Saturday 6 September 2008

يوميات صائم 2


أعتدلوا ولا تتثائبوا أثابكم الله
الله أكبر الله أكبر

لماضة: يا عسقوووووووووول ... بطل لعب جيمز و تعالى عشان المغرب أدن انت مش هاتفطر و لا إيه ؟
عسقول: إيه دة ؟؟ دة صوت المؤذن فى أدان المغرب
أول ما سمعت الأدان دخلت فى اطباق الأكل اللى قدامى زى الإعصار .. و بعد ما الإعصار انتهى بأمان الله و بعد ما صليت المغرب روحت زى النحلة اللى بتتنقل من زهرة إلى أخرى .. أتنقل من طبق قطايف .. إلى صينية كنافة .. ثم بعد ذلك إلى شفشق العصير  .. فإلى سطل الخشاف .. منطلقا إلى كوباية شاى .. ثم متبخترا فى أنحاء البيت حاملا جوال الزبيب ألقط منه لغاية ما أوصل إلى التلاجة .. هنا يكون الزبيب دوره خلص (أو هو نفسه خلص( عشان يبدأ دور طبق الفاكهة
 


لماضة: انت مش ملاحظ يا عسقول يا اخويا إنك زودتها فى الأكل حبتين ؟

عسقول: لا أبدا .. هو دة الطبيعى بتاعى .. بس انت عشان كنتى صايمة و النهاردة أول يوم فحاسة إنى زودتها حبتين
لماضة: جايز .. بس فيه إشاعة بتقول إن اللى بياكل كتير كدة النوم بيكبس عليه و مش بيقدر يركز فى حاجة
عسقول: أديكى قلتى ... إشاعة .. و إشاعة مغرضة كمان .. ثم لسة بدرى على أدان العشا .. يعنى أكون هضمت و استريحت

و فجأة

الله أكبر الله أكبر

عسقول: إيه دة ؟؟ .. دة أدان العشاء
بسرعة روحت اتوضيت .. و خرجت أنشف نفسى .. مش عارف ليه ابتديت أحس بتثاقل

عسقول: تثاقل إيه .. اثبت .. هاتضحك لماضة عليك
عسقول: يا عم ما أنا ثابت أهو
عسقول: هاتروح تصلى يعنى هاتروح تصلى
عسقول متثائبا: يا عم أنا رايح أهو .. هو أنا قلت إن أنا عايز أنام .. و لا باين عليا إن أنا عايز أنام و لا حاجة

نزلنا أنا و لماضة من بيتنا باجرجر فى رجلى و أنا مش قادر أصلب طولى و باتجنب إنى أبص للماضة .. مش عارف ليه حاسس إنها بتبصلى بمكر كأنها فاقسانى .. لكن لأ .. مش لازم يكبس عليا النوم دة احنا لسة فى أول يوم (الله يرحمك يا سيد يا مكاوى).. أنا هادخل الجامع و أقف فى أول صف خلف الإمام عدل .. أيوة أنا لازم فى رمضان دة إيمانى يزيد قوى
 

عسقول: ياللا بقى يا لماضة .. أنا عايزك تخرجى من الجامع التهاردة واحدة تانية ... و لا رابعة العدوية فى إيمانها .. و أنا هاتلاقينى خارج و لا ابن عطاء السكندرى فى زهده و إيمانه
لماضة: من شكلك كدة باين عليك انك هاتخرج و لا أهل الكهف اللى ناموا تلتميت سنة
عسقول: هع هع هع ... لست أنا هذا الكهف .. أقصد لست أنا هذا الرجل
لماضة: أما نشوف يا عم الكهف
عسقول: طب ياللا ادخلى مصلى السيدات .. و لا تتفضلى تصلى معانا أحسن .. أهو تنورينا برضه ومش هتفرق كتير
لماضة: ياما نفسى آجى معاك عشان أشوفك و انت بتصلى يا عم بن عطاء السكندرى .. بس كنت خد معاك بطانية
عسقول: ماشى يا لماضة .. انت هاتشوفى منى إيمان ما بعده إيمان .. ياللا .. أشوفك بعد الصلاة

دخلت الجامع و سنترت نفسى ورا الإمام عدل فى أول صف .. بعد ما صليت السنة فضلت قاعد مستنى الإقامة .. فضلت مستنى كتير .. هى الإقامة لسة بدرى عليها ليه كدة .. طولت قوى .. يا ترى بتعملى إيه يا لماضة دلوقتى .. بالتأكيد مش شايفانى .. طب أنا أريح دماغى شوية على ايديا الاتنين لغاية الإقامة


لماضة : ايه الزحمة دي براحه شوية يا ست
الناس بتستغل اني مش باينه من الارض وزي الكتكوت وعمالين يشيلوا ويحطوا فيا
سيدة وقورة: انتي يا ماما روحي ارجعي ورا صلي مع العيال
لماضة (فتحت كل فتحات وجهي في اذبهلال ) : عياااااااااال يا حاجه انا عندي .......
السيده : انتي هترغي كتير ليه الجامع مش مكان للكلام

وفي لحظه من الزمن انتقل بسرعه الضوء بكف واحد الاقي نفسي في الصف اللى بعد العيال ذات نفسيتها ايوه لزقت في الحيطه واديا فوق لا مش تذنيبه بدعي ربنا على الظالم والمفتري طبعا عارفينه وغالبا اضطريت بعدها اني اعيد وضوئي
بس يبدو إن حظى حلو إنى قررت أصلى فى الدور التانى .. آدينى واقفة جنب الشباك اللى بيبص على مصلى الرجال
هاهاهاهاهاىىىىىىى . عسقول أهو ساند دماغه على ايده و نايم. يا ريتنى كنت جبت الكاميرا
الله أكبر الله أكبر

عسقول: إيه دة ؟؟!!؟؟ هو فيه إيه ؟؟

انتبهت فجأة على صوت الإقامة و روحت قايم مع الإقامة....... و وقفت فى الصف .. نويت أصلى صلاة العشاء .. 

 الله أكبر .. بسم الله الرحمن الرحيم .........

لماضة: ولا الضآلين آميييييييييييييييييييييييييييييييييييييييييييين

و أنا في قمة اندماجي الروحاني اذا بطفل برىء تبدوا عليه بعض ملامح الطفوله المشردة  يقف قدامي ويبدوا انه كان محصور يا ولداه فحب يفك حصرته على مصليتي او بمعنى ادق مكان سجودي بالذات
اضطريت طبعا اني اكمل صلاه على الواقف من غير اي حركات فيما عدا رموش عنيا اللي بدأت تبكي من خشية الله  وعصارة البصل اللى الست اللى جنبي كانت فاطره بيه يومها وطبعا عصارة الطفل البرىء وهو بيبصلي ويضحك
يلا ما علينا كده ضمنت كسوة العيد
الحمد لله خلصنا صلاة العشا بسلاااااااام  .. وابص حوالي .. الاقي الستات كلهم بينظرو لي شذرا .. وعينيهم مشذره كده وطالع منها شذر .. وعلى وشوشهم نظرة قرف وسادين مراخيرهم .. ولقيت ست كبيره بتميل علي وبتقولي
الست الكبيرة: يا بنتي لو يعني حصل حاجه .. عيدي صلاتك .. وممكن يعني كنتي تسيبي الصلاه وتروحي بيتكم .. وكده يعني
لماضة: حصل حاجة ايه يا حاجه؟
الست الكبيرة: يابنتي اذا كان اللي مابيشوفش من الغربال اعمى .. يبقى اللي مابيشمش عنده انفلونزا
استوعبت ان الست قصدها على الواد اللي عمل اللي عملو والريحه فاحت وفحفحت والناس افتكرو انا اللي عملت كده .. وقبل ما اقول للست اني بريئه لقيت ام الواد جات قدامي وقالتلي
ام الواد: معلش يابنتي .. اصل انتي عارفه بقى العيال مايقدروش يمسكو نفسهم
بصيت عليها وعلى الواد اللي ولا على بالو التهمة اللي اتهموني بيها الستات بتوع المسجد .. وبصيت عالست اللي جنبي لقيتها بتقولي
الست الكبيرة: يوه .. لاهو الريحه ده كانت من .. شوفتي بقى .. ان بعض الظن إثم .. بس ابقي خدي بالك برضه ياشابه

عسقول: أنا خلاااااااااااااااص فصلت شحن
عسقول: يابنى اثبت شوية .. طب حاول تتماسك لغاية ما الأربع ركعات الأولانيين من التراويح يخلصوا .. أهو ممكن تستريح شوية أثناء الدرس اللى فى النص
عسقول: و الله عندك حق .. يا رب يا معين
و صليت أول اربع ركعات من التراويح بمعجزة .. و كنت مستنى الدرس اللى فى نص التراويح بفارغ الصبر

عسقول: أخيرا الدرس .. أنا أريح دماغى على إيدى شوية عشان أقدر أركز فى الأربع ركعات التانيين .. دة لماضة لو شايفانى دلوقتى أما ممكن ما ادخلش البيت تانى
عسقول: إيه يابنى اللى انت عامله دة .. فوق و صحصح .. أمال قاعد تقول لى إيمان و تقوى و انت فى البطيخ .. قلت لك استريح مش تنام
عسقول: يا عم أنا مش نايم .. أنا مريح دماغى بس و مغمض عينى و مركز بودانى
عسقول: ودان إيه يا ابو ودان .. كان غيرك أشطر .. مع السلامة و القلب داعيلك .. بس خد بالك إنك نايم من عشر دقايق قدام الشيخ اللى بيقول الدرس عدل .. و شكلك بقى منيل بنيلة و الشيخ عايز يقيم عليك الحد

وفجأة .. لقيت قدامي خيالات طايره .. الخيالات دي انا فاكرها كويس .. دول الفريق اللي بالعب بيه عالبلاي ستيشن .. بس ايه اللي جابهم هنا .. او انا ايه اللي وداني هناك .. هو انا مش كنت في المسجد .. ايه اللي جاب المسجد للاستاد .. انا شايف اللعيبه جايين ناحيتي عشان اديهم الخطه .. خطة ايه دي بس اللي عايزينها .. والواد رونالدينهو ماله جاي وبيعرج .. لأ .. الدلع ده مش عندي .. انا هقعد رونالدينهو وانزّل عبد الحليم علي .. أي نعم مش في الفورما ولا بيعرف يلعب كوره من اصلو .. بس انا ماحبش سياسة لوي الدراع .. وبعدين ميسي فين .. ميسي فين ياجدعان .. هو فاكرها عزبة اهلو .. يسيب المدرب بتاعه ويروح ياخد شاور .. طب كان يقولي .. مش يمكن كنت ابقى انا كمان عايز شاور فتلة ولا أي حاجه من الكافتيريا .. آخر موسم ليك يا ميسي معانا

انتبهت فجأة على مشهد الشيخ اللى بيلقى الدرس و هو بيبص لى شذرا و هو بيقول: قوموا إلى صلاتكم يرحمكم الله

قمت و أنا عامل زى الكتكوت المبلول من الإحراج .. بصراحة تجنبت إنى أبص للناس اللى واقفين يمينى و شمالى عشان العملية مش ناقصة بلل .. أنا شكلى بقى زبالة .. أنا لازم أعوض بقى النوم اللى نمته دة و أصلى الاربع ركعات دول بمنتهى التركيز .. وهابقى اعمل التخطيط بتاع الماتش بعدين بروقان

عسقول: هاهاهاهاهااااااااىىىىى ... كان غيرك أشطر
عسقول: غور من قدامى يا بن الـ
عسقول: يا عم خلاص .. براحتك .. عيش يا مان

الله أكبر .. بسم الله الرحمن الرحيم ........

و واحدة واحدة الدنيا ابتدت تضلم و تلف بيا .. و فجأة لقيت نفسى بامد رجلى بسرعة قدامى عشان أمنع نفسى من السقوط .. بصراحة ماحاولتش أتخيل شكلى وقتها فى عيون اللى بيصلوا على يمينى و على شمالى لما يلاقوا واحد فجأة هايقع من طوله و بيلحق نفسه عشان مايقعش فطلع رجله خارج الصف عشان يوزن نفسه .. بصراحة ... شكلى كان منيل بنيلة .. وبرضه هغير رونالدينهو

بغض النظر عن إيه اللى حصل بعد كدة .. المهم إنى صمدت لغاية ما الشفع و الوتر عدوا على خير .. و أول ما سلمت .. منعت نفسى إنى أبص على أى حد حواليا و أخدت الشبشب بتاعى و انطلقت زى السهم خارجا من المسجد و أنا ناوى إنى مادخلش الجامع دة تانى و أروح أصلى فى جامع فى تنزانيا عشان مالاقيش حد يعرفنى هناك .. يا ترى عملتى إيه يا لماضة ؟؟

لماضة: إيه الصوت الغريب دة ؟
أأأأأأخخخخخخ
لماضة : دة صوت السيده الوقورة جايلي من اول صف قومي يا حاجه صح النوم قصدي تقبل الله
السيدة : منا ومنكم خدي ايدي يابنتي باينلي نعست
لماضة : واضح أني هصلي هنا كل يوم خلاص انا حفظت مكاني في الركن البعيد الهادي خصوصا إنه جنب الشباك عشان أراقب عسقول.
خارج المسجد

عسقول : ايه الاخبار يا لماضة ؟؟ آه يا لماضة لو حسيتى بالإيمان اللى أنا حاسس بيه دلوقتى .. حاجة عظيمة جدا .. كنت حاسس إنى طاير مع الملايكة
لماضة بدهاء: واضح جدا إنك بالفعل كنت مع الملايكة .. بس عشان كنت بتاكل معاهم رز و انت نايم
عسقول مفاجأ: هوبااااااا ... انت كنتى شايفانى و لا إيه ؟؟
لماضة : ربنا يخلى لنا الشباك اللى بيطل على مصلى الرجال يا بن عطاء السكندرى
عسقول مهزوما :انا اكتشفت ان أم علي وكيلو القطايف وصينية الكنافه لا يجوز اكلهم قبل الصلاة
لماضة: و أنا اكتشفت بالبرهان والدليل القاطع يا عسقول يا اخويا ليه صلاة المرأه في بيتها افضل
عسقول مستفهما : ألا صحيح .. ايه الريحة اللي كانت جايه من نواحيكم؟؟؟؟

اعزائي المشاهدين نقل معكم هذه الحلقة





58 comments:

nona said...

ههههههههههههههههههههههه
تصدقى بالله دة الاى بيحصل فعلا فى صلاة التروايح و حدث و لا حرج على الاى بيحصل فى مصلى السيدات تحسى اكنها قلبت حضانة اطفال و الا باة واحدة تقف وراكى و الموبيل عمال يرن ياستى ما تسبية فى البيت و الا اقفلى صوت الجرس خلاص عارفنا انك عم المهم
و خنقات على مين الاى يقف الاول او التانى
بس يا استاذ عسقلانى كفاية عليك الفطار و خلى التحلية بعد التروايح عشان لماضة ما تضحكش عليك تانى
يومياتك رائعة جدا

Unknown said...

نونا
هنيئا اول تعليق
على السحور كده
صباح الفل
قوليله بالله عليكي محدش يتقل في الاكل

صوت من مصر said...

لماضه
والله بوست جميل كل سنه وانتى طيبه بقالى ربع ساعه بقرا البوست ؟

Soooo said...

زين والله زين

بس خدي هنا .. انا اسمي موجود ليه؟؟؟

أكونش انا العيل اللي عملها على روحه؟؟؟

ملحوظه
قولي لعسقلاني يبقى ناصح .. ينزل بعماد متعب ومعاه فلافيلو .. ويشيل رونالدينهو وميسي .. ولو عنده وقت .. يبقى ينزل بعماد النحاس بعد مايجيب اول جون .. ويأمن خط الباكات باتنين فراوده .. و .. بقولك ايه .. خليه يركز في الصلاه وخلاص





سلاموووووووووووز

blue-wave said...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
يا نهاركم ابيض
انا عمرى ماضحكت الضحك دا قبل كدا
الله يكرمكم يارب

Unknown said...

هايلة يادكتورة
ورسالتين مهمين جداً بصراحة مصلى السيدات اللى صوته بيكون مسموع جداً فى مصلى الرجال
وعاداتنا فى الأكل فى الشهر الكريم

ياريت يكون فى وقفة كبيرة كمان مع التليفزيون فى رمضان
مش عارف بمناسبة ايه الحقيقة يبقى رمضان موسم مسلسلات ولا كأنه بالتناوب مع إبليس
ربنا يهدى ويتقبل صالح أعمالكم
رمضان كريم
***************************************
اللهم بلغنا ليلة القدر وارزقنا فيها عتقاً من النار وتوبة نصوحاً لا نعود بها إلى معصيتك أبداً .. آمين

Anonymous said...

ههههههههههههههههههههههه

مسخره بجد

دمكم خفيف جداااااااااااااااا

تسلم ايديكم

و لازم مش نتقل فى الاكل

انا اصلا تعبت من الموضوع ده

فى رمضان معرفش بجد بيحصل ايه

جزاكم الله كل خير

سلامات :)

Jack Sparrow said...

ربما قد يهمك زيارة مدونتي لست ادري تماما فلتقرري انتي

صباح الصباح said...

مش معقول يا لماضة بقى كدة تدبسيها فى الولد الصغير
هههههههههههههههههههههههههه
وكمان عسقول : يا ابنى حد ياكل كيلو قطايف بحالهم.. دى مش اكلتك دى اكلة 10
هههههههههههههههههههههههههه
اللة اللة
دة كمان سوو منور هنا..
ما شاء اللة البوست دة بجد طحن طحن طحن

صاحب المضيفة said...

تسلم الأيادي على السرد الرايق ده


كل سنة وانتي طيبة

Misrdream said...

معجبتنيش المره دي
مستني اليوميات التالته

مهندس مصري بيحب مصر said...

بسم الله ما شاء الله اللهم لا حسد
عقلية كوميدية مهلبية 100 مية انتي و البشمهندس عسقول
و لو اني مش عارف ايه اللي دخل سوو في الموضوع
أكيد هو اللي طبخ الفطار
:)

بس هل الموضوع وصل لدرجة عمايل العيال على السجاد
ليه ؟ مفيش إختراع اسمه بامبرز
حسبنا الله في كل اللي فاكرين بيت ربنا نادي للمقابلات و الفشخرة و الكلام الفاضي
بس الله يخليكي ضحكت كتير
:)

اسكندراني اوي said...

كل سنه وانت طيبه ورمضاااان كرييييييييييييم
على فكره السنه اللي فاتت كنا بنصلي التراويح في احد المساجد الكبيره في محرم بك
والشيخ هدد الستات انه حيقفلهم المصلى من الاردغانه اللي كانت حاصله
فمعلش الستات دول .... نقول ايه بس اللهم اني صايم

اما النيام نيام فدول كتييير برضه وبتحصل في احسن الرمضانات

صدى الصمت - عاشقة الورد - said...

فعلاً بيحصل دايماً مشاكل فى مصلى السيدات بسبب الأطفال وساعات مابنسمعش حاجة من الصلاة أو الدرس من كتر صراخ الأطفال وجريهم ولعبهم وبتكون مشكلة كبيرة

Hassnaa said...

ههههههههههههههههههه

بجد بوست جامد اوي و عسول اوي

بس هوه في حاجه علشان الصوره تكمل

عسقول صغنن و لا كبيير :))

الواحد بيحاول يتخيل المظر

انت و شفناكي عالتلافيزيووون :))

بجد بجد بوست تحفه

Hassnaa said...

لماضه :))

http://hosny-hassnaa.blogspot.com/

و قوليلي ايه رايك :)

aya said...

بجد البوست يفطس من الضحك
تخيلي ان تقريبا الي حصل معاكي غالبا بيحصل معايا
بالذات المعلمه دي غالبا ليها توأم في كل الجوامع والعيال دول بئا حاجه فظيعه يكونو بيصلو واذا فجأه في وسط الصلاه تلاقي واحده ضربت التانيه علي قفاها
كل عام وانتي الي الله اقرب وعلي طاعته ادوم
وكل عام وانت طيب يا عسقول بس بلاش ام علي دي بتعمل تخمه
سعدت بزيارتك واتمني دوام التواصل
د.ايه

بحبك يامصر said...

السلام عليكم
كل سنه وانتى طيبه يا دكتوره لماضه
صحيح كل الصور اللى قولتيها موجوده
وانتى نقلتيها باسلوب جميل وواقعى ودمه خفيف
تحياتى ليكى

ابن حـجـر الـعـسـقـلانـى said...

صباح الدماغ العالية يا جدعان


بجد أنا ضحكت كتير على الموضوع برغم إنى مشارك فى كتابته

بس بصراحة كل ما أتخيلك و انت واقفة و مش عارفة تسجدى أموت من الضحك

بس بجد مية مية بجد يا لماضة على الموضوع

ثم يا سوووو انت عارفنى راجل زملكاوى .. يعنى من الآخر مابافهمش فى الكورة .. و إلا ماكنتش ابقى زملكاوى

أنا هاسيبلك انت قيادة الفريق و وقفنى أنا حارس مرمى

بس لما نفوز بالبطولة نبقى نقسم ففتى ففتك

Anonymous said...

بجد مش عارفة اقول ايه لساني ويدي تعجز عن كتابة اي تعليق


بجد يسلموا ها الايادي الحلوة

ربنا يباركلكم يارب ونشوفكم كدة مؤلفين سيناريو هادف مش بتاع اليويمن دول ده انتوا هتكسروا الدنيا


سلامي لكي ولعسقول
sooo و لــ

Anonymous said...

في غلطات نحوية في التعليق بتاعي عديها بقي واعملي نفسك مش شيفاها هههههههههههههههههه

مهرة سالم said...

صلاةالمرأة في بيتها أفضل من صلاتها بالمسجد، ما لم يكن وراء ذهابها إلى المسجد فائدة أخرى غير مجرد الصلاة، مثل سماع موعظة دينية، أو درس من دروس العلم، أو سماع القرآن من قارئ خاشع مجيد . فيكون الذهاب إلى المسجد لهذه الغاية أفضل وأولى.

الدكتور الشيخ يوسف عبد الله القرضاوي

عمرو said...

PEACE.... قوى

قوى


!!!!!!!!!!!!!!

مـجـنـووون said...

السلام عليكم ورحمة الله وبركاته

مشكلت الاساسية في رمضان أن الناس بتيجي ساعة الفطار بتاكل علي اخر طاقتها ، لما يبقي الواحد مش قادر يتحرك من كتر الأكل
يعني بيضيع منه حاجات كتيره زي صلاة التراويح والفجر
حتي لو صلاها مش حيبقي مركز فيها خالص

تقبلي مروري
مجنووون

Unknown said...

صوت من مصر
معلش اديك بتسلي صيامك ك)
,,,,,,,,,,,,,,,,,,,,,
سوووو
يا باشا كفايه اشرافك واخراجك ولمساتك الساحره اللي اتحطت في الاخر دي
هههههه هخليه يركز انت بس قوله ميتقلش في الفطار
صباح الفل
,,,,,,,,,,,,,,,,,,,,,,,,,,
دكتور عمرو فاروق
اي خدمه يا باشا
ادفع اللي عليك بقى
,,,,,,,,,,,,,,,,,,,,,,,,,,
احمد عبد العال
ربنا يكرمك يا دكتور ان شاء الله احنا بنحاول ننقض حاجات محدش اتكلم عنها قبل كده وكمان مهمه شويه وبتحصلنا كلنا على فكره حكايه العيل اللي عملها دي حصلتلي بجد
:)
,,,,,,,,,,,,,,,,,,,,,,,,,,
ماجنوليا
كل سنه وانت طيب الناس ما بتصدق المناسبات تيجي عشان تاكل
,,,,,,,,,,,,,,,,,,,,,,,,,,
صباح الصباح
ايوه والله الكلام ده حصل بجد مش هزار
اي خدمه يا ريس يارب نسعدك دايما
,,,,,,,,,,,,,,,,,,,,,,,,,,,,,
صاحب المضيفة
ربنا يخليك يا باشا
وانت بالصحه والسلامه
,,,,,,,,,,,,,,,,,,,,,,,,,,,
حلم مصر
ليه بس طيب ايه مش عجبك عشان نتفاداه المره الجايه ان شاء الله
,,,,,,,,,,,,,,,,,,,,,,,,,,
مهندس مصري
سوو يا سيدي حط لمساته الاخيره للحوار وكمان اشرف عليه
لقاء عمالقة زي ما بيقولوا
ايوه حسبن من هنا لبكره مش بيخلوني اعرف اركز الله يسامحهم
,,,,,,,,,,,,,,,,,,,,,,,,,,,,
اسكندراني أوي
الله اكرم وانت بالصحه والسلامه يا هندسة ايوه عماليهم سودا الستات دول
على فكره الواد عملها بجد الموقف ده حصلي
,,,,,,,,,,,,,,,,,,,,,,,,,,,,
صدى الصمت
ايوه كلنا بنعاني من نفس المشكله اللى بيغيظني لا هي بتصلي ولا بتخلي الناس يصلوا من عيالها يبقى كانت تستنى في بيتها احسن بدل ما تطلع روحنا كده
الله يسامحهم بقى
,,,,,,,,,,,,,,,,,,,,,,,,,,,,
حسن
يا سيدي عسقول ده بشمهندس قد الدنيا اكبر مني كمان مش كتير يعني ب 3 سنين كده وسوو طبعا عمنا كلنا ههههه
,,,,,,,,,,,,,,,,,,,,,,,,,,,,
آية
اه والله ربنا يسامحهم على اللى بيعملوه فينا
,,,,,,,,,,,,,,,,,,,,,,,,,,,
بحبك يا مصر
ربنا يخليك يا افندم الحمد لله انها عجبتك
كل سنه وانت طيب
,,,,,,,,,,,,,,,,,,,,,,,,,,,
عسقووووووووووووول
ماشي يا شريكي ليك يوم يا ظالم
النهارده الواد نام على ضهري منهم لله
وانت نايم تحلم بفران بتلعب كورة
تسلم ايدك يا باشا على الحوار بجد انت وسوو
عمالقه بجد
لقاء السحاب
سلام بقى احسن ابتدت تمطر لا مش الولد تاني دي مساورة الجيران ضربت عندنا
,,,,,,,,,,,,,,,,,,,,,,,,,,,,
دكتورة رورو
ربنا يخليكي يا جميلي تسلمي
ايه اللغه الغريبه دي انتي مش مصرية ولا ايه يابت
ايه تسلموا ها الايادي دي
مش بتاعتنا
اسمها تسلم ايدك يا ريس
:)
,,,,,,,,,,,,,,,,,,,,,,,,,,,,,,,,
ام كي
صحيح جزاك الله كل خير على المعلومه وجاري التنفيذ
وياريت لو يكون اقرب مسجد لبيتها مش لازم مسجد في اخر بلاد المسلمين يعني
,,,,,,,,,,,,,,,,,,,,,,,,,,,,,
عمرو
قشطه يا معلم

Unknown said...

مجنووون
مشكله فعلا
الحمد لله ان الصيام لحد المغرب بس لانه لو كان للعشا كان زمان الناس كلت بعضها
:)

Unknown said...

حلوووووووووووووووووووة دمك خفيف مووووووووووووووووووووووت وانا ضحكت لما شبعت بس فعلا الاكل قبل الصلاة كارثة بكل المقاييس الارضية

Hassnaa said...

حرام عليكي يا لماضه

خلتيني حسن :((

حسناء والله حسناء

Dr.Mohammed Gohary said...

أول زيارة ليا
وان شاء الله مش الاخيرة

ومن غير لماضة هعلق
ومش عاوز حد يبحلق
.
..
...
....
.....
......
.......
........
.........
..........
...........
..........
.........
.......
......
.....
....
...
..
.

كيكيكيكيكيكيكيك
يحظك يا لماضة
دا موضوع توووووووحفة
ايه داااا
دانا اللي بسمعه عنك صحيح بأه
بيقولوا قال دمك خفيف

دا مش خفيف
لالالالالالا مش يلطش مخك ما يرحش بعيد
دا شربااااااااااات أي والله
:d

خلينا نشوووووف



واديا فوق لا مش تذنيبه بدعي ربنا على الظالم والمفتري طبعا عارفينه وغالبا اضطريت بعدها اني اعيد وضوئي


كيكيكيكيكيكيك انا عارف ليه عيدتي وضوئك

هههههههههههههههههههههههههههه

-----------------------------

محصور يا ولداه فحب يفك حصرته على مصليتي او بمعنى ادق مكان سجودي بالذات

ههههههههههههههه ياااااااااااااااااع
هههههههههههههههههههههه

ههههههههههههههههههه

------------------------------

الست الكبيرة: يوه .. لاهو الريحه ده كانت من .. شوفتي بقى .. ان بعض الظن إثم .

المفروض كونتي جولتيلهيه شوفتي بقا يا انشراح... أهو دا سبب العطر اللي فاح ... وياريت بجة تبطلي نباح ... واخفي من جدامي بدل ما ميطلعش علكي صباح

هههههههههههههههههههههههههههههه

-------------------------------



هههههههههههههه

حلقة جميلة بجد


كل سنة وانتم طيبين

رمضان كريم

دانتي طلعتي حدوتة يا لماضة

مصري بالغربة said...

تصدقي انا دلوقت تأكدت فعلا انك لمضة

سيبك من كل البوستات اللي فاتت ديه اركنيها على الدكة ( دكة البلاء بتاعة المدرب الكدير عسقلاني ) بس

بصراحة لمضة . . لمضة يعني

ويا ريت نلاقي كل يوم لامضة من النوعية ديه

بتفكروني بمسلسل طاش ما طاش اللي عندنا هنا

وبالتوفيق

بس فيه طلب لو ممكن

بعد كل بوست تقولوا البوست اللي بعده حينزل امتى ويوم ايه والساعة كام

عشان نستناه ممكن

كلام حسام said...

انسة لماضة
دوك لماضة
طبعا انتي غلطانة وغلطانة كتير مش شوية علشان المفروض بدل ما كنت عملت التدوينة ده هية كنت عملتي تدوينة تانية تناشدي اهل الخير والاحسان للتبرع لشراء بامبرز فوري للطفل البرئ وتوعديه انك هتديه نص المهية او حتي تلت في المية انما كده انتي ظلمتي الواد والولية
وتلاقي الولية مشيت تقول شفتوا لماضة المفترية لا حطيت جوز جنيهات في صدر الواد ولا جريت جري بعد الصلاة اشترت له عسلية
غلطانة اوي غلطانة كتير
اهي ده باين اللي قولته غلطان كتير غلطانة اوي مطلع اغنية
او منزل الست السمية الاقتصادية
رمضان يا كريم يا لماضة

أُكتب بالرصاص said...

تقبل الله منا ومنكم .. وكل عام وإنت بخير

Empress appy said...

يا عينى عليك يا عسقول ده حالنا يا خويا الاغلبيه

لماضه موضوع المسجد عامل ليه ازمه نفسيه متتخيلهاش بجد

Unknown said...

طب أقول أيه بس
عمالقة الكوميديا في التدوين أجتمعوا طبيعي يطلعوا المستوي ده
بس النقل جه واقعي مميت
:)

كل سنة و أنتي طيبة رمضان كريم

Unknown said...

لكل أحبائي المدونين أرجوا زيارتي للتعرف علي تفاصيل أفطار جماعي

ياسمين حميد said...

المفروض المساجد التي فيها مصلى للنساء أن يبقى خارجها غرفة للأطفال وتتبرع بعض النساء برعايتهم حتى تنتهي الامهات من الصلاة
...

romansy said...

كل سنة وانتى طيبة
جميلة قوى الحكايات دى
دا فعلا اللى بيحصل فى بعض المساجد
الا ما رحم ربى

حكايات جميلة قوى

على فكرة
اسلوبك شيق فعلا
بيفكرنى بالحكايات اللى فى مجلة علاء الدين
وميكى ماوس

المتبهدلون في الأرض said...

يافندم ....بجد إنت موهوبة "شهادة حق"مش عارف انتي بطلتي تدوين ليه

انا ما كنتش متوقع أبدا أقول الكلمة دي لحد بس حقا انتي تستحقينها بكل جدارة




""الكلام ده لصاحبتك الأنتيم صاحبة مدونة اسمعوني "ياريت توصليلها الكلمتين دول وقوللها جمهورك مستنيكي


شكرا على التوصيل

عالم حبيب said...

السلام عليكم

تابعت يوميات صائم 1 .. عجبتني جدا .. دي أكيد رائعة كمان .. بس محتاجة طباعة بقى والواحد يقرأها على رواقة .. ان شاء الله لي عودة .. رمضان كريم

مقاطعـــــــــــــون said...

جميل قوى الاتحاد اللى حصل دا واول مره اشوفه مبروك
وربنا يوفقكم
http://mokat3een.blogspot.com/
شاركونى حمله مقاطعون نحن نرفض اى قرش يدفعه العرب للتتربح من ورائه اسرائيل وغيرها رافعه شعار ان العرب يستفيدون من وراء شركاتهم ولا تتسببوا فى قطع ارزاق الناس انهم يضغطون علينا بلقمه خبز
فسحقا لاى لقمه تاتينا منهم فى مقابلها الاف يموتون من اموالنا شارك ولا تتردد
وجزاكم الله كل خير

Resala said...

ههههههههههههه
لا جامده جدا فعلا
تسلم ايدك يالماضه
وانا اتمنى انك تزورى المدونه بتاعتى كلها حاجات كوميدى وهتعجبك
منتظر تشريفك ليا

Resala said...

www.3eeshayamak.blogspot.com

فى القلب said...

حتى فى الصيام ضحكتينى وجوعتينى أعمل فيكى أيه بس يا قمر أنتى ديماً كده مش ليكى حل

كل سنهو أنتىطيبه وخطيبك بيقلك فين الياميش بتاع السنه دى هومستنيه

دمتى يا دكتور

alexandrany said...

لماضه

مش قولنالكم خدوا معاكوا بامبرز وانتوا رايحين الجوامع عشان ما تفضحوناش
ما سمعتوش الكلام
تستاهلي
:)

عسقل
يا بني وليه الكسفه انا كنت في السرير اللي جنبك
هههههه

كل سنة وانتو طيبين

Anonymous said...

السلام عليكم دكتورة لماضة

وفعلا ضحكتينا من القلب ههههههههههههه

ربنا يارب بكرمك ويلا خير بقى معلش خيرها فى غيرها ان شاء الله

بصى بقى نصيحة ليكى لما تحبى تروحى تصلى فى الجامع شوفى جامع موجود فيه واحدة بتحارب العيال الصغيرين وبتحرم امهاتهم تجيبهم معاهم علشان العمايل اللى بيعملوها دى

طبعا مسجد نساء يخلو من عيال صغيرين ده فى المريخ ان شاء الله ايوه تانى شارع على ايدك اليمين

ربنا يا رب يعينك عى الطاعة ويعين عسقول باشا على النووووووووووووووووم
هههههههههههههههههههههه ما ترعلش منى يا عسقول بهزر والله انا عارف ان الكلام ده كله افتكاسات فكرية لا غير ههههههه

دمتم لنا بخير ويلا سلام

موجة said...

لا بجد انتي مش ممكن
هههههههههههههه
البوست ده كنااااااااافة خالص
ربنا يباركلك
كل سنة و انتي طيبة يا لماضة

خالص تحياتي
مجرد موجة

Anonymous said...

هههههههههههههههههههههههههههههه
تصدقى فعلا النوم ده حاجة طبيعيه فى الدرس و أحيانا فى الصلاة نفسها و الله..معايا واحدة نامت و حلمت و هى بتسجد...و الستات اللى معاها أطفال يأما تصلىفى بيتها يأما متجبش طفلها معاها لكن الحضانة اللى بنشوفها دى لا تجوز ده بيت ربنا اللى لازم يكون له أحترامه




و كل سنة و انتى طيبة

Soul.o0o.Whisper said...

السلام عليكم و رحمة الله و بركاته

كل سنة و انتى طيبة يا لماضة
عارفة إنىمقصرةفى حقك
معلش سامحينى

رمضان كريم بقى
:)

بالنسبة لصلاة التراويح طبعا معظم المساجد بالحالة اللىقلتيها دى

لكن باحاول اختار مكان يكون هادى بعض الشئ
و احياناباصليها فى البيت

على حسب
بس البوست بصراحة توووووووووووحفة

تسلمى و يسلم عسقول و سووو

خالص تحياتى

أختكم فى الله said...

كل سنة وانتى طيبة

رمضان كريم

بوست زى العسل والله

ربنا يبارك فيكى

Unknown said...

انجي
كل سنه وانتي طيبه يا انوج متقليش بقى في الاكل
,,,,,,,,,,,,,,,,,,,,
حسناااااااااء
بعتذر بجد انا اسفه على هذا الخطأ المطبعي الغير مقصود والله
,,,,,,,,,,,,,,,,,,,,,,
دكتور محمد الجوهري
تشرفنا اي وقت يا دكتور والحمد لله انها عجبتك
,,,,,,,,,,,,,,,,,,,,,
مصري بالغربه
الحمد لله انها عجبتك يا افندم
للاسف احنا مش نقدر نحط معاد تتحط فيه البوست اللي بعده امتى بس احنا بنحاول نثبته بوست كل اسبوع باذن الله هبقى اغششك لما البوست ينزل :)
,,,,,,,,,,,,,,,,,,,,,,
شملولي
ايوه فعلا انا غلطانه المفروض كنت اكلته ووديته الدبليو سي كمان على فكره الموقف ده حصل بجد
,,,,,,,,,,,,,,,,,,,,,,,
اكتب بالرصاص
امين يارب كل سنه وانت طيب يا هندسة
,,,,,,,,,,,,,,,,,,,,,,,
آبي
هههههه معلش تعيشي وتاخدي غيرها انا بقيت اصلي في البيت دلوقتى
,,,,,,,,,,,,,,,,,,,,,,,
عاليا حليم
اي خدمه يا جميل كلك ذوق يا عليتي
كان نفسي اجي معاكم الفطار ده ابقوا افتكروني بقى عندما تغوص المعلقه في طبق الشوربه
,,,,,,,,,,,,,,,,,,,,,,,,,
ياسمين حميد
اقتراح هايل والله
بس الاحسن انهم ميجوش خالص بدل ما يبطلوا صلاتنا احنا وهما كده كده مش عارفين يصلوا من عيالهم
,,,,,,,,,,,,,,,,,,,,,,,,
رومانسي
ميكي وعلاء مره واحده
ربنا يخليك يا رافع من روحنا المعدنيه
,,,,,,,,,,,,,,,,,,,,,,,,
ابو الليل
بغض النظر عن الاسم ان شاء الله يوصل
,,,,,,,,,,,,,,,,,,,,,,,
عالم حبيب
في انتظار رأيك
,,,,,,,,,,,,,,,,,,,,,
مقاطعون
شكرا يا افندم
,,,,,,,,,,,,,,,,,,,,,
جيمي
ربنا يخليك ان شاءالله ازورك
,,,,,,,,,,,,,,,,,,,,,
اوشة
ههههههه مين يجيب للتاني
بوسيهولي يا اوشه بالله عليكي
,,,,,,,,,,,,,,,,,,,,,,,
اسكندراني
ماشي يا مصطفى
هبقى اخد كوافيل زياده معايا
,,,,,,,,,,,,,,,,,,,,,,,,,,
جمعاوي
اي خدمه يا باشا
يارب يسعدك دايما
,,,,,,,,,,,,,,,,,,,,,,,
موجة
ايه يا عم فينك من زمان
الحمد لله انه عجبك
ربنا يسعدك دايما
,,,,,,,,,,,,,,,,,,,,,,,,,
انا ودماغي
ههههه فعلا حقيقه علميه واثبتت بالدليل القاطع المبلل
,,,,,,,,,,,,,,,,,,,,,,,
Soul.o0o.Whisper
ولا يهمك الله يعينك
كل سنه وانت بالف صحه وسلامه
,,,,,,,,,,,,,,,,,,,,,,,
اختي في الله
ربنا يكرمك يارب ويعزك ويسعدك دايما
نورتيني

elsha3er said...

بجد اتشرفت بزيارة مدونتك البوست رائع وكلماتك خفيفة

احمد الشاعر

3omda said...

Great post...go ahead.I love your sarcastic style."Rabna y wafa2k"

عالم حبيب said...

لمــــاضة

طبعنا وقرأنا .. ما شاء الله رااااااااااااااااائع جدا .. ايه المغامرات دي

بالمناسبة على موضوع النساء في المسجد

مرة كان الشيخ حسن ايوب بيعطي محاضرات في السيرة .. وكان صوت النساء بيعلى جدا والشيخ بيتكلم .. قالهم : ياستات : احنا هانعملكم ساحة .. الشمس تضرب فيها ونجيبكم نوقفكم فيها علشان اللي عندها كلمتين يسيحوا وتخرجهم قبل ما تيجي الدرس .. وتيجي بقى ربنا هاديها وتقعد ساكتة :) .. ممكن مش نفس النص لكن نفس المعنى لأني سمعته من زمان

ربنا يهدىىىىىى النساءءءءءءءءءء والرجال كمان

تدوينة رائعة أدخلتي السرور على قلوبنا جزاكم الله خير

NODY said...

انا اول مره ازور البلوج
وعندك حق فعلا فى كل كلمه دا بيحصل حقيقى
بس دمك شرباته بجد

أحمد سعيد بسيوني said...

بسم الله الرحمن الرحيم

معذرة على الخروج عن الموضوع

ولكن
نكسة مصرية جديدة
في العاشر من رمضان 1429هـ
10/9/2008
على مدونة البحر
www.ana-elbahr.blogspot.com

نشرف بزيارتكم

تحياتي

ojg said...

الحلقة حلوة أوي تسلم ايديكو
انا فعلا من كتر الدوشة اللي بتحصل في مصلى السيدات احيانا بتمنى انزل اصلي مع الرجالة
:s
بس بالنسبة للأكل ماتقلقيش تماما
انا في الطبيعي ديناصور صغنن :)
انما في رمضان مش بعرف اكل
هما يا دوبك شوية رز على حبة سلطة
وع المسجد عدل
:)
مستنية الحلقة الجديدة

محمد فكري said...

هههههههههه
..........
جميل بجد..

شكراً ليكي ع البوست الجميل ده..


وكل سنة وانتي طيبة

ANGHAM ALLAM said...

انتي زي العسل و دمك خفيف موت
أنغام علام