Saturday 5 January 2008

تاج السنه الجديده



وصلنى التاج ده من عند ابو فرح وهو عليه تاج متأخر بس يلا زى بعضه عشان خاطر بس فرح ومامة فرح


نجاوب عليه على طول عشان بحضرلكم اليوميات الجديدة وانا عارفه ان الجزء ده بالذات ناس كتير مستنياه


بسم الله


نبتدى


لو مكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟


اعترض على السؤال لو مكنتش مصرى كنت هتمنى انى ابقى مصرى


النيل رواني والخير جواني


لوكنت أوروبي أو غير مسلم هتبقي إيه نظرتك للعرب والمسلمين؟


كنت هحسدهم ان عندهم دين زى الاسلام بسماحته


وكنت هحسدهم انهم يوم ما بضيق عليهم بيفردوا سجادة صلاة ويرفعوا ايديهم لربنا


لوقالولك إنت بقيت رئيس جمهورية هتعمل إيه؟


هوزع عصير قصب على شعب مصر كله


وبعدين هتنحى


لوسمح لك برؤية الرسول عليه الصلاة والسلام وإنك تقوله كلمة واحدة؟


أحبك


(يحشر المرء مع من أحب)


لو كنا في عصر ازدهار الأندلس كنت تتخيل نفسك إزاي؟


امممممممم صعبة دى اتخيل نفسى ازاى وانا لسه مجتش على وش الدنيا


لو خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟


هقوله كل شىء نصيب وهفسخ الخطبه


لكن لو زوجى الامر هيختلف


الرسول امرنا بالتكاثر لمباهاة الامم بينا


وامر الرجل بانه من الافضل ان يتزوج المرأاه الولود


ولو انا مكانه واكتشفت ان العيب عندى هفسخها برضه الا اذا كان مصمم بقى


لو طلعت القمر هتكتب عليه ايه؟


بصراحه هكتب زى ما بشمهندس عصفور قال


هضع قبلة للصلاة


لو مررت التاج لحد وماجاوبش هتعمل ايه؟


لا مش همرره لحد اصلا هدفنه هنا عشان تقريبا كل الناس جاوبت عليه كفايه كده الرحمة حلوه برضه




21 comments:

عصفور المدينة said...

مشرحة التاجات عند الدكتورة لماضة

أسأل الله أن يحشرنا وإياك في زمرة نبيه صلى الله عليه وسلم


:)

في انتظار عصير القصب

غمض عينيك said...

اجابات قوية
وصريحة
و

لمضة

شكرا ع الاستجابة
وبالنوسبة لتاج التفاؤل الفظيع دا
هجاوب عليه قريب ان شاء الله
اصله صعب اوي

تحياتي الطبية
محمد سمير

raspoutine said...

بوست حلو وتاج جميل
عارفة انا لو مكنتش مصرى عارفة كانت نظرتى ليهم هتكون ازاى ؟
مش هتكون فيه نظرة اساسا لانى مش هشوفهم
ربنا معانا بجد ربنا مع كل المصريين

فى القلب said...

أجاباتك جميله أوى يا لماضه

وخصوصاً لما تقبليه الرسول صلى الله عليه وسلم

بحبك يامصر said...

اجاباتك جميله وان شاء الله نحشر مع رسول الله بالجنه
بس انتى بخيله اوى عصير قصب؟

Ahmed Mubarak said...

هوزع عصير قصب على شعب مصر كله
وبعدين هتنحى


بغض النظر عن اني بحب عصير القصب

بس شكلوة الحكام المصريين مش هيورد عليهم واحد يديهم لحمة..عصير قصب..هوا انتي كمان هتتلامضي مع الشعب كمان
:D:D:D

حتى دة يوم واحد..وزعي لحمة..
:D

اسكندراني اوي said...

مش كده والنبي

راجعلك تاني

DR.HAMAS said...

ردودك جميلة الصراحة

و فيه منها طريف جدا

زى ردك على لو بقيتى رئيس جمهورية

بتاع عصير القصب

و حلو قوى كلمتك للنبى صلى الله عليه و سلم

و أختلف معاكى فى رأيك فى موضوع عدم الانجاب ده

مش هو كل حاجة يعنى

انا لسة متجوزتش و معرفش الشعور بصراحة

بس لا أرى أن يهدم بيت بسبب الانجاب

دى وجهة نظرى



حقيقى كلامك جميل

و ردك رائع

ربنا يكرمك


د.حمـــــاس

Unknown said...

بشمهندس عصفور
الله يكرمك عصير قصب بس ده انا اجيب الغدا بقى
,,,,,,,,,,,,,,,,,,,,,,,,,,,,,,,,,,,
ابو فرح
اى خدمه ياباشا الله يعينك انا عارفه اللى عندك بس بغلس عليك
:)
,,,,,,,,,,,,,,,,,,,,,,,,,,,,,,,,,,,
راسبوتين
عندك حق ربنا يتولانا برحمته
ويفكها من عنده
,,,,,,,,,,,,,,,,,,,,,,,,,,,,,,,,,,,
فى القلب
الله يكرمك ياست الكل
ربن يكتبلنا واياكم رؤية الحبيب المصطفى عليه افضل الصلاة والسلام
,,,,,,,,,,,,,,,,,,,,,,,,,,,,,,,,,,,
بحبك يا مصر
مش بخل بالعكس انا قلته عشان ده اكتر مشروب بحبه جدا ده حب منى لشعب مصر
,,,,,,,,,,,,,,,,,,,,,,,,,,,,,,,,,,,
احمد مبارك
ههههههههه لا مفيش حاجهمضمونه فى البلد دى قد عصير القصب الحاجه الوحيده الى لسه بخيرها لا مرشوشه ولا لامتسرطنه وكمان مغذى
,,,,,,,,,,,,,,,,,,,,,,,,,,,,,,,,,,,
اسكندرانى اوى
مستياك يا هندسه
ماله بس عصير القصب ده حتى كله طاقه وكمان نقى معلهوش توكسوفين
,,,,,,,,,,,,,,,,,,,,,,,,,,,,,,,,,,,
دكتور حماس
الله يخليك
لا طبعاانا متفقه معاك فى نقطه ما بعد الزواج وربنا يعافينا من هدم البيوت انا اقصد فتره الخطبه
حقه وحقى ان ينعم بنعمة ربنا علينا الاولاد لكن فى الزواج ده قدر وتبقى قلة اصل منى لا مؤاخذه لا يعنى عمرى ما اعملها صراحه
:)

Unknown said...

انا اول مره ادخل عند حضرتيك
مدونه رائعه
واجابات قويه وواضحه
بس انا مبحبش القصب
ربنا يبارك في حضرتيك
وجزاكم الله خير

اسكندراني في الغربة said...

طبعا تفرقي عصير قصب و تشربي انت المانجة و الفاخفاخينا
ههههههه
يعني اية فخفخينة يا ريسة؟


تحياتي

السـيد شبـل said...

لماضه ازيك ايه اخباركمع السنه الجديده ...


هى بدأت بتاج وان شاء الله الى جاى احلى


اجاباتك جيده جدا واتمنالك التوفيق

مروة الزارع said...

اجابات جامدة ولمضةةةة وعسل زيك

كل سنة وانتى طيبة

دكتور حر said...

عاوزه الحقيقه

انا حاسس انت مش جاوبه التاج ده بمزاج خالص

ومحاولات اللماضه فيه مش قوي

وكمان بعض الاجابات مش واقعيه ومش متفكر فيها حبتين

***
معلش ما اهو احنا برضه منحبش نقول كويس ونجامل على طول

وامتأكد ان دي حاجه هتفرحك

وانا كمان
منتظر عصير القصب
(:

Unknown said...

الفاتح الجعفرى
وان شاء الله متكونش اخر مره زيارتك
هجيبلك خروب ولا تزعل
:)
,,,,,,,,,,,,,,,,,,,,,,,,,,,,,,,,,,,
اسكندرانى فى الغربه
لا الفخفخينه دى منتج مش مصرى القصب مصرى ميه الميه
,,,,,,,,,,,,,,,,,,,,,,,,,,,,,,,,,,,
السيد شبل
الحمد لله انا تمام
الله يكرمك
,,,,,,,,,,,,,,,,,,,,,,,,,,,,,,,,,,,
مروه الزراع
ربنا يخليكى انتى الى كلك ذوق
,,,,,,,,,,,,,,,,,,,,,,,,,,,,,,,,,,,
دكتور حر
والله برافو عليك
للاسف انا كنت مستعجله شويه فى التاج ده لسببين اول انى مقدرش اتاخر على حد خصوصا لما يكون ابو فرح ثانيا لان يومها دماغى كانت مشغول جدا بالبوست الجديد ويومياتنا لدرجه ان يومها مكنتش عارفه انام من التفكير وقمت مسكت الورقه والقلم وقعدت اكتب لحد الفجر انت عارف لما فكره تمسكك بتبهدلك لحد ما تطلعها
بس انا سعيده جدا بنقدك ده بجد عشان انت علمتنى حاجه جديده
متشكره ليك جدا يا دفعه وعوزاك تنقد وتضرب على طول ولا يهمك
ليك جركن عصير قصب بحاله

мσнη∂ιš said...

بحييك يا لذيذ يا رايق ع الإجابات الحلوة

الفراشة الصغيرة said...

لماضه

ميرسى جدا على القصب
وصلنى
يدوم اول دور عايزة تانى بقه

يلا هينتخبوكى تانى امتى
علشان اصوتلك

Anonymous said...

ربنا يكرمك
اجابات جميلة بجد خصوصا اللي عن الاسلام وكلمتك للرسول صلى الله عليه وسلم
واسأل الله ان يحسن خاتمتنا وأن يجمعنا في مستقر رحمته ..........آمين
د.خليفة

Unknown said...

البشمهندس
الله يكرمك ده من ذوقك
,,,,,,,,,,,,,,,,,,,,,,,,,,,,,,,,,,,
الفراشة الصغنتوته
ههههه يا ستى تعالى وانا اشبعك عصير قصب
بس انتى خليكى معايا الانتخابات قربت
وانا على وعدى للشعب كبايه لكل مواطن
,,,,,,,,,,,,,,,,,,,,,,,,,,,,,,,,,,,
اخو دكتور حر
يا نهار ابيض
والله انا سعيده جدا بتشريفك ليا ده
ربنا يعزك ويكرمك يارب
والله انا جاوبت بدون تفكير فعلا ده الى حساه واللى شيفاه صح من وجهة نظرى زى مااتربيت واتعلمت
ربنا يارب يحسن خاواتيمنا اجمعين ويسقينامن يد رسوله الكريم شربة هنيئة مريئة لا نظمأ بعدها ابدا
وتحياتى لدفعتى دكتور حر

د/اجدع بنوته said...

التاج ده اتهرى والله

مفيش مدونه ادخلها الا لما الاقيه

انا هروح اشترى تاج جديد بقى ونمرره ع بعضشينا م تانى

تحياتى ع الاجابات

بس مش شايفه اجابة الغرب اللى هيحسدونا ع الاسلام مش منطقيه شويه

ازاى هيحسدونا واحنا كل الصوره اللى وصلالهم عن دينا

انه دين ارهاب وسفك دم

Unknown said...

اجدع بنوته

متهيالى هما بيحسدونا فعلا
وده باين جدا فى القوانين اللى بيحطوها للحد من تدهور مجتماعتهم اخلاقيا وانتشار امراض وجرائم كتير جدا
وده موجود فى ديننا بالفعل مش مجتاجين قوانين ولا سن لوئح ليه
على فكره مش كل الغرب وصلهم الصورة السيئه دى عن الاسلام
فقط الجهله منهم
واجبنا بقى نعلمهم ولا ايه
والاولى اننا نبدأ بنفسنا
يعنى دى وجهة نظرى

اه والله التاج ده داب فعلا
عشان كده دفنته عندى