Wednesday, 6 August 2008

سيدة الميكروباص



الدنيا ايه غير عربية ميكروباص وشوية حاجات فوق بعضها

كواجب يومي اتجهت لركوب هذه المواصلة الشعبية المريحة وخلي بالك من مريحة دي فتحت الباب لاقيت عينكم ما تشوف الا النور واحدة ست كُبرة قاعده في الكرسي اللى ورا السواق قلت كويس اقعد حريم في حريم على الاقل الست باين عليها ضخمة الجثة عريضة المنكعين تحميني من نهش كلاب السكك بس واضح اني مخدتش بالي من ان ضخمة الجثة دي تشمل انها اضطرت تاخد الكنبه كلها وفاض منها بعض الاجزاء ريحتها على الكرسي التالت كمان عشان كده لما سألتها فيه مكان فاضي جنبها بصتلي بأذبهلال حسيت اني غبية لاني فكرت حد قاعد وهي مدارية عليه وفعلا مكررتش السؤال تاني لما اكتشفت السر قلت ما علينا ناخد الكنبه اللى بعدها

كاميرا واحد انزل هنا يابني

الكنبة الاخيره : اتنين شباب قاعدين يمارسوا عرف الميكروباصات الجديد وهو اللعب في الموبايل وازعاج الناس بالاغاني مجهولة الهوية عملا بمبدأ لازم تسمع

الكنبة اللى قدامهم على طول : شاب قاعد واضح عليه الانهاك يوجه كلامه للشباب اللي ورا وينادي على الكباتن جمع كابتن

قلت في عقل بالي : ايوه كده هي دي الشباب الصح لسه مكملتش لاقيت الولد بيقولهم

قولي يا كابتن معندكش حاجه حلوة تتسمع

الكابتن : عاوز تسمع ايه يعني

الولد : اي حاجه على ذوقك كده يا معلم

الكابتن : كله موجود قول انت عاوز تسمع ايه وانا اشغلهولك

وكأن يعني الواد عنده اذاعة الشرق الاوسط كلها في الموبايل وكل الاغاني والحاجات اللى تتسمع واحنا في برنامج على الناصيه او ما يطلبه المستمعون

الولد : يعني اي حاجه لعبد الباسط ياريت لو عندك انا مش عارفني

الكابتن : طبعا عندي ده انت مزاجك عالي قوي

الولد : قشطة

تبدأ الاغنيه انا انا انا انا انا انا انا انا انا - عديتهم طلعوا 15 أنا تقريبا - أنا مش عارفني انا كنت مني انا مش أنا امال عفريتك يعني هكون انا مثلا

شوية ويطلع واحد في مقام والدي ملتحي وباين عليه التقوى اذ فجأة الاقي حوار الكباتن والولد بقى كالاتي

الولد : يابني مش تشغلنا عبد الباسط

الكابتن في ذهول : امال مين ده

الولد : يابني عبد الباسط عبد الصمد شغلنا قرآن

الكابتن : هههه ماشي يا باشا وعمال تقولي قشطة

اخيرا الميكروباص بدأ يمشي لاقيت السواق بيقول للي جنبه

بص بقى يا هندزة انا الفلوس دي على جزمتي ولا مؤاخذة ولا تفرق معايا في ايوتها حاجه اه زي ما بقولك كده يعني مثلا خد عندك انا باخد اليوميه بتاعتي من هنا واروح اشوفلي اي مصلحة اقضيها بيها

ايوة امال من يومين كان معايا ولا مؤاخذة 600 جنية ينطحوا جنيه رحت نزلت على الكورنيش وأكلت ايس كريم وشربت بيبس ودرة مشوي واتمشيت مع صحابي واخر الليل جبنا مصلحة نعدل بيها دماغنا

ايوه يا باشا اصل المصالح دي اهم حاجه لازم تمتع نفسك ومتحرمش نفسك هي الفلوس يعني هتفيد بايه

واديك شايف الدنيا كلها مصالح !!

الراجل : عندك حق يا أسطى دول حتى فضلوا المصالح على الضرايب وقالك الضرايب مصلحتك أولا

كاميرا اتنين هنا قرب شوية

يتوقف الميكروباص ويصعد ما لا يقل عن 11 نفر فوق 14 اللى جواه ولحظي العثر يقعد جنبي 3 غير ال4 اللي موجودين بالفعل ومنهم واحدة ست لا مش ست عفوا هي عشة فراخ تقريبا مكنوش على ايامها وزعوا صابون الجمعية !! وطبعا عشة الفراخ قعدت فوقيا من هنا وانا بقيت النحي نحي ناح رحت في غيبوبة فرخاوية

صحيت على نص المسافة كده لاقيت حرب استنذاف قدام واحد عجوز جنب السواق بيقوله

انتوا غليتوا الاجره ليه منكوا لله احنا هنلاقيها منين ولا منين

السواق : يابا احنا مالنا مش الحكومة هي اللى غلت علينا البنزيم ولا مؤاخذة

الراجل : عيب عليك متقولش على الحكومة كده انتوا اللى ناس مفتريه وبتتبلوا على الريس كمان يا ناكرين الجميل

السواق : يابويا احنا مالنا تيجي اوديك البنزيمة امونها قدامك عشان تصدق

الراجل : بطلوا بقى جشع حرام عليكوا الراجل موفرين لكوا كل حاجه انتوا اللى مغلينها علينا وبتمصوا دمنا منكوا لله وكمان بتتهموا الريس والحكومه يا نصابين

صحيح زي القطط تاكلوا وتنكروا وكمان بتيجوا على الغلابة اللى زينا

السواق : يابا متصدعنيش هي الاجرة زادت ربع جنيه هتدفعه ولا معكش وتقول من الاول بدل ما تودينا في داهيه

وهنا تنطلق كل العربيه في نفس واحد : نزل الراجل ده يا اسطى بدل ما نضربه ده شكله عميل حزب وطني ايه ياعم انت معانا ولا علينا

الراجل : انا مع الحق يا ظالمة حرام عليكوا الراجل بقى صاحب عيا على اديكوا اتقوا الله فيه

تنفجر العربيه بالضحك والسخريه طبعا عارفين ليه ؟؟

على ايدك هنا يا أسطى نزلت من الميكروباص وكأنها ولادة متعثرة لكن الحمد لله عدت سالمة وعلى موعد بميكروباص آخر ان شاء الله

68 comments:

alexandrany said...

هات الباب معاكي يا بنتي
انتي يا ست
يا مادموزيل الباب
الباااااااااب
هنعلق يافطة ع الباب بعد كده اللي نازل يقفل الزفت معاه
هههههههه

لماضة said...

اسكندراني
الباب براحه يا انسة
انتي صحتك مسعداكي ولا ايه
ما تقفلي الباب كويس سا انسه انتي مفطرتيش النهارده ولا ايه
ههههههههه

A.SAMIR said...

عليكي باتباع الحكمة الخالدة القائلة
هين قرشك ولا تهين نفسك
وبالتالي عليكي بالتاكسيات
وسيبك بقى من الميكروباصات واتباع نظرية الالتحام بالجماهير
تحياتي

لماضة said...

احمد سمير
هههههه وهنكمل بقيت الشهر منين يا باشا
الميكروباص شر لابد منه
والمضطر يركب الميكروباص

أحمد عبد العدل said...

ده فين ده يادكتورة..الحمد لله ان بلدنا مش كده!!!!!!!!!!!؟
فى بلد تانيه برضه فى ناس بتركب فى الصندوق فى عربيات النقل مع الــ... الحمد لله ان بلدنا مش كده.
على فكرة زمان كان اللى مش متعلم برضه أخلاقه كويسة وبيفهم .. لكن فعلاً الفقر والجهل من أبشع الافات اللى ممكن تصيب الناس وتغيّر مجتمعات بالكامل
تسلم ايدك

النجمة الصامدة said...

ههههههههههههه

الواحد ياما بيشوف في الميكروباص دا عجايب والله

عالم اخر

تحسي ان الشعب كله بكل فئاته وافكاره وتصرفاته بيتجمع في الصندوق اللي ماشي عالارض دا

بس دي احلى حاجة على فكرة
عشان وانا رايحة الكلية ولا راجعة
لو مليش نفس اقرا ولا اعمل حاجة مفيدة
اقعد اسمع حكاوي
هههههههههههههههههه


كل ميكروباص وانتي طيبة

مهيج الجماهير said...

انا عن نفسى الميكروباصات دى مش بركبها غير فى حالتين
عندنا هنا فى دمنهور .. لأنى ساكن فى حتة بعيدة شوية
و عندكوا فى اسكندرية من المندرة للطابية علشان لينا بيت هناك
انما غير كدة
لأ
مش قنزحة ولا حاجة
بس علشان أنا عندى حاجة كدة زى الفوبيا من الأماكن الضيقة و الزحمة
بتعب جداً من المواصلات
مااااااااااا علينا
بجد بجد بجد ... ضحكت من قلبى على البوست ده
تحياتى ليكى
سلام

oRiGiNaL HeArT said...

هههههههههههههههه
لا بجد حمد الله على سلامتك
فعلا الميكروباص واللى حصل فيه دنيا تانية خالص
ربنا يكون فى عونا
-اصلى انا كمان حريفة ميكروباصات-هههه

بطوط حبوب said...

الميكروباص؟؟

يا بنتى دا متعه الحياه فى مصر بجد
تدخلى الميكروباص تحسى انى مفيش مصرى واحد بره الميكروباص
ال70 مليون مصرى جوه

تخرجى منه تلاقى ال 70 مليون فى الشارع برضه

تروحى الغشل نلاقيهم هم هم ال 70

هو احنا كام 70 محدش عارف
:)

appy said...

طيب يا ست الفرخه ههههههههه قصدي الدكتوره مش تخلى بالك برضه مت صحتك انت حمل الكلام ده بزمتك

رئـــــيسـة حزب الأحلام said...

هههههههههههههههههههههه
هو دة حال الميكروباص
انتى ممكن تعملى يوميات فى الميكروباص
مش عارفة امتى ربنا هيتوب علينا من الميكروباصات
انت رايح فينا يااسطى
سلامى ليكى يلمضة

همس الاحباب said...

ميكروباص ايه
اللى انتى بتتكلمى عليه
يا بنتى شوف الخلفية الاول مالها
انا مش شايف الكلام جالى حول بصراحة
الكلام مش ظاهر عندى
ولا انا ما بقتش اشوف
جايز
عامة راجع تانى
اشترى تلسكوب وراجع
انتظرونى

aya said...

ههههههههههههههههه
قلبى معاكى
والله يا لماضة انا اول سنتين فى الكلية قضيتهم فى المواصلات
سنة تالتة حلفت يمين منا راكبة ميكروباصات تانى
حتى مع خروجاتى مع اصحابى اسالهم الخروجة فيها مواصلات ايه ؟
لو ميكروباصات اقولهم معلش بلاها الخروجة ديه انا هيبقى عندى صداع يوميها

والله ده الميكروبصات وحودايتها محتاجة مدونة لوحدها

كل سنة وانتى طيبة ولو انها متاخرة
معلش
ملحوقة الههدية والتورتة ال 7 ادوار

سومه...مجنونه فى بلد عاقل said...

اصلا اصلا الميكروباصات من بعد القانون الجديد اتادبت لدرجه ان 40 فى الميه منها مبقاش يشتغل لانهم ممعاهمش رخص والناس فى اكتوبر بالذات بقيت تركب على الشبكه من فوق
جم يعدلوها كعبلوها اكتر
تحياتى ليكى سومه_87

محمد الهادى غانم said...

السلام عليكم
يمكن اول مرة اكتب تعليق بس انا اول مرة دخلت عندك المره اللي فاتت ونسيت اقولك كل سنة وانتي طيبه
والسنه الجايه اشوفك دكتوره اد الدنيا
بس التورته كان فيها سنه واحده بس ؟
المهم ربنا يكون في عونكو يابتوع المحروسه في المواصلات بصراحه ان شاء الله ليكو الجنه
المهم ان انتي اولا نزلتي بالسلامه
وثانيا ان انتي لاقيتي واحد بيتكلم صح احنا اللي مش عاجبنا حاجه الراجل ده بيتكلم علي الملك مش كده اكيد هو فاكر انه عايش من ايامه
ويجعله عامر
ابفي شرفينا

عصفور المدينة said...

حتموتوا الراجل في عز شبابه
:)

ياسر حسين said...

يا ترى قانون المرور الجديد
لم ينال من الميكروبااااظ
اللي بيمشي أحيانا من غير باب
واحيانا من غير لوحة ارقام
:)
يا ريت يعملوا زي الطيارات
بينبهوا عند الركوب
اغلاق الهواتف النقالة
لتأثيرها على أجهزة الملاحة
ههههههههههههه
خالص تحياتي

DR.roro said...

بصيت لروحي فجاة ..لقيتني كبرت فجاة ...تعبت من المفاجاة ....ونزلت دمعتييي ......قوليلي ايه يا مرايتي ...قوليلي ايه حكايتى ....تكنش دي نهايتي واخر قصتي .........
ههههههههههههههههههه اكمل ولا ههههههه

انا يابنتي من كتر ما بتتشغل في الميكروباصات حفظتها مش عارفة هما عاجبهم فيها ايه دي لا وايه السواقيين يقولوك الا عبدالباسط ده محدش يغلط فيه ده عمنا ههههههههه

ربنا يرحمنا من الميكروباصات

كنت انا واتنين صحابى زمان كدة من ايام الثانوي كنا بنتفق علشان نحوش علشان نجيب عربية قلنا بدل الايس كريم والبيبسي اللي احنا عمالين نجيبهم دول واحنا بنتمشي نحوشهم احسن
مش كان زمانا دلوقتي معانا مبلغ وقدرة وجبنا العربية وكل واحد كان ياخدها لفة شوية واستريحنا من الميكروباز ههههههههه

خلاص هفتح معاهم الموضوع تاني

تيجي تشتركي معانا هههههههههه

هنريحك متخافيش احنا التلت وانتي التلتين هههههههههه

أظن كدة بقي عدل علي الاخر واالي تعرفة أحسن من اللي متعرفهوش

لماضة said...

احمد عبد العال
فيييييييييين ؟؟ مش هقولك انزل اي موقف في مصر وانت تعرف (وش مذبهل(
,,,,,,,,,,,,,,,,,,,,,,,,,,,
النجمة الصامدة
اه والله بلد ميكروباصات صحيح
,,,,,,,,,,,,,,,,,,,,,,,,,,,
مهيج الجماهير
هههههه انا بركبها في كل الحالات وحياتك
,,,,,,,,,,,,,,,,,,,,,,,,,,,
اورجينال هارت
الله يسلمك يا جميل ربنا يتوب علينا منها بقى هههه
,,,,,,,,,,,,,,,,,,,,,,,,,,
بطوط
انت يا واد انت مجيتش ليه يوم الجمعه ده انت هتتقطع كلنا كنا مستنينك
الدنيا دي ميكروباص كبير 14 راكب :)
,,,,,,,,,,,,,,,,,,,,,,,,,,
ابي
ههههههه الناس هيموتوني كفايه الريحه عرفت دلوقتى نعمة بطوط بتاعتك
,,,,,,,,,,,,,,,,,,,,,,,,,,
رئيسة حزب الاحلام
هي دي مصر يا عبلة توب علينا يارب
,,,,,,,,,,,,,,,,,,,,,,,,,,
همس خالد
ياعم الخلفيه مالها بس
بلاش بقى الاجهزه اللى كسفانا اللى بتجيبوها دي غير الكمبيوتر الناس كلها قريتها اهيه هههههههه قولي اكشف عليك نظر
,,,,,,,,,,,,,,,,,,,,,,,,,,
ايه
اول سنتين بس يا ايه انا قضيت 6 سنين وسنه امتياز ادي سبعه وحياتك في المبكروبازااااات ده انا ليا الجنه بقى ههههههه
,,,,,,,,,,,,,,,,,,,,,,,,,,,
سومة المجنونة
ايه هيلغوا الميكروباص امال اتشعلق في ايه بعد كده لا نستحملها لو ببلاويها نستحملها برضه
,,,,,,,,,,,,,,,,,,,,,,,,,,,
محمد الهادي غانم
كل سنه وانت طيب يارب شمعايه واحده عشان عيد ميلاد المدونة سنه واحده بس اما عيد ميلادي انا بقى متعدش
ايوه كان راجل حكيم الصراحه مش حكيم اللى بيغني
,,,,,,,,,,,,,,,,,,,,,,,,,,,,,,
بابا عصفور
هههههههههههه ضحكني تعليقك قوي ايوه الراجل كان بيدافع عنه باستماته مش عارفه ليه بصراحه مش ممكن يكون خايف لا ده بيدافع كانه بيدافع عن حد من عياله مثلا
,,,,,,,,,,,,,,,,,,,,,,,,,,
استاذ ياسر حسين
لا لم ينل حتى الان تقريبا هينال مننا احنا بس والوضع هيفضل زي ما هو عليه واحنا الضحيه كالعادة
,,,,,,,,,,,,,,,,,,,,,,,,,,,
رورو
هههههههههههههههههه ميه ميه الاقتراح ده انتي بتقولي فيها احنا فعلا كنا بنفذه وعملنا ليه جمعيه بس كنا متأخر شوية عنكم كان اول سنه في الكليه انا موافقه اجيب اللى حوشناه على اللى جمعتوه ونجيب فردة كوتش :)

Rehab Mostafa said...

عندي سؤالين بس الأول .. هو بعد ما قال هندزه واياتوها والكلام ده قال.. وأكلت ايس كريم !!! :))
وكلمة مصلحه دي معناها ايه يعني بيظبط دماغه وكده؟

الميكروباصات دي معاناااااه والله وياريت لاقيناها ..لو دخلتي عندي هتلاقي بوستين عنهم وعن المعامله والراحه التاااامه اللي فيهم
وإلا بقى اللي تيجي تقعد عليكي والواحد أصلاً بيكون مش واخد حيز من الفراغ تيجي وحده بقى فاميلي سايز حلوه كده من اللي هما خمسه ف واحد تقعد على الواحد تفطسه غير بقى ان الحمد لله تقريباً ماسمعوش عن اختراع الصابون ومش بيستعملوا الميه والله ببقى خلاص مش قادره وأزق فيها بس على ميين أنا فين وهي فيييييييييييين الناس دي متغذيه كويس وصحتها مساعداها بتفتري بيها على الناس
ربنا يرحمنا

انسان بلا عنوان said...

انت ضحكتينى من قلبى بجد

بالذاد ساعة انا انا انا انا .....

وبعدين موضوع ع الباسط ده كمان


عليكى اسلوب فظيع فى الجكاوى
السرد يعنى
جميل

تحياتى

خمسة فضفضة said...

السلام عليكم ورحمة الله وبركاته


هههههههه

فكرتيني باللذي مضي يا لولو
بس من الواضح كده ان الميكروباسات اتطورت كتير اوي عن زمان


ربنا يصبرك علي ما بالاكي يابنتي
:)))))))))))))))


سلام

Doba said...

يا ضنايا يا بنتى
كل ده مريتى بيه فى مشوار واحد

انا يوميا بسمع الكلام ده
بقيت حاسة انى فى حالة دوشة مستمرة ومستميته بعيد عنك

بقى عندى شبه صداع مزمن من وجع الدماغ

أومال لو شغلط بقى انا انا اناا دى فى الميكروباز كله والسماعات وجعالك بطنك من صوتها العالى

تعملى ايه

اهىء اهىء
يلا سلام وعقبال الميكروباز الجاى

A7MeD F@hMy said...

اهيء هيء هيء
و الله صعبتي عليا يا بنتي
ههههههههههههههه
دي مش مواصلة ده عقاب
بقول لك ايه
معكيش حاجة لعبد الباسط
ههههههههههههههههه

egyboy said...

ربنا يكون فى عونك يا لماظه أنا كل لما أركب الميكورباص ده اتشاكل مع السواق على الشلن اديله بريزه ومش عايز يجيب الشلن اشاكل معاه واخلى الناس تمسك فيه وأخلع أنا زى الدكتور لما يخلى أهل المريض يمسكوا فى الممرضة ويخلع هوا

مجلة علّي صوتك said...

حرام عليهم الراجل غلبان هو بس خايف انكم تطلعوا انتم اللي عملاء وهو عضمة كبيرة ومش حمل بهدلة

Che_wildwing said...

انا لسه نازل من الميكروباص حالا واحب ابشر كل الناس
ان سواقين الميكروباصات بيضربوا مخدرات وبيرة وهما سايقين والناس راكبة
العملية بقت اخر قلة ادب وخصوصا من البتاع اللى اسمه تباع ده

البنت الشقيه said...

فعلا يالماضه دى الميكروباصات الايام دى بيحصل فيها العجب تدخلى الميكروباص وعينك ماتشوف الا النور ممكن تلاقى كل حاجه

تحياتى
لولو

همس الاحساس said...

ههههههههههههههههههههه

تجننى يا بطوط

انا كل اما اقرا جملة اضحك اكتر

ده احوالنا مع الموصلات
بقينا بتوع الميكروبص بدل الاتوبيس


بجد يسلمو ايديك على المشهد الكوميدى ده من حياتنا اليوميه

عمرو said...

عطرٌ جدا هذا البوست يا لماضة,.... بالفعل اعجبنى جدا جدا

نفس الشئ يحدث (حدانا) فى الزقازيق.... السرفيس-اللى هو الميكروباص بلغتكم- يكون ممتلئا عن آخره بالبشر,جالسين وواقفين... أحيانا كثيرة كنت أضطر أن أركب بطريق شبه مستحيلة.. قدماى تحتلان بالضبط مساحة 40 سم مربع من ارضية السرفيس فى حين يستمتع باقى الجسم بالهواء العليل خارج العربة.. بالمعنى الحرفى لكلمة !!!1

ولكنّى فعلا كنت أستمتع بتجربة الميكروباص, خاصة و اننى أستقلّه يوميا تقريبا خلال أيام الدراسة بالكلية


تحياتى الحارة يا لماضة

Diyaa' said...

وما الحياة إلا ميكروباظ كبير
بس تحفة الإخراج السينمائي ده يا ست الداكطورة :))
الليست بتاعة المدونات جاهزة..ابعتيلي ميل وقت ما تكوني فاضية عشان شكلك يا عيني من المستشفي علي الميكروباظ علي السرير مش بتلحقي تاكلي حتي
ربنا يكون في عونك
تحياتي والمرة الجاية اركبي منطاد

mohra said...

بتتبلوا على الريس؟؟
انتى ركبت ميكروباص و لا سافرتى بلد تانيه

blue-wave said...

رغم زعلى منك واختلافى معاكى
لكن مقدرش انكر اعجابى بخفة دمك
بجد انتى مصفتى وصف ولا اروع لرحله فى مجاهل الميكروباص:))
تسلم دماغك وحمد الله على السلامه

ňįĝŗő said...

المكروباظاط؟!!!
( صوت مصمصة شفايف )
هو فيه في حلاوة المكروباظاط
و عيشة المكروباظاط
و دنيا المكروباظاط
و مواقف المكروباظاط
و خنقة المكروباظاط
المكروباظ بالنسبة ليا بقى بيجري في الدم
أنا بجد من عاشقي المكروباظ
بأحس بجد إن كل حد جوا المكروباظ ما هو إلا مندوب عن الفئة بتاعته في المجتمع
بجد الحياة في المكروباظ يتكتب فيها أفلام
و أبسط مثال على كده البوست بتاعك ده يا لماضة
المكروباظ هو المادة الخام اللي عليها بنيتي المعالجة البوستية
و بعدين انت بتتريقي على رائعة عبد الباسط حمودة (أبو تريكة الأغنية الشعبية) .. الأغنية الحدث .. الأغنية اللي غيرت مفهوم الأغنية الشعبية في مصر
أنا مش عارفني .. أنا تهت مني
ده يكاد يكون مفيش مكروباظ أو توك توك أو غرزة إلا و الأغنية دي راشقة فيهم
ثم استني صحيح .. انت داخلة المكروباظ بتدوري على مكان تقعدي فيه!!!
على فكرة الست اللي كانت بتبصلك بإشمئناط دي مكنش اشمئناط ولا حاجة
دي بس كانت مستغربة من السفروتة دي اللي بتسأل على مكان فاضي و هي 5 سنتيمتر يبقوا بالنسبة لها ملعب
شوفت انت ظلمتي الست إزاي



يلا سلام

كلام على بلاطة said...

ربنا يهديكى يا لماضة
بس دمك خفيف
تحياتى

كلام على بلاطة said...

ربنا يهديكى يا لماضة
بس دمك خفيف
تحياتى

البت قباحة said...

قولتلك باتى معايا فى السكن اصريتى تروحى لقضاكى

فعصت فيكى كام كيلو الوليه دى

احنا مصدقنا ننفخ فيكى شوية

وبعدين ربع جنية تانى زيادة ياولاد ال.......

بعد كدا انتو اللى تجولى انا مش ناقصة مصاريف

عايزة اشوفك يا بت

تشاووووووووووووو

شفقة هانم واحسان بك said...

واللهى انتى عسل يا لماضة وبعدين يا ستى خلاص هرحمك من الميكروباص واشتريلك عربية مش هتشتغلى معانا سكرتيرة وان شاء الله ال 300 جنية هيقضوا ويشتروا العربية ويفيض كمان

همس الاحباب said...

ههههههههههه
انتى محتارة فى مكان
نزلى السواق واقعدى مكانه
بسيطة يا ست لماضة
ومش كفاية بتسمعى الاخ عبدالباسط حموده بس بجد حلوة عديتهم لقيتهم 15 انا دى
ولا الراجل الكبير
بجد بجد تحفة
فعلا حرام عليكوا جبتم للريس المرض وتعبتوه نفسيا يا اخوانا
الراجل عضمة كبيرة برده
ايقطع نفسه يعنى

Anonymous said...

ممتازة يالماضه
عبد الجليل
المنصورة

TAFATEFO said...

موضوع الأغاني ده .. مره لحظي العاثر ركبت مترو .. وواحد شكله مش ولا بد ماسك تليفون صيني صوته مزعج للغايه ومشغل أغنيه مش قادر أوصف كم الإزعاج

والناس كلها واقفه متضايقه .. ومحدش كلمه .. قمت رايح واقف قدامه وقلتله لو سمحت .. مردش عليا .. بصباعي خبطتله على كتفه .. بكل سماجه رفع وشه بالسلو موشن وقال أيوه .. شاورتله على تليفونه .. بصوت متخلف رد: وهي نضايقاك في ايه؟
قلتله لما تكون في مكان عام .. مينفعش تغني بصوت عالي .. ولا تزعق .. ولا تشغل أي حاجه بصوت عالي
!!!!!
ملامح عجيبه ارتسمت على وجهه .. وقف .. وقال بطريقه مقرفه .. أصلي مش واخد بالي ان ده مكان عان(عام) .. قاومت الضحك وقلتله .. أديك خدت بالك
:D

Noha El-arabi said...

حمد الله ع السلامة
من الميكروباظ
بالنوسبة للمواطن اللي كان بيسمع اغاني، كان المفروض تطلبي انتي كمان تسمعي اغنية الدنيا خربانة يا عم خربانة، انا مش عارفة الكلام الهادف و الجميل ده الناس مش عاجبها ليه
المواطن التاني اللي بيموت في تراب و اسفلت الحكومة كان لازم الميكروباظ كله ضج بالتصفيق له
(هيييييييييييييييييييييييه(
صوت الشعب

بنوتة said...

ههههههههههههه معلش هقرأ و اجي اعلق الضحك نساني كل حاجة

صوت من مصر said...

لماضه فكرتينى ببوست كنت كاتبه من سنه مثلا عن ايه قعدتى على القهوه بنفس الصيغه تقريبا بس بجد الفنان فنان تسلم ايدك يا ام مدونين مصر؟

Misrdream said...

دي تانى زياره ليا لمدونتك
بجد انا بحب اسلوبك السخريه الممزوجه بالمراره من اوضاعنا طريقة سردك لرحلة الميكروباص بتجبرني على متابعة التدوينه للاخر بشغف وده قلما نجده فى مدونين الايام دي
تقبلي تحياتي

صباح الصباح said...

بقى كدة تظلموا الراجل وتقولوا هوة اللى مغلى العيشة.. بقى دى اخرتها.. اة منكوا يا بلد!
هههههه

لماضة said...

رحاب مصطفى
هههههه اه طلعت تحشيشه بيحششوا بعيد عنك هشوف بوستاتك اكيد
,,,,,,,,,,,,,,,,,,,,,,,,,
انسان بلا عنوان
هههههههه ايوه والله حاجه تجنن يا اخي انا اتفجعت اساسا
ولا اغنيه المحكمة دي كمان اول مره سمعتها قعدت اعيط في الميكروباص
,,,,,,,,,,,,,,,,,,,,,,,,,
دكتورة فضفضه
ايوه اتطورت كتير توب علينا يارب
,,,,,,,,,,,,,,,,,,,,,,,,,,
دوبا
هههههه اه والله ياحماتي بيجيلي صمم بس بخليه يوطيه بجد مزعجين
,,,,,,,,,,,,,,,,,,,,,,,
احمد فهمي
لا معايا قرص ريفو من صداع اللي سببه عبد الباسط واعوانه ينفع هههههههه
,,,,,,,,,,,,,,,,,,,,,,,
ايجي بوي
الله ده مش انا لوحدي اللى بتخانق على الشلن وفي الاخر باخده بريزه ههههههه عشان مفيش فكه
,,,,,,,,,,,,,,,,,,,,,,,
علي صوتك
والله هم يبكي وهم يضحك ياما هنشوف
بلد ميكروباصات صحيح
,,,,,,,,,,,,,,,,,,,,,,,
تشو
ايه الاسم العجيب ده :)
ربنا يبشرك بالخير
,,,,,,,,,,,,,,,,,,,,,,
البنوته الشقيه
اه والله حاجه صعبه ربنا يستر علينا ويتوب علينا بقى
,,,,,,,,,,,,,,,,,,,,,,,,
همس الاحساس
ربنا يخليكي يا جميله انتي اللي سكر عشان كده عجبك البوست
,,,,,,,,,,,,,,,,,,,,,,,,
عمرو
ههههههههههه تعليقك تحفه تصدق كان نفسي اجرب احساس اني بره العربيه ده واتشعلق فيها بس للاسف انا بنت رغم ان ده مش عائق بالنسبالي بس عائق بالنسبه للناس للاسف
,,,,,,,,,,,,,,,,,,,,,,,,
ضياء
اهلا اهلا باشا
ابعتها يا باشا
انا في الانتظار
,,,,,,,,,,,,,,,,,,,,,,,,,
مهره
ههههههه لا والله هي هي نفس البلد بس من جوا عربيه ميكروباص
,,,,,,,,,,,,,,,,,,,,,,,,
دكتور عمرو فاروق
رغم زعلي انا كمان منك بس تعليقك بفرح لما بلاقيه عندي جدا
شكرا على شهادتك الغاليه دي يا باشا
,,,,,,,,,,,,,,,,,,,,,,,,,
نيجروووووو
ههههههههه سفروته ايوه والله الست بصتلي بقرف قوي لا سيبك من الاغنيه دي كمان فيه اغنية المحكمة اول مره سمعتها قعدت اعيط في الميكروباص ههههه
,,,,,,,,,,,,,,,,,,,,,,,,,,
على بلاطه
امين يارب :)
,,,,,,,,,,,,,,,,,,,,,,,
قباحه
هههههههه جيالك يا غاااااااااليه
جيالك يا حبيبتيييييي
ولا يوم من ايامك يا ام زعبولا
بس ارجوكوا افتحوا حاججه في المسمط اللى بتنيموني فيه ده انا خسيت من كتر العرق اللى عرقته وانا نايمه
,,,,,,,,,,,,,,,,,,,,,,,,
شفقه هانم واحسان بيه
هههههه طيب اديكوا على مرتب اول الشهر بقى
,,,,,,,,,,,,,,,,,,,,,,,
همس خالد
هههههههه ماشي يا ابو همس المهم انا هموت واعرف يعني ايه الاغنيه دي
,,,,,,,,,,,,,,,,,,,,,,
عبد الجليل
ربنا يخليك يا افندم
,,,,,,,,,,,,,,,,,,,,,,,,,
تفاتيفو
ههههههههههه يا لهوي على العته اللى الناس فيه انت بتقول فيها انا لما بركب برضه عربيه والسواق بيكون مزعج كده او حد مزعج بخليهم يوطوا الصوت خصوصا اني بكون جايه من نبطشيه يعني فيه طبل في دماغي لوحده مش نقصاهم
نورتني
,,,,,,,,,,,,,,,,,,,,,,,,,,,
نهى العربي
هههههههه لا انا كنت هموت واقوله شلغي العبد والشيطان جوجوجوجوجوجو اهي دي بقى فيها 35 جو
,,,,,,,,,,,,,,,,,,,,,,,,,,,
بنوتة
ماشي يا قمر في انتظارك
,,,,,,,,,,,,,,,,,,,,,,,,,,,
صوت مصر
مين ام المدونين دي
ههههههه حرام عليك انا بموت من الضحك لما بسمعك بتقول الكلمه دي تشكر يا باشا بطلت سجاير ولا لسه يا واد
وش مطلع لسانه

لماضة said...

MISDREAM
ربنا يخليك يا افندم دي شهاده غاليه بجد وكلامك فرحني بجد واداني ثقه في حاجه بكتبها حاسه انها قليله ومش تليق اني انزلها ولازم اكتب احسن منها
بجد متشكره جدا
,,,,,,,,,,,,,,,,,,,,,,,,
صباح الصباح
صباح الفل
شفت الناس مفتريه ازاي
:))

المنسى said...

ميكروباصات تاااااااانى
هى إيه الحكايه
ههههههههههههه
بس حلوة عشة الفراخ
المواصلة دى منين لفين يالماة
بجد نفسى أعرف
أحتمال أكون بركبها
هههههههههههههههه
ومتنسيش صح
سلملى على قانون المرور
هههههههههههههه

نهر الحب said...

لماضة
ازيك يا قمر
بجد وحشتينى يا دكتورة
وسعدت جدا جدا جدا بالتعرف عليك
اما موضوع الميكروباص دا فموضوع منيل بجد
يعنى انا مرة شفت واحد بيحب فى واحدة فى الميكروباص بشكل علنى وفاضح واللى مش عاجبة 00 ومرة تانية سمعت شباب عاملين يتكلموا عن مراكز النت اللى ممكن تستغفل فيها اللى قاعد ويفتحوا مواقع مش كويسة ولما نزلوا اتضح لى لانهم كانوا ورايا ومش شفتهم انهم اطفال مش اكثر من 15 سنة بالكتير
ولا لما تلاقى تحرشات من النوع الثقيل اوى فى الميكروباص المشؤؤم
فمن يومها نزلت وحلفت انى اقاطع كل ميكروباصات البلد
بجد موضوع حلو



وكل سنة وانتى بالف خيرررررر
ياستى الدكتورة

عروس البحر said...

بس حلوة اغنية انا انا انا
تحياتي علي بوستك و علي خفة دمك يا قمر
فعلا هو الميكروباص ايه؟؟؟
غير شوية ناس و اغنية انا انا و شوية حاجات فوق بعضها

The Führer said...

كدة يا دوك تكسفينا وسط الناس ، بتركبي ميكروباص .!!
احنا في الصعيد اتطورنا وبقينا بنركب فيمتوباص .عقبالكو

حنين.. said...

ههههههههههههه
لا تاكسيات ولا ميكروباصات
انصحك ان تسيرى زحفاااااا على الاقدام
وان رجلييلك اتكسرت
مليش دعوه
تحياتى ليكى
فى انتظار المزيد
حنين
دمتى سالمه

صوت من مصر said...

لا بشرب اكتر هههههههههههههه
وش بيشرب سجاير

سمر الشافعى said...

ياااااه بتفكرينى دايما ب اسعد لحظات حياتى نسخه طبق الاصل منى مااحنا زمايل كفاح كليه واحده

تصحى الصبح كدا بتقولى يافتاح ياعليم تطلعى تستنى نص ساعه مع ملايين البشر مستنيه اسم النبى حارسه الميكروباص وبعدين تمارسى هوايتك فالزغد بالكوع ووسع ياعم عدينى ياحاجه ماتحترم نفسك ياراجل انت وهكذا لحد ماتلاقى نفسك بقدره قادر على رجل اى حد جوا الميكروباص ههههههههه

تدخلى بقى تسمعى كل مالذ وطاب ابتداءا من دقيقه حداد لحد انا مش انااااا ولازم تستحملى وتسكتى

وعلى ماربنا يفرجها وتنزلى من علبه السردين تلاقى نفسك بتبصى لنفسك كدا وتقولى انا مش اناااا والله العظيم انا نازله من بيتنا بلبسى مكوى وطرحتى كانت فوق راسى وكنت لابسه شوز كمان يالهوىىى فين الشنطه هههههههه

تحياتى ياقمر

دعاء مواجهات said...

ههههههههههههههههههه

ربنا يعينك يابنتى

فعلا انا الحاجة الوحيدة اللى بحبها لما بركب مواصلات الحكاوى والقص والافلام دى

بحب اتابعها اوى بجد

بتبقى متعة

تحياتى لميكروبااصك

اتشرفت اوى بمعرفتك ياقمر

بيس

دعاء مواجهات said...

اة صح

نسيت اقولك

دى مدونة جديدة

لاازم تتابعيها ومش مهم فيها كومنتات

http://llzakreeen.blogspot.com/

mohamed ghalia said...

حمدا لله على السلامة أهم حاجة إن الميكروباص بيوصلك مكان ما إنتى عايزة فى ساعة ولا ساعتين ولا تلاته وحتى لو غلوا الأجرة أو حصل خناقات أو اإلى جنبك غلس عليكى
المهم إنك بتوصلى للمكان إلى عايزاه والمضطر يركب الميكروباص
تحياتى

son's egypt said...

السلام عليكم
الميكروباضات اكتر مكان ممكن تسمعي فيه اي حاجة
ممكن ضحك هزار كلام جد
كل اللي خطر علي بال الواحد
واللي يركب الميكروباص ياما حيشوف منه

Manamino said...

رابع ورا يابشمهندز
رابع ورا يا انزة
جتكم البلاوي ركاب اخر الليل
تحياتي يالماضة

صدى الصمت said...

بجد بجد مدونة تحفة ودمها خفيف والميكروباص دة زى المية والأكل بالنسبةلى لأنى بأركبة كل يوم وانا رايحة الشغل وياما قاسييييت فية وشفت أيام سوده معاه وكويس ان فيه حد حاسس بينا لازم يعملولنابدل ركوب ميكروباص زى بدل إصابة عمل وله اية رأيك؟

انا من اهوى ومن اهوى انا said...

لماضة :

فعلا هو المثل الشعبى اللى قال الجنية غلب الكارنية

وهين قرشك ولا تهين نفسك

والفلوس بتقوى القلب كل دا فعلا مظبوط

اللى عايز يعيش فى بلد زى بلدنا لازم يكون معاة فلوس

دلوقتى لما غاب الضمير وزاد الزحام الناس غلابة

تعمل اية كلة بيسرق وينهب

لنا الله

وحاولى بعد كدة ماتركبيش ميكروباظ بدون محرم

تحياتى

و القادم....أجمل said...

و الله شكلنا في الاخ هنمشي
:(

بس سيبك كله كوم
و عمو العميل دا
هههههههههههههههههه

بس خلي بالك الاغنية دي مشهورة
تقريبا كان بيغني لطالب طب
" لاقيتني كبرت فجأة ,,, تعبت من المفاجأة
و نزلت دمعتشييييييييييييييييييي "

سالفل على عيونك

:D

nosha said...

الدكتورة لماضة
للأسف المثال ده موجود دايماً في حياتنا وبنقابله كل يوم ولكن بالنسبة ليا أنا كشاب فبقول إمتى بقى الشباب دي تفكر بجد وتحس بحجم المسئولية والظروف اللي إحنا فيها لإنهم فعلاً مفيش في دماغهم أي حاجة خالص غير على رأي الأغنية أنا مش عارفني صحيح لإن كل واحد فيهم مش عارف هو مين ولا عايز إيه ولا عنده حلم ولا طموح ولا مبدأ مجرد ماشي مع التيار مكتن ما يوديه ومش فارقة بقى هيروح فين ..... وطبعاً الكلام ده مش بينطبق على كل الناس دي لإن منهم فعلاً اللي طلعان عينه ومبدهل ومش قادر يعمل اجة ولا عارف ليوصل لكيانه فغصب عنه بيتحول بيبقى زي العينة اللي كنتي بتحي عنها دلوقتي دي وخاصة سواق الميكروباص بتاع البنزيم

آسف للإطالة وتحياتي ليكي

لماضة said...

المنسي
ربنا يستر علينا ميكروباص واخرة
,,,,,,,,,,,,,,,,,,
ايناس نهر الحب
هههههه ولسه هنشوف ونسمع
,,,,,,,,,,,,,,,,,,,
عروس البحر
هههههه يا سلام عليه ساعة صبحية
,,,,,,,,,,,,,,,,,,,
دكتور فوهرر
هههههههه اوعدنا يارب اللى اداك يدينا يا سيدي
,,,,,,,,,,,,,,,,,,,
حنين
ايوه خدي ديلك في سنانك واجري
,,,,,,,,,,,,,,,,,,,
صوت من مصر
والله انا خايفه عليك
,,,,,,,,,,,,,,,,,,,,
سمر الشافعي
لا ياختي انا بعد كده بقيت اطلع الميكروباص جزمتي في اديا اضمن هههههه
,,,,,,,,,,,,,,,,,,,,
دعاء مواجهات
عندك حق يا قمر علم وينفذ المدونة الجديده مبروك
,,,,,,,,,,,,,,,,,,,
محمد غاليه
عندك حق مضطرين للاسف توب علينا يارب
,,,,,,,,,,,,,,,,,,,,
ابن مصر
اه والله دنيا تانيه
,,,,,,,,,,,,,,,,,,,,
منامينو
شوية جنبك يا انسة
كرباج ورا يااسطى:))
,,,,,,,,,,,,,,,,,,,
صدى الصمت
هههههههه فكره جامده والله
يطلعولنا بدل فاقد زي بدل انتقال كده
,,,,,,,,,,,,,,,,,,,
انا من اهوى
ههههههه هو انا لاقيه محرم وقلت لأةبس اشوفه قبل ما اموت
,,,,,,,,,,,,,,,,,,,
ولاء والقادم اجمل
هههههههههههه تصدقي مخدتش بالي
لا يابت احنا اغنيتنا على باب المحكمة دي زي على باب المشرحة بالظبط
,,,,,,,,,,,,,,,,,,,,,
نوشا
اهلا اهلا الزياره المتاخره دي نورتنا يا باشا
صحيح عندك حق محتاجين يفوقوا من غيبوبة انا مش انا يارب ربنا يكرم قريب

abo salah said...

بعد السلام عليكم

هههههههههههههههههههههههههههههههههههههههههه
والله العظيم الميكروباصات دى مشكلة

بس الميكروباص العجب دا انهى خط بالظبط ؟
شكله خط نغمات عبد الباسط
هههههههههههههههههههههه

بس كله كوم والراجل اللى عايش في غيبوبة دا كوم تانى .. قال يقولك الراجل بقى صاحب عيا منكم .. باين الراجل دا كان راكب من محطة المريخ
ههههههههههههههههههه

انا بلا فخر من ركاب الميكروباص وبأشوف زى كده واكتر

وبما أنك انضميتى لحزب ركاب الميكروباص يبقى ربنا يعينك

تحياتى يا لماضة

oRiGiNaL HeArT said...

هو فى حد بيربى ضفادع ؟؟
زى الفراخ كدة مثلا ولا ايه !

Soooo said...

اهو ده اللي انتو فالحين فيه
مالو الريس ؟؟
راجل زي الفرن والله
وكل شوية تجيبو العيب عليه في اي حاجه في رغيف وخلاص


قال يافرعون ايش فرعنك .. قال مالقتش بجنيه جبنه اسطمبولي
مشيها جبنه اسطمبولي


ملحوظه
كلمات الرائعة (انا مش عارفني) لمطرب الجيل عبد الباسط حموده .. بتقول
انا مش عارفني
انا تهت مني
انا مش انا




سلامووووووووووز