Sunday, 20 July 2008

جائنا التاج التالي



وصلني التاج ده من دكتورة منوسي على الايميل لولا بس انها غاليه عندي واسمها غالي عليا كمان اصله بيفكرني باسمي قلت خلاص لازم نجاوب


من أنت؟
لماضة والأجر على الله خريجة كليه البوستة في طنطا اعمل حاليا امتياز مقيم وغدا لناظره قريب طبيب مقيم على ما تفرج


وكنت تحب تكون حد غير نفسك؟
لا بصراحه كل اللى يجيبه ربنا كويس ده امر ربنا ودي خلقته اللهم لا اعتراض الحمد لله انها جت على قد كده شدة وتزول


بتدون ليه - امتى - لمين وفين؟
ليه ؟ عشان اتلامض معاكوا امال هتلامض مع نفسي يعني
امتى ؟ الساعه 2 الضهر على نص كوبري قصر النيل
لمين ؟ بدون عشانك يا مصر وعشان ترابك الزعفراني اللى بيدخل جوه عيني
أنا لا ممكن أبدا أنسى جمايلك عليا
النيل رواني والخير جواني
فين ؟ ايه التوهه دي أكيد هنا في دكانة لماضة ليس لنا فروع اخرى وخلي بالك من العلامة
بإختصار بدون عشان أكتب حاجه مبيحكمهاش زمان ولا مكان حصلت في زمن وآن لها الأوان تتنقش من غير حسبان


منظر أو موقف مش قادر تنساه عمرك؟
راجع مدونة لماضة كلها وركز كويس عشان هيجي منها سؤال في الامتحان


أمنية شبة مستحيلة نفسك تتحقق؟
ربنا كبير قادر على كل شىء يا ياخده يا ياخده محدش يفهم غلط أنا اقصد الفقر اللي قاعد على قلبنا وبعدين معاكوا عيب كده طويل العمر يطول عمره وينصره على مين يعاديه


تحب تكون مكان حد مشهور ؟مين ؟ وحتعمل ايه وقتها؟
لا انا متواضعه أحب اكون مكان بسم الله يجعل كلامنا خفيف عليهم
مقدرش انطق اسمه بيجيلي حشرجه وبفقد بعدها حواسي التسعه
هعمل ايه ساعتها العمل عمل ربنا بقى اكيد مش هعرفكوا
لا انا هجيبكوا تقعدوا معايا كمان


شايف مستقبلك إزاي ؟
عبد الحليم الله يرحمه شافهولي من وانا لسه في بطن الحاجة أم لماضة
قالي روح يابني طريقك مسدود مسدود يا ولدي مسدود اصلهم لسه مكنوش يعرفوا نوع الجنين يدوبك قال يا ولدي من هنا واتكل من هنا كان فيه شىء لله وفعلا كبرت وفهمت السبب لقيت المجاري ضاربة في الشوارع ومسدودة قمت لفيت من الناحيه التانيه اصلهم قالولي خليك حدق وأمشي جنب الحيط قمت طلعت احدق منهم ومشيت على الحيط نفسه
ولا مؤاخذة مبخفش دلوقتى غير من ربنا وحاجه واحده بس ضرب الجزم أصلي عقبال أملتكم أترقيت في الشغلانه وبقيت باشصرصار قد الدنيا


تختار زوجتك /زوجك عل أي أساس؟ المال /الدين/الجمال/ المستوى الأجتماعي ؟
بس يجي وبعدين يحلها حلال متبقوش قطاعين أرزاق


امتى يكون الحب أعمى؟
لما تتواجد حلة المحشي حيث ثبت بالدليل القاطع على أنها اقصر الطرق


شايف الدنيا إزاي؟
دنيا خربانه ياعم خربانه لا ده الراديو معلش صوته عالي قولولي السؤال كده تاني اصلي مسمعتوش


صفة أو عمل جميل نفسك نشاركك فيه؟
مشروع عصير قصب خالي من الزعازيع واصدره لدول الخليج واحتكره سعره يطلع مع سعر البترول وكل ما يغلوا البترول كل ما احرمهم من عصير القصب ويا الدفع يا زعزوعه لكل مواطن


التاج ده عجبني بصراحه عشان كده همرره لكل الناس اللى هتتلامض معايا وأولهم
ماما فاتيما روح قلبي
البت مروة صحبتي الانتيخ
دكتور عمرو فاروق
كبير العيله الخال احمد الصباغ
أختي وحبيبتي اللدودة مروة جمعه
واحلى تحيه للباشا اللي نور التدوين كله عمرو الطاروطي
بوبي حبيبة قلبي وخرفانها جاوبي يا آبي احسن ما ادبح خرفانك على العيد
وصديقي الصدوق صالح سعيد جدا جد
ا

وأستاذ العربي حسام ابراهيم


43 comments:

bad credit unsecured loan said...

You have a very impressive blog.


bad credit unsecured loan

عمرو الطاروطي said...

مروة هانم

الأسئلة دي من برة المقرر
بس أوعدك
هحاول أكون صادق بدرجة معقولة
انتي عارفة طبعا الغسيل المش نضيف لما بيطلع برة، الصورة مبتبقاش تمام

تحياتي لأجمل مروة في الدنيا

بطوط حبوب said...

صباح اللامضه فى اجاباتك بجد
هتصدرى زعازيع قصب

انتى كده هتحلى ازمه ال..... اممممممم
مش عارف بس هتحليها
وعلى فكره هى ازمه جامده اوى ربنا معاكى

دعاء مواجهات said...

اية دة التعليق التالت

حلو بردو معنى كدة ان فية امل

ولسة معلقة عند الرايق الاول لا بجد فية تقدم

__________________

دعاء مواجهات said...

دا انتى طلعتى شرقاوية أصيلة بقى

ومصاحبة كل الدستورجية حبايبنا

السيناريوهاتى منهم والمزنوق فى التعليم

والنبى ياختى تسلميلى ع الواد عمرو الطاروطى

يابختك ياعم تاج تحفة بجد واجابات زى العسل والله دمك عسل

ومتنسيش تسلمىع صالح هو كمان دا احنا عشرة عمر مع الشرقاوية اسأليهم نفر نفر نفراية نفرااية..

دعاء مواجهات said...

اما بقى البت مروة جمعة

ارزعيهالى بوووسة جاامدة طحن مووت

البت دى جدعة اوى بجد

وزى العسل

دا بغض النظر طبعا عن تطنيشها الغير متعمد لموبايلى

اوعى تنسى بووسة جاامدة طحن بقوول

كلهم بجد ونعم الصحبة وعلا بركات لو تعرفيها بردو نفس البوووسة

وسلااامى لموقف الزقازيق وسيارات الأجرة

ولعم حسن بتاع السميط

وتيتا وبابا وجدو من خالوا وعمو وأنكل..

وبس كدة

رئيس جمهوريه نفسى said...

طويل العمر قاعد فى الملاعب لحد ما يبورها ولو هو مشى اختار الخليفه بتعته

همس الاحساس said...

هههههههههههههههه

الصراحه اللماضه مش طبعى بسى بدال قلنا نتلامض يبقى نتلامض منا من الشرقيه برده


يا بنتى طويل العمر .....يجعل كلامنا خفيف عليه

خربها وقعد على تلها خلاص

متحوليش لانه نزل رجليه وبيقول الى ليه حاجه يورينى نفسه

لا تقولى مجارى ولا شوارع ولا رغيف عيش

ده انا سمعت كمان هيكون فيه ضرايب على البيوت

انا منى وحده هعطيه البيت واعيش بالشارع واقوله ادفعلى انت الضرايب

تسلمى يا قمر

تقبلى مرورى

الطبـيـبـه الأديـبـه said...

السلام عليكم ورحمه الله وبركاته

اقوللك حاجه يا لماضه ..انا كل اما اكون زهقانه ادخل على مدونتك علطول مش عارفه مجرد ما بقرأ العنوان مش ببطل ضحك ،،
أضحك الله سنك وأدام لك روحك المرحه هذه
ربنا يوفقك
السلام عليكم

لماضة said...

bad credit unsecured loan
thx my blog is ur home lol but who r u plz
,,,,,,,,,,,,,,,,,,,,,,,,
عمرو باشا الطاروطي
جاوب بكل صراحه يا باشا ولا يهمك عاوزين المستخبي يبان
,,,,,,,,,,,,,,,,,,,,,,,,,
بطوط حبوب
ازمة ايه ؟؟؟؟؟؟؟؟؟
متوديناش في داهيه
,,,,,,,,,,,,,,,,,,,,,,,,,
دعاء مواجهات
ازيك يا بت انا مش شرقاوية ولا حاجه اسكندرانيه بحروايه سعادتك
بس بحب اهل الشرقيه دول وبموت فيهم واولهم الناس العسل دي
هسلملك عليهم حاضر
انتي استلمتي التعليقات لحسابك يابت
هدفعك اجره على المطرح اللى اخدتيه
,,,,,,,,,,,,,,,,,,,,,,,,,,
السيد رئيس الجمهورية
بلاش نجيب في سيرة الاسياد هههههههه احسن دول بيطلعوا بالليل
,,,,,,,,,,,,,,,,,,,,,,,,,,,
همس الاحساس
يابنتي بلاش الكلام ده الواحد جتته مش خالصه كده ممكن نروح في داهيه كلنا ونقفل الدكانه
,,,,,,,,,,,,,,,,,,,,,,,,,,,
اجمل طبيبه اديبه
وعليكم السلام ورحمة الله
ربنا يكرمك انتي اللى زي العسل ومدونتك بجد شىء رائع ومشرف
ربنا يكرمك يا قمر وتبقى احسن دكتورة واديبه كمان

حنين.. said...

يعنى يوم ما تحلمى بمشروع تعمليه او تشاركى فيه, تحلمى بعصير القصب, طيب تعالى وانا هشغللك على محل العصير اللى على اول شارعنا, والله انتى زى العثل, ولو من الشرقيه....... فالشرقوه احسن ناس وانا بحبهم اوى, ولو من طنطا فأنتى جنبى , نبقى جيران.. الا هو انتى منين؟ تحياتى

شفقة هانم واحسان بك said...

مبروك الف مليون مبروك على التاج يا قمر بجد تستاهليه
شفقة

مهيج الجماهير said...

اجاباتك جميلة قوى
بس معلش اسمحيلى أسألك سؤال برة المنهج
هو انتى متعودة مترديش على التعليقات ؟؟
مقصدش البوست ده
اللى قبله و تقريبا اللى قبله
و برضه رغم كدة بيعجبنى اسلوبك جداً جداً جداً
تحياتى ليكى
سلام

لماضة said...

حنين
هههههه لا عصير القصب في مصر مبيجيبش فلوس لكن بره عمله صعبه انا يا ستى من كفر الدوار يعني نص اسكندراني ونص بحرواي ولا من طنطا ولا من الشرقيه بس انا بحب البلدين دول جدا
تحياتي يا جميل
,,,,,,,,,,,,,,,,,,,,,,,,,
ميسز شفقه هامن ومستر احسان بيه
ههههههههه هو شقه يا شفقه ولا ايه مسيري اوقعلك واحد في وسط البلد
,,,,,,,,,,,,,,,,,,,,,,,,,
مبهج الجماهير
لا والله ابدا غير مقصودة مني
كتير بقعد اكتب التعليق وبعد ما بكتبه النت بيعمل معايا الدنيئة ويقطع ويضيعها وبكتئب بعدها والاكتر الجهاز بتاعي الله يرحمه مش مساعدني فعلا اني افتح اكتر من صفحه في نفس الوقت وغالبا انا مش بدخل الا وقت قليل جدا ما قبل النبطشيات او بعده وفي كلتا الحالتين بيكون غصب عني مش عندي وقت ارد مش تناكه والله لان فيه تعليقات ببقى هموت وارد عليها
وعموما يا سيدي اديني رديت هات ربع جنيه بقى

د.دغيدى said...

مشروع عصير خالى من الزعازيع
هى دى اخرتها
يالا اهو يكسب اكتر من الطب برده

appy said...

اخص عليكي مش عيب كده عاااااااااااا
طيب انتى سوسه وبتجاوبى زي العسل انما انا حرااااام يا بنتى عاااااااااا
وبعدين بطلى الاسفين من تحت لتحت انا بجبها وش لما هطلع على مارينا هههههههههههه


المهم يا حبيبى الشنطه بدايتها 100 جنيه بس انما دعوه امل بتهزر وانا شيلت الكومن لو عجباكى حطي سعر
اوك اللى فى بيكيا

blue-wave said...

ماشى يا مروة
مااااااااااااااااشى
منك لله يا بعيدة
دا تاج تدبسينى فيه؟؟

يا مراكبي said...

هو إنتي بتتمني إن الفقر اللي كابس على نفسنا بقى له 27 سنة إنه يزول بعد العمر ده كله؟

عموما الفقر له أولاد .. واللي خلف ما ماتش

خدي بالك المدونات متراقبة .. هتجيبيلنا الفقر كده

لماضة said...

دغيدي
هههههههه الايد البطاله قصدي ايد الدكاتره اهي احسن من قعدتنا على القهوه
,,,,,,,,,,,,,,,,,,,,,,,,,,,,
ابي
طيب جاوبي يا بوبي وبلاش لماضة متخافيش هحصلك قوليلي عاوزه سندوتشات ايه
ايوه الشنطه عجباني هشوف لسه الاب توب في طريقه الي واشوف شنطته ايه نظامها لو طلعت شنطته اي كلام هبعتلك اقولك
,,,,,,,,,,,,,,,,,,,,,,,,,,,,,
دكتور عمرو فاروق
هههههه اي خدمة يا سيادة النايب
,,,,,,,,,,,,,,,,,,,,,,,,,,,,,
يا مراكبي
هههههههههههههههه كده برضه يا حمايا انا هموت من الضحك
انت عاوز تودينا في داهيه ولا ايه
تهون عليك مرات ابنك
متقلقش انا محصنة المدونة

صاحب المضيفة said...

كالعادة

لماضة فوق العادة

ولماضة بلا حدود


منتظرين المزيد


تحياتي

Bongo said...

هههههههههههههههه

حتي في التاج بتتلامضي كل اللماضة دي :D

فى القلب said...

عسسسسسسوله

استمتعت وأنا أقراء التاج و ردودك ألى مليانه لماضه وحياه

صالح سعيد said...

مساء الورد
ازيك يا مروه
عامله ايه
يا رب تكونى بخير
كعادتك لمضه متلامضه فى اجابتك
روحك حلوه بجد
تمنياتى لكى بالتوفيق
تحياتى

maryooom said...

اولا انا اسفه افتكرتك الصورة حطاها جديده بس شكلك حطاها من زمان اووووي وبعدين كنت فكراكي ولد اول ما قريت الاسم بس مش مشكل بقي واحد برضه
اجاباتك لمضه يا لماضه

حبيبـــــــة القمـــــر said...

ايه يابنتي اللماضه دي كوووووولها
تصدري عصير قصب طب ونسيتي الطريق المسدود وطويل العمر اللي مش هيسيبك الا لو خد نسبه
ولا بلاش هو مالوش في القصب كفايه
عليه الززززززززززززززززززززززززززززززززززززز الكيبورد علق
هههههههههههههههه
تحياتي للماضتك العسل

dr.roro said...

السلام عليكم
ازيك يا لموضة
مش عرف ارد أقول ايه بس عسل عسل عسل

ربنا يكرمك يارب ويرزقك بواحد كدة لمض زيك علشان يبقي بدل لماضة أس واحد تبقوا لماضة أس اتنين

صباح الصباح said...

لماضة
عجبتنى اوى ما شربتش من نيلها.. جتهم نيلة البعدا.. ما تفهمونيش غلط انا اصدى الناس الوحشة اللى مش بتقول يعيش يعيش يعيش!!
تحياتى وعاوزين كمان بوست جديد

سومه...مجنونه فى بلد عاقل said...

قصب فعلا رؤيه مستقبليه هايله ....ولعلمك انتى كدا دكتوره ناصحه تجيبيلهم السكر وتعالجى
زى بتوع الكاوتش اللى بيرمو منسامير قدام محلاتهم...:))
زى العسل واجابات جميله تسلمى
تحياتى ليكى سومه_87

مؤمنه said...

السلام عليكم ورحمة الله وبركاته
جزاكى الله كل خير على الاجابات التى افادتنا كتيــــــــــــر
ربتا يوفقك وتلاقى ابن الحلال وقبل كده الحقى نفسك واتعلمى طريقة المحشى
ومشروع عصير القصب لو ما فيهاش رزاله ممكن اشاركك فيه ما تفتكريش انى دخله على طمع علما بان دخله كبير
بس اصل انا بحبه اولى
انتى تعصرى وانا هشرب
هههههههه
اول مرة ادخل المدونه شدتنى اوى صورة البروفيل الكرتون دى بحبه جدا
شكلها كده مش هتكون الاخيره
دومتى بكل خير
والسلام عليكم ورحمة الله وبركاته

واحد من زمن الرسالات said...

ياتري سبب اختيار اسم لماضة هو شخصية لماضة اللي في فلاش
موضوع دمه خفيف

alexandrany said...

امتى يكون الحب أعمى؟
لما تتواجد حلة المحشي حيث ثبت بالدليل القاطع على أنها اقصر الطرق

مش لما تعرفوا تتعملوا محشي الاول وبعدين تتكلموا عليه
هههه

لماضة said...

صاحب المضيفه
طيب دعواتك معانا :)
,,,,,,,,,,,,,,,,,,,,,,,,,,
بونجو
اي خدمه يا بانجو يابني بتسطل على اسمك ده
,,,,,,,,,,,,,,,,,,,,,,,,,,,
قي القلب
ربنا يخليكي
,,,,,,,,,,,,,,,,,,,,,,,,,,,
صالح سعيد
ربنا يخليك ياباشا
المهم متاخدناش في دوكه وتجاوب على التاج
,,,,,,,,,,,,,,,,,,,,,,,,,,,,
مريوم
فعلا الصورة من اول ما بدات مغيرتهاش ده حتى الناس بقت مسميه البنت لماضة بدل بوو ههههه
بس ولا يهمك متغلاش عليكي
نورتيني يا جميل
,,,,,,,,,,,,,,,,,,,,,,,,,,,,
حبيبة القمر
ههههههه طبعا يا بنتي انا عامله للمشروع دراسة جدوى كمان
,,,,,,,,,,,,,,,,,,,,,,,,,,,,
دكتورة رورو
ازيك يا قمرايه عامله ايه
انتي اللى زي العسل والله انا بفرح لما بشوف تعليقك عندي
,,,,,,,,,,,,,,,,,,,,,,,,,,,
صباح الصباح
شكرا يا جميل وصبح صبح
صباحك فل
,,,,,,,,,,,,,,,,,,,,,,,,,,,
سومة
ههههههههه كده برضه تفضحينا وتكشفي المستور دايما قارشة ملحتي كده وفهماني
ماشي يا سمسمه
,,,,,,,,,,,,,,,,,,,,,,,,,,,
مؤمنة
ربنا يخليكي الصورة والمدونة وصاحبتها تحت امرك
وتنوريني اي وقت وربنا يرزقك يارب انتي كمان
,,,,,,,,,,,,,,,,,,,,,,,,,,,
واحد من زمن الرسالات
لماضة دي اسم اطلقه عليا بعد المعارف وزمايلي وطبعا لماضة فلاش في دمي منكرش
نورتني
,,,,,,,,,,,,,,,,,,,,,,,,
اسكندراني
كده برضه تشكك في قدراتي
الله يسامحك
طيب ارجع مصر انت واحنا نعملولك اجدعها حلة محشي مشكل

همس الاحباب said...

هههههههههه
انا شغال ببعت تعليقات ومش عايزة تظهر ليه بقى ممكن اعرف
المهم
انا مت على نفسى من الضحك
ايه يابنتى خفة الدم واللماضة دى كلها
واول ما تشطح تنطح ولا ايه يا دكترة
عايزة تقعدى مكان عمو جيمى ولا ايه
ينفع كده
انا من النهاردة لااعرفك ولا تعرفينى
روحى يا شيخة وتعالى بسرعة
بجد ربنا يسعدك ويوفقك دائما
تحياتى اختى العزيزة

همس الاحباب said...

طبعا اللى على على
وبين من الذوات لا مش ذوات الاربع لاسمح الله
مبروك على اللاب توب
ومبروك على....
يلا سلام يا لماضة

سبهللة said...

دمك شربات
لا تعليق

أحمد كمال said...

إيه يا مروه ده ؟ أنا أول مرة أقرأ تاج كله لماضة بالشكل ده ، لأ دي مش لماضه و بس ، دي لماضة و دم زي العسل بجد ، يعني أنا بازهق من اللماضة لما تبقى برخامة كده أو بزن ، لكن لماضتك بصراحة محتاجة تتسجل فيديو ، و أحب أبشرك : حاتودينا كلنا في داهية قريب جدا إن شاء الله .

تحياتي

لماضة said...

همس خالد
هههههههه امال مين اللى هيجيبلي سندوتشات الشاورمة غيرك
,,,,,,,,,,,,,,,,,,,,,,,,,
سبهلله
والله انتي اللى سكر ده من ذوقك
,,,,,,,,,,,,,,,,,,,,,,,,
استاذ احمد كمال
هههههه ابشر عن قريب ان شاء الله

L.G. said...

ايه الماضة دي
بس المعنى في كرش الشاعر قريته

الصورة اكتر من جميلة

لماضة said...

اي جي
ربنا يخليكي استري عليا
الصورة دي اهداء من احمد مبارك

L.G. said...

ولو أني أتألم كثيرا وكان المفروض أخليها أي جي بس الاسم ال جي زي بتوع التليفزيون والغسالة

أتمنى أقابلك على مج نسكافيه مش انت اسكندرانية ؟؟

لماضة said...

ال جي
هههههههه معلش والله عندي الغلطه دي
موافقه جدا طبعا مدام فيها كابتشينو
يلا بينا
عاوزه تقابليني فين وامتى

Anonymous said...

dear dr/Lamada
very happy cos i speak to you
your blog is very interesting
loughing deeply from my heart
also your friends are funny
i hope to be 1 of ur friends
society, policy and peoples those who i care with
with my best wishes
dr/Blogger

Anonymous said...

GOOOOOOOOOOOOOOOOOOOOOO
22222222222222222222222
HILLLLLLLLLLLLLLLLLLLLL