Tuesday 18 September 2007

طالب الطب

ده طالب الطب

تعاطفك معاه مش كفايه

اتبرع ولو بجنيه

29 comments:

اسكندراني اوي said...

هههههههههههههههههههههههههههههههههههههههههههههههههههههههههههههههههههههه



معلش كان الله في عنوكم يا طلاب الطب

طب مش كنتي حطيتي رقم الحساب عشان نحول عليه كام هيكل عظمي لزوم التخرج


وكنتي عاوزه ملك تطله داكطووووووره

ماشي يا لاماضه

Unknown said...

ههههههه
لا يا اسكندرانى انا بحب حقى ناشف
يعنى رغيف عيش وكام بيضه يقدوا الغرض ادى جزاة اللى بيسمع كلام بابا وماما ويقولوله ادخل طب

Esmat said...

lamada
يا حبيبتى كلنا تعاطف
ومش بس جنية
جنية ونصف
بس المشكلة بعد التخرج
يا ترى يا ترى
حيبقى التبرع كام
اكيد حيبقى 2 جنية
ماشى يا ستى
والف تحية يا لماضة يا عسل

Unknown said...

هههههههه
شكرا يا قسمت على زيارتك ليا شرفتينى
ادعى انتى بس يبقى فيها تخرج
احسن واضح انها حالة ولادة متعثره وليكى عليا اعمل صندوق مخصوص لجمع التبرعات العينيه والماديه على جنب فى المدونه
وهنيالك يا فاعل الخير

Yasser Hussein said...

لو الرسم ده أنتي اللي رسماه فانتي موهوبة بجد

خالص تحياتي

Unknown said...

لا يا ستاذ ياسر مش انا صراحه
بس ده ميمنعش انى موهوبه فى الرسم فعلا
بس للاسف كان ايام الخوالى
ليت الشباب يعود يوما
ان شاء الله بعد الكليه اجدد نشطاتى من تانى
وبصراحه الصوره عجبتنى لانها قريبه قوى من الواقع الاليم
النظاره كعب الكبايه اللى طلبة الطب مشهورين بيها من كتر الدح بس الحمد لله انا لسه 6/6 ربنا خد منى كل حاجه وادانى الصحه
وكمان الكتب والفار اللى فى الكم فكرنى بواقعه ليا مع الضفادع هبقى احكيها بعدين
والكتب والعظم المنتور يمين وشمال اقرب ما يكون شبيه بالواقع
شكرا لتشريفك ليا وزيارتك مدونتى
تحياتى

مدونة كل العرب said...

والله دا حال طلاب كتير مش هكر بس على طلاب المشارط قصدى الطب
كل عام وانتم بالف صحة وسلامة
رمضان كريم

Unknown said...

كل سنه زانت بالصحه والسلامه يا صاحب الحريه والابداع وشكرا لزيارتك مدونتى المتواضعه

مواطن زهقان said...

هههههههه
هههههههههه
هع هع هع 3هع
بجد شكلهم نكتة
بس نتبرع ازاى
بقا عهشان
هما فعلا صعبوا عليا

Marwa Friday said...

صباح الورد يا قمر
والله ده حال طالب الطب وباقي طلبة الكليات الأخرى !ا
ربنا يوفقك يا جميل ..وتبقي داكتورة قد الدنيا
بس اياكي اشوفك مع عبلة كامل في إعلانات برسيل .."شوفوا البالطو بتاعي بقى أبيض زي الفل ازاي..عشان العيانين يتحسن حالهم !"..بس أقولك ..الإعلانات جنب الطب بتعمل شغل حلو مش عيب يعني ..أنا بحب اعلانات الشوكلاتة والبرسيل عشان اقعد في البالونة مع عبلة كامل!ربنا يوفقك يا جميلة :)) تحياتي

Unknown said...

مواطن زهقان
كل سنه وانت طيب
يا عم قول انت بس طالع من ذمتك كام
واحنا نجيلك لحد البيت نقلشك
قصدى ناخدهم منك
تبرعوا لصالح ايتام طلبة الطب الغلابه
وهنيالك يا فاعل الخير
حسنه قليله تمنع بلاوى كتير
مرحب شهر الصوم مرحب

Unknown said...

مروه جمعه
مرمر حبيبتى اسمك غالى عليا وانتى عارفه طبعا السبب بس اوعى تقولى لحد
والله فكره حكايه الاعلانات دى بس انا شايفه ان الوقوف على باب جامع بيكسب اكتر
يابنتى الشحات ليه نص البلد
امال انا عامله البوست ده ليه
نيهاهااهاا
وعلى فكره بقى انا مش بغسل ببرسيل البالطو
لانى مش بغسله الا مرتين فى السنه
مره اول السنه
ومره قبل امتحان الشفوى
وقيسى كده على بقية الزمله
على فكره مش عبله لوحدها اللى كانت قاعده فى بالونه ابسولتلى
دى اليسا كمان قعدت فيهاااااا

yomna said...

ربنا معاكي يا بنتي
انا مش عارفة بتستحملوا السبع سنين دول ازاى
ده الواحد خلص الاربع سنين بطلوع الروح و كمان شبه اتلحسنا في اخر سنة انما انتوا بقى...يلا كلنا لها
و بخصوص التبرعات لو هنقسمها بالنص فانا مستعدة اخبطلك على شقة شقة فيكي يا مصر و المهملك..و اهو الشعب المصري يحب يخدم برده

Unknown said...

هههههه
ماشى يا مونى نسبتك محفوظه بس انتى اجدعنى معايا خلينا ناخد من كل واحد فى مصر جنيه
دعواتك مش هوصيكى فطار وسحور وفجر وظهر وعصر وتروايج ولو قدرتى تصلى صلاة حاجه ربنا يفك زنقتى يبقى كتر خيرك
شكرا لزيارتك الجميله

غمض عينيك said...

يااااه
هما الحادج والحاجة اللي في الصورة دول في كليه الطب

دول مش عايزين تعاطفي
دول عايزين تعاطف شعب بحاله

بس والله يابنية ولا ليكي عليا حلفان
ان جعبست حداكي في المدونة
الف وادور وادور والف
على كل بوستاتك ولاقتها حلوة واصل واصل وزينة وزي الفل

وشفت الخيبة لما اتسرقتي في الجامع...شاطرة تتلامض بس ع الست الغلبانة
وكمان الايس كربم اللي دفعتي فيه دم قلبك
وشفتك وانتي معكوشه عشان الطباشير اللي مخبينه
وشفت الشطارة لما حرقتي بيتكوا بالفانوس

لا لا لا
مدونة لمضة لمضة يعني
بس جميلة اوي

اتشرفت بزيارتك يالماضة
محمد سمير

Unknown said...

غمض عنيك واحلم معايا
ايه ياعم الكلام ده كله اخجلتم تواضعى
مش كنت تجولنا انك مجعبز حدانا هنا فى المدونه كنا عملنا معاكوا الواجب
شويه عصير فورمالين فى الفيفتين
ولا صنيه من المشرحه مشكله من اللى جلبك يحبها
اسعدتنى زيارتك جدااا
وكل سنه وانت طيب
امال لو تعرف المستخبى ده فى حاجات والله لولا خوفى من انكوا متصدقوش كنت قولتها
مستنيه ردودك تسعدنى دايما

daktara said...

طيب انا بقي دلوقتي اتبرع
ولا اقاسمك في الفلوس باعتبرنا في الهوا سوا
متهيألي الخيار التاني احسن

انظر حولك
د. خالد عزب

Unknown said...

ماشى يا عم الدكتره من اولها هنقطع على بعض
موافقه تقاسمنى بشرط
تساعدنى فى جمع التبرعات منالساده المدونين
وكمان تشاركنا حمله الا رسولى
ها موافق نكتب العقد؟

Unknown said...

جنية بحالو
و ده نجيبة منين ده و نزلت امتى العمله دي

Unknown said...

محمد صبحى
خلاص نخليها ورقه بعشره

البنت الشقيه said...

هههههههههههههههههههههههههههههههههه
هتبرع لصالح اليتامى ربنا معاكو انا اه لسه صغيره بس عرفت معنى مذاكرت الطب خالتو كانت بتنتحر مش بتذاكر يالا ربنا معاكو ويخلصك منها بخيييييير بس والنبى عدى على مدونه ماما كلاكيت تانى وتانى واقنعيها بحكايه الطب دى خليهم يعرفوا!!!!!!!!!!!





يا ريت بقى تشرفينى عندى فى مدونتى ومدونه صحبتى روبى انته عمرى وحواديت بنات محتاره



لينا

Unknown said...

البنوته الشقيه
حاضر يا قمر هعدى واتلامض عندكوا
بس انتى عوزانى اقنع ماما بايه
انك تدخلى ولا متدخليش
؟؟

البنت الشقيه said...

لا يا لماضه وحياتك انا قصدى اقنعيها انى مدخلش خاااااااااااااالص
انا نفسى ادخل فنون تطبيقيه واطلع مصممه ازياء بس قولى يارب

Unknown said...

لوليتا يا حبيبتى
انا هقولك على الاختيارات وانتى تختارى اللى تحبيه وهقولك انا وانا قدك عملت ايه
الاول وانا فى 3 اعدادى بالظبط بدايتها كانت السنه دى يعنى قدك
حطيت هدف قدامى
الهدف ده انى منقصش من المجموع الكلى اكتر من 5 درجات فى كل المواد
وركزت قوى فى مذاكرتى على الهدف ده
وفعلا
سنتها طلعت من الاوائل على مدرستى والمحافظه وجبت المجموع اللى رسمته بالظبط
دخلت ثانوى وكان الهدف ده بيكبر معايا اول باول
وزودت عليه
انى لازم اجيب مجموع عالى مفيش كليه تتحكم فيا وانا اللى اختار ادخل ايه
وبصراحه كانوا فى البيت مشجعنى على طب خصوصا والدى
وانا كنت مياله بس مكنتش اعرف هو ايه نظامه
مكنتش تفرق معايا لانى مجربتوش وبسمع انه صعب وكلام كتير يلخبط
وفعلا
جبت مجموع عالى الحمد لله
وكان قدامى كل الاختيارات
وقامت فى البيت معركه
بين صيدله وطب وحقوق وفنون جميله
بس انا سالت نفسى سؤال
انا شايفه نفسى فين فى دول
يعنى متخيله نفسى من صغرى ايه
دكتوره بكشف على الناس
ولا ببيع دوا
ولا فنانه بترسم
وهل لو دخلت طب هقدر عليه وعلى صعوبته وطول الدراسه ولا نفسى قصير
طيب انا بحب الادويه ولا لا
بحب الامراض وعاوزه اكتشف كل حاجه عن جسم الانسان
الاجابه الاخيره كانت هى
انى مش شايفه نفسى الا دكتوره ونفسى قوى اعرف كل حاجه عن نعمه ربنا فى اجسامنا
وصليت استخاره وتوكلت على الله
الحمد لله ربنا وفقنى فى دراستى وكنت كل يوم بحب الكليه عن اليوم اللى قبله
الكليه فى حد ذاتها مش صعبه
بالعكس دراستها لذيذه جداا اا
وكل ما نعرف حاجه نفرح قوى
وفرحة الناس بينا كمان كانت لا توصف
خصوصا لما تقولى لحد انا فى طب او هبقى دكتور يفرح بيكى قوى
بصراحه شعور احسد عليه
باختصار الناس بتتشرف بيا
بس طبعا ده مش سبب لوحده وان كان حاجه جميله
السبب الاساسى
انى مش شايفه نفسى فى اى حاجه غير طب
ومستعده استحمل اي صعوبات وقرف لانى بحب الشغلانه دى
دلوقتى السؤال اساليه لنفسك
انتى شايفه نفسك فين
بتحبى طب وحابه تكشفى على الناس وتعرفى ولا ده شىء مقزز بالنسبالك
نصيحتى ليكى
لو مش حابه كليه الطب متدخليهااااش ابدا
بس خلى فى بالك انك مجربتيهاش ولا تعرفنى حاجه
بس اسالى نفسك انتى شايفه نفسك بتشتغلى ايه
لابسه بالطو وبتمشى وسط العيانين ولا فين
نصيحتى التانيه
ركزى قوى قوى فى مذاكرتك انك تجيبى اعلى مجموع وتتحدى نفسك عشان مفيش حاجه تتحكم فيكى وانتى تختارى تحبى تكونى فين مش مكان او كليه تتفرض عليكى
فهمتينى يا قمر
ربنا يكرمك يا جميل وتجيبى اعلى مجموع يارب انا عارفه انك شطوره وربنا هيكرمك ان شاء الله بس فكرى فى كلامى واحسبيها مع نفسك
واهم حاجه دلوقتى مذاكرتك والمجموع
سلامى ليكى ولماما كتير

البنت الشقيه said...

ميرسى لماضه انتى لذيذه اووووووووووى وانا اسفه انى مردتش بسرعه كنت مشغوله بس انتى بجد قدرتى انك تدخلينى فى دماغ تانيه فعلا الاهم انى اجيب المجموع وبعدين افكر فى حكايه الكليه
وحكايه حبى للطب او لا دى كل بنت نفسها تتدخل وتبقى دكتوره بس انا مش عارفه
انا بحب الملابس جدا وبحب اصمم لبس جدا وبرضه الفنون التطبيقيه درجتها مبتقلش عن 98 بس صدقينى اذا جبت مجموع حلو هعمل مناقشات كتيييييييييييييره وهسئل نفسى وهبقى ارد عليكى
اوك؟

Unknown said...

اشقى بنوته
ماشى ياقمر
المهم تكونى عارفه انتى عاوزه ايه فى كل خطوه
وزى ما قلتلك كل شىء بالترتيب
ربنا يكرمك يارب وتجيبى اعلى مجموع وتطلعى من الاوائل
وتفرحى ماما وتفرحينا
بجد بجد
الفرحه بالنجاح وخصوصا المجموع لا تقااااااااوم
ان شاء الله تدوقيها

ابن سينا said...

معلش هو طريقنا طويل كده
حتى بعد ما اتخرجنا لس المصاريف لزوم الدراسات و الكتب و المراجع ربنا يرحمنا

dr_mon said...

هههههههههههههه
أهم حاجة يادكتورة
ماتنسيناش فى التبرعات اللى توصل

غموض said...

بجد انتى دمك زى العسل بس اهم حاجة التبرعات بالنص ها اية رائيك