Thursday 14 February 2008

حب صحي جدااا




شكر خاص لـ ولاء على تعبها فى تلوين الصورة

هو = البيه الضاكتور
هي = الست الضاكتورة

هو : انا النهارده يا حبيبتى كتبتلك على خروج معايا وهناخد سوا جرعة الغدا اليوميه اتفضلى ادخلي

هي : ميرسي استنى افتح ايدك

هو : ايه اللى بترشيه ده برفيوم

هي : لا ده مطهر للايدين عشان انت مسكت الباب

هو : ده بقى من انظف واطهر المطاعم المكان هنا معقم جدا وهيعجبك

لحظه قبل ما تقعدى اتاكد ان الكرسي مفيهوش اى فضلات ملوثه ( المره دى يحرك الكرسي برجليه مش كل شويه هترشله مطهر على ايده ) اتفضلى استريحي

جرثوم ( ينادي على النادل ) ها يا ستى تحبى الغذاء بايه

هي : اللي توصفه يا حبيبى

هو : طيب من فضلك تجيبلنا 30 جرام لحمة مشوية كلوريد الصوديوم قليل وطبقين شوربة فراخ ياريت المية اللى هتتعمل فيها تكون بنسبة 5% محلول ملح وطبقين خضار سوتيه ويفضل يتسلق الخضار فى ميه مقطره استنى انا معايا 14 كيس اهم خدهم

والحلو يكون 50 سم عصير برتقال للدكتوره وانا تجيبلى شاي و تحليه بتركيز 25% جلوكوز

هي : ممكن اخد عصير موز باللبن

هو : لا يا حبيبتى كده الصنفين مع بعض هيتفاعلوا ويضروكي ده عشان يقوي مناعتك
مش هوصيك بقى الاطباق تكون معقمه فى فرن على درجه 600 درجة سيليزيوس ويفضل لو الشوك والمعالق تكون بلاستيك استعمال مره واحده فقط

الجرسون : تأمر باى حاجه تانيه يا افندم

هو : لا متشكر جدا بس ياريت تجبلنا الغدا كمان ساعه و16 دقيقه عشان العملية الايضيه بتاعة جسمنا متتلخبطش ها يا ست الدكتورة ايه رايك

هي : حاسه انى بقيت احسن دلوقتى

هو : يا ستى انا جايبلك هديه ونفسى اشوفها عليكى




هي : معقوله يا حبيبى ربنا يديك الصحه يارب انا كمان كنت حاسه وجبتلك هدية انا كمان

هو : يا سلام وعرفتي ازاى

هي : ابدا حسيت بنفس الاعراض

هو : ورينى الهديه بتاعتك الاول

هي : اتفضل يا سيدى بالشفا ان شاء الله

هو : ياه وتاعبه نفسك ولفاها فى صورة اشعة انتى عارفه انى بحب اللون ده

هي : أفتحها الاول

هو : ازازة دوا بشريطه حمرااا

هي : دى ازازة فاتح شهيه ومفاجأه فيها فيتامينات وحديد كمان هتلاقى معاد الجرعه كتبهولك على الشريطه الحمرا

هو : طيب يا ستى ربنا ما يدخل المرض جسمك ابدا شوفى بقى هديتى وياريت تخلينى البسهالك

هي : ايه ده مش ممكن مش مصدقة عينى علبة جوانتيات كل صوبع لون

هو : هاتي ايدك البسهالك

هي : طيب اروح دقيقة التواليت اصلح كريم الحساسيه واجيلك

هو : اوك يا حبيبتى بس اتاكدى ان البشره شربته


بعد 10 دقايق


هو : هاتي بقى اشوف المقاس مظبوط مال ايدك بترتعش كده ليه انتى لازم تعملي تحليل هيمجلوبين اكيد عندك انيميا

هي : عملته طلع كويس هروح اعمل تحليل غدة بكره ان شاء الله عشان اطمن وانت مال وشك بهتان شويه النهارده وعينك صفرا

هو : فعلا انا حاسس بشوية ارهاق متشغليش بالك

هي : اوبس معلش حصل خير

- كوز الميه اللى على التربيزه اتكب وبسرعه تمد اديها فى شنطتها وتطلع كيس-
( وتقوله : ولا يهمك امسحه بحتة الشاش دى ( أكثر فاعلية من المناديل

هي : شوفت الشريط الجديد اللى نزل السوق

هو : مش ممكن جميل جدا و بوستر الاعلان بتاعه فكرته جديدة وتشد

هي : ايوه ولا الحبايه بتاعته مغلفه عشان تحمى جدار المعده

انا جبتلك عينه تجربه وتقولى رايك

هو : اوك هبلعه بشوية ميه ونشوف


هي : يلا عشان تلحق النبطشية


هو : طيب الاسعاف مستنياكي بره هتوصلك للبيت

جرثوم

روشتة الحساب من فضلك

93 comments:

و القادم....أجمل said...

ههههههههههههه
ههههههههههههههههههه
هههههههههههههههههههههه

ايه دا دا
لا لا لا انا مش عايزة دكتور يا ستي
مش لاعبه
ههههههههههههههه

و في الاخر كمان روشتة الحسااااااب
:D

انتي فزززززيعه
ربنا يرزقك بزوج دكتور صالح يارب
بس يكون يعني مش معقم اوي كده

:)

و تعب ايه بس
احنا نطول نخدمك يا ضااكتورة

تسلم ايديكي و يسلم ابداعك
عايزين حلقات تانية باه

:)

Bella said...

حلوة قوي قوي

ربنا يسعدك
بقالي كتير ماضحكتش

ههههههههههههههههههههههههههههه

عجبتني قوي جرثوم دي


ههههههههههههههههه

بطوط حبوب said...

ههههههههههههه
يخرب بيت مخك بجد
فى اخطاء جثيمه جدا وقعوا فيها
اولا كميه العصير عايزنها 50 سم وده مش صح لان المفروض يقولوا 50 سم مكعب
دول دكاتره فاشله وبيستهبلوا
ههههههههههههههههه
انا من مكانى هذا انصح بالانفصال

فرنسا هانم said...

هههههههههه
حلوه حكايه ساعه و16 دقيقه
امال جايين بدرى ليه ؟؟؟؟
كانوا جم قبل الميعاد ب 14 دقيقه و30 ثانيه و 160 فينتو ثانيه و هنيه لك يا فاعل الخير والثواب

shabfa2re said...

ههههههههههههههههههه
انا عاوز اتجوز ضكتورة
لانى مش بحب اروح لدكاترة

عصفور المدينة said...

انت مشكلة
:D

يا مراكبي said...

المدونة دي معقمة كويس هي كمان وألا أغسل إيدي كويس بعد ما أكتب التعليق؟

دكتور حر said...

ههههههههههههههههههههههههه
ههههههههههههههههههههههه
ههههههههههههههههههه
ههههههههههههههه
هههههههههه
ههههههه
هههه
هه
ه


الله يخرم جيبك يا لماضه

انا بالطبع قعدت اتخيل نفسي انا والست الدكتوره اياها بالمنظر ده
بس الحمد لله

طلعنا هوموجينص
مش اكيورت خالص


الحمد للااااااااااااااااااااااااااه

الحمد لله

Mohamed Shedou محمد شدو said...

هم تمام بس انا عندي مشكلة واحدة معاهم
سيادته عاوز شوك بلاستيك عشان صحته
ده كده دكتور اي كلام
يعني يهتم بصحته ومش مهم صحة الأرض؟
مش صحة الارض برضه هتاثر على صحته في الاخر؟

اصل انا مش بحب ثقافة الـ
disposable
اللي بقت في كل حاجة دلوقتي

كمان ازاي يستخدموا عربية الاسعاف في مشاويرهم الشخصية؟
:)

أحسنتي يا دكتورة

صحفية روشة said...

هههههههههه
حرام عليكى يا لماضة شرقتنى من الضحك
طول عمرى كنت بقول ان العيال بتوع كلية الطب دول عيال خنيقة كانو دافنين راسهم فى الكتب فى علمى
ومش بيفهمو فى اى حاجة فى الدنيا ودمهم ثقيل
اصل كنت ادبى وكل العلمى اللى كانو معايا كانو رخما اوى
هييييييييه راحت ايام الثانوية بقة
المهم انتى غيرتى فكرتى عنهم يا دكتوره
انا بعشق زيارتى ليكى هنا
يا اعسل واظرف دكتورة فى ال26 محافظة وتوشكى
سلام

Unknown said...

النص الفوقاني من الدكتورة بيفكرني بالشغالة اللي عندي
ده شعرها المدلدل من ورا ده عبارة عن مزرعة ميكروبات لاهوائية
التعقيم بايظ يادكتورة
انتي شربااااااات
:)

Empress appy said...

يا نهار ابيض لو هو ده حوار الدكاترة وحياتهم طيب قوليلى حياة الظباط والمحاميين ايه
ربنا يجعل ايامك كلها حب يا لمضه هانم

Rain man said...

يخرب عقلك يا لماضة
انتي دخلتي كمية المصطلحات دى فى الحوار ازاي ؟؟
و كله كوم و كلمة جرثوم اللي فى الاخر دي كوم تاني
كان نفسي اشوف ردة فعل الجرسون و هو بيسمعها

بجد تحفة

Desert cat said...

اشطة هو كل اللى بيتجوز واحد من نفس مجاله بيعيشوا حياتهم كلها على هاذوه الأساس
طيب انا بقى عايزه اتجوز واحد بتاع نت علشان يظبطنى فى السرعة
وناكل باكونت من ايجى نت ونشرب على حساب تى داتا
طبعا ما هو المؤمن كيس روترات

mohammed alsha3r said...

كل ما استطيع ان اقوله

انى لم اسطع ان امسك نفسك من الضحك

بس اسلوب حوارى حلو

والحمد لله انى مش دكتور

ويارب ما اتجوز دكتورة

ههههههههههههههههه

Marwa Friday said...

الله الله
تسلم ايدك يا لماضة.. بجد تحفة يا بنتي..
امال لو تخيلنا السيناريو مدرسين أو صحفيين.. ههههههه
عسولة
خسارة.. لازم تحاولي تنشري كلامك ده.. اتفقنا؟
صباحك معطر بلون الحب..
كل سنة وانتِ طيبة

http://kasperb4.blogspot.com/ said...

الغريبة ان الجرثوم حتى لم يبدي أي اعتراض على الطلبات ولا حتى استفسر عن حاجة

أكيد ده جرسون من القصر العيني
هههههههههه

Rivendell** said...

اييه يا ست لماضة انت بتسوقي سمعتنا في البلد هو احنا ناقصييييين

هههههههههههههههههههه

بس بجد ملعوبة بحرفنة جااااااااااااااامدة جدااااااا


عظمة على عظمة يا ست الضاكتورة

صوت من مصر said...

ايه ده يا لماضه كل سنه وانت طيبه والضاكتور والضاكتوره وكمان الجرثوم افندى
مبفهمش فى الطب لكنى دكتور فى القلب

only spot said...

ههههههههههههههه
ليه يا بنتى عاملين فى نفسهم كده صحيح طباخ السم بيدوقه بس دى مش قصة حب خالص ده عذاب
طب هم لو حبو يعملو فرحهم هيعملوه فى انه مختبر وتحت انه درجة حراره ويا ترى هيعزمو الناس ولا عشان النفس والعدوى بقى والجراثيم
هههههههههههههههه
تحياتى ليكى ويسلم قلمك

آفاق الحرية said...

هههههههههههه
بجد روعة وجميلة جداا
بس انت كده هتكريهينا في زواج الطبيبات
بس روشتة الحساب كانت كشف ولا استشارة
جزاكم الله خيرا

الراقـــص مع الذئـــــاب said...

السلام عليكم
اضحك الله سنك يا دكتورة

اول (زيارة) لمدونتك
وإن شاء الله (هتردد) عليها ديماً
وهبقي (اتابع) عندك علي طول

سلام

son's egypt said...

السلام عليكم
لو حياتنا حتبقي كلها كده
يبقي الافضل نفضل زي ما احنا علي امراضنا

فاتيما said...

لماضة يا حبوبة
يا بت يخرب خفة دمك دى .. حللى و شوفى السكر الى متركز فى لسانك دا نسبته كام عشان نحاول نبقى شربات زيك ..
أنا متفائلة بمستقبل الطب فى مصر ..أنت هتطببى الروح قبل ما تعالجى المرض ..
ربنا يحميك يا حبيبتى

أحمد جلال said...

أنا حسيب الكلية دي قريب..ماهو لو الحياة كده بعد التخرج يبقى بلاها..أنا مدخلتش تجارة لييييييه؟

سهر الليالى said...

يخرب عقل دماغك يا ست اللمضة
فظيييييييييع فظييييييييييع فظيعععععععع

أنا كان نفسى اتجوز دكتور بس كدة ممكن أعيد النظر
ولا لو قاعده معاه وقال يا جرثوم دى ولا وصف الأكل دة دة كان زمانى أتشليت واخدنى على كرسى بعجل واحنا مروحين
هههههه

تحياتى وعايزاكى تتحفينا كدة بقى كتير

د.دغيدى said...

ايه ريحت السفلون والفنيك اللى انا شاممها دى
بوست هايل يا دكتورةالله ينور

operative theaterدةاكيد جوازهم كان فى
والصور كانت عند درويش سكان

Ahmed Al-Sabbagh said...

ههههههههههه

ايوة احب اتلامض

طبعا انا عارف انك زعلانة منى

بس واضح ان فى موردين اخرين للكاريكاتير

معلش

انا كنت فاكر انك لسه مش عايزة تنزلية دلوقت

وروحت اشتريت اسكانر عشان ادخل الكاريكاتيرات

بجد سامحينى

وطبعا مش هضحك على المقال ده تانى

لانه اصلا قطع فشتى فى المرة الاولانية

:)

على فكرة لازم تعملى كتاب

امممم

وهفكر لك فى اسم للكتاب وديزاين كمان

:)

بس ابقى اخد نسخة موقعة هدية

جيشع انا

هههههههه

تحياتى

احمد

دنيتى الجميله said...

لماضه حبيبتى مش ممكن
كل ما ادخل مقدرش ابطل ضحك
ربنا يسعدك زى ما بتسعدينا
انا مع الاستاذ احمد فعلا انتى لازم تعملى كتاب
ان شاء الله هيضحك مصر كلها ويكون كتاب لكل مواطن
صفحتين قبل الاكل وصفحتين بعد الاكل
بجد احنا محتاجين لشخصيه حلوه زيك
تمتعنا بروح الفكاهه واللماضه والخيال الجميل ده
مع كل حبى وتقديرى ليكى

Unknown said...

الله
مش مصدقه عنيا
حد يطلشلي
اى اى
ايه ده الموضوع عجبكم والله ما مصدقه
شكر خاص لولاءوالقادم اجمل على تعبها وصباغ انا عارفه اللى عندك والله
ولو عندك الصوره ابعتها وانا هعملها تحديث ياريت
دى جبتهم من موقع وولاء ساعدتنى فى تلوين اول صورة

rainbow said...

ست الداكتورة

والله يا بنتى ضحكت وانا نفسيتى زباله مش ممكن كلمة جرثوم والمؤمن مش كيس قطن ههههههههههههه

والا الاخ الداكتور اللى معجب بإنها لفت الهدية فى صورة اشعة مش ممكن بجد جميلة جدا

يا رب تفرحى وتضحكى اد ما رسمتى الابتسامة على وشوشنا

كل سنة وانتى اجمل واسعد ومع من تحبين

حبى ودعائى

هدى

لـــى لــــىِ said...

هههههههههههههه

اللماضة المردى مية مية

على درجة استاذ ورئيس قسم

انت نسيتنى ولا ايه ياعم

سلاماتى

لى لى

بحبك يامصر said...

الله يا لماضه
جميله بجد واسلوبك تحفه
انا بضم صوتى للى كان بيقول انك غيرتى فكرته عن طلبة الطب والدكاتره دمك زى العسل

جهاد خالد said...

هههههههههههههههههههههههههههه

تحففففففة

بجد روعة

تسلم إيدك
............

شاركيني بالتصويت على فكرة كتابي الأول
www.somood.blogspot.com

Unknown said...

ههههههههه .. كالعادة .. دمك زي العسل يا لماضة.

إيمان said...

أحب أوى يا لماضة أتلامض

يارب ايكتر من أمثالك

وتكونى طبيبة تفتح وتشرح القلب والنفس

مش طبيب اليومين دول اللى بيشبه

وتقريبا بيشخص

جميل البوست والصورة رائعة جدااااااا


تحياتى ومودتى

رئيس جمهوريه نفسى said...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
روعه بجد ودمه خفيف جدا على فكره انا كانو مرشحين ليه دكتوره بطلت خلاص مش عايز اتجوز

مي بهاء الدين said...

ياسلااااام بوست علاجي معقم ميه ميه

يعني انتوا لما بتلفوا الهدايا بتروحوا ألفا سكان؟
وفي الأفراح هاتشربونا جلوكوز؟
ولا ناقص توزعوا علينا علب بانادول بدل العشا....كل ده يمكن

بس الأكيد إن اللي يدخل المدونة دي هايتطعم ضد التكشير
:) :) :) :)

فضفضة said...

دول غلبوا 55 اسعاف هههههههههه

هيعملوا مشاويرهم بالاسعاااف

وصراحة رهيييييبة

وحاسة انى عايزة اعمل تحليل

لانى شكلى هيجيلى السكر منهم ههههههه
كرهتينى فى الدكاترة

صحفية روشة said...

لماضة زعلانة منك معنتيش بتزورينى ليه
اهئ اهئ اهئ

عبدالرحمن الشافعي said...

ههههه
والله أنا فضلت أضحك...
بس بجد بجد حلوة قوي ...
شكلك مطحونة علشان دخلتي كلية الطب
شكلي مش داخلها .....خوفتوني
ههههه...للدرجة دي..
ضحكتيني يا ضاكتورة
وحلوة الفكرة ....وعموما..ربنا يوفقك يارب ويرزقك بالراجل الحلال ...بس ما يكونشي زي ده وما تكونيش طبعا زيها ...هههه
بهزر

تحياتي لكي

إبـراهيم ... said...

يخرب بيت فقر اللذين كفروا !!!

جدي مش بس لاماضة على فكـرة ....
دي كتابة حلوووة قوووي ، ومتميزة

..............
حلو يا لماضة

كريم بهي said...

دا بقى يبقى حب
لامواخذة دي قصة علاج
وايه الصحة اللى فيه
انا لو فى موقف الدكتور دا كنت زمانى عييت دلوقت
اينعم انتى دكتورة بس للدرجة دي حرام
بجد حرام
دا بطنى وجعتنى
حب ايه
اللى انتى جاية تقولي عليه
انتى عارفة ابله
معنى
الحب
ايييييييييييييييه
****
بجد فكرة البوست عجبتنى اوى
ورغم انى اضايقت بس ضحكت تسلم افكارك
وانا سعيد انى بزور مدونتك واكيد مؤكد تاكيدا
هاكون عندك على طول

تحياتى
كريم بهي
ك
ر
ي
م
ب
هـ
ي

القلم السكندري said...

لا حول ولا قوة إلا بالله

علي كدة بقي عايشين في بيت زي الناس ولا حاجزين سويت في مستشفي؟؟

وبيكلو طبيعي زي الناس ولا عايشين ع المحاليل؟؟

كان الله في العون

بوست لذيذ

تحياتي

Shreef said...

ايوه احب اتلامض لان بصراحة البوست ده فوق الوصف بجد احييكي جدا على البوست ده و الحوار اللي دار بينهم و مش ممكن انا مش عارف الجرسون استحملهم ازاي دا كا المفروض يحضرلهم الاكل في صيدلية مش مطبخ..بجد البوست جميل و الجميل كمان تعليقات الناس اللي زادت الموضوع جمال..شكرا يا دكتره على جرعة الضحك اللي في الوريد ديه..سلام

الفراشة الصغيرة said...

بجد
ومن الاخر
انتى بت مووووووووووز
موز موز موز
وعسل
وسكر

وكل الحلويات اللى عند الراجل

Shreef said...

بعد قراءة البوست للمرة التانية و التالتة لاعجابي بيه ليا سؤال بسيط

هوا يعني ايه العملية الايضية ديه ؟؟

Unknown said...

شيفو
الايضيه دي عمليه فسيلوجيه فى الجسم
بتنظم دخول الغذاء واستفادة الجسم منه
بتبقى منتظمه جدا سبحان لله زى الساعه

يا جماااااااعه بجد انا تعليقاتكوا مش قادره اد عليها من فرحتى بيها
اضافت للبوست كتير قوى قوى
دى تستاهل بوست لوحدها

Rania Lelah said...

بصراحلة اول زيارة ليا
و اول ما قريت البوست
مقدرتش امنه نفسى انى اتلامض
اهو دة الحب الى بعدها يتقال
ايوة صحة و عافية
:))

تحياتى

شريف طلال said...

ههههههههههههههههه
تحفه واللهى
فطست على روحى من الضحك
جامد جدا
شكراااااااا

صحفية روشة said...

ايه يا لماضة انتى كتيتى البوست ورحتى نمتى عليه ولا اية
طب وحياة الجثة اللى انتى مخوفاهم بيها فى البيت وغلاوتها عندك ترجعلنا تانى
متطوليش غبتك
يلا سلام

Anonymous said...

ههههههههههههههههه تحفة بجد البوست ده اهوه ده الحب ولا بلاش الحب المعقم بيعيش ويدوم

تحياتي

غراب said...

السلام عليكم ور رحمة الله و بركاته

والحلو يكون 50 سم عصير برتقال للدكتوره وانا تجيبلى شاي و تحليه بتركيز 25% جلوكوز

لذيذ اوي البوست دة
بس نسيوا حاجة مهمة جدا كانت ممكن تودي بحياتهم
نسيوا يغسلوا ايديهم بصابونة ديتول

البنت الشقيه said...

هههههههههههههههههههههههههههههههههههههههههههههههههههههههههه
بجد انتى سككككككككككككر وقمر
والله وحشانى جددددددددا جدا جدا ومع انى زعلانه منك شويه عشان مشفتكيش عندى من زمان ونسيتينا ولا ايه يالا انا مسامحه بس انا عايزه طلب عايزاكى تكملى يوميات طالب طب اوك اصلها حلوه اوى بجد اوك؟


لولو

lonely said...

انتى لو سمعتينى وانا بضحك مش هتبطلى ضحك من هنا للصبح

الحته دى عجبتنى قوى

ايه ده مش ممكن مش مصدقة عينى علبة جوانتيات كل صوبع لون

هههههههههههههههههههههههههه
متخيلاها والمفروض انها دكتورة وماشية بكل صوبع لون

ههههههههههههههههههههههههه
هههههههههههههههههههههههههه
ههههههههههههههههههههه
هههههههههههههههه


لا بجد قلبى هيقف

فكرونى بمحمد عبد الوهاب لما كان فى المطعم وراح يغسل ايده بعت الجرسون اشترى له مطهر غسل الصابونه وغسل ايده بيها

قال بيطهر الصابونه

ههههههههههههههههههههههههههههههه
ههههههههههههههههههه

ربنا يحميكى يابنتى

الـسـيـدة نـون said...

هههههههههههههههههههههههههههههههه
ههههههههههههههههههههههههههه
هههههههههههههههههههههههههههههههههههههههههه
هههههههههههههههههههههههههههه
ههههههههههههههههههههههههههه
لا بجد
معقول ده
انتى يا بت ايه؟
يخرب بيت دماغك العالية
ههههههههههههههههههههههههههه
هههههههههههههههههههههههههههههههههههه
ههههههههههههههههههههههههههههههههه
ياخراااااااابى
جرثوم يا لماضة
اخر شريط اللى بيتكلموا عليه ده كان شريط حبوب منع الحمل ولا ايه؟
ههههههههههههههههههههه
هههههههههههههههههههههههه
مسخرة يا بت والله

اجري على الله said...

سلام عليكم
دي اول زياره
بس بصراحه اجمل واظرف بوست شوفته النهارده
لا فعلا لماضه
وزي مابيقولوا الحب انواع ومن انواعه الحب المعقم

اتمنى ان نتواصل دائما
الشاعر بن هلال

Doba said...

اول مرة النهاردة اقعد اقرا مدونتك من اولها لاخرها

تحفة بجد

ماشاء الله عليكى دمك زى الشربات
ربنا يبارك فيكى

تحياتى
هبة

مشمش said...

تحفة يالماضة ربنا يوعدك بحب زي دة صحي عشانك يارب انتي سكر اوي

همس الاحباب said...

من اول ما شفتك وانا عارف ان اخرتك واحدة من الاتنين( ابقى اقولك عليهم بينا وبين بعض)
بس بصراحة ما لكيش حل فعلا لماضة اسم على مسمى
بس انتى نسيتى الديتول ليه يا ست الضاكتورة
ربنا يوفقك ويرزقك بضاكتور معقم جاهز
على فكرة محتاج مساعدتك فى مدونتى همس الاحباب ممكن
اعتبريها استشارة فنية من غير تعقيم
مع تحياتى خالد

Unknown said...

سالخيييييييير

والله يا جماعه ما عارفه اقول ايه
انا فى ربع هدومي منكم
بتابع مدونتكم وتعليقاتكم والله
لسه ممتش بتنفس
بس كل ما اكتب التعليق النت يعملها معايا
الناس اللى بتدعيلى يرزقنىبحب صحي دى بتدعي عليا اكيد هههههه

ربناايخليكم يارب واكون على قد المسئولية واكتب حاجات تفرحكم اكتر من كده

العواف بقى
علقوا يا اخوانا انا متابعه بس والله ما عارفهافتح صفحة التعليقات النت وحش جدااا

Anonymous said...

يانهار ابيض عليكي


ايه ده يا دكتوره لماضة

لا بجد ايه الافكارالجامده دي ....
لا بجد انتي كده مبدعة بجد ..اشتغلي في الحاجات دي بقى وسيبك من الطب ده اللي لايودي ولا يجيب يا شيخة ..هههههههه

ربنا يكرمك كده وتفرحينا كمان وكمان

Dr.KAHLIFA

(احمد سكر ) said...

هههههه
انا طبعا مش هقدر ااقول
اكتر من اللى اتقال
بس اسمحيلى اسجل اعجابى
ههههه
بجد ضحكتينا

تقبلى مرورى
احمد سكر

"النجم القادم" said...

السلام عليكم
كلمة مبدعة رائعة لاتكفى
والله ضحكت من كل قلبى وانا قلتلك
هم بتوع كفر الدوار كلهم كده
ابداع واصالة
وفقك الله ربنا يجازيكى خير والى الامام دائما يا استاذة لماضة

اللؤلؤة المكنونة said...

هههههههههههههههههههههههههههههههههه
هههههههههههههههههههههههههههههههههه
هههههههههههههههههههههههههههههههههه
ههههه
أضحك الله سنك

فكرة جميلة وعرض أجمل
بس خيالى حبتين..هو فيه كده ؟
الله المستعان

الحمد لله الذى شافانا وعافانا مما ابتلى به غيرنا

ربنا يرزقك بزوج صالح بس ما يكونش معقم

تحياتى

أم أحمد المصرية said...

لا يا لماضة انت خسارة في الدكترة انت تشوفي لك جرنال لمض زيك و تكتبي لنافيه لماضة يومية عشان لما كابل النت يقطع نعرف نوصلك :)
يا تري بتعقمي الكي بورد قبل ما تكتبي و لا لأ انا عن نفسي حبقي اضع قطرة كل ما اقوم من علي النت عشان لو اي فيروسات دخلت عيني اسيبك بقي دلوقت لأن جوزي الدكتور قرب يجي و لازم افرش له الارض رمل قصدي قطن و ارش له الارض كحول ابيض
ابقي اتفضلي زوريني في مدونتي و ما تقلقيش بعقمها بعد كل زائر
سلام كبير قوي لست الدكتورة

واحده من الناس said...

ازيك يا لماضه
والله واحشاني ووحشتني لماضتك

وايه الجمال ده
بس دول مش دكاتره دول مرضى وسواس قهري

تحياتي ليكي يا قمر

ابو صهيب ( الجمعاوي الاصيل)سابقاً said...

ههههههههههههههههههههه
ههههههههههههههههههههه
ههههههههههههههههههههه
اضحك الله سنك

فعلاً اضحكتيني

ده حب اكسيد الكربون

ولاايه

ده على كده لما يجوزوا يجيبوا

امبوبة اكسجين علشان النفس

t3ban said...
This comment has been removed by the author.
t3ban said...

فعلا احلي فلانتين في غرفة العمليات
مفيش احمر من كدة
و في الفرح تشغلو طبيب جراح
ولما تهيبرو
هي الحالة اه اه اشتغلت
و لما حد يزعل قولو لطبيبي
لا الحمد لله ان طب بتاخد من 150في المية

"النجم القادم" said...

السلام عليكم
معلش انا جيت تانى
بس بسرعة الحقى
مبارك عندنا ومحدش قدنا
تعالى قوليله الا فى نفسك
واحنا هنوصله
بسرعة انتى لسه بتقرى

khobayb said...

ما شاء الله
رائع فعلا

أتمنى أقرالك أكتر بنفس الطريقة دي

د/اجدع بنوته said...

ياشيخه روحىىىىىى

ربنا مايحكمك ع ايتاام

سدتيتها ف وشنااا

هنتجوز مين احنا دلوقتت

مهندسين وصيادله ومش راضيين بينا

حتى الدكاتره اللى فاضلنا

تعملى فيهم كده

اهىءءءءءءءءءء

NIDAAL .R said...

ههههههههههههههههههههههههههههه
بوست جاااااااامد جدا
بس انا نفسى اعرف انتى بتالفى الكلام ده ازاى
بوست راااااائع و ممتااااااز
و ياريت اعرف رايك فى تغطية المؤتمر على البلوجر تبعى

ا بـن عــمــر said...

هههههههههههه
بلاش كده احنا دكاتره برده

عايز أتعلم said...

زورونا تجدوا مايسركم
بس مش دلوقتي

عايز أتعلم said...

زورونا تجدوا مايسركم
بس مش دلوقتي


khalifa

Unknown said...

اسلوبك جميل جدا وعجبتني قوي جرثوم دي
تقبلي تحياتي ومروري

Rain man said...

واضح اني مصاب بالزهايمر
كنت متخيل طيلة الاسبوع المنصرم انني قمت بالتعليق على هذا البوست
اما انكم اهل التدوين تطبخون التعليقات و تأكلونها
و اما اننى بلا ذاكرة
علي العموم
انتي يا لماضة مزعجة الى الدرجة التى تجعلني اتوسل اليكي ان لا تتوقفي عن ازعاجي ابدا

لحظه من فضلك said...

ارجو الاهتمام بذلك الموضوع الموجود بالمدونه وارجو التضامن معى وشكرا

تائهة فى أرض الأحلام said...

هههههههههههه
صحيح الدكاترة لما تكتب بقى

تحياتى لك واعتبرينى صديقة جديدة لمدونتك

a.aTeYa said...

ههههههههههههههههههه


انا تقريبا كده داخل على نوبه طب .. هههههههههههه

لا لو كده مش فى الليله دى انا .. احول خدمه اجتماعيه بكرامتى .. ال جرثوم و اطباق معقمه

yomna said...

يا نهار ابيض يا نهار ابيض
ايه ده يا بنت يا لماضة...الموضوع ده شكله حصل بجد ولا ايه...بقى اسيبك فترة كده ارجه الاقيكي قلبى البلوج كازينو الوردة الحمرا... يا ولاد من هنا بلاش اللمة دي وكل واحد يشوف شغله

ههههههههههه
بجد والله يا لماضة جامد جدا الحوار ده وخصوصا لما طلبوا الغدا...حاجة تحفة

simple girl.. ..simple dream said...

ايه يا ست لماضة دة
انت هتطلعى كدة سمعة طين عن الدكاترة
انت اصلا سبب ان البنات الطبيبات معنسات
اول مرة اجى عندك الاقيكى مشردلنا كدة
ربنا يسامحك يا ستى

Anonymous said...

جميل يامروه... ضحكتينى من قلبى بجد.... روز

سندريلا said...

ههههههههههههههههههههههههههههههههههههههههه
ربنا يسعدك

ayar said...

ههههههههههههه والله عسل يابنتى دى من تاليفك ؟!
ولا حتة الشريط دى تحفة موتتنى من الضحك

Anonymous said...

رووووووعة يا مروة

بعد إذنك سمحت لنفسي بنقلها هنا

http://www.mrafee.com/vb/index.php
وطبعاً لم أنس وضع اسمك الكريم عليها وعنوان مدونتنتك أتمنى لو تقبلي دعوتي لك إلى منتدانا مرافئ الوجدان

الله يسعدك

فاتن محمود

شاذلي دنقل said...

ههههههههههههههههههههههههههههههه مش ممكن اللماضه دي يخرب عقلك ايه الفظاعه دي لا لمضه لمضه يعني
ربنا يرزقك بدكتور لمض كده

صمت المشاعر said...

ههههههههههههههههههه

ههههههههه ياخبر دا الواحد يجيله اكتئاب يا شيخه

يلا ربنا يرزقك بدكتور اد الدنيا كدا ويجيبلك هدايا كتير وفيتامينات ويعماك اجزخانه في البيت من كتر الهدايا

Lina Aude said...

مع إنو بوست ئديم
بس أنا من زمان ما تابعتك هون يا مروة

خطيرة الفكرة و ضحكت لحد ما ئلت بس
لو كل الناس هيك
كان ما ضل حدا فيو مخ

Ahmed Fayez said...



عارف ردودي متأخرة
بس مكنتش اعرف المدونة قبل كدة
المهم
يمكن الموضوع ده مكتوب بشكل كوميدي ساخر
بس الدكاترة عارفين ان فيه شئ من الواقعية
حياة الدكتور بتتمحور حوالين الطب
بتبقى كل حاجة فيها كدة
طب في طب
و يمكن ده بسبب المدة الطويلة اللي قضاها في دراسة الطب و في اجواء المستشفيات
و اعتقد يا دكتورة مروة انك لاحظتي التأثير ده في حياتك
و اللي من خلاله كتبتي التدوينة دي


meme hassan said...

تحفه اوي اوي...وربنا يستر علينا وعليكم....