؟؟؟


عموما القائمة تحت الإنشاء

الوينج التانى بقى اى حد هيرد على التاج ويتلامض معايا قلنا إيييييه

القائمة تحت الإنشاء هيتحط اسمه فى القائمة

40 comments:

محمد عبد الغفار said...

ايه التدبيس ده بقى

السؤال لازم يكون نفس العدد ولا مفيش مشكله

Unknown said...

هههههههه
كنت لسه ببعتلك تيجى تستلم الشحنه
لا اى عدد زى ما حضرتك تحب

Esmat said...

كلمات فعلا فعلا تؤدى إلى التفاؤل
الفرح والسعادة مصادرهم كتير اوى
لو عايزين فعلا نفرح
ونعيش حالة تفاؤل
وأسعدنى أكسيرك التفاؤلى كتير اوى
ربنا يجعل كل حياتك
تفاؤل × تفاؤل×تفاؤل
ويهنيكى يا رب
لموضة العسل اوى لكى منى احلى تحية
أموااااه

3ala asm masr said...

انتى حد حلو اوى يا لماضه
بجد كل ما ادخل مدونتك اكتشف انك حد حلو اوى من جوه
ربنا يوفقك يا قمر ويفرحك ديما

Doba said...

سيبك انتى
روحك حلوة وزى الفل
وابيض أصفى من اللبن الحليب زى مبيقولو

روحى يا لماضة اللهى يوسع رزقك وتاخدى شهادتك وتساعدى اى فقير يحتاجلك وتكونى نعم الدكتورة لمصرنا الغالية

ربنا يبارك فيكى ويبارك فى والديكى اللى خلوكى بنت الكل يفتخر بمعرفتها ويتباهى انها من بنات مصر

تحياتى
هبة

ممكن درة مشوى لو سمحتى
ولو عاوزة تتوهينى انا معنديش مانع خالص مالص

Unknown said...

بسم الله ما شاء الله :))))))))))

كل ده و بتوقوليلى عتالى ألحقى أنا لسة فاضل عندى شوية اكسير تفاءل ؟ امال لو كان موجود حبة حلوين كنتى قلتى أيه يا لمضة ؟ :)))

انا ماسكة خشب و الله و انا بكتبلك أهوه

اجاباتك الأولى عجبتنى أوى كلها عودة الى السمو و الروحانية الطاهرة و هذا أكثر ما يدعونا للتفاءل و موضوع الكابتشينو ده باه اسالينى أنا عليه
ههههههههههههه
ما تحدفيلى مج :)

hazem shalaby said...

مساء الخير يا دكتورة المجانين .. أنا خايف اتلامض ادخل مع بتوع الوينج الشمال .. أبوس ايدك بلاش .. تحياتى على شوية الاكاسير جمع اكسير اللى اتحفتينا بيهم وربنا يديم عليكى التفاؤل يا رب .. دمتى لنا ودامت سعادتك

عصفور المدينة said...

ماشاء الله أطول عدد من النقاط رأيتها يعني يومك كل تفاؤل بارك الله فيك

Unknown said...

عصمت

ربنا يخليكى ويحلى ايامك كلها يارب
حقيقى والله التشاؤم والتفاؤل احنا اللى بنصنعه بلاش لماضة يلا وورينا شوية الاكسير اللى معاكى هتعملى بيهم ايه

,,,,,,,,,,,,,,,,,,,,,,,

على اسم مصر

ربنا يخليكى كسفتينى والله
ده كتير عليا انا مش قوى كده يعنى بس شهادتك اعتز بيها
بس فين مدونتك انا مش عارفه ادخل ؟؟

,,,,,,,,,,,,,,,,,,,,,,,,

هبه

بما انى كنت مستنياكى تتلامضى عشان كنت مكسوفه ابعتلك اشوية اكسير
والله ما هبخل عليكى ده انتى من الغاليين عندى وشهادتك اعتز بيها جدا ربنا يكرمك
والبؤين الحلوين والدعوتين دول هيتحطط اسمك فى القايمه
هههههه
استلمى يا قمر

,,,,,,,,,,,,,,,,,,,,,,,,,,

عاليااااااااا

ههههههههه ربنا يكرمك يارب
يلا تعالى نضرب احلى اتنين كابتشينو سوا
وبطلى لماضة وورينا شوية الاكسير اللى معاكى هتعملى فيهم ايه

,,,,,,,,,,,,,,,,,,,,,,,,,,

استاذ حازم

اخويا وصديقى الغالى طبعا مش اخويا بجد بس فى مقام طبعا الشرف ليا فى كده
بما ان حضرتك دخلت تتلامض بص على اليافطه اللى انا حطاها فوق التعليقات ايه تتلامض معايا
فحضرتك لازم تاخد شويه اكسير
حالا هتتحط اسمك بس مش فى الباك الشمال لا فى الباك اليمين عشان هو ده بتاع القائمه تحت الانشاء
ههههههه
يلا استلم اشرب وادعيلى

,,,,,,,,,,,,,,,,,,,,,,,,,,,

عصفور المدينه

ربنا يكرمك يا هندسه
ويجعلى ايامك كلها افراح انت كمان ويحلى ايامك يارب
نورتنى وشكرا على كلامك الجميل

Unknown said...

من غير لماضة أنا جاي لوحدي
شرفتيني في المدونة، ونورتيها يمكن يطلع ليكي قرين من الجن ، ولمض برضه
شكرا شكرا شكرا على الزيارة الجميلة
عاوز اقولك اكسير التفاؤل بتاعك رهيب
خاصة اننا مشتركين في حب عصير القصب

بالهنا والشفا التاج
ياريت تقرأي
بريزة ورق عندي ع المدونة
يومك كله تفاؤل يا دكتورة
أحمد

اسكندراني في الغربة said...

بجد حتتعبي الي حيجاوب التاج بعد الي كتبتية


تحياتي يا متفائلة
اصدي يا لمضة
يوةةة
اصدي يا لماضة

Desert cat said...

يارب دايما متفائله يا لماضة وتشوفى بعنيكى كل حاجه حلوة
فعلا احلى لحظة تفاؤل بحسها فى حياتى وقت الفجر

Unknown said...

لماضة عندنا خناقة الحقينا

shahy said...

الله يالماضة
فكرتيني بأيام الكلية وايام اتوبيس الكلية

اية التاج الغريب دة

حلو قوي التفاؤل وان الواحد يبص للنصف المليان اللي في الكباية

تحياتي يا دكتورة
وهاروح اشوف باقي المدونة

shahy said...

ههههههه
اة صحيح ظلموكي قوي لما قالوا انك لمضة يالمضة

مدونتك لذيذة جدا و دمها خفيف

تحياتي يا دكتورة

Unknown said...

اللهم صل ع النبي

أيه التفاؤل ده كله؟؟

ربنا يزيدك من نعيمه
_______
ألا من الحق أنتي لسه متخرجتيش .. صح؟

;)
____

مدونتك لطيفة جداً
تحياتي

Unknown said...

استاذ احمد صاحب احلى يوميات للعيال

والله انا اللى سعيده جدا بتشريف حضرتك متتصرش سعادتى قد ايه
تحياتى لك وانا جايه اتلامض عليك متقلقش
وبالنسبه الخناقه انا جايه اتفرج

,,,,,,,,,,,,,,,,,,,,,,

اسكندرانى يا متغرب

امال انا ايه لزمتى اللى يتعب يجى على طول عاوزين نسترزق
يلا شرب انت كمان شوية اكسير وجاوب على التاج بلاش لماضة

,,,,,,,,,,,,,,,,,,,,,,,

قطةالصحرا

ربنا يكرمك يارب احنا وانتى
الدنيا ايه غير شوية حاجات فوق بعض
دايما منورانى والله
تحية مغمسة بالبن ليكى يا قمر

,,,,,,,,,,,,,,,,,,,,,,,

شاهى

بالظبط انا بحبابص للنصف المليان فعلا خصوصا لو عطشانه
الحمدلله ان المدونه والتاج عجبوكى
مش هوصيكى بقى الاقيكى اول واحده بتتلامضى معايا بعد كده
نورتينى يا قمر

,,,,,,,,,,,,,,,,,,,,,,

دكتور انونيمس

ايه يا دوك الاسم الغريب ده
مش عارفه انطقه
انجليزى ده يا مرسى
ربنا يكرمك يارب ويعزك
انا يدوب مخلصهامتحانات سنه 6 من اسبوعين ومانتخه3 شهور اجازهفى انتظارالامتياز
دعواتك بقى
شرفتنى

Boba said...

انا اسمي حبيبة عجبتني المداونة اويييييي

=)

زُمُرده said...

أحمدك يااااااااااارب
طلعت في الونج اليمين
ربنا يجعلنا من اهل اليمين

لأ بجد اكسير منعش جدا
ويفوق من اجدعها بنج
ايه ده التفاؤل كله
انت مش بتقري جرايد
ولا بتخرجي تتفرجي ع الناس
في الشارع
ولا بتسمعي طراطيش كلام
ايييوه ياجدعان

شكولاته وكابتشينو ودره مشوي
وبحر وعيال ومصاصات ولبان
وضحك وعيانين وفجر وسكاشن
ايه ده كله؟؟

--------
بالحق هو الأكسير ده
وريد ولا عضل
احله في 5سم ولا 3

هو انت مش واخده بالك اني لسه
حديثه العهد ..كي جي 1
اعمل ايه وايه فايده التاج
نوريني يابنتي
خدي بايدي ربنا يهديك

http://kasperb4.blogspot.com/ said...

إجاباتك جميلة يا دكتورة

وواضح انك لماضة بحق وحقيقي مش كلام يعني
ههههه

اسكندراني اوي said...

نعم حااااضر
افضى كده واروق واشوف ايه التاج ده يتحل ازاي انا مش شايف اي تاجات الحقيقه

وش مزبهلللللللللللللللل

ياسر مدني ...دينامو الإخوان said...

أنا إتفصلت م الجامعة يا جدعاااااااااااااااااااااااان
الحقووووووووووووووووووووووووني

Unknown said...

حبوبه

ربنا يخليك يا جميله نورتينى
حبيبه يا جماعه اصغر مدونة شفتها 10 سنين

,,,,,,,,,,,,,,,,,,,,,

زمرده

ههههههههه امين يارب

والله انا مش كده يا زمردده انا عايشه فى الدنيا برضه وحاسة قوى بهموم الناس وبحب اندمج فيها لانها بتخرجنى من همومى اللى صعب على بشر يتحملها عشان بس اخد عبره واقول الحمد لله على النعم اللى انا فيها
كل اللى قلته ده انا بعتبره من نعم ربنا عليا رغم انه ممكن يكون شىء تافهه وبسيط بس الضحك نعمه والفرحه نعمه وكلمة الحمد لله فى ذاتها نعمه
بالنسبه ازاى تجاوبى التاج انا كتبتبلك شرح مفصل فى مدونتك يا قمر شوفيها كده ولو محتاجه اى تفسير تانى انا فى الخدمه بس المهم بلاش لماضه وخدى الاكسير عضل وريد برشام المهم تشربيلك شويه
:)

,,,,,,,,,,,,,,,,,,,,,,,

الام وامال

ازيك يا محمود
طيب بلاش لماضة انت كمان وانا شايفه ان نفس التاج وصلك من علا جاوب وورينا شوية الاكسير اللى معاك هتعمل بيهم ايه

,,,,,,,,,,,,,,,,,,,,,,

اسكندرانى اوى

براحتك يا هندسة
المهم تجاوب وتاخد شوية اكسير
لو اى استفسار انا تحت امرك
وهعملك خصم 50% على الفيزيته
يلا ان شالله ما عن حد حوش
هههههههه
المهم طمنا عليك يا اسكندرانى يارب تكون بخير

,,,,,,,,,,,,,,,,,,,,,,,

ياسر يا ديمنامو

معلش تعيش وتاخد غيرها
الحمد لله اننا طلعنا منها

زُمُرده said...

السلام عليكم

وصلني ياجميل
وجاري التنفيذ

ساعات كتييييير بقدر اشوف التفاؤل
وخصوصا لما تشيلي هم حد غيرك
وتحسي بالمسؤليه وانك لازم تفرحيه

بس لما ملاقيش حد اشيل همه
والاقيني ويا همي
يجري التفاؤل مني

الفراشة الصغيرة said...

يخرب عقلك
والله العظيم انت عسوله جدا
بس بجد انتى لمضه لماضه
وشكلك كدة مشكله

يلاعقبال تيجان اصحابك
وسمعنا واحده ايوووووة اسكندرانى
ترلا لا لا لا لا

سها السباعي said...

الله
على اذان الفجر وكتاب ربنا
وبعدهم الشيكولاته الجلاكسي

ربنا يخليكي انك افتكرتيني
بس اللي عندي حبة بريال
ينفعوا
هاطله بيهم فاتورة في اقرب وقت

انت سكر

و القادم....أجمل said...

فزيييييييييعه يا بنتي و الله

""بيضحكلى ويقولى أبوس أيدك يا لماضة تعالى مرة بدري أقوله استغفر الله""

هههههههههههههههههههه
هههههههههههههههههههههههههه

ربنا يسعدك ايامك يارب يا جميلة
و يسعد قلوب الجميع يارب

ان شاء الله هرد عليه في اقرب وقت
هقعد اكتب في مسودة ههههه
و ان شاء الله انزلهم قريب

ابقوووووووووووا معنا

:D

تحياتي و حبي
(علي فكرة بعتلك الميل اوفلاين مش عارف وصل و لا )

:)

Unknown said...

زمردة

اوك يا جميل يلا متعينا بقى باجاباتك قريب ان شاء الله

,,,,,,,,,,,,,,,,,,,,,,,,,

فراشتى الصغيره

ايووووو يا جدعان
ايه الكلام الحلو ده كتير عليا ربنا يخليكى يا قمر
انا كمان مستنيه معاكى يردوا

,,,,,,,,,,,,,,,,,,,,,,,,,

سها
يا ستى بريال ببرسيل
كل اللى تقولى عليه جميل المهم يكون شىء منك
;)
,,,,,,,,,,,,,,,,,,,,,,,,,

ولاء

الله يكرمك الايميل وصلنى اضافه لكن اف لاين موصلنيش ا نا كمان بعتلك ايميلى مسينجر اف لاين مش عارفه وصلك ولا لا
يلا بقى مخمخى كده وورينا تحضيرة الاكسير بتاعك
اكيد هيبقى قنبله انا عارفه بس قنبله حلوه

فى القلب said...

دكتوره لماااااضه

كنت عايزه أجى ليكى من زمااان بس الشديد القوى عطلنى

عموما متعوضه يا قمر

ردودك على التاج بجد رااااااائعه

انتى طيبه اوى اوى يا لماااااضه

عــلاء ســالـــم said...

السلام عليكم

كل تاج وانتي طيبه

بجد فعلاً جمعتي شويه مواقف وأشياء تثير التفاؤل
كنا محتاجين نفتكر الحاجات دي

البنت الشقيه said...

لماضه يا جامد

ايه الكلام الجامد ده انتى عسوووله اوووووووووووى بجد والف مبروك على التاج لاحلى والذ لميضه فى مصر كلها


ليناا

Unknown said...

فى القلب

ربنا يخليكى ياستى وانا كنت مستنياكى تيجى من زمان نورتينى والله وشكرا على كلامك الجميل ده

,,,,,,,,,,,,,,,,,,,,

علاء سالم

الله يخليك يا علاء
تعيش و تفتكر
المهم عجبك
تحياتى لك

,,,,,,,,,,,,,,,,,,,,

اشقى بنوته

تعالى لما اعزمك على ايس كريم
ههههههه عشان لما ضه يا جامد دى لوحدها
شكرا يا جميل على كلامك الحلو ده
سلامى لماما

Rosa said...

سكر بجد
ربنا يفرحكل ايااااااااامك يا رب
و يفضل تأثير الاكسير دا طول عمره معاكي يا رب
انتي حتة سكرررررررررره
:) :)

3ala asm masr said...

لماضه
مدونتى موجوده يا قمر يعنى هتروح فين بس؟؟
جربى انتى بس تانى وان شاء الله هتدخلى
وتنورينى وهستنى زيارتك

Unknown said...

روزا

ربنا يخليكى يا قمر انتى اللى سكر والله
دايما منورانى يا روزا

,,,,,,,,,,,,,,,,,,,

على اسم مصر

حاولت اكتر من مره مش عارفه

ممكن تبعتيلى لينك المدونه اكون شاكره جدا

walaa said...

احلى حاجه فيك التفأولوانا بحب التفأول قوى

اتمنى تزورىhttp://mawgoda.blogspot.com/ مدونتى

موجة said...

دي أحلى للماضة يا للماضة ..
بوست يجنن بجد .. المفروض الواحد يدور على التفاؤل و اكاسيره .. جمع اكسير هههههههههه .. في كل حتة و في اي موقف مهما كان يبدو انه بسيط ..
استمري

safa7_karmooz said...

مافيش حاجه مسلية هنا :p

Unknown said...

ولاء

الله يخليكى ان شاء الله ازورك اقرب وقت ممكن

,,,,,,,,,,,,,,,,,,,,,,,,,

موجه

الله يخليك شكرا لتشجيعك

نورتنى

,,,,,,,,,,,,,,,,,,,,,,,,,,,

سفاح كرموز

المره الجايه هجيبلك توم وجيرى معاها كيس فشار
:P

موجة said...

تصوري عمر ما حد بعتلي تاج