Thursday, 3 July 2008

بحلم معاك




وصلني بالبريد المستعجل تاج غالي قوي
التاج ده لحد دلوقتى مش عارفه اكتب فيه إيه لأنه باختصار يستاهل يتكتب فيه عمر بحاله وكل حاجه حلوة ممكنه
بس اللي اقدر أقوله انه تاج جميل من إنسانة أجمل أكيد عرفتوها إيمان اللي عماله تشخبط على كل حيطان المدونات
التاج عبارة عن مجموعة أحلام أنا هرغي كتير ليه ندخل في المفيد ونجيب من الآخر


بسم الله توكلنا على الله


السؤال الأول


خمسة أحلام كنت بحلمهم في الماضي


لو حصرتهم في عدد خمسة أبقى كدابة كبيره ولو كتبت حاجه قبل حاجه أبقى اكبر بكاشة عرفتها البشرية
اقدر أقول في منها كتير أتحقق الحمد لله ولسه بيتحقق
صحيح مكنتش أحلام عظيمة قد ما كانت بسيطة وكنت بقول لنفسي لما احلم حلم صغير ويتحقق أحسن لما احلم حلم كبير يطّلع عيني وميتحققش وساعتها اقصر فوق قصري
بس الحلم الكبير الوحيد اللي حلمته ومازالت بحلمه هو
الجنة


السؤال التاني يا خفي الألطاف نجنا مما نخاف


خمسة أحلام بحلمهم للمستقبل


شبشب بوردة وكيس عسلية
إيه حكاية رقم خمسه ولا انتوا بتغزوا العين إذا كان كده ماشي يبقى أجاوب التاج على عروسة واخرمها
طيب بعينكوا مش قايلة إيه هي الأحلام دي
حاكم الحاجات دي بتتنظر فعلا

ندخل على اللي بعده السؤال التالت وإذا جاوبته ما بدك شيء راح تخسره


شخصين موجودين في حياتك وكنت تتمنى وجودهم


إيه ده انجليزي ده يا مرسي ازاي موجودين وأتمنى وجودهم مهم موجودين وإذا لم يوجدوا فمن أين سأتمنى وجودهم حد فهم حاجه ولا أنا
بس موجود وأتمنى يدوم وجوده هو والدي مهو أكيد ربنا يديله الصحة يارب وطوله العمر موجود في حياتي وإلا كنت جيت منين ولا أنا لقيطة مثلا


السؤال الخامس والأخير لو جاوبته غلط هترجع للنص جنيه


شخصين مش موجودين وتتمنى وجودهم في حياتك


الإجابة من غير لماضة أول شخص هو حبيبي رسول الله عليه أفضل الصلاة والسلام
الشخص الثاني وهو زوجي لو كان في العمر بقيه وعشت لحد ما أشوف اليوم ده


خلص التاج وسكتت لماضة عن الكلام المباح نعمل بقى العقاب المتعارف عليه في مثل هذه البوستات وهو اننا نحدفه للناس دي


البت مروة صحبتي الانتيخ
مهندس العدة بتاعتنا قلتكوا مش هسيبو في حالو
دفعتي دكتور حر

وكعقاب رادع وفعال لكل اللي اتلامضوا في الـ 100 تعليق في البوست اللي فات
تحديث هااام
اولا التاج ده بمرره لخالي و خالنا كلنا ابو المخاليل الصباغ
ثانيا يا جماعه والله انا مقصدتش اهرب من الاجابه بس فعلا كل يوم بصحى فيه بيتولد باحلامه الجديده وانا بحب اعيش كل لحظه أجمل لحظه بحلوها ومرها وبقول اكيد بكره احسن ان شاء الله واللى كان نفسي فيه النهارده مين عارف قادر ربنا يحققهولي بعدين
غلبتكوا صح ;)

22 comments:

فاتيما said...

يا سلاااااااام
إيه الأجابات الأونطة دى
فين الأحلام يا ست هانم
إيه يا مرمر
و لا حلم غير الجنة
طب ربنا يكتبهلنا جميعاً
بس فين الأحلام الدنيوية ؟؟
إيه النظام يعنى
طيب
عموما
أنا بتمنالك كل اللى بتحلميى بيه و اللى إحنا معرفنهوش يتحقق
و أكتر حلم نفسى فيه فى تاجك دا
أنى أشوفك عروسة و منورة الكوشة
قريب بقى و تفرحينى
عشان أقول حد من عيالى فلح
أهو
بوسة على خدك يا حبيبة ماما
يا طعامة

إيمان said...

لألألألأ يا لموضة
انا كده مش هديكى أعمال السنة
زى ما بعمل فى العيال عندى فى الكلية

كده تخمينى فى التاج يا لموضة
ماشى اول تاج بردو هيجنى مش هعتقك

بس والله الجنة دى مش حلم قليل
لأن مفروض فى كل عمله بنعمله يكون
هدفنا بيه الجنة ربنا يكتبها ليا وليكى ولجميع المسلمين

أما عن أحلام المستقبل ماشى يا لموضة
من غير ما تفسرى نتمنى ليكى فيها الخير
وربنا يكرمك لأنى حاسكى حد كويس
وربنا هيكرمك إن شاء الله

ويرزقك بابن الحلال واشوفك عروسة بس يارب يكون قاهرى عشان اعرف احضر فرحك
يإما هتجيبلى طيارة مخصوص تاخدنى

ويخلي لك والدك ويديله الصحة

يااااه ده أنا طولت أوى
بس اه صحيح اية حكاية الشخبطة على حيطان المدونات....تلاميذى يقولوا عليا

تحياتى وحبى

Ahmed Al-Sabbagh said...

ههههههه

كويس عشان اغش منك

وبردة تمررية لبتاع العدة وتسيبى الخال الكبير

اخسسسس

ده ما كنش عيش وايس كريم

وشاورما بايظة

هئ هئ

خالو

مش فاكر said...
This comment has been removed by the author.
اسلام الحضرى said...

لماضه لماضه يعنى

انا من مكانى هذا اعلن انى مفهمتش حاجه

صاحب المضيفة said...

اجباتك دبلوماسية قوي المرة دي

مش عارف ... انا حسيت بكده وخلاص


لكن على كل حال


على الرغم من دبلوماسيتها


رايقة برضو



تسلم الايادي

HelSiNg said...

الحمد لله معلقتش على التدوينة الاخيرة :)

على فكرة انا لسة منزل الحلقة وشايفها

ما شاء الله كنتى منورة فعلا

وحاجة كويسة اوى انك اتكلمتى فى سلبيات الكلية والمهنة
ان شاء الله دايما صوتك مسموع

تحياتى

ayman badr said...

لأ لأ اجابات اونطة فعلا على رأى فاتيما
خدتينا فى دوكة كالعادة
بس ربنا يوفقه وتبقى امه داعياله اللى هيتجوز دكتورتنا لماضة
تحياتى

البت قباحة said...

ايه يا بت الالوظة دى؟
بتالوظينا و فين البهاريز هو بس كدة

شبشب بوردة ايه و عسلية ايه بس
الله يرحم جزمتل اللى اتسرقت و كتى ماشيه تلقى فى شبشب كان هيبلعك .... دلوقى حليت الشباشب

يا رب توحى الجنة عشان الواحد يحلف ان فى حد يعرفوا هناك. اصل انا كدا كدا لابسة فى النار. ابقى بس زورينا

عارفة هخش النار ليه؟؟؟؟؟؟؟؟؟

عشان هقعد عليكى افتسك عشان لبستينى فى التاج ده

يالا سلام و اشوفك الاربع فى الطوارئ و تتنايلى تقلبيها داى عشان مش هقعد لوحدى انا

abo salah said...

بعد السلام عليكم

أيه دا يا لماضة
كده فبركتى التاج
دا انتي يابنتي هربتي من نصه بصنعة لطافة
ولا هيا لماضة يعني ؟؟

عامة ياستي ربنا يحققلك كل أحلامك
ويرزقك الجنة وأيانا أن شاء الله

تحياتي

دعوة للأمل said...

ربنا يحقق لك أحلامك
تحياتى

أحمد كمال said...

يعني اتلامضتي و ماقولتيش حاجة ، مافيش فايدة ، أنا متهيألي إنتي التاج اللي ينفع معاكي لازم يكون لمض و يكون بالإكراه .

بس برضه أتمنى لك تتحقق كل أحلامك اللي قلتيها و اللي ماقلتيهاش :)

عايز أتعلم said...

ماشي يا لماضة

الجنة حلم عظيم ..بس فين اللي تتمنيه في الدنيا وتسعي لتحقيقه
بتكروتينا

ماشي يافتانه ..اقوللك متقوليلهوش ..تقوليله وتقولي بهدي النفوس ..ماشي انا مش زعلان برضو ....هههههههههههه


ابقي زورينا كده ..مش تفتني ومتسأليش كمان...سلام

همس الاحباب said...

ههههههههههه
كل ده احلام
والله كتر خيرك
بس بجد حلوة قوى بحلم بشبشب بوردة وكيس عسلية
طب شبشب ماشى على اعتبار انك حافية وممكن تستخدميه بعد الجواز
بس العسلية ايه لزومها
مش خايفة على طقم الاسنان
هههه
تحياتى يا دكترة

يا مراكبي said...

كل دي بوستس قاتتني؟ ده أنا الريدر بتاعي كان مخرف بقى

وبعدين سيبك من البوست بتاع الأحلام ده .. المفروض إنه ما يتمررش للماضة علشان الإجابات هتبقى أخر لماضة ده إذا كان فيه إجابات

فاتني موضوع الضفادع .. وكنت عايز أعرف إذا إشتغلتي على حاجة تانية أكبر من الضفادع وألا لأ؟ زي الصراصير مثلا؟

وفاتني موضوع الحديث التليفيزيوني .. ده إنتي إتصيتي جامد .. بس ما جيبتيش يعني سيرة المليون عريس اللي إنتي حاجزاهم من أولاد المدونين؟

أما بقى حكاية الجواز من دكتورة .. فأنا هأحتفظ برأيي لنفسي أحسن

مش أحسن برضه؟

blue-wave said...

الللههه
اجاباتك تحفه بجد
ربنا يكرمك

فرنسا والرايق said...

انا عليا الشبشب ابو ورده يا دكتوره
ربنا يحققلك احلامك
واقدر اجبلك كيس العسليه كمااان

mostafa rayan said...

ربنا يحققلك كل احلامك
بخصوص بوست تحب تتوز دكتورة عايز اقولك تسلملنا كي بوردك انا ماقدرتش امسك نفسي من الضحك
ربنا يوفقك يا لماضة

لماضة said...

ماما فاطمة
مش اونطه ولا حاجه هبقى اقولك في ودنك عشان بتكسف اميين يارب يسمع منك
,,,,,,,,,,,,,,,,,,,,,,,,,,,
ايمان
اي خدمة يا مون مون محركمتكيش من حاجه اهو ههههههه اجابات ولا اخر لماضة
ربنا يكرمك ويرزقك يا جميله يارب
,,,,,,,,,,,,,,,,,,,,,,,,,,,
الصباغ
ايه ده يا خال انت بتسيحلي ولا ايه اعملك ايه اذا كان حظك كده كلنا اكلنا وانت اللى حظك طلع في الحمضان فقري بقى ههههههه
,,,,,,,,,,,,,,,,,,,,,,,,,,,
اسلام الحضري
ليه بس يا حضري ده انت اسمك غالي علينا حتى
,,,,,,,,,,,,,,,,,,,,,,,,,,
صاحب المضيفه
نعمل ايه طيب الطبع غلاب قصدي اللماضه تتعوض المره الجايه مش رايقه ولا حاجه والله ده انا مطحونة فعلا وبجد مصدقت جاوبت عشان خاطر ايمان رغم انها متعتبرش اجابه يعني
,,,,,,,,,,,,,,,,,,,,,,,,,
هيلسينج
اه هربت من التاج معلش تتعوض ربنا يخليك ده من ذوقك
,,,,,,,,,,,,,,,,,,,,,,,,
ايمن بدر
ههههههه بس واضح ان مفيش و لا ام دعت لابنها لحد دلوقتى بدليل ان مفيش حد جه انا مش مستعجله الموضوع ده يجي على مهله بدل ما يتعتر في السكه ويتجبس وميجيش خالص
,,,,,,,,,,,,,,,,,,,,,,
مروة مدحت
طيب بعينك مش هقلب مواعيدي وهسيبلك دراكولا تعذبك في الطوارىء عشان تحلفي بايامي في النبطشيات ههههههه
,,,,,,,,,,,,,,,,,,,,,,
ابو صلاح
فينك يا راجل بجد بجد ليك وحشه حمد لله على سلامتك يارب تكون بخير بجد مبسوطه بتعليقك قوي
,,,,,,,,,,,,,,,,,,,,,
دعوة امل
ربنا يخليكي ويحققهالك يارب
,,,,,,,,,,,,,,,,,,,,,
استاذ احمد كمال
ههههههه متوجدش لسه التاج ده متقلقش
ربنا يخليك ويحققلك احلامك
,,,,,,,,,,,,,,,,,,,,
خليفه
هههههههههه ايوه قلتله انا قلتلك هقوله بس احكيلي عمل فيك ايه ؟؟؟
ربنا يوعدنا واياكم الجنة
,,,,,,,,,,,,,,,,,,,,,,,,
همس خالد
بقى كده يا ابو همس انا حافيه القدمين على راي كاظم وطقم سنان كمان انت عرفت كل اسراري هههههه
,,,,,,,,,,,,,,,,,,,,,,,,
حمايا يا مراكبي
هههههههه لا متقلقش قولت بس في الكواليس اصلي بتكسف ههههه الحلقة الجايه من الضفادع اوعى تفوتها عشان تعرف عملت فيا ايه الكلام ده حصل بجد على فكره
,,,,,,,,,,,,,,,,,,,,,
دكتور عمرو فاروق
ربنا يخليك يا افندم من بعض ما عندكم
,,,,,,,,,,,,,,,,,,,
فرنسا والرايق
يا الف نهار ابيض بجد منورني ومنورين المدوانات اللى حواليا
لولا اني عندي افلاس فكري اليومين دول كنا عملنا شغل جامد قوي معاكم
بس اديكوا على العربون كيس العسلية زي ما اتفقنا
,,,,,,,,,,,,,,,,,,,,,,
مصطفى ريان
ربنا يخليك يا مصطفى ويرزقك يارب بس مش بدكتوره اكيد :))

عاليا حليم said...

(الشخص الثاني وهو زوجي لو كان في العمر بقيه وعشت لحد ما أشوف اليوم ده )

ده يا بخته ده ... حبعيش فى سعادة و هنا من اللماضة الى حيستمتع بيها كل يوم
:)

واحدة مفروسة said...

ايه يا دكتورة ده كله
كل ديه احلاااام
يالهوي
كله كوم و كيس العسلية ده كوم لوحده
اهو ده حلم صعب اوي انه يتحقق
ههههههههههههه
كيس عسليه؟؟؟؟؟!!!!!

لماضة said...

عالياااااااا
يادي الكسوف يا ولاد
ربنا يرزقك يا عاليا يارب باحسن الناس وافرح بيكي واحضر فرحك
,,,,,,,,,,,,,,,,,,,,,,,,
واحدة مفروسة
ليه بس مش صعب ولا حاجه المشكله الوحيده اني مبقاش فيا شنان اكل عليها العشليه