Friday 8 February 2008

حياتي من غيرك كابتشينو




في حركة جدعنه غير مسبوقة قررت أنا وصديقتي" الشيخة رحرح" كما تعودت أنا أدللها - حيث أن من حق الطويل يدلع- أن نلتحم بطبقات الشعب المطحونة ونذهب لأحد أشهر مطاحن البن في الاسكندريه والذي تجذبك رائحته من على بعد 6 حارات لتناول واحد من ثلاث مشروبات أدمن عليهم وهو الكابتشينو

ولان أختكم لا يتجاوز طولها بضع سنتيمترات فقد قامت رحرح متفضلة بإعطاء بون الشراء " لدكتور الكابتشينو" كما أسميته وكانت معاناة ما بعدها معاناة بالنسبة لي للوصول لهذا الكوب الدافئ في يوم من أيام طوبة الذي جعلني كركوبة وفضلت احايلة ميردش أقوله انزل يقولى اللي عاوزنى يجيلي كده برضه يا سونة يا خاين وبعد معاناة للوصول ابتدت الحرب مع تفريغ محتويات أكياس السكر البنية اللون وقد تمكنت قواتنا من الوصول للهدف واقتحام هذا السد المنيع وذلك بعد تقديم الشيخه رحرح يد العون معي في تقليب هذا الكوب المستعصي

ولأن" اللماضه" في دمي قررت الانتقام قمت طلعت بنظري كده - أيام ما كان عندي نظر- ونظرت نظرة ثاقبة لطبقة الأوزون لدكتور الكابتشينو ونهرته بشدة : مش تعملوا حساب الناس اللي في الأرض وتخلوا البار تحت شوية اعمل إيه أنا دلوقتى مش كمان بشرب الكابتشينو للركب على الواقف وكمان مش عاوزني أطوله
دكتور الكابتشينو في ابتسامته المعتادة يشير في صمت لإحدى الأركان حيث يوجد به حافة طاولة قصيرة إلى حد ما تستخدم للأطفال

احم احم تنحنحت في خجل وهمهمت : أنا اللي جبت ده كله لنفسي
ومحاولة لتدارك هذا الموقف قلت له : تسلم أيدك على الكابتشينو طول عمري بقول عليك دكتور


وبينما أنا أسهب في الكلام عن هذه الخلطة السحرية وكيفية صنعها واخراجها بهذا الفوم المليان إذ أرى على مرمى بصري - أيام ما كان ليا بصر- لافته عجيبة نوعا ما تحمل الآتي

ممنوع التدخين للسيدات


قمت بجذب رحرح من طرف عباءتها لاستئذانها في النزول لأحدثها : شايفه كاتبين إيه ناس ذوق ذوق صراحة
مش عاوزين الرجالة تدخن حفاظا على مشاعر السيدات المرهفات و الأطفال الرضع وحديثي الولادة

رحرح : يابنتى لا دي أكيد قصدهم إن الستات هما اللي ميدخنوش بس غريبة الحكاية دى
أنا : طيب ما كانوا كتبوا ممنوع التدخين وخلاص اشمعنى يعنى السيدات لا هي أكيد زى ما بقولك كده
ولكي اقطع الشك بالسكين عن مغزى هذه ألافته لم أجد استشاري أمامي إلا دكتور الكابتشينو

(أنا : إلا قولي يا ريس ( على اعتبار أن هذه الكلمة ذات صدى ارهابي عفوا ايجابي ومن أحب الكلمات لأذن الشعب المصري
انتوا كاتبين ممنوع التدخين للسيدات تقصدوا إن الرجالة يمتنعوا عن التدخين عشان خاطر السيدات الفضليات حفيدات ابلة حكمت ولا تقصدوا إن ألطف الكائنات نفسها تمتنع عن التدخين

يجيبني مقاطعا : ايوه حاطينها عشان فيه سيدات منقبات بتدخن سجاير هنا وشكلهم بيبقى وحش

أنا : اممم يعنى عشان واحده منقبة عملت كده تكتبوا الكلام ده طيب؟
في سري: وازاى تعمل كده مش يمكن البيشه تولع هي حابكت يعني الليلة يا عمدة؟

الدكتور : لا مش كده كذا واحده منقبة ومحجبة عملتها وشكلهم مش مستحب

أنا : امممممممممم يعنى لو كانت بشعرها وبتدخن مكنش فيه مشكله ماكنتوش علقتوها

الدكتور : لا إحنا مكتبناش كده إحنا نقصد المصريات لأنهم لما يدخلوا يدخنوا كده شكلهم يعنى مش ولابد

أنا : امممممممممممممممم يعنى لو واحده صابغه شعرها اصفر أو مش مصريه عادي تدخن لكن العيب إنها تكون مصريه ومسلمه ومحجبة أو منقبة لكن غير كده براحتها وكمان الرجالة عادي لما يدخلوا يدخنوا البيت بيتهم

الدكتور : أصل فيه هنا زباين منقدرش نزعلهم

أنا : امممممممممممممممممممممممممممماشى
( وانغمست مرة أخرى في شوب الكابتشينو)

كلمة أخيره

عيب كده يا ستات كسفتونا

59 comments:

Anonymous said...

هييييييييييييييييييييييييييه
اول تعليق

هقرأ وبعدين أرجع

بطوط حبوب said...

لالالالالالالالالالا
انتى فاهمه غلط خالص
دا الراجل بيقول ان الستات قدرتها على التحمل كبيره فممكن تستحمل طول ما هى الشارع ولحد ما تروح وبعدين تدخن زى ما هى عايزه
انما الرجاله غلابه مش قادرين يتحكموا فى نفسهم
شفتى ظلمتى الراجل
روحى قولى عمو انا اسفه

سندباد said...

مساء اللماضة
كل ما احب اضحك اجي هنا
يربنا يخليكي للناس اللي عايزة تضحك
تحياتي

mo'men mohamed said...

هههههههههههه
انصحك انك تلعبى عقلة
وأنحك برده انك تربطى فى رجلك أستيك و أنت بتلعبى عشان يبقى المفعول أعلى
وعلى فكرة انا مش مقتنع بحتة المنقبات اللى بيشربوا سجاير دول
السلام عليكم

دنيتى الجميله said...

واحد كابتشينو وصلحو
واحد كابتشى هنا لاحلى لمضه
وكرسى طويل من غير مسامير
هههههههههههههههه
فعلا يا لماضه
عيب يا ستات كسفتونا
المنتقبات الغير ملتزمات حرام عليكم
اسأتوا لكل المسلمات
وسلامى للدكتور كابتشينو

دكتور حر said...

خلتيني اسقع

وبعدين أدفا

واشرب

واستغرب

وبعدين اضايق

صح كده؟

منكم لله يا ستات

تدوينه معقوله يا لماضه
بس الكلام لازم نعكسه وننزل بيه للشعب اللي بيدخن ده

واحده واحده
ربنا يسترها معانا

دمت بكل خير

مي بهاء الدين said...

لماضتي اللمضة

دلوقتي بأه دخلنا في منطقة ماكنتش عايزة أدخلها..بس أمري إلى الله
يعني يا أيها المجتمع الذكوري الغير عزيز..الذكر ليه حق يحرق في صدر سعادته
ويدمر الرئتين عاااااادي
يعني هوه سيادته يعني لما هاييجي يتحاسب في موقف عظيم يوم لا ينفع مال ولا بنون..ويتسأل عن صحته حافظ عليها ولا لأ...هايكون الحساب مختلف يعني عن الأنثى اللي عملت كده؟
والله الحساب واحد والأذى عالصحة واحد
يعني مش مجرد ان الست المجتمع بيبصلها بصة وحشة لما تدخن ده يدي الحق للراجل انه يدخن...التدخين لازم يمنع عالرجاله والستات..وكل البلاد الأوروبية دلوقتي عاملين حظر على التدخين رجاله وستات مافيش فرق...كده تبقى مفهومة

ويعني لوالست دخنت في الخفاء عشان الشكل الإجتماعي وكده يبقى أوكيه؟
يعني مش مهم صحتها..أهم حاجة المنظر

لإمتى بقى هانفضل سلبيين بنركز عالمظهر وبس..وامتى هاناخد موقف إيجابي يخلينا متحضرين ومانخليش حجتنا السخيفة بتاعة أطلع همي في السجاير هيه الشماعة بتاعتنا
همنا هايزيد مش هايقل لو طلعناه في التدخين

أسفه على الإطالة
أطلع همي في إيه أنا دلوقتي؟
:)

ابن حـجـر الـعـسـقـلانـى said...

المعاناة فى طريقة التعامل مع فنجان الكابوتشينو فكرتنى بطريقة إعداد الأسمنت المسلح

أنا شوفت مدخنات كتير جدا .. على كل شكل و لون .. بحكم إنى زبون مستديم للقهاوى .. لكن ما شوفت "المدخنة ذات النقاب" دى .. طب مش كنتى تصوريها

فاتيما said...

لماضة يا طعامة
الف هنا الكابتشينو ..انتى اسكندرانية كمان يا بنتى ..دانا هحبك لميت سبب وسبب أول الف منهم انك من اسكندرية ..أنا عشت فيها 6 سنين كانت الحضن والسكن والملاذ ..و بأعشقها فى الشتا عشق موت وبغير عليها فى الصيف من المصيفيين ..سلامى لكل حتة فيها وخلاص بقالى أصدقاء حلوين هناك..
اما موضوع المنقبات المدخنات فأنا متفقة تماما مع مى بهاء البهية ..التدخين أصلا لازم يتمنع ع الراجل والست .. بس صحيح شكل المنقبة مستفز أكتر من بنت عادية أو محجبة..لكن على فكرة انا لاحظت الحكاية دى انو كل ما تعملى مظاهر التزام أكتر كل ما تزيد الرغبة فى كسر القيود اكتر ..البنات بتركب تاكسى مخصوص عشان تدخن ..حاجة غريبة ..؟؟ المفروض يمنع التدخين على الجنسين احتراما لصحة كل من يدخل الكوفىشوب ومنهم انتى يا كتكوتة ..
تحياتى

L.G. said...

هي الماضة عيب مظنش بس زمان كانوا بيقولوا لمضة يعني عندي رأي متهيألي يعني
المهم جميلة التدوينة فعلا عند محلات الهدوم أحيانا حتى البائعات بتكون الهدوم بعيدة عن متناول ايديهم معرفش ايه الحكمة مع ان بنات مصر لا يمتازوا بالطول الفارع
كمان حكاية المدخنين طبعا المفروض التدخين ممنوع بس تصوري عندهم حق عارفة ليه المنقبة أو المحجبة أهم تلتزم عن المتبرجة من وضع تلك اللافتة غار على دينه هو مش على المرأة
أنا شايفة مادام لبست الحجاب تحترمه المتبرجة ربنا يهديها ليست ملتزمة بقوانين الاسلام عادي لا تلتزم بقوانين المجتمع
الموضوع حلو بجد

A long distance said...

على كده كلمة قصيره قليله عليكي يا لماضه
هههههههههه
وبعدين الستات بقيت تدخن في اي حته دلوقت
سجاير وشيشه
وعادي

Unknown said...

دكتور خليفه
طيب كده عليك غرامة تأخير وكمان غرامة مكان :)) اقرا وتعالى قولى رايك
,,,,,,,,,,,,,,,,,,,,,,,,,,,,,,,,,,
بطوط الحبوب
هههههه يا سلام قدرتها على التحمل والله انا اتغاظت جدا انا عارفه الرجاله دول مظلومين دايما
,,,,,,,,,,,,,,,,,,,,,,,,,,,,,,,,,,
سندباد
مساء الورد عليك الله يكرمك :) وانا بتسعدنى زيارة حضرتك جدا
,,,,,,,,,,,,,,,,,,,,,,,,,,,,,,,,,,
مؤمن محمد
هو انا لسه هلعب اللى كل شىء راح وانتهى خلاص والله انا دايقتن قو كلمته فعلا وبعدين ادايقت اكتر انه خص السيدات بس ما كان كتب لا للرجاله وخلاص
,,,,,,,,,,,,,,,,,,,,,,,,,,,,,,,,,,
دنيتها الجميله وانا كمان
ههههههه هو فين كنت محتجاله الكرسى ده قوى والله والله ياريت اسائوا وبس كمان اللى غاظنى التفرقه العنصريه فى شىء اصلا خطأ
,,,,,,,,,,,,,,,,,,,,,,,,,,,,,,,,,,,
دكتور حر
انا معاك نعكسه ونطبقه رجاله وستات بجد نفسى التدخين يتمنع من مصر كلها
وبعدين انت كده لازملك دكتور بعد التغيرات المناخيه دى كلها :)
,,,,,,,,,,,,,,,,,,,,,,,,,,,,,,,,,,,
مي بهاء
والله يا مي عندك حق وكلامك ده فعلا هو اللى جه فى بالى وقتها ودايقنى ولما قلت اشمعنى الستت بس ما التدخين غلط لاتنين قالى لان فيه زباين لينا رجاله بيدخنوا ومنقدرش زعلهم ربنا يارب يعافي كل الناس منها
,,,,,,,,,,,,,,,,,,,,,,,,,,,,,,,,,,,
ابو العساقيييييييل
هو انا لو كنت شفت واحده بدخن منقبه كنت هسيبها كنت هطبق فى زمارة رقبتها طبعااااااا بس ياريت على كده وبس ما كانوا كتبوا ممنوعالتدخين للاتنين اشعجب الستات يعنى؟؟
,,,,,,,,,,,,,,,,,,,,,,,,,,,,,,,,,,,
روح قلبى ماما فاطيما
الله يهنيكى يا ست الكل ياريت والله تنورينا وانا اعزمك على اجدع كابتشينو فى اسكندريه كلها
بس فعلا انا ادايقت جدا من كلام الولد وحاول ادافع عن المقبات لاقيته بيقولى انهم اكتر منواحدهوكمان محجبات ادايقت اكتر المشكله انه مش قهوة عارفه لو قهوة كنت قلت ماشى انما ده محل البن البرازيلى لو تعرفيه اللى اول المنشيه فى شارع سعد زغلول يعنى مكان محترم بيقدم مشاريب فقط مش قهوه كمان دايقنى انه خص السيدات فقط يلا الله يصلح الحال
,,,,,,,,,,,,,,,,,,,,,,,,,,,,,,,,,,,
اى . جي
لا طبعا اللماضه مش عيب اللماضه جدعنه :) اه والله محلات الهدوم دى كمان ولا السوبر ماركت بس بتصرف برضه بخلى حد يناولنى مستغله انا ايوه بس الكلمه صعبه اوى وغريبه ممنوع للسيدات بس حقيقى حسيت بالاحراج والكسوف خصوصا انها مش قهوه تحياتى يا قمراية
,,,,,,,,,,,,,,,,,,,,,,,,,,,,,,,,,,,
a long distance
الله يبشرك بالخير :) فى كل حته وبعدين احذر كل من اقترب من الارض (ضحكة شريرة(

Hossam said...

هالو لماضة ازيك مدونتك حلوة بس مش اوى
اصلى بتلامض وخدى بالك منى بقى انا 15 سنة يعنى اللماضة.0 كلها ولمض على لمضة مينفعوش

صوت من مصر said...

على فكره انا راجل وبخن ومفيش مشكله ان البنت او اغلسيده تدخن ليه هى السجاير مكتوب عليها للرجاله فقط ولا ايه وعموما كابتشينو بالهنا والشفتشى يالماضه
مفيش شويه بقا

rainbow said...

الصديقة العزيزة وحشتينى جدا

اخيرا عاد النت واصلحت جهاز الكمبيوتر التعس ! بجد وحشتينى بطريقة وحشة

اولا حروبك الصغيرة والكبييرة فى سبيل الحصول على حقك الطبيعى فى الشراء والتعامل لاغبار عليها .. استمرى يا بنتى ربنا يوفقك ! وبالهنا والشفا الكابيتشينو المدكتر على اساس اللى عملوا داكتور وانتى ست الداكتورة !

ثانيا نيجى للمهم واللى ممكن كنت اسكت لولا شوية تعبيرات كده فى حكايتك فرستنى .. مش منك طبعا من الموقف ككل .. المجتمع الذكورى العجيب الذى نعيش فيه اصبح غير محتمل حقا اكيد اللى وضع اللافتة رجل واللى اشار بيها رجل واللى انتى سألتيه عن فحواها كمان رجل واللى من حقه يدخن فى اى مكان رجل واللى بيصدر وجهات نظر مظهرية على اى ست رجل .... ليه كده التدخين قاتل للرجل والمرأة والطفل اذا سمح به فليسمح دون تحديد واذا منعه فليمنعه عن الجميع

عندما نمنع التدخين فى مكان ما ليس هذا تدخلا فى الحرية الشخصية فالمفروض انها مكفولة للجميع شريطة الا نؤذى بها احدا وعندما نكتب ممنوع التدخين نمنعه لاذاه على الغير مدخن لم نحدد رجل ام امرأة فالدخان نفسه لايميز اى رئة سيدخل ويدمر ! 0

اعرف انى اطلت لكنى حقا اكره التمييز واكره ان يمنح ويمنع الرجل شيئا لا يملكه اساسا !0

حبى الخالص ومودتى الصافية

هدى

هشام علاء said...

عزيزتى لماضة

انا ماقدرتش امسك نفسى و انا بقرا البوست بتاعك و جاتلى نوبة ضحك كانت هتقلب على بكاء هستيرى على ما وصلنا اليه من تدهور فى افكارنا و سذاجة

مافيش مكان فى العالم ممكن تلاقى فى يافطة زى دى غير مصرنا المحروسة

احنا بتوع ازدواجية الشخصية و الافكار و احنا اللى بدعنا المعايير المزدوجة و الكيل بمكيالين مع الاحتفاظ بحقيقة ان العلم لا يكيل بالبتنجان

و الحقيقة انه لا يوجد لدينا ما يسمى باحترام القانون لان القانون اصبح اداة تلويح فى يد من يمللك القوة فقط لكن القانون نفسه ليس له اى حول و لا قوة و اصبح السائد عندنا هو قانون الاهواء الشخصية يعنى من الاخر كده كله ماشى بمزاجه بصرف النظر عن القانون او حرية و مشاعر الاخرين و الدليل فى كلام الدكتور كابتشينو الاخير عن الزباين اللى ما نقدرش نزعلهم يعنى الموضوع ليس له علاقة بالذوق او اللياقة او اى شىء و انما بالمزاج

عامة الكابتشينو مفيد للسقعة جدا فى الجو ده و تحياتى للشيخة رحرح و احنا اكيد قرايب لان اصدقائى بينادونى كبير قبيلة الرحرحنية (بجد مش هزار

تحياتى ع البوست و الى اللقاء

http://kasperb4.blogspot.com/ said...

في فرق كبير جدا بين واحدة منتقبة وواحدة ملتزمة
في بنات وستات لابسين النقاب مش التزام ولا تدين
لكن لابسينه كده على سبيل العرف او التقاليد
بمعنى ان العيلة بتاعتهم يعني معندهمش حريم ينكشفوا على حد
في ناس كده فعلا وانا شفتهم بنفسي

كنت قاعد مرة ف محل كشري ودخل علينا اتنين بردو منتقبين من النوع التايواني ده
وفجأة اول ما دخلو لقيتهم خلعوا البيشة وهاتك يا أكل ولا كأن في رجالة قاعدة وهتشوف وشهم

يبئا دول مينفعش نخلط بينهم وبين المنتقبات الملتزمات

ياريت النقطة دي تكون واضحة

وعندك واحد كابتشينو والحساب عند لماضة صاحبة المدونة
:D

احمد الجيزاوى said...

يعنى ايه
بصى احتياتى الله يسمحم
لخيت مفهم فى ايه

ههههههههههههههههههه

بجد رائعه يا لماضه
تعرفى لمه قولى لماضه فى معرض الكتاب وانا يومه مرحتش وكبرت وقلت مين لماضه دة
ولمه نصحونى اخش مدونتك
بصراحه
انا بعترف علشان فى ناس تنيه مش حضرتك طبعا
فى ناس تنيه اهو انا بعترف يا ناس يا تنيه تكسبه الرهان
(توضيح صغير ناس كتير رهنونى انى لمه اخش مدونتك هنبهر )وحصل وكسبه الرهان

لماضه فعلا لماضه والمركز الرئيسى لماضه والتوكيل لمضكم فى الشرق الاوسط

تحياتى
لنبهارى باسلوبك
يا دكتور ة
وربنا يكفينا شر الحقن
احمد الجيزاوى

Ahmed Mubarak said...

ازيك يا لماضه
انا مكنتش اعرف إن الاخت لماضه بتاعني من الطول كدة
وكالعادة دمك شربات
:D:D
الراجل برضوة ليه وجهة نظر نصها صح ونص غلط

اولا التدخين حرام للرجاله والسيدات مش حرام للسيدات بس او الرجاله بس

بس هوا عايز يكسب فلوس..فمنعش موضوع التدخين رغم إنه هيسأل عنه قدام ربنا..بس الراجل لسه فيه حبه غيرة على دينه وبنات بلدة بدليل إنه مش عايز البنات والمنقبات خاصه يخلوا شكلنا وحش..لأننا اتربينا ان الست كائن رقيق محترم اوي اوي وبيتكسف جدا وغالبا اخلاقه احسن من الراجل ..
فندعيلوة بالهدايه
انا مش ببرر ليه لكن بحب أشوف ديما النصين المليان والفاضي من الكوبايه

هيطلعلي من منظمة تحرير المرأه..إنت مش عجباك المرأه..وانت ضد الوحدة الوطنيه وتقطيع الملوخيه..

يا جماعة التدخين وحش للرجاله والستات..
ولكن هوا فعلا اسوء للستات لأن 80 من المدخنين على الاقل رجاله في مصر فبنستغربها من الستات..وطبعا بنات مصر الحمدله محترمين جدا

ياريت بتوع تحرير المرأه بدال ما يضربوني يقولوا لا لتدخين السيدات مهياش حاجة جميله او فضيله تتخانقوا عليها يعني
طالبوا مثلا بحق المرأه في اختيار الزوج..دة حقها ..لكن تدخين ايه إلي تتخانقوا عليه
:)
شفتوا بابا أحمد ديمقراطي إزاي ..تحياتي
يا لمضه هانم

رئيس جمهوريه نفسى said...

الموقف مرسوم بدم خفيف كالعاده بس ليه عقده الخواجه يعنى اشمعنى الاجانب تدخن والمصريات لا

أحمد جلال said...

واضح إن الراجل و طني و مخلص و يساعد البلد في النهضة الإقتصادية العالمة السوسيولوجية الفكرية..يبقى ليه ترهقيه بالأسئلة دي كلها؟

Desert cat said...

بصى يا ست الدكتورة
للاسف احنا المفاهيم عندنا اختلفت خالص
يعنى الست الى بتدخن هى المودرن والتدخين لتكملة الشياكة
وفى ناس بيبقى نفسها تعمل الحاجة بس خايفة .. تعمل اييييييييييه ... تلبس النقاب اللى بقى بيبتلبس علشان يتداروا فيه ويرتكبوا ما يحلو لهم
تحياتى ليكى يا قمر

يا مراكبي said...

إنتي فعلا بتتكلمي جد؟ دول مجانين أكيد .. إديني مبرر واحد عقلاني يخليهم يكتبوا الجملة دي .. إحنا متخلفين للدرجة دي؟

هو العيادة بتاعة الدكتور ده فين علشان ما أروحلوش؟

Anonymous said...

اه معلش والله .... دكتور حر هو اللي خلاني اقوم ...
مش مشكلة بقي ...ابقي عرفيني الغرامة كام...ههههههه

حقيقي منهم لله الستات وخصوصا المنقبات اللي ممكن يسيؤ لسمعة الاسلام والمسلمين...ربنا يعافيكي

وبعدين انتي بجد شوقتيني للكابتشينوا بتاعك ده ..لما اااجي اسكندرية قريب هبقى ادور على واحد من اياهم

ومعلش والله اني مكتبتش امبارح

كاميليا بهاء الدين said...

شربتى الكابيتشينو؟

بالهنا والشفا

ههههههه

إنتى عسولة اوى والله

تحياتى لاحلى لمااضة

كاميليا

Layla said...

هههه..انا بقول نبعت جواب لسوزان مبارك ولمجلس حقوق المرأة عشان نلفت نظرهم للموضوع ده

احنا في القرن ال21 ومن حق الستات انهم يدخنوا ويجيلهم سرطان الرئة زي الرجالة بالضبط

بصراحة لوحة غريبة جدا..كان المفروض يخلوها ممنوع التدخين للكل..مش للستات بس

Unknown said...

حسام
طبعا يا لمض باشا اانت غلبتنى فى اللماضة :) اتلامض براحتك
,,,,,,,,,,,,,,,,,,,,,,,,,,,,,,,,,,
صوت من مصر
وبتدخن كمان وبتقولها فى هتضرب يا واد انت ومش هديك كابتشينو الا لما تبطل تدخين
,,,,,,,,,,,,,,,,,,,,,,,,,,,,,,,,,,
استاذتي الفاضلة هدى
والله انا بسعد جدا بزيارة حضرلتك ليا بحس انى حد مهم
عندك حق انا كمان اتغاظت جدا يعنى التدخين كله غلط يا تمنعه كله يا اما متكتبش كده اولا تفرقه عنصريه بين المصريين وغيرهم
ثانيا مصلحة المحل لانه خاف ازباين بتوعه يزعلوا
ثالثا الست والراجل فى التدخين سواسيه
رابعا انه فعلا بص للمظهر فقط
بس تعرفى انا بعدما طلعت زعلت قوى قلت فعلاالست اللى بتدخن شكلها مقزز للدرجه دى :( تحياتى لشخصك الكريم هو فعلا حاجه تزعل
,,,,,,,,,,,,,,,,,,,,,,,,,,,,,,,,,,
هشام
الله يكرمك هو ده الكلام انا متفقه معاك فى كل كلمة قلتها وهيوصل سلامك للشيخه رحرح ان شاء الله انا بس بحب اقولها كده لانها عارفه حاجات كتيرفى الدين بحب اعاكسها يعنى
,,,,,,,,,,,,,,,,,,,,,,,,,,,,,,,,,,
الام وامال
والله يا محمود يا خويا ربنا يهديهم بجد انا زعلت جدا
,,,,,,,,,,,,,,,,,,,,,,,,,,,,,,,,,,
احمد الجيزاوي
هههههههههه انا عارفه مين اللى دلك عليا واخد الرهان ادفعله بقى احسنلك ده ميعرفش حد وعندك واحدكابتشنو لاجدع جيزاوي الله يكرمك ده كلام كبير وكتير عليا
,,,,,,,,,,,,,,,,,,,,,,,,,,,,,,,,,,
احمد مبارك
تخيل بقى الطول ده ايه قصدك القصر ده :)اتفق معك يا سيدى فى كل حرف سطرته فعلا كل التساؤلات والكلام ده جه فى دماغى بس بصراحه اليافته كانت مستفزه كنت هموت واصورها وان شاء الله هصورها انا وراها والزمن طويل
,,,,,,,,,,,,,,,,,,,,,,,,,,,,,,,,,,
السيد رئيس الجمهورية
الله يكرمك يا ريس عقدة خواجه وعقدة الراجل يشرب براحته الست ترص الحجر بس:)
,,,,,,,,,,,,,,,,,,,,,,,,,,,,,,,,,,,
احمد المصري
هو انا لحقت اقول انا كنت متغاظه جدا
,,,,,,,,,,,,,,,,,,,,,,,,,,,,,,,,,,
قطتي
والله يا قطه المفاهيم كلها اضربت عندى مبقتش عارفه مين الصح ومين الغلط بجد الواحد مخه ضرب ربنا يهدى
,,,,,,,,,,,,,,,,,,,,,,,,,,,,,,,,,
يا مراكبى
اه والله بتكلم جد ان شاء الله اخطف رجلى اصورها كمان يارتنى كنت صورتها وانا واقفه الواد كان هيصورهلى انا اللى اتكسفت وخفت يقبضوا عليا
عيادته فى شارع سعد زغلول وانت داخل على المنشيه واحد بتاع بن مشهور جا بيبيع منتجات البن والكاكو وكمان عنده مشاريب عارفه وحش متشربش منه :))
,,,,,,,,,,,,,,,,,,,,,,,,,,,,,,,,,,,
دكتور خليفه
هههههههه خلاص سماح المره دى واالله انا ادايقت جدا لما قالى منقبه وقلتله بقى عشان واحده قالى دول كتير زعلت اكتر وحاولت اكدبه واقاوح معاه انه غلطان يلا ربنا يهدي ان بزعل قوى والزعل وحش عليا :)
,,,,,,,,,,,,,,,,,,,,,,,,,,,,,,,,,,
كاميليا
والله انتى اللى سكر الله يخليكى يا قمر ده من ذوقك
,,,,,,,,,,,,,,,,,,,,,,,,,,,,,,,,,,,
marvel
والله كنت هموت واصورها وا شاء الله هعملها اه والله عندك حق يستاهل يجيلهم بلاوي عشان يحرموا يدخنوا
:)) ههههههه

هبههههووب said...

أنا اول مرة ازور مدونتك
بس شكلها حلوة اوى
انا مش مع التدخين نهائى للراجل او للست لأنه حرام شرعا
وبيضر الصحه والسرطانات وووو
كل الكلام دا كلنا عارفينه واولنا المدخنين
بس المهم الارادة ف ان الانسان عارف ان دا غلط وعايز ميعملوش
المهم
ربنا مقلش على حاجه حرام وهو عارف ان الحاجه دى صعب اننا نبطلها
---
بستغرب اوى لما الاقى ستات قاعدين على قهوة وبيشربوا شيشه او سجاير...بقول يبقوا قدوة اذاى لأولادهم
no comment
---
سلام مؤقت
ياريت تنورى مدونتى

صالح سعيد said...

ازيك يا دكتوره لماضه
ايه الجمال ده
بجد الله ينور عليكى
تسلم ايدك

سهر الليالى said...

بقى افتكرتى ان لراجل كاتبها عشان الرجالة يراعو شعور الستات الفضليات
يا طيبة قلبك

ولا يا حرااااااااام طلعت بالعكس أن الرجالة خايفين من منظر السيدات
ههههه

لا حول ولا قوة إلا بالله

تحياتى وضحكتينى يا سكر

صوت من مصر said...

يا لماضه شرب السجاير غير مضر بالصحه ولا بالفلوس لان الحرامى مش هيلاقى حاجه يسرقها من الفقر يا لمضه

media said...

جميل اوي الحوار ده
فكرتينى ب اعز صديقاتى
احنا كمان لينا حكايات مع الكابتشينوا
وهي بالذات اكتر مدمنه كابتشينوا
مش عارفه بصراحه ايه حكايه الكابتشينوا مع الناس

انا حاسه ان في يوم من الايام انهم ممكن يعملوا سجايركا بتشينوا


وبالنسبه للستات سواء محجبه او غير
انا مش بحترمهم سواء في مكان عام او مكان خاص
وانا شوفتها كنت بعمل حوار مع فنانه والدتها كانت بدخن بصراحه مكنتش مستريحالها

الفارس الملثم said...

انا قريت اغلب المدونةوهي بجد جميلة اوي
وبمناسبة الكابتشينو ياريت تقلنا ,
المقادير عشان الواحد يشربها في بيته بدل البهدلة دي

وربنا يستر متلقيش المرة الحاية مكتوب ممنوع دخول العالم اللمضة

عصفور المدينة said...

هو إيه المشروبات التانية اللي انت بتدمنيها
:)
نفسي أعرف مشروب اللماضة اسمه إيه عشان نكتب ممنوع مشروب اللماضة لطلبة الطب

Unknown said...

لذيذه المدونه دي قوي
وبعدين حضرتك زعلانه ليه ان حضرتك قصيره
هو حد طايل

هههههههههه
طايل برضه
مفيش فايده
......
بالنسبه للمنتقبات اللي بيدخنوا
انا اعتقد انهمه من دول عربيه
خليجيات يعني
وهمه بينتقبوا مش دين
لا عاده
زي الايشارب عندنا
..................

عجبني جدا الالتفات الضميري في كسفتونا دي
وفيه قيمه تربويه عاليه جدا
فبعد حديث لطيف
به نقد ساخر للواقع في شكل اسئله بريئه
وبعد ان تركت للقارئ ان يستنكر هذا الفعل المشين!!!من أصحاب المحل لتعليقهم اللافته
صدمت القارئ بسبب الاستنكار الرئيسي
ألا وهو تدخين السيدات
رائع
بجد رائع
تحياتي
والى الامام

Empress appy said...

اولا انا طويله ومعنديش مشكله فى شرب الكابتشينو ولا المسكافيه ههههههههه وانا عرفاكى كام سم وقولت لكى
اما بقى يا اختاه يا دكتوراه المنقبات اللى بينيلوا الدنيا ربنا يهدى مش عاوزة اقول حاجه تانيه وبصراحه مش عاوزة واحده تقولى لا دى بتسئ لنفسها مش للاسلام لا معلش بقى بتسئ للاسلام هو محدش شايفها هى مين انما هيقول دى مسلمه ما هى مش مسيحيه ولا اى ديانه تانيه ولابسه كده
هرد بس على واحد هنا بيقول ممكن يكونوا خليجيات لا يا عمنا الخليجيات بيقلعوا كل حاجه فى مصر بصراحه وتعالى اتفرج عليهم فىالقاهرة وانت تعرف بعض منهم والقليل هو اللى بيفضل لابس الطرحه ونص شعرا باين
واخير اتكسفى براحتك احنا بقينا فى زمن مفهوش حياء

مشمش said...

ستات اية ورجالة اية واية علاقة السجاير بالاخلاق المشكلة انها غلط علي الصحة ودي نعمة ربنا مدهالنا لازم نقدرها كتكو القرف مليتو البلد

أشرف حمدي said...

يخرب عقلك
مدونتك تحفة ، وأسلوبك في السخرية أكتر من رائع بجد
ياريت نتواصل من خلال البريد
ashraf_hamdi@hotmail.com
لازمن تشاركينا مجلة القرطاس
حبقى أقولك على التفاصيل
تحياتي لموهبتك الفذة

Doba said...

مليش دعوة انا عاوزة فنجان كابتشينو مكتوب عليه دوبه

بجد مليش دعوة بقى اعملولى واحد لانى بحب النيسكافيه والقهوة جدا

هعيطلكو هنا
عاوزة فنجااااااااااااان
=======
عسل كعادتك يا لماضة يا مرات ولدى
عادى هيتنيه تخلف الراجل على خوفه على شكله والستات هتفضل عبيطة ومستهترة وبجحة

والعوض على الله فيما يتبقى
تحياتى
هبة

مروة الزارع said...

امممممممممممممم

كابتشينو من غيرى

خياااااااااااااااااااااااانة

عاااااااااااااااا
عاااااااااااااااااااا
عااااااااااااااااااااا

اسكندراني في الغربة said...

اية الانحلال الي و صلنا لية دة؟
بقي يمنعوا السيدات المهزبات المحترمات من شرب السجاير و يسموا بشرب الكابتشينو
:(
:(
:(

و القادم....أجمل said...

ارررررررحمي نفسسسسسسسسسك
يا بنتي اخرتك وحشة
لمااااااضة لمضنه
:\
بس الكابشتينو دا بيتشرب
و لا بيتخد في العضل
؟؟!!!!!!!!!

بس يعني مكان يمنع التدخين كله
ال منظرهم وحش ال
يا سلام سلم يا دكتور كابشتينو
نزل من عيني ايوه و الله


لماضة يا بنتي
انتي فعلا لمضة
بس سكرة

:)

only spot said...

عارفه مشكلتنا اننا سطحين بجد ومش قادرين ننضج بقى يعنى مبدا التدخين الى بيدمر الصحه والى بيتعارض مع الايه الكريمه ولا تلقو بايديكم للتهلكه تجهلناه انما ان ست تدخن لا عيب ياى دى صيعه ومش محترمه لكن لو ولد دخن اه عادى اصله راجل
بلى خيبه يا شماتت طنط مريكا فينا
امتى بس هنبطل سطحيه مش عارفه وبعدين كده تشربى كابيتشينو لوحدك طب اعزمى طيب
تحياتى ليكى على هالتدوينه

Soul.o0o.Whisper said...

لماضة

ايه الجمال دا يا بنتى
بجد مدونتك تحفة

أول مرة صحيح بس ان شاء الله مش هتكون الاخيرة

تحياتى لكى و لشخصك الغالى

بس تعرفى
انا مش هاستغرب ان يبقى فى منتقبات مدخنات
اصل الوقتى بقى فى ناس كتير بيلبسوه موضه

و اهو تغيير بردوا

انما فعلا الغريب انه يكون ممنوع التدخين للسيدات
فين المساواة؟؟

أنا أطالب بالمساواة
:)

شكرا ليكى

حقى اهرتل said...

نفسى اقرالك اول قصه عشان ده الشرط الوحيد لعمار اغبنى عشان يوافق ع الخطوبه

white Angel said...

هههههههههههههه
الطف ما في الموضوع اسم صحبتك دي
ومتغاظه اوي من موضوع الكابتشينو دا وانامش فيه... ما علينا

نرجع بقي لموضوع السجاير
انا بس عاوزة اقولك حاجه مهمه اوي علشان مش نفكر كتير . دلوقتي يا لماضه كل معاير المحافظه والادب والاصول والاخلاق واللي يصح واللي ميصحش كلها كلها اتلغبطت واختلط فيها الحابل بالنابل
مش عاوزاكي تستغربي من اي أمر مغلوط بتشوفيه لان الان بقيت الاصول والعرف لها مقاييس نسبيه يعني اللي زيي وزيك وشايفين ان في وضع غلط في غيرنا كتير شايفين ان دا حرية شخصية ومحدش ليه دعوة

ما علينا


تحياتي
good Post

الـسـيـدة نـون said...

والله يا لماضة
الموضوع ينشق على نقطتين
انا معاه ان الستات ماتدخنش
بس اشمعنى الستات
مايكتب ممنوع التدخين وخلاص
يبقى اذا كان المدخن من حقه انه يدخن يبقى الغير مدخن من حقه انه يشم هوا نضيف
وبعدين بصراحة مبرر الدكتور مش منطقى
يعنى ايه اصل المجبات والمنقبات شكلهم مش حلو
اى نعم هما فعلا بيكون شكلهم مش حلو ومش لايق مع اللى هما لابسينه
بس الموضوع مالهوش دعوة باللبس
وعلى رايك يعنى لو خوجاية دخلت المحل تدخن عادى باعتبار انها مش مصرية ومش محجبة
ايه الكلام الفارغ ده
مايمنعوا التدخين كله وخلاص
سلام
اختك خيخة

mohamed said...

اه صحيح هى المنقبه دى شربت سجاير ازاى ممكن تكون عاملة فتحة فى النقاب عند بقها ولا موصله السيجارة بخرطوم ومدخلة الخرطوم من تحت النقاب يلا مش مهم المهم الكابتشينو كان كويس ولا لأ لو كويس يبقى اكتبى عنوانه وقليلة انا عملتلك دعاية ع النت وعايزة اشرب ببلاش

Unknown said...

اه على فكرة حكاية المنتقبات الى بيدخنوا دى صحيحة بشوفهم على طول على قهوة الفيشاوى بيدخنوا شيشة كمان

بس رحرح و من حق الطويل يدلع : D

انتى عسولة اوى يا لماضة

دكتور حر said...

كنت عاوز أسالك على واحده زميلتك اسمها ميرفت الصافي
لو تعرفيها يا ريت تقوليلي

saso said...

حلو البوست اولا
عاملة اي ف برد اسكندرية
ولا مش برد اليومين دول صح
ما علينا
حلو اوي انك سالتي شوفي كان في كام بنت شافت التنبيه ومهتمتش او سالت
--
الحق علينا لما بنسكت
لو كل واحد دخل سأل ليه اللي مكتوب ده واعترض كان صاحب المكان شاله ولو من باب الزهق
فهماني
ياريت في منك كتير يعني
:)

Unknown said...

هبهههههوبه
الله يكرمك هو د الكلام هجيلك جري
,,,,,,,,,,,,,,,,,,,,,,,,,,,,,,,,,,,
صالح سعيد
ازيك يا ريس وعليك يا افندم ايه رايك مش يستاهلوا ؟
,,,,,,,,,,,,,,,,,,,,,,,,,,,,,,,,,,,
سهر الليالي
شفتي يا سهر يا ختى ده انا غلبااااااان
,,,,,,,,,,,,,,,,,,,,,,,,,,,,,,,,,,,
صوت من مصر
ياسلاااااااااااااام انا وراك لحد ما تبطلها
,,,,,,,,,,,,,,,,,,,,,,,,,,,,,,,,,,,
لولا
عندك حق
ياريت تحدفيلى سجارتين كابتشينو :)
,,,,,,,,,,,,,,,,,,,,,,,,,,,,,,,,,,
الفارس الملثم
لا طبعا يا افندم ده ان مبسوطه جدا باهتمامك ده ومنورني اى وقت وكل وقت
,,,,,,,,,,,,,,,,,,,,,,,,,,,,,,,,,,,
بابا عصفور
عصير القصب والخروب والكابتشينو
ومشروب طلبةالطب عصير قصب يوميا مده 6 سنين :)
,,,,,,,,,,,,,,,,,,,,,,,,,,,,,,,,,,,
انسان
انا مبسوطه بتعلقيك جدا بجد
وبعدين ايه ياعم قصيره اه احذر كل من اقترب من الارض :)
,,,,,,,,,,,,,,,,,,,,,,,,,,,,,,,,,,
ابيي
استرى عليا الله يخليكي :)والله خليجيا ومصريات وكله لكل قاعده شواذ بس المشكله السيئه بتعم
,,,,,,,,,,,,,,,,,,,,,,,,,,,,,,,,,
مشمش
كنت هموووت واقول الكلمه دى فعلا ملوا البلد والله
,,,,,,,,,,,,,,,,,,,,,,,,,,,,,,,,,,
دكتور اشرف حمدي
علم وينفذ يا افندم
,,,,,,,,,,,,,,,,,,,,,,,,,,,,,,,,,,
هبه حماتي
نسكافيه بس وعندكواحد كابتشينو جامد اوى وصلحووووه :)
,,,,,,,,,,,,,,,,,,,,,,,,,,,,,,,,,,
مروه سلطه
بعينك يا مروه انتى تعملى دايت ممن اديلك قهوه ساده هع
,,,,,,,,,,,,,,,,,,,,,,,,,,,,,,,,,,
اسكندراني متغرب
شفت الانحلال ههههه وعينى عينك كمان بنشربه
,,,,,,,,,,,,,,,,,,,,,,,,,,,,,,,,,,,
ولاء والقادم اجمل
لا يا بنتى متخافيش عليا انا اخدت حقي
,,,,,,,,,,,,,,,,,,,,,,,,,,,,,,,,,,,
ONLY SPOT
الله ينور صراحه مش عارفه انا امتى الناس دى هتستوعب ليكى واحد كاتشينو ومج هديه
,,,,,,,,,,,,,,,,,,,,,,,,,,,,,,,,,,
Soul.o0o.Whisper
ههههههه مساواة ايه انا عوزاهم يمنعوه اساسا الله يكرمك ككذوق المدونة وصاحبتها تحت امرك بجد نورتينى
,,,,,,,,,,,,,,,,,,,,,,,,,,,,,,,,,,,
ابو عمار حمايا
طيب قولى اعملها ازاى وانا اقول على طول المهم ترضى عني وتجوزني ابنك :)
,,,,,,,,,,,,,,,,,,,,,,,,,,,,,,,,,,,
الملاك الابيض الجميل
فعلا عندك حق معاير كتر اختلطت علينا ربنا يسترهابجد
,,,,,,,,,,,,,,,,,,,,,,,,,,,,,,,,,,
حماتي خيخه
ايوه والله يا حماتي قلتله انا اتغاظت قوى مسكتش برضه بس ايه النور ده منوراني يا نورا والله بجد بفرح قوى لما بلاقيكى
,,,,,,,,,,,,,,,,,,,,,,,,,,,,,,,,,,,
محمد
ليه هي منقبه من مدرسة المشاغبين :)
وبعدين انا لو قلت كده فى المحل مش بعيد يخلينى اسيقه هههههه
,,,,,,,,,,,,,,,,,,,,,,,,,,,,,,,,,,
عالياااا
هههههههه اه والله مدلعاها اخر دلع
,,,,,,,,,,,,,,,,,,,,,,,,,,,,,,,,,
دكتور حر
وصل يا افندم
,,,,,,,,,,,,,,,,,,,,,,,,,,,,,,,,,
ساسو
ههههههه طيب انا جاتلى فكره دلوقتى
نروح نعمل مظاهراه كمان
ممنوع التدخين خالص
لا ستات ولا رجاله

د.دغيدى said...

اولاالسلام عليكم
ثانيا بالهنا والشفا على الكابتشينو
ثالثا احب اعلق على حاجتين استفزونى جدا
اولهم(معلش اصل فى ناس مانحبش نزعلهم)وده وان كان على لسان شخص عادى فانه بيعبر عن اتجاه عام للبلد ان فيه ناس مانقدرش نزعلهم وكان اصبح لكل مجموعة او صنف مبادئ واحكام واخلاقيات لازم يتعامل من خلالها
يعنى مثلا السياح والاجانب لهم اخلاق معينة لازم نعاملهم من خلالها وكان احنا اصبح مالناش هوية او اخلاق نفرض عليهم احترامها
كذلك الناس اللوكال ليهم معاملة خاصة وهكذا الخ الخ
النقطة التانية ان فيه البعض بيعمموا الخطا والسيئة
يعنى لو محجبة او ملتزمة اخطات فهى وكل الملتومين والمحجبات اخطاوا
بل ان فيه ناس بترفع الخطا على المعتقدات والاتجاهات اللى بينتموا اليها
وكان مثلا لو دكتور اخطا يبقى العيب على الطب وكلياته يعنى يقفلوها احسن بقى
معلش خنقتكم بس انا كنت متضايك بجد

solo said...

انا داخل اقلك البلوج والله تحفة انا فعلا مش عندي وقت اني اقري الموضيع بتاعك بس خدت نبذه عنهم بس والله تحفة

Unknown said...

د. دغيدي
عندك حق وده للى استفذني برضه فى كلام الراجل ده
الله المستعان المهم اننا منسكتش على الغلط
,,,,,,,,,,,,,,,,,,,,,,,,,
سولو
لله يخليك
المدونة وصاحبتها تحت امرك يا افندم

Anonymous said...

بصى انا كنت بقولك هقرا الموضوعات واعلق واحد واحد... انا مش هعلق انا هكتفى بالضحك... ينفع؟؟؟....حاجه كمان... موضوع ان كل ناس ليهم معامله ده بجد حاجه بتغيظنى... متهيألى ان لو الاجانب حسوا ان لينا معتقدات لازم يحترموها هيحترموا المعتقدات دى زى مثلا لما يجوا يدخلوا يزورا المساجد بيقلعوا الاحذيه ويغطوا شعرهم على سبيل احترام المكان... ولو حددنا زى مثلا فى شرم الشيخ على سبيل احترام كون اليلد مسلمه اعتقد ده مش هيضايقهم بل بالعكس ده هيدينا قوه... لكن احنا العكس بنحدد القواعد على اللى على مزاجهم هما... على الاقل نبدا بنفسنا... يعنى فى عيادتك ان شاء الله تحاولى تطبقى المبدأ ده

روز

ayar said...

اصل يا لماضة الست المحجبة اللى بتدخن بيبقى منظرها مستفز جدا وبيبقى شكلها مناقض تماما للحجاب واحنا مش عاوزين حد يتريق على حجابنا اما اللى مش متحجبة بقى تعمل اللى تعمله انشالله تولع فى روحها ... بس الغريب بقى واللى اول مرة اسمعه منك ان فيه منقبات بيدخنوا .. غريبة دى اوى !!

helium atom said...

"ربنا لا تجعلنا فتنة للذين آمنوا"

فاهمة .. اللذين امنوا .. تخيللى ان المنقبات من النوعية دى .. بيكونوا فتنة للذين آمنوا و اللذين كفروا


بس انتى ثكر والله ثكر

صمت المشاعر said...

ههههههههههههه

بوست حلو اووووووووووي وجميل زيك يا لماضه صدقتي فعلا يا ستات كسفتونا