Saturday 26 January 2008

يجعلك فى كل دعوة شغلانة




الدكاترة كانوا دايما يقولولنا إن الدكتور الشاطر لماح شاطر ودايما كانوا يشدونا من سماعاتنا مهي دايما فى ودانا و يفكرونا بالجمله دى ويحاولوا يشربوهالنا فى محلول معالجة الدماغ كانوا يقولولنا لازم تخلوا بالكم من العيان كويس اوى وتبصوله من فوق لتحت نظره فاحصه من وهو على باب العياده ده باعتبار ان ربنا هيكرمنا يعنى ونفتحها بعد عمر طويل قولوا يارب


العيان لازم تفليه من راسه لرجليه وتاخد بالك من كل كلمه بيقولها وكل نفس بيتنفسه وكل حركه بيعملها - بنتعب والله – وعليه خد عندك مثلا تدخل عليك العيانه من دول تقولك انا اسمى سوسو تعرف انها جايه تشتكى ان ضوافرها بتتقصف اما لو قالتلك ان اسمها ام محمود اعرف ان عندها لومباجو


لو العيان قالك انه ساكن فى قريه او اصله فلاح اعرف على طول وانت مغمض انها حاله بلهاريسيا اما لو قالك انه من المهندسين مثلا اعرف انك بتكشف على الحاله الغلط ودور هتلاقى القطه فى ايده بتنونو جنبه عشان عندها مغص اما بقى لو قالك انا الشعب يعنى لا هنا ولا هناك يبقى على طول دى حاله ضغط وقلب وسكر وهلم جرا
هبقى اقولكوا على الخبرات دى كلها فى احدى يوميات طالب الطب ان شاء الله

فى احدى حلقات الدرس العيانه دعت للدكتور وقالتله يجعلك فى كل خطوة سلامة قام الدكتور قالنا اخدتوا بالكم من الدعوه دى قلنا فى نفس واحد يا بختك حد يطول ست مبروكه زى دى تدعيله كده
قالنا بلاش نفسنه وركزوا معايا من الدعوة دى يا دكاترة نستنتج ان الحاجه دى جوزها بيشتغل سواق ومش اى سواق لا ده على عربيه لوري صح يا حاجه ؟؟
الحاجه ابتسمت وقالت ايوه انا اصلى متعودة ادعيها لجوزى كل يوم الصبح وهو نازل الشغل
الدكتور: اثبــــــت عندك والدليل قالوله




قمت انا بقى ايه بما انى بحلم ابقى دكتوره شاطره وطبعا لا تخفى عليكم نباهتى ومفهوميتى سرحت بخيالى كده اتخيل كل الدعوات وكل دعوة بمدلولها الوظيفى وحطيتها فى جدول عشان احفظها عن ظهر قلب ما انتوا عارفين برضه ان طلبة الطب حفيظه ويمكن اتزنق فيها فى امتحان ولا حاجه







انتبهوا ايها الساده اليكم الجدول الآتي بقائمة دعوات امهات مصريات لازواجها ومدلولها الوظيفى مقدمه اليكم على عرض حال دمغه



الهي يعمر بيتك
زوجة البنا

ربنا يكفيك شر المرض
زوجة الدكتور
ربنا يخبزلك الخير
زوجة فران

ربنا يطرحلك البركة ويفرجها فى وشك
( زوجة المهندس (طرح وجمع بقى وفرج من فرجار برجل يعنى

الهي ينصرك على مين يعاديك
(زوجة الظابط (اللى هما الشعب ولا مؤاخذه


يجعل فى وشك القبول ويحبب فيك خلقة
زوجة المحامي


الهي يرزقك من وسع
زوجة البقال


الهي يطعمك ما يحرمك
زوجة الطباخ

الهى يسترك ويكسيك ما يعريك
زوجة الخياط

الهى يحنن قلوب الناس عليك و يديك ما يستخسر فيك
زوجة الشحات

الهي ما تنضان ولا يجوع لك كبد
(زوجة الجزار (الضانى والكبدة مش محتاجه توضيح


الهي يبل ريقك ويسقيك من الحوض البارد
زوجة بتاع عصير القصب

الهي ما يرقدلك جتة
زوجة الحانوتي

ربنا ينورلك طريقك
زوجة الكهربائي

دايما حسك فى الدنيا
زوجة المطرب

يجبرك دنيا وآخرة
(زوجة مدرس الرياضيات (جبر وتفاضل وحساب مثلثات


ربنا يسهلك طريقك
زوجة السباك

ربنا يعلى مراتبك
زوجة المنجد

الهي يفتح في وشك الابواب المقفولة
زوجة حرامي خِـزن

ربنا يكتر من امثالك ويديك الصحة وطولة العم
ر
السيدة الأولى

73 comments:

سهر الليالى said...

هههههههههههههههههه

يا دماغ يا دماغ
فطستينى على روحى من الضحك
وجبتى كم الدعوات دة منين

بس بجد حلو اوى ما شاء الله
يعنى بعد كدة الواحد لازم يركز هو متجوز ايه ويختبر الدكتور عشان يشوف شطارتة
ههههههههههههه

تسلم ايدك
وربنا يجعلك فى كل خطوة عيان

تحياتى

فزلوكة said...

لأ بجد بجد جامدة ولذيذة وتحفة
يا بنتى أنا أول مرة أدخلك المدونة
بس عجبتنى جدا ..شكلى هقيم عندك
روحى إلهى يكفيك شر المرض!!!!!!!!؟؟
زهراء

3ala asm masr said...

ههههههههه
لاء نبيهه
اسمحيلى اخد ميل سعتك

Gid-Do - جدو said...

خدعوك فقالوا ان لماضة دكتورة وبتدى حقن ـ لكن البوست دة اثبت ان لماضة شحاتة محترفة على باب ام هاشم وخريجة كلية الشحاتة العليا بتقدير شحاتة ممتازة ـ بس خلاص دأنتى طلعتى فشنك وتستهلى الشوكولاتة اللى عمرها سنتين بتاعة البياعين السريحة فى مترو الانفاق

http://kasperb4.blogspot.com/ said...

لا حلوة بجد قاموس الدعوات ده
:D

MerMaid said...

ازيك؟؟
اول زيارة واول تعليق تقريبا
مش واخدة بالي قوي
:))عندي زهايمر
لازم بقي تتخصيي نسا وولادة زي ما خيخة قالت ولا انتي تخصصتي خلاص؟؟
:)
البوست هايل طبعا وجميل قوي زيك
تحياتي ليكي

عصفور المدينة said...

حلو أوي درس الفراسة ده

وفعلا كل من يتعامل مع الناس لازم يتحلى بالفراسة بس يكون عنده استعداد أحيانا إن فراسته تخيب
:)

Unknown said...

ههههههههه
زي العسل ماشاء الله عليكي
انا حبيت مدونتك اوى
ان شاء الرحمن ازورها دايما
ربنا مايبوظلك سماعه
ربنا ما يكسرلك حقنه
ويجعلك في كل خطوه عيان
...
ربنا يبارك فيكي ياقمر
اختك حطم القيود

اسكندراني اوي said...

ههههههههههههههههههههههههههههه
انتي مش ممكن بجد ايه اللي انتي كاتبااااه ده

حرام عليكي انا عيطت من كتر الضحك
روحي يا شيخه الهي يرزقك ما يحرمك قادر يا كريم

ibn_abdel_aziz said...

:)))))
اختي دكتورة برضة وبيدعولها كثير حسب مزاج الداعي

مرة واحدة ست دعتلها وقالتلها
يارب يرفع عنك الهم زي ما رفعتي عني الالم

دعوة رائعة
بحد

ربنا يكرمك ويوسع رزقك ويوريكي الطريق الصحيح في كل مناحي الحياة
امين

Anonymous said...

جميل قوي الدرس ده يا لماضه
ربنا يكرمك..بوست رائع ..
ربنا يعينك في المرحلة القادمة ويوفقك

خمسة فضفضة said...

السلام عليكم ورحمة الله وبركاته

لا حول ولا قوة الا بالله

اهي دي آخرة اللي يفكر يدخل كلية الطب

معلش يابنتي اكتر من كده ويزيح ربنا


ههههههههههههههههههههههههههههههههههههههه

عابد الرحمن said...

هههههههههههه
طيب كويس ان دعوت يجبرك دنيا واخرة
يا رب العالميييييييييييين
على فكرة نفسي اشوفك دكتورة كده حوووووووت زي اللي بعالج والدي عنده
بس مش تكوني رخمة زيه اصله يا ساتر بيضحك بالقطارة
والضحك بينزل على قطن يمتصه علطول نفسي اغرق وشه بتدين عشان اطهره من التكشيرة دي
سلامي ليك يا لمضة

son's egypt said...

السلام عليكم
بوست يموت من الضحك بصراحة
وربنا يزود ليكي مرضاك
ويزيد السكر والضغط زي ما زاد سعرهم

ياسمين حميد said...

هههههههههههههههههه
طيب لو واحدة دكتورة زوجها مهندس وأبوها ضابط كيف يكون دعاؤها؟
:-P

ساعد نسرين الايمن said...

بجد بجد ربنا يجزيك خير علي كل بسمة رسمته علي شفاه حد محتاج يبتسم
انتي دماااااااااااااااااااااغ عالية اوي
انا قرايت البلوج كله في قاعدة
وسبيت حساب العميل الزفت اللي كنت بشتغل فيه
لكن لازم استفيد من اكسير التفاؤل بتاعك ده وارجع اخلصه

تحياتي

أحمد جلال said...

ههههههههه..أنا بقالي سنتين في الكلية دي معرفش إنها حتقلب لكوميديا في السنين الجاية..يلا ربنا يوفقك وتفتحي عيادة كبيرة كده..و يكفيكي شر المرض.

مدونة كل العرب said...

ههههههههههههه
لماضة كتير مهضومة
وكمان صورة البروفيل كتير بتعقد وبتجنن
تحياتى

ابن حـجـر الـعـسـقـلانـى said...

ضحكتينى و الله

هو أنا معاكى فى دعاء السيدة الأولى الحتة اللى بتقول فيها "يديلك طولة العمر" .. لكن الجزء الأول بتاعها اللى هو "الهى يكتر من أمثالك" .. دة اللى مش ممكن تدعيه أبدا .. عشان دة ماينفعش يبقى فيه واحد زيه أبدا .. و لو أى بوادر ظهرت إن حد قرب يبقى زيه .. بيتشحن ورا الشمس كدة فى السريع اللديع

Desert cat said...

اجمل حاجه دخلت دماغى دعوة السيدة الاولى
بصراحة دى ست الستات علشان كدا بتدعى دعوة محصلتش
اما دعوتى انا
الهى ما يقطع لك وصلة
طبعا دى للنت

Unknown said...

بجد بوست هايل يطمنا على مستقبل الطب فى مصر
واضيفلك بقى
ربنا يجعل الصعبة فى ايدك ساهلة
مراة الحداد
ربنا يفتحلك الابواب المقفولة
مراة الحرامى
الهى ماتشوفش وحش
مراة مدون

Ahmed Al-Sabbagh said...

ههههههههههههههه

:))))))

هموت من الضحك

بجد انتى فظيعة

هههههههههههههههههه

طب طالما كدة

تعالى ليكى عندى تاج

تاخدية وتجاوبية مش عايزين تزويغ

بنفكر نروح المعرض يوم الجمعة القادم ؟؟

ايه رأيك ؟؟

منتظر رد التاج

رأيك يهمنا

تحياتى
أحمد

ابن رشد said...

ههههههههههههههههه
لذيذة بجد و لماضة بجد
طب خدي دول
الهي ما يتحذفلك بوست ( زوجة المدون ) الهي يخرب بيتك ( زوجة الريس ) حلو كدة على فكرة انا مهندس طيران مراتي تدعي باية

صوت من مصر said...

والله الحمد لله انا مفيش حد هيدعيلى
ولا هيدعى عليه

ana ga3an said...

بقي قلولكو ان الدكتور الشاطر هو اللماح
يعني نتخيل ان الجيل الجديد من الدكاترة هايعالج بالفهلوة
استر علي عبيدك يا رب

Unknown said...

سهر
هههههههه اختبري انتى جوزك بس وسيبى اختبار الدكتور امين يارب ما احنا بناكل من مصايب الناس نعمل ايه بس قدرنا
,,,,,,,,,,,,,,,,,,,,,,,,,,,,,,,,,,
فزلوكة
ماشىيازهرء بس خلى بالك الاقامة يوم واحد لازم تدفعي فزيته وهاتى معكى سرنجات وانتى جايه
,,,,,,,,,,,,,,,,,,,,,,,,,,,,,,,,,,,
على اسم مصر
خديه يا ستى ميغلاش عليكي انا اطول
,,,,,,,,,,,,,,,,,,,,,,,,,,,,,,,,,,,
جدوووووو
هههههههههههههههه قعدت اضحك لحد ما ماما جت على ضحكي طيب ايدك على اى حاجه من قدم شىءبيداه التقاه وهنيالك يا فاعل الخير فى انتظار الشوكولاته وربنا يرجعك بالسلامه يا حبيبى يارب
,,,,,,,,,,,,,,,,,,,,,,,,,,,,,,,,,,,
محمود الام وامال
الحمد لله انه عجبك خده احفظه بقى عشان همتحنك فيه
,,,,,,,,,,,,,,,,,,,,,,,,,,,,,,,,,,,
ميراميد
نورتينى طبعا فى اول زياره وان شاء الله مش اخر زياره بلاش نسا اصل صحتى على قدي والستات دول عاوزين عافيه
,,,,,,,,,,,,,,,,,,,,,,,,,,,,,,,,,,,
بابا عصفور
عشان بس حضرتك تعرف ان بنتك نبيهه من يومها ولو الفراسه خابت ممكن استعين بتوك توك
,,,,,,,,,,,,,,,,,,,,,,,,,,,,,,,,,,,
حكم القيود
امييييييين يارب ادعى اللهى يسترك خصوصا اخر حاجه دى
,,,,,,,,,,,,,,,,,,,,,,,,,,,,,,,,,,,
اسكندرانى اووووي
هههههههههههه امين يارب ربنا يجبر بخاطرك ويطرحلك البركة
,,,,,,,,,,,,,,,,,,,,,,,,,,,,,,,,,,,
ابن عبد العزيز
جامدة قوى الدعوة دى :)
انا واحده دعتلى ربنا يسترك دنيا واخره زى ما سترتينى سلملى على اختك جااااامد
,,,,,,,,,,,,,,,,,,,,,,,,,,,,,,,,,,,
دكتور خليفه
انت ايه اللى مقعدك هنا روح ذاكر:) معلش بقى عقدةالطفوللة بطلعها على اى حد لسه بيدرس ربنا يخليك كويس ان وصلك الدرس المستفاد جدع والله انا مبسوطه
,,,,,,,,,,,,,,,,,,,,,,,,,,,,,,,,,,,
دكتورة فضفضه
هههههههههه ادعيلى ربنا يخليكى باينلى لسعت حضرتك اللى فهمانى صح ربنا يستر :)
,,,,,,,,,,,,,,,,,,,,,,,,,,,,,,,,,,,
عابد الرحمن
لا متقلقش انا استاذهفى الضحك وفك التكشيره والغرز ههههههه هاتلى والدك ربنا يديه الصحه والعافيه يارب ويخليهولكوا
,,,,,,,,,,,,,,,,,,,,,,,,,,,,,,,,,,,
ابن مصر
هههههههه متقلقش هما زايدين خلقه عند المصريين كلهم ابعت يارب :)
ربنا يشفى ويعافى كل مريض امين
,,,,,,,,,,,,,,,,,,,,,,,,,,,,,,,,,,,
ياسمين حميد
دى معضلة بس ممكن تدعى تقول الهي ما يدخل المرض جسمك ويضاعف حسناتك ويجعلك منصور ومجبور الخاطر :)
,,,,,,,,,,,,,,,,,,,,,,,,,,,,,,,,,,,
دراع ياسمين اليمين
الله يكرمك فى قاعدة واحده ده كده العميل حسابه وقف ههههه ربنا يكرمك يارب ويكتر من حسباتك
,,,,,,,,,,,,,,,,,,,,,,,,,,,,,,,,,,,
احمد المصري
كوميدية ايه بلاش احسن خلينى ساكته هتكتشف لوحدك متقلقش بس نصيحه حاول تخليك بعقلك لاخر لحظه ربنا يكرمك يا احمد يارب وانا تحت امرك فى اى استشارة
,,,,,,,,,,,,,,,,,,,,,,,,,,,,,,,,,,,
حرية الفكر والابداع
ههههههه جميله قوى كلمة مهضومة دى ربنا يخليك دى مقابلها عندنا مش بينزلى من زور اتفضل الصورة والمدونة كلها تحت امرك
,,,,,,,,,,,,,,,,,,,,,,,,,,,,,,,,,,,
ابو العساقيييل
مهى خلى بالك دى بتدعي للدكتور لما تدعيله يكتر من امثاله تبقى ايه افهمها بقى يا حدق يجعل كلامنا خفيف عليهم :))
,,,,,,,,,,,,,,,,,,,,,,,,,,,,,,,,,,,
قطة الصحرا خربببببببببش
هههههه يعنى لو واحده قالت كده هعرف انها صاحبة سيبر روحى يا شيخه الهي يباركلك فى المزر بورد و ما يوقعلك ويندوز ابدا
,,,,,,,,,,,,,,,,,,,,,,,,,,,,,,,,,,
دغيدي
ههههههههههه طيب هكتبهم فى القاموس دول الهى ما يدخل المرض جسمك ابدا
,,,,,,,,,,,,,,,,,,,,,,,,,,,,,,,,,,,
خالو احمد
خلاص موافقه ان شاء الله انا هقول لبابا واذا كان كده هتشعلق فى اخر عربيه فى القطر واجيلكوا جري
التاج انا بمررهولك من دلوقتى
,,,,,,,,,,,,,,,,,,,,,,,,,,,,,,,,,,
شمس
ههههههه طيب ممكن تقولك الهى ما يوقعك فى مضيق والهي ما يقصقص ريشك
,,,,,,,,,,,,,,,,,,,,,,,,,,,,,,,,,,
صوت من مصر
مهو لو كنت اديتنى الشلن كنت دعيتلك الهي يديك ما يستخسر فيك
,,,,,,,,,,,,,,,,,,,,,,,,,,,,,,,,,,,
اسلام ابو المفاجيع
ههههههههههه جيل جديد بس والقديم وحياتك
مصر كلها ماشيه بالفهللوه والدراع
روح يا شيخ الهى يطعمك ما يحرمك

مي بهاء الدين said...

لماضة يامجرمة

روحي ياشيخة...وتعالي بسرعي
:)

Empress appy said...

طيب اعمل فيكى ايه ده تركيز عالى بس
اولا بسم الله ماشاء الله عليكى بجد ذكيه ولماحه
بس بقى قولى زوجة بتاع السمك والخضار بتقوله ايه الله يكرمك كده
بس انتى حفظتى كل الدعاوى دى منين انت فى مستشفى الحسين ولا ايه ههههههههههه

مروة الزارع said...

ههههههههههههه

هعهعهعهع

هههههههههههه

اية يابت يا لماضة

انا كل ما بدخل عندك فشتى بتعوم

ههههههههههههههههههه

انتى مشكلة

وحشاااااااااانى

Unknown said...

انتي مالكيش حل
وبقترح تاخدي جائزة سوزان مبارك في اللماضة

يا مراكبي said...

ههههههههه

حلوة دعوة السيدة الأولى دي .. تحفة بجد .. روعة

ههههههههه

أنا مراتي ما بتقوليش حاجة خالص .. حماتك يعني .. بدأت أشك في نفسي كده

NIDAAL .R said...

هههههههههههه
لماااااااضة
كيفك و كيف الجثث تبعك
يارب تكون الكلاوى و الحاجات دى بخير لسة ما اتشرحتش
بوست جميل اوى و ادعيلى انا كمان
رااااااااااااائع
دمتى و دام قلم يومياتك او ذكرياتك او كتاباتك
تحياتى
نضال

صالح سعيد said...

ربنا يباركلك فى بوستك
البوست بتاعك يعنى
دعوة مدون

raspoutine said...

لاء حلوة ودمها خفيف

tota_fm said...

معلش اتأخرت وعدت منى مواضيع كتير بس انتى عارفه الامتحانات استرها يارب
اولا يا ستى الف مليووووون مبروك على النجاح وليكى علبه شيكولاته مش شيكولاتيه واحده

البوست رائع كالعاده ومش قادره ابطل ضحك وبعدين ايه الدعاوى اللمضه دي بس كده الواحد اطمن عليكى بقيتى دكتوره شاطره قسم دعاوى
روحي ربنا يكرمك ويجعل على ايدك الشفا

S H A H said...

انا بقيت ادخل هنا عشان اضحك
انا شاكك في انك تكوني بنت اقصد مش ولد يعني

مفيش بنت سكر كدة

تقبلي مروري :)

بيتنا القديم said...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

بيتنا القديم said...

جمييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييل

بيتنا القديم said...

خصوصاً دي "الهي ما تنضان ولا يجوع لك كبد
(زوجة الجزار (الضانى والكبدة مش محتاجه توضيح"..........

مالكيش حل

دمك شربات
.
.
.
ايه ده

هو انا قلت شربات

يا خبر

اذن انا بتاع عرقسوس

(:

تحياتي يا اعسل العسلييين بدون البحث عن مهنة كلمة عسل..!!

(:

soma said...

ههههههههههههههه

تحفه وقعتينى من الدحك

بجد انتى عملتى الجدول دا ازاى؟؟

دا انا هطبعه واوزعه على كل صحابى اللى فطب يمكن يفلحو

مدونتك رائعه أول مره ازورها بس شكلها مش هتبقى أخر مره

Rain man said...

اللهم بطخه
عادل إمام :D

ايه الموضوع الجامد ده
و ايه كم الدعوات الهائل ده
اتكلي على الله و اشتغلى شحاتة بلا طب بلا كلام فاضى

white Angel said...

انتي سكره اصلا

وبوستاتك جميله زيك كدا بالظبط

ههههههههههههههههههههههههههه
بجد ضحكتيني من قلبي

تحياتي يا جميله

دنيتى الجميله said...

مش ممكن لمضتك دى
انا لما بحب اضحك وافرفش بدخلك على طول
وكل الدعوات دى جميله جدا
بس عارفه انا بحب جدا دعوه ربنا
يباركلك ويرجع لينا بالسلامه
وكلمه سمعتها من الاثر
نحن نحتمل الجوع ولكن لا نحتمل نار جهنم
ها عرفتى جوزى بيشتغل ايه
يلا اتلمضى

Unknown said...

تقولك انا اسمى ساوسو تعرف انها جايه تشتكى ان ضوافرها بتتقصف اما لو قالتلك ان اسمها ام محمود اعرف ان عندها لومباجو

هههههههههههههههه

و لا النكت الى فى الاخر دى ( ربنا يعلى مراتبك - مرات المنجد )
يخرب عقلك بجد ليا حقك احطك فى اى دمعةحزن لا انا فعلا عندك بخرج من مود النكد الى لازقلى لازقة تعبتنى اوى يا لماضة نفسى اسلطك عليه يمكن يخلى عنده دم و يمشى

Unknown said...

اه صحيح اشكريلى اخوكى الى خلانى استمتع بزيارتك تانى و ربنا يخليلنا جهازه

Dr. Kafy said...

بصراحة أنا اتعلمت منك كتير مع إنى متخرج من زمان و باشتغل بس أضافتي لى
و خدى عندك مثل

كم من صغير اتنشأ باس الكبير إيده

Unknown said...

مى بهاء
هههههه طيب حساب التاكسى عليكى
,,,,,,,,,,,,,,,,,,,,,,,,,,,,,,,,,,,
اببببى
هههههههه زوجة بتاع السمك اكيد بتقوله ربنا يهدي موجك ويرزقكك من وسع وحياتك الحسين ما فيه الدعاوي دي
,,,,,,,,,,,,,,,,,,,,,,,,,,,,,,,,,,,
مروه سلطة
ههههههه ابقى هاتى معاكى عوامة وانتى جايه وانتى كمان يا مرمر والله متخافيش انا متبعاكي والله
,,,,,,,,,,,,,,,,,,,,,,,,,,,,,,,,,,,
استاذ حساااااام مدرس الارياف
ياه والله انا مبسوطه جدا بوسام اللماضه اللى حضرتك ادتهولى ده شرط انت اللى تعلقهولى لما تبقى ناظر بلاش ماما سوزى
,,,,,,,,,,,,,,,,,,,,,,,,,,,,,,,,,,,
يا مراكبى
ليه يا حمايا كده هههههه طيب انا هوصى ماما عليك حماتى يعنى تدعيلك يجعل الخير من قسمتك
,,,,,,,,,,,,,,,,,,,,,,,,,,,,,,,,,,,
نضال
روح يا شيخ ربنا يكرمك دنيا واخره ويعدلهالك
,,,,,,,,,,,,,,,,,,,,,,,,,,,,,,,,,,,
صالح سعيد
روح يا ابو ادهم يكرمك ويجرى قلمك دايما
,,,,,,,,,,,,,,,,,,,,,,,,,,,,,,,,,,,
راسبوتين
الله يكرمك ده من ذوقك
,,,,,,,,,,,,,,,,,,,,,,,,,,,,,,,,,,,
توتا اف ام
الله يخليكى كفايه بس جيتك دى ربنا يقويكى يا قمر ويجعل الصعب فى ايدك سهل
,,,,,,,,,,,,,,,,,,,,,,,,,,,,,,,,,,,
شاه
الله يكرمك لا متقلقش بنت والله اعلم طيب اوعى تكتر الحلو غلط عليك :)
,,,,,,,,,,,,,,,,,,,,,,,,,,,,,,,,,,,
سمسم صاحب البيت القديم
هههههههه الله يكرمك لا انت كده بقيت المأذون
,,,,,,,,,,,,,,,,,,,,,,,,,,,,,,,,,,,
سوما ربنا يخليكى
ايوهخليهم يحطوا المنافستو ده معاهم احنا بنحب نخدم نورتينى يا قمر
,,,,,,,,,,,,,,,,,,,,,,,,,,,,,,,,,,,
رجل المطر
طيب ايدك على اى حاجه الهى ربنا يكرمك
ده العيال جاعنين عاوزه اجيبلهم عشا
,,,,,,,,,,,,,,,,,,,,,,,,,,,,,,,,,,,
الملاك البرىء الابيض
الله يكرمك يا ست الكل ده بس من ذوقك
,,,,,,,,,,,,,,,,,,,,,,,,,,,,,,,,,,,
دنيتى الجميله
يا كزوفى ليه الاحراج ده طيب زوج حضرتك اكيد حلوانى :)
,,,,,,,,,,,,,,,,,,,,,,,,,,,,,,,,,,,
عاليااااااا
لو كان النكد رجلا لقتلته بالتلاته الله يخليكى يا جميله روحي يا شيخه ربنا يفرح قلبك كمان وكمان
,,,,,,,,,,,,,,,,,,,,,,,,,,,,,,,,,,,
دكتور كافي
يا خبر ابيض ده شرف ليا يا افندم لا طبعا العين متعلاش عن الحاجب الا فى حاله واحدة
;)
ده حضرتك استاذى انا بس بحب اتلامض كده :)

Anonymous said...

دعوة من ولية ساعه مغربية

روحي يا لماضة إلهي ربنا يوفقك ويسعدك ويرزقك بابن الحلال اللي يستتك ويهنيك
يا لماضة يا بنت حوا وآدم

ربنا يوفقك وما يحرمناش من لماضتك

rainbow said...

ست الداكتورة !!0

موتينى من الضحك
مدونتك دى بجد عثل عثل عثل

روحى يا شيخة ربنا ما يزنقك فى اوتوبيس

ويبعد جيبك عن التفليس

ويرزقك بداكتور عريس

اولى يا رب !0

حبى ودعائى الصادق جدا

هدى

shahy said...

مش ممكن انتي مجرمة
رهيب والله رهيب
اية يادكتور الشطارة دي كلها
لأ صحيح لماحة يعني لماحة

تسلم ايدك ياست الدكتورة امتعتيني بحقيقي

تحياتي يالمضة

Doba said...

روحى يا لماضى الله يسامحك

قريت بوستك من يومين وكل لما اجى ادعى دعوة لحد اقعد افكر انا كده اللى قدامى هيفتكرنى مرات مين البقال ولا بتاع اللحمة ولا ايه

وكل لما افتكر امبارح اقع على روحى من الضحك الله يسامحك يا مرات ابنى

اما خليت ابنى يفقعك علقة سخنة
اصل هو شديد قوى مع الشغالييين بتوعه

نيهياهيايهاهاا

دمتى بكل لماضة
تحياتى
هبة

Marwa Friday said...

ههههههههههه
جامدة يا لماضة ..ههههه ايه الدعوات دي ..تحفة ! .. طيب والله موضوع يستاهل يتنشر في جرنال .. بلاش كسل وابعتي!ا

ربنا يجبر بخاطرك ..دي تنفع دكتور عظام ..مجبراتي بقى هههههههههه

مدحت محمد said...

رغم انى محامى والدتى مبتدعليش العوة خالص
الحاجة الوحيدة اللى بتقلهالى
الله يكون فى عونها يابنى
امها داعية عليها
هههههههه

WhatEver?!!! said...

هههههههههههههه موتينى من الضحك يا لماضة
بس بجد جاامد البوست

بس عندى ملاحظة مرات الحانوتى هتقولة ربنا ميرقدلك جثة

امال هتاكل منين

بس بجد لذيذ ميرسى يا قمر

مهندس مصري بيحب مصر said...

بوست جامد جداً
ههههههه
ربنا يكرمك و يجازيكي خير و يفرحك زي ما فرحتي ناس كتير كده

على فكرة سير / آرثر كونان دويل مؤلف شخصية شيرلوك هولمز
ألفها تشبهاً بأستاذه في كلية طب الذي كان له فراسة رهيبة
و ببصة واحدة على الشخص ممكن يحكي تاريخ حياته تقريباً

يعني الموضوع ده قديم من ايام شيرلوك هولمز و الدكاترة بتعمل كده
:)
أنا موافق على نزلة المعرض يوم الجمعة و ليا كلام تاني مع الصباغ

Rosa said...

هههههههههههههههههههه
فظيعه يا لماضه
انتي يا بنتي متأكده انك خريجة طب
و لا كان في كورسات في السيده نفيسه و لا ايه يا بنتي
سكر بجد يا لماضه
ربنا يجعلك في كل خطوه عياان
:D

فرنسا هانم said...

الهى يفك ضيقتك
زوجه صراف فى البنك
ربنا يجعلك فى كل خطوه سلامه
زوجه حرس الشرف
تحياتى لكى وللماضتك
ويارب اشوفك دكتوره صاحبه اكبر عياده

Ahmed Al-Sabbagh said...

لماضة

انا مش لاقيكى على الفيس بوك تهتى منى

انا بليد اوى فى الفيس بوك

انا بعت لك ميل

اوك شوفى وردى عليا

Unknown said...

العنقاء
الله ايه الدعاوي الجميله دى يسمع منك ربنا ومحرمنيش منك
,,,,,,,,,,,,,,,,,,,,,,,,,,,,,,,,,,
استاذه هدى
يااااااااااااااااااارب
,,,,,,,,,,,,,,,,,,,,,,,,,,,,,,,,,,,
شاهي
الله يخليكى الحمد لله انى عرفت اخليكى مبسوطه والله دى احلى حاجه عندى
,,,,,,,,,,,,,,,,,,,,,,,,,,,,,,,,,,,
حماتى دوبا
ههههههههه ليه كد بس يا حماتي كل يوم علقه ده انا بحبك وبموت فى ابنك
وماله ضرب الحبيب
,,,,,,,,,,,,,,,,,,,,,,,,,,,,,,,,,,,
مروه جمعه
يا رافعه من رحى المعنويه جرنان ايه بس
يابنتى هواحنا قدك خلينا كده جنب الحيط
هههههه مجبراتى ربنا ما يكسرلك خاطر
,,,,,,,,,,,,,,,,,,,,,,,,,,,,,,,,,,,
دوحة
هههههههههههه مش انت لواحدك انا بابا وماما برضه بيقولولى نفس الكلمه
,,,,,,,,,,,,,,,,,,,,,,,,,,,,,,,,,,,
whatever
هههههه لا مهى بتدعى للدكتر بقى ربنا يخليه امال مين هيعالجها دى كده بتكرمه يعنى مش عاوزه تسترزق من وراه
,,,,,,,,,,,,,,,,,,,,,,,,,,,,,,,,,,,
بشمهندس مصرى اصيل
الله يكرمك شيرلوك هولمز وكونان كمان انا بعزهاوى الحقيقه بس اول مره اعرف ال معلومه دى على كده انا وصلت للعالميه
ربنا ييسر فى نزولة يوم الجمعه ادعى بس الجو يتحسن
,,,,,,,,,,,,,,,,,,,,,,,,,,,,,,,,,,.
روزا
ههههههههه كانت غلطه الكليه دى الحمد لله ربنا خرجنى منهاعلى خير اه والله متخرجه من طب اسكندريه بس باينلى الكليه جابت معايا العكس
,,,,,,,,,,,,,,,,,,,,,,,,,,,,,,,,,,,
فرنسا هانم
ههههههههههههه يا خبر ابيض على الدعوات الجامده والله لولا كسلى كنت عملت تحديث وحطيت الدعوات دى باسمك
ربنا يخليكى ليا
,,,,,,,,,,,,,,,,,,,,,,,,,,,,,,,,,,,
صباغ
وصل وعلم وينفذ

Anonymous said...

بصراحه يا دك انا طول عمرى بقول عليكى لمضه بس بجد بوست عبقرى ودعوات رائعه وبجد أتمنالك كل التوفيق والنجاح وحياه عمليه رائعه ان شاء الله

مع تحياتى دكتور هيرو

د/اجدع بنوته said...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه


مش ممكن .. هموت م الضحك

يافقريه يافقريه

شكرا اكيد هينفعونى انا كمان

وانا باخد الهستورى

هههههههههههههههه

Unknown said...

هيرو
االله يكرمك يا دوك
ربنا يارب يعديك منها على خير

,,,,,,,,,,,,,,,,,,,,,,,,,,,
اجدع بنوته

ههههههههه ايوه سجلى عندك كله بينفع

هوندا said...

هههههههههههههههه جميله اوى بجد ابداع ابداع يعنى

Unknown said...

هوندا
الله يخليك
ده من ذوقك

الفارس الملثم said...

حلوة الدعوة الاخيرة ومتنسيس كمان كمان دعوة ربنا يسهلالك ويبعد عنك ولاد الحرام

طيب لو افترضنا ان الدعوةدي من السيدة الاولي

ياتري هي بتقولها لمين وتقصد مين بولاد الحرام

علي فكرة مدونة جميلة اوي ومفيش احسن من اللماضة بس اهم حاجة تبعدي عن اللماضة مع .......يجعل كلامنا خفيف عليهم

الفارس الملثم said...
This comment has been removed by the author.
و القادم....أجمل said...

هههههههههههههههههه
هههههههههههههههههههه

حلو بتاعه المطرب دي
ههههههههههههه

كتكوته طلعي كتاب و الله
حاولي تحوشي و تطبعيه
و الله هيكسر الدنيا

ربنا يزود من لماضتك يارب
بس دايما في الخير
و اسعاد الناس

تحياتي و حبي

:)

غازى said...

السلام عليكم

أولا : مدونتك جميلة جدا جدا جدا من هنا لحد سور الصين العظيم

ثانيا انتى ينفع تشتغلى رائدة فضاء , ودا لأسباب معينة إن شاء الله أقوللك عليها بعدين

ثالثا : بخصوص البوست دا بالذات فانا عايز أسأل سؤال :

مين قاللك إن السيدة الأولى بتدعى لجوزها وتقوللـه : ربنا يطول فى عمرك ؟؟

السيدة الأولى بتدعى لجوزها حسب الظروف بمعنى : إنه لو كان رايح البرلمان بتقوللـه : إلهى ينصرك على من يعاديك
دا على أساس إن المعارضه اللى فى مجلس الشعب يجيلها شلل

أما بقى لو كان رايح مشوار صد رد زى أمريكا - فؤنسا - ألمانيا - أو أو أو فبتدعيله وتقول : روح إلهى يوقفلك ولاد الحلال , دا على أساس إن احنا اللى ولاد حرام

ما علينا


المهم إن المدونة أكتر من رائعة وخفة دمك اللى ماشفتهاش قبل كده بتخلينى أتجرأ وأطلب إننا نكون أصدقاء ..

وربنا يوفقك


غازى

Unknown said...

الفارس الملثم
هههههههه ربنا يستر بقى وشكرا على الشهاده الغاليه دى ربنا يخليك
,,,,,,,,,,,,,,,,,,,,,,,,,,,,,,,,,,,
والقادم اجمل
ههههههه كتاب ايه يابنتى طول ما الطب ورانا كل سنه وانتى طيبه ربنا يخليكى يا ولاء
,,,,,,,,,,,,,,,,,,,,,,,,,,,,,,,,,,,
غازي
الله يكرمك
ايه كمية الدعوات دى
خلينا ماشيين جنب الحيط
ضحكتنى اوى والله
يجعل كلامنا خفيف عليهم
وشكرا على كلامك الجميل دى شهاده غاليه ربنا يكرمك
واكيد اصدقاء باذن الله

همااااام said...

السلام عليكم يارورى
جمييييييييييييييل اوىىىىىىىىىى
ماما قريتها معايا وماتت من الضحك
قولتلها دى ملروه اللى انتى شفتيها
مكنتش مصدقه نفسها ان يطلع منك كل ده

بارك الله فيك

انسان وبس ! said...

السلام عليكى
على فكره ده اول تعليق ليا فى المدونه بتاعتك
وعايز اقولك ان المدونه_ صاحبتها_ هايله جدا، وقمه فى اللماضه
بس هو انتى كده فى الحقيقه ؟
يعنى لمضه

صمت المشاعر said...

هههههههههههههههههه

ههههههههههههه

والله حاجه اول مره اخد بالي منها

شكرااا ليكي علي لفت الانتباه لهذه الدعوات

Ahmed Fayez said...



حلوة الدعوات دي
من ألطف الحاجات اللي الواحد بيقابلها
و يمكن بتخفف عنه هموم و متاعب الوظيفة
هي دعوات المرضى و أهليهم
بتحسس الواحد انه بيعمل حاجة
انشالله حتى يسمع العيان و يخليه يفضفض
و يقوله ألف سلامة عليك