Thursday, 31 January 2008

تاجك فوق راسي يا خال




تاج جالي على حين غفلة من أحمد الصباغ وبما انه خال والخال والد وكلام الوالد لازم يتسمع وينفذ بدون اى مناقشات صدر فرمان رسمي من ديوان عام العائلة التدوينية انه لازم نجاوب على التاج ده اوامرك يا خال

انا هشمع الاجابات بالشمع الاحمر من دلوقتى

وربنا يستر على مستقبل التدوين فى مصر بعد التاج ده

اشوفكوا على خير

يا خفي الالطاف نجننا مما نخاف

بسم الله نبدأ


هل توافق على حذف خانة الديانة من البطاقة الشخصية ؟

أكيد لا طبعا مسلمة واعتز باسلامى حتى آخر زفير وكلمة مسلمه قبل لماضة في البطاقة كمان


ما رأيك فى المثليين ؟
متهيألى دول الحلقه المفقوده بين الانسان والقرد

هل هى حرية شخصية ؟
ايوه الحلال بين والحرام بين الله يهديهم ويشفيهم

هل توافق على الإعتراف بالمثليين ؟
للأسف مضطرين نعترف بيهم كمشكلة وآفه فى المجتمع والنفوس المريضه واجب معالجته
ا

هل لديك أصدقاء من المثليين ؟
اعوووذ بالله اذا كانت سيرتهم بتخلى نفسي بتغم عليا


هل تعتقد بوجود إضطهاد للمسيحين فى مصر ؟

والله احنا لينا جيرانا ناس زى الفل الصراحة كل عيد يبعتولنا كحك وبيتى فور وانا بحب آكل بيتي فور طنط اوى وماما برضه لازم ترد وتبعت اصلهم بيحبوا كحك ماما
افتكر السؤال كده غلط الصح هل يوجد اى انسان يستطيع ان يتنفس الصعداء فى مصر ؟


من هو الشخص الذى تختارة لرئاسة مصر ؟

ده هيتوقف على عمري مقارنة بعمر الريس وطبعا طويل العمر يطول عمره وينصره على مين يعاديه


أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات؟
كل اللى هيكونوا معايا فى السجن بعد الانتخابات


هل توافق على مشاركة كل من : الإخوان المسلمين - الأقباط فى الحكم ؟

والله ده هيتوقف على الشخص نفسه هل معروف بنزاهته لا بلاش نزاهته دى يعني معروف انه اخلاقه عالية وانه لا يسعى وراء اغراض كده ولا كده يبقى اخترناه اخترناه


فى رأيك الشخصى .. ما هى أفضل مدونة على بلوجر قمت بزيارتها ؟

بلاش تهدئة نفوس


للإناث فقط : هل توافقين على الزواج من رجل مطلق ؟

ده باعتبار انى بندرج تحت هذا النوع من البشر يبقى نسأل بابا والله بس هو يجى ونبقى نشوف يا كسوفي


اذا تزوجت وأنجبت ولدين وبنتين .. أى الأسماء تحب أن تسمى ؟

ده اذا بقى حصل يدينا ويديك طولة العمر اكيد اللى هتأمر بيه حماتي هو انا اقدر اتكلم في حاجه زي دى


هل تعتقد أن توريث الحكم فى مصر . . سيتم فعلا أم لا ؟

مفيش حاجه بعيدة على ربنا المكتوب على الجبين لازم تشوفه العين


فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟

افضل انجاز : اممم بحاول افتكر اهو
اسوأها : الاول انت فاضي ولا وراك حاجة


همرر التاج ده للصباغ ذات نفسه ولازم يشرب ده كاس ولازم يدوقه
تحديث
اعتذر منكم جدا فى التاخير على الرد فى التعليقات لسوء الاحوال النتيه عندي
ووصلنى الايميل ده من اخ فاضل بخصوص سؤال الصباغ فى التاج
هل توافق على مشاركة كل من : الإخوان المسلمين - الأقباط فى الحكم ؟
وده ما ورد فيه للعلم بالشىء
أما بعد
سُئل الدكتور يوسف القرضاوى سؤال مشابه لهذا وهو عن جواز ترشيح غير المسلمين للمجالس النيابية وكان رده كالآتى

( ........ والذى أراه ان هذه النيابة عن جزء من الشعب فى دائرة معينة او التمثيل له ، لا يعتبر من باب الإمارة او الولاية ، التى ذم الحديث طلبها والحرص عليها فالنائب ليس وزيرا ولا اميرا ولا واليا ، بل هو يمثل دائرته فى هذا المجلس الذى يقوم على محاسبة الأمراء و الولاه و الوزراء ولهذا هو يحاسب ولا بُحاسَب لأنه لا يوجد ما يليه ويحاسب عليه .

ثم أنه يساعد فى التشريع للأمة فى ماليس فيه نص محكم ، وذلك فى ( منطقة العفو ) التى ليس بها أى نص أو فيهما نص ظنى محتمل فى ثبوته أو دلالته أو فيهما . واذا كان غير المسلمين من أهل دار الإسلام و بالتعبير الحديث ( مواطنين ) فى الدولة الإسلامية ، فلا يوجد مانع شرعى لتمكينهم من دخول هذه المجالس ليمثلوا فيها بنسبة معينة مادامت الأغلبية من المسلمين ................ ويرى الفقهاء أن لها ما للمسلمين ولهم ما عليهم ، وأن القرآن الكريم قال { لَا يَنْهَاكُمُ اللَّهُ عَنِ الَّذِينَ لَمْ يُقَاتِلُوكُمْ فِي الدِّينِ وَلَمْ يُخْرِجُوكُم مِّن دِيَارِكُمْ أَن تَبَرُّوهُمْ وَتُقْسِطُوا إِلَيْهِمْ إِنَّ اللَّهَ يُحِبُّ الْمُقْسِطِينَ ( 8)
ومن برهم و الإقساط اليهم ان يمثلوا فى هذا المجالس حتى يعبروا عن مطالب جماعتهم ...... و ألا يشعروا بالعزلة عن بنى وطنهم ، ويستغل ذلك أعداء الدين و المسلمين ليغرسوا فى قلوبهم العداوة والبغضاء للمسلمين وفى هذا ما فيه ضرر وخطر على مجموع الأمة الإسلامية و غير المسلمين .

وقد أجاز المسلمون خلال العصور المختلفة أن يتولى غير المسلمين من أهل الذمة : وزارة التنفيذ وعرف كثير من وزراء الدولة العباسية و لم ينكر عليهم احد من العلماء ذلك الا اذا طغوا وتكبروا على المسلمين ...........)


هذا كان رأى الشيخ الذى يتبنى منهج الوسطية " الدكتور يوسف القرضاوى" و ذلك تجديه فى كتابه فتاوى معاصرة و أيضا فى كتاب فقه الدولة فى الإسلام فصل " ترشيح غير المسلمين للمجالس النيابية " و أنصحك بالإطلاع عليه ففيه ردود لتساؤلات عديدة بعقل رشيد

27 comments:

آلام وآمال said...

حلوة اجاباتك يا لماضة
وهربتي طبعا من شوية اسئلة بدبلوماسية
;)
بس تسلم ايدك بردو

آلام وآمال said...

معلش فيه حاجة نسيتها

السؤال اللي بيقول
هل توافق على مشاركة كل من : الإخوان المسلمين - الأقباط فى الحكم ؟

انا بيتهيألي يعني انه سؤال غير منطقي بالمرة
ان مكتوب ف الدستور ان احنا بلد اسلامية (ده اللي مكتوب يعني) وبالتالي لايجوز اصلا لقبطي ان يتولى رئاسة الجمهورية

ده حد علمي يعني والله اعلم
واللي يعرف حاجة تانية يا ريت يوضحلي

موجة said...

دبلوماسية من قمة شعرك حتى اخمص قدميكي
حلوة اخمص دي هههههههههه
ازيك يا لماضة
حفضلي تتلامضي كده لامتى
ثم تقولي على المثليين الحلقة المقودة ما بين ال ههههههههه
وبعدين تعترفي بيهم .. يا حلاوة

ثم مش عاطية لنفسك انك تحلمي حتى بتشكيل وزارة

على فكرة انا بعتلك التاج ده ما كنتش اعرف ان الصباغ باعته للجمهورية كلها كده لانه مش جايلي من الصباغ اصلا من دودو

تعرفي اني جاي اقولك خدي التاج ده
بس كويس
المهم اني اعرف رايك في الاسئلة الفظيعة المريعة الشنيعة دي

خالص تحياتي
احمد توفيق

Rain man said...

واضح ان الصباغ فعلا طبع مليون نسخة من التاج ووقف على باب جامع
انا كل ما ادخل مدونة الاقى التاج ده
حتى انا جاوبت عليه بردو
يا للهول
..
غلطة عمرك انك مررتى التاج للصباغ تانى
دلوقتى هيمرره لنص سكان الصين و الدول المجاورة
رحمتك يارب

مهندس مصري said...

اجابات 100 مية يا دكترة
بس حلوة قوي حتة اللي تؤمر بيه حماتي
دا انتي كده عروسة لقطة
يا بخته بيكي سعيد الحظ
بس ما تروحيلوش بجثة
:)

mohamed said...

دكتورة لماضة أنتى بجد دمك خفيف ,
أنا بقول تركزى فى الجواز أحسن
,والرجالة الى مش ناويين يجوزوا
وبعتبراك دكتورة تفكرى فى تسجيل
عملية بأسمك فى أستأصل الجزء الخاص
بالادراك فى مخ الرجالة علشان يجوزوا
وما يفكروش فى الى هيجرا لهم بعد
الجواز,أدينى أتلمضت معاكى, وناوىأتلمض معاكى لو فضلت أنا عايش
,وأنتى فضلتى دكتورةوأمانة عليكى ملكيش دعوة بياأخوكى محمد

mohamed said...

دكتورة لماضة أنتى بجد دمك خفيف ,
أنا بقول تركزى فى الجواز أحسن
,والرجالة الى مش ناويين يجوزوا
وبعتبراك دكتورة تفكرى فى تسجيل
عملية بأسمك فى أستأصل الجزء الخاص
بالادراك فى مخ الرجالة علشان يجوزوا
وما يفكروش فى الى هيجرا لهم بعد
الجواز,أدينى أتلمضت معاكى, وناوىأتلمض معاكى لو فضلت أنا عايش
,وأنتى فضلتى دكتورةوأمانة عليكى ملكيش دعوة بياأخوكى محمد

mo'men mohamed said...

فعلا لماضة
على العموم
فى مسألة الإخوان و الأقباط
المفروظ ان دولة الإسلام هى دولة مدنية تحتكم الى الإسلام
وللأقباط فيها حدود لا يمكن ان تتخطاها
بس احب افهم من حضرتك نقطة ان الشخصية اللى تملك الحكم لا بد و ان تتميز بالنزاهة
هل حضرتك تقصدين الإخوان ان الأقباط
جزاكم الله كل خير
السلام عليكم

صوت من مصر said...

لماضه انت شكلك بتخافى من الحومه ولا ايه من النهارده مفيش حكومه على فكره شيلت صوره الشلن من البروفايل عشانك هههههههه

خمسة فضفضة said...

السلام عليكم ورحمة الله وبركاته

ايه الاجابات الجامده دي يا لمااااضه

اما صحيح لماااضه

Hannoda said...

إجاباتك كلها لماضة و حياد و تنفيض ايدين
:)

وقال يعني سمعتي كلام خالو

فزلوكة said...

إيييييييييييييه اللماضة ديه؟؟؟؟؟؟؟؟
دمك زى السكر والله
وإجاباتك تمام
وياريت ترخصى الفزيتة شوية

Dr-Abd-Alrahman said...

اجابات جميلة وموضوعية مع ان الاسئلة مش مرتبطة ببعضها
شوية في السياسة وشوية في الاسرة

علي العموم انا جالي نفس التاج بالظبط من احمد والحمد لله جاوبت

عابد الرحمن said...

لمضة
بس عسولة
حظك اني بخاف من الدكاترة
ههههههههههههه

maii bahaa said...

يا لماضة يا مظبطانا..ورافعة راسنا

الإجابات بصراحة ماقل..ودل أوي أوي


تحياتي
:)

عصفور المدينة said...

الدكتورة المسلمة لماظة
بارك الله فيك لم أكن أتخيل أنه يمكن إجابته بالسرعة دي مش كنت تغششيني

Hosam Yahia حسام يحى said...

حلوه الردود بس مان فيها شويه لماضه زياده عن الازم

اتمنى زيارتك على مدونه صوت الحريه وابداء رايك بها

سهر الليالى said...

هههههههههههههههه

يا سلام على اللماضه فى الإجابات
ولا حكايه حماتى دى كمان .. ماشى ياختى

بس فى حاجات هربت منها يا جميل
قال وانا جاية قلت اغش من ست الدكتورة حاجة يمكن تنفعنى

بس حلوة الإجابات برضو
تحياتى

عـلا - من غـزة said...



ههههههههههههههه

اخف دم اجابات على اغلس اسئلة ممكن تكون في تاج :p
مع الاعتذار للي مألفها طبعا

lol @ كل اللى هيكونوا معايا فى السجن بعد الانتخابات

ههههههههههههههههههه

عجبني تعليق rain man :P

وبعد هذه الوصلة من اللماضة اعتقد انك اثبتي جدارتك وممكن جدا تخشي الانتخابات وانتي مطمئنة :D

تحياتي

Rain man said...

واضح إن الصباغ وزع التاج ده على جمهورية مصر العربية كلها
كل ما ادخل مدونة اتكعبل فيه
و اللى حز فى نفسي اكثر انك مررتي التاج للصباغ تاني
و ده معناه انه هيبدأ يفكر فى تمريره للعوالم المجاورة

على العموم إجاباتك لمضة
فلة شمعة منورة
على راى اخونا اللمض عمرو أديب

بحبك يامصر said...

اجابات دمها خفيف
اكيد زى صاحبتها
بس الانجازات مش ممكن نحط مترو الانفاق؟
انا بستأذنك بس نحط المترو
عشان اراجل يبقى عمل حاجه

أحمد المصري said...

ياااااااه..ازاي نسيتي بس ؟حد يقدر ينسى الإنجازات العظيمة للحكومة في الفين وسبعة..الضربة الجوية الأولى طبعا..ده انتي عليكي حاجات0

د/اجدع بنوته said...

جامدين الاجابات يالماضه

عسل عسل يااخواتى

والله انا حبيتك لله ف لله

لماضة said...

بعتذر حقيقى عن عدم الرد على التعليقات النت جميل جميل جميل وربنا يبارك في الوصله

النجم القادم said...

السلام عليكم
اول زيارة للمدونةة ولكنى
بورهت بها واعجبت بها اعجابا شديداً
واجاباتك على التاج جامده اوى اوى اوى
ربنا يكرمك كده وتترشحى للرئاسة واحنا هنقف معاكى باذن الله

الفارس الملثم said...

هل تعتقد أن توريث الحكم فى مصر . . سيتم فعلا أم لا ؟"

هو السؤال مفروض هو ايتم امتي

يديكم كلكم طول العمر وكفاية قر علي الراجل

و القادم....أجمل said...

ايه الردود دي
لا عايزين ردود متفصفصه

ههههههههههههه

ربنا يحميكي يارب
و اشوفك اكبر دكتورة لمضة

قولي آآآآآآمين

:)