خلي عندك بطاقة .. خلي عندك صوت

الحملة دي جايه عالوجع قوي فكرتني بخمس سنين فاتوا بالتحديد 2005/9/6   يدوب كنت في كلية ووخداني الحماسة قوي اني امثل بلدي او ان يبقالي صوت انتخابي او بمعنى اصح يبقالي كلمة .. مهو المصري مش بس بكلمته المصري ببطاقته وحريته

وعليه طلعت بطاقتي الانتخابيه مش بس عشان انتخب .. لأ .. وكمان عشان لو منتخبتش محدش ياخد صوتي .. دول معتقوش الميتين يا اخوانا ما بالكم بقى بحد زيي مش طالعله صوت .. ويدوب بنادي على العيان الي بعده .. او بملي لموظف الصرف اسمي اخر كل شهر .. أو حتى بدي للجزار حق كيلو عضم بعد ما عضمه فيهم بتكون اتحشرت في زوري وجرحت في  احبالي الصوتيه الي بقت عامله زي حبال الهوا لا طالعلها صوت ولا تستحمل مشبكين غسيل .. نهايته

افتكر اني انتخبت رئيس غير الرئيس بتاعنا - أطال الله في عمره وعمري لحد ما اشوف رئيس غيره -  حاكم انا من ساعه ما وعيت عالدنيا مشفتش رئيس لا قبله ولا بعده .. وكانت الانتخابات نزيهه الحق .. كفايه انهم سألوني بره هتنتخبي مين قلتلهم الريس .. ودخلت جوه شديت الستاره ولا كاني في بروفة محل ملابس داخلية .. خايفة حد يشوفني وانا بعلم علامة الخانه التانيه – مهو الريس طبعا الخانه الاولى -  وبدل ما أعلم طلعت متعلم عليا بالحبر السري اتختمت على ايدي بصبغة اليود ولا الفيش والتشبيه .. بس المهم اني عملت الي انا عاوزاه .. روحت وانا في حالة نشوة غريبه وبغني وطني حبيبي الوطن الاكبر يوم ورا يوم أمخاخه بتصغر

مش اسكت بقى بعد النتيجة واخترناه اخترناه !! اصريت ادخل انتخابات مجلس الشعب .. بس الحق المره دي كانت غير نزيهه على الاطلاق اذ لاقيت جيش من الامن المركزي واقف مانع المنتخبين من الدخول وقافل ابواب اللجان .. قلت فرصه وجتلي  " اتجتل شهيدة يا ولاده " وقفت زي الغضنفر قدام عساكر  الامن المركزي انا هدخل يعني هدخل هاتولي الكبير هنا والحمد لله كنت بقولها وقتها وانا معنديش سوابق وديتها حرمان من الامتحان والحمد لله اني مليش جيش

لاول مره اشوف ظابط بيتكلم بعنيه كلام غير الي بيقوله بايده وبلسانه عنيه بتقول انتي جدعه وانا نفسي أدخلك تنتخبي بس لو طاوعتك الاسياد هيغضبوا عليا ولسانه بيقولي مفيش انتخابات ومع الحاحي وقدر من اللماضة لاقيته بيبتسم وبيقولي هتنتخبي مين ؟؟ قلتله حد انا شيفاه كويس

لاقيته فكرني بتمثيلية رأفت الهجاص وهو بيقولهم وسعولها تدخل ربنا معاكي !!

وبرضه عملت الي انا عاوزاه لتاني مره رغم اني لاقيت اسمي متعلم عليه في الدفتر اني فعلا انتخبت مع اني ولا شفت الدفتر ولا اعرفه اصريت اني اغير الصوت واخدها القاضي هزار وعجبته رنة موبايلي وقتها الي كان نفسي تكون مصر ياما يا سفينه أتخرمت وغرقت بينا

سبحان الله انتخابات الرياسه كانت نزيهه والصندوق ازاز والسلم نايلو في نايلو والريس كسب برضه وانتخابات مجلس الشعب الغير نزيهه لانهم منعوا المنتخبين يدلوا باصواتهم كسب الي كنا عاوزينه لان ارادة ربنا وارادة الشعب تدخلت والفلاحين لعبوا دور محترم لما دخلوا كلهم قدموا اصواتهم .. وبسبب كثرة عددهم كسب المرشحين الي الناس عاوزينهم على غير ما خطط الحزب اياه وكانت مفاجأة يعني الكترة غلبت الحزب والصوت عمل طفره والناس جريت في الشوارع من فرحتها لحد الفجر ولا كأس الامم الافريقية

التفاصيل كتير في المرتين والاختلاف كبير كمان المره الاولى مقدرتش اغير حاجة بس المره التانيه قدرت ونجح المرشح الي احنا عاوزينه

المره دي بقى هنحدد اذا كان فعلا صوتنا ده احباله متينه ولا يدوب أوتار بنشدها على الربابه وزي ما عندنا  بطاقة عيش وبطاقة تموين ومجازا بطاقة تحقيق شخصية يبقى عندنا كمان بطاقة انتخابية