Saturday 8 November 2008

برقية تهنئة للسيد باراك أوباما


 
بعد أن حقق مرشح الحزب الديمقراطي باراك أوباما انتصارا ساحقا ماحقا وحتما سيؤتي ثماره لاحقا على منافسه اللدود جون ماكين .. في سابقة من نوعها .. ليس فقط مجرد فوزه كأول رئيس أسود .. يدخل البيت الأبيض كالفارس الهمام عنترة بن شداد ليكون صاحب أول طلعه جوية – لا دي مش بتاعته – انما فوزه بنسبة تعدت 90% كمرشح للحزب الوطني الديموقراطي  والتي قلما تحدث لمرشح يتبع هذا الحزب وأهو الريس الأسود ينفع في البيت الأبيض !!
ولهذا قد أوجب على فخامة الرَّيسة سمو الأميرة لماضة عاهلة مدونة لماضة .. بضرورة شد مكتوب سياسي قصير- بمعنى آخر برقية تهنئة - لمعالي الرئيس السيناتور السيد باراك أوباما .. معربة فيها عن بالغ سعادتها بفوز سيادته .. والدعوة له بإستمرار جلوسه على كرسي الرئاسة ما تبقى له من العمر المديد بإذن الله تعالى  .. متمنيتاً له دوام الصحة والعافيه .. وربنا يباركله في بناته قادريا كريم – إحنا ولايا برضه –
وقعد عبرت الشيخة لماضة بأسمها وأسم شعب المدونة المبجل .. عن بالغ التهاني الودية على الثقة التي أولاه إياها شعب الولايات المتحدة الأمريكية الصديق ، راجياً لفخامته التوفيق الدائم في مسئولياته وحمله الثقيل
وقد أعربت عن سعادتها بإطلاق ما يقرب من 14 صاروخا مسيلا للدموع .. وانطلاق موكب مكون من 12 موتوسيكل و30 سيارة ليموزين تحمل لافتة هيئة وطنية .. وإغلاق جميع الطرق المؤديه لوسط البلد .. إحتفالا وتكريما بهذا الفوز المبهر!!
ودعت الانسة الفاضله لماضة .. المتحدث الرسمي بأسم المدونة .. الي ضرورة إستقرار الوضع في الشرق الأوسط .. ودفع عجلة السلام  98 .. وضرورة تزويدها ببعض المضخات .. تطلعا لتحقيق توازن واستقرار في منطقة البحر الأوسط .
وقد شددت في برقيتها أيضا على تعزيز التعاون بين البلد والمدونة .. بما يكفل القضاء على الأرهاب التعليمي .. والتطرف الديني .. و التحرش المرضي .. ويضمن بروز نظام عالمي جديد متعدد الاطراف .. واكثر توازنا وأمناً وسلاما .
وأكدت الملكة لماضة الرابعة والعشرون بعد المائة .. على التزامها بتنفيذ قرارت مؤتمر الأتوبيس .. والتعهد بفض أي منازعات .. وسرعة الاستجابه لأي اختناقات بداخله  .. والتعامل معها بالحزام والشبشب المطلوب عفوا الحزم والشكل المطلوب .
وأقرت خلو مدونتها من أية أسلحة نووية .. قد تهدد دفع عجلة السلام .. حيث انها تقوم فقط بأستخدام " الجاز" في سيرها .. والذي ترجو من سيادتكم النظر في ضرورة خفض سعر " الكوز الواحد " بما يحفظ  المخزون الدولي .. ولتتمكن من السياده الكامله لمدونتها بنفسها .. دون تكليف لجيشكم الباسل بإستلام مثل هذه المهام الضئيلة .
كما تضمنت البرقية التي قد بعثت بها جلالة الملكة .. طلب بسرعة إرسال عدد لا بأس به من " طفايات الحريق "  لتهدئة الأسعار – أقصد الاوضاع - وأيضا حفظا لأمن وسلامة المدونة من بطش الماس الكهربي الغاشم .
في النهاية نرجو من سيادتكم كدولة عظمى التكرم بزيادة حصتنا من القمح الأمريكي الفاخر .. طمعا في سد أفواه وأرانب كثير من المساكين من شعبي الفقير البائس .. لزيادة حصة الفرد الواحد من ربع جرام قمح الى ربع وحبتان فقط لا غير !!
 


88 comments:

Yasser Hussein said...

أول تعليق
مش أول طلعة ... كاريكاتيرية
الله ينور يا دكتره
وتحية كبيرة للسيد باراك حسين اوباما
وربنا يهديه كده ومينفسنش مع العرب زي اللي قبله واللي قبل اللي قبله
واللي قبل اللي قبل اللي قبله
إلى ما لا نهاية

خالص تحياتي

wanna b a physician said...

والله احنا بنهنيه انهارده يا عالم بكرة هيعمل ايه وهنقوله ايه
وطبعا طبعا نطلب من تحقيقه كل رغبات وطلباتك ويتكرم بذلك

تحيه طيبة وختام

Unknown said...

سعيد جداً والله بفوز أوباما
يااه مستنيينه من زمان أوى
ربنا كريم .. ما ضاقت الا ما فرجت
مبروك للشعب العربى والاسلامى كله
... وبالهنا والشفا
وربنا يستر
ويجعله عامر
تحياتى يادكتورة

همس الاحباب said...

هههههههههههههه
هههههههههه
الف مبروك وعقبال البكارى
ده مش فرح ما يكونش طهور طيب
اوووووه افتكرت
حمدلله على سلامة الوصول يا ريس
مكتوبالك تقعد على الكرسى الابيض فى البيت الابيض
وتورينا ايام سوده اسود من شعر راسك زى اللى قبلك
ومتشكرين يا سيادة الملكة الاميرة الانسة لماضة
على تلك التهنئة فيكى الواجب برده
والنبى ما تنسيش حصتى من القمح
وانا اشوفك بربع حباية برده
بجد تسلم ايديكى يا دكترة

bastokka طهقانة said...

قمح اية يا اختي اطلب كرواسون جاهز لسه حنخبز



اوروفوار

Lyssandra said...

والله يا لماضه

أنا شايفه الناس كتير جدا فرحانه باكتساحه وفوزه منقطع النظير

بس انا قرأت كلمتين ومش مرتاحه علي
ويكيبيديا

علي العموم كل شئ هايبان مع الوقت

----------

تحياتي يا قمرايه

Lyssandra

اهو ده عيبه said...

ههههههههههه
بجد دمك زى العسل يا لماضه
انتى بتهنيه ولا بتعملى اعلان عن نفسك
بس بجد موضوع لذيذ
وياريت تقراى البوست الاخير عندى لان له علاقه باوباما برضه
تحياتى لكى

mohamed ghalia said...

هههههههههههههه
لا ايه التواضع ده يا لماضه
معقول سمو الأميرة لماضة تبعت تهنئة لأوباما
يطلع ايه يعنى ايه يعنى رئيس امريكا
لازم تقللى من التواضع ده بصراحة
تحياتى على الأسلوب الرائع
دمتى بود

رئيس جمهوريه نفسى said...

واللة مش عارف حاسس انى الشعب العربي عموما حيشوف ايام سودة على يد اول رئيس اسود لامريكا ربنا يستر وميخفضش القمح مش يزودة

رئيس جمهوريه نفسى said...

لماضة
هى دكتورة مروة المعداوى مختفية فيبن وياريت لو قابلتيها بلغيها سلامى

*الطالبة عفو الله *زوزو said...

واو

بجد يا حضرة الاميرة و لا الملكة منا تهت وسط الكلام المهم انتي يا لماضة
كنت بقول ايه
اه كنت بقلك بجد رسالة هايلة
و يا رب بقى تجيب نتيجة
بجد طريقة كتابتك روعة
كلام عميق وليه دلالات

سلمت ايدك يا قمر

سلام

اقصوصه said...

مبرووك

مبرووك لاوباما

ومالت علينا احنا!

هديـــل الـروح said...

السلام عليكم ورحمه الله وبركاته

ازيك يا لماضه
وحشتينى جدا جدا
أسفه انى متابعتش موضوعاتك من زمان سامحينى على التقصير
والف مبارك للسيد أوباما
بس يا ريت يسمعك يا مروه
ابقى ابعتيله لينك المدونه
ههههههه
ربنا يبارلك لك فى مدونتك وموضوعاتك كمان وكمان
تحياتى يا جميل
السلام عليكم

كلام حسام said...

ايه ده
معقول نسيتي تطلبي ان محلات كنتاكي لازم تنتشر في النجوع والقري وكام محل لمطاريد الجبل

ذو النون المصري said...

والله سبقتيني بالبرقيه
اعتقد انه زيه زي غيره
و مش بعيد يبقي رئيس لمره واحده فقط
و الله اعلم جايز ميكملهاش
قلبي حاسس انه هيحصل كينيدي

يا مراكبي said...

وأنا بصفتي الرئيس الأمريكي القادم بعد الحاج عبده أوباما ما يخلع لا أرحب بالتعامل أو التعاون بين الولايات المتحدة الأمريكية ومدونتكم اللمضة لأننا نحب من يستمع لكلامنا دون لماضه أو معارضة

وأحب أسمع سلام بريتني سبيرز

blue-wave said...

ياعينى عليكى يا لماضه:)))
كنتى طيبه والله
يلا كلنا لها:)))

ايام العمر said...

ههههههههههههههههه

سعدت بالمرور بس اانا عايز اطلب طلب

من سيادة الملكة لماضة الرابعة والعشرون بعد المائة

كنت اتمنى ان سيادتك توافقى على الطلب المقدم من شخصى المتواضع لكم
بالجوء السياسى فى مدونتكم

قصدى مملكتكم

وشكرا

صبرني يارب said...

ههههههههههههههههههه
حلوه اوي يا لماضه عسل انتى والله

Geo Amr said...

هههههههههههههههه البوست رائع جدااااااا اسلوبك فى كتابته بس مش عايزين نكون مبالغين قوى فى فرحة انى اوباما اصبح رئيسا ونصبر لحد ما نشوف ردود افعاله اتجاه القضايا بس اهم درس نتعلمه من فوزة هو التحدى والارادة القوية

عصر الجنون said...

عجباكى الطله الاوباميه ... خير ان شاء الله

لكن انا مش متفائله

شهرزاد said...

هههه سكر يا لماضة
أوباما بجد بقى ظاهرة عالمية أكثر منه رئيس لدولة كبرى
ربنا يستر

صباح الصباح said...

وفقنا اللة واياكم لما فية صالح الوطن

it is typically elly baly balek

ههههههههههههههههههههههههههههههه

و القادم....أجمل said...

ههههههههههههههه
هههههههههههههههههههه


تحفةةةةة يا بنتي
مبرووووووك يا عم اوباما

لماضة بذات نفسيها
شديتلك مكتوببب

:D


متنسيش تطمنينا عليكي
:|

kochia said...

اجمل برقية قريتها في حياتي
جامعة مانعة

تحياتي

صفا سارة said...

والله انتى زى العسل ومتابعة مدونتك دايما حلوة اوى البرقية دى ومره اميرة ومرة ملكة هو ده الكلام اصل يفكر انك حاجة بسيطة ولا حاجة فى انتظار رد البرقية ده بئه

Asmaa mahaba said...

اتمنى ميطلعش نقبنا على شونه يا دكتور لان فى شك بداخلى كبير جداا يخبرنى بان القادم ليس افضل من الماضى
وبعدين يا دكتوره بصى لينا مسلمين فى مسلمين وعرب فى عرب وبنقطع بعضينا فما بالك ناس اغراضهم كلها تتمثل فى السيطره على العرب واموالهم دا اذا كان فى اموال
عارفه انا مؤمنه بحكمه بتقول
ما حك جلدى مثل ظفرى
يعنى لا معونه حتنفعنا ولا مين اوباما حينصرنا

Hannoda said...

بعد تقرير أكيد بخفة دم فخامة سمو الامير لماضة عاهلة المدونة
وبعد التصريحات المشددة باعجابنا الشديد نحن أفراد شعب المدونة بكل اللماضة التي تتمتع بيها سمو الامارة.. قصدي الاميرة

بعد كل ده

يسعدني جدا انتقال مقر أحلامنا و أمنياتنا وتطلعنا لمستقبل أفضل إلى موقعه الجديد الولايات المتحدة الامريكية بعد أن تبين ان الوطن آيل للسقوط

تحياتي

Dr. Ibrahim said...

برقية تهنئة ...للرئيس أوباما

وبرقية تهنئة للشعب الذى يختار رئيسه بحريه..
وبرقية تعزية للشارع العربى الذى يظل يحلم بأن هناك من يأتى من قلب أمريكا ومن داخل البيت الأبيض ليحررهم


وعجبى...

د/هيما

محمد إبراهيم محروس said...

لذيذة يا دكتورة
وبعدين ايه موضوع ربع جرام قمح
أنتي طالبة القمح بودرة
كدنا هندمن وتبقى مصيبة والواحد يمشي يشم في كيس قمح مطحون والبوليس يقبض عليه بتهمة حيازة قمح
فل عليكي
خالص تحياتي

مسدس صغير said...

مش اوباما طلع مسلم وبيضحك على امريكا .. مش مصدقانى طب هوه كمان طلع اخوانجى واخوانجى كبير دا حتى اسم ابوه حسين واسمه الحقيقى ابو محمد وبيدلعوه ابو ما ...

وميض ابتسامة said...

سمو الاميرة لماضة
والله انا شايف انك توفرى على نفسك عناء التهانى ..لانى اساسا معنديش ثقة فى أى من هؤلاء الامريكان .. ومش يعنى عشان الراجل المفترى بوش مشى وجاء خلفه ابن حسين فهذا معناه ان يزيدك حبتين قمح بحالهم على ماهو مقنن لك

لا ده سموك بتحلمى احلام غريبة جدا تكاد تقترب من احلام العصافير .. دعينا نعيش الواقع وبناقص الحبتين دول

تحياتى

بس خلاص ... said...

صاحبة المقام الرفيع والكلام البديع ...الشيخة الاميرة العاهلة ساكنة البيت الابيض فى مملكة لماضة العشوائية ..
ايه الطلعة الامريكانى الجامده دى
طبعا رسالتك لشيخ قبيلة الامريكان الهمجية والتى تدعى الحرية الانسانيه كلام ملوك .. مالناش فيه احنا الصعاليك ..ز ولكن باقولك تصريحاتك وتنويهاتك واحتمالاتك ونداءاتك انهم هينصفونا وبالخير يدونا ... بالتركى يوك ...يوك

صيدلانيه طالعه نازله said...

الف مبروك ليه اولا و لينا ثانيا فى حاله اثباته لحسن النوايا و بصفتك التحدثه الرسميه المفروض تقدمى له دعوه رسميه ازياره مملكه المدونه العظيمه دى من اهم بروتوكولات الملوك و اوعدك ان شعب المدونات يخرج يستقبله و يرحب بيه ترحيب الرؤساء
و نرفع راسك قدامه

mohamed ghalia said...

أختى العزيزة
إجاباتك على الأسئلة رائعة
حقيقى تشرفت بزيارتك للمدونة وبقبولك للتاج
دمتى بكل الود وفى سعادة

هاني جابر said...

والله ياست الدكتورة لماضة
انا بحييك علي البوست الرائع وانا اول مرة ازور مدونتك وليا الشرف في كده
وربنا يستر بعد فوز اوباما ايه الي حيحصل الله اعلم

شفـقــة و إحســــان said...

لماضة وحشتينا اوى فينك؟

Unknown said...

ياتري يالماضة ياوختي
لما التهنئة وصلتلة

كان رد فعلة اية

والله متشوقة اعرف الاخبار

وفعلا الدقيق الفاخر

هو الحل


تفتكري بكرة احسن مع باراك

كنت نفسي ف دة
بس مش متفائلة خير منة
والله اعلم


سلاممممممممممم

رئـــــيسـة حزب الأحلام said...

اية يافخامة الريس لماضة
اية كل القرارات والحاجات الجامدة دى
بجد تنفعى رئيسة الجمهورية

تحيانى لكى ياعسل

أنا said...

أهو على الأقل بيتغير لهم الرئيس مش اللى لازق بغرى فى الكرسى عقبالنا بس مايكونش اللى فى بالى.................أنتو فاهمين مين طبعا؟ وهل يخفى القمر

قلم رصاص said...

ههههههههههههههههه

مبروك ياريس
وربنا يستر وتطلع جدع والنبي

ههههههههههههههههه

احنا زهقنا من قلالاة الزمة والضمير

شكرا يادكتورة مروة

تقبلي تحياتي

Unknown said...

انا جيت انا جيت

ههههههههههه
نشكركم يا شعبي الحبيب
ربنا يستر ومرحش في داهيه

انا بطمنكم بس اني لسه عايشه وبخير وفي بيتنا لحد دلوقتي بس مش هقول العنوان طبعا عشان ميعرفهوش ويجوا يجيبوني من قفايا

عندي بس شوية دوشه في الشغل هخلص وجايااااااالكم
جيالك يا طاهره

د.دغيدى said...

رد واجب صرح فخامة وسيادة الرئيس باراك
عن شكره للملكة لماضة
وبيطمنها وياكد لهااننى ساظل على العهد والوعد للحفاظ على الدولة الاسر....قصدى الفلسطينية
اما بالنسبة للعرب والمسلمين فحوريهم ايام سو....ققصدى سعادة وهنا
هو انا ليا هم ولا شغلانة غيرهم

أحمد سعيد بسيوني said...

رسالة مؤثره

قاربت على البكاء

دمتم

Hannoda said...

طيب ما تطوليش برضه

مستنيينك
:)

t3ban said...

اوباما اوباما اوباما المتراس عبود ابو العلاااااااااااااااااااااااا

كائن بشرى said...

ما شاء الله

لو تسمحيلى يا دكتوره لماضه
انا عامل مدونه جديده

أسمها الدكتره مش هز كتاف

وحطيط فيها مدونتك فى المدونات الصديقه

لو تتكرمى وتطلى طله علينا
نشوف قلمك هناك
ولو مره كل شهر
احنا مش طماعين

ماء تشرين said...

ياله مبروك عليهم عقبالنا يارب يمسكنا واحد اسود ازرق رصاصي متفرقش بس انبى ياسمو الاميره الدكتورة الانسه المبجله تقولى لسعادة فخامة الرئيس ميقطعش الجوابات
بوست جامد جدا
سلام

((..همـ قلب واحد يجمعنا ـسات..)) said...

المدونة الفاضله : :
..نتمني لكِ مزيدا من التقدم والنجاح
وان تكون مدونتك معبرة عن صوتك في كل مكـــــان
.. .. .. ... ..
سعيا منا بأن نجعل من علاقتنا روحاً اكثر حباً وتواصلاً
وبأن نجعل من صوتنا قوة أكثر انتشـــاراً وتأثيــراً .. ..
وبأن نرتقي بفكرنا ...وثقافتنا ...وعلمنا ...وخلقنا ..
.. .. .. ... .. .. ..
ندعوكي للمشاركة معنا في رابطه همســات . . .
...أول رابطه عامة تختص بالفتيات المدونات .....
شاركينا الانطلاقه ..وكوني احدي اعضاء همسات وشاركينا
اجتماعنا الاول ...لتكون همسات .. قلب واحد يجمعنا
فمعاً . . . . . نلتقي .. لنرتقي

تحياتنا ::
(( فريق العمل بهمسات ))

dina seliman said...

لماضااااااا باشااااااااااا
تضامنا معاكى
احب ابلغله فرحه الشعب المصرى
اللى وقع الدويقه وحرق المسرح والشورى
احتفالا بقدوووومه

وربنا يستررررررررررررر

maha zein said...

يا جامد يا ريسنا يا غالى
يا مدلعنا ومهشتكنا ومبشتكنا
تسلم يا ريس
تسلملنا
ونبوس ايدك عوزين بيبسي كانز مع القمح نبل ريقنا

بوست شقلبزنات علي الاخر
تسلم ايدك
مكنتيش تجيبي سيرتي كده معاكي باى حاجة
مكنش العشم

غمض عينيك said...

الانسة الفاضلة لماضة
من واشنطن دي سي ابعث لكم بخالص الشكر والتقدير على رسالتكم القيمة والتي اثلجت صدورنا
واذ ابعث بهذا الشكر فاني اعبر عن تقديرنا لدوركم الرئيسى في عالم التدوين وفي فض نزاع القضية التدوينة واتمنى دوام التعاون بين الولايات المتحدة والمدونة لضمان حياة سعيدة لكل الشعوب

باراك اوباما
عنه
محمد سمير ( صاحبه)ء

Anonymous said...

زي ما امريكا اتغلبت على عقدة السود و تخلصت من العنصرية

ياريت بقى احنا كمان نتغلب على العنصرية اللي عندنا تجاه الشعب المصري

Alkomi said...

بالنسبة لازمة الاتوبيس ابو اجرة موحدة مش هيحلهالنا ولا ايه يا لماضة

عُـــقـــد لُــــــــولِــــى said...

ههههههههههههههههههههههه

هههههههههه
بجد ظريفة اوى والله

بس انتوا مستنين ايه من اوباما

هناخد زى ما خدنا من اللى قبله

متعجلين ليه

انا متاكده ان اول حاجه هيعملها
هيامر بالهجوم علينا
علشان يريحنا من الدنيا وبلاويها
واهو بالمرة يوفر المعونه والقمح

مصطفي النجار said...

مبروك
وربنا يستر

moory-mero said...

السلام عليكم و رحمة الله و بركاته
والله يا لماضه انتي عثل وثكر كمان موش جيت عندك من زمان ثوري بقى
بموت في لماضتك بجد
بث بقولك ايه ابقي قوليلي وانتي بتحييه بتضربي الصورايخ المسيلة للدموع فين عثان اثتخبى بعيد ثويه

وثوفي بقى اوباما ناوي على ايه هو كمان ربنا يستر

في رعاية الله

marmar said...

بوست جمييييييل جدا يا لمضه انتي ويارب يهدي حج باراك ده محدش عارف هينيل ايه ياريت تنوريني في البلوج بتاعي انا اسمي ريم
http://showmeursmile.blogspot.com/

Mahdi Mahdi said...

يلزمنى رايك فكن ناصحا ولا ملامة، فهدفى افهام المرضى والموتورين ممن يتطاول او يخادع بدس السم فى العسل تحت دعوى الدفاع عن الاسلام ، ان العين بالعين والسن بالسن والبادى اظلم ، وجنت على نفسها براكش

arsenalwy said...

اهم حاجه يالماضه خلو مدونتك من اى اسلحة نووية

انا كده ادخلها وانا مطمئن

Ahmad Hegab said...

قلتى فصدقتى

DR.HAMAS said...

ايه العبقرية دى يا سمو الأميرة

بجد ربنا يبارك فى عقلك

لكن لا نعول كثيرا على أوباما

الله أعلم هيعمل ايه

..........




د.حماس

الراقـــص مع الذئـــــاب said...

عليكم
جامدة يا لماضة
حقيقي جامدة خالص

حاجــ عيال ــات said...

السلام عليكم
هو البوست دا نزل امته
انا كل يوم بدخل مش بلاقي جديد
وبعدين لو نزل النهاردة ازاي مالحقش اول تعليق
لا أنا زعلانة منك يالماضة طيب مفيش كوزات بينا اديني رنة على اي كوز فاضي من الجاز يعني انت تفضلي تملي كل حاجة جاز كده وتزعليني
طيب عامة مبروك ووحشتينا
ومبروك لأونكل أوباما ويارب يخليه لمصر قصدي للأمريكا والنبي ياختي نسيت هو مين بتاع إيه
يالا
سلام مؤقت ياجميل

هاني جابر said...

دعوة لصيام يومي الأثنين 24/11 - 1/12 والدعاء لإخواننا في غزة والتبرع بثمن وجبة الافطار لأهالينا في غزة
والي عايز يشارك يسجل معانا في حملتنا بوضع البانر في مدونته والمشاركة في الجروب ويدعو الناس كلها للمشاركة معانا
هدفنا 1.000.000 مسلم يدعو ويتبرع لاخواننا الرقم سهل ونقدر نحققه بس عايز تعاون وجدية
والي ميقدرش يصوم يوم يصوم التاني بس لازم نصوم من اجل اخواننا في غزة

البانر علي المدونة


www.bahebalhorea.blogspot.com


http://www.facebook.com/group.php?gid=37720052122

البت المشمشية حلوة بس شقية said...

الله ينور عليكى يا لماضة هانم ياريت تنورى مدونتى المتواضعه

Unknown said...

السلام عليكم

مش عارف دى اول زيارة ولا التانيه

على العموم انا سعيد بيها جدا

وبينى وبينك الرؤساء كلهم شبه بعضهم

مش حتفرق واحد ضيع البلد وواحد جاى يضيعها بس بطريقه جديده شويه

وبعدين احنا عاوزين ايه غير ان امريكا تبعد عننا

على العموم اهو احسن من غيرو بس يحقق اللى قال عليه

تحياتى

Muhammad Mammdouh said...

لماضة لماضة يعنى
الله ينور يادكتور انما الراجل ده اسمو خليط بين الديانات كده حاجة غريبة فعلا ربنا يستر من الى جاى وخدنا اية من الابيض لما هناخد من الاسود وربنا يخلى ام اربعة واربعين اصل سمو هو الرابع واربعين يبارك لباراك والله اعلم بلى فى ضميرى

بنت مصرية said...

طالبه دقيق بس امال هنجيب الغموس منين؟

Jana said...

نسيتى تذكرى محاولات رأب الصدع
ههههههههه

تصدقى مكنتش اعرف انك اسكندرانية!!!!
كده عرفت لماضتك جاية منين

تحياتى لماضة مع واحد رز بلبن بالايس كريم من وفيق
:)

daktara said...

لا شكر علي واجب يا سمو الشيخة
اوعدك سوف انظر لكم بعين الاعتبار

انظر حولك
باراك اوباما

daktara said...

البوست اللي فات رائع
عقبال باقي السيندرومات

انظر حولك
د. خالد عزب

مواطن مصري said...

ههههههههههههههههههههه
جمدة اخر حاجة

Unknown said...

سلام الله عليكم ورحمته وبركاته
تختلف الاشكال والالوان والاسماء
وكلهم واحد
لانه دولة مؤسسات وليست اشخاص
نسأل الله ان يهلكهم ويسقط دولة الظلم الاكبر في هذا العالم
وان يعز الاسلام والمسلمين
وجزاكم الله كل خير

هديـــل الـروح said...

انتى فين يا لماضه ..وحشتينا ووحشتنا موضوعاتك

منه مرتجى - عازفة الأوتار said...

ههههههه
يا بختك يا اوباما
لماضة حتتحالف معاك

انا مستنية نصيبى من القمح
و افواهى كلها مفتوحة على مصرعيها
و ذئاب بطنى تعوى و خلفية من النحيب المتواصل تناشد عطف السيد اوباما
D-:

بجد انتى زى العسل

د. إيمان مكاوي said...

فرقعة الإعلام المصري ومحاولة إلصاق التهم بأناس ابرياء لتضخيم الامور في قضية الطبيبين المصريين في السعوديه....
وما علاقتهم بمستشفى السلام بجده ؟
تدوينه جديده في يوميات أم البنين

احساس لسه حى said...

عزيزتى

انا خايف يكون اوباما ده

اكبر حاذوق امريكى للوطن العربى

ما اصل بدل عرف يوصل للمنصب ده وهواسود وباصوله دى

يبقا لازم ادم تناوزلات كتيرة

واصحاب المصالح عارفيين انه مستعد لتقديم المزيد ليهم

وبكرة الخبر يبقى ببلاش

تحياتى

سلام

Unknown said...

من أوباما
أحمد مطر

مِن أوباما
لِجَميعِ الأعرابِ شُعوباً أو حُكّاما

قَرْعُ طَناجِرِكُمْ في بابي
أرهَقَني وَأطارَ صَوابي


افعَل هذا يا أوباما
اترُك هذا يا أوباما
أمطِرْنا بَرْداً وسَلاما
يا أوباما
وَفِّرْ للِعُريانِ حِزاما
خَصِّصْ للِطّاسَةِ حَمّاما
فَصِّلْ للِنَملَةِ بيجاما
يا أوباما

قَرقَعَة تَعلِكُ أحلاماً
وَتَقيء صَداها أوهَامَا
وَسُعارُ الضَّجّةِ مِن حَوْلي
لا يَخبو حتّى يتنامى
وَأنا رَجْلُ عِندي شُغْلٌ
أكثَرُ مِن وَقتِ بَطالَتكُمْ
أطوَلُ مِن حُكْمِ جَلالَتِكُمْ
فَدَعوني أُنذركُمْ بَدءاً
كَي أحظى بالعُذْر ختاما
لَستُ بِخادمِ مَن خَلَّفَكُمْ
لأُسِاطَ قُعوداً وَقياما
لَستُ أخاكُمْ حَتّى أُهْجى
إن أنَا لَمْ أصِلِ الأرحاما




لَستُ أباكُمْ حَتّى أُرجى
لأكِونَ عَلَيْكُمْ قَوّاما
وَعُروبَتُكُمْ لَمْ تَختَرْني
وَأنا ما اختَرتُ الإسلاما
فَدَعوا غَيري يَتَبَنّاكُمْ
أو ظَلُّوا أبَداً أيتاما

أنَا أُمثولَةُ شَعْبٍ يأبى
أن يَحكُمَهُ أحَدّ غَصبْا
و نِظامٍ يَحتَرِمُ الشَّعبا
وَأنا لَهُما لا غَيرِهِما
سأُقَطِّرُ قَلبي أنغاما
حَتّى لَو نَزَلَتْ أنغامي
فَوقَ مَسامِعِكُمْ.. ألغاما
فامتَثِلوا.. نُظُماً وَشُعوباً
وَاتَّخِذوا مَثَلي إلهاما




أمّا إن شِئتُمْ أن تَبقوا
في هذي الدُّنيا أنعاما
تَتَسوَّلُ أمْنَاً وَطَعاما
فَأُصارِحُكُمْ.. أنّي رَجُلُ
في كُلِّ مَحَطّاتِ حَياتي
لَمْ أُدخِلْ ضِمْنَ حِساباتي
أن أرعى، يوماً ، أغناما

اسماء said...

سلام عليكم ازيك يا لماضة
ايه مختفية فين
بقالي كتير مش ظاهرة
انا حبيت اقولك اني كتبت عن مدونتك في ملحق تيلي بيزنس اللي بيطلع كل خميس مع جرنال العالم اليوم ياريت تبقي تقريه وتقوليلي رايك
modawen5ana.blogspot.com

انت تسال والكمبيوتر يجيب said...

اهلا بك ...ننتظر تعليقاتك على ما نكتبه من بوستات فى مدونتنا ونذيع الموضوعات والتعليقات فى حلقات برنامجنا ويوجد

بعض الحلقات فى بوكس الأرشيف على اليسار يمكنك الأستماع الى اى حلقه فيها
برنامجنا يذاع يوميا صباحا تسعه وعشره على اذاعة البرنامج العام اى الأذاعه الرئيسيه لمصر عدا الجمعه ويوجد رابط فى

موقعنا تضغط عليه وتنتظر وقت الأذاعه فتسمعنا الرابط الى اليسار تحت الساعه والموقع هو
http://dear.to/cairo
لو زرته ستعرف كل شىءعنا وعن ما نفعله ...صوت وصوره
المدونه
http://netonradio.blogspot.com

السينيور said...

انتى بجد
دماااااااااااااااااغ

Hannoda said...

انتي فيييين يا لماضة و مدونتك بتنده عليكي

dr.mahmoud said...

اسعدتيني بلماضتك000 وحسستيني ان فعلا فيه روح حلوة بقت موجودة داخل جدران الكلية000الروح دي كنت مفتقدها زمان وكانت هي السبب في هروبي انا واصحابي في اوقات فراغنا وهي بالمناسبة كتيرة للكليات المجاورة000اتمني لكي تفضلي لمضة ومتخليش اي حاجة تبعدك عن لماضتك المحببة000 واتمني نكون فعلا اصدقاء00د0محمود سميرdr_mahmoudalex@hotmail.com

شفـقــة و إحســــان said...

,حشتينا يا لماضة ووحشتنا بوستاتك
الطب واخدك مننا ولا ايه

Go2LIghtGO said...

احييكم يا جماعة و احييكى يا لماضة
:)
مدونة لماضة فعلا عجبانى المدونة دى

ادعوكم لمدونتى انا

احمد عبد السلام said...

اية الخفة والجمال دى

mahmoud dighidy said...

تعليقاتك طريفة جدا بس نفسى يكون فى كلام عن مواضيع تانية غير الطب زى موضوع اوباما كده
اقصد بكل الموضوعات المطروحة على الساحة