Tuesday 21 August 2007

اني اتجلبت

مسرح الاحداث
مسجد من اكبر مساجد عروس البحر يفد اليه الناس من كل فج عميق
زمن وقوع الحادثه
العام السابق ولاول مره فى تاريخ اللماضه وقد شهد توافقه مع اول يوم دراسى
المجنى عليه
لماضه على سن ورمح اللى بترعب الناس اتقلبت
وكيل المدعين
وكلت ربى ياخدلى حقى
الوقائــــــع
نحيل بشأنها الى ما جاء بعريضة الدعوى منعا للتكرار وحرصا على وقت عدالة المحكمه
الطلبــــــات
عايزه حقى يا سعادة البيه المأمور
معلش يا جماعه اصلى كان نفسى اعمل تغيير مسار وادخل حقوق والموقف اثر فيا شويتين
احكيلكم بقى اللى حصلى وعاوزه المحكمه تجيبلى حقى
السنه اللى فاتت مع اول يوم دراسه فى الكليه ولاول مره اقرر اجرب فكره الكورسات فى الكليه نظرا لان الدراسه صعبه ولان الواحد نفسه يبقى دكتور شاطر بدل ما انسى الفوطه فى بطن العيان ولا اجيب للناس مصايب والحكايه مش ناقصه
المهم
يومها المفروض كان برضه بدايه اول يوم فى الكورس وقلت فى عقل بالى انا ايه اللى يخلينى اروح وارجع انزل تانى من بيتنا لا يابت يا لماضه احسن حاجه اتغدى بره واروش نفسى واصليلى ركعتين فى الجامع يمكن ربنا يفتحها فى وشى السنه دى ويكرمنى بكام عيان
وفعلا اخدت المخله بتاعتى على كتفى ورحت اتغديت وتوجهت لبيت من بيوت الله اسأل حسنه قليله تمنع بلاوى كتيره
صلينا الفجر فين
الله عليك يا سيدنا الشيخ اشجينا كمان
ايه النور والروحانيات العاليه دى مفيش احلى من ان الواحد يكون بتاع ربنا قصدى مع ربنا اللهم لك الحمد والشكر
الست الحاجه : تاخدى سندوتش يابنتى
لماضه ( وعصافير بطنى بتهوهو) :شكرا يا امى بالهنا والشفا
الست الحاجه : انتى فى كليه
لماضة : ايوه يا امى انا فى كليه طب اخر سنه الى جايه (طبعا ده كان السنه اللى فاتت الحمد لله) ادعيلى
الست الحاجه : ربنا يكرمك يابنتى ويعلى مراتبك اصل انا ركبى بتوجعنى وعندى روماتيزم وقلبى بيدق على طول واديا بترتعش مش بقدر امسك حاجه و .......... الخ الخ الخ
لماضة : ألف بعد الشر عليكى يا امى ربنا يشفيكى ويعافيكى يا رب
يا حلاوه يا ولاد ادى اول فزيته ربنا مش بينسى حد صحيح الشحات ليه نص البلد قصدى الواحد يبقى يجى يسترزق هنا
الست الحاجه : ما تريحيلك شويه يابنتى شكلك تعبان مددى رجلك كده وخدى راحتك احنا ستات زى بعضينا ومتخافيش على حجاتك
لماضة ( والنوم يداعب عيون حبيبى قصدى عيونى ) : خايفه تروح عليا نومه شكرا يا امى
اه يانى فين سريرى حبيبى ولا طبيخ ماما الغامق
الله اكبر حى على الصلاه قد قامت الصلاه
لماضه فى سرى : هى الست دى داخله وحاطه شبشبها فى كيس وشيلاه قدامها كده ليه خلاص يعنى ده احنا داخلين نصلى ونفتكر ربنا وبعدين ده شبشب عادى اما الناس دى غريبه صحيح امال لو فلوس كانت عملت فيها ايه كل ده عشان شبشب وتاعبه نفسها وشايله كيس مخصوص فى شنطتها اما حكايه يلا ما علينا دع الخلق للخالق
الله اكبر
لماضة : الست دى بتزقنى كده ليه ده احنا بنصلى وانا مفينيش زقه
ايه الريحه الفظيعه دى هيغمن عليا ده احنا بنصلى يا ناااااس ارحمونا
الست دى رجليها شكلها عامل كده ليه مش يلبسوا شربات ويغطوها
اللهم اغزيك يا شوشو
ايه البت دى ده منظر لبس تصلى بيه
الله اكبر
استغفر الله العظيم اللهم اغزيك يا شوشو اتفوووو
السلام عليكم ورحمة الله
اللهم تقبل منا يارب
الست الحاجه : خدى ايدى يابنتى ربنا يكرمك ويرزقك كده بابن الحلال
لماضة ( هى لحقت تاخد بالها انى مش لابسه حاجه فى ايدى ) :ياااااااااااااارب يا نينا (ببراءه وخجل شديد بقيت طمطماية) بس الشهاده الاول ناخدها وبعدين الجواز
حجة البليد بقى
ياه الساعه كام دلوقتى كده تمام يدوب الحق اقوم امشى عشان اوصل مشوارى
ولفعت المخله بتاعتى تانى على كتفى استعنا على الشقى بالله
لماضة : الحقوووووووووووووووووووووونى يا ناااااااااااااااااس
اني اتجلااااااااابت

دزمتى اتسرقت يا ولد العم
يا فضيحتك يا لماضة لما ولاد الدهاشنه يعرفوا انك اتجلبتى

جزمتى اتسرقت يا ناس الحقونى امشى ازاى دلوقتى واعمل ايه

الست الحاجه : لا حول ولا قوة الا بالله معلش يابنتى مش عارفه ايه اللى داخلين الجوامع يسرقوا الناس دول مش تخلى بالك من حجاتك وبعدين اهم معلقين ورقه كله يخلى باله من شنطته وجيوبه

لماضة : يا ستى انا داخله بيت ربنا مش فى محطه مصر ولا راكبه ميكروباااااااااااااز اه يانى اعمل ايه دلوقتى وأمشى ازاى

ولاد الحلال: طيب ما تلبسى زنوبه من بتوع الميضة (المكان اللى بيتوضوا منه يعنى) وامرك لله

لماضة: زنووووووووووووبه زنوبه زنوبه حلوه وطعمه وحبوبه

يادى الفضيحه ام جلاجل يادى الجرسه ام حناجر

انا عاوزه طيب حاجه بس اروح اقرب محل اشترى شوز جديد اروح بيه مشوارى وارجعه تانى

بنوته روشه : طيب تاخدى البوت بتاعى تلبسيه لحد ما تشترى وترجعى

لماضة : (بوت عزالحر واكيد رحته ربنا يحفظنا ) ميرسى يا حبيبتى بس اصل ده مش مقاسى الدنيا مقاسى وانا بقاسى

الست الحاجه (بنظره امومه وشفقه وحنان ): طيب يابنتى معلش خدى شبشبى روحى اشترى بيه ورجعهولى تانى

لماضة : طيب وحضرتك تمشى ازاى وهتعطلى نفسك تستنيى لحد ما اشترى شكرا يا امى

الست الحاجه : ولا يهمك انا مستنياكى

لماضة : طيب خدى بطاقتى ولا شنطتى رهن لحد ما ارجع

الست الحاجه : عيب يابنتى يلا عشان متعطليش نفسك الحقى قبل ما السوق يقفل

لماضة (فى سرى ): هى دى شهمنة ولاد البلد ولا بلاش ادى قلب المصريين والله لو لفيت الدنيا ما هلاقى حب كده بس للاسف الست الحاجه شبشبها كبير قوى ده قد رجلى 3 مرات يلا مش مشكله اهى كلها دقايق واشترى حاجه البسها فى دماغى قصدى فى رجلى

ومشيت مشيييييييييييت على الاشواك
بيب بيييييييب : مش تفتحى يا أنسه
لماضة (وأنا بعبر الطريق) : ما تصبر ياعم مش شايف الشبشب اتقلع من رجلى استنى اصلى بمشى فى الشبشب الاول
ماشيه اتشحتف بالشبشب بكل فخر ولا هاممنى وراسى طبعا لفوق عشان محدش يبص لتحت وكل ما ابص لحد الاقيه يعدى
ولا الكاميرا الخفيه يشاور لتحت ويموت من الضحك وانا خلاص هعيط
الحمد لله وصلت لشارع الاحذيه
ايه يابت يا لماضة حلوه الشوز دى
صاحب المحل ( بنظره احتقار وقرف واشمئزاز على رجلى ) وشويه كان هيضربنى ويقولى روحى الله يسهلك
جتكوا القرف مليتوا البلد
المحل اللى جنبه مردتش ابص على البترينه دخلت على طول
لماضة : بص بقى يا عم انا اتسرقت فى الجامع ودى مش رجلى قصدى ده مش شبشبى ده شبشب ست تانيه
وعاوزه اشترى شوز انت عارفنى وبشترى من عندك على طول انا مش هنقى اللى تجيبه ينوبك ثواب
الراجل مات من الضحك قالى طيب ثوانى
جابلى حاجه حلوه ايه رايك يا انسه

لماضة : شغاله على بركة الله نقرا الفاتحه يلا لفلى بقى الشبشب ده لفه حلوه
الحمد لله ربنا سترها صحيح الراجل استغل الموقف وجابلى اغلى حاجه وستر ربنا انى معايا مصاريف الكليه والكتب

كنت ناويه ادفعها وطنشت النهارده ده بابا وماما هيفررررررررررررررحوا قوووووى لما يعرفوا الفلوس راحت فين

الامانه رجعت لصحابها الحمد لله وكل الستات اللى فى الجامع باركولى على الارض

والحمد لله انها جت على قد كده ومفيش حاجه تانيه اتسرقت خصوصا سندوتش الجبنه مكنتش هعرف اعوضه

ومن يومها بقيت ادخل اى جامع جزمتى فى حضنى وكيسها فى شنطتى الادب حلو

تمت

14 comments:

اسكندراني اوي said...

ههههههههههههههههههههههه
بتحصل في احسن المواقف
انا حصلي نفس الموقف ده
في جامع برضه في اسكندريه وكنا بنحضر فرح في نادي القوات المسلحه
والبدل بقى والكرافت
وطلعت من الجامع لابس شبشب الحمام جررررررررررررررري على العربيه
هههههههههههههههه
معلش استعوضي ربنا فيه

Unknown said...

تعيشى و تاخدى غيرها ,قصدى ان شاع الله ماتخديش غيرها .
بس انت عارفه اهى جت بفايدة بارضوا و جبتى شووز جديدة و متعرفيش يمكن اللى اتسرقت دى كانت تتقطع و انتى ماشية و ربنا يعوض عليك .
بس المره اللى جيه (ان شاء الله ميبقاش فيه مره جاية )ابقى خدى معاكى قفل و اربطى الشوز فى اى حاجه او ادينى رنه و انا اكون عندك فى ثوانى و بالذات انتى عارفانى في الطرق و الشوارع متوصاش

O S A M A said...

ههههههههههههههههههههههههه

انا كمان حصلتلى بس المشكله ان الكوتشي كنت لسه شاريه من اسبوع وفرحان بيه بقي
ودخلت جامع الفتح حطيته من هنا وصليت من هنا مفيش خمس دقايق ببص ملقتوش مكانووووو

بس كلمت اخويا جابلى شوز من البيت وجه احسن من التشريد بقي

ههههههههههههههههههههههههههه

بس حلو البوست

تحياتى

Unknown said...

ههههههههه
هو انت يا اسكندرانى قوى اللى حصلك الموقف ده اصل الستات فى الجامع حكولى عن اللى حصل معاك ده وقالولى انك لبست الزنوبه فى الزفه
تعيش وتاخد غيرها ههههه

Unknown said...

الله يسامحك يا ساره الهى ما يوقعك فى زنقه زى دى ابدا قادر يا كريم
متخفيش انا بقيت اخد شبشب زنوبه معايا استبن هههههه

Unknown said...

شكرا يا ا سامه على زيارتك للبلوج المتواضع
طيب احمد ربنا انك لقيت حد تكلمه يجيبلك حاجه ربنا ما يوقعك فى زنقه من دى :(

اسكندراني اوي said...

اشكر ليكي زيارتك
لمدونتي
وياريت بس اعرف تفاصيل الخبر الغريب اللي انتي قولتهولي عن ظهور مدونتي في احد الجرايد

ولو فيه ليها لينك ياريت تبعتهولي
اسف لازعاجك
اميلي
fisher.m.alex@gmail.com

و القادم....أجمل said...

ههههههههههههههه
ههههههههههههههههه

و الله مش قادرة امسك نفسي من الضحك
مش عارفه ليه اتخيلتك بالشبشب الكبير دا
ههههههههههههههههههههههه
ههههههههههههههههههههههههههههه

حصل خير يا بنتي
و بعدين الحكاية دي بقت معروفة
بجد حاجة تحزن جدا
يلا الحمدلله عدت علي خير

و كل مرة و انتي طيبة
:D

سندريلا said...

هههههههههههههههههههههههههههههه انتى سكر اوى اوى اوى وانا بدور على صورة بلى ايوم بلى احطها فى مدونتى اتلاقيت فى مدونتك سكمر اوى بجد والغريب انى بردة بموت فى بووو وحاطاها صورة ليا وعندى صور ليها كتير والاغرب انى وانا بفرا حاسة انى انا اللى بكتب فيكى كتير منى رغم انى لسة مش دوست اوى فى المدونة زيك بس كلامك خلاى اتشجع وادووووووووس بقى

انتى سكر اوى

اتمنى نزورينى هنا
http://sendrellatoday.blogspot.com/

helium atom said...

هههههههه


تصدقى ماصعبتيش عليا؟

بجد انا لو قابلت حد بلماضتك دى.. و اتحط فى الموقف دا اودامى مش حاقول حاجة غير "احسن"1

мσнη∂ιš said...

ايه يا بنتي انتي مسمعتش المثل العربي القائل: عادي في المعادي و كزلك في الزمالك
:D
بوست هايل و عقبال المرة الجاية
يالله سلام

شهووووده said...

ههههههههههههههههه.. اسلوبك هااااااااايل

yourfrindalex said...

هههههههههههههههه
موش مومكن ايه العسل ده انا موتت من الضحك بجد انتى موش مومكن
تعرفى حصلت معايا لكن شباشب ماتنفعش اخرج بيها وخرجت حافى ومشمر البنطلون وناكش شعرى ومطلع نص القميص بره ماسك بوصة فى ايدى وكل مااجى جنب حد اعمل انى ح اضربه يجرى من قدامى وركبت الترام ونزلت ركبت قطار ابو قير وروحت البيت امى اول ماشافتنى شهقت وقالت يالهوى اي ده مالك قلت لها انا اتجلاااااااااااااااابت وهنا افتكرتك ياسكر والمهم معايشة الفكرة للخروج من المقلب لان ولا تاكسى كان راضى يقف لمنظرى قلت لا كمل المصلحة دى وتحياتى
معلش احنا بنتكلم

Ahmed Fayez said...



فكرتيني بالذي مضى
حاجة غريبة قوي السرقة في الجوامع
من حوالي 3 سنين اتسرق مني الكوتشي في احد المساجد
كانت حوسة
الواحد يعمل ايه طيب!!
يروّح حافي؟؟
طب اروح اشتري كوتشي جديد ازاي؟؟
ما انا عاوز حاجة أروح بيها
و كانت العناية الالهية
خدت تاكسي لحد بيت واحد صاحبي قريب و خدت من عنده (سابوه) و روّحت بيه
اللي مضايقني ان الكوتشي كان جديد
..
بس مابقيتش استغرب
لان واحد صاحبي اتسرق و هو بيعمل عمرة
اتسرق في قلب الحرم
و عند الكعبة
الموبايل بتاعه اتسرق
..
الحرامية ما بقاش عندهم ضمير يا جدعان
!!!