في المنزل .. حيث يقوم سوووو بعمل وجبة الافطار وتقوم ماما نظمية بمشاهدة التلفزيون
ماما نظمية : واد يا سوووو .. ماتعرفش برنامج ايناس الدغيدي هيتذاع الساعه كام
يخرج سوووو من المطبخ وهو مرتديا مريلة المطبخ ورابطا رأسه بمنديل بـ أوية .. وممسكا بالمغرفة ويبدو عليه الاستعجاب
سوووو : ايناس الدغيدي ايه دلوقتي يامّه ؟؟
ماما نظمية : مش هي بتعمل برنامج اسمه الجريمة برضك ؟؟؟
سوووو : لأ يامّه جريمة ايه بس .. أنتي دايما مخك رايح للمصايب .. اسمه الجريئة ..على وزن الجريئة والوحش .. حتى شفتيها وهي بتغيظ الوحش بشعرها وشوية شوية تلاقي كتاكيت بتنطلنا من التليفزيون منه .. بس ماعتقدش انهم ممكن يعرضوه قبل الفطار .. إلا بقى لو كانو عايزين يكسبوا ثواب افطار صائم قبل المغرب !!!
ماما نظمية : ليه بقى .. دي حتى بتقول حِكَم وكلامها موزون ويمكن كمان تعرض حتت من افلامها وخصوصا فيلم مذكرات مراهقه الي بيفكرني بأبوك وشقاوته وهو في شبابه
سوووو : - محدثا نفسه - حِكَم وكلامها موزون .. انا فهمت بس ليه بابا بظبوطي طفش وسابنا وساب البلد و هَجّ على أطاليا !!!
ماما نظمية : وانت بقى يا شملول عامللنا فطار ايه !!؟؟
يجلس سوووو مربعا على الارض بجوار الكنبه التي تجلس عليها ماما نظمية
سوووو : عامللك يا ستي فضلة خيرك وخير السامعين والقاريين .. فخده ضاني ودكر بط وعشر تجواز حمام - راجع الموضوع ده - وشوية حاجات خفيفة كده .. فراخ بانيه .. مكرونه باشاميل , و السمبوسك بقى ياستي عامل صنفين .. صنف باللحمه المعصجه بالسبانخ .. وصنف بالجبنه الرومي والجرجير
ماما نظيمة : بس !!! طيب متنساش تحمرهم بالسمنه الفلاحي وتحط عليها قشطه بالزبدة احسن الرجيم بتاعي يبوظ
سوووو : معلش بقى مانت عارفه اني ايدي لسه ما خدتش عالمطبخ زي ايام زمان
ماما نظميه : مش انت اللي حكّمت نافوخك وقلت افتح مكتب داكور .. اهو المكتب فتح على نفوخك .. واديك ياخويا فتحت المكتب .. ونسيت الصنعه !!
سوووو : يعني وهو انا كنت عارف ان الاسمنت هيغلى وكل الناس هتهرب من شغل المقاولات يامّه .. ماهو على ايدك .. مانابني غير اني عَشّمت نفسي بالحَلَق !!؟؟
ماما نظمية : على قولك يابني .. يا معشم نفسك بالحلق .. شرق برق
سوووو : - محدثا نفسه - ااااه .. رمضان رجع ورجعتلنا ماما نظميه بأمثالها !!!!!
تمسك ماما نظمية بالريموت كونترول وتحاول تغيير القناه
سوووو : - مندهشا - بتعملي ايه .. ده هايجيبوا برنامج جديد بتاع أكل وعايز ألحق اعمللكو صنف منه !!
ماما نظمية : بلا صنف بلا بتاع .. بلاش الهباب الي بتبلبعوه ليل نهار ده .. انا عايزه اشوف البرنامج بتاع المسابقات .. اصل انا امبارح اتصلت بيهم وجاوبتهم على السؤالات بتاعتهم .. ومتعشمه ربنا يكرمني واكسب التاب توب
سوووو : تاب مين؟؟؟؟ مين ده الي تاب .. تاب ايه يامّه البرامج الدينيه دي مسابقاتها مش مضمونه مش كانوا بيقولوا امبارح الجايزه عمره والنهارده قالولك العمرة محدش رايحها عشان الانفلونزا ؟؟؟؟
ماما نظمية : يابني تاب توب .. هو انا اقل منكم انت واخواتك .. مانا لازم ادخل عالنت انا كمان واعمللي أكاون عالفيس بؤ
سوووو : اهلا .. اهلا .. تعالى يا بظبوطي شوف مراتك اللي انحرفت على كبر !!!!! شوية شويه وتقولي عاوزه اشيت على الفاسينجر !!!!!
-----
قبل المغرب بدقائق .. تخرج لماضة من حجرتها و تقابل سوووو و ماما نظمية
لماضة: يااااااااه .. انتم فينكم يا جماعة من رمضان اللى فات .. من أيام معركة الرنجة على الشط .. وحشتونى .. أمال فين عسقول و بابا بظبوطى ؟؟
سوووو: يا فتاح يا عليم يا رزاق يا كريم ... ما كنتى فى أوضتك بقالك حداشر شهر ... إيه اللى خرجك دلوقتى .. عسقول يا ستى راح يجيب لنا عرقسوس من بتاع عصير القصب اللى جنبنا .. و بابا بظبوطى ماعجبتهوش الأوضاع هنا .. فخلع على أطاليا
لماضة : كدة من غير مايقول إنه مسافر .. أصلى كنت عايزاه يجيبلى من هناك بيتزا ومكرونه شعر بدل اللى بيعملها سوو
سوو : ايه مكرونة شعر دي .. شيفاني بعملك مكرونة مولد النبي .. عشان تعرفي بس انك خيبه ولا عمرك هتفلحي في مسكة المغرفه
طااااااااااااااااخ .. باب الشقة يترزع و يتفتح و يدخل عسقول محنى الظهر و يحمل فوقه برميل ضخم
عسقول صارخا : يا عم سوووو أنا مش رايح مشوار العرقسوس دة تانى .. و اجرى بسرعة نزل من على ضهرى البرميل
ماما نظمية : اتحرك ياد يا سوووو نزل من على ضهر أخوك تموين العرقسوس اليومى بتاعنا .. الواد شكله خلاص هايقع من طوله
سوووو: حاضر حاضر – إيه المياعة دى .. هى هاتفرق فى إيه لما يبقى شايل العرقسوس على ضهره أو شايله فى بطنه
عسقول: يا عم أنا دوخت على ما لقيت برميل بالحجم دة .. و بعد ما أخدته و روحت لبتاع العصير و طلبت منه يملاه عرقسوس .. قال لى أسيبه و أفوت كمان يومين يكون ملاه .. قلت له يومين إيه يا عم .. دة الأدان فاضل عليه ساعة و أنا عايزه قبل الفطار .. المهم فين و فييييين لما قدرت أقنعه يملا ربعه
لماضة : ربعه إيه .. دة البرميل مليان
عسقول : ماهو أنا روحت على بتاع عصير تانى بس العرقسوس اللى عنده كان خلص .. فقلت له خلاص .. يحط كل التمر هندى و السوبيا اللى عنده .. دة حتى الله يكرمه حط لى جركن عصير بطيخ كان فاضل عنده من بتاع أسبوعين كدة .. و الغريبة إنه ما أخدش فلوس على عصير البطيخ .. فيدوبك .. عدى نص البرميل بالعافية
سوووو: أمال النص الباقى دة مليان إيه ؟؟
عسقول : و أنا راجع لقيت على الناصية زير مية و كام قلة .. روحت مفضى اللى فيهم جوة البرميل .. فيدوبك جاب تلات أربع البرميل .. بس فيه قلة وقعت منى جوة البرميل فكسلت أرجعها مكانها
ماما نظمية : أمال الربع اللى فاضل دة مليته منين يا وااااد ؟؟
عسقول : بصراحة ... وقفت أريح شوية جنب معمل الطورشى اللى جنبنا .. فعجبتنى مية الطورشى جدا .. فقلت مش هاحرم نفسى و لا هاحرمكم منها .. فروحت مكمل البرميل
لماضة : بمية الطورشى ؟؟ انت عارف الراجل ده بيخمرها ازاي
عسقول: أيوة .. بيخمرها بالتبول الارادي .. و الراجل حط لى شوية لفت صحيح و جزر و لمون ببطرماناتهم
ماما نظمية : و الله براوة عليك يا ولد يا عسقول .. عرفت تتصرف صحيح .. بالهنا و الشفا يا أولاد .. كل واحد يدخل بقى يجيب له جردل عشان يغرف لنفسه من منقوع البراطيش اللى فى البرميل دة .. عشان خلاص المدفع قرب يضرب .. و التفاعلات اللى جو البرميل هى كمان هاتضرب
-----
آذان المغرب .. ويجلس الجميع ( ماما نظمية و سوووو ولماضه وعسقول) على الطبليه اللى بطول طرابيزة الميس بتاع الجيش , وبمجرد ما يبدأ الآذان ينزل الجميع حتتك بتتك عالاكل زى الحمير فى النجيل.. لا الحمير بتشبع و لا النجيل بيخلص لغاية ما يتبشمو وينامو على ضهرهم كما البهايم
عسقول : يااااه .. أنا متهيألى زودناها شوية فى الأكل المرة دى !!؟؟ مع إن الأكل مش ولا بد مع عدم اللا مؤاخذة
لماضه : قول لأخوك اللي مش راضي يعتقنا و زي ما يكون بيعلفنا
ماما نظمية : ألا صحيح يا سوووو .. ايه البتاع الاخضر اللي عامل زي الملوخيه ده؟؟
لماضة : هاهاهاهاىىىى .. دة النجيل يا نظنظ
سوووو : نجيل إيه بس .. ده الصنف اللي لقطته وعملته لما كنا بنتفرج عالبرنامج الجديد بتاع الاكل اللي قلتلك عليه
ماما نظمية : بس ما كانش طالع معاه اخضر زي ما طلع معاك كده !!!!!!
سوووو : معلش بقى .. المرّه الجايه هيطلع ازرق واحمر .. وبافكر اعملو كاروهات
عسقول : بس انت واثق في اللي أكلناه ده .. اصل بطني بتعكش عليّ
سوووو : بتعكش ايه بس .. بلاش تخاريف يا جرع .. استعيذ بالله واسترجل واشرب بيريل
لماضة : وكتاب الله انا حاسسه انك كنت بتفتكس وبتجرّب فينا
سوووو : انا ياختي ولا جرّبت ولا نيلت .. انا نفذت اللي عملو الشيف سمسون بالظبط
ينظر الجميع لسوووو باندهاش
الجميع : الشيف سمسون ؟؟؟؟؟؟؟
سوووو : اه سمسون .. ده شيف اتعلم الطبيخ في لومان طره لما اتحبس في قضية إتجار مخضرات
يضع الجميع يدهم على كروشهم .. ونسمع صوت أشبه بصوت الديناصورات في فيلم صراع في المترو
الجميع : يالهووووووووووووووووووووووووووي !!!!!!
استشد معكم
ملحوظة
باقي الحلقات هتلاقوها على جنب
45 comments:
أولاً كل سنة وانت طيبة يا لماضة
الموضوع تحفة وآخر لماضة بجد
أنا مت من الضحك انت جايبة الكلام ده منين ؟
مش انا لوحدي يا دعاء
بصراحه سوو وابن حجر العسقلاني عاملين فيه شغل عالي
ايه هو ده؟
نص المفردات مش فاهمها ... ههههه
انتوا بتاكلوا 3 طن مواد غذائية في الفطار والا ايه؟
ههههههه
تحياتي لعسقول وسوووو تحية كبيرة قوي
ليه يا حمايا بس
مهو الكلام واضح وصريح
كل واحد ومعدته بقى
عشان تعرف ان المصريين يهضموا الزلط
أنت حكيمة لا يؤمن لها جانب لا بد أن يقع أعفاءك من الوظيف اذ يخشى أن تقتلى الشعب المسكين بالضحك .. خيالك الضاحك مفازة مررررررررعبة .أنا فتاة تونسية أموت بالضحك كلما قرأت نصوصك وقد كتبت وصية أتهمك فيها بجرم اللماضة ..على فكرة مادام لدي نفس سأعود لقراءة النص مجددا لأضحك ...أنت رهيبة !!
جميلتي لو كنت املك دواءا مثل الضحك
لاستخدمته مع كل مرضاي
:))
اسعدتني زيارتك كثيرا ومتابعتك اكثر واكثر
ما شاء الله يا حاجة لماضه
ربنا ما ينضب قريحتك
:)
الا ايه اللي عرفك طول الميس بتاع الجيش
ده انا معرفهوش
كل سنة وانتي طيبه
اموت واعرف اية الطبق الاخضر اللى ممكن يكون احمر أو أزرق أو - ودي المصيبة - كاروهات
موضوع أكتر من تحفة بجد
الله ينور
كل سنة وانت طيبة و بالهنة والشفة للوجبة
فعلا الموضوع كوميدي
انا كنت اعدةبضحك بطريقة مجنونة
كل سنة وحضرتك طيبة يا دكتورة
ورمضان كريم
ههههههههههه
كل سنه وانتى طيبه يالماضه
بس اللى يشوفك مايقولش ان بتاكلى كل ده لوحدك
ههههههه
لو على سوووو ممكن
وايه موضوع
بيخمرها بالتبول الارادي
يعععععععععع
انتوا من قوم نمنم ولا ايه
يالهوى
وفى الاخر استشهدتوا؟
ده اقل واجب يابنتى
(:
رمضان كريم يادكتورة لماضه
وكل سنة وانتوا طيبين
بس مين ابو حجر العسقلاني ده
انا حاسس بجو الذهاب ليثرب والكفار واقفين على باب المدينة
ههههههههههههههههههه
البوست تحفه كما تعودنا منك دايما
ربنا يتقبل منا ومنكم الصيام والقيام
في حفظ الله
هاهاهاهااىىىىىى
ماشى يا عم قلم رصاص
مقبولة منك
:-) :-) :-)
بس ابن حجر العسقلانى دة بعيد جدا عن الكفار و يثرب .. دة كان فى القرن التاسع الهجرى .. يعنى بعد عصر كفار يثرب بتسعميييت سنة
بجد انا فطست على نفسي من الضحك
والتفاصيل بتاعتك حلوة جدا
ان شاء هقرا كل اليوميات من اولها دلوقتي
ان شاء الله هتابع المدونة
واتمنى تزوريني في مدونتي عشان انا لسة جديدة
هههههههه
صحيح ده افطار شهي جدا جدا جدا
هههههههههه
كل سنه وانتي طيبه
يا عيني على الإبداع الثلاثي المعتبر
:))
و انت يا بن حجر مدونتك ماتت و شبعت موت ما تشغلها يا راجل
سواء الصحيفة او الإستراحة
ايه الكسل التدويني ده
يا ترى لسة فاكرانى ولا لأ
عامة كل سنة و انتى طيبة سواء افتكرتينى أو لأ
تحياتى
شكراً يالماضة على وجبة الضحك هذه
11 شهراً في الغرفة! الحمد لله على السلامة وفي رواية أخرى صباح الخير
وفي رواية ثالثة كفارة
ههههههههههه
كل سنه وانتى طيبه يا لماضه ،،
إيه المصطلحات الجديده دى بجد مع انى مفهمتهاش إلا إنها عجبتنى جدا
رمضان كريم عليكم وعلينا ومنتظرين باقى اليوميات
هههههه
جميلة قوى القصة
كل سنة وانتى طبية ورمضان كريم
السلام عليكم....
كل عام وأنتي بخير يا لموضه يا جميله...
في أمان الله
لماضة كل سنة وانتىطيبة وبخير يارب دايما
رمضان كريم يا عسل
وخلاص ان اتفقت مع المخرج والمنتج
وهنعمل فيلم
( افطارا شهيا )
بطولتك طبعا يا دكتور
كل سنة وانتي طيبة
رمضان كريم
:)
السلام عليكم.. كل عام وأنت بخير.. أنا مسلم.. نعم اسمي مسلم.. أنا سعيد والحمد لله بميلادي مع شهر رمضان المبارك وسأكون سعيدا أكثر بزيارتك..
وجزاكي الله كل خير فيما قولتي
السلام عليكم
كل سنة وانت طيبة
يارب اكون زائرة خفيفة على قلوبكم
مستنية زيارتك
تحياتى لك
دي اول مره ارد علي حاجه لمدونتك
بس بجد المدونه تحفه
انا متابعاها من فتره
وبجد دمك زي العسل يا ست الدكتوره
انا برضوه زميله في الشقاء بس في
كليهالهندسه
كل عام وانت بخير
وعقبال السنة الجاية الاقيكي باشمهندسة قد الدنيا يا داكتورة
يا ترى مستعدين للعشر الأواخر زى استعدادنا لأول ليلة ؟http://hadeelheart.blogspot.com/2009/09/blog-post.html
علي فكره جامد اوي الحوار ده بالذات في البدايه كده ياسووو .. لابس المريله .. مش مصدق بصرحه مريله يا سوووو هههههه
بجد شغل جامد اوي وده مش غريب علي لماضه هانم والعسقلاني انا لسه معرفوش
بس سووو ده برنس وانا عارف
-------
هههههههههههههههههههههههه
يخرب بيت جنانك يا بت انتى
ازيك يادكتوره لماضه
اخباراتك ايه
فى دعوه لتجمع خيرى فى الاسكندريه
يوم 10/10
والدعوه باسم حنين القلب
وعاشقه الرومانسيه
نتمنى نشوفك
لسه شهر رتبى امورك علشان تبقى معانا
والتفاصيل على مدونتى
بجد بجد سووووووووووووووووو
ده مسخره
وانتى اسلوبك جامد
كل سنه وانتى لماضه
المصرى
موضوع شيق
كل سنه وانتى طيبه يا لموضه انتى
وحشانا جدا جدا
عيد سعيد عليكى
راى انك موهوبه طبعا يادكتور
بجد المسلسل ده رائع
مش ناويه تتنجى حاجه تانى قريب
انا راى الحجه نظيمه كانت مشعشعه بصراحه
كل عام وانتم بخير
قرار 101
بعد المشاورات و المؤتمرات و المناقشات
قررنا نحن رخم باشا و رخمه هانم
انشاء بلوج نرخم بيه عليكم
و من باب التكرم و التفضل و الرخامه
حبينا نقول لكم عشان تيجوا تزوروا البلوج غصباً عنكم
و مش هقول سلاااام
رخامه بقى هه
قهوة الرخمين
:D
رمضان خلص من زمان .. والعيد كمان
مافيش بوست جديد
في انتظار الجديد
:)
ها يا لماضه انتى رحتى فين وحشتينا والله ووحشتنا موضوعاتك ..كل عام وأنتى بخير
السلام عليكم ورحمة الله وبكاته
هههههههههههههه
وحشاني يا لماضه
وموتيني من الضحك
كل سنة وانت طيبة
كل سنة وانت طيبة
ومدونة جميلة
تقبلى مرورى
بوست رائع كالعادة.. مزيد من النجاح يالماضة
هههههههههههههههه من ايام الرنجه ع الشط فكرتينى بالبوست دا
...
متقوليليش ع الشيفات واللى بيعملوها انا بقوم ماما بالعافيه من قصاده ووجعتلى بطنى بقى كل دعوتى فى الصلاه ربنا ما يسامحه :(
لحد ما يوم قولتلها يا ماما انا كل مره اترجاجى بلاش تعملى اللى بيعملوه ولالا تقولى ايه دا يعنى هو وحش اخر ما فاض بيا قولتلها اااااااااااااااااااااه وحش خلاص زهقت شهرين بجامل لحد ما جالى تسمم
فين محشيكى الحلو فين الفته فين الطبيخ لو زهقتى اقلبى صينى اعملى ملوخيه......من ساعتها الحمد لله مبقيتشى تنفذ وصفاته المفتكسه...رغم انها بتكتب وراه وعندها كشكول للوصفات بتاعته ... مش مشكله تكتب براحتها المهم معدتى تفضل سليمه ...
:)
السلام عليكم هذة القصة تجنن يا لماضة
واتشرف بدخولك مدونتى
حلوة اوى اوى اوى يا لماضة بس تعالى هنا انتى كنتى مختفية فين المدة دى كلها
انتى وحشة مش بتسالى على اصحابك المدودين اقصد المدونين
سلامى
شفقة
Post a Comment