Sunday 2 October 2011

والمسكين يديني لقمة




هوه هوه هوه
هوه هوه ننه ننه هوه

واحد أتنين سرجي مرجي .. أنت حكيم ولا تمرجي
أنا حكيم الصحية ..
العيان أديله حقنه .. والمسكين أديله لقمة

أنا حكيم .. أديله حقنة .. مسكين .. لقمة

أنا نفسي اطلع دكتورة لما اكبر يا بابا .. نفسي اطلع دكتورة وأعالج الناس واديهم دوا
بس مش الدوا اللي طعمه وحش بتاع الكحة .. لا هديهم دوا الفيتامين عشان بطعم الفراولة أو المضاد الحيوي عشان بطعم الموز .

مش عايزه أدي حد حقنه .. لو عيان قوي هديله حقنه في أيده مش في حته تانيه عشان بتوجع قوي . حقنه البنسلين بتوجع مش عاوزه أخدها الشهر الجاي.

فاكر يا بابا الراجل العجوز الي كان جنب سيدي الله يرحمه في المستشفى .. مكنش حد بيزوره واحنا اديناله من العصير والتفاح اللى كنا جايبينه . وانا خفت منه وهو بياخد الحاجات بايده اللي كانت كلها بقع زرقه وحمرا مكان الحقنه .

هوه ده بقى يا بابا العيان الي عاوزه اديله حقنه .. ومسكين هديله لقمه .. لا عصير ..  لما اكبر ان شاء الله وأبقى دكتورة ...

حج حجيجه بيت الله
والكعبه ورسول الله
بدي ازورك يا نبي
ياللي بلادك بعيده

ستي .. ستي .. والنبي الغالي يا ستي تدعيلي وانتي في الكعبه قدام ربنا اني اكبر وابقى دكتورة .. عشان اديلك حقنه بدل أم محمد جارتنا .. اللي بتوجعك وهي بتديهالك .

فيها احمد وحميدة
حميدة جابت ولد
سميته عبد الصمد
مشيته عالمشايه
خطفت رجله الحداية

لما اطلع دكتورة ان شاء الله .. هدي العيال التطعيم في المدرسه .. مش هخلي دراعهم يورم زي ميس يسريه ما عملت فينا .. ايدي وجعتني اسبوع بحاله وعملت صديد مكان الحقنه .. مش هديهم تطعيم مضروب .. او على الاقل هديهم التطعيم في بؤهم .. عشان ميبقوش زي حسين جارنا اللي عنده شلل أطفال .. كان نفسه يركب قدامنا على العجله و يلعب معانا .. بس احنا اللى بنركب وراه وبنلعب بالعجله بتاعته .

حد يا حد يا بوز القرد
انت ولد ولا بنت
انا ولد زي القرد

اخيرا بقيت دكتورة قد الدنيا .. لو سمحت انا الدكتورة ..  بعد اذن حضرتك كان ليا طلب بسيط بس ممكن يعني  اصل انا دكتورة ...
بقيت بعيش بتلات شخصيات عكس بعض .. بره المستشفى بحاول قد ما بقدر احافظ على كبريائي كطبيبة .. في المستشفى بحاول قد ما بقدر احافظ على كرامتي كطبيبة .. في الشغل الخاص بحاول قد ما بقدر أمثل اني طبيبة .. في المجتمع الكل بيحاول وبيقدر يذل الأطباء .. في البلد بتتقن احتقار مهنة الطب .

حلفت امك يا جمل
ما تسقيك الا اللبن والعين جمل

بول الجمل فيه الشفاء .. لبن الجمل فيه الصبر .. العين جمل في السنه مره
واحنا الاطباء راكبين جمل ماشيين بيه في بلدنا .. صحراء من كل حته حوالينا .. مفيش تعليم .. مفيش فلوس .. مفيش ضل .. فيه بس عذاب وشقاء  .. مينفعش تعترض .. ومينفعش تنزل من الجمل .. خليك ماشي زي لا مؤاخذة الجمل الي انت راكبه .. لا تضل الطريق ولا تعطش .

هوه هوه ننه ننه هووه
واحد اتنين سرجي مرجي
انت حكيم ولا تمرجي
انا حكيم الصحية
العيان اديله حقنه
والمسكين يديني لقمة

معلش أصل شكلي وأنا صغيره نطرت الغطا  كتير وأنا نايمة

10 comments:

عمرو يسرى said...

اسلوبك رائع
تحياتى

Unknown said...

شكرا يا عمرو ربنا يخليك

فاتيما said...

وحشتينا يا طعامة
يا شقاوة

الدنيا تروح وتيجى
والثورة تقوم
وعاوزين يقعدوها
وانتا يا جميل
لسه بتقول ..وتعيد فى مآسى
أن تكون طبيباً فى هذه البلد


بصى
انا لما بشوف اضراب الدكاترة
لسه متماسك كدا ...
رغم كل شىء
بحس ان فيه امل
والمدرسين
والسواقين
وغيرهم ...

ان شاء الله هييجى
بفايدة
الحق مبيضعش ما دام وراءه مطالب
وانتوا طالبين بقلب وضمير
عشانكم
وعشانا ... كلنا


ان شاء الله
خـــــير

حمدلله ع السلامة
يا حبيبتى

Noha Saleh said...

عاجبنى اسلوبك جدا

ahmkashwa said...

اسلوب كالعاده رائع

بس الاروع كدكتوره نكمل الاضراب علشان ابسط حق للمواطن انه يتعالج بكرامه وده فى المطالب بتاعتكم

وكمان نوضح للناس ان الاضراب مش علشان الدكاتره بس ده كمان علشان المرضى

Nana said...

جامدة جدا استمرى

هديـــل الـروح said...

ههههههههههه بشرتينى بشرتينى انا هتخرج ان شاء الله لو عشت كمان سنتين واشوف اللى انتى بتشوفيه ده ..ربنا يستر ..كل سنه وانتى طيبه

للمرشحة انجى على لمجلس الشعب 2011 الدائرة الثالثة said...

من غير لماضه اسلوبك جميل

يا مراكبي said...

:-)
كويس

وأديكي بقيتي دكتورة

ها؟
:-)

وبعدين؟
:-)

MindEktomia said...

تحفة ..اسلوبك فيه حاجة مختلفة :D