Monday 24 August 2009

فطر صايم والدعوة هدية


 

من 3 سنين تقريبا اتسابقت انا واخواتي أزاي نفوز بافطار صائم وبالدعوة دي .. اكيد مش دعوة فرح -عقبالي يارب -  ولا هي دعوة غداء – أوعدنا كده - دي دعوة صائم عند فطره
قمنا أشترينا قيمة تلاته اربعة كيلو بلح على عجوة .. وكل واحد خدله ناصية - غرضنا كان شريف المره دي -  قبل المغرب بنص ساعه عشان نوزع على الناس اللي هيأذن عليها المغرب قبل ما توصل بيتها وبكده نبقى فطرناهم على حسابنا ولا اضطرينا نعزمهم بقى ووالدي يدفع من لحمه الحي .. ولا أمي تفضل تطبخ وتجهز لمية صنف ..  ولا أنا اتعاقب بغسيل مواعين المية صنف دول
هما يدوب كام بلحاية يفطروا بيهم وكتر ألف خيرنا .. يحمدوا ربنا ..  ويدعولنا من قلبهم .. ويفتكرولنا الجمايل دي
 وفعلا انتقلنا بإذاعة خارجية إلى ما يطلبه الصائمون في برنامجهم المفضل على السفرة او على الناصيه مفرقتش كتير
 وفجأة ظهر اول فدائي من بعيد .. طلعت اجري وبعزم عليه بالبلح .. لاقيته بياخد ويعبي في جيوبه الاتنين - ايوه مهي حاجه ببلاش كده - وياريت على كده وبس قام واكل شوية كمان وهو واقف - مهو بلح سايب - وبعد ما شبع قالي انا عمك جرجس جاركم الجديد !!
بعدها على الناصية التانيه لمحت بنت الحارة – حبيتك يا أم حلق تارة – المره دي هي اللى جريت علينا وطبعا العلام مش بالساهل - اللي يتلسع من الشوربة ينفخ في كباية الشاي - قمت عديت 4 بلحات زي الشرع ما قال واديتهالها .. لاقيت البنت بتبصلنا بنظرات عجيبة شككتني في نفسي .. وقامت واكلاهم وهي ممتعضة قوي .. قلت وماله بعذرها !!
وبعدها بلحظات قرب مننا شيخ من مظهره طبعا يدل أنه خارج دائرة الشك قمنا مقدمين كل عزيز لدينا من تمر وعجوة بنظرة منكسرة لاقيناه فرح قوي وقال بارك الله فيكم أي والله قالنا بارك من غير ميم وسألنا هو البلح ده منين
 قلناله : من عند عم فتحي البقال
الشيخ :  لأ أقصد فلوسه حلال
لماضة : والله يا شيخنا احنا وفرنا مصروف البمب والصواريخ وقلنا نعمل حاجه ابتغاء مرضاة الله ونفطر صائم ونكسب دعوة لا ترد
الشيخ وشه نور وقالنا : والبلح ده نوعه ايه
لماضة بكل سذاجة : ده بلح مستورد أه ونص أسمه بلح نانسي
الشيخ وشه اتقلب ضلمة ورمى البلح من ايده بعد ما كان بيفكر يدوقه : استغفر الله .. اعوذ بالله منكم ومن أمثالكم  .. هتخلوني أعيد وضوئي .. ربنا يهديكم أنتوا واللي زيكم
شوية ولاقينا مجموعة شباب زي الورد .. ميلت على اخويا وقلتله اتعرف على اساميهم الاول .. وفعلا الشباب رحبوا بينا قوي الحق .. وبدأنا نوزع عليهم البلح فعلا البركة بالشباب .. ولسه ملحقتش اتهنى بالبركة دي لاقيت الشباب بيلعبوا نبلة بنوى البلح !!
قلت لأخويا هو حل من اتنين اما ان المغرب اليومين دول بيأذن والشمس طالعة .. أو ان فيه فتوى جديدة ماشية في البلد ان البلح مش من المفطرات
أو أن البلح ده متهرب او براني والناس بتشك في ذمتنا وبيدخلوه على المطحنه يتاكدوا انه بيطلع نوى
او مش لاقيين في التمر عيب قال يا مفطر الصايمين
 .. أنا حاسة اننا بدل ما بناخد ثواب بنحرض الناس على الرذيلة وبنمارس فعل فاضح في الطريق العام
بقولك ايه يلا بينا نروح بدل ما يجوا يمسكوني انا والبلح ونتلف في ملايات .. ولا يحرزوا على شوية البلح الباقيين اللي هنفطر بيهم واحنا بندعي دعوة صــــائم .. توب علينا يارب !

29 comments:

Unknown said...

ملحوظة على جنب

::::::

حدث بالفعل

Unknown said...

ازيك يا دكتورة
بوست جميل
و ساخر و غريب كمان

الا الشيخ لما سمع نانسى
!!!!
ههههههههههههه
واضح ان المكان اللى وزعتوا فيه البضاعة اما تلات ترباعهم فاطرين
اما معظمهم من الأخوة الأقباط

الا هو ايه اللى من غير ميم
؟!!
-------
صحيح انا احمد بدراوى
من الفيس بوك
بس قفلت الأكونت فترة كدة
قولت اقولك لا تفتكرى انى شيلتك او كدة
---
مع تحياتى

بسمه عبدالباسط said...

ازيك يا جميل اخبارك ايه

عارفة انا السنة اللى فاتت اشتريت انا واخويا بلح برضة بس عملنا فكرة تانية اخويا وداه للناس فى الجامع وهما يتصرفوا فيه براحتهم بقى أعملى كده وإن شاء الله تاخدى الثواب برضة

Fahd said...

عديت 4 بلحات زي الشرع ما قال

اضحكتني والله اضحك الله سنك

لقمة محدش بياكلها بالساهل اقصد اجر

بارك الله فيكي وكل عام وانتم بخير

صيدلانيه طالعه نازله said...

هههههههههههههههههه
حلوه نتلم احنا و لبلح فى ملايه دى
بس بجد فكره حلوه قوى و ربنا حيجازيكى خير عنها انشاء الله
كل سنه و انتى طيبه

Hannoda said...

مع اول سطور قريتها في البوست تخيلت معاكي برومانسية بالغة شكل الشارع قبل وقت الآذان
وتخيل كم الدعوات الملفوفة بطيبة وود وابتسامات مريحة وتفرح

صدمتييييني

ده حتى الشيخ ماهانش عليه يكمل الخير للآخر
عمل توترتة ورش عليها حبة رملة ومشى

كل سنة و انت طيبة والمهم انك كسبتي الحسنات من رب العالمين

رمضان كريم

Unknown said...

رمضان كريم :)

هديـــل الـروح said...

السلام عليكم
ازيك يا لماضه ؟عامله ايه ؟ كل سنه وانتى طيبه ورمضان كريم عليكى وعلينا ،
بس بج دالفكره دى جميله أوى جزاك الله خيرا انتى واخواتك عليها بس بجد لو جاتلك الفرصه تعمليها تانى متتأخريش لأن بجد ثوابها كبير أوى

يا مراكبي said...

حدث بالفعل؟

ههههههه

اوعي تكوني عملتي الحكاية دي في شهر تاني غير رمضان وانتي مش واخده بالك .. تلاقيكي مستغربة ايه حي الفاطرين ده

وبعدين ليه تجيبي بلح اسمه نانسي برضه؟ ماهو من اسمه كده فعلا يفطر لوحده

tamer.sala7 said...

ربنا يجعله في ميزان حسناتك بس ابقي خدي بالك بعد كدة بدل ما تتحبسي بتهمة نووية

لاسع افندى said...

حرام عليكى حد يفطر الناس على بلح اسمه نانسى عجرم
هههههههههههه


تحياتى اللاسعه

سمسمه said...

بوست جميل يالماضه
(:
كل سنه وانتى طيبه
وياستى اجرك عند ربنا مش هيروح

أبو العريف said...

ازيك يا دكتوره لماضه

والله انت فقر

دمك عسل

الغريب بقي

انا طول عمري بقضي رمضان في البلد

وطبعا في البلد عندنا ليه شكل تاني

لكن اخر رمضان قبل ما اجي السعوديه

اضطريت اقضيه في الشغل بين القاهره والسويس

شفت غرائب

ناس في السويس قاعدة تضر شاي في النهار عادي

رجاله بشنبات

انا كان هاين علي اطردهم من الموقع

وقال ايه كل شويه يوقفوا شغل ويشربوا شاي

ولما اتنرفزت وزعقت

اصلهم عمال وبيعطلو الشغل

جا واحد قالي معلش اصلهم مرضي

نص البلد مرضي

وفي القاهره

القهاوي فاتحه عادي

وقشطه

بسمة انور said...

ههههههههههههههه

يالهوز
ايه الخفه دى يا عثل انتى

لالا احتسبى الاجر والثواب عند ربنا
الناس هما اللى فهموك غلط

ههههههههههههههههه

بسمة انور said...

اه نسيت اقولك

مدونتك حلوووووووووووة ربنا يخلهالك وتتربى فى عزك ان شاء الله

mohamed ghalia said...

كل سنة وانتى طيبة يادكتور

شوكولاتة said...

وده برضو كلام يا لماضة نانسي دلوقتي مابقتش موزة انتي من بخرة الصمح تجيبي بلح هيفا ده شغال في الهرم حلاوة

Anonymous said...

كل سنة وانتي طيبة يا دكتورة

انما الاعمال بالنيات ولكل امرئ ما نوي


الا ايه حكاية 4 زي الشرع دي؟؟

السنة بالاعداد الوترية يعني 3 او 5 او 7

فعن عَامِر بْن سَعْدٍ عَنْ أَبِيهِ قَالَ قَالَ رَسُولُ اللَّهِ صلى الله عليه وسلم مَنْ تَصَبَّحَ كُلَّ يَوْمٍ سَبْعَ تَمَرَاتٍ عَجْوَةً لَمْ يَضُرُّهُ فِي ذَلِكَ الْيَوْمِ سُمٌّ وَلا سِحْرٌ . رواه البخاري

قلم رصاص said...

كل سنة وانتي طيبة يادكتورة
ورمضان كريم وربنا ميقطعلك عادة يارب

تقبل الله منكم ومنا

Me7'o said...

الظاهر إنك كنتى بتديهم البلح وتستنى الفارغ

هههههههههههه

تحياتى

كل سنة وإنتى طيبة ورمضان كريم

ذو النون المصري said...

جميل جدا جداا لبوست
ضحكت فعلا علي المواقف فيه
كل عام انتم بخير

شموسة said...

لماضه ....رمضـــ كــريم ــــان
أعاده الله عليكي باليمن والبركات
كل سنه وأنتى بألف خير

تقبلي مرورى

مصري بالغربة said...

كل سنه وانت طيبه يا لماضه
بس البلح ده كان شكله مغشوش ولا ايه
باقولك ايه مفيش عندكم في مصر او في كفر الدوار

بلح هيفاء وهبي
بتاع بوس الواوا
هههههههههههههههههههه

كرسي أعتراف said...

احببت ذلك النوع من اللماضة

دكـــــتور جدا said...

ربنا يباركلك يا دكتورة
والكلام ده في العلمين ولا ف بلدكو !!!
ربنا يتقبل منكم ان شاء الله

call to liberty said...

موضوع جميييييييييل
متشكريييين
ودى اول مرة ازور فيها المدونة دى وان شاء الله متكنش اخر مرة
http://feeelkalb.blogspot.com/ اتمنى الزيارة

mohamed said...

ايه يا بنتي دا كله

دي كنت منطقه ايه بالضبط

دول هما المصريين

Unknown said...

كل سنه وانتوا طيبين يارب
نعمل ايه بقى
غاويين شقى

doaa said...

عايزة أقولك إنك بتكتبي ساخر حلو جداً
بجد ضحكتيني ربنا يكرمك
كل سنة وانت طيبة
انت فين على الفيس بوك عايزة أضيفك