Saturday 10 April 2010

أبو الليف مطرب الحمام الأول



كالعادة قاعده لا بيا ولا عليا بهرش في وداني مكان السماعة وبلعب في عيني (منخيري بقت قديمة ) هبط على اغنية انا مش خرونج انا كينج كونج بصراحة الاغنيه جت على الوجيعه خصوصا اني في نفس ذات اللحظة كنت على الفيس بؤ الي مبفتحش غيره اصلا .. لفت نظري ان الراجل صوته حلو صحيح الاغنيه مسخرة بمعنى الكلمة .. بس اجبرني اني اركز في الكلام والصوت ده طبعا بعد ما موجة الضحك عدت على خير ومجاليش امساك بعدها الحمد لله
قلت يلا بجملة التهييس الي بنسمعه كل يوم يعني هي جت على الراجل ده ما احنا بنسمع تهييس على العلاج والضرايب والسكن والاكل .. اهي حاجه تطري الي بنسمعه وخلاص .. واذ بعد ايام الاقي الراجل ده نزله شريط بصراحة مقدرتش امسك نفسي جريت نزلته كله دفعه واحده وكانت المفاجعة!!
نادر ابو الليف بصراحة دي اول مره اتكلم عن فيلم او فنان او اي اغنية بس بجد يعني الراجل ده فنان رغم الاراء المعارضة ليه انه اساء للفن على اساس ان الفن محتاج الي يسوءه اساسا ..كفايه اعلانات الافلام الي الواحد بيستخبى ويستنى البيت ينام وهو بيشوفها ما بالك بالافلام على بعضها محتاجة انك تنيم مصر كلها
طيب هاجموه ليه ؟؟
 صوته وحش ابدا والله صوته قريب من حسن الاسمر وارحم من جورج موصوف لحساسية صدر تامر حسني (فكها بالكلمات المتقاطعة )
شكله وحش طيب ده حتى احلى من شعبولا ..وكفايه ان البوستر بتاعه مفيهوش برنيطه .. رجعنا لأصلنا الخيش والبدائية الي احنا فعلا ماشيين تجاهها تاني دلوقتي
الكلمات الحقيقة مفيهاش اي ابتذال لاننا بنسمع كلمات اسوا كتيرعلى الاذن .. وبتسببلي تلوث اكتر من الي بتسببهولي السماعه كل يوم في الكشف ومحدش يقولي بوس الواوا .. ببساطه هو جاب مصطلحاتنا بس بجرعه كبيره حبتين وبخفة دم ورشاقة معهوده من ايمن بهجت قمر بجد ابدع فيها
الافكار الحمد لله اننا لاقينا حد مش سارق افكار ولا جايبلنا افكار مستهلكه زهقنا منها يعني ضمنا ان محدش هيرفع قضيه عليه ..اخيرا مطرب بدون سابقة .. الشريط ده زي ما قالوا بيلخص حياة نادر ابو الليف اللي بيعيشها كل شاب دلوقتي
واذا ترجمنا الشريط كالاتي ابو الليف كان بيحب واحده بس كانت مدمنة فيس بوك زي حالتنا قام اتخانق معاها وقالها انا مش خرونج قامت اديته بومبه واهله قاطعوه ومبقاش عنده ثقه في حد وبدأ يعتمد على نفسه وجاب تاكسي وحب يرجع عابدين بس واضح ان كان فيه ناس كتيرفي الموقف بتنفسن وندلوا معاه الندالة دي حالة عامة .. امتى نتحسن ولما رجع وقال جبت شقة ومكنش عاوز يدفع مهر كفايه على التشطيب هو التشطيب رخيص ؟ وربنا اكرمه واتجوز بطلوع الروح ربنا رزقه بولد وبقى يعلمه قبل ما ينام فيه حاجات لازم يعملها مش على روحه .. وتقريبا كلها حاجات متعلقه بالحمام مش ابن ابو الليف ؟؟ وبقى يصحى الصبح ويجري على اكل عيشه الست مراته طلعت عينه وكره بسببها كل الستات فعلا دولا مجانين
وكفايه اسمه الي كله نضافة ياريت بقيت المطربين بقى ياخدوا صابونه احنا مبنحبش نرغي
و ادينى فى الهايف وانا احبك يا ننس

39 comments:

Shimo said...

ده أنتي تحفة
أنا عاجبني مووووووووووت البلوج بتاعك
بسيط وثافب فبي نفس الوقت
شوفتي ثاقب ديه يا لماضة:)

Keep up, you'r so talented

Unknown said...

جامده ثاقب دي يا شيمو
حسيت انه فيه حاجه بتشكني
ربنا يخليكي يا جميله على كلامك ده
رفعتي معدنياتي

Anonymous said...

الراجل ماسمعتلوش غير انا موش خرونج

على فكره هو مونولوجست موش مطرب ... زيشعبولا كده ... بس هما بيتكسفوا من الكلمه دي :)

تحياتي

بنوته مصريه said...

انا كمان مسمعتش ليه غير انا مش خرونخ
بس هو فعلا كده يبقى منولوج ومش فاهمه ليه بيتكسفوا
مع ان شكوكو كان حد جامد يعنى مش صعب اننا نقول منولوج
وسورى على الاطاله

NaiRa said...

اولا لماضه بجد بحس انك بتتكلمى بلسانا كلنا
دماغك عجبانى كتير ربنا يوفقك
وثانيا بقى نادر ابو الليف
انا شوفته فى برنامج 90 دقيقه
بجد انسان كويس جدا وغنى اغنيه لعبد المطلب غنها صوته كان حلو اوى
فعلا فيه نفس البحه بتاعه حسن الاسمر
وان الناس دول بردو ليهم فنهم
ليه الناس بقى بتهاجمه عشان بيقول اللى كل الشباب بتقولو خرونج مثلا
غير كده كمان نحمد ربنا انو مطلعش قال بالبنجو مش بتاعى ولا قال كوكو كوكو دى
بردو قال كلام يتسمع معملناش تلوث سمعى وشكلو كويس يعنى مفيش كمان تلوث بصرى
بتمناله التوفيق بجد
ونايس بوست يا قمرايه ودايما متميزه وارائك حلوه

Unknown said...

اه والله الراجل ده دماغه حلوة
وصوته حلو
كفايه انه بيقول حاجه ليها معنى
ايه يعني مونولوج
هو حاجه عيب لا سمح الله
بجد انا متكيفه من الشريط حتى لو مش عاجب حد

sarah said...

النهارده اول يوم ادخل على مدونتك (الرائعه على فكرة )قررت اعمل كومنت المهم بالنسبه لموضوع الاخ ابو الليف والله بس هى اغنيه انا مش خرنج اول ما سمعتها جات لى صدمه بس بعد كده لقيت الموضوع عادي والله عندك حق فى اغانى سمعناها انيل بكتير وبالنسبه لا سمه لا تعليق بندعى بس ياريت ميدهورش اكتر من كده

مخبر قمل دولة said...

تأييد بشدة يافندم
بس مظنش انه يتصنف مونولوجست . اعتقد اللي رأيهم كده هيتغير لما يسمعو بقية الالبوم .. على فكرة كنج كونج مش من افضل اغانيه رغم شهرتها
عموما ايا كان الاسم هو راجل جامد فعلا . مفيش ابتذال ولا انحطاط ولا سهوكة ولا كلام فاضي
راجل دماااااغ بمعنى الكلمة
وشكله تحففففففة الاستايل بتاعه بشعره الطويل ودقنه ورفعة حاجبه حاجة روعة جدا ومميزة ف نفس الوقت .. يفكرك كده ببوب مارلي (رغم اختلاف الاتنين طبعا) .. الدستور كانت عاملة معاه حوار ومصورينه صورتين تحفة احلى من بتاعت الالبوم .. نفسي ينزلوها ع النت عشان انزلها
انتي سخنتيني على فكرة هروح اسمعه

Lady E said...

الألبوم فعلا جميل وواقعي جدا وبعدين أيمن بهجت قمر ويحيى وتوما وصوت أبو الليف لازم يبقى ألبوم متميز وفعلا فيه ابداع وبسيط

تسلم ايدك وبوست مميز زي باقي كتاباتك

Unknown said...

احم احم
سلامو عليكو

اوك انا متفق معاكي
الراجل صوته مش وحش
والكلمات مش مستهلة وجديدة
والموضوعات عصرية جدا

بس المهم بقي
هو يستاهل كل الضجة اللي حصلت عليه دي
هو مش مطري او مغني زي كل الناس الموجودة دي؟؟
يعني واحد تعب شويه في حياتو ؟؟
كل المصريين الحمد لله منيلين بنيلة
اتحدي الدنيا واتحدي نفسه ونجح انه يعمل شريط؟؟؟
فيه ناس كان حالهم اسوأمنه واتحدو الدنيا برضو ويقو دكاترة ومهندسين ومبدعين في مجالات مهمة
يستاهلو ان حد يعبرهم شويه

هو حد اجتهد ووصل لنجاح معين
اوك ربنا يوفقه بس ميبقاش حديث مصر كلها ابوالليف

مرسي ليكي

سمع هوص (Abo 3li) said...

نقد فني وتحليل عميق من ناقدة فنية رفيعة المستوي... لواحد من افضل البومات هذا الجيل... االبوم يعبر بصدق وبعفوية عن واقع ملموس في اطار من الكلمات الراقية الشيك.... ههههههههههه

كفاية "مش اي سمكة ملونة ينفعنا بطروخها" ههههههههههههههههه


واديني في الهايف فعلا

Anonymous said...

يمكن كلامنا على الحاجات دي بيحقق هدف ليها

احنا مين

احنا اللي مش عاجبنا حاجات كتير وبتكلم عليها في كل حته
ماهو لما محمد واحمد وحسين وسمر وساره يكتبوا على البلوج سبوت عن ابو الليف
وتامر ووائل وهيثم يتكلموا عنه في الفيس بوك
وعبد الرحيم وعبد الله يكتبوا عنه في الجرايد
و عمرو و معتز وسوسن وسهير يستضيفوه في برامج
خلاص كدا الراجل وصل

وكمان كام سنه يعمل له كليب عن القدس او فلسطين او كليب للأطفال لطيف او مسلسل سيت كوم كوميدي في رمضان او فيلم تافه من انتاج السبكي

ويتحول الراجل لنجم وله جمهور

بالظبط زي اللي حصل مع نانسي عجرم
اول ما طلعت قالوا عليها مطربة الدعارة و قطعوا لحمها
دلوقتي
نانسي الدلوعة
نانسي الرقيقة
نانسي الحبوبة
انجغه انجغه انجغه


والمصيبة دلوقتي ان كل ما زاد اسفافك وتفاهتك وهيفاتك في اي مجال انت شغال فيه كل ما الناس بتتكلم عليك اكتر ودا بيحقق لك الشهره في ثانية
وممكن بعد كدا تعمل حاجة تلاقي ليها جمهور عريض وتبطل اسفاف
يعني الاسفاف مجرد مدخل للشهرة وطريق قصير

واحنا كل مرة نبلع الطعم دا ونتكلم ونتكلم ونتكلم و في ثانية الراجل يتشهر ويتعرف ويحس انه خلاص اصبح نجم معروف والناس بتشاور عليه وهو في الشارع
اهلا بيك يا ابو الليف في دنيا الهطل
واذا كنت انت اهطل فصدقني الشعب المصري اكثر هطلاً وهبلاً وعبطاً منك بكتيييييييير
وصباح الخير عليكي يا اختشي

Ahmed Fayez said...




السلام عليكم أولاً

و ثانياً أنا ماسمعتش حاجة لأبو الليف ده لأني حسيت إنه زي باقي الأخوة المطربين و المطربات مجرد شخص عاوز يعمل قرشين و يبقى نجم عن طريق إنه يستهين بعقلي و يضحك عليا بكلمتين

ثالثاً أنا لا أتفق مع حضرتك في نقطة إن صوته مش وحش زي جورج وصوف أو شكله أحلى من شعبان و باقي المقارنات
ده مش مبرر إنه ينضم للكتيبة و يبقى مطرب نديله وداننا يرجع فيها
الحرامي الصغير اللي بيسرق ألف جنية مش أحسن من الحرامي الكبير اللي بيسرق مليون
كلهم حرامية في الآخر

كفاية مطربين قوي لحد كدة
كل يوم نشوف واحد جديد و الكلام نفسه بيتكرر
ممكن الرقصة تختلف من مطربة لمطربة أو القميص بتاع الفنان يتغير إنما الهراء اللي بيقولوه هو نفسه مابيتغيرش

عاوزين بقى شوية مثقفين و علماء من باب التغيير على الأقل

شكراً على طرح الموضوع
و ياريت ماتتأخريش كتير في كتابة مواضيع جديدة


دكتور حر said...

ايه الثقافة الجامدة دي يا لماضه

اللهم صلي عبى النبي

بس يا رب كل الرجالة مش يطلعوا خرونج
احسن العمليه زادت
:)

كالعادة سلمت يداك

سكندري said...

Oops! Oops! Oops!
ايه التدوينة الجامدة دي
أنا كنت ميت علي نفسي من الضحك و انا بقرا التدوينة دي ... بجد جامدة جداً
ووجهة نظرك تحترم
الراجل ماقلش كلام ابيح (واشتري) زي صاحب الشعر (المتصدر) الساحة حالياً و البنات بتموت فيه ... انا عارف عاجبهم في ايه ؟
الراجل قال كلام منطقي جداً و احساسه عالي قوي ..
و بعدين اللي عايز يهاجم يهاجم بقي المهم هو راجل نضيف و كفاية اسمه
و بيعترف انه مش خرنج و مش هيرضي باي وضع مش ولا بد من حبيبته ... اصله لامؤخذاة مش خرنج

فكرة من الزمن ده said...

والله يالماضة انا مصدقتش نفسي اول مرة سمعته
على الفايس بوك
بيقول انا مش خرنج
قلت وقعتك مش فايته ايه اللي حصل ام الليف عملت ايه
وفكرته واحد عامل كليب مع نفسه كدهبطريقة الكاريوكي وقلت والله برافو انه من غير امكانيات وطالع الكواليتي عالية معاه
اذ فجاتن اكتشف انه مطرب بجد وجديد وعامل شريط بحق وحقيق
قلت ولسة ياما فيكي العجايب يامصر
لكن لما شفته بيحكي معاناته
انه اشتغل سواقة ياست هانم سواقة
وانه اشتغل في الزراعة في ليبيا واشتغل واشتغل
فقلت ده مصمم بقى
انما بجد بغض النظر عن كل ده الاغنية حلوة
تحياتي

shekomando said...

ابو الليف فعلا كلنا محتاجين ننضف ودانا و اذ من هذا المزنأ حيكون عندي شجاعه عكسه و حقول اني خرونج و مش كينج كونج

إيمان بلال said...

كتييييييييييييييير روعة
حلوه حلوة

Kiara said...

هههههههههههههههههههه

الصراحه يامروة لسة ودني مش اتعودت عليه خالص :(


وعرفته من دكتور عندي في الشغل

وكان بيقول الكلام وانا اضحك

واديني في الهايف ههههههههههه

اسكندراني اوي said...

ههههههههههههه
بوست عسل يا لماضه وبجد بجدكلام منطقي جدااااااا

شوكولاتة said...

عندك حق يا لماضتي فعلا الألبوم جه حلو قوي احلى حاجة فيه انه معبر جدا وجديد م مبتذل

تحياتي

sony2000 said...

اكتر اغنيه فشريطو عجبتني
موش كل سمكه يخدعنا بطروخها
بجد اتحولت لمثل
بينضرب بيه المثل
هههههههههههههه:)

سواحة said...

انا سمعت اغنية واحدة حسيته نظام شعبولا
بس شدتنى انكش باقى اغانيه :-)
كفاية نال رضا اللماضة

Unknown said...

حلوة أوي ترجمة الشريط دي

مش عارفة الكل بيهاجمه ليه يا مروة مع انه عاجبني جدا

مرة واحد على الفيس بوك دخل معايا فى نقاش غويط فى ان ابو الليف ده عايزين يعملوه ظاهرة

وعايزين يلهوا الناس عن اللى بيحصل

وعايزينه يبقى رمز .. وان ايمن بهجت بيستغلوا وبيستعبط علينا وعايز يكسب وخلاص

وانهم بيتاجروا ببؤسه وفقره وظروفه الصعبة مع انها فى اختراع يعني فى ملايين الشباب كدة

وردي عليه هو إن أبو الليف بمنتهى البساطة حالة غنائية خفيفة وظريفة ولطيفة وبس كدة ، وان احنا بهجومنا عليه بالطريقة دي بندي الموضوع أكبر من حجمه بجد

فعلا يا جماعة كله بينفسن
:D

كــركــبــة دمـــاغ ㋡ said...

ابو الليف ده دماغ عاااااليه

والالبوم كله تحفه جباااااااااارة

والله كله عــ بعضه سكر ويضحك جدااااااا

واحب اقول ان انا متضامنه مع ابو الليف

تحياتي جداً يا لماضه

محمود المصرى said...

محمود المصرى بيمسى وبيقولك انتى بتبلغى شويه ده ابو الليف ابن المطرب الكبير ابو صابونه والست شامبو ودى عيله نظيفه قوى والقطنه مبتكدبش

Anonymous said...

مساء الخير يا دكتورة مروة على فكرة هية مش قضية صوت ولا شكل الراجل ده اعتمد على نظرية خالف تعرف و هوة عمل كده بالظبط اسمه شاذو مختلف ابو الليف شكله اكيد مش محتاج بين اغانيه ام الاختلاف اول مرة واحد يغنى لموقع انترنت دى حتى البوستر بتاع الشريط شكله غريب مش بوستر لمغنى ممكن لفيلم حاجة كده بس فى الاخر الراخل فعلا صوته حلو .

Nana said...

بجد احيكى على بساطة التعبير اللى بتتكلمى بيها وانا معاكى فى كل اللى قلتيه انا سمعت اغنية انا كينج كونج واغنية الستات دول مجانين وفعلا صوته مش وحش واغانيه غير تقليدية بس مش هو ده المستوى اللى ممكن نسمعه

يا مراكبي said...

إيه ده؟

ده توارد أبو الليف

قصدي توارد أفكار وبوستات وكده

:-)

حلو عنوان البوست قوي كمان

بس بجد من غير هزار .. لو الناس دققت شوية هتلاقية بجد رائع .. المشكلة إن الناس مش قادرة لسه تستوعب قد إيه المجتمع بقى كده فعلا وكأننا عايشين في عالم آخر .. وده هأشرحه في بوست منفصل إن شاء الله

زهور الامل said...

والله انا شوفت اعلانه لكن مسمعتش الشريط
حتى انا وزمايلي في الشغل علقنا عليه وعلى البوستر بتاعه وهو لابس لبس بدائي
وصوته بصراحة مش بطال

بس معرفتش لسة مجمل الشريط بيقول ايه
اهو بكرة نعرف ونسمع

تحياتي

semsem said...

لسه زي انتي مفيش فايدة
اسم على مسمى
وينقطع لسان اللي يقول غير كده
بخصوص بقى الاخ المناضل ابو الليف
فانا دلوقت عرفت هما ليه سموه ابو الليف
ده من نضافة مخه
النضافة اللي على حق
عشان طلع حاجة ظريفة طريقة لخص فيها كل حاجة بالشكل ده
صحيح الشكل مش متعودين عليه احنا اتعودنا عالاسفاف زي ما قولتي
بس حاجة تشد ودي في حد ذاتها رسالة في حاجة ميديا زي دي
وشكرا وخلينا نشوفك

Aya Refaat said...

انتي بتتكلمي جد؟؟

ريم وجيه said...

ههههههههههههههههههه
البوست جامد جدا
اول مرة ازور المدونة
وبجد بوست تحفة واسلوب جميل اوى

واثقة بربها said...

ههههههههه اول مرة ازور مدونتك بس بجد تحفة جبتى من الاخر .....ظاهرة غريبة ابو الليف بس بجد للى هينقطنى ان فى ناس بتقول عليه فن هادف

عمار said...

كتبت عنه قصيدة في مدونتي .. طالعوها .. طالما انكم مهتمون به هكذا

محمود المصرى said...

انا سعيد جداَ بزيارتك ليا وانت فعلاَ عبقريه
اْخوكى الصغير
محمود المصرى

محمود المصرى said...

انا سعيد جداَ بزيارتك ليا وانت فعلاَ عبقريه
اْخوكى الصغير
محمود المصرى

بيتنا القديم said...

جااااااااااااااامد "التحليل" ده..!
(:

Me, myself, and her said...

الذي أفرز أمثال أبو الليف في مجتمعنا - اللي مش ناقصه - هو التصفيق الجاهل لكل ما هب ودب من أغاني ومغنيين

لو كان الناس يملكون فطرة (اختيار) ما يريد وما لا يريد لما لاقى أبو الليف سوق ياكل منه عيش

سيظل السوق العربي أفضل سوق لكل شئ طالما أنه أفضل من يستهلك كل شئ بدون وعي وإدارك الانتقاء والاختيار

طبعا هذا ليس آخر المطاف ، لانه مقابل كل أبو الليف ، يخرج مضاد حيوي من ذات المجتمع ليفرض أفكار وحلول ومساحات تفكير جديدة تنظف الأجواء

عندي أمل :)