أصحى يا نايم
ماما نظمية : يا ولاد اصحوا عشان تتسحروا .. اصحوا ده السحور بركة
عسقول : يا بركة دعاكي يا امه أدعيلي اتجوز وأتستت
لماضة : مش لما يجيب معايا نتيجة الأول
عسقول : يا لماضة انتي بقيتي من القواعد من البيت
لماضة : قواعد .. طيب أقعد على الطبلية وانت ساكت
على الطبلية يجلس عسقول ولماضه وامهم
عسقول: ااااااه رجعنا لمقرر السحور اليومي طبق الفول المتين والجبنه القريش وقرصين البيض والزبدية .. والله الزبديه هي اللى بتهون عليا السحور ده
لماضة : بلاش تتبتر على نعمة ربنا .. كل وانت ساكت .. وبعدين الفول ده الحاجه الوحيدة اللى بتخلينا نصد في الصيام
عسقول: ههههههه اوي اوي وانا بقول برضه الحاله الغريبه اللى الناس بتكون فيها وقت الصيام دي من ايه .. الواحد يدخل المصلحة من هنا وعينك ما تشوفي الا النووووم
اصحى يا نايم وحد الدايم
اصحي يا عسقول وماتبقاش كسول
لماضة: واد يا عسقول .. سامع ده المسحراتي بينادي اسمك
اصحي يا لماضه واديها رياضه
عسقول: وجاب اسمك انتي كمان اهو
واصحي يا امهم وشيلي همّهم
لماضة وعسقول: وجاب سيرتك اهو كمان يا امه
ماما نظمية : قطع لسان اللي يجيب سيرتي ولا اسمي على لسانه
عسقول: سيدي ياسيدي .. شايفه امك يابت يالماضه .. طب والله انا كان نفسى أطلع لمض زيكم كدة .. بس انتو عارفيننى طيب و ماباعرفش أرد على الناس .. و حساس .. و رقيق .. و جميل .. و أمور .. .. و أمى بتخاف عليا من نسمة الهوا .. عشان كدة أنا هاسيبك لضميرك يعذبك
لماضة : مين ده اللي جميل وأمور ورقيق وحساس
ماما نظمية : يابنتي ده بيتكلم على واحد صاحبه أكيد .. هو دايما كده بيحب يشكّر في غيره
لماضة : انا عارفة ! .. ده حتى براءة الاطفال في أذنيه
عسقول: امه .. انا عايز اقول حاجه بس احلفي برحمة خالتي ماتضربيني
ماما نظميه: قول وانا اوعدك لو اتضايقت هضربك .. وخالتك لسه عايشه اصلا
عسقول: بصراحة يا أمه الفول اللى انت بتعمليه فى البيت دة بيبقى جبار .. بس ماتزعليش منى .. أنا نفسى أجيب فول فى يوم من عند "الشيخ" اللى واقف على عربية فول على ناصية الشارع .. أنا سمعت إن الناس بتقف طوابير عنده من بعد صلاة العشا لغاية الفجر
لماضة: آه مش الشيخ دة اللى اتقبض عليه السنة اللى فاتت عشان ظهر عشر حالات تسمم و كانوا واكلين من عنده فول ؟ آه عارفاه بيقولوا الفول بتاعه بيودى الجنة عدل
عسقول: لأ .. حرام عليكى .. في قبل الجنة مستشفيات وغسيل معده .. وبعدين بطلو كدب وافترا .. هم ماكانوش عشرة .. كانوا تسعة فقط
ماما نظمية : ما شاء الله يا عسقول يابنى .. طول عمرك تحب الأمانة
سوووو : سلامو عليكو
عسقول : وعليكم السلام ورحمة الله .. أتفضل يا عرب
لماضة : وعليكووو السلام ورحمة الله .. سلام مربع للجدعان
ماما نظمية : حمد لله على السلامة يا سوووو افندي .. تـَّو ما شرفت يا خويا
سوووو : يا امه يعني الناس بتتطور وبتتقدم وبتطلع القمر وبتركب توك توك .. وانتي تقولي (تـَّو) .. ايه (تـَّو) دي ؟؟؟
ماما نظمية : بتتريق على امك .. مانت طالع لابوك .. وعلى رأي المثل .. ياللي انت كده مرتاح وكده مرتاح .. عايز ايه دلوقتي؟؟
عسقول : واد يا سوووو .. سيبك من امك واحكيلي ايه النظام .. مش قلتلك تاخدني معاك
يجلس سوووو على الطبليه مزاحما عسقول ويزق لماضه بكوعه في وشها وتروح مكفيّه على قفاها
سوووو : اسكت ياعسقول ياخويا .. ده اتضح اننا ولا عايشين
ماما نظمية : احمد ربنا ياخويا .. ولا انت طالع لابوك .. وعلى رأي المثل .. فينك ياللي انت هناك .. قاللك انا هنا
عسقول : مش عايشين ازاي ياخويا
سوووو : ياعسقول يابني .. انا دخلت الخيمه من هنا .. ولقيتلك رقاصه ومطرب
الجميع باندهاش : مطرب !!!!
سوووو : اه .. بس هو ماحدش استغرب ليه من الرقاصه !!؟
عسقول : رقاصه رقاصه .. كان فيه فايبريشين يعني ؟؟
سوووو : اكيد في فايبرشن يابني.. مش هتعمل نفسها بترقص سايلم مثلا .. وأجدع من أي فايبريشن كمان
ماما نظمية : إيه يا اولاد الفايبريشن دة ؟؟
عسقول : لا .. دى حاجة كدة من اللى نقدر نقول عليها ... المفطرات .. زى الأكل و الشرب كدة .. المهم يا سوووو .. كمل يا خويا .. طب كان فيه فايبريشن روسى ؟؟
سوووو: لا طبعا .. البلدي يوكل ياعمنا .. البت الرقاصه محترفه محترفه يعني .. حاجه كده من اللي بنشوفها في السيما ونقول دي شغل جرافيك ومؤثرات
لماضه : ودي كانت بتعمل ايه ياسوووو
سوووو : أكيد مش بتوزع عرق سوس عالناس في الخيمه يعني
ماما نظمية : وانت اصلا ايه اللي يوديك الاماكن المشبوهه دي
لماضه : استني يا امه .. كمل يا سوووو
سوووو : لا مش هينفع اكمل .. بعدين ياعسقول ابقى احكيلك الباقي .. بيني وبينك
ماما نظمية : لا بقى .. انا عايز اعرف شفت ايه تاني هناك
عسقول : يا اما احنا داخلين على الهزع الاخير من الليل .. المفروض ننوي الصيام ونقول يارب
عسقول وهو بيميّل على سوووو وبيكلمه بصوت واطي : يارب تاخدني معاك المره الجايه
لماضة : طب تقب بعشرة جنيه دلوقتى يا سوووو و إلا هاشرح لأمى بالتفصيل يعنى إيه فايبريشن
سوووو : ليه يا أم العافية
لماضة : هشتري حاجه عجبتني هتجيب ولا اقول لبابا اني شفتك بتشرب سجاير أول ما المغرب أذن
سوووو : سجاير .. انا اشرب سجاير برضه .. طب تصدقيها عني دي يا امه؟؟
ماما نظمية : اه اصدقها .. مانت طالع لابوك .. وعلى رأي المثل .. بتشرب سجاير يا واد .. قال باشرب وايه المانع
سوووو : انتي بتجيبي الامثال دي منين يا امه؟؟
لماضه : بقولك ايه .. هاتجيب العشره جنيه ولا اقول اني شفتك بتشرب سيجاره تحت السرير
سوووو : اهو .. انتي بنفسك قلتي .. تحت السرير
عسقول: وهي هتفرق في ايه تحت السرير من فوق التسريحه يا سوووو
سوووو : لا تفرق .. فوق التسريحة لماضة مكبرة صورة المدعو بيومي اللي صورته على العلب ومعلقاها قال ايه بتذاكرعليه ثم ان دي ما كانتش سجاير .. ده كان عود بخور باغيّر ريحة السرير اللي اختك الداكتوره لماضه .. بتلعب مع ضفادعها عليه
عسقول : وياريتها عالضفادع وبس .. وسحالي وابراص وصراصير
ماما نظمية : بتصرصري كمان يالماضه .. وانا اللي قلت انك مش طالعه لابوكي .. أتاريكي على رأي المثل .. بتصرصري ليه يابنتي .. قالت مالقتش اللي يصرصرني
لماضه : اصرصر ايه بس .. دي الحاجات اللي بنتعلم عليها التشريح بس انتو مش فاهمين
ماما نظمية : هو انتي يابنتي مش في كلية طب بني آدمين ؟؟
سوووو : او بني سويف
لماضه : آآآآه ضاعت العشرة جنيه خلاص كده آمنت ان السيجارة هي التطور الطبيعي لكباية الخشاف لا بقولكم ايه .. نبقى نكمل ماتش التريقه ده بعد السحور .. سيبوني اركز في طبق الفول اللي قدامي الله يكرمكم
لماضة تنظر بأذبهلال لعسقول : ايه ده انت نسفت طبق الفول .. طيب السنه اللي فاتت ودخلنا موسوعة جينيس بأكبر طبق فول عرفته البشريه .. السنه دي ايه .. ناوي تدخلنا سيادتك الموسوعة في سرعة نسف الطبق
عسقول : هبقى اجبلك طبق من عند عربية الشيخ
ماما نظمية : وبكده يبقو عشر حالات تسمم رسمي
سوووو : وابقي عالجي نفسك ياست الداكتوره
عسقول : ويارب نتقبل في الموسوعة
لماضة : نتقبل !! منا ومنكم طبق الفول
أكلها معكم
53 comments:
هههههههههههههههه
اولا ازيك يا لماضه هانم
موضوعك النهاردة هايل جدا
وبخصوص موضوع الفول على السحور .. أحب أضيف لك معلومة مهمة جدا..
المصريين لو مكالوش فول .. يعيوا ويجي لهم .. يجي لهم .. يجي لهم حاله معنويه
ههههههههههههههههه
وربنا يستر الأيام الجايه
دي الحكومة النضيفه ناويا تخصخص الفول هو كمان
هههههههههههههه
يلا تقبلي تحياتي بالكاتشب
هههههههههههههههة فطستونى على نفسى من الضحك وبجد بوست تحغة هو واللى قبلة
والفول دة حبيب قلبى دانا بتسحر يجى رغيفين فول انا اساسا عمرى ما جعت فى رمضان بس بعطش اوى
رمضان كريم وكل سنة وانتى طيبة فى تلت مغفرة الذنوب
*تحفة
جوعتوني اكتر ما انا جعان
بقالي يومين و ده التالت ما إتسحرتش
زميلي في الاوضة بيقول انه مش عارف يصحيني و منبه الموبايل مش عارف مبقيتش اصحى عليه ليه
دا أنا كنت باقوم من اول رنة
و انتوا عماين تتكلموا على السحور
جوعتوني
و طبعاً البوست جميل مش عارف اعلق على ايه و لا ايه علشان جعان و عطشان و مكلتش من ساعة فطار امبارح
لالالالالا
ايه الروقان ده كله
وكمان فايبريشن وروسي كمان
ده الحكاية وسعت قوي والمستور دخل البلد حتى في الفايبرشين
الله يرحم أيام زمان
:D:D:D:D
يعنى معقول كدة..
عسقول نازل تريقة على طبق الفول المسكين
وفى الاخر ينسفة نسف
شفتى باة
ورينا هتتسحرى اية؟
هههههههههههههههههههههههه
الله يخرب بيت فقركوا
انتوا مصايب و النيعمه منك له لها له
بجد البوست خشاف خشاف يعنى
ثم بتخبوا ليه موضوع الفيبرشن على لماضه على اى اساس
لاااااااااا
منتو مش واخدين بالكو مهو الموضوع فى بيتها و الله
المصنفات و الله متخذتش قرار فى اللى زى حالاتى و حالاتها فممكن تقولا عادى يعنى
فى بيتها
اخواتكو فى الرضاعه برضو
قولو انتو بس للماضه و هى هتقولى
ثم لا مانع من شويه حركه بعد اليوم الواقف ده
حركه من هنا و لا من هنا اهو اليوم يعدى هو هيبقى منكو و لا من العيانين
الفول
هو فيه زى الفول
دانا نفسى اتسيحر بقى على العربيه نفسها بس هى البت مروة تطاوعنى
بس شويه امثال عجب بجد
و قال يا قاعده فى حالك....سيبونى لوحدى وانا ناقصاكو
سيبونى بقى افطسلى عيلين و لا احدفهم بحاجه...منا شغاله اطفال دلوقت
ال اطفال ال
دانا اللى لسه برضع و النعمه
يلا استمروا استمروا
و لا مواخده عايزه موضوع ساكلوسف (اكسكلوسف) عن الفيبرشن
يلا
معطلكوش
تشااااااااااااااووووووووووو
هما الناس دول نايمين هنا و الا اية
لحقوا كل دول علقوا على البوست يلا ما علينا
بس بجد حكاية الخيمة الرمضانية دية تحفة و لازم سووو يحكى شاف اية هناك فيها لا اخفيها و انتى فاهمة باة
حلو قوى نتفرج طول الليل على الرقاصة الفيبريشن و اول ما الفجر يقول الله اكبر ننوى الصيام على طول
و فين فول الشيخ دة يا لماضة عشان لو عايزة اخلص من حد ابعتة ياكل من عندة ههههههههههههه
كل يوميات و انتى طيبة يا دكتورة لماضة
لا احب ان اقرأ بالعامية كثيرا
و لكني في كل مرة ادخل عندك او عند سوووو اكتشف ان العامية ليست سيئة على الاطلاق ..
بصراحة انتي اضفيتي عليها بخفة دمك رونق خاص
و انا مش هستخف دمي او اتلامض معاكي و الا هبقى انا الخسران اكيد
الصمت في حرم الجمال جمال
كما يقول نزار
هو سؤال بس خارج النسق الجغرافي
و ان كالن له علاقة بالتاريخ
عمرك فكرتي تكتبي بالفصحى ؟؟؟
سلالم
ههههههههههههههههههههههة
اية المدونة الجامدة دى- - -مدونة -تحفة
وبوست روعة لا ودى اول مرة وهفضل متابعها على طول
وكل سنة وانمتى طيبة ورمضان كريم
قلم رصاص
يا افندم ربنا يكرمك ده مش موضوعي لوحدي سوو وابن حجر معايا
ايوه كله الا طبق الفول بالروح بالدم نفديه
,,,,,,,,,,,,,,,,,,,,,,,
بلاك جوست
ربنا يسعدك كمان وكمان
كل زبادي حلو قوي عشان العطش
رمضان كريم
,,,,,,,,,,,,,,,,,,,,,,,
مهندس مصري
ادي جزاة اللي مياكلش الفول :)
,,,,,,,,,,,,,,,,,,,,,,,,
صاحب المضيفة
ههههههه برىء يا بيه اسال سوو انا مليش دعوه ايوه فين ايامك يا سهير يا زكي
,,,,,,,,,,,,,,,,,,,,,,,,,
صباح الصباح
بتسحر زبادي بس :) على الاقل ده ضامنه ان كل واحد ليه بتاعته محدش هياكلها منه
,,,,,,,,,,,,,,,,,,,,,,,,
البت مروة حفيدة فضه المعداوي
يابت طيب استري علينا هي الحكايه ناقصه فضايح ايوه ايوه الحركه بركه ومفيده عشان الهضم
,,,,,,,,,,,,,,,,,,,,,,,,,
نونا
يا جميل ما انتي اكلتي اول تعليق البوست الي فات :)
ايوه اللهم اني صايمه وبعدين انا لسه صغننه بلاش نفتح عنينا على الحاجات دي
,,,,,,,,,,,,,,,,,,,,,,
جاك سبارو
مش كده بذمتك
العاميه دي لغتنا الجميله بعد اللغه العربيه على طول
لا كتبت يا افندم باللغه الفصحى
ميم نون ومواضيع تاني
وهدية ست الحبايب
,,,,,,,,,,,,,,,,,,,,,,,
مصطفى
يا افندم المدونه وصاحبتها تحت امرك
ياريت تتابع يشرفني بجد
وانت بالصحه والسلامه
ههههههههههههههههههههههه
ياااااااة يا لماضه
بجد بجد كنت محتاج اوى شوية الضحك دول دلوقت تحديدا
تسلم ايدك وبجد ربنا يكرمك
ايه ده امال ماما نظيمة مكلتش معاكم ولا ايه انتوا نستوها ؟؟؟؟؟؟؟
ولا شكلك كدة يا لموضة خدتي رشوة من باباكي علشان متأكليهاش معاكي. كدة تبيعي مامتك عشان 10 جنيه
علي راي المثل ابيعك يا مامي من اجل 10 جنيه
هما صحيح بيجيبوا الامثال دي منين
يا لماضة أنا مش عارف انتم عايزين تعرفوا إيه اللى حصل جوة الخيمة ليه ؟؟
إيه الفضول دة
ناس من اللى علقوا عايزين يعرفوا اللى حصل جوة الخيمة
مش معقول كدة ... قوليلهم لما يكبروا شوية نبقى نتكلم
بس بجد الله ينور عليكى انت و سوووو
ليكم لمسات حلوة جدا جدا
مية مية
كان نفسى اعرف سو شاف اية فى الخيمة بالضبط
والفايبريشن دا يا ترى مفطرات ولا مكهربات
حوار جميل
رمضان كريم عليكم
استغفر الله العلي العظيم من كل ذنب عظيم
انا اروح خيمه واشوف مطرب فايبريشن ورقاصه سايلم؟؟؟
انا؟؟
على رأي المثل .. قالولي رحت خيمه .. قلت انا لاقي اكل !!!؟
عسقول
بكره بعد حوار مستشفى ابو الريش والخير اللي ناوين نعملو ابتغاء مرضات الله .. هفسحك فسحه انما ايه .. رقص وطبل وكل الحاجات اللي استغفر الله العظيم
ماحنا ان شاء الله هنكون كسبنا شوية حسنات .. نضيعهم أول بأول .. وربك غفور رحيم
سلامووووووووز
بجد جميلة قوى يوميات صائم وجميل القيم اللى بتحاول تزرعها فينا من خلال البسمة على الوشوش ومن غير وعظ وتعالى على اللى بيعملوا كده
سلبيات طرحها جميل جدا
وبجد بهنيكوا عليها
تحياتى للجميع
يا سوووو
انت زعيم كبيييييير
أحب سوسو
ههههههههههههههههه
كارثه يابنتي
إيه ده ؟؟
لأ وكمان سوووو دخل الحدوتة ؟؟
دي هاتبقي حكاية جامدة أوي
ههههههههههههه
لأ بجد حاجه جامده أوي يا لماضه
فعلا لماضه يعني بجد
تحياتي يا لمضة
وتحياتي للأخوة عسقول وسوووو
وماما نظمية
Lyssandra
البوست هايل يا لماضتى بس بقولك ايه انا عايزة طبق فول متوصى عليه من عسقول
ايه الامثال الجامده دي...بوست هايل وعلي فكره أسلوبك بيفكرني بـ حد عزيز عليا...
Go ahead,with my best wishes.3omda
ههههههههههههههههههههه
بجد موتيني من الضحك ايه يابنتي انتي فظيعه
كل سنه وانتي طيبه
بجد بوست تحفففففة
الكوميديا عليت مووووووت
انتوا التلاته بصراحه فظاع
وماما نظمية دي خرافة
جامدة بجد
اموت واعرف مين فيكو اللي بيكتبها
ومبسوطة قوي ان سوووو دخل في الموضوع
كده الخيمة هتولع
قصدي اليوميات يعني
بس بجد برافو عليكو
وعسقول بدل ما كان كسلان
سوووو هيبوظه ويخليه فسدان
وانتي ياحرام يا بنتي لوحدك معاهم
اتلامضي شوية ووريهم
عايزين دم
:)
واضح انكم كلكم طالعين لأبوكم
وعلى رأى المثل
سألوا العيال مش طالعين
لأمكم نظيمة ليه؟
ردوا وقالوا
وهنطلعلها ليه؟
طب انا كنت عايزة اعرف
الست الرقاصة عملت ايه؟
ياريت لما سووو وعسقول
يدخلوا جوة الاوضة
ويحكوا مع بعض يبقوا يعلوا صوتهم شوية علشان اسمع
كل سنة وانتوا طيبين
اختكم خيخة
ههههههههههههههه
ده طلعتي مش انتي بس يالماضه ..
بجد ماشاء الله عليكي
اسلوبك تحفة كالعادة ..
وبتخليني ابتسم حتى لو متدايقة ..
كل حبي ,,
وكل سنه وانتي طيبه ..
دكتور عمرو فاروق
الله يخليك يا باشا عشان تعرف بس الجمايل
,,,,,,,,,,,,,,,,,,,,,,,,
رورو
يابنتي دول 10 جنييييييييييييه
حد لاقي الزمن ده
قال على راي المثل ال10 جنيه الحمرا تنفع اليومين دول
,,,,,,,,,,,,,,,,,,,,,,
ابو العساقيل
الصراحه الجماهير كلها تطالب برفع غطاء الخيمه الله ينور عليك كمان يا باشا
,,,,,,,,,,,,,,,,,,,,,,
ايناس نهر الحب
الفايبريشن ده نسخة نوكيا الجديد عيب عليكي يا نوسه لما تشككي في سوو كده
,,,,,,,,,,,,,,,,,,,,,,
سوووووووو
صديقي من ايام الديزة
ابعد عنه يا عسقول ياما تاخدوني معاكم الخيمه
والا هعيط وافضحكم
,,,,,,,,,,,,,,,,,,,,,,,,
ايمن بدر
الله عليك بجد قدرت تفهمنا الحمد لله ان الرساله بتوصل دي حاجه تفرح ويارب قدرنا
,,,,,,,,,,,,,,,,,,,,,,,
ابو العساقيل
بلاها سوسو خد نادية
,,,,,,,,,,,,,,,,,,,,,,,,,
ليساندرا
الله يخليكي يا جميل شكل المدونة هتنفجر بينا ههههه
,,,,,,,,,,,,,,,,,,,,,
شفقه هانم واحسان بيه
طبق فوق من عسقول
ههههههههههه ملقتيش غيره اكيد هتاخدي الطبق فاضي بقى بعد ما يمسحه
,,,,,,,,,,,,,,,,,,,,,,
عمدة
الامثال دي افتكاسة سووو
ربنا يكرمك الحمد لله انها عجبتك
,,,,,,,,,,,,,,,,,,,,,,,
كيارا
كيارا هنا يا مرحبا يا مرحبا
ايه يابنتي مستنياكي من زمان
الحمد لله ان اليوميات عجبتك ربنا يسعدك
,,,,,,,,,,,,,,,,,,,,,,
او جي جي
ههههههه انا قلت كده برضه يبعدوا عن بعض او ياخدوني معاهم
,,,,,,,,,,,,,,,,,,,,,,
خيخه
الله عليكي يا خوخه ههههههه
شكل المدونة هتولع بينا احنا التلاته
,,,,,,,,,,,,,,,,,,,,,,,,,و
ميرام
ربنا يخليكي يا جميله ويسعدك دايما يارب
مبسوطه قوي بكلامك ده
السلام عليكم
بجد يا لماضة مدونة تحفة
ودمك خفيف جداًوإسلوبك في الكتابه رائع ومصري قوي
نسأل الله أن تخرج الأمة هذا العام من رمضان بنية جادة للتغيير , أسلوبك جميل وياليته بالفصحي فهي من تعاليم الإسلام.
بسم لاله ماشاء الله
اسلوبك تحفه
اعتبريني زائر دائم لبلوجك من النهارده
باذن الله طبعا
ليكوريكا
جميلة قوي يا لماضة
:)
قريت اليوميات كلها لحد دلوقتي و عجبتني جداً
و كل ما اخش هقرأ حتة
سلامي لعسقول و لماضة و ماما نظمية
كل سنة و انت طيبة
السلام عليكم يا دكتورة
هههههههههههههههههههههههههههههه
وربنا يكرمك انت وعسقووووووووول وسوووووو على وجبة الضحك الدسمة دى اللى انتوا شكلكوا كدهة محضرينها مخصوص علشتن رمضان
دمتم لنا بخير وسلام
ههههههههههههههههههه
بجد بوست فظيع شنيع مريع
أنتى أول حاجة أتكلمتى عن الخيم الرمضانية بأسلوب فكاهى بس للآسف أنا مش فاهمة إزاى الخيم دى بيكون ليها موقع من الإعراب أساسا...حسبى الله ونعم الوكيل فى اللى عملها ....أما الفول ده فهو الأساس الواحد ميستمخش إلا لما يضربلوا طبق فول كدة مدمس
ياااااااااااه أنا جعت و أحنا لسة الساعة 7 الصبح :(
ههههههههههههههههههههه
انا مش باكل فول خالص بقى
و مش بحبه خالص خالص مالص
حلوه اوى
السلام عليكم ...
البوست ده رائع
أتمنى لكى التوفيق
وتقبلى مرورى.
جميل جدا البوست دة وربنا يوفقك وتقبلى مرورى وشكرا كتييييييير
كل ما ادخل عشان اعلق تحصل حاجه وما اعرفش اعلق وانا اللي اتعلق
ههههههه
الله يكرمك يا دكترة شقه فول من عند الشيخ بتاع العربيه الله يكرمكوا
ولا استني استني خليها شقتين
اصل باحب الوسع
:)
كل سنة وانتو طيبين
شيشة في الصحور يا مفتريين ؟
لماضة انا بلاك جوست وعملت مدونة كدة ممكن تخوشييها وتقولى اية رايك
نورتى المدونة ونورينى على طول
بوست هايل يا دكتورة
بس صحيح سو وعرفناه والعسقلانى ومحدش تايه عنه
مين بقه ماما نظمية صاحبة الأمثال الشعبية
هههههههههههه
ايه الدم الخفيف ده يا لماضه بجد انا مش قادره أمسك نفسى
أسلوبك لحد الوقتى محدش يقدر ينافسك فيه والله
كل عام وأنتى بخير ورمضان كريم عليكى وعلى عسقول وسووو
مروة هانم انا حطيت الصورة
خشى شوفيها اول متصحى
انتى شكلك نومك طويل اوى عموما انا اخضر بس مش باستك
مركز ضحايا لحقوق الانسان بالاسكندرية يهيب بكل الناشطين والاعلاميين والصحفيين ولجان حقوق الانسان للمشاركة فى المؤتمر الصحفى الحاشد من وراء اغلاق مدرسة الجزيرة بالاسكندرية جريمة تشريد الف تلميذ بالاسكندرية باغلاق مدرستهم فى اول ايام الدراسة وذلك يوم الجمعة الموافق 19/9/2008 فى تمام الساعة التاسعة مساءا بنادى المحامين - كورنيش جليم - الاسكندرية
لااااااااااااااااا
دانتى بتفتحى النت كل اسبوع مرة مانتى لو منورتنيش هقتل نفسى
كل سنة وانت طيبة يا لماضة
على فكرة الفول دلوقتى بئا اكل الطبقة فوق المتوسطة
انا روحت مع اختى وجوزها واتسحرنا فى الجحش اللى فى السيدة زينب
اكلنا فول وطعمية وسلطة وزبادى
عادى يعنى مش مدين خوانة
وخير اللهم اجعله خير لقينا الحساب 85 جنيه
ليه معرفش
يلا
كل سنة وانتو طيبين
ههههههههههههه
بوست رائع ، حرام عليكي يا شيخة ،كنت ح أفطس.
ماما نظيمة بأمثالها الغريبة فكرتني بأم زمبوء في كاريكاتير الدستور .
دمت مبدعة ومعلية ضحكتنا وراميانا علي ظهورنا ومفطسانا
كل سنة وحضرتك طيبة
رمضان كريم
كل سنة وانتى طيبة لماضة والى الامام دائما ياريت تنورينى فى المدونة
ههههههههههههه
اه اتلامض معاكى وماله
ايه يبنتى العسل ده كله
النمل هيتلم كده
نفسى اعرف ايه كل الامثال بتيجى منين
ال وعلى رأى المثل عامله مدونه جديده وعايزاكى تدخليها
ان كنت ممن يتذوقون الشعر العامى والزجل ، ارجو زيارة مدونتى والتفضل بالنقد والتعليق ، فالنقد كالنصح ، والدال على الخير كفاعله
كلنا نقدس مصر ، ولكن اليس من حقنا ان نغضب اذا ما انحرف المسار
والله إنتي سكر يا لماضة
بجد أنا مبسوطة ب المدونة اللطيفة جدا دي
إنتي بجد تستاهلي التلفزيون
المرة الجاية في العاشرة مساء بقى إن شاء الله
و مش عايزاكي تقولي اسمي ولا حاجة يعني
:D
ابقي بس علميني حبة لمضنة
حاكم الدنيا ملطشة معايا شوية
تحياتي
الله على الجمال
بجد تسلم اديكوا
بس عايز ارعف رأيكم
http://www.lmada.com
http://www.lmada.com/vb
Post a Comment