بابا انا عايزه اتجوز
ياريت عشان اخلص منك .. بس الناس الغريبه ذنبها ايه
لا فهمتني غلط انا مش عاوزه اتجوز عشان ازهق ناس تانيه
امال عايزه تتجوزي ليه يا أم العافيه زهق ؟ ولا عايزه تصيفي ؟
لا يا بابا افهمني انا عايزه اتجوز عشان بدل الجواز وبدل العيل
طول عمري بسمع عن بدل إنتقال – يجعلي في كل خطوة سلام –
أو بدل عدوى – بعد الشر عليا ان شالله عدويني –
أو بدل إقامة – يجعلها قدم السعد -
أو حتى بدل فاقد – يارب الي في بالي -
لكن اول مره في حياتي اسمع عن بدل الجواز .. دي مش كلمه وحشه محدش يطير بعقله .. بدل الجواز ده عباره زيادة اتنين جنيه في مرتب الحكومه
ودي تقدر تحتسبها مكافأة لانقاذك روح بشرية من الدهس بقطر العنوسه .. او تعتبرها حاجه تصبرك على ما بلاك .. او يمكن حاجه تعينك على تسديد اقساط جوازك بقية عمرك
بصراحة الاتنين جنيه مغريين اكتر من جوازك من السيدة الفاضله هيفا – هي مش بقت سيدة دلوقتي مودام يعني ولا ايه ؟ - وهي تحتكم على الاتنين جند فين ولا عمرها شافتهم يدوب بتشوف ورق اخضر بس ورق الملوخية يعني مفهومه طبعا
الحقيقة مغريات الجواز في بلدنا كترت حواليكم يا شباب .. ليكم حق تضعفوا بصراحه وغلطان اللي يفكر ينحرف .. خصوصا انه لقى حد يوجهه .. وكمان يديله اتنين جنيه جنيه ينطح أربعة أربع
اتنين جنيه يا ظلمة يالي متعرفوش ربنا .. يعني تستر نفسك وبيتك وان شاء الله مش هتتفضح فضيحة الموظف يوم طلوعه على مرتب أول الشهر.. توكل على الله ودوس يابني
ده غير ان فيه مفاجأة الصيف ولكل موسم حلاوة العيل يعني لو ربنا اكرمك وجبتلك عيل هتاخد بدل عيل اتنين جنيه كمان والعرض ده ساري حتى قدوم تاني عيل مش لنفاذ الكميه زي ما كنت متخيله يعني هتاخد بدل عيل على الاول والتاني بس وبعد كده لازم تربط الحزام لان لو فكرت تغلط مع مراتك يبقى هتشحت بالعيل التالت يعني الحكايه مش سبهلله كل سنه تجيبلك عيل وتفكر تعملك مزرعة ارانب سواء ارانب بشرية او نقدية من الاتنين جنيه ولا حاجه
الحكومه مبترميش كتاكيت قصدي جنيهات .. خدهم في جيبك وبوس حلمة ودنك
والكلام ده يطبق على البنات كمان .. لازم البنات تبقى واعيه اكتر من كده وتحاول تصطاد الاتنين جنيه بسرعه المتمثلين في العريس .. وكمان تتمسك بحقها في الوظيفه وحذاري من القاعده في البيت هيضيع عليها حاجات كتير وحقها هيتهضم .. اضربي اتنين جنيه من المرتب الاساسي في الحوافز في البدلات والذي منه يعني كلها كام سنه وتبقي من ذوات الريش
يعني الاتنين جنيه دول اللي ممكن ناس من اللي - اللهم احفظنا - بيشتمو في الحكومه عمال على بطال .. ممكن الاتنين جنيه يعملو حاجات كتير قوي زي تذكرة اتوبيس مكيف .. اي نعم هو بقى اتوبيس بس ومابقاش مكيف وكمان شويه مش هيبقى اتوبيس اصلا .. بس احسن من التوك توك
الاتنين جنيه دول يجيبو اربع سجاير ال ام فرط .. وقدامك بقى تختار ال ام ازرق او لو اهلاوي هاتها احمر
كمان الاتنين جنيه دول ممكن يساهموا في حل ازمة تاكسي لو ركبه واحد هو اللي هيدفع .. ساعتها وبمنتهى الافتخار هتقولي انا معايا اتنين جنيه فكه !!
هييه ... الواحد نفسه اتفتحت للجواز .. انا بس خايفة من طمع العرسان فيا .. اتنين جنيه زياده وماله واهي كلها ستره وربنا يسترعلى ولايانا
61 comments:
والله محدش ظامن الحكاية دى
بس فى الطلاق ، بعد الشر
فى بدل نفقة
ههههههههههههههههههه
انا عارفه انها نفقه طول عمري
اول مره اعرف ان النفقه كمان اتبدلت يا طه
يبقى خسارة الجوازه
المشكله بقى اني سالت لو اطلقت الاتنين جنيه دول هيروحوا فين
ولا هياخدوهم مني باثر رجعي
ما انت عارف الحكومه متسيبش حقها
اه والله فعلا اغراء جامد جدا
اتنين جنيه .. مع اتنين جنييييييييه
يعملوا أول مليون
اه والله فكرة
انا خلاص ظبطت نفسي
مش متجوز غير دكتورة ..انتهت الحكاية دي
وابقى احسن من اي حد سافر برا
وعملهم على قلبه
هههههههههههههههههههه
عجبني جدا الحتة دي يا دكتورة مروة
"وتفكر تعملك مزرعة ارانب سواء ارانب بشرية او نقدية من الاتنين جنيه ولا حاجه"
ربنا يزيدك
كل يوم الحكومة مروقاكم حوافز وبدلات
دا انتوا خربتوا البلد
وكتر خيرها البعيدة مش مقصره معاكم
قصف عمر اللي ف بالي
ههههههههههههههههههههههه
حمدلله على السلامة يادكتورة
ومتغبيش تاني عن المدونة
في حفظ الله
يانهاااااااارى دا جد ولا تهيؤات؟؟؟
اتنين جنيه بحالهم؟؟؟؟؟طب سؤال الاتنين جنيه عمله ولا ورق اصلها تفرق
احنا شعب متدلع اخر دلع انا مش فاهمه الشباب عاوزين ايه اكتر من كده..هيدوووووووووووووهم تووووو باوند بحالهم...
طب يعنى بدل منغنى الـ145 جنيه هنقول والاتنين جنيهولا ايه النظام
أنا رأيى ان الشباب المفروض يحسوا شويه بالحكومه ويعرفوا ان الحكومه أهى بتساعدهم وبتديهم اتنين جنيه
يعنى المفروض بعض من الشباب دول يتنازل شويه ولو بجنيه مثلا يعنى ياخد جنيه واحد كفايه ويسيب التانى للحكومه أكيد الحكومه هتعمل بيه حاجات مفيده أكتر
يعنى مثلا جنيه على جنيه يكون أجرة الكراكات اللى بيبعتوها تهد البيوت اللى من غير ترخيص
ولا يعملوا بيهم أى حاجه مفيده من هذا القبيل
والله مش عارف أقول ايه غير حسبى الله ونعم الوكيل
دكتوره مروه
أنا ازادت شرفا لما دخلت مدونتك ووضعت فيها تعليقى
دمتى بكل الخير أيتها المدونه الرائعه
المدونه ظريفه جدا
ريحتني وضحكتني
أتمنى لك مزيد من التوفيق والتألق
الله هبقى غنية اتنين جنيه ودول يجيبوا شقة يا اوختى
بس عايزاهم اربع جنيهات
لما الحق ادور على عريس بقى قبل مالحكومة ترجع فى كلامها
دى ثروة يابنتى !!!!!!
تحياتى ليكى يامارو
انتى بجد جميلة
يا نهار ابيض
ده احنا داخلين على فتنة
بكرة نلاقى ناس تضرب لها ورقة عند مأذون وهما مش متجوزين طمعا فى الاتنين جنيه
وناس تبدأ تزور بطايق بقى وناس تزور شهادات ميلاد ويسموا نفسهم بأسامى ناس متجوزين علشان الاتنين جنيه
احنا داخلين على فتنة كبيييييييرة ومحدش عارف هتاخدنا لفين
لموضتى وحشتنى لماضتك
حكومة كريمة أوى إثنين جنيه..ده تراب الميرى اللى بيتكلموا عنه اللى مليان خير
.
طيب الموظف لو إجوز اتنين حيأخد 4 جنيه ولا ملوش غير 2 بس
أخيراً بوست جديد
أحمدك يااااااااا رب
---------------------
وكمان بتتريقى على الاتنين جند طب إيه رأيك بقى إنى ليا أخت صيدلانية وبعد ما أشتغلت فى الحكومة عملت دبلومة فى صيدلة المستشفيات عارفة مرتبها زاد أد إيه؟؟؟
5 جنيه
شوفتى البذخ بتاع الحكومة
لماضه فينك بقىالك يجي شهر
تلاقيكي قاعده تحسبي في اتنين جنيه فوق اتنين جنيه
وقدامك مليون حاجه تعمليها بيهم
بس نصيحه
فكري كويس
دا مش مبلغ سهل
تحياتي يادكتوره
منار
ايه ده يالماضه
فينك من زمان يابنتي
بقي كل ده الغيبه دي عشان 2 جنيه
لا فعلا ليكي حق
وحشتينا يالماضه
هههههههههه
هههههههههه
بجد انتى مشكلة
اتنين جنيه يا لماضة
يلا فضل ونعمة
كل سنة وانتى طيبة
وعقبال 100 سنة
تحياتى
يعني يا لماضة لو الواحد اتجوز 4 وجاب من كل وحدة 2 يعني عن كل وحدة وعيالها هياخد 6 جنيه في 4 يبقوا ب 24 جنيه
حلوين
اهم يفكوا زنقة
ولا مينفعش التعدد
يعني زي العيال اول زوجتين هما اللي يدفع لهم بدل جواز و اول عيلين بس يعني كدة يتغرم هو
بس يستاهل مش كان عايز ياكل الحكومة
الغلبانة
بس ربنا جزاه بنيته
هههههههه
لذيذ اوى الملصق ده
تسلمى
اتنين جنيه
جنيهان مصريان
الله اكبر
كده لو الواحد مشاها بقى واتجوز اربعه وش
يبقى ثمانيه جنيهات مصريه
والله حاجه اخر صيحه
بس كده مش قليل حبتين يعنى
ده الطماطم باتنين ونص
يبقى بدل الجواز اتنين جميه
مفيش تشجيع جامد
بس دى دعوه للتفكير انى اغير رايى
ههههههههههههههههههههه
هههههههههه
اتنين جنيه حته واحده
تحياتى
ههههههههههههههه
ياسلام ياسلام
انننننننننيييييييييييين جنيه بحالهم
الله يرحمك ياجدي
البلد ديه مش عايزه ناس تعليم عالي
البلد العظيمه ديه عايزه ناس شايله البندجيه وتطوخ طخيخ
انا عارف انك دايما مشغوله بس ياريت من وقت للتاني تتواصلي معانا في مدونتك
ههههههههههههههههه
هو انتي لسه عارفة
العازب له علاوة إجتماعية 4 جنيه
و لو اتجوز يبقوا 6 جنيه
بزيادة 2 جنيه بحالهم
و 2 جنيه لأول عيل و زيهم لتاني عيل
و لا تزيد أبداً عن 10 جنيه و لو خلفت زوربة عيال بعديهم حتى
هما اول عيلين بس اللي بيزودوك
أقولك حاجة
أنا عملت دبلومة دراسات عليا في الهندسة الصحية( هندسة مياه الشرب و الصرف الصحي و معالجة التلوث و المخلفات ) عارفة زدت بعدها كام
7 % من الأساسي
هو ده القانون سواء ماجستير او دكتوراة او دبلوما ملكيش غير 7% من الأساسي
يعني بعد بهدلة و مرمطة في الموقع مع العمال و الصنايعية طول النهار كنت أجري على الكلية و أسافر لها في إسكندرية علشان أحضر المحاضرات بالليل بعد الشغل و ما كنتش بألاقي وقت أذاكر فيه غير في أتوبيس غرب الدلتا و أنا رايح و أنا جاي
و بعد بهدلة سنتين و تمقيق عين في المراجع و إمتحانات بالإنجليزي زدت كام ؟
12 جنيه بحالهم
تحيا مصر و يعيش البحث العلمي فيها
هههههههههههه
والله وحشتوني يا جدعان
ووحشتني دماغكم الجميله دي
فعلا لو فيه بدل نفقه زي ما طه قال
ولا لو واحد اتجوز اكتر من واحده يعمل ايه
زي ما ميرا بتقول
فعلا مشكله
الحكومه هتلاقيها منين ولا منين
بتتعب والله
على فكره القرار ده من زمان
انا اللى موظفه جديده
والي يتوظف ياما يشوف
هههههههههههههه
قال اتنين جنيه قال
هو جنيه.. وأنا جنيه
ونفرتكهم بقى ونعيش
هههههههههههههه
ربنا يكرمك ياحبيبتى
بتتريقي علي النعمه يالماضه
دي نعمه واللي يكرهها يعمي
الاتنين جندي دول اجره توك توك رايح جاي
مش احسن ماتخديها موتورجل طول الشهر
الحكومه النظيفه الهي ربنا مايسترهم ويفضحهم عايزين يريحوكوا وانتوا غاويين شحططه
عقبالي يارب اما اخد اول اتنين جنيه
يارب
كل سنه وانتى طيبه يالماضه
ويارب كل سنه تكونى اكتر لماضه من اللى قبلها
عقبال 100 سنه ياقمر
بيتهيالي انك سمعتي اغنية ابو جريشة 145 جنيه و جيتي كتبتي البوست ده علي طول
لا العرسان هيطمعوا عشان موظفة حكومة بقي
قال 2 جنيه قال
........................
انا ال 100 جنيه مبتقعدش في جيبي 3 ايام
مع اني باكل في بيتي و مش مجوز و لسه خريج جديد
انا لو منك اوفر ال 2 جنيه للحكومة بدل ما اصرف قدامهم 200 جنيه مهدئات شهريا من العريس
أولا و قبل أي حاجة
كل سنة و انت طيبة و عقبااااااااال ميت سنة
ثانيا بقى أنا مذهولة جدددا من الكلام...اتعودنا اننا نسمع الارقام الخرافية عن الرواتب و شوية شوية مابقتش بستغرب قوي
بس بجد اتنين جنيه؟؟
زي ماتكون الحكومة بتتعامل مع ناس ماعندهاش اي عقل او خلفية عن الحياه.. وكل ما اتخيل منطقهم بحس بالعبط
ربنا مع الناس في بلدنا
كل سنة وإنتي طيبة يالماضة يالمضة ويارب ماتبطلي لماضة أبدا
الله الغني عن أنا باقول الحكومة تتلم بقى وتوفر فلوسها وتبطل تشتغلنا ولو هما عال فيسة قوي كده يبقو يدونا 1000 جنيه بدل حرقة دم
ههههههههههههههه
بوست يجنن يالماضة
تقبلي مروري
هههههههههههههههه
حجة حلوة برده للجواز
اتبنى عريس طيب لغاية متخدى الإتنين جنيه
هههههههههههههههههه
هههههههه
ربنا يخلى الحكومة
كثر خيرها
اثنين جنيه بحالهم
يا سلام
طب و يخصموا منهم اكيد جنيه و نص تأمين صحى
و تحاليل ما قبل الزواج
ههههههههههههه
طيب الحقي بقه يا لامضه
تقفشي عريس
الا سوقهم في العالي اليومين دول
وشاحيين ف السوق
تحياتي
وما تنسنيش في اي حاجه كده ولا كده من الاتنين جنيه دول
هههههههههههههههههههه
الحكومة طول عمرها بنت حظ وغاوية تقول نكت
يا خسارة أختذها ربة منزل
2 حنيه بحالهم
دى حاجه تفرح بجد والله كويس أخصصهم مرتب للتكاسى ده أنا صارفه عليهم دم قلبى!!!هههههه ده الحكومه كريمه بشكل بتقدر ظروفى لأبعد الحدود !!!
دمتى مبدعه يا لماضه
يا حلاوة
والله حلو قوي الكلام ده وماتستهتروش بال 2 جنيه دول
ماهو 2 عى 2 يبقوا 4 و 4 على 4 يبقوا8
وقريب جدا تحوشوا المليون من ال 2 جنية دول
ماهو مشوار المليون بيبدأ ب 2 جنية
ولا ايه ؟
بقالى كتير مازورتكيش يا لمضه
وحشتنى موضوعاتك اللذيذة
كالعادة دمك زى العسل
فى حد برده يجيب الحسد لنفسه برجليه
اديكى دلوقتى عرفتى العرسان بموضوع الاتنين جنيه
كل البنات التانية حيحسدوكى على الثروة اللى حتجيلك لو جاه اول عريس
ههههههههه
بجد موضوعك جميل قوى
أيوة فعلاً كلامك مظبوط أنا زودونى 2 جنية لما إتجوزت
و2 جنية كمان لما خلفت
وشوفى الأمله بقى لما إترقيت عارفة زودونى كام ؟؟؟
الله يكرمهم زودونى 5 جنية بحالها
شفتى الحلاوة !!!!
يا بختك يا لماضه
يعني تتجوزي وتاخدي كمان 2 جنيه بحالهم
يا سلااااااااام تصدقي أنا دلوقتي بس ندمت أني متوظفتش في الحكومه كنت زماني متبغدد آخر بغدده
2جنيه جواز و2 أول عيل و2 للتاني
يعني زياده 6 جنييييييييييييييه بحالهم
والله والله والله حسرتيني وخلتيني زعلت خالص مالص
يا بلاش!!
:)
طبعا ياستى الدكتوره انتى اول مره تشوفينى هنا بس انا بقرا ليكى من فتره لابأس بها وبتعجبنى اوى طريقتك الساخره بس انا حبيت اقول للناس اللى معانا ياجماعه انا اول ماشتغلت عرفت الموضوع ده وطبعا فرحت جدا دول اتنين جنيه مش اى كلام طبعا انا كنت مفكرهم على الاساسى واى موظف معانا يعرف يعنى ايه اتنين جنيه على الاساسى لكن للأسف اتصدمت لما عرفت انهم على الشامل ...ههههههههههههه
عشان كدا مش عاوزهم خالص الحكومه اولى بيهم منى ياجماعه الحكومه مش ساكته بس احنا اللى مش واخدين بالنا دول عملوا مييييييييييييييييت جنييييييييه شهريا بدل بطاله يعنى ربنا يكون ف عونهم ...
بجد يادكتوره موضوعاتك متميزه جدا وياريت متغيبيش علينا تانى .
2 جنيه
طب يعني ورق ولا فضة
اه أصلها تفرق جدا
تدوينتك دي فكرتني بالنكتة بتاعة "بدل ما أشحت "
اتنين جنيه
دا الواحد كده ممكن يبقى له حساب في البنك
عشان يأمن مستقبل العيال
على فكره بقى فى علاوه جواز والمفروض بتكون كتير مش اتنين جنيه بس يعنى يكن توصل تمناشر خمشاشر جنيه كدا
شباب اليومين دول مستعد يدفعلك الاتنين جنيه وانتى عند اهلك ويرحم نفسه جاتلى فكره احنا نمارس ضغط بدل عليهم يعنى يا الدفع يا الجواز بحيث يوصلنا كل اول شهر 2 جنيه بدل ما نتجوز خالص اعانه من شباب مصر عشان نحل عنهم:))
الا قوليلى مينفعش اتجوز اربعه واخد تمانسه جنيه علاوه :)))امم اتارى الرجاله طول النهار بيطالبوا بالتعدد كل دا عشان بدل الجواز فهمت اخيرا
يااه الناس مابئاش ليهم حجة كلو هيجوز من بكرة
اتنين جنية باءا مش اي حجة لا كدا كتيير اوي هيعملة بيهم ايه
ليه يا جماعة ظالمين الحكومة هما تلاقيهم فاكرين ان اسعار دلوائتي هيا بتاعت زمان
شوفو باءا اتنين جنية كانو يعملوا ايه
:)
ومال لو كانوا عشرة جنيه كنتي عملتي ايه
واهو برضو اسمها بدل
وسميها بدل اي حاجه وخلاص
ربنا يعين ويوفق يارب
لماضة
اول مرة ازورك
عجبتنى قوى اللماضة
مخ موزون عيبه انه فاهم زيادة عن اللزوم وكده الحكومة تزعل منك
وقلب حاسس وشايل وكاتم
حسبى الله ونعم الوكيل فى كل من حول احلى ايام تعيشوها لكل هذا الكم من
الاحباط والنكد
اما بدل الجواز ده واقف على الحكومة بخسارة .. كفاية ان المتجوز حيرازى الحكومة بعيل واثنين عايزين ياكلوا ويتعلموا
يعنى العنوسة اوفر لها بكتير
شفتى بقى حجم التضحية التى تقدم للشباب ناكر الجميل
تحياتى يا المض لماضة
ثكر يالماضة ثكر
أنا عاوزة اتجوز
اقصد عاوزة آكل ملوخية زي هيفاء
ولا لما اشوف حلمة ودني
جهاد مشالي
ههههههههههههههههه
لا فكرة تحفة بصراحة .. إتنين جنيه بحااااالهم .. ومش مكسوفين وهما بيقولوا كدة والنبى؟
ده الأتوبيس الأحمر بتاعكوا الجديد ده ابو دورين بقا التذكرة الكاملة بخمسة جنيه ونص الطريق بتلاتة يعنى بردو اكتر من الاتنين جنيه
أقولك على حل ... انا لو منك اقولهم اديكوا انا الاتنين جنيه دول وتلغوا المادة دى وتتلهوا على عينكوا احسن
أنا اتجوزات بس ماخدتش الاتنيين جنيه
أعمل ايه دلوقتي
والله باباكي راجل طيب
خايف على الناس
لـــــــمـاضة
السلام عليكم يا عسل
كل رمضان وانتى بخير وطيبة
وتكونى فى فرح وسعادة يا رب دايما
نورتنى زيارتك ليا
ده انا هفرق حاجة ساقعه لمده يومين :D
يا حلو انت يا حلو
يامفتريه اتنين جنيه بحالهم
حسرتينى على نفسى
حسيت انى عنست عنوسه معنسه
انا عايزه اتجوز بقا
اشمعنا انتى تتجوزى وتاخدى اتنين جنيه
ودول يطلعوا كام بالمصرى اصلا؟
بوست لذيذ لذاذه مش عاديه
عجبتينى
هزورك تانى
باىباى وتعالى زورونا
هههههههههههه
والله اثنين جنيه مبلغ مش بطال يفك زنقة اكتر محتاج
هههههههههههه
انا بقالي كتير مش بزور مدونتك بس ان شاء الله هرجع اتبعك تاني
ههههههههههههههههههههههه
ولله انتى مجرمه
اتنييييييييييين جنييييييه بحالهم
يا حلاوة يا ولاد
لا لو علي كده يبقي الواحد يفكر بقي
مع إني معنديش تليفون
أقصد أنا اساساً مش موظف حكومة
بس بكره يجيلي التكليف إن شاء الله
ولازم أجهز للموضوع ده دلوقت
ربنا يعينك و يقويكى على التكليف و ما فيه
كل سنة و انت طيبة و إلى الله أقرب إن شاء الله
تقبل الله منا و منكم
رمضان كريم
كل سنه وانتى طيبه يا دكتوره
كل سنة وإنتى طيبة
ورمضان كريم
تحياتى
السلام عليكم
كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه
وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم
وارزقنا العفاف والرضا - والمحبة واهدينا يا عظيم
وأعنا علي القيام والصيام والصلاة والارتقاءالي جنة الفردوس
واجعلها لنا ميراث خير وسعادة
واجعلنا من عتقاءك في هذا الشهر يا معطي يا وهاب
وارزقنا حلاوة القرآن و حسن تلاوته
وتدبر معانيه وفهم علي النحو الصحيح
ورطب ألسنتنا بذكرك يا الله
قلتلهم ليه دلوقتى
بكرة تلاقى كل واحد رايح يدور غلى الاتنين جنيه بتوعه
وساعتها حتنتبه الحكومة للاهدار الفظيع فى الميزانية
ويلغوها او ينزلوه لجنيه وربع
والا اللى مصدقت فرحت وقلت خلاص
حتتدعدل وحكون نفسى
كل سنة وانتو طيبين
سؤال لو سمحتو
وإياكم تفتكروها لماضة مني
هو الجنيه والاتنين جنيه
في الساعة ولا في اليوم ولا الشهر
ولا ايش الحكاية
لأني عن جد ماني فاهمة
قشطة يادكترة هنهيص ياعم بال 2 جنيه ونجيب اللى نفسنا فيه بقى واللى على على ياسيدى ، بس ابقوا افتكرونا لما تقفوا اول استك
مدونتك رائعة ، متابع قديم جدا ودى اول مرة اعلق
بجد مجهود جبار وكنت فاكر إن ممكن مدونتي تعجبكم أنتي وأصحابك الأخرين من المدونين وخصوصا إني أنا كل فريق العمل
المهم المدونه بجد لذيذه وكمان المدونات الأخري زي دكتور حر وبطوط
ربنا يوفقكم
هو من الممكن إن مدونتي يكون لها مجال وسط كل هذه الخبرات الواسعة اللي عندكم
عموما شرفيني بزيارتك وإرمي كلمه أو حتي تعليق
محاسب/ محمد الجريدي
eglibrary.blogspot.com
Post a Comment