Friday 4 December 2009

Spiritual music



الاخوة المتعصبين أو محدودي الفهم برجاء الامتناع عن قراءة هذا الموضوع واذا تفضلتم بقرائته الرجاء اكماله لاخر حرف حتى لا تسيئوا الفهم والتسرع في الحكم


على غير المعتاد وغير الاتفاق ايضا مع صديقة كفاحي صحبتشي وحبيبتشي صابونة – نظرا لكثرة شغفها بالاستحمام -  وفي رواية أخرى سحلية النيل – نظرا لانها كانت بطله في السباحه - ذهبنا للسنكحة في أيام الاجازة وكأنه نوع من الاخذ بالثأر بما تفعله بنا العلمين ومرضاها من المارينز نسبة الى مارينا
وبدوري انا المجنونة الاولى اخبرتها عن نيتي القتالية في حضور احدى حفلات مكتبة الاسكندريه المقامة  .. وان الحفلة لن تزيد عن بعض الموسيقى الروحانيه كما قرأت الاعلان .. وانها فرصة للتروية عن نفوسنا.. خاصة عندما ضربت على وتر حساس لديها وهوعشقها لموسيقى الجاز فلربما يتواجد بالحفل هذا النوع
وبالفعل بعد الحاح شديد منها – مش مني الحمد لله – واخذ الاذن من عائلاتنا الكريمة بان كل منا قد تبرع للاخر بعزومه لا ترد على هذه الحفلة القيمة التي لا نعرف ماهيتها حتى وصلنا شباك الحجز
فاذا بالموظف وبدون ان انطق بكلمه يقول : داخلين حفلة النهارده فيه تذاكر كتير كام واحده
فأجبت وانا في حالة ذهول بعد ما لمحت الاعلان مره ثانيه انه انشاد ديني باللغه المصرية وطريقة عرض الموظف للتذاكر وكأننا على شباك بيع حشيش يستفسر عن العدد والكمية
اخبرت صديقتي بالمفاجأة حتى تستعد نفسيا
لماضة : على فكره ده انشاد ديني باللغه المصرية
صابونة : يعني ايه ؟؟ مفيش موسيقى
لماضة : يا بت انشاد ديني يعني اكيد فيه ابتهالات وكده يعني
صابونة : يعني ايه انا جايه اقول لأجل النبي و مدد مدد ومفيش جاز
لماضة : لا جاز ولا نفتالين بلي .. بقولك ايه احنا خلاص قطعنا التذاكر.. كان زمانا اكلنا بيهم ايس كريم من عند بندق انتي الي ركبتي دماغك وطلعتي ايدك مالشباك ودفعنا الاجرة للسواق .. استحملي بقى .. وبعدين يابنتي انتي جايه تعصي ربنا .. جاز ايه وبنزيم ايه بقولك انشاد ديني
صابونة : عندك حق الحمد لله انتي من ساعه ما قلقتي منامي الصبح ومعرفتش انام بعدها قعدت ادعي عليكي وماما ما صدقت بعتتني اجيبلها حاجات من السوق رجعت ضهري متكسر لاقيتها بتدعيلي الحمد لله ففرحت
لماضة : شفتي بقى يعني لولا اني صحيتك مكنتيش اخدتي الدعوة دي عشان تعرفي بس اني من الصبح ممشياكي في نور الله ادعي واقول يارب .. يلا ندخل الحفلة هتبدأ
وعلى باب الدخول
اذا بموظف اخر ياخذ التذاكر في سرعه اكبر مما تخيلت وتلاها تفتيش لنا لولا الحرج لصار تفتيشا ذاتيا لجواربنا داخل الاحذية
داخل القاعه
أكثر ما لفت نظرنا وجود عدد كبير من السائحيين الاجانب من مختلف الدول حيث فاق عددهم الحاضريين من المصريين وقلة عدد المحجبات مما زاد حيرتنا ما طبيعة هذه الحفلة ؟؟
لماضة : واخده بالك ان الاجانب من كل مكان انا حاسه اننا في مهمه في تل ابيب
صابونة : بس الاجانب دول هيفهموا ايه اذا كان الانشاد ديني وبالمصري كمان .. جايين زي عواجيز الفرح يصقفوا وخلاص .. لا و فيه حاجه كمان ملاحظاها الاخوة المسيحيين كتير برضه يا خوفي لا يكون  اللي في بالي صح

لماضة: آه فعلا انا برضه في بالي حاجه وخايفه تطلع صح .. استغفر الله العظيم بس ايه الي في بالك يا صابونة ؟
صابونة : لا وكمان مفيش بنات مسلمة غيرنا هي احتفالات رأس السنه بدأت من دلوقتي ولا ايه ؟؟
لماضة : حاسه اني جايه احضر قداس .. او اننا  اتنين مساطيل دخلنا جامع في صلاة الفجر .. الحقي ده فيه أخت داخله .. بقولك ايه ما تيجي ندخل الحمام ونختفي لحد ما النور يطفى احنا شكلنا غلط في المكان ده وكل الناس بتبصلنا
صابونة : يارتنا كنا رحنا عند بندق
لماضة : شفتي يا صابونة وانا الي كنت فاكره اننا جايينا نرضي ربنا
صابونة : بقولك ايه اوعي تصقفي ربنا هيغضب علينا
لماضة : يابنتي انتي من الاول جايه ونيتك سودة اهو الجاز بتاعك هيولع فينا
اثناء حديثنا تستأذن فتاه مسيحيه للعبور بين الكراسي وتشكرنا بعد مرورها بكلمة ميرسي
صحبتشي صابونة ترد على الفتاه : الشكر لله
لماضة : يابت قولي الشكر للرب هتودينا في داهيه
تظهر مقدمة الحفل لتنوه ان الحفل يحوي مؤلفات موسيقية وابتهالات صوفيه وقبطية تتوحد جميعا لاعلاء كلمة واحده هي حبنا لله وان الفرقه تجمع عدد كبير من الفنانين العالميين من مختلف دول العالم باختلاف ثقافتهم وديانتهم حالها حال الجمهور الحاضر
يظهر اول مغني يطالب الجمهور بالغناء معه
قولوا معايا : هاااااااا هااااا  هاااا هاااا ها ها ها ها ها هاااااااااااااا
لماضة : ها ها ها هااااااايي ي ي
صابونة : لماضة اوعي تغني معاهم استغفر الله العظيم
لماضة : لا ده انا كنت بنشد قصدي بنشز بس
الحق يقال ان هذا المطرب تفاعل الناس معاه بشكل كبير جدا سواء مع الالحان او الكلمات وكانها تسبيح للسماء نابع من القلب رغم كونها باللغه المصرية الا ان الاجانب تذوقوها وتفاعلوا معها الحفل كان رائع بحق سواء الابتهالات الاسلاميه او القبطية او حتى الموسيقى كانت غاية في الاتقان والروعه
لماضة : تصدقي انا مبسوطه فعلا
صابونة : وانا كمان الحمد لله ما أغضبناش ربنا وافتكر ولا هما كمان شوفتي اهو كله بيتكلم المهم ان كلهم بيذكروا ربنا بطرق مختلفه شوفتي كانت نيتنا ايه ربنا برضه مش عايزنا نعمل حاجه وحشه اهو كله كلام لربنا
لماضة : شوفي الغريب اننا عايشين سوا بنحب بعض بنتريق على بعض الي بيفرق معانا بس هو الاحترام والتقدير لبعضنا وده الي مخلينا متعايشين سوا وافتكر ان الي بيجمعنا اكبر من كده وده اكتر حاجه خوفتنا من الحفلة
خوفنا اننا نغضب ربنا واكيد هما كمان وده في رايي اهم شىء خوفنا من ربنا ومحبتنا له هي سر اجتماعنا
فعلا لكم دينكم ولي دين وكفايه اننا كلنا بنعبد اله واحد هو الله مهما كانت ثقافتنا وديننا المهم اننا في الاخر موحدين وبنصلي لله
انا خلصت الموضوع يارب محدش يسيء الفهم او الظن بيا وبلاش شتيمه عشان الشتيمه بتلف تلف وترجع لصاحبها

34 comments:

زقطـوطـة said...

هههههههههههههههههههههههههههههههههههههههههههههههههههههههههههههههههههههههه
لمااااااااااااااضة
هو فيه مونتاااااااااج ؟؟؟
قوي الموضوع و طرحك للفكرة
معاكي حق
بنضحك على بعض بس بجد بنحب بعض
ومتعايشين بصدق النية لله
راااااائع كالعادة

Unknown said...

اه فعلا فيه مونتاج
زقطط متودينيش في داهيه الهي يسترك

blue-wave said...

تصدقى بالله؟
وحياة ابنى اللى جاى مافهمت حاجه:)
يا اما انا غبى او جعان مش متأكد:))

blue-wave said...

قريت تانى وفهمت انه كان انشاد دينى مسيحى
كويس
ربنا يباركلك
هوا انا كدا صح ولا انا لسه جعان؟:)

نجلاء said...

مساء النور
انا متابعة من زمان مدونتك بس دي اول مرة ارد.
البوست جميل جدا وفكرني فموقف مشابه حصلي انا وواحدة صحبتي.
على فكرة انا مغربية و
هنا في المغرب معندناش مغاربة مسيحيين
يعني منعرفش اي حاجة عن دينهم بس في عندنا كنائس للاجانب
المهم في مرة كان عندنا مشروع كنيسة والمفروض نعمل مسح لكنيسة ونعملها بلانات وكده(انا طالبة في هندسة قسم عمارة)
وروحنا انا وواحدة صحبتي، وطبعا من جهلنا وحظنا المهبب روحنا يوم الصلاة بتاعتهم.
والمفارقة المضحكة ان اول ما دخلنا ابتدت الموسيقى، وجيه واحد ورانا وقفل الباب.
احنا فضلنا مذهولين، اصل الجو اللي جوه غريب وجديد علينا، الموسيقى كانت روحانية وابتدت اول ماحطينا رجلنا جوه، والراجل بتاعهم ده جاي ناحيتنا
تخيلي انتي بقى الموقف
بقول لصحبتي تعالي نهرب دول اكيد عايزينا نرتد!!!
بس الحمد لله الموقف عدى على خير وشرحنا للراجل احنا جايين ليه وتفهم الموقف وادانا معاد عشان نيجي نقيس براحتنا وكان في منتهى الادب

اسفة لو طولت عليكي بس لقيت ان الموقف مشابه اوي للي حصلك وقولت ارغي شوية وفعلا اختلافنا ده وعدم رغبتنا في اكتشاف الاخر بتخلينا نجهل ونفوت حاجات كثيرة جميلة.

دمتي بخير

Unknown said...

عمرو
هو كده فعلا كان انشاد ديني مسيحي واسلامي بالتبادل
اتعشيت ايه ما تجيب سنكوتش معاك

نجلاء
ههههههههه موقف لا تحسدوا عليه
الحمد لله
نورتيني بزيارتك

serindipity said...

الله يكرمك
فى الاول اتخضيت لكم اوى
هههههههههه
يارب نتجمع دايما فى الخير

Ahmed Kamal said...

طب أقول لك إيه؟
يا ستي ربنا يتقبل طاعتك ..!

قلم رصاص said...

ههههههههههههههه

طب وهنفهم ايه غلط ليه؟

البوست فكرته واضحه وبأسلوبك الحلو

وضح اكتر

ورحلة موفقة لمكتبة اسكندرية

الا من حق شوفتوا النص مليون كتاب

اللي فرنسان ادتهم للمكتبة ولا لأ؟

أصلي معدتش بصدق حاجة اليومين دول

كل سنة وانتي طيبة يادكتورة

نورتي بيتك ومطرحك تاني

في امان الله

Ahmed Fayez said...


حمدا لله على السلامة
مش عارف بتغيبوا ليه كدة؟
مشاغل يعني!
ربنا معاكم


الموقف ده يذكرني بموقف حصلي من كام سنة

كنت ماشي في الشارع
لقيت جنازة معدية
الايمان دخل قلبي
و الدمعة كانت هتفر من عيني
قلت لازم اخد ثواب تشييع الجنازة
روحت ماشي ورا الراجل
و ادعيله بحرقة
لحد ما وصلنا لمقابر المسيحيين
!!

بس الحقيقة مش ندمان اني مشيت وراه و لا دعيتله .. هو بني ادم زيي .. و ربنا وحده اللي يعلم اللي في قلوب عباده

المصريون خليط متين بين الاسلام و المسيحية محدش يقدر يفرقه
ليه؟؟
لان من قديم الازل و الاتنين موجودين و اختلطوا بشكل كبير
زي الشاي بلبن
محدش يعرف يطلع الشاي من اللبن بعد ما يتخلطوا

العرب جم مصر و كان فيها مسيحيين
المسلمون كانوا نسبة قليلة جدا بالنسبة للمسيحيين
و دلوقتي المسلمون نسبة اكبر
الفرق في النسبتين بين زمان و دلوقتي ان المسلمين تناسلوا و ان المسيحيين منهم من اسلم
فممكن تلاقي ناس مسلمين كتير كان جدود جدودهم مسيحيين .. او كان جدود جدودهم كفار
المهم اننا مسلمين او مسيحيين غرضنا طاعة ربنا .. و كل واحد يؤمن بربنا بالطريقة اللي تناسبه

بس كلنا مصريين و ده شئ يخليني احب صديقي المسيحي لانه مصري .. و لان فيه احترام متبادل بيننا .. لا انا بعيب في دينه و لا هو بيعيب في ديني

(أنا برئ من كل مسلم يهين المسيحية .. و برئ من كل مسيحي يهين الإسلام)

أعتذر عن الإطالة

ameen said...

هى هى هى هى


وربنا انا حاسس ان الموضوع فيه كلمتين كده ف الاستخبس

بس لازم نعرفوهم

يا مراكبي said...

أحلى حاجة الجملتين اللي في الإفتتاح والختام اللي باللون الأحمر دول .. والله برافوا عليكي

أصل فيه ناس كتير هتفتكر كلام تاني وتؤلك مقاصد غير مقصودة .. اتعودنا على كده من ناس كتير

عموما عنوان البوست كفاية جدا انه يعبر عن قصدك الحقيقي من البوست .. ولو انه مكتوب بالفرنساوي .. لو ان بالإنجليزي كان هيبقى فهمه أسهل

:-)

حنين said...

ازيك يا لماضه
واللهى بجد بوست جميل واستمتعت جدا بقرائته المهم انك خرجتى مكن الحفله بتجربه جديده ومثيره انا لسه مستنيه انك تزورينى
مع تحياتى حنين

حنين said...

ازيك يا لماضه
واللهى بجد بوست جميل واستمتعت جدا بقرائته المهم انك خرجتى مكن الحفله بتجربه جديده ومثيره انا لسه مستنيه انك تزورينى
مع تحياتى حنين

Asmaa mahaba said...

ههههههههههههههههه
هم بتوع التكفير والهجره لسه موصلوش عندك:))

Mafrousa said...

هههههههههههههه
عادى يا لمضة انتى
المهم انك ذكرتي الله
و الكل بمختلف اطيافة ذكر الله

همس الاحباب said...

اللهم تقبل يا لماضة
وصابونة ومارينز
انا قلت البنت ناوية تاخد شاور بعد عناء العمل والسفر طلع انشاد دينى بصحبة صابونة
كل سنة وانتى طيبة
تحياتى

وميض ابتسامة said...

عزيزتى
تناولتى موضوعا الكلام فيه لاينتهى عند حدود معينة فالكل واحد منا رأى سواء كان عاقل او صاخب رأى قد يميل للمنطق او للتطرف المهم اننا مازلنا منقسمين على انفسنا .. لكن انا شايف وده رأيى الشخصى ان شعار
الدين لله والوطن للجميع
هو شعار يجمعنا ولا يفرقنا نحن المصريون ويحافظ على وحدتنا التى تذعر اعدائنا داخل بلدنا الحبيبة مصر وخارجها
خالص تحياتى

اقصوصه said...

انا اشوفه شي وايد حلو

adel said...

انا اول مرة اعلق

بس انا هاختصر معاكي
:):)
انا مسيحي و الفرقة اللي بتتكلمي عناها معروفة في القاهرة اسمها
انا مصري
الفرقة دي انشاد ديني و ترانيم مسيحية لربنا و بيعملوا مزج بينهم و بين ساعات الانشاد الصوفي

لون غرضه اننا لما بنسبح لربنا مسيحين او مسلمين او يهود ف فالنهاية هو الله
هو نفس الالهة و هما بصراحة بيعملوا الحان كويسة قوي قوي

لو تحبي دوري علي انا مصري علي اليوتيوب و هتلاقي فيديوهات ليهم

Tamer Nabil Moussa said...

بوست رائع لماضة

بس اللى يضحك دخولك انتى وصحبتك لمكان على انة انشاد اسلامى وبس هههه

ربنا يوفقك ويكرمك


مع خالص تحياتى

mohamed ghalia said...

هههههههههه
لا متقلقيش يادكتور فهمناكى صح

سواحة said...

جميل

بس بجد سوال ليه الناس بقيت تخاف تتعرف على الديانات الاخرى
احنا كمسلمين بنؤمن بالمسيحية و اليهودية بس فى الحقيقة قليل مننا الى يعرف حاجة عن الدينتين الثانين

فكرتينى بموقف كان فيه جنازة لواحدة مسيحية غلبانة جدا و كنا بنساعدها اثناء مرضها لان ملهاش قرايب و لا ناس الا زميلة فى الشغل
و لما اتوفت عملوا جنازة صغيرة على قد الفلوس الى فضلت و طبعا مكنش حد غيرنا احنا و الزميلة المتكفلة بالمرحومة، بس زميل طبيب مسلم فى الشغل راسه و الف ..... ما هو داخل الكنيسة و لا معزى ، استغربته قوى و قولتله مش فاهمة ليه موقفه ده و هو مش حيفرق قوى فى الحقيقة و احنا رايحين علشان ده واجب
لعلمك راح فى الاخر :-) بس السبب الله اعلم

Mahmoud Ahmed said...

ههههههههههههههههههههههههههه
جامده و الله جدا جدا
هههههههههههههههههههههههههه
بس هو مكنش باين يعني من الاول انه مش إسلامي ؟؟

صدى الصمت - عاشقة الورد - said...

على فكرة أنا من رأيى إن الفن الراقى الحقيقى مالوش علاقة بالديانة أو اللهجة أو الوطن
وأنا بحكم دراستى زرت المتحف القبطى والكنائس أكتر من مرة ولقيت هناك فن رائع وراقى جداً جداً
تحياتى

MaX HecToR said...

انا اول مرة ادخل المدونة بس بجد عجبتنى اللماضة اوى اوى يا لماضة
وقصة الحفلة دى جميلة جدا ومعناها احلى ما فيها
احنا كلنا بنحب بعض وزى ما قلتى لكم دينكم ولى دين
غير ان الاسلام دين تسامح وبعدين انتى نسيتى مقولة مهمة اوى
محمد نبى وموسى نبى وعيسى نبى وكل من ليه نبى يصلى عليه
اللهم صلى وسلم وبارك على سيدنا محمد
شكرا

♥ •. مناكيش .•♥ said...

ههههههههااااااااى
بوست جامد اوى بجد
واسلوبك وطريقة توصيلك للفكره جميله

Anonymous said...

أنا عارف "أنا مصري" كويس جدا وتعرفت منهم على صديقة ذات حدث تدويني هي وينكي ونكوكة الشهيرة جايز تعرفيها-بتغني معاهم
بس معترض جدا على حاجتين:
1- لغة مصرية لغة مصرية.. إيه لغة مصرية دي..؟ فيه لغة عربية ولهجة مصرية، عاجبهم على كده أهلا وسهلا، أنا من زمان وانا مش مرتاح لاسماعيل سراج الدين ده، ما علينا...
2- الشتيمة عمرها ما بتلف وترجع لصاحبها، الشتيمة أساسا بتلزق عند صاحبها ولا تتركه أبدا :)

Anonymous said...

أنا عارف "أنا مصري" كويس جدا وتعرفت منهم على صديقة ذات حدث تدويني هي وينكي ونكوكة الشهيرة جايز تعرفيها-بتغني معاهم
بس معترض جدا على حاجتين:
1- لغة مصرية لغة مصرية.. إيه لغة مصرية دي..؟ فيه لغة عربية ولهجة مصرية، عاجبهم على كده أهلا وسهلا، أنا من زمان وانا مش مرتاح لاسماعيل سراج الدين ده، ما علينا...
2- الشتيمة عمرها ما بتلف وترجع لصاحبها، الشتيمة أساسا بتلزق عند صاحبها ولا تتركه أبدا :)

Unknown said...

هو بوست مسلي بصراحة بس ليه تعليق على اخره

اللي هو تفسيرك ل كلمة (لكم دينكم ولي دين)
يعني كلنا مثلا بنعبد ربنا
وكل واحد بطريقته

يعني انا فهمت من البوست ده انك بتقولي اننا كلنا بنعبد الله الواحد بس كل واحد بطريقته وان الكل مسلمين ومسيحين متفقين في كده
بس كل واحد بطريقته او بمعنى ادق حسب دينه

ومرواحك للحفلة دي ادالك الاحساس ده

ثم كمان عاوز اعرف يعني ايه (المهم كلنا موحدين) مفهمتهاش دي

يعني المسلمين موحدين بربنا
وكمان المسيحين موحدين بربنا؟؟

ده اللي انا فهمته من البوست ده

كلامي صحيح؟لو مش صحيح يا ريت تشرحيلي

اصل بصراحة كده انا شايف الجزء الاخير ده كلام فاضي

El_Tahan said...

لا لماضه لماضه بس موضوع حلو وكويس انك وصلتى بفكره حلوه فى الاخر عجبتنى جدا والله يعنى المغزى بتاع الموضوع جميل بحييكىويارب نفضل ايد واحده

Unknown said...

هاني
ايوه بالظبط زي ما انت فهمت
عندك حق في ان الجزء الاخير ملوش لازمه بس انا خفت محدش يفهم قصدي فحبيت ااكد عليه مش اكتر

Anonymous said...

طيب..انا قرأت لآخر كلمة

وفي الآخر طلع هو نفس اللي فهمته قبل ما اخلص البوست

تعليق صغير بس

احنا مش كلنا موحدين

المسلمين موحدين وغيرهم لآ واللي بده يزعل يزعل

وزي ما قال أحد اللي علقوا الجزء الأخير كلام فاضي

وحكاية ان نقعد نغني وننشد مسلمين ومسيحيين والمهم النية مش مستوعباها بصراحة .......


ما تزعليش بس البوست كله مش حلو

dr.mimo said...

تصدقى يالماضة ان الدنيا فعلا صغيرة

اهو انا دلوقتى قاعدة جمب صابونة على السرير
اصلها معايا فى صدر المعمورة
شفتى بقى الدنيا
هههههههههههههههه