Tuesday 10 June 2008

مغامرة otv


طبعا كلكم عاوزين تعرفوا ايه اللى حصل من طقطق لسلام عليكم
طيب تدفعوا كام
انا راضيه بباكو شوكولاته جلاكسي بالمكسرات ابو 3 جنيه

اللي حصل كالآتي

وصلني ايميل من الجميل هيثم ابو عقرب معد البرنامج بيطلب استضافتي في برنامج مساءك سكر زيادة طبعا انا مصدقتش فكرتها اشتغاله المهم بعتله رقم تليفوني اتصل بيا واتفق معايا كل ده وانا مش مصدقه ولا حد عندي مصدق حتى وهو بيقولي عربية القناة هتستناني تاخدني قلتله طيب إديني اماره اعر ف منين انه انتوا اصل انا بقيت مطلوبة امنياً دلوقتى قالي متقلقيش
لحد ما العربية جت اخدتنى فعلا انا قلت كده خلاص لماضة راحت في شربة ميه بسكر زيادة خطفوني يا ولاداااه

وصلت القناه في مدينة الانتاج الاعلامي اطمنت شوية الحمد لله ودخلوني في اوضها كلها فيبر في فيبر " والله يا لماضة وعديتي" قعدت شوية لاقيت مين داخل يكلمني الجميل شريف عبد الرحمن طبعا انا اتخضيت الراجل لاقاني فتحت بقي واذبهليت بقوله مش انت اللى هتستضيفني ده هيثم قعد يضحك قالي هيثم المعد انا المذيع المهم اني عارفه كده بس الجهل بقى والخضه بعيد عنكوا
اصله يخض فعلا حاجه جميله قوي اللهم اغزيك يا شوشو

شويه وقعد يرتب معايا محدش ملاني اجابات يا اخوانا والله انا اللى قلت الكلام لوحدي وقلتله اني عاوزه اتكلم عن الكتاب وعن المؤتمر في الكليه عندنا
وشوية دخلت الفراشة انجي المقدم ووراها لاقيتلكوا مين عمكوا
عقروب قلتله يا راجل لسه فاكر وقعدت اقرره مين الى فتن عليا اكتشفت انها اختي وصديقتي اللدودة ومدرستي في عالم الكتابه البت دربكه قصدي مروة جمعه كنت مستحلفالها الصراحه
وقعدنا نتكلم شوية عن الاسئله تاني وبقوله يا هيثم الله يتمملك بخير فرحه يوم 16 \ 6 ياجماعه ربنا يكملك على خير يارب ده غير انه طلع مدون قديم ومعقرب فعلا

بس وبعدين قعدت في لحظات الانتظار الاخيرة حسيت اني مكنش فيا نقطة دم واحده كنت مرعوبه بجد خصوصا ان شريف كان موصيني اطلع اللماضة كلها الحمد لله كنا هنروح في داهيه لكن ربنا ستر

بعد ما خلصت تصوير انجي قامت بتقولي انتي عسل هاتي بوسه بصيت لشريف ساعاتها قعد يضحك محدش يفهم غلط يا اخوانا

بعد ها قابلني اخويا الكبير ابو همس ربنا يخليه يارب جابلي أكل اصلي كنت واقعه من الجوع وفضل معايا لحد ما ركبني بصراحه عمل معايا واجب صعيدي جامد أوي خصوصا واني كنت تايهه يا ولاد الحلال واهل مصر متوصوش يتوهوني زياده قاموا معايا بالواجب
الحمد لله ان ابو همس لقطني ما انا كنت لقيطه فعلا وقتها واقفه بشحن موبايلي عاله على محل موبايلات صغير عشان تليفوني كان فصل الراجل ذوق صراحه قد يسترجع معايا ذكريات اسكندريه والموبايل في الشاحن

اسيبكوا بقى تتفرجوا على لماضة في التلافازيون اللي نزلهالي محمود
آلام وآمال ربنا يخليه بجد مش عارفه اشكره ازاي فرحت قوي لما لاقيته نزلها وكمان لينك لمصري مصراوي ربنا يخليك يارب على مجهودك الجميل ده واقدر اردهولك اللى عاوز يحتفظ بلماضه جوده عاليه على جهازه بس هو حر بقى لو الجهاز جراله حاجه اللهم بلغت

بس حقيقي مش عارفه اشكركم ازاي الفرحة اللى انا فيه دي كلها انتوا سببها وانا رايحه كنت كاتبه كل اساميكوا في ورقه عشان اقولها بس للاسف اتلخمت فاعذروني
يلا حضروا كيس اللب والسوداني
اتمنى لكم مشاهدة ممتعه
دي بجودة عاليه من مصري المصراوي
الفيديون الاول

الفيديون التاني


87 comments:

فاتيما said...

كنتى زى القمر يا حبيبتى
و بصراحة إنتى جدعة أنا لو مكانك أغرق فى نقطة مية
برافو عليكى
شرفتينا
عقبال حلقة عشان الكتاب الأول بتاعك
تحياتى يا طعامة

فاتيما said...

آه
أول ما جبتى سيرة عز و البرطمان قلت بس
البت هتوقع ساويرس فى عز و تبقى حوسة
بس هما لما الدور كتر خيرهم
و ماما قاللتلى ما شاء الله عليها
و بتقولك مبروووووك

نعكشة said...

ماشاء الله كنتي عسولة :D

ومدونتك عسولة ماشاء الله

مما يدعوني اني ادعبش فيها كلها إن شاء الله اما اخلص امتحانات

اتمني ليكي كل النجاح و التوفيق بعد كدة

سلامون عليكي

رئـــــيسـة حزب الأحلام said...

الف مبروووووووووووووووووووووووك
قمر ونورتى المدونين كلهم
ايه ياخواتى الجمال دة كلام وجمال اية
والله حته سكرة يالماضه
تحياتى لكى

AHMED SAMIR said...

لا لا لا ....ماينفعش الكلام دة
تليفزيون وفضائيات وكدة
اللي عدى عدى يا سيدي
ربنا يسهل له يا عم
طب خديني تحت جناحك
اتبنيني
الف الف مبروك يا ملكة اللماضة
تحياتي

حاجات جوايا said...

ألف مبروووووووووووووووك يا قمر
عاقلة وراكزة ودمك سكر
ربنا يزيدك اتزان يا قمر
وعقبال كل مرة

دمتى بخير وصحة وسعادة

Unknown said...

ماما فاتيمااااا
ربنا يخليكي يا رب
عجبتك صحيح ده انا كنت مفيش فيا نقطه دم واحده بس المذيعين بصراحه كانوا متفهمين الحمد لله
,,,,,,,,,,,,,,,,,,,,,,,,
نعكشة
ربنا يخليكي دعبسي من هنا للصب ح وانا كمان هاجي ادعبس واتلامض عندك
,,,,,,,,,,,,,,,,,,,,,,,,
السيدة الاولى رئيسة حزب الاحلام
الله يبارك فيكي يا جميل
عقبالك يارب وعقبال كل الناس
,,,,,,,,,,,,,,,,,,,,,,,,
ابو سمره
الله يكرمك يا باشا
ايه الحسد ده انا اتبناك برضه دي تيجي ده كفايه انك بتعلق عندي بعد طول غياب ربنا يخليك يا احمد يا رب عقبالك
,,,,,,,,,,,,,,,,,,,,,,,,,
سالي
ربنا يخليكي يا قمر
يادي الكسوف يا ولاد
والله انتي كلك ذوق

R-H-S said...

مبرووووووووووووك
وعقبال اما تطلعي في الراديون
تحياتي

rtrcbh said...

لغتى هويتى.. الى كل عربى يتحدث بحرف الضاد، الى كل مسلم غيور على لغته وهويته الاسلامية ،الى كل من يريد العز والفخر لأمته وهويته الى من يبتغون النصرة ان شاء الله، الى من يسعون الى الصلاح والاصلاح ...ندعوكم جميعا اخوانى وأخواتى الافاضل الى المشاركة معنا فى هذه الحملة والتى شعارها (لغتى هويتى )وندعوا فيها الى أحياء اللغة العربية فى كل كتابتنا بجميع المدونات والمواقع والمنتديات وموقع الفيس بوك هذا الاسبوع بأسلوب سهل بسيط لا ندعوا الى أستخدام غريب الالفاظ أوالالفاظ الفخمه ولكن ندعواللبعد عن الالفاظ البذيئة والعامية المتدنيه ، لنثبت لانفسنا اننا أمة مسلمة عربية ، نثبت لانفسنا اننا نحب لغتنا ونعتز بها اكثر من اى لغة اخرى، هذا هو هدفنا.... يدك بيدنا ننشر الامر بكل المواقع والمنتديات والمدونات والايميلات- لله عز وجل فقط نفعلها ، لحفظ ماء وجوهنا أما أنفسنا نفعلها ، ليذكر فى التاريخ اننا ما زلنا عرب نفعلها ،لتأتى يوم القيامة امام الله وتقول يارب عملت على نشر لغة كتابك وإحياءها لا اندثارها ...هذه الحملة هى حملتك انت ليست ملك لاحد انت المسؤل عنها امام الله فأنظر ماذا ستفعل!!!!!!!!!! لمزيد من التفاصيل بمدونة (ادم ويحيى) www.sunlightatnight.blogspot.com التصميمات الخاصة بالحملة موجوده بالمدونة فلنرى الله من انفسنا خيرا ونتوكل على الله ونبدأ الان بسم الله ــــــــــــــــــــ

د.دغيدى said...

على فكرة انا كتبت تعليقى اللى فات قبل ماشوف الحلقات ب س بصراحة انتى تستاهلى اكتر من كدة
الله ينور رفعتى راس طب اسكندرية كلها

شفـقــة و إحســــان said...

مبروك يا لماضة....يا حلاوة يا ولاد التلافازيون حتة واحدة عقبالنا يارب

Noha El-arabi said...

عايزة الحق كنت جامدة آخر حاجة
بس المذيعة يعني
اللهم اغزيك يا شوشو
بس المذيع تحسي انه فاهم و شغال
مبروك يا جميل

بحبك يامصر said...

الف مبروك يا دكتوره لماضه
فرحتلك كنتى منوره الشاشه
سفيره لينا فى القنوات الفضائيه انتى واببى
تحياتى ليكى

غادة said...

كنتى زى العسل يا مرمر و الله
و كان دمك خفيف و ضحكتك لذيذه
وبعدين هزهقك جلاكسى بس اقابلك بس
ربنا يوفقك يا مروه يا رب و تكونى زى دكتور محمد حجازى بتاع ملف المستقبل -اظن اسمه كده على ما انا فاكره
سلام مؤقت يا قمر

فليعد للدين مجده said...

د.\مروة
تحية طيبة
لقد كنت موفقة في حديثك
الي الامام دائما

سيـــناريـو said...

ماشالله عليج .. الله يوفقج وتصيرين
دكتوره اد الدنيا

من الإمارات ^_^

اهو ده عيبه said...

ايه يا مروة العسل ده
بجد حلقة حلوة قوى وكويس انك رفعتيها هنا والا كنت هزعل قوى لو مشفتهاش

بس شكلك كنتى مكسوفه شوية او مخضوضه هو شريف عسل للدرجه دى :)

يارب يوفقك يا مروة واشوفك احسن الناس دايما

علا من غزة said...


الناس بتبتدي خطوة خطوة وانتي وصلتي للتلافازيون مرة وحدة :D
ما شائ الله اللهم لا حسد ولا حول ولا قوة الا بالله :D
بس بجد بجد انا مبسوطة اوي اني شفتك .. وان ابتدى يطلع للمدونين حس يا جدعان
برافون برافون :D

تحياتي يا دوك

صوت من مصر said...

مبروك يا لمضه بس بصراحه لماضتك كانت قليله كنتى خجوله ؟
جدااااااا
عموما مبروك وعقبال ال bbc

عصفور المدينة said...
This comment has been removed by the author.
Mafrousa said...

لماضه انا شفتك يوميها فى التلفزيون
و قعدت ادور على اللينك بتاعك مع اني حطاه فى الريدر و الفيد ...بس تقولى ايه للتخلف يتاعي من ساعتها و انا حتجنن بلف المدونات ادورلك على تعليق علشان اقولك انا شفتك ياجميله
تصدقينى لو قلتلك كنت فرحانه بيكي...اه والله...
المهم الاندال دول يبعتولك عربيه تجيبك و بعدين ياخدوا غرضهم و يرموكي للمواصلات؟
ههههههههههه

محمد عبد الغفار said...

مبروك

اسعدتنى فرحتك

جمعاوى said...

الله ينور يا فندم

كنت بأقوول


حضرتك مش محتاجة حد يشيل لك الشنطة ؟؟؟؟؟؟؟

مـحـمـد مـفـيـد said...

بالتوفيق دايماً

Unknown said...

الف مبروك شرفتينا طبعا هشوف الحلقة واقولك رايى لما انزلها بس
الف مبروك

lobaka said...

بصراحة ماشاء الله
وادي هيدييتك
دومين لمدونتك دي
تكون باسم دومين موقع
كلام في سرك
دومين مجاني في مجاني
http://www.lamadaa.co.cc/
جربيه وقوليلي

yoyeta said...

الف الف الف الف مليون مبروك يا دكتورة لماضة بصراحة كنتى منورة على شاشة التلفزيون و نورتى كل المدونين و انتى بجد معزتك عندى كبير جداً
و ان شاء الله الى الامام دائماً و بالتوفيق بأذن الله

همس الاحباب said...

هههههههههههه
الف مبروك طبعا
وانتى تستاهلى كل خير
واتمنالك التوفيق دائما
وسعيد جدا جدا انى قابلتك طبعا
تحياتى وتقديرى

Misrdream said...

انا اول مره اعرف المدونه من البرنامج
وبجد عجبتني دماغك قوي وعجبتني مدونتك جدا
تقبلي تحياتي

صاحب المضيفة said...

الكبير كبير يا ست لماضة


ما شاء الله لا قوة الا بالله


تشرفت بمعرفتك يوم حفل التوقيع


ويارب دايما من نجاح لنجاح

تحياتي

Anonymous said...

ايه يا بت يا لماضة العسل ده
كنتي عاقلة كدة وركزة بس بصراحة مكنتش متخيلاكي كدة خالص كنت فكراكي اشقي من كدة
بس انت تلاقيكي كنت هايبة الموقف علشان كنت حاسة ان انتي خايفة خالص
بصراحة ربنا يكون عونك انا لو مكانك مكنتش عرفت اتكلم خالص
الف مبروك يا دك و عقبال كدة المرة اللي جاية بس بقي تبقي تقدمي البرنامج مش ضيفة فيه ويكون البرنامج عن اساسبات واصول اللماضة هههههههههه علشان نتعلم منك شوية بمكن يجي مننا هههههههههه

د/اجدع بنوته said...

العدد

والامكانيات

والابتزاز

اديهممممم يامرووووه

هو ده .. خليهم يحسوا بينا

وكراسى صيد

هههههههههه واوبريت الليله الكبيره

عايزه تبيعى نص الجثه وتسترزقى

والله العظيم انتى باشااااا

لقاء زى السكر ومغامره فل

ليكى عندى علبة جلاكسى كامله

بالهنا والشفا

بس ايه ده 10 دقايق كامله عن الطب

هههههههههههه

وكل الاهمال م الاجهزه والامكانيات بس يامروه

عينى ف عينك كده

ههههههههههههههههههههه

احلى منظومه

يلا ادعيلى عندى امتحان كميونتى يوم الحد واحسرتاااااه

ومبروك ياقمر

وجامد البينك ع فكره

alexandrany said...

يا ستي الف الف مبروك وعقبال القناه الاولي والمحليات والقناه الخامسه عشان الحبايب
انا لسه ما شوفتش الفيديوهات بس حبيت اسجل حضور
:)

HERO said...

ايه ده هو ده الحال في كليات طب الجمهورية كلها ولا ايه بالضبط نفس اللي بيحصل عندنا والله بالملميلميتر يا حبيبي بالميليميتر

بجد كنتي منورة والله وثابتة دكتورة يا ولاد بجد
قشطة عليكي والى الامام وعقبال لما نشوفك دكتورة قد الدنيا

تحياتي

عروس البحر said...
This comment has been removed by the author.
عروس البحر said...

نورتي يا لماضة
ما شاء الله عليكي
شعاع نور نور ستديو اوتي قي
انا شفتك علي التليفزيون مباشرة
يا قمر ما شاء الله
ربنا يوفقك في دراستك
يا دكتورة لماضة
تحياتي

mohra said...

ده انت صوغيوره خالص و عسوله ع الاخر

Ahmed Kamal said...

دكتورة لماضة ماكنتيش لمضة في الحلقة ولا حاجة .. بس كنتي حقنة :)

Unknown said...

جهاد
الله يبارك فيكي يا قمر ربنا يسمع منك
,,,,,,,,,,,,,,,,,,
د ابو يحيي وادم
ان شا ءالله يا افندم اشوفها
,,,,,,,,,,,,,,,,,
دغيدي
ربنا يخليك يا دفعه عقبالك يارب
,,,,,,,,,,,,,,,,
شفقه واحسان
اولا الاسم موتني من الضحك عقبالك ياااااارب
,,,,,,,,,,,,,,,,,
نهى العربي
فعلا ما شاء الله عليكي انتي لماحه المذيع كان مذاكر كويس قوي عسل شريف
,,,,,,,,,,,,,,,,,
بحبك يا مصر وانا كمان
ربنا يخليك يا ريس ده من ذوقك بس انا اجي جنب ابي القمر ايه
,,,,,,,,,,,,,,,,,
نور
ربنا يخليكي يا جميل انتي كلك ذوق والله
ابعتي الجلاكسي تاخدي حته من قلبي على طول بس ابعتي انتي
ايوه عرفاه طبعا دكتور محمد حجازي اوعدنا يارب
,,,,,,,,,,,,,,,,
فليعد للدين مجده اللهم امين
ربنا يخليك يا افندم متشكره جدا على راي حضرتك واهتمامك وتشجيعك
,,,,,,,,,,,,,,,,,
سيناريو
ربنا يخليكي يارب واهلا بالامارات كلها انا بحب بلدكم وشعبك جدا جدا جدا سلام اسكندراني من هنا لحد الامارات كلها
,,,,,,,,,,,,,,,,,,
اهو ده عيبه
ربنا يخليكي يا دودي انتي اللى عسل
مش انا اللى رفعتها محمود الهي يستر ه هو اللى رفعها
فعلا كنت هموت من الرعب ربنا يخليكي يارب
,,,,,,,,,,,,,,,,,,
علا من غزة
ههههههههه ايه النفسنه دي يا علا
ربنا يخليكي يا جميل وعقبالك يارب
,,,,,,,,,,,,,,,,,,
صوت من مصر
ايوه يا سيدي الله يبارك فيك
ايوه كنت في نص هدومي فعلا الحمد لله ربنا ستر

إيمان said...

طبعا يا لموضة انا شايفة كم التعليقات وفى مقابل مش لاقية ردك
أدى اللى خوفنا منه يا لموضة طلعتى فى التلافزيون .....وبقيتى نجمة ...ومبقاش فى وقت للمعجبين

مبروك يا لموضة مبروك علينا أنتى مبروك على الجيل حد مهذب وناضج زيك
ويارب نشوفك طبيبة جميلة طيبة قريبة دايما من قلوب الناس

عجبنى فى اللقاء محاولة السيطرة على ارتباكك ...وابتسامتك الدائمة
واتزانك.........

يارب دايما كده نلاقيك منورة كل الشاشات تليفزيون ونت وما يستجد كمان

تحياتى ومحبتى

عندما انتهيت من صنع سفينتى..جف البحر said...

اولا انا اول مرة اجى هنا وجيت بالصدفة ومبسوطة انى جيت وبسم الله ماشاء الله على كم التعليقات سيبك الظهور على الشاشة بيفرق بردوا
انت حد جميلة اوى - عندك اتزان جميل - تلقائيتك هى سر جاذبيتك
عندك عين ثاقبة - بتعرف تعبرى كويس عن التفاصيل
احيكى من كل قلبى وارفع لكى القبعة وانحنى
وأشكر الظروف ودكتورة إيمان إنها عرفتنى بمدونتك
بالتوفيق يا دكتور ومن نجاح لنجاح بإذن الله

Unknown said...

واحدة مفروسة
هههههههههه
بقى كده ماشي يا ست مفروسه هما فعلا توهوني وانا مروحه بس الحمد لله ربك سترها معايا
,,,,,,,,,,,,,,,,,,,,
استاذ محمد عبد الغفار
ربنا يخليك يا حمايا انا فعلا طايره من الفرحه الحمد لله
عقبال اولادك يارب
,,,,,,,,,,,,,,,,,,,
جمعاوي روش طحن
بقى كده يا جمعاوي
لا يا سيدي بشيلها لوحدي الحمد لله فيا ادين وربنا مديني الصحه
يا عم انا لسه فقريه زي ما انا
,,,,,,,,,,,,,,,,,,,,,
محمد مفيد
ربنا يخليك يا ا فند م
,,,,,,,,,,,,,,,,,,
ايمن بدر
خلاص في انتظار رايك
,,,,,,,,,,,,,,,,,,
لوباكا
ربنا يخليك يا افندم على الهديه الغاليه دي بس انا مش عارفه استخدمه ازاي جهله معلش
,,,,,,,,,,,,,,,,,
القطقوطه الصغيره
ربنا يخليكي يا قمر انا كمان ارتحتلك كتير
ربنا يكرمك يارب انتي كمان
,,,,,,,,,,,,,,,,,,
ابو همس
ربنا يخليك والله انا رجعت حكيت لبابا وماما قعدوا يدعولك ههههه وشكرا على االمسج على الهوا
,,,,,,,,,,,,,,,,,,,,
مصر دريم
ربنا يخليك الحمد لله ان البرنامج عرفني على ناس حلوين زيك كده
اتمنى بقى متقطعش الزياره
,,,,,,,,,,,,,,,,,,,
صاحب المضيفه
ليه بس كده يا عم ما كبير الا ربنا
وبعدين انا بالذات كبير دي ميتنطبقش عليها خااااااااالص
انا كماا ن اتشرفت بمعرفتك جدا
اخ وصديق عزيز ربنا يخليك
,,,,,,,,,,,,,,,,,,,
دكتوره رورو
هههههههههه ميغركيش الشقاوه كانت ورا الكواليس وحياتك بس قلت الطيب احسن مش ناوية تعملي مدونة انتي كمان ولا ايه
باين عليكي نفسك حلو قوي في الكتابه وهتسوى الهوايل يلا اتجدعني بقى كده وورينا
,,,,,,,,,,,,,,,,,,,
سمسمه اجد ع بنوته
بذمتك يا سمسمه مش حقيقي
وما خفي كان اعظم بس انا قلت الم الدور احسن يطربق على دماغي هههههههه
عقبالك يابت
,,,,,,,,,,,,,,,,,,,,
اسكندراني
ربنا يكرمك يارب كلك ذوق شوفها كده وقولي رايك ايه
,,,,,,,,,,,,,,,,,,,,
هيرو
مش طب وبس وحياتك كل كليات مصر لينا رب اسمه الكريم ربنا يوفقك يارب
,,,,,,,,,,,,,,,,,,,,,
عروس البحر
يادي الكسوف يا ولاد
ربنا يخليكي والله انتي عسل
عقبالك يارب
,,,,,,,,,,,,,,,,,,,,,,
مهره
هههههههه شفتي بقى امر ربنا
الحمد لله ربك بيقطع من هنا ويوصل من هنا
,,,,,,,,,,,,,,,,,,,,,,,
استاذ احمد كمال
هههههههه بقى كده
المهم كان فيها الشفا الحقنه دي ولا لا

Unknown said...

ايماااااااان
يا خبر انا كنت مستنيه تعليقك والله قلقت عليكي
انا مش ناسيه التاج الجميل بتاعك
ربنا يخليكي يا مون مون يارب
وعقبالك يا جميل انتي كمان تستاهلي كل خير
,,,,,,,,,,,,,,,,,,,,,,,,
البحار ة صانعة شفينه الاحلام
ان شا ءالله البحر مش هينشف ولا حاجه
بجد اسعدني تعليقك جدا واسعدني وجودك جدا جدا
وربنا يخليها ايمان انها عرفتني ب حد جميل زيك

rtrcbh said...

السلام عليكم ورحمه الله وبركاته
آختى الكريمة
لما أراك لم تشاركي معنا في حملتك إلى الآن ؟
أختى الكريمة : هي حملتك هي لغتك ولغتي أذا لم نحافظ عليها نحن ونعمل على نشرها فمن يفعل ذلك ؟؟
أنا لا ادعوا إلى المثالية فى استخدام اللغة والأمر مفصل بالموضوع بالمدونة
وهى ليست دعوا لفرض قيود على كيفية التعبير عن الرأي فلك مطلق الحرية في هذا
أختي الفاضلة أن مشاركتك في هذه الحملة سوف يكون احد أسباب نجاحها ونشر لغتك
ندعوا إلى الاعتزاز بلغتنا ..أعلم انك تعتز بها ولكنى أدعوك الآن إلى نشر الأمر بين كل من تعرف وكل زوار مدونتك التي تدون بها وكل المنتديات التي تشارك بها
إلا أذا كنت غير مقتنع بالفكرة والحملة فلك مطلق الحرية في هذا واعتذر أذا كنت أطالت عليك
والسلام عليكم

Unknown said...

دكتور ابو يحي وادم
انا لسه شايفه الاعلان حالا من لحظات
لان ظروف عملي للاسف مسمحتش اني اشوفه غير دلوقتى

المـــفـــــــقــــــــوعـــــة مــرارتـهــا said...

اهم حاجة ابو همس جابلك تاكلي ايه أوعي يكون شانتاوتش طعمية أزعل منه أوي

Soooo said...

قشطه عليك يابو اللماميض ياجامد
لسه ماتفرجتش عالكليب الصراحه
بس من غير ماتفرج انتي اصلا عسوله

ربنا يكرمك يارب واشوفك وكيل نيابه قد الدنيا


سلامووووووووز

Yasser Hussein said...

الف مبروك على الاحتفاء الاعلامي ده
انتي تستحقين
أنا عملت دوون لوود للفيديو
عشان أتفرج عليه بدون مضايقات سرعة العرض على اليوتيوب بسبب بطأ الشبكة احيانا
:)

خالص تحياتي
مع تمنياتي بمزيد من التوفيق

حبيبـــــــة القمـــــر said...

عديتي يا لماضه ههههههههههههه
بجد كنتي عسووووله اوي
واللقاء كان جميل
وكنتي سكر فيه

آفاق الحرية said...

منورة والله يادكتورة
ايوه كده
بقينا نجوم فضائيات بقي
ههههههههههههه
الف مبروك

Marwa Friday said...

باحبك يا بنت يا جميلة


باحبك وربنا يعلم معزتك في قلبي
:)
مش شغل تماحيك ده على فكرة غزل صريح
هههههههههههههه

كلامك كسفني جداً
ربنا يسامحك
صباحك عسل

Unknown said...

عجبني قوي
الكلام اللي وقولتية
بالذات اخر حاجة
لما قولتي علشان اللي جايلي ميت ميت
للدرجة دي خايفة
علي الناس
بجد ياريت فعلا يفكرو
ان الدكتور اللي كان واقف بعيد وماشفش الحاجة دي بتتعمل ازاي
هيطلع دكتور شاطر ويبقي المريض
مسلم نفسة لية ازاي
وفعلا دلوقتي عرفت الفرق بين ناس
اهتمت تسمع وناس وقفت ورا محاولتش تشوف وبين ناس حاربت
وطلعت فوق كرسي وطراربيزة لالا كتير قوي
منورة
يالماضة
مدونتك جميلة
سلام
مني

شفـقــة و إحســــان said...

شدى حيلك بقى واكتبى ولا التلافازيون هيكسلك....لا بجد انا قاعده مستنيه الجديد يلا بسرعة

Unknown said...

انا شفت الفيديو بجد الله ينور يا دكتورة بجد انتى جبتى من الاخر ولماضتك فيديو حلوة زى لماضتك على النت
تحياتى

Unknown said...

الف مبروك يا ست لماضة هانم، بصراحة كنت مالية مركزك قوي ، وجمك زي العسل .. ربنا يوفقك دائماً.

soma said...

السلام عليكم ورحمه الله وبركاته
الي الدكتوره الجميله لماضه
انا مش قادره اوصفلك انا اعجبت بكلامك قد ايه انا في يوم من الايام كنت فاتح التليفزيون لقيت شريف وانجي بيقدمو بنت دكتوره لمضه اتفرجت عليكي واستنيت الاعاده وشوفتك تاني ودورت علي النت لغايه ما لقيت الويب سايت
بتاعك فكان نفسي اكون صديقه ليكي
صديقتك الجديده سوما

خمسة فضفضة said...

السلام عليكم ورحمة الله وبركاته

مبروك يا احلي لمضه في بر مصر

ايه يابنتي الحلاوه والفصاحه دي

نزلت الجزئين عندي وشفتهم كده علي رواقه

يلا عقبال المره الجايه

سلام

بطوط حبوب said...

حلقه جامده مووووووووووت
مبروووووك وعقبال ال cnn

Asmaa mahaba said...

كنتى زى السكر يا لماضه انا قلتلك انى شوفت الحلقه بالصدفه
بس فعلا الموضوع محرج جداا ياله عقبال ما تطلعى فى مجلس الشعب :)))
تحياتى ليكى سومه_87

Anonymous said...

نفسي حلو في الكتابة ههههههههههههههه
هي طبخة ولا ايه
عموما يا ستي هذه شهادة كبيرة منك وهذه الشهادة اعتز بيها ربنا يكرمك ويوفقك واشوفك كدة ان شاء الله في احسن حال
انا كنت عايزة ايميلك بس مش عارفة اوصله لو امكن يعني تبقي تدهولي وجزاكم الله خيراااااااااااا

رئيس جمهوريه نفسى said...

انا شفت الحلقة وبسم الله ما شاء الله على الثقه الى كنت بتتكلمى فيها ولا كانى فى تصوير ومذيعيين وكده
بس انا مستنى علشان تتخرجى علشان اكشف مجانا تقولى حتتخصصى طب شرعى يعنى الواحد يكشف عندك مرة واحده بس وكمان هو فاقد على الادراكات الحسيه والبصريه والسمعية ومش يعرف يقولك سلام
بس سيبك انا اكتشفت اكتشاف مذهل والله اه وربنا انى ليه فترة طويلة بتسرق وبتشرى كادبورى مكسرات باربعة جنية

زُمُرده said...

الله الله

اغيب اغيب ارجع الاقيكي في التلفزيون
مبرووووووووووووووووك يا احلى دكتوره

اه ياعم اللي علي علي
علشان كده بطلتي تزوريييييييني

طب خدي بالك احنا ولاد بلد واحده وانا اللي يلامضني الامضه

بقولك ايه
استنيني عند الموجه الشقيه

زُمُرده said...

ما انت زي العسل اهو في الفديو ما شاء الله

ربنا يحرسك وينصرك

بنت الصالحين said...

والله يالماضه فتحت القناه مع اني بصراحه مش بتفرج عليها
بس فتحتها علشان ست الحكيمه

وقولت لماما قالتلي مين قولتلها لماذه
قالتلي طيب هاتي النظاره

اديتهالها علشان تشوفك
كنتي عسوووووله
ومكنتش متخيلاكي كده بصراحه

كنت متخيله ناهد وشوشني هي اللي هتطلع
ههههههههههههههههههههههههه


تقولي ايه بقي الصور علي فكره عليها عامل كبييييييير


مباارك عليكي يالماضتي واتمني لك مزيد من التالق

حقى اهرتل said...

مبروك يا لماضه والله وبقيت نجمه الف الف مبروك وعقبال ما اشوف اول قصه قصيره ان شاء الله

Bongo said...

اروح امتحن يومين ارجع الاقي كل ده حصل ؟؟؟

مبرووووك يا جميل علي الحلقات الجميلة دي

و عقبال قناة الجزيرة :D

دعاء مواجهات said...

الف مليوم مبروك يالماضتنا ولساننا المتكلم

وسفيرنا ف الفضائيات والذى منو

نورتى الشاشة يابت يادكتووورة

عقباال كدة لما نشوفك مع (اوبرا وينفرى)

قووولى اميييين

تعالى عندى عزماكى ع حاجة ساقعة وعصير بالمناسبة الحلوة دى

بيس ياقمر

قوس قزح said...

مبروك يا مروة
زى القمر ما شاء الله وكلامك جميل

هو احنا بعد الموت تمنا 150 جنيه بس ؟؟ و انا من الافلام اللى كنت بشوفها فاكرة ان تمننا اكتر من كده :(

جاااااامد اوى ردك بتاع الطب الشرعى ده هههههههههههههههههه

ربنا يوفقك يارب

نبض الحياة said...

السلام عليكم ورحمة الله وبركاته
شارك معنا في إعادة نبض الحياة للشارع السكندري ... شارك معنا في تكوين فريق للعمل في هذا المشروع ... شارك معنا في رفع العبء عن الأسر محدودة الدخل ... نحن في انتظارك لتضع لوجو المشروع وتشارك معنا
اتحاد الأطباء العرب - لجنة الإغاثة والطوارئ - فرع الإسكندرية
www.pulse-of-live.blogspot.com

د.دغيدى said...

نقيتى على الراجل اهو طلق شاهيناز
يالا جاتلك الفرصة
هههههههههههههه

دكـــــتور جدا said...

حضرتك نورتي البرنامج
واتمنى أن تزوري مدونتي المتواضعة

حنين.. said...

كنت عثوووووووووله خالث يا لماضه والف مبرررررررررررررررروك يا جميل وانتى تستهالى يا قمر. والله قلبى كان معاكى, كنت حاسه انك شويه و..... بس كنت منوره, وعقبال المرات الجايه

شفـقــة و إحســــان said...

انتى فين ليه مختفية وحشتينى ووحشتنى حكاياتك
شفقة

د. إيمان مكاوي said...

حقيقي أنا فرحانه بيك جدا ..أنا زميله ليك بس قديمه حبتين ..وفرحانه ليك جدا وعقبال نشر أول كتبك
وإن شاء الله مش هقطع الزياره
تحيات أم البنين

Mafrousa said...

ايه يا لماضه
انتي فين
ما طبعاًً طلعنا فى التلفزيون
اللي علي علي
عاوزينك تشرفينا في
http://faransaraayek.blogspot.com/

Unknown said...

الله يكرمكوا بجد والله
انا مش عارفه ارد على ال تعليقات الجميله دي كلها
اولا كسل ودي عيب مني
وقلة وقت
بس متابعه كويس والله
قلت اما ارد على التعليقات او اكتب حاجه جديده
وحشتوني بجد
زي ما اكون بقالي سنه مدخلتش نت

dodda said...

كله تمام وزى الفل
انا اللى مجنننننننى..ازاى صدقوكى انك دكتوره؟؟؟؟؟؟
مبروك يا لموضه

هديـــل الـروح said...

السلام عليكم ورحمه الله وبركاته ،،

ما شاء الله عليكى يا مروه بجد بجد فكرتينى بنفسى ،، نفس الحجات اللى بتحصل عندنا فى الكليه برضه ،تقريبا الطب على مستوى الجمهوريه بهذا الشكل ،،
أنا سعيده أنى رأيت طبيبه مثلك أعجبنى تفكيرك وقدرتك على عرض المشاكل التى واجهتك بطريقه لذيذه جدا وأسلوب رائع ،
بتمنالك مستقبل سعيد مع الميتين ههههههه تخصص صعب أوى ،، انتى اخترتى الميتيت أنا هختار الأطفال إن شاء الله برضه أبرياء ميعرفوش حاجه ،،

وفقك الله فى مشوارك
السلام عليكم

3ashry said...

بصراحة .انا فرحت جدا لما جاللى الخبر عن طريق الصدفة و برغم اختلافنا الفكرى الا انى مبسوط و سعيد بالفيديون ده و يا رب من نجاح لنجاح


ملحوظة : حاسس انى ببارك لحد ف الثانوية العامة

ana ga3an said...

مبرووووك يا دكترة
هي دي الناس اللي بتشرف لما تتكلم علي العام
مش المناظر اللي ما يعلم بيها الا ربنا

مشرف صفة التوحيد said...

انا سعيد جدا لان هناك فتاه شرقيه ومصريه بتتكلم وبتدون بالطريقه دى بجد بجد انا مبسوط بيكى وبافكارك وياريت كل الفتيات الى زيك يحاولوا يعملوا زيك لانك مثل رائع لكل فتاه مصريه

مع فائق تحياتى
ياسين عبد العزيز حامد

M!DO said...

على فكرة أنا يوم مانتي طلعتي في otv انا كنت فاتح التليفزيون بالصدفة و لقيتهم بيقولو معانا المدونة فلانة الفلانية ... قلت أحول اشوف حاجة تانية بدل الملل اللي أكيد هشوفه ده ... بس لما سمعت إنك في طب ... مرضتش أحول .. قلت اشوف إيه القصة ؟
أصل فكرتي عن بتوع طب دول مقولكيش ... أنا اصلاً مبطقش الدكاترة ... no offense :)
من غير رغي يعني إنتي عسل و مدونتك عسل و أنا حطيت لينك بمدونتك عندي في البلوج لو مفيش مانع يعني :)

حاجــ عيال ــات said...

لماضة ياست الدكتور
بجد مدونتك زي السكر وانت تجنني في الاذاعه والتليفزيون
ربنا يوفقك يارب

صمت المشاعر said...

ما شاء الله عليكي يا مروه

كنتي اموره وكلامك زي العسل

الي الامام دايما يارب

أحمد عاطف said...

السلام عليكم ورحمة الله وبركاته

الحلقة الخاصة بيكي كانت في قناة او تي في يوم 3 يونيو سنة 2008

ويكفي اني اقولك ان اسلوبك وطريقتك في الحديث وهدوئك وثقتك هما اللي دفعوني يومها اني انشأ مدونة

في اليوم دا مالحقتش انقل اسم مدونتك

بس عملت مدونة وانا احمل بين نفسي الشكر والعرفان لكِ بالجميل

فأنتِ صاحبة الفضل في أن ادخل ذلك العالم الذي لم أعرف عنه الكثير

شكرا لكِ بعد عام كامل من التدوين

شكرا لكِ من أعماق قلبي

تحياتي يا رائعه

Unknown said...

مبارك يا دكتورة لماضة هذا الظهور الرائع.......فى اولثلاث دقائق كنتى متوترة حبتيتن..وبعد كدة انطلقتى ففوووووووووووووووووووووووووو

mohamed said...

ماشاء الله
غدا بأذن الله
أنتى وكل من هم مثلك
سيجعلوا مصر
أحلى
وأحسن
تحياتى لكى