Saturday 12 April 2008

لو طلبك رسمي خليك رسمي




أعزائي الكرام في بلدنا الحبيب وتميزا عن بقية الشعوب لدينا احترام الكبير واجب قومي وانحناءة الرأس مطلوبة في بعض الأحيان لأننا باختصار لازم " نطاطي" من أجل بلدنا الديمقراطي ولأجل ما نعلى ونعلى ونعلى

وكما هو المتعارف عليه في جميع المصالح والهيئات والميكروبازات لابد وأن تلجأ لاستخدام بعض الألقاب ليس من باب الذوق فحسب وإنما من باب اللي يجيلك منه الريح فالباب المقفول يرد القضا المستعجل وكما قالوا في الأمثال لولاك يا لساني ما انسكيت يا قفايا

لذلك يجب عليك أن ترقص للقرد في دولته وأيضا تقبل يده ورجليه إن احتاج الأمر فبوس الأيد ضحك على الدقون واستخدام مثل هذه الألقاب يعد فن في حد ذاته فالفن نشأ في اليمن وترعرع في الحجاز و "اتدلع" في الشام و" أترقص " في مصر

فتعالى معي نتخيل إن كنت فارسا بحق واعتليت ظهر هذا الحصان المدعو اللسان لكي تقضي طلب ما مجرد ورقة على عرض حال دمغة فانك يا عزيزي ستحتاج إلى قاموس من الألقاب لجميع الشخصيات التي ستسهل عليك قضاء حاجتك وصدقني فهذه الكلمات أقوى من أي " ملين " ستستخدمه لهذا الغرض ولنبدأها معا خطوة بخطوة

أول شيء فور خروجك من البيت ستلتقي بالست بركة بائعة الفجل وتصيح قائلا " ادعيلي يا حاجه " فالست بركة دعائها مستجاب بأذن الله ليس لإتمامها مناسك الحج أو حتى زيارتها للسيدة وإنما لزيارتها المتكررة فقط لقبر زوجها وسعيها بين الأسواق لجلب الرزق ناهيك عن بلوغها اليأس ليس عمرا فقط بل وحالا أيضا لذلك فهي ست بركة

بعدها ستتجه لتستقل سيارة أجرة بالإشارة بأصبعك ولكنه لن يجدي نفعا وستضطر أحيانا للوقوف أمامها بل والقفز فوقها لتسأل سائقها " فاضي يا أسطى " ولكنه حينها سيدهسك بعد أن يطحنك بكلمة " هتدفع كآم يا هندزة "

ولن تجد مفر أمامك إلا أن تتسلق نافذة – فالأبواب غير متاحة - أول أتوبيس سياحي فاخر ماركة " تاتا " ولا تنسى أن تلتقط معك يد هذا الرجل ذو العقد السادس من العمر وغير القادر على الجري واللهث مثلك وراء الأتوبيس " فالصحة على القد والأتوبيس ميعرفش حد وتنبهه لألا يسقط بقول أيدك يا حاج
وخذ في اعتبارك أيضا هذه الألقاب وأنت تلتحم مع الشعب فمثلا إذا جاء التحامك مع فتاة سمراء ممشوقة القوام من أسرة طيبة وترغب فى الاستقرار فلا تغفل عن إلقاء التحية "لا مؤاخذة يا مزمازيل" في حين ستنهرك أخرى بنظرة قد تقلع معها عيونها الأربع وقذائف من صفاتك السيئة التي ستنعتك بها نتيجة لفرمك إصبع رجلها الأصغر ففاجأها و كشرعن أنيابك قبل أن تلتهمك حياً وانهرها لإحضارها إصبعها تحت خفيك في قول خلاص يامه

وأرفس الحائط الكائن بجوارك وقل " شوية جنبك يا كابتن" وذلك إن وجدته شاب في العشرينيات من عمره يضع كمية لا بأس بها من الزبد الأصيل في شعره ويضع بأذنه سدادات عفوا سماعات مستمتعا بنهيق " بحبك يا حمار" يخرج منها في حين يوشك بنطاله في السقوط ولكنه مازال متشبثا حتى أخر لحظة حتى ينتبه لكونه كائن ذو دم أبيض عله ينتفض من مكانه ويتركه " للست أم حودة " لكي تجلس هي ورضيعها حتى لا يتمكن " حودة " من الوصول إليك ويكف عن اللعب في جميع فتحات وجهك
أما إن كان "الأخ اللي جنبك" يظهر به بعض علامات الصلاح والذي يطيح بك عند اقل " فرملة" للأتوبيس لتجد نفسك في "حجر" السائق وذلك لانشغاله بتلاوة كلام الله وحرصه الشديد على عدم مس المقابض حتى لا تنقض وضوءه عن طريق نقلها كهرباء من " آنسة " تتشبث بها فنبهه بقول لين " خلي بالك يا شيخنا " فالمسامح كريم

ولا تنسى حق الدولة حينما ينادي عليك " تذاكر يا أفندي " فهذا لقب يطلق عادة على عامة الشعب وخاصة مرتادي الأتوبيسات أمثالك ها وصلت المصلحة ستجد من ينتظرك وفي خدمتك ساهرا عليها وأسأله على استحياء ممكن يا " بيه" تخلص لي الطلب ده فيحمر وجهه ويزأر في وجهك " روح يابني الله يسهلك " عندها توجه إليه مرة أخرى بيد ممدودة بما تبقى لديك من " فكه" بعد انتشالك في المحطة فستلاحظ اختفاء جميع الأرقام الآحاد من جبهته و سوف يجيبك بكل حفاوة " تعالى أوديك
للباشا يخلصهولك "

قف عندك ولا تتجهم ودق الباب بخفة ودلع وامسح أيضا نعليك قبل الدخول ويستحب أن تكون جاهزا بهدية رمزية ولتكن طقم مكتب جلد طبيعي لا تيأس أين ذهبت ابتسامتك ؟؟ فطلبك سيجاب بتوصية وبإشراف من " الباشا" وتحته إمضاء " الريس الكبير" شخصيا والذي تقع تحت يده وسيطرته زمام الأمور كلها

ها اخبارك ايه دلوقتي ؟؟ إيه " ياض " مالك هتعيط ولا إيه أجمد " يا عم " كده أمال ولازم تتعلم " يا معلم " ولازم تمشي وتخليك رسمي لو طلبك رسمي

فكرة وسيناريو وحوار استاذة ورئيسة قسم مدونة لماضة

50 comments:

فرنسا هانم said...

هى الست بركه دى عندكم برضه
يبقى على كده منتشره فى كل المحافظات

اما عن الشباب اللى داهنين شعرهم عسل
فخلاوها بصل البصل كمان

Unknown said...

ههههههه
ايوه يا خالتشي
ده حاجه تغيظ والله
دايما منوراني أول تعليق
اهو المره دي مخدتهوش منك ولا حاجه
:))

فاتيما said...

إيه دا يا مرمر
دانتى عملتى دراسة مسحية يا ماما عن كم الالقاب اللى عاملين نرشها على بعض من غير مناسبة الا غالبا للتريقة وتخليص المصلحة أو حتى تبركا بأى حد كبير و غلبان
بقينا بنتكلم أكتر ما بنشتغل يا لماضة
و بعدين و النبى بلاش انتى تقولى كدا بقى عشان أصلا الدكاترة أكتر ناس بيقولو كلمة من دول للى العيانة عشان يخلص الكشف سريع سريع
يقوم يقولها
حاسة بإيه يا أمى ؟
نظام خلصينى
أوعى يا بنوتة تعملى فيا كدا ...
إبقى قولى بتشتكى من إيه يا مامافاتيما
موش يا أمى عشان انا فاهمة كل حاجةو هيا طايرة أهو
تحياتى يا حبيبتى و مبدعة كعادتك

المـــفـــــــقــــــــوعـــــة مــرارتـهــا said...

كان لازم ننتخب النائب بتاع الطربوش عشان يبقي ريسنا
الراجل كان واعدنا بطربوش لكل مواطن .. وكان هايبقي الإحترام للركب ... الطربوش ليه هيبته يارجالة

تحياتي

بطوط حبوب said...

هههههههههههههههههه
باعشق اسلوبك
بس لسه فاضل شويه القاب
يابرنس ويا بوب ويا جنتل

لما تركبى ميكوباظ وتقولى لراجل لا الاجره 50 قرش مش 60 قرش
يقول ليه يا برنس هى كده

هتدفع ولا تنزل جنتل

مش هنقعد نتكلم طول السكه يا بوب

اسكندراني اوي said...

يا بركه
اسف يا دكتوره
سؤال يا انزه
انتي جبتي صوره الطربوش ده منييييييييييييييييييييييين
ههههههههههه
بوست يفطس من الضحك
متألف صح صح
ومتعوب عليه كتييييييييير

اشكرك على الضحكه اللي رسمتيها على وشنا

Unknown said...

ليه كده بس
هههههههههههههههه
جامده
بس لو دخلتي فيهم شمال مش يبقى احسن
وسلمولي على الطرابيش
اللي بقت كابات دلوقتي
!!!!!!!!!!!!11

عــلاء ســالـــم said...

السلام عليكم

كما تعودنا مع زيارة مدونتك الإبتسامه مع النقد الهادف .
المفروض الحكومه تعمل وزارة وتسميها وزارة الألقاب وتكون مسؤوليتها تحديد الألقاب لشرائح المجتمع ومعاقبة من يتهاون في إستخدامها .

..................

بالنسبه للموضوعين السابقين بخصوص سرقة بعض مواضيع مدونتك فدا فعلاً عمل سيئ جداً والحمد لله إنك ماسكتيش وإنك أخذتي حقك .

أنصحك بوضع كود جافا بيمنع نسخ محتويات المدونة زي اللي أنا عملته في مدونة القصائد بتاعتي .

على الأقل اللي هايحاول يسرق المواضيع هايتعب في إعادة كتابتها بإيده مش هاينسخها على الجاهز كده .

ولو ماتعرفيش الكود قوليلي وأنا ممكن أكتبهولك في تعليق .

خالص تحياتي

Amr Ahmed said...

حلو الموضوع يا مزمازيل

::)))

خمسة فضفضة said...

السلام عليكم ورحمة الله وبركاته

انتِ نسيتي كلمه ياريس اللي ليها مفعول السحر علي سواقين الميكروباز والتاكسي

Unknown said...

ايه كم الألقاب دى يا دكتورة عظمة على عظمة ده قاموس شامل لكل ألقاب العصر الحجرى اللى احنا فيه
عجبنى البوست جدا بس فيه تحفظ
أنتى مش هتيجى تزورينى والا ايه يا "مازمازيل"
ومش مهم تعلقى
تحياتى

Anonymous said...

لماضة .. انتى بتهيسى


حاسة انك كاتبة البوست دا بعد يوم حر .. فى شيفت غلس فى المستشفى .. و بهدلة فى المواصلات

مش كدة يا باشمهندسة؟

رئـــــيسـة حزب الأحلام said...

السلام عليكم
هترجعونا للطرابيش لية كدة

Yasser Hussein said...

حقيقي سعادتك انعمتي علينا بهذا الموضوع المفتكس وأشرحتي صدورنا بكلام سموك
:)
أكثر حاجة عجبتني أنك وقعتي بأسمك في آخر البوست وعملتي بنصيحتي حتى لاتتكرر السرقات لأفكارك التدوينية المتميزة
في انتظار المزيد من الابداعات

خالص تحياتي

د.دغيدى said...

لا ياريت بس تيجى على ريس وياباشا
لا دة كمان لازم تتجمل الالقاب يحبت
حضرتك وسيادتك وبعد الاذن والسماح من جنابك
وياسلام بقى بحبت ترقية
يعنى العسكرى يتقاله ياحضرت الظابط
والتمرجى يادكتور والكاتب ياستاذ
لازم كدة اللى قدامك يحس انه الكل فى الكل وان كل شئ بيمشى بامر سيادته وتوجيهات معاليه
الناس من كتر ماهى مظطهدة كل واحد بقى يدور على اى فرصة علشان يحسس اللى تحته بالذل
اظن دى ظاهرة تستحق الدراسة

Unknown said...

أزيك يامروة

لذلك يجب عليك أن ترقص للقرد في دولته

لا تعليق بعد الجملة دى

خالص تحياتى

بحبك يامصر said...

ياسلام يا ست يا حكيمه
دايما متجدده
المصطلحات كتيره دى عايزه قاموس
تحياتى

wanna b a physician said...

موضوع الاتوبيس ده بقا بالذات الناس عجيبه
خلاص يعنى حتى وهو واقف بيقرا قرأن ما شاء الله بس مش على حساب مضايقه غيرك ولا مش بتقرا ااحاديث وقران بتمعن
ومعلش اللى بنطلونه واقع ده مش بياكل كويس عايز multi vitamins
تحياتى

صحفية روشة said...

بوست تحفه يا ست البنات
:)
واحشنى بجد

رئيس جمهوريه نفسى said...

اذا اردت ان تنجز فعليك بالمنجز
وابجنى تجدنى
هى المفردات المستخدمه فى كل المصالح الحكوميه

(احمد سكر ) said...

ههههه
انا عاوزاسال سؤال

انتىاتحكالك
ولا حصلك كدا

للاسف يادكتوره دا واقع بلدنا

كل حاجه بالفهلوه

كنت بشترى مره قطعة غيار للعربيه

لفيت عليها شارع شبرا كله
والوكاله وعزبة شلبى
ههههههههههه
المهم فى الاخر لقيتها عند راجل سنى
فى دكانه صغننه خالص

بكامدى ياحاج

قالى ب 12 جنيه

قلتله لاء انا عاوزالاصليه ام 80 جنيه

قالى حاضر وراح جابهالى جوا الكرتونه ومغلفه تغليف بتاع بره

طلعت الفلوس واديته ال 80جنيه

ومشيت شويه ولقيته ندهلى
قالى يااستاذ انت كدا مقتنع
قلتله اه طالما دى الاصليه
قالى تعرف دى نفسها نفس ام12 جنيه
الفرق اندى فى كرتونه مضروبه بس فى كرتونه
متقلده بس فىكرتونه
قلتله ازاى دا السريل نمبر بتاع التصدير وكدا

قالى كله بينضرب يا ابنى

ورجعهالى
واخدت ام12 جنيه
كل حاجهعندنا فهلوله

تحياتى دكتوره

واسف انكنت طولت عليكى

سكر

دكتور حر said...

د لماضه

المبدعه المسروقه

الدكتوره المحتاسه

المضغوطه الرايقه

هي فعلا بلد الكلمنجية والفهلاوية

بس الحمدلله
الحمد لله
الحمد لله

لسه لقب الدكتور ما اتاكلش

ربنا يستر
والله ينور عليكي

مهندس مصري بيحب مصر said...

الله ينور عليكي يا بنتي
بوست رايق
يارب يكون مزاجك رايق برضه
:)

*سمر* said...

مروة
اسلوبك رائع ..انا بحب مدونتك جدا ..مستنية اشوفلك كتاب فى يوم من الايام ..ان شاء الله :)
جميل موضوع الالقاب ده ..مش عارفه ده عندنا بس فى مصر ولا فى كل حته ..اعتقد فى ام العجايب بس (اقصد ام الدنيا )
تناولك ليه مختلف وشيق ..
تحياتى :)

صالح سعيد said...

لماضه ازيك وكيف حالك
اكثر الله من امثالك
اصحاب الدم الخفيف
والفكر اللذيذ
حلو الموضوع يا لماضه
تمنياتى بمزيد من التوفيق

Tamer Nabil Moussa said...

هنعمل اية اذا كان الحال من زمن على نفش الحال

بوست مميز

تحياتى

*سمر* said...

عديت على مدونتك دلوقت ..لقيتك مش كاتبه حاجة جديدة ..قريت الموضوع تانى ..عجبنى اكتر من المرة الاولانيه ..
حبيت اقولك بس :)

سهر الليالى said...

يا جامد يا جااااااامد
وحشتينى يا سكر
والف بعد الشر عن مدونتك من الحرمية ان شالله يتشكو فى ايديهم

البوست جامد مووووووووت
تانى مرة اقراه انتى عارفة بس ضحكت زى اول مرة برضو
بس فى لقبين كمان تسمعيهم دلوقتى على طول
باشاااااااا
اللى بقت تتقال للعربجى قبل اى حد
وباشمهندس
اللى بقت للسباك والكهربائى
أما عن المهندسين اللى بجد فبقو بيقلولهم
يا اسطىىى

هههههههههه
الدنيا حالها اتقلب يا جدعان

المهم انتى طمنينى عليكى
سلام

احمد الجيزاوى said...

شكر خاص باسم المواطن المطحون فى البلد الجنون
تحياتى الى دكتورة الماضه فى مصر

shahy said...

كدة فكرتيني بالشباب اللي داهنين شعرهم مرهم على فازلين
انتي عارفة انا ببقى متضايقة اوي لما بشوف البنطلونات اللي هاتقع منهم دي وبحس كدة اني عاوزة ادخلهم الفانلة جوة البنطلون وارفعهلهم زي مابعمل في الواد الشنيور ابني
بصراحة منظرهم بيبقى يع خالص

تحياتي يالمضة لكي ولأسلوبك المميز

يا مراكبي said...

حلو قوي البوست ده بجد

بس ناقص جزء مهم نسيتي تنوهي عنه علشان الرقابة الأخلاقية .. وهو الألقاب البذيئة .. ودي بقى ما أكثرها .. دي بقت لغة رسمية هي التانية

بذيئة بذيئة يعني

د/اجدع بنوته said...

وحشتينى مووووووووت يالموووضه

كنت مفتقداكى كتير وانا بزاكر

واقول ياترى لموضه وهى بتزاكر الكميونتى

كان احساسها زى احساسى كده

بس الحمدلله البوست بتاعك ده خرجنى م الاحساس

ودخلنى ف احساس تانى خالص

كالعاده اسلوب مبتكر وفكره اكثر ابتكارا

yomna said...

يا باشمهندزة لماضة منورة و الله ...بقالي كتير مجتش عندك من يوم نجاحك بس ساعتها لا لاقيت شربات و لا جاتوه ولا حتة اجرة المكروباظ فقلت احرمك مني شوية

بجد بجد بوست تحفة...ميطلعش غير من لماضة صحيح

Hossam Nasr said...

السيدة الكريمة

تابعي على مدونة قولاً سديداً رد الحكومة الهولندية على حملة المدونة لدعوة الحكومة الهولندية لسن قوانين ردعية تمنع حدوث الإستهزاء بالمقدسات الدينية ورد المدونة عليهم على الربط التالي
http://kawlansadida.blogspot.com/2008/04/blog-post_18.html

وجزاكم الله عن نبيكم خيراً

bastokka طهقانة said...

لم تبلغ سن الياس فقط و لكن حال الياس كذلك
ههههههههه قوية قوي الحته دي يا مزمازيل

اوروفوار
:)))))

صيدلانيه طالعه نازله said...

يا لماضه الالقاب دى بقت اجبارى مش اختيارى و دلوقت اخر حد بنقوله يا باشمهندس هو المهندس نفسه
انا فيه ناس يدخلواعندى الصيدليه و تفضل ساعه تقولى يا مدام و انا مطنشه فى الاخر تقولى اسفه هوه انتى دكتوره؟!!!
طب ارد اقوللها ايه دى بذمتك

Unknown said...

ههههههههه
انا بقى يا جماعة اخر الالقاب الى اتناديت بيها الشهرين الى فاتوا كاللاتي
يا ميس ودي كلمة متعارف انها بتتقال للممرضات
يا حبيبتي على اعتبار اني طفلة بكرانيش محدش يفهم غلط
يا أبلة ودي بسمعها مليون مره فى الساعه مع اعتبار اني جوا شوال ابيض شبيه بالبالطو وكمان خانقه رقبتي بالسماعه
نفسي حد يعترف ويقولي يا دكتوره احسن شكلي بقى وحش قوي يا جدعان

مهندس مصري بيحب مصر said...

و هو احنا مش قوالتنا كفاية و لا ايه يا ضاكطورة
:)
ههههههههههههه

همس الاحباب said...

ههههه
وحشتينا يا دكتورة لماضة على سن ورمح
مبسوطة كده يا دكترة
ربنا يوفقك ويكون فى عونك
يلا شدى حيلك كده وخلصى الامتياز
علشان اجيبلك همس تتعلم منك اللماضة مش تكشفى عليها طبعا
خلينا نشوفك يا ستى الدكتورة
تحياتى خالد

Ahmed Al-Sabbagh said...

هتلامض يا ضنايا

بصى يا ستى انا قعدت اقول ازاى ده انا قريت البوست ده من زمان

اتارينى متمتع بحق حصرى انى اقراه قبل ما يتكتب قصدى اول ما اتكتب

وبصراحة جميل جدا جدا جدا

انتى روعة

أحمد

rain man said...

يا جماعة حصل مشكلة في مدونتي القديمة
و لا استطيع إضافة المشاركات بها
لو كنتم مهتمين بزيارتي رجاء تفضلوا بزيارتي من الان فصاعدا على رابط مدونتي الجديدة
http://fatmaistheword2.blogspot.com/
سأنتظركم

aya said...

هههههههههههههههههههههه
والله انتى سكرة

عندى حق يا ستنا
بجد الله ينور عليكى
احنا شعب بنحب دايما نتنده بالقاب

شعب محترم من يومنا

الله ينور يا لماضتى

Empress appy said...

بنت يا دكتورة وحشتينى سلامك وصلنى من قطه الصحراء وغيرت اللوك بتاع مدونتىعلشان خطرك مع انه كلفنى الشئ الفلانى ههههههههه والحساب عندك
وبجد قاموس انتى متحرك فى كل الالقاب والامثال ههههههههههههههههههههه مش ممكن ربنا ينجحك وافرح بيك ونسميك شيخ الحارة

Anonymous said...

ههههههههههههه
كركري من الضحك فانتي في مصر
لان الابتسامه لاتفيد
بس لسه فيه شويه القاب
بتاعه القاموس
الشبابي االجديد
موز وساكموز
والحاجات الجامده دي
عاوزينك تلفيهم لينا في موضوع
اسلوبك مميز تحياتي

Ahmed Mubarak said...

الموضوع ده تاخدي بيه دكتوراه يا سعاده الضاكتورة

:D

سندباد said...

بجد انا جاي عشان عارف اني هاضحك من قلبي
شكرا يالماضة بجد ربنا يخليكي للمدونيين

Anonymous said...

معلش لماضتى جات متاخره بس العيب مش من عندى عبال مااتعلمت اكون رسمى وانا باقدم طلب رسمى لسعاده رئيسه دوله مدينه اللماضه الدوليه المتحده باطلب فيه الادن والسماح بعرض اعجابى الشديد والمتناهى بعرضك للمضاتك وسلمولى على كل البشاوات والافنديه شاملا جميع الالقب الرسميه منها وغير الرسميه وتحيه جامده جدا للست الضاكتووووووووووووووووووووووره

Anonymous said...

اختك . ام العيال
والله يا لماضه فعلا كلامك كلو صحيح انا مريت بموقف من المواقف المفرحه دى بتاعة بلدنا .. و اذ فى يوم مشرق والدتى صحيتنى بدرى عشان نروح السنترال و ندخل لاخويا المتجوز جديد تليفون و لقيتها قلبت الدولاب فوقو و تحتيه و جابت من شنطة الذكريات كومة ورق و فتحت شنطه هندباج ورزعت كل الورق دا فيها انا قولت يمكن بتفكر تهرب من البيت ولا حاجه فا قولت يا واد طنش خالص .. و لقتها لبست الحته اللى ع الحبل و قالتلى .. يا ام العيال .. وصيتك صينية البطاطس اللى فى الفرن ابقى كل شويه شقرى عليها .. اشقر عليها ايه يا ماما فيه ايه .. اصلى رايحه السنترال فا ضربت فى عروقى دم الوطنيه الاسريه .. و قولتلها استنى حالبس و اجى معاكى .. و الست زاى ما يكون ماصدقت .. راحت حادفه الشنطه فى وشى و شمرت عن ساعديها و انطلقنا فى رحلة الاف ميل .. طبعا مش ح اتكلم عن الطابور اللى كان فى السنترال اصل دى حاجه بقت عاديه فاضلنا ناخد الطوابير حقن .. مع لاعتذار ..بس وصلنا لحد الشباك و اســـــتــــــنــــــيـــــنــــــا دا دليل على الوقت يعنى اتارى احنا جينا وقت الفطار لاء بجد مالناش حق ازاى مانرعيش فرق التوقيت ما بين بيتنا و السنترال دا حتى تبقى عيبه ..و طبعا اختك زهق و كانت ح تولع فى الشباك و الفطار و والشنطه و اخلص بس قولت يا واد طنش خالص .. وبعدين طلت علينا سيدة فى مقتبل العمر بابتسامه عريضه و 3 كيلو مكياج فى وشها و يجى 3 سندوتشات مطحونين يا عينى بين انيابها .. و قالت خير يا حاجه فا راحت امى بكل اباء و شمم قالت حضرتك احنا و قلبت على امينه رزق فى فيلم وضاع العمر يا ولدى .. طبعا عروق الوطنيه الاسريه ضربت فيا تانى و ازاى ماما تتكلم معاها كدا و لسه كنت ح افتح بوقى و اتكلم و لقيت كوع والدتى رشق فى معدتى اسكتى يا بت خالينى نخلص ... و طبعا بعد كميه حضرتك اللى سمعتها موظفة السنترال اليوم دا متهيئلى كانت مفكره نفسها ماما سوزان .. و طبعابعد ما الضغط ارتفع عندى و كنت بجد حاولع فى السنترال و الموظفه و الشنطه و صينية البطاطس اللى فى البيت
طولت عليكى بس موقف من الحياه
اختك ام العيال

Wael 3sily said...
This comment has been removed by the author.
Wael 3sily said...

مساء الخير يا دكترة
ههههههههههههههه
اولا بشكرك كتيير على الابتسامة والضحكة الى مافارقتنيش طول ما انا متابع مدوناتك
بجد اسلوب متميز جدا جدا
انا مش عايش في مصر
بس بجد لما قريت الكلام ده حسيت اني في مصر
هههههههههههههههههههههههه
اتمنى اشوف المزيد
شكرا