Wednesday 18 August 2010

كائن صرصاري




من يوم ولادتي وانا بتعامل ككائن صرصاري كانت غلطة الدادا الي شدتني من لساني .. ووصف جدتي لما عرفت اني بنت وكان تعليقها التاريخي لماما  : - ايه الصرصار الي جبتهولنا ده ؟؟!! -  

وللاسف ده مكنش مجرد وصف ده كمان فعل لاني كنت باخد جائزة البيت التقديرية في العياط والشحتفه  وبنال شرف كل الرضعات في غير مواعيدها المنطقية وكمان فسحة ليليه مع والدي وده كان معاد مقدس للفسح  بالنسبالي – أمي دايما تقولي غاوية نكد من يومك -  وهذا الشق الأول من الصرصرة

ولان ربنا بيعوض كل انسان يقطع من هنا ويوصل من هنا كان الشق التاني واللي كان متمثل في قصر قامتي – الحمد لله -  من وانا في اللفة فضلت أعاني من ازمة الناس في التعامل معايا على اني بنص رجل مع اني في الحقيقة بنص لسان كنت فاشلة في تطليعه للعيال  .. لانه مربوط  يعني العيب الخلقي كان في لساني مش في طولي يا خلق ..

وللاسف كان من اول الناس والدتي ولهفتها على شراء كل الهدوم الطويله على اساس اني هطول يوم بعد يوم .. وتكتشف إن الهدوم هي الي بتطول من غلبها .. وانا زي ما انا بجرجر ديل فستاني .. 

من طفولتي اتحرمت وعمري ما حسيت يعني ايه لبس الشورت .. لان كل الشورتات كانت شرعيه بالنسبالي مهما كان مقاسها على بقية الاطفال .. ولو جابتلي صندل مقاس زيرو صوابعي تتشوه من المشي لاني كنت بكتفي بكعب رجلي بس جواه .. 


ولما كانت تلبسني كافوله متحتاجش أي غيار تاني معاها لانها كانت بتغطيني بيها لحد صدري وبطلع درعاتي منها كمان .. الكافوله والبرنيطه الاتنين بيتمسكوا بدبوس واحد من يومي طفلة موفرة

وتجلت معاملتي ككائن صرصاري لما بدأت امشي زي بقيت الاطفال وفضل والدي ووالدتي يجيبولي مشاية كانت خيبة املهم كبيرة لان رجلي عمرها ما طالت الارض وكانوا بيضطروا يشيلوني انا والمشاية مع بعض عشان متقلبش على ضهري ونفسي يتكتم ..

وبعد ما ربنا اكرمني وبدأت اخد اول خطواتي امي مصدقتش نفسها .. فكرتني لسه بحبي لاني يدوب كنت بطول طرف جلبيتها وكانت بتاخد بالها طول الوقت ان والدي ميفعصنيش برجله وانا بتمشى جنب الحيط 

حاولت والدتي بكل قوتها انها تساعد على نموي سواء بالتغذية .. كانت بتهتم تأكلني الخضار والفاكهه بدون تقطيع يعني الخيار والجزر بطوله .. العيش الفينو بلبابته .. او باللعب ..

كانت تفضل تعلق لي اللعب في اطول مسافة ممكنه بالنسبالي ودي غالبا ما بتكون في اوكر الباب عشان اشب واوصلها وكانت النتيجة ان ايدي هي الي طولت وعشان كده كنت دايما بفضل اللعب في التراب .. وساعتها بتكون نهايتي ان حتى اثناء عقابي دايما يعلقوني من رجلي يمكن اتمط في اديهم ولا حاجه

المشكله بقى كانت لما بنخرج ونقابل الناس أمي كانت بتتفنن تعمل في شعري كل النخل الي ربنا يقدرها عليه .. يعني لو الخابور ابو ربع كان موجود وقتها كانت لزقتهولي في دماغي .. 

وطبعا كنت الطفلة الوحيدة الي هدومها دايما ستراها .. الحقيقه الخياط كان يجي عندي والنص متر في ايده يبقى توب بحاله

محدش اخد باله ان دي كانت سعادتي الحقيقيه لاني الطفلة الوحيدة الي قدرت اتشال اطول فتره ممكنه .. بعيدا عن كلمة - عيب عليكي بقيتي طولي ولسه بتتشالي؟؟! .. وغير اني كنت بقعد في عربية الاطفال مربعه مش عامله رجلي فرامل .. وكنت بستمتع بالاكل على الواقف عشان ينزل في رجلي براحته من غير ما يحمض قبل ما يوصل بطني .. وأول طفلة صرح ليها مص القصب حتى لو كانت فيها نهاية لمرتبة السرير

الخلاصة حاولت أسرتي في المرحلة دي من عمري بكل الطرق إني أطول ولو كام سم لكن القدر لعب لعبته وجه دوري بعدها في التعامل مع الظروف نكمل المرة الجاية

24 comments:

تيمور said...

اول الكلام كل عام وانتى بخير

رمضان كريم


بجد انتى مشكلة ههههه

بجد بوست دمة خفيف وعجبنى اوى


تعرفى من حكمة ربنا ان الناس مش زى بعضها وتختلف عشان يكون فى تكامل

واشكرك مرة تانية على الكلام الجميل دة

تحياتى

Unknown said...

ومتنسيش ايام الجامعة..كان لازم كرنيه الجامعة يكون معاكي لان السكيورتي الي ع باب الجامعة كان دايما يسئلك
رايحة فين يا شاطرة؟

Unknown said...

كانت بتاخد بالها طول الوقت ان والدي ميفعصنيش برجله وانا بتمشى جنب الحيط

هههههههههههههههههه

انتى عارفة يا لماضة إنى قصيرة زيك .. بس أحب أطمنك من هذا المزنق إن المأساة تكتمل مع الإقتران بزوج طوييييييييل
:D

KEBLAWYAT said...

السلام عليكم

" وفضل والدي ووالدتي يجيبولي مشاية كانت خيبة املهم كبيرة لان رجلي عمرها ما طالت الارض وكانوا بيضطروا يشيلوني انا والمشاية "

احم .. ايه المشايه دى ؟

Unknown said...

المشاية دي عباره عن حاجه مدورة كده بعجل من تحت العيل بيتحط فيها كانه بيلبسها زي البنطلون بتساعده شوية على المشي وبتعمله زي سناده
اكيد عارفها بيجيبوها للعيال كلها

KEBLAWYAT said...

أها .. كده عرفتها

احم .. كان عندى واحده .. ده وانا صغير برضه يعنى

بس مكنتش أعرف ان الحاجه دى اسمها مشايه

мαησηα said...

ههههههههههههههههه

والله انتى سكر يا لماضة

كل سنة وانتى طيبة حبيبتى

وماتقلقيش من الموضوع ده

ليه فوائده بس انا مش عارفاها الحقيقة

انا بحاول اقنع نفسى انه القصر له

فوائد ههههههههههههه

اسكندراني اوي said...

الله يحظك يا دكتوره
هلكتيني من الضحك
ربنا يسعدلك احواله وينولك الللي في بالك
وش شرير

sal said...

رمضان كريم يا دكتورة

انا بعد البوست الجميل ده اتأكدت ان اى حد قصييييير
لا يؤثر الصيام عليه
ان جسما او روحا
فتسامى بالصيام الى الاعلى
ولا تخلدى الى الارض
فهناك الصرصرة الحقيقية

اسعد الله ايامك بكل الخير

تحياتى وتقديرى

ذو النون المصري said...

ذكريات طفولتك ظريفة جدا جدا

طوبه فضه وطوبه دهب said...

انا اول مره ادخل بس بجد مت من الضحك تسلم ايدك وكل سنه وانتى بالف خير

يا مراكبي said...

:-)

ليه بس بتقولي على نفسك كده؟

اوعي حد يقنعك انك قصيرة

حاولي دايما يكون عندك احساس بالطول .. وما يهمكيش رأي الناس المغرضين

Dr. Kafy said...

كل عام و إنت بخير يا دكتورة لماضة

و ماله القصر؟ ده حتى معظم العظماء قصيرين و آديكى أهه بقيتى دكتورة و كمان مشهورة بمدونتك و برامجك ، على فكرة أنا سمعت البرنامج بتاعك على الإذاعة و استمتعت بيه جدا.
أجمل التهانى
و أرق تحياتى

اقصوصه said...

رمضان كريم

مبارك عليكم الشهر

وكل عام وانتم بخير

Kiara said...

كل سنة وانتي طيبة ياقمر


مالهم القصيرين بئا

ماهما جامدين بئا :)

الغـــــريـــــب said...

:)
موضوع لمض فعلا
بس كدا عملتى فتنه بين القصار والطوال

هل يا ترى هناك أبحاث طبيه لعلاج الموضوع دا ولا خلاص كدا
:)

Noha Saleh said...

بجد بوست دمه خفيف اوى
كل سنة وانتى طيبة
ورمضان كريم

قلم رصاص said...

هههههههههههههههه
صرصاااااااااري

كل سنه وانتي طيبه يادكتوره
رمضان كريم عليكي وعلى الأسرة

*همسة حب * زوزو said...

ههههههههههه
يوست دمه خفيف و عسول زيك
في انتظار التكملة
كل سنة و انتي طيبة
تحياتي

الفتى السافج said...

walla zaman sitt il koll... il tool mish bilsanty... il tool bil makana illy wa7id beyewsallaha... wenty ba2a 3la kida taweeeeeeeeeela geddddddannnn !!!

kol sana wenty tayeba we mate7remenash min lamadtik kidda 3la tool !!

بنت الغربة said...

وحشتينى قوى يالماضه ياقمر
ودايما اسلوبك زى العسل زيك
كل سنه وانت طيبه ياقمر
وعيد سعيد
تحياتى

باحث عن حب said...

جميل اسلوب الكلام والله زى العسل
لماضه على حق
تقبلى تحياتىالسلام عليكم

dr.mimo said...

انا اول مرة ادخل
بجد جميلة جدا واسلوبك جميل

Anonymous said...

بما انك قصيرة كده اكيد اكيد بتعرفي البني ادم النظيف من القذر ....نظرة واحدة علي انفه من زاوية الرؤية بتعتك دي ويتم الفحص .....حولي تتخصصي انف ههههههههههه