فوزي عاوز ايه من ليلى !؟

 تضامنا مع فوزي

اسمعي مني يا لوليتا .. شوفي انا بدلعك لحد دلوقتى وماسكه نفسي .. هتقوليلي الا ما سمعتها من البعيد فوزي هقولك فوزي جدع شهم وابن حلال لازم تشوفيه عاوز ايه وتريحيه

هي الواحده مننا ياختشي ليها ايه غير الخمس حيطان .. اللي النبي حارسه وصاينه فوزي تعب وحفي وورجله شققت ومأثرش فيها فازلين .. وتيجي في الاخر تقوليله الشقه من حقي ومش كفايه اني رضيت بيك

ده على اساس لا سمح الله فوزي افندي كان باير ومش لاقي حد يتخطبله .. وما صدق انك دقيتي بابه قام افتكر أغنية يامّه القمر عالباب – اي والله قمر .. حتى شوفي صورته قبل ما عنيه تحوّل على ايدك

وانتي في الاخر جايه تعملي عليه كولومبو وتقوليله انا مكسورة الجناح .. قال يعني انتي كمان مخدتيش منه ضلع وسيبتيه يا ولداه ناقص ضلع .. ده بقى شبه منحرف

شوفي يا ست الكل بقى وطرطقيلي ودانك اللى خرمهوهالك ساعة ما سي فوزي جابلك الحلق .. صحيح يا ولاد .. يدي الحلق لفوزي .. عشان يديهولك

الريس فوزي مش عاوز منك كتير .. هو الجدع من دول يهمه ايه غير هدمه نضيفة وكلمة حلوة .. ولقمة مستويه كويس .. ايوه يا ليلى بصراحه فضحتينا وانتي مطلعه الرز مأرمز .. واللحمه كاوتش .. والفراخ مخليه من العضم ومن اللحمه كمان .. ياختي اتعلميلك صنعة تنفعك بدل الطبيخ الي فشلتي فيه .. ده لما بيقولك اعمليلي كوباية شاي .. بتحتاسي وبتحطي سكر لمون بدل السكر العادي .. تقوم بطنه تُكرش عليه ويقضيها رايح جاي على بيت الراحه

الراجل عداه العيب خطوبة وجبر بخاطرك .. جواز وستر عليكي .. عيشه وجايبلك مطرحين وعفشة ميه زي بيت الطاعه ما قال .. ناقصك ايه ؟؟  المفروض بقى انتي كمان تحطي في عينك حصوة وزلطة ودبشه .. وتشيليه على كفوف الراحة .. وتحطيه يا شابة جوا عنيكي .. بس اوعي تكوني مخرطة بصل ساعتها .. ما انا عارفاكي تموتي في ريحة التقليه في البيت .. قال ايه شطارة والطريق لقلب فوزي كرشه

اهو كرشه ده هو اللى جابلك الكافيه .. وترجعي تقولي فين ايامك وانت ولا مهند في زمانك

من الاخر بقى وعلى بلاطه .. فوزي مش عاوز يسمع منك غير كلمة واحده هتريحي بيها باله وتطمني قلبه ويعيش بعدها في سعادة وهنا ويدعي للست والدتك الي عمره ما شاف منها كلمة حلوة

هي كلمة وفوزي ده شعر راسه هينبت لوحده من الفرحة .. ولا سحر ولا شعوذه

قولي ورايا .. لا مش زوجتك  فوزي

 .. قولي ورايا 

!! روح يا فوزي .. وانت حــــــــر