أحمر من كده مفيش

راجعه من المستشفى الصبح بعد غياب اسبوع لا بيا ولا عليا .. ومحدش يقولي خير الف سلامه كنتي ليه في المستشفى .. اكيد مش عيانه يعني الحمد لله .. ده شغلي يا ناس بما اني للاسف اتحكم عليا اكون من ذوات الرداء الابيض الحمد لله مش الاحمر

المهم للحظ لابسه الجاكيت الاحمر بتاعي اذ لاقيت الناس كلها بتبصلي وواحد بيقول : يا فتاح يا عليم يا رزاق يا كريم ده احنا لسه عالصبح امال على الضهر هيلبسوا ايه

الصراحه شكيت في نفسي اكون نسيت الزعبوط الاحمر في دماغي ولا حاجه .. بعد الليله الكحلي الي قضيتها في المستشفى اللي كانت كلها دماء حمرا بالطبع .. وشوية لاقيت المحلات بدأت تفتح وخير اللهم اجعله خير الحياة بقى لونها احمر.. ودباديب نطت .. وقلوب حمرا بطير في الجو .. وحاجة تجيب الضغط .. بصيت في الموبايل اعرف احنا كام النهارده الاقي اليوم المعهود 14 فقراير..ده الي عامله حسابه وكنت ناوية مطلعش من بيتنا عشان مراوح صدري بتطبق عليا اليوم ده

ركبت الميكروباص .. الاقيلكم يا اخوانا واحد شايل قلب احمر يجي 6 متر في 6 متر ومكتوب عليه طبعا هابي زلانطين والبت لاطعه صورتها عليه تقولش الست هيفا في زمانها .. بصيتله بكل حسره وحقد .. وقلتله في سري يابن المحظوظه .. مكملتش لاقيت العجلة فرقعت .. والمشروع اتعطل بينا .. وطبعا اضطرينا ننزل نشوف مواصله غيرها .. وكل ما نوقف مواصله ميرضاش عشان طبعا القلب الطيب .. لحد ما جه واحد من الركاب الصعايده اخدته الجلاله وقال للولد

صعيدي يا بوي على حج صعيدي واجول الحج : عارف يا ولد لو مركبناش دلوجيت انا هاخد الجلب ده واعمله مرتبه وامدد عليه وسط الطريج ولما اصحى هجطعهولك حتت وهنتفه ريشه ريشه

طبعا مخبيش عليكم حسيت ساعتها زي ما كون تعبان وارتحت .. زي ما اكون عطشان وشربت

والحمد لله وصلت بيتنا بسلام  .. وقررت زي بقيت البشر الطبيعيه اخد دش - عيد بقى - ودي فرصه لا تعوض .. اطلع من الحمام والخوخ على خدي الاقي ماما محضرالي الترننج الاحمر .. قلت يمكن بتعوضني الحرمان اللى انا فيه .. ميضرش برضه  .. وماله احمر احمر هيحصلي ايه اكتر من كده .. واهو نار بيتنا ولا حمار الفلانتين

عملت موبايلي صامت .. وقلت مفيش مفر من الهروب الاعظم الا وهو النوم .. الواحد احسن حاجه في اليوم ده ينام لحد ما اليوم ده يعدي على خير..  واللون الاحمر ده الي قربت اكرهه يختفي عندما يغيب قرص الشمس الاحمر وترجع الحياه بمبي

صحيت و رحت اشوف حاجه اشربها ولا اكلها .. لاقيت والدتي العزيزة واقفه في المطبخ على رجل واحده وكل عيون البوتجاز الحمرا شغاله .. ولما سألتها : خير عندنا عزومه ولا ايه ؟؟

قالتلي : لا انا بعملكم بسبوسه وكنافه عشان عيد الحب

لماضة : الرحمه يارب هو ورايا ورايا

مامتي : طيب شوفي كده صينية البسبوسه وشها احمر ولا لسه

لماضة : لا ده انتوا متفقين عليا بقى انا هروح اشوف حاجه اشربها

ماما : فيه عصير فراوله في التلاجه

لماضة : ربي اني لا اسألك رد القضاء ولكني اسألك اللطف فيه فراوله فراوله اهي حاجه حمرا والسلام في اليوم الي مش عاوز يعدي على خير ده

مفيش ساعتين ببص لروحي فجأة لاقتني لاقتني كبرت فجأة .. ووشي احمر بنزهير.. وتقريبا كده جالي حساسية من عصير الفراوله .. واصر انه يطبع بوسه حمرا على خدي بحرارة الحمى

وبعد شوية دخلت المطبخ تاني اشوف ايه النظام لاقيتها بتطبخ ومجمعه كل الطماطم الحمرا اللي في التلاجه وناويه تعمل طبيخ لا مش غامق طبيخ احمــــــــــــــر من كده مفيش